post

Persoas usuarias do Centro Ocupacional visitan varias empresas da Costa da Morte

A actividade, incluída no programa de formación, orientación e inserción laboral, pretende potenciar as habilidades ocupacionais e pre-laborais das persoas con diversidade funcional

Dentro do programa de formación, orientación e inserción laboral, que se desenvolve no Centro Ocupacional Íntegro co obxectivo de promover a autonomía persoal e a vida independente das persoas con diversidade funcional, un grupo de usuarios e usuarias, acompañados/as do persoal voluntario da entidade, veñen de realizar unha rolda de visitas a varias empresas da Costa da Morte para coñecer os diferentes perfís profesionais que existen na contorna, analizar os sectores aos que pertencen e achegarse ás súas rutinas de traballo.

Para complementar a formación teórica en materia de orientación e inserción laboral, que cada semana se leva a cabo nas dependencias de Nantón (Cabana de Bergantiños), o pasado mes de setembro realizáronse varias saídas a empresas da contorna para posibilitar a aprendizaxe e desenvolvemento de habilidades ocupacionais e pre-laborais necesarias para unha plena inclusión no mercado de traballo.

Agrosoneira, Eroski, Granxa Os Loureiros e Comercial Benedicto foron os novos destinos deste programa, co que tamén se pretende potenciar as capacidades individuais, a participación na vida social e a mellora da autonomía e a autoestima das persoas con diversidade. Ademais de amosarse interesados/as no funcionamento interno das empresas, os usuarios e usuarias do Centro Ocupacional quixeron coñecer máis a fondo as rutinas de traballo que se desenvolven a diario en cada unha. Quizais coa intención de formar parte delas algún día! Desde Íntegro desexamos que así sexa!

post

Mais Porvir promove a inserción laboral de persoas con discapacidade coa contratación de dous auxiliares de limpeza

Os traballadores/as participaron previamente nunha acción formativa coordinada por Inserta Empleo e co-financiada pola Iniciativa de Emprego Xuvenil, o Fondo Social Europeo (FSE) e a Fundación ONCE

A semana pasada, o Centro Especial de Emprego MAIS PORVIR Xestión Social procedeu á contratación de dúas persoas con discapacidade para a realización de tarefas de limpeza e mantemento de instalacións. Os traballadores/as son dous dos alumnos/as que participaron na acción formativa “Experto en limpeza de inmobles”, impartida pola entidade do 23 de novembro ao 11 de xaneiro deste ano.

O curso, co-financiado pola Iniciativa de Emprego Xuvenil, o Fondo social Europeo (FSE) e a Fundación ONCE, no marco do Programa Operativo de Emprego Xuvenil, estivo coordinado pola asociación Inserta Empleo e contou cunha duración de 150 horas, na súa maioría de carácter práctico.

O obxectivo desta formación, dirixida a persoas desempregadas con certificado de discapacidade igual ou superior ao 33% ou incapacidade permanente recoñecida en grado total, absoluta ou gran invalidez,  consistiu en proporcionar ao alumnado os coñecementos e recursos necesarios para o desempeño das tarefas de limpeza e desinfección diaria de inmobles en tempos da Covid. Os resultados acadados foron moi positivos e agardamos que se traduzan en novas contratacións.

post

Rematado o curso de creación de perfís en webs de emprego para achegar ao mercado laboral ás mulleres con diversidade funcional do rural

No último ano, 36 persoas beneficiáronse do Punto de Intervención para Mulleres, co-financiada polo Fondo Social Europeo (FSE) no marco do programa operativo FSE Galicia 2014-2020

O mes de setembro deixounos un balance máis que positivo no Punto de Intervención para Mulleres con Diversidade Funcional do Rural (PIMDRural), unha iniciativa promovida pola asociación Íntegro e co-financiada polo Fondo Social Europeo (FSE) no marco do programa operativo FSE Galicia 2014-2020, para fomentar a igualdade de oportunidades e contribuír a diminuír a triple discriminación na que se atopan as mulleres en situación de especial vulnerabilidade.

Tras un ano de intensa actividade formativa para dotar ás mulleres do rural dunha maior autonomía e independencia, necesarias para mellorar a súa situación persoal, social e laboral, o pasado mes de setembro puxemos en marcha unha novidosa acción, totalmente de balde baseada na creación de perfís en webs de emprego, coa finalidade de mellorar a formación das participantes de cara a aumentar a súa empregabilidade ata lograr a plena integración socio-laboral.

Balance

Durante o período 2018/2019, un total de 36 mulleres en situación de especial vulnerabilidade beneficiáronse do noso servizo de mediación familiar e de apoio e orientación laboral, postos en marcha hai xa catro anos. Moitas delas, formaron parte tamén dun extenso e variado programa formativo, no que se impartiron cursos relacionados coa procura de emprego a través do teléfono móbil, formación básica en prevención de riscos laborais e confección de currículos e cartas de presentación.

Así mesmo, leváronse a cabo numerosas accións de acompañamento na busca de emprego, promoción do emprendemento e prospección do mercado de traballo, intermediación e tutorización laboral e profesional logrando 4 insercións laborais, unha cifra moi positiva tendo e conta a triple discriminación que padece este colectivo (muller con diversidade funcional que reside no medio rural).

Ademais das sesións teóricas, as participantes tiveron a oportunidade de achegarse á realidade actual dalgunhas das empresas máis importantes e punteiras de Galicia como é o caso de Aluman, Inditex e Cerdeimar, entre outras. Nos vindeiros meses, está previsto continuar con este ciclo de visitas para adquirir novos itinerarios de inserción profesional.

 

post

Íntegro inicia un ciclo de visitas a grandes empresas para promover a inserción laboral de persoas con diversidade

Dez usuarios/as do centro ocupacional e 6 mulleres do PIMD Rural foron os/as primeiros participantes desta novidosa acción, que tivo como destino Aluman pero que continuará con visitas a empresas como Coca-Cola, Inditex ou Cerdeimar, entre outras   

Un dos obxectivos da asociación Íntegro é dotar ás persoas con diversidade funcional da zona rural dos medios formativos e laborais necesarios para o desenvolvemento dunha vida plena, autónoma e igualitaria. Para elo, a nosa entidade vén de iniciar un ciclo de visitas a grandes empresas da contorna co obxectivo de poñer en marcha novos “ itinerarios de inserción profesional” para mellorar a capacitación profesional e o acceso ao mercado de traballo tanto dos usuarios do noso centro ocupacional como das participantes do programa PIMD Rural, financiado pola Secretaría Xeral de Igualdade da Xunta de Galicia e o Fondo Social Europeo (FSE).

A empresa Aluman, con sede no municipio de Arteixo, foi primeiro destino desta interesante iniciativa, na que, nesta ocasión, participaron dez usuarios/as do centro ocupacional e 6 mulleres do Punto de Información á Muller con Diversidade. Ata alí se desprazaron, o pasado día 28, todos/as participantes, acompañados/as pola terapeuta ocupacional e a educadora Social do centro, para realizar un percorrido polas instalacións e asistir a unha charla na que recibiron detallada información sobre o funcionamento da fábrica e as diferentes áreas de traballo que engloba. 

 

 

Esta actuación, que forma parte do plan estratéxico de inserción laboral do centro, verase complementada con novas visitas a outras grandes empresas, punteiras na  xeración de emprego e de riqueza na nosa contorna como é o caso do grupo Inditex, a conserveira Cerdeimar ou a sede de Coca-Cola na Coruña, entre outras. Ademais dunha primeira toma de contacto co tecido empresarial, esta ronda de visitas propiciará un maior achegamento ao mundo laboral das persoas con diversidade funcional que residen nas zonas rurais e, especialmente, das mulleres que sofren unha dobre discriminación, converténdose nun dos grupos de exclusión social máis vulnerables. O número de participantes variará en cada saída en función da dispoñibilidade das empresas. Manterémosvos informados/as!

 

 

 

 

 

 

post

Axudante de cociña e peón de xardinaría, novas oportunidades para o emprego en Íntegro

  •  Ambas accións formativas, destinadas á mellora do emprego, están subvencionadas pola Xunta de Galicia e o Fondo Social Europeo (FSE) dentro do Programa Operativo de Galicia 2014-2020
  • As clases están formadas por un máximo de dez alumnos/as con diversidade funcional para ofrecer unha atención individualizada e adaptada ás súas necesidades

En Íntegro temos claro os nosos propósitos para o 2018 e sabemos como conseguilos. Unha das nosas prioridades é acadar a inserción laboral das persoas con diversidade funcional e, especialmente, das que residen no medio rural. Para logralo, dende a entidade apostamos por unha formación de calidade, individualizada e adaptada ás súas necesidades. O Centro Especial de Emprego e o Centro de Recursos, situados na localidade cabanesa de Nantón, desenvolven numerosas acción formativas, co-financiadas pola Consellería de Política Social da Xunta de Galicia e o Fondo Social Europeo (FSE) dentro do Programa Operativo de Galicia 2014-2020, coa finalidade de mellorar a empregabilidade dun dos colectivos máis vulnerables da sociedade actual e garantir a igualdade de oportunidades e acceso ao mercado de traballo.

Na actualidade, son varios os cursos que conforman o programa de formación integral e inclusivo elaborado para este ano. Un dos máis avanzados é o de Axudante de Cociña que se está a impartir nas nosas instalacións dende o pasado 11 de decembro. Este obradoiro, de 78 horas de duración, está formado por un total de dez persoas, 4 homes e 6 mulleres, con diversidade funcional e procedentes de diferentes municipios da Costa da Morte.

E contra todo prognóstico, a eles non se lles está dando nada mal! Mentres que elas se mostran máis rápidas e resolutivas entre os fogóns, eles semellan máis ordenados e tranquilos, aínda que igual de eficientes tanto na elaboración dos pratos como na presentación dos mesmos. A manipulación dos alimentos e a hixiene e limpeza na cociña son outras das materias que xa dominan tamén á perfección.

Ademais das sesións teórico-prácticas, impartidas por persoal cualificado, tamén se inclúen competencias transversais e prácticas en empresas unha vez rematadas as clases, previsto para o 23 de marzo. Esperemos que tanto esforzo, ilusión e bo facer teña a súa recompensa e se traduza en postos de traballo estable e de calidade. Sorte a todos/as!

E quen está de sorte son os/as amantes da xardinaría porque mañá dará comezo unha nova acción de formación co-financiada pola Consellería de Política Social e o Fondo Social Europeo (FSE), e especializada no coidado e mantemento de zonas verdes. Poderán participar ata un máximo de dez persoas con diversidade funcional coa finalidade de ofrecer unha atención individualizada e adaptada ás necesidades de cada alumna/o. Se estás interesada/o en formar parte do curso de Peón de Xardinaría, que se impartirá ata o 28 de marzo (104 horas), consulta a dispoñibilidade de prazas no 981 734 985.

post

Clausurado en Laxe o sétimo curso do PIMD Rural organizado pola Asociación Íntegro

Trátase dun programa formativo financiado pola Secretaría Xeral de Igualdade e o Fondo Social Europeo (FSE)

Hai uns días clausuramos o curso de Artes Manuais levado a cabo no Concello de Laxe dentro do programa do Punto de Intervención para Mulleres con Diversidade (PIMD Rural), financiado pola Secretaría Xeral de Igualdade da Xunta de Galicia e o Fondo Social Europeo (FSE).

CLAUSURA TAPAS E APERITIVOS 1

Dúas alumnas do curso de Cociña de Malpica xa conseguiron traballo

Na entrega de diplomas estiveron presentes cinco das oito mulleres que participaron nesta acción formativa, acompañadas de varios representantes da Asociación Íntegro e dos  responsables do departamento municipal de Servizos Sociais. Esta actividade, realizada o pasado mes de xullo nos locais sociais de Traba e de Laxe, concluíu con gran éxito de participación superando as expectativas previstas. Ademais, ao igual que aconteceu noutros concellos incluídos neste programa formativo, as alumnas- mulleres, prioritariamente, con disCapacidade- amosaron gran interese e implicación durante a súa formación co obxectivo de sentar as bases para a súa posterior inserción laboral. Este foi o caso de dúas usuarias do curso de Tapas e Aperitivos de Malpica que atoparon traballo antes de rematar o obradoiro.

Balance

Dende a posta en marcha do PIMD Rural, implantado en catro concellos da Costa Bergantiñá- Cabana, Malpica, Ponteceso e Laxe-, xa se desenvolveron sete accións destinadas á formación de mulleres con diversidade funcional: 4 no Centro de Recursos de Nantón (Cabana), 2 en Malpica e 1 en Laxe. No mes de setembro terá lugar a oitava no municipio de Ponteceso, para a que xa están cubertas todas as prazas. As especialidades impartidas abarcan diferentes temáticas segundo as preferencias das alumnas: Artes Manuais, Informática e Mecanografía, Redes Sociais e Cociña.

Pero as noticias en torno ao PIMD non rematan aquí! Despois do verán agárdannos importantes novidades orientadas á inserción laboral e á mellora do emprego. Un paso máis que esperemos sexa firme e definitivo na procura da inclusión das persoas con diversidade e, especialmente, dun dos colectivos máis vulnerables: as mulleres.

Bo verán!

IMG-20160622-WA0083CLAUSURA TAPAS E APERITIVOS 2

IMG-20160623-WA0002

IMG-20160711-WA0001

 

 

 

 

 

 

 

post

Dúas alumnas do curso de Tapas e Aperitivos do PIMD Rural de Íntegro xa acadaron a inserción laboral

CLAUSURA TAPAS E APERITIVOS 1Onte tivo lugar no Concello de Malpica a clausura do curso de Tapas e Aperitivos organizado pola Asociación Íntegro e o Departamento de Servizos Sociais dentro do PIMD Rural. Seis das oito participantes recibiron os seus diplomas de mans do presidente da nosa entidade, Adolfo López, e a concelleira da área, Marisol Blanco.  As outras dúas alumnas non puideron completar o curso porque xa conseguiron traballo, principal finalidade desta acción formativa co-financiada pola Secretaría Xeral de Igualdade da Xunta de Galicia e o Fondo Social Europeo (FSE).

Tanto a responsable municipal como o noso presidente amosaron a súa satisfacción pola inserción laboral de ambas usuarias e destacaron a importancia de continuar desenvolvendo programas conxuntos de colaboración para que este tipo de iniciativas dean os seus froitos e posibiliten o acceso ao mercado laboral, que no caso do Punto de Intervención para Mulleres con Diversidade Funcional van especialmente dirixidas ás mulleres con disCapacidade para seguir avanzando cara a súa inclusión real.CURSO TAPAS E APERITIVOS

As alumnas demostraron o resultado da súa formación preparando e servindo tomates recheos e quiche de verduras, dous pratos que acadaron a máxima cualificación tanto pola súa presentación como polo seu sabor. Parabéns a todas polo excelente traballo realizado!