post

Mención Honorífica para Íntegro polo seu labor de promoción do voluntariado

  • Foi durante o transcurso do XX Congreso Estatal de Voluntariado celebrado o pasado xoves en Expourense
  • Esta mesma semana, a Fundación Mapfre tamén seleccionou á entidade como unha das dez beneficiarias da I Convocatoria de Axudas a Proxectos Sociais de ámbito nacional

Esta semana a asociación Íntegro está de parabéns e por partida dobre. E o motivo non podía ser máis gratificante e honroso para todos/as os/as que formamos parte desta gran familia: o fomento e a promoción do voluntariado. O pasado xoves 29, a nosa entidade foi distinguida cunha Mención Honorífica concedida ás entidades de acción voluntaria de Galicia.

 

A directora do Centro de Recursos, Noelia Barreira, e a educadora social, Tania Bartucca, foron as encargadas de recoller o galardón xunto aos compañeiros/as doutras entidades sociais que están a traballar no desenvolvemento e promoción de accións encamiñadas a fomentar o voluntariado. A entrega de premios tivo lugar no recinto feiral de Expourense, no seo do XX Congreso Estatal de Voluntariado celebrado os días 28 e 29 deste mes baixo o lema Enlazateaovoluntariado.

 

Fundación Mapfre

Pero esta non foi a única boa nova que nos deixou a semana. A Fundación Mapfre vén de facer pública a relación de entidades premiadas na I Convocatoria de Axudas a Proxectos Sociais, posta en marcha a través do seu programa #Sésolidario. Entre os máis de 100 proxectos presentados a nivel nacional en materia de nutrición, saúde, educación, emprego e inclusión social, a nosa entidade figura como unhas das dez asociacións galardoadas, sendo a única ademais de Galicia. Pero este recoñecemento ten un valor engadido xa que todas as propostas foron presentadas polos propios voluntarios da Fundación. Un feito que nos enche, máis se cabe, de orgullo e satisfacción.  

Esta iniciativa, pioneira en España, está dirixida ás asociacións que desenvolven o seu labor en favor dos colectivos máis desfavorecidos e, no noso caso, centrado especialmente na inclusión social e laboral das persoas con diversidade funcional da Costa da Morte a través do noso Centro de Recursos, de Día e Ocupacional. O importe total das axudas concedidas nesta primeira convocatoria ascende a 90.000 €, que serán distribuídos entre todos/as os/as beneficiarios para contribuír así a un mellor desenvolvemento dos seus obxectivos, tarefa na que tamén participarán activamente os propios voluntarios da Fundación Mapfre. Unha colaboración económica e humana que, sen dúbida, nos permitirá seguir traballando para acadar unha sociedade máis xusta, digna, solidaria e igualitaria. Grazas!

post

O alumnado do curso de Auxiliar de almacén completou a súa formación con prácticas en empresas de alimentación

Dez persoas con diversidade funcional participaron nesta acción formativa co-financiada pola Consellería de Política Social da Xunta de Galicia e o Fondo Social Europeo

Os dez alumnos e alumnas que veñen de rematar o curso de Auxiliar de almacén, organizado pola asociación Íntegro e co-financiado pola Consellería de Política Social da Xunta de Galicia e o Fondo Social Europeo (FSE), xa están sobradamente preparados/as para afrontar a súa incursión no mundo laboral e afrontar novos retos profesionais. Como complemento á formación teórica, desenvolvida nas instalacións de Nantón do 2 de abril ao 29 de xuño, os e as participantes deste obradoiro estiveron realizando as correspondentes prácticas de capacitación en varias empresas de alimentación da Costa da Morte cuns resultados sobresaíntes como así constataron as empresas colaboradoras.   

Grazas a un convenio de colaboración asinado entre a nosa entidade e os supermercados Gadis, Día (IRIAGO SL) e Eroski (JOALPER SL), o alumnado tivo a oportunidade de poñer en práctica os coñecementos adquiridos realizando tarefas vinculadas coa súa formación como a clasificación, reposición, etiquetado e embolsado de produtos.

 

 

Esta acción formativa, incluída no Programa Operativo de Galicia 2014-2020 e dirixida a persoas con diversidade funcional e/ou en risco de exclusión social da Costa da Morte, constou de 192 horas teóricas, destinadas a formación específica e competencias transversais, e  40 horas prácticas. Así mesmo, durante o curso tamén tiveron ocasión de visitar as instalacións de Ikea Coruña para coñecer mellor o seu funcionamento. Entre os principais obxectivos deste obradoiro destaca a inclusión social activa do alumnado coa finalidade de promover a igualdade de oportunidades, a participación activa e a mellora da posibilidade de atopar un emprego que contribúa á realización dunha vida plena, autónoma e independente.

Tanto o contacto coas empresas, como a sinatura do convenio e a supervisión dos traballos realizados nas empresas correu a cargo da educadora social da entidade Tania Bartucca Nión, que subliñou a necesidade de continuar con accións formativas desta índole que faciliten os recursos necesarios para incrementar a empregabilidade dun dos sectores máis vulnerables da sociedade. Agora só falta agardar que o mercado laboral lles dea a oportunidade que se merecen!

post

Últimos días para inscribirse no curso de Acondiconamento de Mobiliario Urbano e Xardíns

O novo obradoiro, subvencionado pola Fundación ONCE e co-financiado Fondo Social Europeo, está dirixido a persoas con diversidade funcional da Costa da Morte

O vindeiro 1 de marzo a asociación Íntegro ampliará a súa oferta formativa coa posta en marcha dun curso de Acondicionamento de Mobiliario Urbano e Xardíns dirixido a persoas con diversidade funcional da Costa da Morte. Esta nova acción, subvencionada pola Fundación ONCE, a través do Programa Operativo de Inclusión Social e Economía Social 2014-2020, e co-financiada polo Fondo Social Europeo (FSE), vén a reforzar o plan de capacitación profesional iniciado pola entidade para dotar dos recursos e ferramentas necesarias a un dos colectivos máis vulnerables co fin de mellorar a súa inserción laboral e garantir a igualdade de oportunidades.

Aínda que as inscricións para participar neste obradoiro deron comezo o pasado día 1, o prazo permanecerá aberto ata o 28 de febreiro. As persoas que estean interesadas en formar parte do proceso selectivo poden dirixirse ao Centro de Recursos de Nantón (Cabana) ou chamar ao 981 734 985, de luns a venres en horario de 09 a 17h, para formalizar a súa solicitude ou solicitar a información que precisen. Os aspirantes deberán cumprir dous requisitos imprescindibles: ter recoñecida algunha discapacidade e estar inscritos/as como demandantes de emprego.  Unha vez rematado o período de anotacións, procederase á selección dos candidatos/as que reúnan as condicións esixidas.

O curso, que se desenvolverá entre o 1 de marzo e o 15 de xuño, estará formado por un máximo de 12 alumnos/as para garantir unha atención individualizada e adaptada ás necesidades de cada participante ademáis de facilitar a realización dunha axeitada formación práctica.

Con esta nova acción formativa, especializada e acorde á demanda do mercado actual, preténdese acadar a inserción laboral dunha elevada porcentaxe dos participantes, ao igual que xa sucedeu en ocasións anteriores noutros cursos destas características.

post

Vacacións en La Manga del Mar Menor

Seis usuarios/as de Íntegro participan, xunto a varios familiares e a monitora de tempo libre do centro, nunha excursión organizada por COCEMFE   

Participantes do programa Vacaciones COCEMFE 2017

Esta fin de semana un grupo de usuarios e usuarias de Íntegro partiron rumbo a La Manga del Mar Menor, na rexión de Murcia, para participar no programa de vacacións 2017 organizado por COCEMFE (Confederación Española de Personas con Discapacidad Física y Orgánica) e co-financiado con fondos do Ministerio de Asuntos Sociais. Con esta actividade, dirixida a persoas con diversidade funcional, preténdese promover a realización de actividades de lecer lonxe das súas localidades de orixe e fomentar a convivencia con compañeiros/as doutras entidades.

Ademais de ir á praia tamén aproveitan para facer turismo

Coa intención e a ilusión de gozar duns días de praia e descanso saíron o pasado venres pola noite seis dos nosos usuarios/as xunto a algúns dos seus familiares e a monitora de ocio e tempo libre do centro, Lucía Blanco. Ademais de estar desfrutando xa dos marabillosos areais e o excelente clima dese enclave turístico, situado en pleno litoral levantino, ao longo desta semana terán a oportunidade de visitar os principais puntos de interese da cidade e descubrir a beleza paisaxística dalgunhas das localidades máis próximas.

Durante a súa estancia, os/as participantes permanecen aloxados nun complexo hoteleiro con instalacións accesibles e adaptadas ás súas necesidades, equipamentos deportivos, piscinas, spa e unha ampla oferta de actividades para cubrir o seu tempo de lecer.

O regreso está previsto para o vindeiro sábado. Así que, haberá que agardar ata entón para ver que aventuras nos contan e cal foi o balance do seu paso por terras murcianas. Seguro que a experiencia pagará a pena a xulgar polas seguintes imaxes. Boa estada!

post

15 usuarios e usuarias de Íntegro visitan Madrid co programa Respiro Familiar Vacacional

Quen dixo que as vacacións xa remataron? En Íntegro non fixeron máis que comezar! Un grupo de usuarios e monitores da nosa asociación acaban de poñer rumbo a Madrid dentro do programa Respiro Familiar Vacacional, cofinanciado por LaCaixa de Baio (Zas).

A expedición, integrada por 15 usuarios/as e 4 monitores/as, iniciou onte pola mañá unha viaxe de catro días coa finalidade de gozar dunhas xornadas de descanso visitando algúns dos lugares máis emblemáticos da capital. Aínda que se trata do primeiro ano que se pon en marcha esta actividade, dende a asociación destacaron a boa acollida que esta viaxe tivo entre os usuarios/as e as súas familias acadando unha excelente resposta e unha participación que supera o 90%.

la foto 4Ademais da colaboración da entidade bancaria, esta iniciativa tamén está subvencionada con fondos do centro ocupacional procedentes da elaboración e comercialización dos nosos produtos (Bicos de Amora, obxectos de bixutería e decoración, e todo tipo de detalles personalizados). Un intenso e excelente traballo que deu os seus froitos grazas á confianza de moitas persoas anónimas que apostaron polos estes artigos para agasallar en eventos e celebracións especiais. O resto do importe da viaxe foi sufragado pola entidade e pequenas aportacións dos familiares dos participantes.

Programala foto 4

Tras visitar no día de onte a fermosa cidade de Segovia, con parada obrigada no acueduto e na cidade vella, hoxe tocou percorrido polo Zoo-Acuario de Madrid onde lles agardaban varios espectáculos mariños e exhibicións coas que pasaron un día inesquecible. Mañá pola mañá desprazaranse ata a zona centro da capital para coñecer as principais rúas da cidade (Zona Preciados, Porta do Sol, Gran Vía) e visitar o emblemático Estadio Bernabéu. Xa pola tarde achegaranse ata o fermoso Parque do Retiro, onde esta previsto unha visita guiada moi especial da man do presidente de COCEMFE, Anxo Queiruga. O regreso será o xoves, non sen antes realizar algunha parada polo camiño para compras de última hora. Boa viaxe a todos/as!

la foto 1la foto 3la foto 2

 

post

Catro concellos de Bergantiños contarán co Punto de Intervención para Mulleres con Diversidade Funcional de Íntegro

O 2016 non podía empezar con mellor pé! Se rematamos o ano dando a coñecer o programa CapacítaT, para a educación e formación da sociedade en materia de diversidade e inclusión, agora tócalle a quenda ás mulleres. O Punto de Intervención para Mulleres con Diversidade no ámbito rural (PIMD Rural), que a Asociación Íntegro puxo en marcha nas súas instalacións no 2015, trasladarase a varios concellos da comarca de Bergantiños co fin de ampliar as actuacións que se están levando a cabo dende a entidade e incrementar a colaboración cos servizos de proximidade á cidadanía.

O programa contempla accións para a mellora do emprego e a mediación laboral e profesional

Dende hai anos o centro de recursos de Nantón desenvolve un programa específico de asesoramento e intervención integral para persoas con diversidade funcional, especialmente mulleres, financiado pola Secretaría Xeral de Igualdade e polo Fondo Social Europeo (FSE). Nesta liña, o ano pasado botou a andar o PIMR Rural co obxectivo de promover medidas específicas de loita contra a discriminación e desigualdade de oportunidades que sofre este colectivo, ademais de desenvolver actividades que faciliten o seu empoderamento e reforcen o seu papel no ámbito rural ata acadar unha situación de normalidade.

 

 

Cabana de Bergantiños, Laxe, Ponteceso e Malpica serán, a partires deste ano, os primeiros concellos da Costa da Morte en contar cunha ubicación propia do PIMD Rural, permitindo achegar e aproveitar os recursos técnicos da nosa asociación para poñelos ao servizo das persoas que residen nas diferentes localidades do noso entorno de intervención.

Grazas a este novo programa de cooperación tamén se poderán mellorar as actuacións previstas nos Plans de Igualdade Municipais con medidas específicas para a atención de mulleres con diversidade funcional.

Servizos

Os PIMD Rural ofrecerán completa información sobre os programas e recursos da Asociación Íntegro

As mulleres que se acheguen ata os puntos de intervención poderán atopar ampla información e asesoramento sobre recursos en materia de diversidade; atención psicolóxica e mediación familiar; accións encamiñadas á adquisición de habilidades persoais e sociais básicas así como competencias para a mellora do emprego e apoio na mediación laboral e profesional. Ademais, realizaranse actividades de prevención da violencia de xénero e asesoramento de ocio e participación social. Así mesmo, as usuarias deste novo servizo terán información continua e actualizada sobre todos os programas e accións específicas que se desenvolven en Íntegro.

En breve, poderás atopar na nosa web toda a info que precises sobre o PIMD Rural a través dunha nova sección que crearemos para manterte puntualmente informada. Mentres tanto, se te queres achegar ao novo punto de intervención só tes que poñerte en contacto con nós chamando ao 981 734 985 ou preguntando no departamento de servizos sociais do teu concello.

post

Actividades para todas as idades na I Xornada Diversidade e Familia organizada por Íntegro

Baixo o lema Capacíta-T Avanzando cara a inclusión  a Asociación Íntegro celebrará o vindeiro 3 de decembro, coincidindo co Día Internacional das Persoas con Diversidade Funcional, a I Xornada Diversidade e Familia. Será unha xornada de sensibilización, aberta á participación cidadá, para dar a coñecer as necesidades reais das persoas con diversidade funcional, destacar o papel das familias e romper os estereotipos que a sitúan nun plano de nferioridade. Relatorios, charlas e tamén vivencias persoais serán parte do programa de actos que se desenvolverá no edificio das Escolas de A Trabe (Ponteceso) en horario de 17 a 20.

Pero esta iniciativa, que forma parte do programa Capacíta-T, non só está aberta á poboación adulta senón tamén aos máis cativos/as. Coñecedores de que o piar fundamental para romper barreiras mentais e propiciar a normalidade é a educación de base,  incluímos na xornada diferentes obradoiros, contacontos e xogos para, ademais de posibilitar a conciliación familiar dos asistentes, achegar aos nenos/as de infantil e primaria ós conceptos de diversidade e inclusión real. Ao remate procederase á entrega de premios do concurso “O noso mundo”, no que participaron escolares de diferentes centros de Ponteceso, e á exposición dos seus traballos.

Avanzando cara a inclusión é o lema desta iniciativa dirixida a persoas de todas as idades coa intención de educar e sensibilizar

IMG_5329

Esta mesma semana o presidente de Íntegro, Adolfo López Baña, mantivo unha reunión de traballo con algúns membros do equipo directivo e persoal da entidade para ultimar os preparativos dunha xornada que “pretende ser un punto de encontro e diálogo, non só de afectados/as e familiares, senón de toda a sociedade en xeral, porque a plena inclusión das persoas con diversidade é cousa de todos”, asegurou.

Dende Íntegro animamos a todas as persoas que o desexen a asistir e participar nesta iniciativa informativa e didáctica pero tamén lúdica, e coñecer, de primeira man, o resto de accións que integrarán o programa para o vindeiro ano.

Relatorios e vivencias persoais 

Logo do acto inaugural, a cargo do presidente de Íntegro, Adolfo López Baña,  e do alcalde de Ponteceso, Xosé Lois García Carballido, dará comezo a primeira parte da sesión de relatorios, na que intervirán Noelia Barreira e Begoña Rial, directora e psicóloga- respectivamente- do centro de recursos de Nantón, para falar sobre Diversidade é vida, e a autora de “La Mirada de Ángel”, Mª Luisa Fernández, nai e membro do padroado de ASPANAES, quen ademais de presentar o seu libro conversará sobre O poder das familias.

A segunda parte do acto contará cunha convidada de excepción, Martina González Veiga, psicóloga experta en sexoloxía e xerente do centro Con mucho gusto!, unha das voces máis autorizadas da nosa comunidade para abordar as necesidades afectivo-sexuais das persoas con diversidade funcional.

A rolda de conferencias rematará con dous relatos En primeira persoa, o de Ramón Pombo Castro (ex-xogador do AMFIV e Bergantiñán do Ano 2011) e o de David Pombo Rivera, ambos integrantes da directiva de Íntegro e administradores de Asubiomedia, dous exemplos de superación, adaptación e crecemento persoal.

Capacíta-T

IMG_5362

Este evento está enmarcado dentro do programa Capacíta-T, deseñado pola Asociación Íntegro para a capacitación da cidadanía a través da sensibilización, a educación e a formación para acadar a plena normalidade e inclusión das persoas con diversidade. A I Xornada Diversidade e Familia é  un paso máis para conseguilo. Contamos con tod@s vós!

Debido ao aforo limitado da sala sería convinte confirmar a asistencia ao acto chamando ao teléfono 981 734 985 ou ben anotándose no evento creado para tal fin na nosa páxina de Facebook.

IMG_5337

post

O curso de pladur inaugurado hoxe en Buño reforza o papel de Íntegro coma entidade prestadora de servizos

SAMSUNG CAMERA PICTURESO curso de técnicas de colocación de pladur que comezou hoxe en Buño é unha mostra máis da decisión de Íntegro de converterse nunha entidade “sostible”, con maior autonomía e menor dependencia das axudas institucionais. Íntegro quere ser “unha entidade prestadora de servizos”, insistiu o presidente, Adolfo López Baña, no acto inaugural. Nese sentido agradeceu a aposta do Concello de Malpica pola visibilización das pe
rsoas con diversidade funcional ou, coma neste caso tamén, en risco de exclusión. “Malpica é o primeiro concello que aposta pola visibilización destes colectivos, é un exemplo para outros”, manifestou.

A asociación agradece a aposta do Concello de Malpica pola visibilización das persoas con diversidade funcional e pono como exemplo para outras institucións

O obradoiro de técnicas de colocación de pladur, que tamén incluirá un apartado de pintura, permitirá a formación de 10 persoas con diversidade funcional ou en risco de exclusión. O curso está organizado polo Concello de Malpica e subvencionado pola Deputación Provincial da Coruña, e impartirase todos os luns, martes e xoves, de 9.30 a 13.00 horas, ata o 3 de decembro. Á inauguración asistiron a concelleira de Servizos Sociais, Marisol Blanco Gorín, e o alcalde de Malpica, Eduardo Parga Veiga, que animou aos alumnos e alumnas a aproveitar o curso para intentar mellorar a súa situación laboral. En representación de Íntegro asistiron o presidente e a vogal María José Cousillas. O taller será impartido polo noso monitor Miguel Álvarez.