post

Medio centenar de estudantes do IES Ramón Caamaño de Muxía participaron nunha charla sobre lesións medulares

O presidente da entidade, Adolfo López Baña, e a educadora social Tania Bartucca foron os encargados de dirixir a xornada de sensibilización que rematou cun circuíto de obstáculos

A campaña de prevención de lesións medulares promovida pola asociación Íntegro continúa viaxando polos centros de ensino da Costa da Morte para concienciar á mocidade sobre a importancia de evitar prácticas de risco que poidan derivar en danos irreparables. O pasado mércores 27 fixo parada no IES Ramón Caamaño de Muxía cunha xornada de sensibilización na que participaron medio centenar de alumnos/as de 3º e 4º da ESO.

Ademais da proxección do vídeo da campaña “A ti tamén che pode pasar”, no que interveñen tanto profesionais sanitarios como doentes, a educadora social do Centro de Recursos de Nantón, Tania Bartucca, ofreceu unha charla informativa sobre as principais causas e consecuencias dos accidentes medulares así como das medidas a ter en conta para evitalos. Segundo as estatísticas, os mergullos en praias e piscinas e as imprudencias ao volante son os causantes da maioría de sinistros entre a mocidade, “polo que é moi importante que tomedes conciencia de que un segundo pode cambiar toda unha vida”, recalcou o presidente da entidade Adolfo López Baña, que tamén estivo presente en dita xornada,  para insistir o alumnado sobre a importancia da prevención.

A continuación, o alumnado de secundaria tivo a oportunidade de poñerse na pel dunha persoa con mobilidade reducida a través da realización dun circuíto de obstáculos, que se levou a cabo nas propias instalacións do centro educativo. Aínda que os e as estudantes amosaron gran habilidade e destreza sobre a cadeira de rodas, de seguido comprenderon a dificultade de sortear diariamente obstáculos e barreiras derivadas da falta de accesibilidade.

post

Íntegro achega a diversidade a máis de 200 escolares da Costa da Morte

 Esta semana a campaña de lesións medulares, a Diversescola e o Visítanos promoveron numerosas actividades de sensibilización en varios colexios e institutos da zona

Onte foi un día de intensa actividade na asociación Íntegro, tanto dentro como fóra das nosas instalacións. Mentres que o Centro de Recursos abría as súas portas para recibir a un grupo de alumnos/as do CEIP Eduardo Pondal de Ponteceso, dentro do programa Visítanos, varios responsables da entidade desprazáronse ata o IES Terra de Soneira de Vimianzo para manter unha xuntanza co alumnado de 4º da ESO e 1º de bacharelato no marco da campaña de prevención de lesións medulares.

Esta semana en Nantón imos de aula en aula! A primeira cita foi cos alumnos e alumnas de 3º da ESO do CPI Alcalde Xosé Pichel de Coristanco, cos que mantivemos unha charla informativa o pasado martes para falarlles sobre a prevención de lesións medulares e a importancia de evitar prácticas de risco en puntos de alta sinistralidade como praias, piscinas e estradas. Dentro desta campaña, que Íntegro está a impartir nos centros de primaria e secundaria da Costa da Morte, o segundo encontro tivo lugar onte no IES Terra de Soneira de Vimianzo. 60 escolares de 4º da ESO e 1º de bacharelato participaron nunha animada e moi concorrida xuntanza con varios membros da entidade na que ademais da proxección do vídeo “A ti tamén che pode pasar”, houbo unha charla informativa e un improvisado coloquio sobre as principais causas e consecuencias das lesións medulares e a importancia da súa prevención.

Os que estes días tamén se achegaron de cheo á diversidade foron os máis pequenos/as. Concretamente onte,  máis de 30 nenos e nenas de 5º e 6º de primaria do CEIP Eduardo Pondal de Ponteceso estiveron de visita en Íntegro para coñecer por dentro as nosas instalacións e o funcionamento dos obradoiros.  Da man de Visítanos, unha iniciativa do programa Capacíta-T promovida por Íntegro, e xunto aos nosos usuarios e usuarias percorreron un a un os talleres do Centro de Día e do Centro Ocupacional con parada obrigada na cociña, no ximnasio e na sala de artes manuais, onde tiveron a oportunidade de elaborar tanto xabóns de glicerina como pulseiras de macramé que tamén levaron como recordo. A xornada rematou coa confección dun mural no que recolleron as súas impresións sobre a experiencia vivida no centro.

Diverescola e Medulares

Pero as actividades de sensibilización nos centros educativos da comarca continuarán ata mañá. Sen ir máis lonxe, hoxe a Diverescola, a versión máis peque do programa Capacíta-T, viaxou ata as aulas de infantil do CPI As Revoltas de Cabana para achegar a diversidade a preto de 40 nenos/as, con idades comprendidas entre os 3 e os 5 anos, a través do xogo e o entretemento. Mañá venres será a quenda dos alumnos e alumnas do CEIP Milladoiro de Malpica, ata onde se trasladará a campaña de prevención de lesións medulares poñendo o punto e final así a unha semana frenética e de intensa actividade nos colexios e institutos da Costa da Morte, reflexo da aposta por unha educación inclusiva e en igualdade. Grazas!

post

Íntegro entra nas aulas do CPI As Revoltas para concienciar sobre a diversidade

O colexio cabanés acolleu unha xornada de sensibilización dirixida a estudantes da ESO e de infantil  

Onte en Íntegro saímos á rúa para levar a cabo novas accións formativas de sensibilización incluídas no programa Capacíta-T e o escenario elixido para facelo foi  o CPI As Revoltas, en Cabana de Bergantiños. Nesta ocasión, os alumnos e alumnas de 3º e 4 da ESO foron, xunto cos máis cativos/as, os e as protagonistas dunha xornada destinada a xogar, educar e concienciar sobre a diversidade. E o resultado foi espectacular!

la foto 4Pola súa banda, os estudantes de secundaria participaron nunha sesión informativa sobre prevención de lesións medulares, dentro da campaña que estamos a levar a cabo en numerosos centros educativos de primaria e secundaria da Costa da Morte. O presidente de Íntegro, Adolfo López Baña, e o vicepresidente, Ramón Pombo, foron os encargados de explicar as principais causas e consecuencias de sufrir unha lesión medular durante a charla teórica que impartiron aos alumnos/as co obxectivo, ademais, de concila foto (6)encialos sobre a importancia de previr prácticas de risco en praias e piscinas ou en accidentes de tráfico para evitar así danos irreparables. O relato das súas propias experiencias persoais deu paso á posta en práctica da destreza dos escolares sobre unha cadeira de rodas comprobando así o difícil que resulta desprazarse coa mobilidade reducida. Aínda así houbo quen se atreveu a botar unha carreira!

Mestúra-T en infantil

la foto 5

Pero os momentos máis simpáticos e sorprendentes viñeron da man de Mestúra-T, unha versión infantil do noso programa de sensibilización dirixido a concienciar aos máis pequenos mediante o xogo e o entretemento. E foron, precisamente, os alumnos de 6º de infantil os que, unha vez máis, nos deixaron impresionados/as coa súa naturalidade, espontaneidade e gran capacidade de asimilación. A directora do Centro de Recursos de Íntegro, Noelia Barreira, e a nosa psicóloga, Begoña Rial, achegaron a diversidade e a inclusión aos escolares de 5 anos mediante contacontos de sensibilización e diferentes actividades lúdicas nas que se empregaron técnicas tan divertidas como a caracterización para representar escenas cotiás da vida das persoas con diversidade funcional.  Unha experiencia moi enriquecedora que ven a reforzar a nosa aposta por unha educación inclusiva dende a infancia e unha aprendizaxe en valores. Por iso confiamos en que este programa de educación infantil dea os seus froitos e comece a implantarse nos centros de ensino como un complemento á formación dos máis cativos/as.

Se queredes que Capacíta-T ou Mestúra-T visiten o voso colexio ou instituto, non tedes máis que poñervos en contacto con nós chamando ao 981 734 985. Estaremos encantados/as de coñecervos! Vémonos na próxima e grazas a todos/as por participar!

post

Íntegro lánzase á piscina nunha nova edición do programa de natación terapéutica

A natación terapéutica é un programa de rehabilitación que utiliza as actividades acuáticas cun fin correctivo e de prevención, aproveitando as propiedades físicas que este medio aporta, mediante a práctica de exercicios e movementos específicos recollidos no marco da natación educativa. Cando o corpo entra en contacto coa auga, pesa menos e adquire maior flexibilidade poñendo en funcionamento todos os seus membros e activando os músculos, articulacións, tendóns, neuronas, etc. Sen dúbida, trátase dun deporte moi completo e con numerosos e probados beneficios, recomendado por médicos e especialistas como terapia continuada no caso de persoas con diversidade funcional e/ou pacientes que sofren algún tipo de doenza lumbar ou lesión medular.

img-20161118-wa0022En Íntegro sabémolo e, por iso, dende hai máis de seis anos ofrecemos aos nosos usuarios e usuarias un servizo de natación terapéutica como complemento ao programa de saúde e benestar que levamos a cabo no centro xunto co departamento de fisioterapia.

A actividade, que se desenvolve de outubro a maio na piscina municipal de Cabana, ten unha duración aproximada de oito meses e está impartida por monitores especializados en natación adaptada que, ademais de ensinar a nadar, realizan exercicios de estimulación dentro da auga para mellorar o funcionamento muscular e articular dos usuarios/as. As sesións lévanse a cabo unha vez á semana, xeralmente os venres, durante unha hora.img-20161118-wa0014

Coa finalidade de adaptar as clases ás necesidades individuais de cada alumno/a e prestar unha atención totalmente personalizada establécese un grupo moi reducido, formado tan só por 7 usuarios do centro de día e do centro ocupacional, que se renova cada ano para garantir a participación de todos os interesados/as e cubrir así a demanda existente.

Agardamos que este curso dea resultados tan positivos como en anos anteriores e que os nosos usuarios/as gocen dunha experiencia tan saudable como divertida. E quen sabe se este pode ser o comezo dunha longa e prometedora carreira deportiva!! Seguirémosvos informando dos seus progresos.

img-20161118-wa0012

img-20161118-wa0010

 

post

Íntegro visita o CEIP Canosa-Rus de Coristanco para informar sobre a prevención de lesións medulares

Esta mañá o presidente de Íntegro, Adolfo López Baña; o vicepresidente, Ramón Pombo, e o vogal, David Pombo, estiveron cos alumnos e alumnas de 6º de primaria do CEIP Canosa-Rus de Coristanco para presentarlles a nova campaña de prevención de lesións medulares, que está a realizar a nosa entidade en varios centros educativos da Costa da Morte. Durante a visita, explicáronlles as principais causas e consecuencias de sufrir un accidente medular e déronlles a coñecer as correspondentes medidas de prevención. Na biblioteca do colexio levouse a cabo unha charla teórica para concienciar aos estudantes sobre os danos irreparables que causan as prácticas de risco en praias e piscinas ou en accidentes de tráfico, ao tempo que lles informaron sobre como evitalos.

la-foto-1

Durante a xornada, que resultou moi satisfactoria e enriquecedora, os escolares puideron coñecer da man dos seus protagonistas as experiencias persoais que os levaron a sufrir unha lesión medular, o que espertou gran interese entre o alumnado que no dubidou en facer todo tipo de preguntas relacionadas coas dificultades e a complexidade de vivir sobre unha cadeira de rodas. Para elo, ao longo da mañá, realizaron diversas actividades lúdicas e deportivas para poñer a proba a súa destreza. Xa no ximnasio do centro educativo poideron vivir unha experiencia que resultou tan divertida como sorprendente ao comprobar, en primeira persoa, o difícil que pode chegar a ser realizar accións tan sinxelas como desprazarse dun lugar a outro ou subir e baixar unha beirarrúa. Aínda así, houbo quen se atreveu a botar unha carreira sobre a cadeira de rodas!

la-foto-2

Dende a asociación Íntegro queremos destacar a boa acollida que está a ter esta campaña de  prevención entre os/as escolares da zona e agradecer a colaboración de todas as empresas e institucións involucradas neste proxecto encamiñado á sensibilización dos máis pequenos/as coa finalidade de que tomen conciencia do gran número de obstáculos que deben sortear as persoas con mobilidade reducida na súa vida cotiá. Grazas aos alumnos/as de 6º de primaria polo seu interese e participación durante a xornada. Pasámolo xenial!

post

Íntegro e Vidú suman forzas en favor do deporte e da prevención

A asociación Íntegro vén de asinar un convenio de colaboración coa entidade deportiva Vidú, presidida polo tenista cormelán Martín Varela Dourado, para a promoción do deporte e a prevención de lesións entre a poboación infantil e xuvenil.

Con esta sinatura, celebrada o pasado 20 de abril no pavillón de Cabana de Bergantiños, ambas agrupacións pretenden unir experiencia, traballo e esforzo para poñer en marcha unha campaña de concienciación e sensibilización sobre a inclusión do deporte na vida diaria e a prevención de lesións medulares, algo moi frecuente entre os máis novos debido á práctica de actividades de risco ou aos accidentes de tráfico.

Para elo, contémplase a realización de actividades conxuntas, dirixidas principalmente aos escolares da zona, seguindo como denominador común o deporte e a superación de barreiras, tanto físicas como mentais . Charlas teóricas e exhibicións prácticas, con Martín Varela ao fronte, son as principais liñas de actuación a seguir para facer chegar estes contidos aos nen@s e moz@s da comarca. De feito, os alumn@s do IES de Ponteceso e do CEIP Xosé Pichel de Coristanco xa puideron comprobalo porque o pasado mes participaron nas primeiras sesións. Tiveron a oportunidade de escoitar auténticos exemplos de vida e comprobar, en primeira persoa,  a complexidade do deporte adaptado. Unha experiencia moi gratificante para tod@s e que lle deu que facer a máis de un!