post

A Diverescola de Íntegro entrou nas aulas de infantil do CEIP de Bormoio-Agualada cargada de xogos e diversión

No Día Internacional das Persoas con Diversidade, varios usuarios/as da entidade foron, xunto á súa monitora de ocio e tempo libre, os encargados/as de conducir os obradoiros dirixidos aos máis cativos/as

Con motivo da celebración do Día Internacional e Europeo das Persoas con Discapacidade, celebrado o pasado luns, a asociación Íntegro quixo achegar aos máis pequenos/as a realidade das persoas con diversidade funcional a través dunha nova edición da Diverescola, unha iniciativa de carácter didáctica incluída no programa Capacíta-T, encamiñado a concienciar ao alumnado de educación infantil en materia de diversidade e inclusión. Desta volta,  varios usuarios e usuarias da nosa entidade desprazáronse, acompañados/as da monitora de ocio e tempo libre Lucía Blanco, ata o CEIP de Bormoio, en Agualada (Coristanco), para celebrar unha xornada de sensibilización na que non faltou o xogo e o entretemento.

Nesta ocasión, Dora, Luisa e Fran foron os encargados de dar a coñecer a un grupo de nenos e nenas de 3, 4 e 5 anos auténticas leccións de vida e superación a través das súas propias experiencias. As actividades, adaptadas á idade dos/as participantes, comezaron a primeira hora da mañá cun conto moi ameno e ilustrativo titulado “Por cuatro esquinitas de nada”, no que se aborda a diversidade como un elemento enriquecedor da sociedade, afondando na idea de que todos e todas somos únicos e diferentes.

O momento máis divertido chegou cando tocou pasar á acción e poñer a proba a súa habilidade e destreza. E o certo é que non se lles deu nada mal! Todos os/as participaron superaron, e con nota, un circuíto de mobilidade no que tiveron que realizar un pequeno percorrido collendo varios obxectos cos ollos tapados para poñerse así na pel das persoas que sofren discapacidade visual. Facer un sándwich cunha soa man e realizar un debuxo con diferentes partes do corpo sen empregar a man que usan habitualmente, foron outros dos exercicios acadados con éxito e cos que deron exemplo da súa gran capacidade de empatía. Ao longo da mañá, os cativos/as aproveitaron para preguntarlle aos nosos usuarios/as polo seu día a día facendo gala dunha gran naturalidade e espontaneidade. 

 

 

 

 

 

 

Desde Íntegro queremos agradecer a participación de todos os centros educativos da Costa da Morte neste proxecto co que se pretende promover unha aprendizaxe en valores e unha aposta pola educación inclusiva dende a infancia.

post

3 de decembro, Día Internacional e Europeo das Persoas con Discapacidade

Con motivo do Día Internacional e Europeo das Persoas con Discapacidade, instaurado pola Organización de Nacións Unidas (ONU) e a Unión Europea, a escala mundial e europea, e que cada ano se celebra o día 3 de decembro, desde Íntegro, e como entidade membro de COGAMI queremos trasladar o seguinte:

MANIFESTO

As mulleres e os homes con discapacidade que residen en áreas e zonas rurais constitúen un grupo de poboación numeroso (que supera en Galicia as 100.000 persoas e no conxunto de España ascende ao millón) con índices de exclusión social moito maiores e carencia de apoios e recursos en relación á poboación urbana con discapacidade, o que supón unha presión constante e crecente para abandonar este medio. As persoas con discapacidade e as súas familias deben ser consideradas como axentes clave na transformación do medio rural nunha contorna inclusiva, na que todas as persoas poidan despregar o seu potencial humano.

Reclamamos a necesaria aprobación dunha Estratexia Estatal de Desenvolvemento Rural Inclusivo, con enfoque de xénero e transversal, que posibilite a participación, acceso a dereitos e benestar social, das persoas con discapacidade e as súas familias, favorecendo o seu arraigamento e a continuidade en contornas rurais que actualmente corren perigo de despoboamento e abandono. Todo iso con arranxo ao marco de referencia da Convención Internacional sobre os Dereitos das Persoas con Discapacidade e os Obxectivos de Desenvolvemento Sustentable das Nacións Unidas.

É preciso promover o empoderamento das mulleres e nenas con discapacidade residentes no rural, de forma que ningunha quede atrás. Un desenvolvemento rural inclusivo non pode entenderse sen a dimensión de xénero, que baixo un enfoque interseccional, teña presentes e dea resposta ás necesidades das mulleres e nenas con discapacidade residentes no medio rural, as máis invisibles, actualmente sometidas a índices máis elevados de exclusión, pobreza e violencia, así como das mulleres coidadoras de persoas con discapacidade.

 

As políticas públicas deben potenciar a xeración de novos xacementos de emprego no mundo rural, incluído o emprendemento, que permitan a súa transformación e a creación de riqueza e emprego inclusivo de calidade.

Cómpre adecuar a lexislación vixente ao financiamento de medidas e servizos dirixidos a dar atención ás persoas con discapacidade no medio rural, de forma que se poidan impulsar medidas especiais para evitar a migración e desarraigo do rural.

É determinante a coordinación e o traballo en rede entre entidades- plataformas- institucións representativas da discapacidade e das persoas en risco de exclusión e do desenvolvemento rural dirixidas a atender as necesidades das persoas residentes no medio rural, así como deseñar e implantar apoios e recursos de promoción e atención ás persoas con discapacidade e ás súas familias.

Debe deseñarse unha estratexia conxunta entre as distintas instancias, estruturas, plataformas e entidades na loita contra o despoboamento do medio rural, que mitigue a presión constante á que se ven sometidas as persoas con discapacidade e as súas familias para abandonar o campo e trasladarse de modo non querido a zonas urbanas. O movemento CERMI, do que COGAMI e as súas entidades membro forman parte, achegará ao Foro Nacional de Despoboamento o enfoque do sector social da discapacidade en relación coas estratexias contra o despoboamento do medio rural.

Cómpre dispor de estudos, investigacións e análises estatísticas, sociolóxicas e económicas que permitan coñecer a realidade das persoas con discapacidade e das súas familias residentes no medio rural para sustentar a futura estratexia nacional de desenvolvemento rural inclusivo que reclamamos con urxencia aos poderes públicos.

post

Mención Honorífica para Íntegro polo seu labor de promoción do voluntariado

  • Foi durante o transcurso do XX Congreso Estatal de Voluntariado celebrado o pasado xoves en Expourense
  • Esta mesma semana, a Fundación Mapfre tamén seleccionou á entidade como unha das dez beneficiarias da I Convocatoria de Axudas a Proxectos Sociais de ámbito nacional

Esta semana a asociación Íntegro está de parabéns e por partida dobre. E o motivo non podía ser máis gratificante e honroso para todos/as os/as que formamos parte desta gran familia: o fomento e a promoción do voluntariado. O pasado xoves 29, a nosa entidade foi distinguida cunha Mención Honorífica concedida ás entidades de acción voluntaria de Galicia.

 

A directora do Centro de Recursos, Noelia Barreira, e a educadora social, Tania Bartucca, foron as encargadas de recoller o galardón xunto aos compañeiros/as doutras entidades sociais que están a traballar no desenvolvemento e promoción de accións encamiñadas a fomentar o voluntariado. A entrega de premios tivo lugar no recinto feiral de Expourense, no seo do XX Congreso Estatal de Voluntariado celebrado os días 28 e 29 deste mes baixo o lema Enlazateaovoluntariado.

 

Fundación Mapfre

Pero esta non foi a única boa nova que nos deixou a semana. A Fundación Mapfre vén de facer pública a relación de entidades premiadas na I Convocatoria de Axudas a Proxectos Sociais, posta en marcha a través do seu programa #Sésolidario. Entre os máis de 100 proxectos presentados a nivel nacional en materia de nutrición, saúde, educación, emprego e inclusión social, a nosa entidade figura como unhas das dez asociacións galardoadas, sendo a única ademais de Galicia. Pero este recoñecemento ten un valor engadido xa que todas as propostas foron presentadas polos propios voluntarios da Fundación. Un feito que nos enche, máis se cabe, de orgullo e satisfacción.  

Esta iniciativa, pioneira en España, está dirixida ás asociacións que desenvolven o seu labor en favor dos colectivos máis desfavorecidos e, no noso caso, centrado especialmente na inclusión social e laboral das persoas con diversidade funcional da Costa da Morte a través do noso Centro de Recursos, de Día e Ocupacional. O importe total das axudas concedidas nesta primeira convocatoria ascende a 90.000 €, que serán distribuídos entre todos/as os/as beneficiarios para contribuír así a un mellor desenvolvemento dos seus obxectivos, tarefa na que tamén participarán activamente os propios voluntarios da Fundación Mapfre. Unha colaboración económica e humana que, sen dúbida, nos permitirá seguir traballando para acadar unha sociedade máis xusta, digna, solidaria e igualitaria. Grazas!

post

Alumnos/as da escola unitaria Torrexallóns de Laxe participaron nunha xornada de sensibilización en Íntegro

Durante a visita, os/as cativos tiveron a oportunidade de elaborar xabóns de glicerina e pulseiras de macramé xunto aos usuarios/as da entidade

Un grupo de alumnos e alumnas de infantil da escola unitaria Torrexallóns de Laxe achegouse esta semana ata as nosas instalacións de Nantón para participar nunha nova edición do programa Visítanos, co que se pretende sensibilizar aos máis pequenos en materia de diversidade e inclusión. Tras unha distendida charla, protagonizada polos nosos usuarios/as e monitoras, na que se abordou o significado destes conceptos, realizaron unha visita polo centro, xunto á directora Noelia Barreira, para coñecer de preto o seu funcionamento e o traballo que se desenvolve nos diferentes talleres.

Sen dúbida, os obradoiros de artes manuais foron os que máis chamaron a súa atención. Despois dunha breve explicación sobre o proceso de elaboración dos nosos xabóns de glicerina, todos/as se animaron a probar facendo cadanseu deseño. A fabricación de pulseiras de macramé tamén espertou a curiosidade dos nenos e nenas, que non quixeron marchar sen aprender esta divertida e sinxela técnica.

Na sala de ximnasia puxeron a proba a súa habilidade e destreza con diversos xogos, que lles serviron para comprobar a dificultade de realizar labores cotiás desde unha cadeira de rodas. Ao remate, os/as estudantes empregaron toda a súa creatividade e imaxinación na realización dun mural no que plasmaron as súas impresións sobre a xornada vivida no centro e no que, a bo seguro, non deberon faltar palabras como diversión e aprendizaxe. Grazas a todos/as!

post

Íntegro sae á rúa para esixir que se garanta a accesibilidade nos edificios de vivendas

Foi durante a concentración organizada esta mañá en Santiago por COGAMI xunto a compañeiros doutras entidades sociais e na que o noso presidente participou activamente durante a lectura dun manifesto

Dentro da campaña de sensibilización “A miña casa non é o meu cárcere”, promovida pola Confederación Española de Personas con Discapacidad Física y Orgánica (COCEMFE), un grupo de usuarios/as de Íntegro desprazouse esta mañá a Santiago de Compostela para participar  na concentración organizada por COGAMI na Praza do Obradoiro para poñer en coñecemento de toda a cidadanía a importancia da accesibilidade nos edificios de vivendas. Este acto formou parte da 37 manifestacións simultáneas postas hoxe en marcha en 37 cidades do país de 15 comunidades autónomas co obxectivo de denunciar que milleiros de persoas con mobilidade reducida non poden saír á rúa con autonomía nin, polo tanto, levar unha vida independente.

Acompañando aos nosos usuarios/as e monitoras, tamén estivo o presidente de Íntegro Adolfo López Baña, que participou na lectura dun manifesto para facer fincapé en que se leven a cabo reformas integrais nas vivendas porque “un edificio accesible é un dereito para todas as persoas e non podemos facer que a accesibilidade dependa dos recursos económicos da cidadanía” ao tempo que asegurou que “a realización das obras que garantan o acceso ás persoas con mobilidade reducida é un investimento xusto e necesario porque, ao fin e ao cabo, ninguén sabe se nalgún momento da súa vida vai necesitar destas adaptacións”.

Os datos

Ademais das persoas con discapacidade orgánica, en España hai 2,5 millóns de persoas con mobilidade reducida que precisan de medios de apoio para desprazarse e levar unha vida autónoma. No último censo de vivendas, só o 22,9% dos edificios eran accesibles e tan só o 0,6% dos 10 millóns de estudos de vivendas de España cumpre coa regulamentación. Pero os atrancos van máis alá xa que 63% dos edificios non son accesibles da rúa ao portal por contar con escaleiras nesa zona e o  64% dos edificios carecen tamén de caixas do correo accesibles dende unha cadeira de rodas. Unhas cifras desalentadoras que non convidan á esperanza. 

O acto celebrado hoxe en todo o país pretende sumar esforzos para modificar a Lei de Propiedade Horizontal e que sexa de obrigatorio cumprimento a realización de reformas de accesibilidade solicitadas por persoas con discapacidade ou maiores de 70 anos. Así mesmo, tamén se demandou a concesión de axudas concretas a todas as comunidades veciñais que deban afrontar este tipo de actuacións, ante o elevado custe que supón a súa implantación. O compromiso das administracións públicas e de toda a cidadanía é fundamental para preservar un dereito que afecta á sociedade en xeral.  É responsabilidade de todos/as!

post

O director xeral de Inclusión Social garante o seu apoio a Íntegro a través do programa Avanza Inclusión

Foi durante o transcurso da visita realizada esta mañá aos centros de Día e de Recursos para comprobar in situ a boa marcha dos novos proxectos de inserción socio-laboral impulsados pola Xunta de Galicia

Esta maña recibimos a visita do director xeral de Inclusión Social, Arturo Parrado Puente, que se achegou ata Nantón para coñecer de primeira man o desenvolvemento dos novos programas de inserción socio-laboral que se están levando a cabo no centro, promovidos pola Consellería de Política Social para os anos 2018, 2019 e 2020, e co-financiados polo Fondo Social Europeo (FSE) no marco dos programas operativos FSE Galicia 2014-2020. Así mesmo, o responsable autonómico aproveitou a ocasión para realizar un exhaustivo percorrido polas nosas instalacións xunto ao presidente de Íntegro Adolfo López Baña; a directora Noelia Barreira;  a traballadora social e coordinadora dos proxectos Sandra Reimúndez e os nosos usuarios/as, que exerceron de excelentes anfitrións/as.

No transcurso da visita, Arturo Parrado tivo a oportunidade de comprobar in situ a evolución de dous novidosos proxectos postos en marcha, de maneira simultánea, hai xa algúns meses, co obxectivo de mellorar a empregabilidade daqueles colectivos sociais máis desfavorecidos.  Trátase dun curso de preparación de competencias Clave e a posta en marcha do programa Avanza Inclusión, este último destinado preferentemente a persoas con diversidade funcional e que sexan mulleres, prioritariamente. Ambas iniciativas están co-financiadas pola Xunta de Galicia e o FSE cunha aportación económica que ronda os 80.000 €.

Durante a xuntanza mantida cos representantes de Íntegro, o director xeral destacou o importante labor que está a desenvolver a entidade en favor das persoas con diversidade da Costa da Morte ao tempo que garantiu a continuidade do apoio da Xunta de Galicia para a posta en marcha de futuros proxectos de carácter social. Pola súa banda, Adolfo López Baña, agradeceu a colaboración do goberno autonómico e subliñou que “o respaldo institucional neste tipo de accións é clave para lograr avanzar no camiño da inclusión social e na consecución de proxectos futuros que posibiliten a accesibilidade no marco social, laboral e persoal”.

Aproveitando a súa estancia no centro, o titular de Inclusión Social percorreu, unha a unha, as diferentes salas do centro para coñecer o funcionamento dos obradoiros e, especialmente, dos talleres ocupacionais, onde estivo conversando cos nosos usuarios sobre o proceso de elaboración dos produtos artesanais. Ademais, non puido resistirse aos últimos deseños da colección de xabóns de glicerina Bicos de Amora, cos que foi obsequiado, a modo de recordo, ao rematar a xornada.

post

Íntegro lánzase a auga para gozar dos beneficios da natación terapéutica

De outubro a maio, dez usuarios/as acoden semanalmente á piscina municipal de Cabana para aprender a nadar e gañar en autonomía persoal

Cada ano, en Íntegro, poñemos en marcha un curso de natación terapéutica dirixido aos nosos usuarios e usuarias co obxectivo de mellorar a súa coordinación, equilibrio e autonomía persoal. Trátase dunha actividade deportiva complementaria, enmarcada no programa de saúde e benestar do noso departamento de Fisioterapia, que utiliza o medio acuático cun fin correctivo e preventivo. De feito, a súa práctica está recomendada por médicos e especialistas como terapia continuada, especialmente, no caso de persoas con diversidade funcional e/ou pacientes con algún tipo de doenza lumbar ou lesión medular.

Cando o corpo entra en contacto coa auga, pesa menos e adquire maior flexibilidade poñendo en funcionamento todos os seus membros e activando músculos, articulacións, tendóns, neuronas, etc. Pero, ademais dos innumerables beneficios físicos, estas sesións repercuten positivamente na adquisición dunha maior independencia, auto-confianza e capacidade de socialización.  

 

Desde hai oito anos, de outubro a maio, un grupo de usuarios e usuarias do Centro de Día e do Centro Ocupacional acoden á piscina municipal de Cabana para lanzarse á auga xunto a dúas monitoras de apoio e unha profesora especializada en natación adaptada que, ademais de ensinarlles a nadar, realiza diversos exercicios de estimulación para contribuír a mellorar o funcionamento muscular e articular dos alumnos/as. As sesións, dunha hora de duración,  lévanse a cabo unha vez á semana, xeralmente os venres.

Coa finalidade de adaptar as clases ás necesidades individuais de usuario/a e prestar unha atención totalmente personalizada, o número de participantes é sempre moi reducido. Este ano, son dez as persoas que se están a beneficiar deste programa que, cada edición, renova o alumnado coa finalidade de garantir a asistencia de todos os interesados/as e cubrir así a demanda existente. 

 

Agardamos que este curso dea resultados tan positivos como en anos anteriores e que os nosos usuarios/as gocen dunha experiencia tan saudable como divertida. E quen sabe se este pode ser o comezo dunha longa e prometedora carreira deportiva!! Non os/as perdades de vista! Seguirémosvos informando dos seus progresos.

post

Competencias Clave e o programa Avanza Inclusión, novas accións para a inserción socio-laboral

Ambas iniciativas, dirixidas a persoas en risco de exclusión social, están promovidas pola Consellería de Política Social e co-financiadas polo Fondo Social Europeo no marco dos programas operativos FSE Galicia 2014-2020

A incorporación ao mercado laboral das persoas en risco de exclusión social e, preferentemente, o acceso a aquelas que padecen diversidade funcional é un dos obxectivos prioritarios da asociación Íntegro. Por iso, desde hai meses estanse a  desenvolver novos programas formativos promovidos pola Consellería de Política Social en base á Orde 13 de xuño de 2018, pola que se establecen as bases que rexen a concesión de subvencións a entidades de iniciativa social para a promoción de actuacións de servizos sociais comunitarios e inclusión social para os anos 2018, 2019 e 2020, co-financiado polo Fondo Social Europeo (FSE) no marco dos programas operativos FSE Galicia 2014-2020. 

Desde a entidade de Nantón, temos en marcha de maneira simultánea dous novidosos proxectos destinados a mellorar a empregabilidade daqueles colectivos sociais máis desfavorecidos. Trátase dun curso de preparación de competencias Clave e a posta en marcha do programa Avanza Inclusión. Neste último estanse a realizar diversas accións propias da Carteira de Servizos Sociais de Inclusión Social, que permitan o axuste persoal e social xunto co acceso e permanencia no mercado laboral das persoas en risco de exclusión social, con prioridade de acceso para aquelas que teñan recoñecida algún tipo de discapacidade e que, preferentemente, sexan mulleres.

Entre as actuacións que xa se están levando a cabo destacan a diagnose, deseño, seguimento e avaliación do proxecto de inclusión socio laboral, acompañamento social, accións de adquisición e/ou fortalecemento das capacidades persoais e sociais, accións promotoras do acceso e permanencia no mercado laboral, mediación social, mediación laboral, prospección e mediación laboral activa así como o apoio na conciliación e o reforzo socio-educativo, entre outras. Este programa está en marcha desde o pasado 1 de xullo e permanecerá aberto ata o 30 de xuño de 2020. 

Competencias Clave

Desde o pasado mes de maio, a asociación Íntegro tamén está a desenvolver outra acción formativa consistente nun curso de preparación de competencias Clave. Nesta primeira actuación (son tres), que se prolongará ata o 28 de xaneiro de 2019, estase a formar xa a un grupo de persoas con diversidade funcional (discapacidade intelectual) da Costa da Morte para o seu acceso ás oposicións do grupo V, categoría subalterno, da Xunta de Galicia.  A segunda e a terceira acometeranse de xaneiro a outubro do ano que vén e de outubro a xuño de 2020, respectivamente. Cada unha delas terá unha duración de 130 horas e estará integrada por grupos reducidos de traballo (mínimo 5 persoas e máximo 10) para garantir unha aprendizaxe individualizada e adaptada ás necesidades específicas de cada  alumno/a.

Pese a que estas accións formativas están dirixidas preferentemente a colectivos en risco de exclusión social, con prioridade para persoas con diversidade funcional e, especialmente, mulleres, tamén poderá participar o público en xeral.  Para máis información, non dubides chamar ao teléfono 981 734 985 ou pasar polas oficinas de Nantón, de luns a venres e de 9 a 17 horas.

post

No último ano, 56 mulleres con diversidade funcional foron atendidas polo PIMD Rural

O servizo de orientación laboral para a mellora do emprego foi un dos máis demandados logrando ata 5 insercións

Un ano máis, a implicación e o compromiso institucional fixo posible que o Punto de Intervención para Mulleres con Diversidade Funcional no ámbito rural (PIMD Rural) experimentase un notable crecemento na Costa da Morte chegando a consolidarse como o principal servizo de atención e intervención para mulleres con especial vulnerabilidade, principalmente con diversidade funcional e residentes na zona rural.  No último ano, 56 mulleres foron atendidas por este servizo e resultaron beneficiadas das diferentes accións formativas levadas a cabo para erradicar a discriminación e a desigualdade de oportunidades mediante o desenvolvemento de actividades que facilitaron o seu empoderamento e reforzaron o seu papel no ámbito rural ata acadar unha situación de normalidade. Neste sentido, os resultados falan por si mesmos! En 42 casos realizáronse seis ou máis intervencións para mellorar a situación laboral, persoal e familiar das receptoras,  logrando ata  5 insercións laborais durante o período comprendido entre outubro de 2017 e setembro de 2018. 

Desde o punto de intervención, ademais de visualizar a realidade destas mulleres en situación de vulnerabilidade, fomentouse o seu acceso a determinados servizos e recursos que, doutro xeito, non sería posible. Continuando co traballo desenvolvido en edicións anteriores, achegóuselles información e asesoramento tanto ás mulleres participantes como ás súas familias, sendo os recursos en materia de discapacidade e dependencia os máis demandados. Así mesmo, prestóuselles axuda na xestións de trámites persoais e familiares de carácter administrativo. Outro dos aspectos solicitados polas beneficiarias do PIMD Rural foi o apoio na resolución de conflitos, principalmente de orixe familiar. Neste senso, incidiuse na adquisición de habilidades persoais e familiares para afrontar os problemas de maneira autónoma e mellorar as relacións interpersoais (xestión económica, obrigas, normas de participación social, hábitos dentro e fóra do fogar).

Mellora do emprego

Un ano máis, os servizos de orientación, formación e a busca de emprego foron os máis solicitados polas beneficiarias do PIMD Rural acadando un elevado nivel de participación. Por unha banda, ao longo do ano, realizáronse numerosas accións formativas para dotar ás usuarias de novas competencias e habilidades que contribuíron a mellorar a súa empregabilidade. Neste senso, puxéronse en marcha varios talleres creativos e obradoiros de contido moi variado: habilidades domésticas, cociña, igualdade de xénero, alfabetización de adultos, manexo de smartphone e tablet, auto-coidados, novas tecnoloxías e técnicas para a busca de emprego. 

Por outra banda, proporcionouse apoio directo na prospección do emprego así como acompañamento na busca de traballo e axuda para a elaboración de currículos. Desde Íntegro, tamén se analizaron as necesidades do tecido empresarial local para adecuar a oferta á demanda, axustando ao mercado os perfís profesionais das usuarias dos puntos de intervención. 

Ao longo de todo o ano, a nosa entidade traballou de forma coordinada co Servizo de Intermediación Laboral de Cogami (SIL Cogami) así como cos departamentos de inclusión da Costa da Morte e os orientadores laborais locais dos diferentes concellos. Neste senso, o asesoramento xurídico e a atención psicolóxica prestadas ás mulleres que participaron no programa foron derivadas ao CIM de Carballo, froito dun convenio de colaboración entre ambas entidades.

Dada a boa acollida que esta iniciativa está a ter na Costa da Morte e ante a crecente demanda de usuarias procedentes doutras localidades, en Íntegro seguimos traballando para ampliar o ámbito de actuación do PIMD a outros municipios e incrementar así a nosa colaboración cos servizos de proximidade á cidadanía.

Permanecede atentas porque moi pronto estaremos de volta!

post

Íntegro amplía o seu parque móbil cun novo vehículo adaptado cedido pola Deputación Provincial da Coruña

A furgoneta, que realizará o percorrido Camariñas-Camelle-Nantón, permitirá desdobrar unha das rutas con máis usuarios/as e aumentar así o número de prazas

A asociación Íntegro das persoas con Diversidade Funcional da Costa da Morte vén de recibir un novo vehículo adaptado que permitirá mellorar o servizo de transporte dos nosos usuarios e usuarias e incrementar o actual parque móbil, posibilitando así o desdobramento dalgunhas rutas e a incorporación de novas prazas. A entrega foi realizada esta mesma semana pola responsable da área de Benestar Social e Igualdade da Deputación da Coruña, Ánxela Franco, no marco dun convenio de colaboración asinado polo noso presidente Adolfo López Baña e a titular provincial nas instalacións de Nantón. No acto, tamén estiveron presentes a directora do centro, Noelia Barreira; a vicesecretaria da asociación, Mónica Suárez, e o deputado comarcal Manuel Muíño.   

Durante a entrega da furgoneta, López Baña sinalou que “o transporte é fundamental para as entidades que traballamos no ámbito dos servizos sociais e, especialmente, para as que o facemos no ámbito rural onde a dispersión xeográfica nos obriga a prestar especial atención ao desprazamento dos usuarios/as ata o centro”. Neste senso, fixo especial incidencia na necesidade de dispoñer dunha flota ampla e renovada, adaptada ás necesidades das persoas con diversidade funcional. Pola súa banda, Ánxela Franco tamén coincidiu na necesidade de “dotar ás entidades dos medios e recursos necesarios para contribuír a eliminar os atrancos que existen á hora de facilitar ás persoas usuarias a súa chegada aos centros”.

O novo vehículo, valorado en máis de trinta mil euros, ten capacidade para nove persoas e  está dotado cunha plataforma e un chanzo eléctricos para facilitar o acceso ao mesmo ás persoas que se desprazan en cadeira de rodas. A súa posta en funcionamento está prevista para esta mesma semana e o seu destino, en principio, será a realización da ruta Cereixo-Camariñas-Camelle-Nantón, co obxectivo de desdobrar así un dos percorridos máis masificados en canto a número de usuarios e alixeirar os desprazamentos diarios. Ademais, coa nova incorporación poderase incrementar o número de prazas e atender así unha demanda que nos últimos tempos non para de medrar en toda a Costa da Morte. O presidente de Íntegro, tamén subliñou que “este tipo de axudas resultan imprescindibles para ir renovando un parque móbil, xa algo anticuado, e reducir os gastos de mantemento dos vehículos”.