vacacións | Integro

Seis usuarios/as de Íntegro participan, xunto a varios familiares e a monitora de tempo libre do centro, nunha excursión organizada por COCEMFE

Participantes do programa Vacaciones COCEMFE 2017

Esta fin de semana un grupo de usuarios e usuarias de Íntegro partiron rumbo a La Manga del Mar Menor, na rexión de Murcia, para participar no programa de vacacións 2017 organizado por COCEMFE (Confederación Española de Personas con Discapacidad Física y Orgánica) e co-financiado con fondos do Ministerio de Asuntos Sociais. Con esta actividade, dirixida a persoas con diversidade funcional, preténdese promover a realización de actividades de lecer lonxe das súas localidades de orixe e fomentar a convivencia con compañeiros/as doutras entidades.

Ademais de ir á praia tamén aproveitan para facer turismo

Coa intención e a ilusión de gozar duns días de praia e descanso saíron o pasado venres pola noite seis dos nosos usuarios/as xunto a algúns dos seus familiares e a monitora de ocio e tempo libre do centro, Lucía Blanco. Ademais de estar desfrutando xa dos marabillosos areais e o excelente clima dese enclave turístico, situado en pleno litoral levantino, ao longo desta semana terán a oportunidade de visitar os principais puntos de interese da cidade e descubrir a beleza paisaxística dalgunhas das localidades máis próximas.

Durante a súa estancia, os/as participantes permanecen aloxados nun complexo hoteleiro con instalacións accesibles e adaptadas ás súas necesidades, equipamentos deportivos, piscinas, spa e unha ampla oferta de actividades para cubrir o seu tempo de lecer.

O regreso está previsto para o vindeiro sábado. Así que, haberá que agardar ata entón para ver que aventuras nos contan e cal foi o balance do seu paso por terras murcianas. Seguro que a experiencia pagará a pena a xulgar polas seguintes imaxes. Boa estada!

As familias interesadas en acollerse a este servizo xa teñen á súa disposición toda a documentación e os formularios necesarios

A Federación Galega de Asociacións en favor das Persoas con Discapacidade Intelectual ou do Desenvolvemento (FADEMGA Plena Inclusión Galicia) acaba de publicar a documentación e os formularios necesarios para participar no seu programa de Respiro Familiar 2017, dirixido ás familias de persoas con discapacidade intelectual coa finalidade de proporcionarlles os medios facilitadores para que poidan afrontar con maior acougo o seu día a día e gozar dunhas xornadas de descanso e tranquilidade.

Foto: FADEMGA Plena Inclusión Galicia

Así mesmo, con este servizo tamén se pretende diminuír a tensión familiar, previr situacións de crise persoal ou familiar, favorecer dinámicas familiares e de parella normalizada, e evitar o desarraigo e o deterioro das familias, favorecendo a integración no medio e a solidariedade cidadá coas persoas con discapacidade intelectual e do desenvolvemento. Pero, sen dúbida, un dos seus principais beneficios é que facilita a permanencia no entorno familiar da persoa con diversidade, evitando así a súa inclusión en programas de maior custe económico e social.

As quendas

Foto: FADEMGA Plena Inclusión Galicia

As quendas de respiro familiar concéntranse habitualmente en pontes e períodos de vacacións. Neste tempo, os monitores organizan unha serie de actividades en función dos intereses e preferencias dos/das participantes que, na medida do posible, tratan de acordar previamente. Entre outras iniciativas destacan as excursións á praia e á piscina, os paseos, saídas ao cine e ao teatro ou as visitas a museos e exposicións.

Así mesmo, cada familia pode utilizar un máximo de 20 días de servizo ao ano para estancias programadas en instalacións comunitarias, que poderán chegar ata un máximo de 30 en caso de persoas con familiares que presenten algún problema de conduta, e 60 horas de apoios individuais para facilitar a conciliación da vida familiar, social e laboral.

Se queres darte un respiro ou precisas axuda no teu día a día, bota unha ollada ao programa elaborado por FADEMGA para este ano e escolle a opción que máis che conveña. Preme no seguinte enlace e infórmate sobre a documentación que precisas e a Solicitude de respiro familiar 2017. Para máis información podes chamar ao 981 519 650 ou consultar a web de FADEMGA en www.fademga.org. Dende Íntegro queremos animar a todas as familias a participar neste programa e darse o respiro que se merecen. Anímate e anótate xa!

Arquivos da etiqueta: vacacións

Vacacións en La Manga del Mar Menor

Dispoñibles as solicitudes para participar no programa Respiro Familiar 2017 de FADEMGA