post

A Diverescola chega ás aulas de infantil e primaria do CPI de Zas e do CEIP Nétoma–Razo de Carballo

71 nenos e nenas participaron nas xornadas de sensibilización promovidas pola entidade de Nantón, no marco do programa Capacíta-T, para achegar a diversidade á cativada

Setenta e un nenos e nenas de infantil e primaria do CPI de Zas e do CEIP Nétoma-Razo (Carballo) convertéronse nas últimas semanas en protagonistas das primeiras sesións dunha nova edición da Diverescola, unha iniciativa promovida por Íntegro, no marco do programa Capacíta-T, para achegar aos máis cativos/as a diversidade e a inclusión a través do xogo e o entretemento.

Sen ir máis lonxe, este xoves as aulas do centro carballés de educación infantil e primaria de Nétoma-Razo mudaron o seu tradicional aspecto para converter os pupitres en improvisados circuítos de obstáculos e os libros en leccións orais de vida e superación. Desde primeira hora da mañá, a nosa monitora de ocio e tempo de lecer Lucía Blanco protagonizou, xunto aos nosos usuarios Noé e Yoli, unha xornada de sensibilización repleta de xogos e diversión na que participaron 51 nenos e nenas divididos en tres grupos, dous de infantil e outro de 1º e 2º de primaria, que agardaban ansiosos/as e con expectación a visita da nosa asociación.  

Aprendizaxe e entretemento tamén houbo hai unhas semanas no CPI de Zas, onde unha vintena de alumnos e alumnas tiveron a oportunidade de achegarse á diversidade da man de Rubén e Jessi, dous usuarios/as do centro, cos que pasaron unha mañá moi amena e proveitosa realizando divertidas probas e escoitando sorprendentes historias que falaban de igualdade e inclusión.

Aínda que moitos/as aseguraron coñecer a persoas con disCapacidade na súa contorna, moi poucos sabían do seu día a día. E para descubrilo, non dubidaron en poñerse na súa propia pel demostrando as súas habilidades e destrezas nunha serie de probas con mobilidade reducida e os ollos tapados. Por suposto, todos/as lograron superar e con nota as actividades propostas dando exemplo da súa capacidade de empatía e dunha naturalidade e espontaneidade sorprendentes. Un dos momentos máis divertidos chegou cando os máis pequenos/as se dispuxeron a facer bocadillos empregando unha soa man. E non o fixeron nada mal!

 

 

 

 

 

 

 

 

 

 

 

 

 

Desde Íntegro queremos agradecer a participación de todos os centros educativos da Costa da Morte neste proxecto co que se pretende promover unha aprendizaxe en valores e unha aposta pola educación inclusiva dende a infancia. Vémonos nas aulas!

post

A Diverescola enche de xogos e contacontos as aulas do CPI Xosé Pichel de Coristanco

Máis de 60 nenos e nenas participaron nunha xornada de sensibilización incluída no programa Capacíta-T

Os alumnos/as de infantil e primaria do CPI Alcalde Xosé Pichel de Coristanco convertéronse onte nos protagonistas dunha nova edición da Diverescola, unha iniciativa promovida por Íntegro, no marco do programa Capacíta-T, para achegar aos máis cativos/as a diversidade e a inclusión a través do xogo e o entretemento.

Durante algo máis de dúas horas, as aulas do centro educativo mudaron o seu aspecto para converter os pupitres dos alumnos/as de 1º de primaria en improvisados circuítos de obstáculos e os libros en leccións orais e contacontos de vida e superación, no caso dos/as escolares de infantil. Así, a primeira hora da mañá a nosa monitora de ocio e tempo de lecer Lucía Blanco, acompañada por dous dos nosos usuarios/as, iniciaba unha xornada de sensibilización, incluída na Semana Cultural do centro, repleta de xogos na que participaron 62 nenos e nenas que agardaban ansiosos/as e con expectación a visita da asociación Íntegro.

Aínda que moitos/as aseguraron coñecer a persoas con diversidade funcional na súa contorna, moi poucos sabían do seu día a día. E para descubrilo, nada mellor que poñerse na súa propia pel poñendo a proba as súas habilidades e a súa destreza a través da realización dunha serie de xogos de barreiras que consistiron en escribir coa man que non empregan habitualmente e descubrir obxectos cos ollos tapados. Pese á dificultade das probas, todos os/as participantes lograron superalas con nota facendo gala dunha excelente capacidade de adaptación e empatía.

Desde Íntegro queremos agradecer a participación de todos os centros educativos da Costa da Morte neste proxecto, encamiñado a promover unha aprendizaxe en valores e unha aposta pola educación inclusiva dende a infancia. 

 

 

post

A Diverescola de Íntegro visita o CPI de Zas

Preto de 40 alumnos e alumnas de infantil e primaria participaron no programa de sensibilización e visibilidade de persoas con diversidade funcional

Tras as vacacións de Nadal e coas aulas dos colexios da Costa da Morte repletas de escolares, a asociación Íntegro botou a andar unha nova edición do programa de sensibilización e visibilidade de persoas con diversidade funcional, Diverescola. Nesta ocasión, a versión máis infantil de Capacíta-T trasladouse ata o CPI de Zas para visitar aos alumnos e alumnas dos primeiros ciclos educativos e conciencialos/as en materia de diversidade e á inclusión. E para elo, nada mellor que o xogo e o entretemento.

O pasado venres, 26 escolares de infantil e 12 de primaria participaron na primeira sesión de 2018 do programa Diverescola, unha iniciativa que achega aos máis cativos/as o día a día das persoas con diversidade. A xornada, que deixou momentos simpáticos e sorprendentes, desenvolveuse entre contacontos de sensibilización e diferentes actividades lúdicas nas que se empregaron técnicas de caracterización para representar algunhas das escenas máis cotiás da vida de quen padece algún tipo de discapacidade. Tamén se levaron a cabo pequenos circuítos de obstáculos para poñer a proba a destreza e habilidade dos nenos e nenas coa mobilidade reducida. E foron, precisamente, os/as máis pequenos/as quen, unha vez máis, nos deixaron impresionados/as coa súa naturalidade, espontaneidade e gran capacidade de asimilación.

Ademais de tratarse dunha experiencia moi positiva e enriquecedora, a Diverescola ven a reforzar a aposta da entidade por unha educación inclusiva dende a infancia e unha aprendizaxe en valores. Desde Íntegro agardamos que este programa de educación infantil siga medrando entre a comunidade educativa ata implantarse nos centros de ensino da Costa da Morte como un complemento á formación dos máis cativos/as.

 

 

 

Os colexios que estean interesados en acollerse a este programa non teñen máis que poñerse en contacto coa asociación Íntegro chamando ao 981 734 985 e concretar a data que máis lles conveña. Estaremos encantados/as de coñecervos. Ata a próxima!

Lesións medulares

E dunhas aulas pasamos a outras porque a semana que vén Íntegro retomará a campaña de prevención de lesións medulares que está a impartir nos centros de primaria e secundaria da Costa da Morte para concienciar ao alumnado sobre as causas e consecuencias de sufrir un accidente medular. A cita será o vindeiro día 30 no CPI As Revoltas, en Cabana de Bergantiños.

 

post

O CPI de Zas acolle a última xornada da campaña de prevención de lesións medulares

As charlas informativas nos centros educativos de primaria e secundaria regresarán ás aulas tras as vacacións de verán

Os alumnos e alumnas de 3º da ESO do CPI de Zas foron os encargados/as de pechar esta semana o ciclo de charlas informativas da campaña de prevención de lesións medulares que a asociación Íntegro levou a cabo durante o presente curso escolar en numerosos centros de primaria e secundaria da Costa da Morte.

O pasado martes o presidente da entidade, Adolfo López Baña, acudiu xunto ao vogal David Pombo e a nosa traballadora social, Sandra Reimúndez, ata o centro educativo para  explicarlles aos escolares en que consiste unha lesión medular e como se pode evitar. Neste senso, Teresa e Elena, dúas socias e voluntarias de Íntegro, tamén relataron as súas experiencias persoais e insistiron na necesidade de previr prácticas de risco que poidan derivar en doenzas irreparables, especialmente durante a temporada de verán como consecuencia de imprudencias ao volante ou “zambullidas” en praias e piscinas.

E que mellor maneira de concienciar e sensibilizar aos máis novos sobre as causas e consecuencias de sufrir un accidente deste tipo que converténdoos en protagonistas e sentalos sobre unha cadeira de rodas por uns intres. E a experiencia resultou do máis satisfactoria e enriquecedora xa que ademais de desenvolverse moi ben coa mobilidade reducida e sorteando máis dun obstáculo, amosaron posuír unha grande capacidade de empatía sabendo situarse no lugar das persoas que a diario deben enfrontarse a todo tipo de barreiras, tanto físicas como mentais.

Deste xeito, púxose o punto e final a unha campaña que despide temporada pero que moi pronto volverá ás aulas. Será co regreso dos/as estudantes, tras as vacacións do verán, grazas en parte á crecente acollida que este ano tivo esta iniciativa entre a comunidade educativa, incrementando notablemente a demanda deste tipo de formación. Cada vez son máis os centros que solicitan estas accións informativas e máis os rapaces e rapazas que se interesan por aprender e coñecer en materia de prevención e sensibilización social. Outro exemplo son as cada vez máis frecuentes visitas de escolares de diferentes colexios de primaria dentro do programa Visítanos!, unha actividade encamiñada á educación e capacitación dos máis pequenos en materia de diversidade, ou as xornadas de sensibilización que levamos a cabo en aulas de infantil para achegar a inclusión á infancia.

Dende Íntegro queremos desexarlle a todos os alumnos e alumnas un bo verán e que non esquezan poñer en práctica todo o aprendido durante as sesións de prevención de lesións medulares porque unha imprudencia pode custarnos a vida. Grazas por apostar por unha educación máis diversa e inclusiva porque non todo está nos libros.  Vémonos á volta!

post

Estudantes de 5º de primaria do CEIP Bergantiños achéganse á diversidade con Visítanos!

Durante a visita os alumnos e alumnas realizaron divertidos obradoiros ocupacionais

Se hai uns días eramos nós os que visitabamos a un grupo de escolares do IES Monte Neme de Carballo, o pasado venres foron os alumnos e alumnas do CEIP Bergantiños, tamén de Carballo, os que se desprazaron ata as nosas instalacións de Nantón para participar nunha nova edición de Visítanos!, unha actividade englobada no programa Capacíta-T destinada a educar, concienciar e capacitar aos máis pequenos/as en materia de diversidade.

A xornada comezou cunha breve proxección sobre a historia da entidade e as actividades realizadas ao longo do ano 2016. Unha primeira toma de contacto para coñecer o día a día dos nosos usuarios e usuarias que logrou espertar a curiosidade dos/as escolares, que non dubidaron en preguntar e comentar todo canto se lles ocorría e amosándose moi interesados/as e participativos/as ao longo de toda a mañá.

 

 

 

 

 

A elaboración de pulseiras causou gran expectación

Da man dos nosos usuarios/as, os 57 estudantes de 5º de primaria do CEIP Bergantiños realizaron un percorrido de case dúas horas visitando os diferentes departamentos e os obradoiros do Centro Ocupacional e do Centro de Día. E que ben o pasaron! Dende os invernadoiros ata a cociña, pasando pola aula de informática, tiveron oportunidade de poñer en práctica o aprendido e moitas habilidades ocultas, con trucos e consellos incluídos. Un dos momentos máis divertidos tivo lugar na aula de logopedia, onde aprenderon a importancia de rir e de rirse dun mesmo. Tamén houbo charlas grupais sobre inclusión e diversidade, actividades con globos e talleres de artes manuais nos que aprenderon a facer xabóns de glicerina e pulseiras de macramé cun resultado máis que satisfactorio, sobresaínte.

Arte e deporte

Ninguén quixo perderse a visita ao ximnasio

Pero neste Visítanos! os/as participantes demostraron que, ademais de bos artistas, son bos deportistas. E así o deixaron claro durante a súa visita ao ximnasio de Íntegro. Aínda que non tiveron reparo algún en probar cada un dos aparatos que atoparon ao seu paso, a bicicleta elíptica e a cinta de correr- recentemente adquiridas coa recadación do calendario solidario 2017-  acapararon a atención e as olladas de todos e todas, que non puideron resistirse a probalas. Unha vez máis quedou patente que a diversidade é cuestión de capacidades, non de discapacidades, e que nin a idade nin o tamaño importan. Grazas pola visita! Ata outra!

post

Estudantes de primaria e secundaria do CPI Cabo da Area de Laxe achéganse á diversidade con Íntegro

Mentres que os alumnos e alumnas de 3º e 4º da ESO participaron na campaña de prevención de lesións medulares, un grupo de 3º ciclo de primaria protagonizou a última edición de Visítanos!  

Ambas accións están enmarcadas no programa Capacíta-T, dirixido a sensibilizar e concienciar aos escolares en materia de diversidade e inclusión

Cada vez son máis os centros educativos da Costa da Morte que se suman ás campañas de concienciación sobre diversidade e inclusión promovidas pola asociación Íntegro dentro do programa Capacíta-T. Esta semana o protagonista indiscutible, e por partida dobre, foi o CPI Cabo da Area de Laxe. Se os estudantes de secundaria participaron nunha charla-coloquio enmarcada na campaña sobre a prevención de lesións medulares, ao día seguinte, os/as de primaria protagonizaron unha nova edición do programa Visítanos! nas nosas instalacións de Nantón (Cabana).

IMG_5511Por unha banda, un total de 44 estudantes de terceiro ciclo de primaria do CPI Cabo da Area desprazáronse onte ata o noso Centro de Recursos para coñecer a fondo o seu funcionamento e achegarse ao día a día das persoas con diversidade funcional, compartindo unha xornada de vivencias e emocións xunto aos nosos usuarios e usuarias.

_MG_5598

 

Divididos en varios grupos, os escolares realizaron un longo percorrido polo centro para visitar os diferentes departamentos e descubrir cales son as funcións que desempeña cada un deles. Outra das actividades que levaron a cabo dentro do programa de sensibilización consistiu na realización de varios obradoiros ocupacionais nos que participaron moi activamente seguindo as indicacións dos nosos monitores/as e usuarios/as.

_MG_5619

Cociña, estimulación cognitiva, informática, xestión económica ou rehabilitación física foron algúns dos cursos que espertaron maior interese entre os nenos/as pero, sen dubida, un dos momentos máis divertidos tivo lugar na área de logopedia, onde aprenderon a superar barreiras a golpe de imaxinación e moitas risas. O taller de artes manuais volveu a causar gran expectación entre os/as estudantes, que tamén fixeron gala da súa destreza e creatividade para elaborar pezas de bixutería ou orixinais xabóns de glicerina.

_MG_5528

Tras unha xornada moi enriquecedora e chea de boas sensacións, o profesorado comprometeuse a dar continuidade, xa no colexio, ao noso programa de sensibilización coa posta en común das experiencias vividas no centro co obxectivo de compartilas co resto do alumnado e fomentar así o seu compromiso social.

la foto 5

 

Prevención de lesións medulares na ESO

Por outra banda,  máis concienciados/as quedaron tamén os alumnos e alumnas que cursan 3º e 4º da ESO neste colexio laxense tras recibir a visita, un día antes (o martes), de Adolfo López Baña e David Pombo, presidente e vogal, respectivamente, de Íntegro. A sesión teórica deu comezo cunha animada charla-coloquio sobre a prevención das lesión medulares e a importancia de evitar prácticas de risco en praias, piscinas ou accidentes de tráfico, principais causantes na maioría dos casos. Os poñentes, que tamén relataron as súas propias experiencias, incidiron especialmente nos danos irreparables que causan este tipo de lesións e a importancia de evitalos.

Así mesmo, os/as estudantes amosáronse participativos/as e moi interesados/as en coñecer as dificultades de vivir sobre unha cadeira de rodas. E que mellor maneira de sabelo que subíndose a unha delas! Iso foi o que fixeron no pavillón do centro educativo, ao final da xornada, para comprobar a complexidade de desprazarse ou sortear obstáculos coa mobilidade reducida. Coma sempre, houbo quen sorprendeu facendo gala dunha incrible destreza e gran capacidade de adaptación.

la foto 4

la foto 2

 

 

 

 

 

 

Grazas a todos e a todas por participar! Vémonos na seguinte!

post

Íntegro entra nas aulas do CPI As Revoltas para concienciar sobre a diversidade

O colexio cabanés acolleu unha xornada de sensibilización dirixida a estudantes da ESO e de infantil  

Onte en Íntegro saímos á rúa para levar a cabo novas accións formativas de sensibilización incluídas no programa Capacíta-T e o escenario elixido para facelo foi  o CPI As Revoltas, en Cabana de Bergantiños. Nesta ocasión, os alumnos e alumnas de 3º e 4 da ESO foron, xunto cos máis cativos/as, os e as protagonistas dunha xornada destinada a xogar, educar e concienciar sobre a diversidade. E o resultado foi espectacular!

la foto 4Pola súa banda, os estudantes de secundaria participaron nunha sesión informativa sobre prevención de lesións medulares, dentro da campaña que estamos a levar a cabo en numerosos centros educativos de primaria e secundaria da Costa da Morte. O presidente de Íntegro, Adolfo López Baña, e o vicepresidente, Ramón Pombo, foron os encargados de explicar as principais causas e consecuencias de sufrir unha lesión medular durante a charla teórica que impartiron aos alumnos/as co obxectivo, ademais, de concila foto (6)encialos sobre a importancia de previr prácticas de risco en praias e piscinas ou en accidentes de tráfico para evitar así danos irreparables. O relato das súas propias experiencias persoais deu paso á posta en práctica da destreza dos escolares sobre unha cadeira de rodas comprobando así o difícil que resulta desprazarse coa mobilidade reducida. Aínda así houbo quen se atreveu a botar unha carreira!

Mestúra-T en infantil

la foto 5

Pero os momentos máis simpáticos e sorprendentes viñeron da man de Mestúra-T, unha versión infantil do noso programa de sensibilización dirixido a concienciar aos máis pequenos mediante o xogo e o entretemento. E foron, precisamente, os alumnos de 6º de infantil os que, unha vez máis, nos deixaron impresionados/as coa súa naturalidade, espontaneidade e gran capacidade de asimilación. A directora do Centro de Recursos de Íntegro, Noelia Barreira, e a nosa psicóloga, Begoña Rial, achegaron a diversidade e a inclusión aos escolares de 5 anos mediante contacontos de sensibilización e diferentes actividades lúdicas nas que se empregaron técnicas tan divertidas como a caracterización para representar escenas cotiás da vida das persoas con diversidade funcional.  Unha experiencia moi enriquecedora que ven a reforzar a nosa aposta por unha educación inclusiva dende a infancia e unha aprendizaxe en valores. Por iso confiamos en que este programa de educación infantil dea os seus froitos e comece a implantarse nos centros de ensino como un complemento á formación dos máis cativos/as.

Se queredes que Capacíta-T ou Mestúra-T visiten o voso colexio ou instituto, non tedes máis que poñervos en contacto con nós chamando ao 981 734 985. Estaremos encantados/as de coñecervos! Vémonos na próxima e grazas a todos/as por participar!

post

Íntegro participará en Cee na 2ª Xornada sobre Inclusión Social e Educativa

Con esta iniciativa preténdese dar a coñecer as accións formativas e educativas que se levan a cabo nas diferentes entidades sociais 

A asociación Íntegro participará o vindeiro venres, 3 de febreiro, na 2ª Xornada de Inclusión Social e Educativa que organiza o Concello de Cee, a través da concellería de Presidencia, Benestar Social, Igualdade e Emprego, para dar a coñecer as diferentes accións formativas e educativas que se desenvolven na actualidade na nosa comunidade en favor das persoas con diversidade funcional.

A iniciativa, que terá lugar no salón de actos da Casa da Cultura en horario de 10 a 14h, consistirá na realización de varias charlas informativas protagonizadas por profesionais e usuarios/as das diversas entidades sociais convidadas ao acto. Ao remate, procederase á inauguración dunha exposición temática cos algúns dos produtos e traballos elaborados polos participantes. A mostra permanecerá aberta ese día, de 16:30 a 19:30h, e do 6 ao 10 de febreiro no mesmo horario.

img_5082A media mañá chegará a quenda da nosa entidade coa proxección dun vídeo explicativo sobre o funcionamento do Centro de Día e do Centro Ocupacional. A continuación, a psicóloga do centro, Begoña Rial, intervirá para falar sobre “a sensibilización como ferramenta permanente da educación” tomando como referencia o noso programa de concienciación social Capacíta-T e, concretamente, a importante labor de sensibilización levada a cabo en numerosos centros educativos de primaria e secundaria da Costa da Morte grazas á campaña de prevención de lesións medulares, que este ano verase tamén ampliada a outros colectivos sociais para evitar prácticas de risco en ámbitos tan cotiáns como o fogar, o campo, etc…IMG-20160704-WA0020

Ademais, a técnica de Íntegro abordará a necesidade de desenvolver novas liñas ocupacionais que contribúan a mellorar a formación e a empregabilidade das persoas con diversidade como acontece no noso centro de Nantón coa posta en marcha de diferentes obradoiros temáticos entre os que destacan o de Artes Manuais, no que se elaboran artigos artesanais para a súa comercialización; Exteriores, coa creación e mantemento de invernadoiros e zonas verdes de onde se obteñen produtos para consumo dos propios usuarios/a
s ou a colección de xabóns de glicerina Bicos de Amora, lanzada ao mercado o pasado mes de maio.

Como unha imaxe vale máis que mil palabras, Íntegro tamén estará presente na exposición, que se inaugurará a última hora da mañá, cunha selección dos principais produtos e artigos elaborados artesanalmente polos alumnos/as dos diferentes obradoiros ocupacionais.

Se estás interesado/a en asistir, inscríbete e reserva a túa praza. Aquí che deixamos toda a información sobre a xornada! Vémonos en Cee!

Xornadas_febreiro_2017_cartel

 

 

 

post

Estudantes de Camariñas e da Ponte do Porto protagonizan unha nova edición de Visítanos!

Esta actividade educativa forma parte do programa Capacíta-T que Íntegro imparte aos escolares da Costa da Morte

Non podiamos comezar mellor a semana na que se conmemora o Día Internacional da Diversidade Funcional (3 de decembro) xa que onte as portas da Asociación Íntegro volveron a abrirse para celebrar unha nova edición de Visítanos!, unha actividade educativa incluída no programa Capacíta-T coa que a nosa entidade pretende concienciar, educar e capacitar en materia de diversidade aos máis pequenos.

_mg_2451Nesta ocasión, 36 alumnos e alumnas do CEIP O Areal de Camariñas e do CEIP da Ponte do Porto visitaron as nosas instalacións de Nantón para coñecer de preto o funcionamento do centro e o día a día dos nosos usuarios e usuarias. A xornada deu comezo cunha breve presentación da entidade para explicarlles aos estudantes os obxectivos e valores cos que traballamos en favor das persoas con diversidade funcional.  Dende o primeiro momento,  os alumnos e alumnas amosáronse moi participativos e interesados/as en achegarse á inclusión partindo das súas propias ideas, moitas delas preconcibidas e ditadas por unha sociedade desigual como quedou ben patente coa proxección da curtametraxe Lo Incorrecto, da Fundación Prevent. Tamén se lles amosou un vídeo resumo coas actividades levadas a cabo ao longo do 2015.  _mg_2637

Durante algo máis de dúas horas realizamos un percorrido polas instalacións para coñecer máis polo miúdo o traballo que realizan diariamente os nosos usuarios/as nos diferentes obradoiros ocupacionais. O taller de artes manuais foi parada obrigada. Alí tiveron a oportunidade de descubrir algunhas das técnicas empregadas polos nosos usuarios/as para confeccionar os produtos de artesanía que comercializamos, e que máis dun escolar tamén se animou a elaborar poñendo a proba as súas dotes creativas na confección de xabóns de glicerina da colección Bicos de Amora. O resultado foi sorprendente!_mg_2611

A visita ao invernadoiro foi, sen dúbida, unha das que suscitou maior expectación entre os escolares que non dubidaron en amosar os coñecementos adquiridos tras as explicacións dadas polos nosos técnicos. No xardín terapéutico traballaron con plantas aromáticas, transplantándoas e realizando diversos traballos de composición, dignos de verdadeiros artistas. Así mesmo, realizamos un taller de recoñecemento de especies arbóreas autóctonas a partir de follas que tiñamos recollidas para a ocasión.

_mg_2481

Pero un dos momentos máis divertidos chegou ao final mañá coa realización dun circuíto de mobilidade e desprazamento en cadeira de rodas coa finalidade de achegar aos máis pequenos á realidade da diversidade, xogando coas barreiras ás que cada día deben facer fronte moitas persoas con discapacidade. Unha proba moi entretida e novidosa na que tiveron que poñer en práctica o seu enxeño e habilidade para sortear todo tipo de obstáculos. A mellor maneira de comprobar que a diversidade é cuestión de capacidades, non de discapacidades.

_mg_2516

_mg_2587