O CPI Plurilingüe Cabo da Area de Laxe e o IES Terra de Soneira de Vimianzo protagonizaron as últimas xornadas de sensibilización de Íntegro

Publicado a 2019-03-29T15:59:32+00:00

49 nenos de 2º e 3º de primaria achegáronse a coñecer o Visítanos mentres que os de 4º da ESO e 1º de bacharelato recibiron a visita da campaña de prevención de lesións medulares

Un grupo de alumnos e alumnas de 2º e 3º curso de educación primaria do CPI Plurilingüe Cabo da Area de Laxe achegouse esta semana ata as nosas instalacións de Nantón para participar nunha nova edición do programa Visítanos, co que se pretende sensibilizar aos máis pequenos/as en materia de diversidade e inclusión. Tras unha distendida charla, protagonizada polos nosos usuarios/as e monitoras, na que se abordou o significado de ambos conceptos, os 49 estudantes procederon a realizar unha visita polo centro, xunto á directora Noelia Barreira, para coñecer de preto o seu funcionamento e o traballo que se desenvolve nos diferentes talleres.

Sen dúbida, os obradoiros de artes manuais foron os que máis chamaron a súa atención. E, moi especialmente, o de elaboración de mandalas, ao que se apuntaron sen dubidalo nin un instante para facer cadanseu deseño. A fabricación de pulseiras de macramé tamén espertou a curiosidade dos nenos e nenas, que non quixeron marchar sen aprender esta divertida e sinxela técnica. Na sala de ximnasia puxeron a proba a súa habilidade e destreza con diversos xogos de habilidade, que lle serviron para comprobar a dificultade de realizar labores cotiás desde unha cadeira de rodas.

O paso pola cociña tamén resultou do máis divertido aprendendo a facer riquísimas sobremesas coas que sorprender ás súas familias. Ao remate, os/as estudantes empregaron toda a súa creatividade e imaxinación na realización dun mural no que plasmaron as súas impresións sobre a xornada vivida no centro e no que, a bo seguro, non deberon faltar palabras como diversión e aprendizaxe.

Campaña lesións medulares

Por outra banda, a campaña de prevención de lesións medulares aterrou o pasado martes no IES Terra de Soneira de Vimianzo para concienciar ao alumnado de 4º da ESO e 1º de bacharelato sobre as causas e consecuencias de sufrir un accidente medular. Tras a proxección do vídeo elaborado por Íntegro “A ti tamén che pode pasar”, os/as estudantes seguiron con atención a charla informativa protagonizada polo David Pombo e Teresa Alvarellos, vogal e socia-colaboradora, respectivamente. Durante o acto, ambos fixeron especial incidencia na necesidade de evitar riscos innecesarios como imprudencias ao volante ou mergullos en praias e piscinas, prácticas moi habituais entre a mocidade, sobre todo, coa chegada do bo tempo.

Ao longo da mañá, os 60 alumnos/as participantes tiveron a oportunidade de comprobar en primeira persoa as dificultades de desprazarse nunha cadeira de rodas sorteando obstáculos de todo tipo nun improvisado circuíto de mobilidade, que lograron superar sen problemas grazas á súa habilidade e ás condicións de accesibilidade que reúne o centro educativo en cumprimento da normativa vixente. Así dá gusto!

Grazas a todos/as por participar!

Escolares de Camariñas e Ponte do Porto comparten risas e coñecementos no Visítanos

Publicado a 2018-05-12T19:54:02+00:00

46 alumnos e alumnas de 4º de primaria realizaron un percorrido polas instalacións e participaron en todos os obradoiros coa axuda de mestres/as e usuarios/as

Esta semana o Centro de Recursos Íntegro recibiu a visita dun grupo de alumnos e alumnas dos colexios de educación primaria de Camariñas e Ponte do Porto para participar nunha nova edición de Visítanos, unha actividade de sensibilización incluída no programa Capacíta-T destinada a concienciar aos máis pequenos en materia de diversidade e inclusión.

Onte, a primeira hora da mañá, 46 nenos e nenas de 4º curso do CEIP O Areal de Camariñas e o CEIP Ponte do Porto aterraron nas instalacións da asociación Íntegro dispostos a coñecer de preto o funcionamento da nosa entidade e achegarse ao día a día dos nosos usuarios e usuarias. Logo da charla de benvida e a proxección dun vídeo, os/as estudantes comezaron unha viaxe polas dependencias, tanto do Centro de Día como do Centro de Recursos, con parada en todas as aulas incluída a zona de xardíns e invernadoiros.

Os obradoiros de artes manuais, como o de confección de xabóns de glicerina e pulseiras de macramé, foron algúns dos que máis sorprenderon aos escolares, que non dubidaron en poñerse mans á obra para elaborar as súas propias creacións e levalas para as súas casas como recordo do seu paso polo centro.

Na cociña e no ximnasio tamén tiveron oportunidade de poñer a proba as súas habilidades coa axuda dos nosos usuarios/as e os seus propios mestres/as, aos que, por certo, a repostería non se lles dá nada mal. Ademais de realizar circuítos de mobilidade sobre unha cadeira de rodas, tamén se achegaron ao obradoiro de carpintería para tomar boa nota das labores de recuperación de mobiliario urbano que levamos a cabo e concienciarse sobre a importancia de coidar e conservar os bens e os espazos públicos. Na sala de logopedia houbo tempo para xogar e rir a gargalladas con algunhas probas que, ao principio, semellaban resistirse como as pompas de xabón ou os ollos saltóns.

Finalmente, os/as estudantes elaboraron un mural conxunto coas súas impresións dunha xornada na que ademais de aprendizaxe e coñecementos, houbo emocións e moita diversión. Grazas a todos e a todas por vir!

Máis de 100 estudantes de Ponteceso, Vimianzo e Zas protagonizan as últimas accións inclusivas de Íntegro

Publicado a 2018-04-04T16:58:55+00:00

Onte 34 alumnos/as do IES Eduardo Pondal asistiron a unha charla sobre lesións medulares e 59 do CEIP San Vicenzo de Vimianzo desprazáronse ata Nantón para participar no Visítanos. Hoxe, a campaña de prevención aterrou no CPI de Zas

Tras as vacacións de Semana Santa, a comunidade educativa da Costa da Morte volveu ser a protagonista de varios programas de sensibilización e normalización inclusiva postos en marcha pola asociación Íntegro para achegar a diversidade funcional aos nosos mozos e mozas. Así, entre onte e hoxe celebráronse varias actividades didácticas nas que participaron máis de 100 estudantes. Onte a campaña de prevención de lesións medulares chegou ata as aulas de 4º da ESO do IES Eduardo Pondal de Ponteceso mentres que o Centro de Recursos de Nantón acollía unha nova edición do Visítanos, na que participaron preto de 60 nenos e nenas do CEIP San Vicenzo de Vimianzo. E hoxe, tocoulle a quenda ao CPI de Zas, onde se levou a cabo un encontro con estudantes de 3º e 4º da ESO para falar sobre as causas e consecuencias dunha lesión medular.

Estudantes de 4º da ESO do IES Eduardo Pondal de Ponteceso

Hoxe a campaña de prevención chegou ao CPI de Zas

O regreso ás aulas no IES de Ponteceso chegou con novidades, polo menos para os 34 alumnos e alumnas de 4º da ESO que participaron na campaña de prevención de lesións medulares, organizada pola entidade para concienciar aos máis novos/as sobre a necesidade de evitar sinistros, na súa maioría, irreparables. E sobre as causas e consecuencias dos accidentes medulares xirou a xornada de onte, na que ademais de proxectarse o novo vídeo da campaña deste ano tamén se celebrou unha charla-coloquio cos estudantes, que se amosaron moi participativos/as e interesados/as, especialmente durante o relato de varias testemuñas reais, vítimas de lesións. Idéntica sesión se repetíu hoxe no CPI de Zas en presencia de 32 mozos e mozas de 3º e 4º de secundaria.

Visítanos!

Quen marchou coa lección ben aprendida foi o alumnado de 5º e 6º de primaria do CEIP San Vicenzo de Vimianzo, tras o seu paso onte polas nosas instalacións de Nantón dentro do programa Visítanos, unha acción englobada no programa Capacíta-T dirixida a sensibilizar aos máis pequenos en materia de diversidade e inclusión. Tras abordar o significado destes conceptos, para descartar ideas preconcibidas e, ás veces, erróneas, proxectouse un vídeo explicativo titulado “Lo incorrecto”.

De seguido, os 59 nenos e nenas participantes dividíronse en varios grupos e comezaron a percorrer as instalacións para coñecer un a un os diferentes obradoiros do centro. Os xogos de habilidade da sala de logopedia deron paso á creatividade que empregaron para elaborar os xabóns de glicerina e as pulseiras de macramé. Os circuítos de mobilidade no ximnasio e o taller de cociña, onde elaboraron unhas saborosas rosquillas, foron dúas das actividades que causaron maior expectación, aínda que o máis sorprendente da xornada foi a creación dun “galiñófono” na aula de música, un novo instrumento musical feito con vasos de plástico e un pouco de fío.

Ao final, cada equipo expuxo as súas impresións sobre o aprendido no centro e entre todos/as confeccionaron un mural co máis destacado do seu paso pola entidade, no que seguro figuraban en primeiro término as palabras diversión e aprendizaxe. Grazas a todos/as!

Íntegro achega a diversidade a máis de 200 escolares da Costa da Morte

Publicado a 2018-03-22T22:30:07+00:00

Esta semana a campaña de lesións medulares, a Diversescola e o Visítanos promoveron numerosas actividades de sensibilización en varios colexios e institutos da zona

Onte foi un día de intensa actividade na asociación Íntegro, tanto dentro como fóra das nosas instalacións. Mentres que o Centro de Recursos abría as súas portas para recibir a un grupo de alumnos/as do CEIP Eduardo Pondal de Ponteceso, dentro do programa Visítanos, varios responsables da entidade desprazáronse ata o IES Terra de Soneira de Vimianzo para manter unha xuntanza co alumnado de 4º da ESO e 1º de bacharelato no marco da campaña de prevención de lesións medulares.

Esta semana en Nantón imos de aula en aula! A primeira cita foi cos alumnos e alumnas de 3º da ESO do CPI Alcalde Xosé Pichel de Coristanco, cos que mantivemos unha charla informativa o pasado martes para falarlles sobre a prevención de lesións medulares e a importancia de evitar prácticas de risco en puntos de alta sinistralidade como praias, piscinas e estradas. Dentro desta campaña, que Íntegro está a impartir nos centros de primaria e secundaria da Costa da Morte, o segundo encontro tivo lugar onte no IES Terra de Soneira de Vimianzo. 60 escolares de 4º da ESO e 1º de bacharelato participaron nunha animada e moi concorrida xuntanza con varios membros da entidade na que ademais da proxección do vídeo “A ti tamén che pode pasar”, houbo unha charla informativa e un improvisado coloquio sobre as principais causas e consecuencias das lesións medulares e a importancia da súa prevención.

Os que estes días tamén se achegaron de cheo á diversidade foron os máis pequenos/as. Concretamente onte, máis de 30 nenos e nenas de 5º e 6º de primaria do CEIP Eduardo Pondal de Ponteceso estiveron de visita en Íntegro para coñecer por dentro as nosas instalacións e o funcionamento dos obradoiros. Da man de Visítanos, unha iniciativa do programa Capacíta-T promovida por Íntegro, e xunto aos nosos usuarios e usuarias percorreron un a un os talleres do Centro de Día e do Centro Ocupacional con parada obrigada na cociña, no ximnasio e na sala de artes manuais, onde tiveron a oportunidade de elaborar tanto xabóns de glicerina como pulseiras de macramé que tamén levaron como recordo. A xornada rematou coa confección dun mural no que recolleron as súas impresións sobre a experiencia vivida no centro.

Diverescola e Medulares

Pero as actividades de sensibilización nos centros educativos da comarca continuarán ata mañá. Sen ir máis lonxe, hoxe a Diverescola, a versión máis peque do programa Capacíta-T, viaxou ata as aulas de infantil do CPI As Revoltas de Cabana para achegar a diversidade a preto de 40 nenos/as, con idades comprendidas entre os 3 e os 5 anos, a través do xogo e o entretemento. Mañá venres será a quenda dos alumnos e alumnas do CEIP Milladoiro de Malpica, ata onde se trasladará a campaña de prevención de lesións medulares poñendo o punto e final así a unha semana frenética e de intensa actividade nos colexios e institutos da Costa da Morte, reflexo da aposta por unha educación inclusiva e en igualdade. Grazas!

Estudantes do CEIP Joaquín Rodríguez Otero de Buño achéganse á diversidade con Visítanos

Publicado a 2017-12-14T17:18:30+00:00

O pasado mércores 31 escolares de 3º, 4º, 5º e 6º de primaria gozaron dunha xornada de convivencia e sensibilización en Íntegro dentro do programa Capacíta-T

Esta semana a asociación Íntegro volveu a abrir as súas portas a escolares da Costa da Morte para acoller a celebración dunha nova edición de Visítanos!, unha actividade educativa integrada no programa Capacíta-T dirixida a concienciar, educar e capacitar aos máis pequenos/as en materia de diversidade e inclusión.

Tras a recente visita dos/as estudantes do CPI de Zas, o mércores tocoulle a quenda aos alumnos e alumnas do CEIP Joaquín Rodríguez Otero de Buño, en Malpica. E a

experiencia, novamente, resultou ser un éxito! Ademais de gozar dunha xornada de convivencia, xogos e diversión xunto aos nosos usuarios e usuarias, tamén houbo tempo para a aprendizaxe achegándose ao día a día das persoas con diversidade funcional e descubrindo algunhas das súas múltiples habilidades.

A visita deu comezo arredor das 10:30h cunha breve charla explicativa sobre o funcionamento do centro e os diferentes servizos que nel se prestan. E quen mellor para contalo que os seus propios destinatarios/as, auténticos protagonistas dunha iniciativa encamiñada á sensibilización e á interacción dos estudantes.

Nesta ocasión, 31 nenas e nenos de 3º, 4º, 5º e 6º de educación primaria foron distribuídos en varios grupos para realizar o percorrido polas instalacións e participar nos diferentes obradoiros. Exercitación mental, logopedia e ximnasia foron as actividades que arrincaron os primeiros sorrisos e xestos de admiración entre os cativos/as que non dubidaron en subirse a unha cadeira de rodas para poñer a proba a súa destreza coa mobilidade reducida. Os talleres de artes manuais e cociña lograron espertar a faceta máis artística e creativa dos participantes, dando renda solta á imaxinación para elaborar receitas orixinais ou novidosos artigos de cara ao Nadal. Sen dúbida, a confección de pulseiras e a colección de xabóns de glicerina Bicos de Amora acapararon o interese de alumnos/as e mestres/as.

Ao rematar a xornada, os/as estudantes confeccionaron un mural, que exporán no seu colexio, coas súas impresións sobre o centro e as experiencias vividas nel. Ogallá sexan tan positivas e gratificantes como as nosas.

Visítanos! abre a porta da diversidade a estudantes de primaria do CPI de Zas

Publicado a 2017-11-23T21:24:37+00:00

27 alumnos/as de 4º, 5º e 6 de primaria visitaron o centro de Nantón e participaron en diferentes obradoiros cos nosos usuarios dentro do programa Capacíta-T

Esta semana as portas de Íntegro volveron a abrirse para un grupo de escolares da Costa da Morte cos que celebramos unha nova edición de Visítanos!, unha actividade educativa que forma parte do programa Capacíta-T co que a nosa entidade pretende concienciar, educar e capacitar aos máis pequenos/as en materia de diversidade.

Achegar o día a día das persoas con diversidade funcional aos estudantes de infantil e primaria é unha ensinanza máis doada, entretida e efectiva cando os/as propios/as protagonistas se converten en mestres/as por unhas horas e os libros en divertidos xogos e actividades coas que imaxinar, crear e descubrir as capacidades e habilidades que todos e todas levamos dentro. Onte foi a quenda de 27 nenos e nenas de 4º, 5º e 6º de primaria do CPI de Zas que participaron, case sen sabelo, nunha xornada de sensibilización que deseguido se transformou nun excelente exercicio de convivencia e interacción cos nosos usuarios e usuarias, dos/as que aprenderon verdadeiras leccións de vida.

Tras a proxección dun vídeo explicativo sobre o funcionamento do centro e as actividades que nel se desenvolven tocou pasar a acción. Divididos en varios grupos, os e as estudantes foron visitando os diferentes obradoiros do Centro Ocupacional. Nesta ocasión, ademais de elaborar xabóns de glicerina e pulseiras de macramé, os alumnos/as tamén tiveron a oportunidade de participar nun obradoiro de exercitación mental a través de xogos de habilidade e rapidez que souberon resolver sen grandes dificultades aínda que, iso si, axudados/as en ocasións polos nosos usuarios/as. E se no taller de logopedia aprenderon a rir comezando por eles mesmos, no de cociña demostraron as súas incribles dotes para a repostería elaborando unha riquísima tarta de chocolate, merecedora dunha estrela Michellin.

Ao rematar a xornada, os/as estudantes confeccionaron un mural, que exporán no seu colexio, coas súas impresións sobre o centro e as experiencias vividas. Esperemos que fosen tan positivas e gratificantes como para nós. Vémonos na próxima edición de Visítanos!

Estudantes de 5º de primaria do CEIP Bergantiños achéganse á diversidade con Visítanos!

Publicado a 2017-05-13T22:00:41+00:00

Durante a visita os alumnos e alumnas realizaron divertidos obradoiros ocupacionais

Se hai uns días eramos nós os que visitabamos a un grupo de escolares do IES Monte Neme de Carballo, o pasado venres foron os alumnos e alumnas do CEIP Bergantiños, tamén de Carballo, os que se desprazaron ata as nosas instalacións de Nantón para participar nunha nova edición de Visítanos!, unha actividade englobada no programa Capacíta-T destinada a educar, concienciar e capacitar aos máis pequenos/as en materia de diversidade.

A xornada comezou cunha breve proxección sobre a historia da entidade e as actividades realizadas ao longo do ano 2016. Unha primeira toma de contacto para coñecer o día a día dos nosos usuarios e usuarias que logrou espertar a curiosidade dos/as escolares, que non dubidaron en preguntar e comentar todo canto se lles ocorría e amosándose moi interesados/as e participativos/as ao longo de toda a mañá.

A elaboración de pulseiras causou gran expectación

Da man dos nosos usuarios/as, os 57 estudantes de 5º de primaria do CEIP Bergantiños realizaron un percorrido de case dúas horas visitando os diferentes departamentos e os obradoiros do Centro Ocupacional e do Centro de Día. E que ben o pasaron! Dende os invernadoiros ata a cociña, pasando pola aula de informática, tiveron oportunidade de poñer en práctica o aprendido e moitas habilidades ocultas, con trucos e consellos incluídos. Un dos momentos máis divertidos tivo lugar na aula de logopedia, onde aprenderon a importancia de rir e de rirse dun mesmo. Tamén houbo charlas grupais sobre inclusión e diversidade, actividades con globos e talleres de artes manuais nos que aprenderon a facer xabóns de glicerina e pulseiras de macramé cun resultado máis que satisfactorio, sobresaínte.

Arte e deporte

Ninguén quixo perderse a visita ao ximnasio

Pero neste Visítanos! os/as participantes demostraron que, ademais de bos artistas, son bos deportistas. E así o deixaron claro durante a súa visita ao ximnasio de Íntegro. Aínda que non tiveron reparo algún en probar cada un dos aparatos que atoparon ao seu paso, a bicicleta elíptica e a cinta de correr- recentemente adquiridas coa recadación do calendario solidario 2017- acapararon a atención e as olladas de todos e todas, que non puideron resistirse a probalas. Unha vez máis quedou patente que a diversidade é cuestión de capacidades, non de discapacidades, e que nin a idade nin o tamaño importan. Grazas pola visita! Ata outra!

Estudantes de primaria e secundaria do CPI Cabo da Area de Laxe achéganse á diversidade con Íntegro

Publicado a 2017-04-06T21:07:24+00:00

Mentres que os alumnos e alumnas de 3º e 4º da ESO participaron na campaña de prevención de lesións medulares, un grupo de 3º ciclo de primaria protagonizou a última edición de Visítanos!

Ambas accións están enmarcadas no programa Capacíta-T, dirixido a sensibilizar e concienciar aos escolares en materia de diversidade e inclusión

Cada vez son máis os centros educativos da Costa da Morte que se suman ás campañas de concienciación sobre diversidade e inclusión promovidas pola asociación Íntegro dentro do programa Capacíta-T. Esta semana o protagonista indiscutible, e por partida dobre, foi o CPI Cabo da Area de Laxe. Se os estudantes de secundaria participaron nunha charla-coloquio enmarcada na campaña sobre a prevención de lesións medulares, ao día seguinte, os/as de primaria protagonizaron unha nova edición do programa Visítanos! nas nosas instalacións de Nantón (Cabana).

Por unha banda, un total de 44 estudantes de terceiro ciclo de primaria do CPI Cabo da Area desprazáronse onte ata o noso Centro de Recursos para coñecer a fondo o seu funcionamento e achegarse ao día a día das persoas con diversidade funcional, compartindo unha xornada de vivencias e emocións xunto aos nosos usuarios e usuarias.

Divididos en varios grupos, os escolares realizaron un longo percorrido polo centro para visitar os diferentes departamentos e descubrir cales son as funcións que desempeña cada un deles. Outra das actividades que levaron a cabo dentro do programa de sensibilización consistiu na realización de varios obradoiros ocupacionais nos que participaron moi activamente seguindo as indicacións dos nosos monitores/as e usuarios/as.

Cociña, estimulación cognitiva, informática, xestión económica ou rehabilitación física foron algúns dos cursos que espertaron maior interese entre os nenos/as pero, sen dubida, un dos momentos máis divertidos tivo lugar na área de logopedia, onde aprenderon a superar barreiras a golpe de imaxinación e moitas risas. O taller de artes manuais volveu a causar gran expectación entre os/as estudantes, que tamén fixeron gala da súa destreza e creatividade para elaborar pezas de bixutería ou orixinais xabóns de glicerina.

Tras unha xornada moi enriquecedora e chea de boas sensacións, o profesorado comprometeuse a dar continuidade, xa no colexio, ao noso programa de sensibilización coa posta en común das experiencias vividas no centro co obxectivo de compartilas co resto do alumnado e fomentar así o seu compromiso social.

Prevención de lesións medulares na ESO

Por outra banda, máis concienciados/as quedaron tamén os alumnos e alumnas que cursan 3º e 4º da ESO neste colexio laxense tras recibir a visita, un día antes (o martes), de Adolfo López Baña e David Pombo, presidente e vogal, respectivamente, de Íntegro. A sesión teórica deu comezo cunha animada charla-coloquio sobre a prevención das lesión medulares e a importancia de evitar prácticas de risco en praias, piscinas ou accidentes de tráfico, principais causantes na maioría dos casos. Os poñentes, que tamén relataron as súas propias experiencias, incidiron especialmente nos danos irreparables que causan este tipo de lesións e a importancia de evitalos.

Así mesmo, os/as estudantes amosáronse participativos/as e moi interesados/as en coñecer as dificultades de vivir sobre unha cadeira de rodas. E que mellor maneira de sabelo que subíndose a unha delas! Iso foi o que fixeron no pavillón do centro educativo, ao final da xornada, para comprobar a complexidade de desprazarse ou sortear obstáculos coa mobilidade reducida. Coma sempre, houbo quen sorprendeu facendo gala dunha incrible destreza e gran capacidade de adaptación.

Grazas a todos e a todas por participar! Vémonos na seguinte!

43 escolares do CEIP Canosa-Rus de Coristanco protagonizan unha nova edición de Visítanos!

Publicado a 2017-02-20T19:39:01+00:00

Hoxe en Íntegro comezamos a semana coas portas abertas para recibir a un grupo de escolares que se desprazaron ata Nantón para participar nunha nova edición de Visítanos!, unha actividade educativa incluída no programa Capacíta-T coa que a nosa entidade pretende concienciar, educar e capacitar en materia de diversidade aos máis pequenos.

Esta mañá 43 alumnos e alumnas de 5º e 6º de primaria do CEIP Canosa-Rus de Coristanco visitaron as nosas instalacións para coñecer de preto o funcionamento do centro e descubrir o día a día dos nosos usuarios e usuarias. A xornada comezou cunha breve presentación da entidade para explicar os obxectivos e valores cos que traballamos en favor das persoas con diversidade funcional. Dende o primeiro momento, os estudantes amosáronse moi participativos/as e interesados/as en achegarse á inclusión partindo das súas propias ideas, moitas delas preconcibidas e ditadas por unha sociedade desigual. A continuación, proxectouse un vídeo resumo coas actividades e os obradoiros que se levan a cabo tanto no Centro de Día como no Centro Ocupacional.

Obradoiros

Durante algo máis de dúas horas os escolares, divididos en grupos reducidos, realizaron un percorrido polas instalacións para coñecer con máis detalle o traballo que realizan diariamente os nosos usuarios/as nos diferentes obradoiros ocupacionais. O taller de artes manuais foi parada obrigada. Alí tiveron a oportunidade de descubrir algunhas das técnicas empregadas para confeccionar os produtos de artesanía que comercializamos, e que máis dun escolar tamén se animou a elaborar poñendo a proba as súas habilidades e imaxinación na confección, por exemplo, de xabóns de glicerina da colección Bicos de Amora. O resultado foi gratamente sorprendente!

A visita ao invernadoiro foi, sen dúbida, unha das que causou maior expectación entre os escolares que non dubidaron en poñer en práctica os coñecementos facilitados polo persoal do centro e polos propios usuarios e usuarias. Logo dunha divertida sesión plantando leitugas, traballaron con algunhas das plantas aromáticas do noso xardín terapéutico e realizaron varios talleres de identificación de especies autóctonas. Ao remate, cada alumno/a levou como agasallo unha semente de gladíolo para lembrar o seu paso polo centro.

Pero un dos momentos máis divertidos chegou ao final da mañá coa realización dun circuíto de mobilidade e desprazamento en cadeira de rodas para achegar aos máis pequenos a realidade da diversidade, xogando coas barreiras ás que cada día deben facer fronte moitas persoas con discapacidade. Unha proba moi entretida e novidosa na que fixeron gala do seu enxeño e habilidade sorteando todo tipo de obstáculos. Dende logo, a mellor maneira de comprobar que a diversidade é cuestión de capacidades, non de discapacidades. Grazas a todos e a todas por participar!

Estudantes de Camariñas e da Ponte do Porto protagonizan unha nova edición de Visítanos!

Publicado a 2016-11-29T12:42:02+00:00

Esta actividade educativa forma parte do programa Capacíta-T que Íntegro imparte aos escolares da Costa da Morte

Non podiamos comezar mellor a semana na que se conmemora o Día Internacional da Diversidade Funcional (3 de decembro) xa que onte as portas da Asociación Íntegro volveron a abrirse para celebrar unha nova edición de Visítanos!, unha actividade educativa incluída no programa Capacíta-T coa que a nosa entidade pretende concienciar, educar e capacitar en materia de diversidade aos máis pequenos.

Nesta ocasión, 36 alumnos e alumnas do CEIP O Areal de Camariñas e do CEIP da Ponte do Porto visitaron as nosas instalacións de Nantón para coñecer de preto o funcionamento do centro e o día a día dos nosos usuarios e usuarias. A xornada deu comezo cunha breve presentación da entidade para explicarlles aos estudantes os obxectivos e valores cos que traballamos en favor das persoas con diversidade funcional. Dende o primeiro momento, os alumnos e alumnas amosáronse moi participativos e interesados/as en achegarse á inclusión partindo das súas propias ideas, moitas delas preconcibidas e ditadas por unha sociedade desigual como quedou ben patente coa proxección da curtametraxe Lo Incorrecto, da Fundación Prevent. Tamén se lles amosou un vídeo resumo coas actividades levadas a cabo ao longo do 2015.

Durante algo máis de dúas horas realizamos un percorrido polas instalacións para coñecer máis polo miúdo o traballo que realizan diariamente os nosos usuarios/as nos diferentes obradoiros ocupacionais. O taller de artes manuais foi parada obrigada. Alí tiveron a oportunidade de descubrir algunhas das técnicas empregadas polos nosos usuarios/as para confeccionar os produtos de artesanía que comercializamos, e que máis dun escolar tamén se animou a elaborar poñendo a proba as súas dotes creativas na confección de xabóns de glicerina da colección Bicos de Amora. O resultado foi sorprendente!

A visita ao invernadoiro foi, sen dúbida, unha das que suscitou maior expectación entre os escolares que non dubidaron en amosar os coñecementos adquiridos tras as explicacións dadas polos nosos técnicos. No xardín terapéutico traballaron con plantas aromáticas, transplantándoas e realizando diversos traballos de composición, dignos de verdadeiros artistas. Así mesmo, realizamos un taller de recoñecemento de especies arbóreas autóctonas a partir de follas que tiñamos recollidas para a ocasión.

Pero un dos momentos máis divertidos chegou ao final mañá coa realización dun circuíto de mobilidade e desprazamento en cadeira de rodas coa finalidade de achegar aos máis pequenos á realidade da diversidade, xogando coas barreiras ás que cada día deben facer fronte moitas persoas con discapacidade. Unha proba moi entretida e novidosa na que tiveron que poñer en práctica o seu enxeño e habilidade para sortear todo tipo de obstáculos. A mellor maneira de comprobar que a diversidade é cuestión de capacidades, non de discapacidades.