post

O Programa Operativo de Emprego Xuvenil posibilita a contratación dunha técnica en Educación Infantil

A subvención concedida polo Fondo Social Europeo e a Xunta de Galicia terá unha duración de sete meses

Nos últimos anos, tanto o Centro de Día como o Centro de Recursos de Íntegro están a experimentar un crecemento constante no volume de actividades e programas dirixidos a persoas con diversidade funcional da Costa da Morte para contribuír así a mellorar a súa calidade de vida e acadar a súa plena inclusión na sociedade. Pero a ampliación da oferta formativa leva parella, ademais dun notable incremento de contidos en materia de capacitación, emprego ou  sensibilización social, a ampliación do noso cadro de persoal co obxectivo de atender unha demanda cada vez maior, máis esixente e con novas necesidades. Así, desde a entidade de Nantón (Cabana) apostamos pola formación continuada dos nosos traballadores/as e a adhesión a  programas de cooperación que promovan a contratación de novos profesionais destinados a favorecer a diversidade social dos colectivos máis vulnerables e/ou en risco de exclusión.   

Neste sentido, desde o pasado día 1 o noso cadro de persoal viuse ampliado grazas á incorporación dunha nova traballadora. Trátase dunha técnica especialista en Educación Infantil contratada a través dun programa de cooperación posto en marcha pola Consellería de Economía, Emprego e Industria da Xunta de Galicia e as entidades sen ánimo de lucro, coa finalidade de mellorar a empregabilidade e a inserción profesional daqueles mozos e mozas inscritos/as no Sistema Nacional de Garantía Xuvenil, dentro do ámbito do Programa Operativo de Emprego Xuvenil. Dita subvención está co-financiada nun 91,89% polo Fondo Social Europeo (FSE) e a Iniciativa de Emprego Xuvenil.

Ao longo dos próximos sete meses, a nova experta en Educación Infantil encargarase, por unha banda, de levar a cabo a planificación, deseño e desenvolvemento dalgúns dos talleres do Centro de Día e do Centro Ocupacional e, pola outra, da formación das persoas con diversidade funcional que asisten de forma regular aos nosos obradoiros ocupacionais e das que participan esporadicamente nalgunha acción formativa concreta ao longo do ano. Ademais, participará activamente no noso programa de ocio e tempo de lecer para complementar e ampliar os servizos prestados polo equipo de monitores/as. Un axuda extra que será ben recibida tendo en conta que nos últimos meses incrementouse o número de usuarios/as chegando a situarse na actualidade en 40 persoas.

Funcións:

  • Organización e desenvolvemento de talleres de artes manuais (bixutería, elaboración de xabóns, pintura…).
  • Realización de obradoiros de formación e capacitación (escola de adultos, novas tecnoloxías, formación especifica para a ESA, competencias clave…).
  • Programa e avalía os procesos educativos.
  • Desenvolvemento de actividades destinadas á creación de novos hábitos para o fomento da autonomía.
  • Realización de metodoloxías de xogo para estimular a creatividade, a iniciativa e a disciplina.
  • Deseñar saídas de ocio e lecer adaptadas ás preferencias e necesidades dos usuarios/as do centro.

Con esta nova contratación, englobada no Programa Operativo de Emprego Xuvenil, esperamos poder mellorar e incrementar a atención ás persoas con diversidade funcional da Costa da Morte e ás súas familias para a consecución dunha vida independente e autónoma.

 

post

Aberta a inscrición para os campamentos de verán específicos para persoas con discapacidade

A entrega de solicitudes poderá realizarse ata o vindeiro 30 de maio

Xa está aberto o prazo de inscrición para participar nos campamentos de verán específicos para persoas con dicapacidade, promovido pola Dirección Xeral de Maiores e Persoas con Discapacidade da Xunta de Galicia.  Este ano ofértanse 170 prazas, divididas en quendas de 10 días entre o 1 de xullo e o 12 de setembro. Como novidades, haberá 20 prazas máis destinadas principalmente ao tramo de idade comprendida entre os 19 e os 40 anos  e unha nova instalación para o desenvolvemento dos campamentos: a Residencia de Tempo Libre do Carballiño, en Ourense. O período de recepción de solicitudes rematará o vindeiro 30 de maio.

Durante 10 días, os/as participantes poderán gozar dunha estadía socializadora e de convivencia, nun espazo lúdico, integrador e seguro mediante a posta en marcha de actividades orientadas, especialmente, ao fomento de habilidades sociais, ao contacto coa natureza e o mar, ao coñecemento da propia cultura e á educación para a saúde.

A solicitude de praza neste programa de campamentos específicos para persoas con discapacidade é compatible coa solicitude de prazas de inclusión no programa Campaña de verán 2018 da D.X. de Xuventude e Voluntariado.

Requisitos

As persoas interesadas en participar nos campamentos deberán ter recoñecida alguna discapacidade, cun grao igual ou superior ao 33%, e  unha idade comprendida entre os 11 e os 40 anos, ademais dos seguintes requisitos:

  • Estar empadroado nalgún concello de Galicia.
  • Non padecer enfermidade transmisible con risco de contaxio.
  • Non presentar trastornos que poidan alterar a convivencia durante o transcurso da actividade.
  • Ter unha capacidade mínima de comunicación e de participación nas actividades que se van desenvolver.
  • Ter unha mobilidade acorde ás características da instalación que se solicita.

Instalacións

Os equipamentos nos que terán lugar estas accións de verán específicas para persoas con discapacidade son os seguintes:

Albergue xuvenil de Gandarío, emprazado no municipio coruñés de Bergondo. Desenvolverase a temática de natureza e mar.

Residencias de Tempo Libre de Panxón, no concello pontevedrés de Nigrán.

Residencia de Tempo Libre de O Carballiño, situada na provincia de Ourense.

Nas dúas últimas instalacións, os campamentos tratarán sobre actividades de teatro e natureza.

Bonificacións

O prezo máximo de cada praza ascenderá a 125 euros. Dito importe verase reducido nun 50% se o/a solicitante é posuidor do título de familia numerosa e nun 25% para quen teña o Carné Xove. Así mesmo, terán preferencia as persoas que non participasen no programa en anos anteriores así como as que residan habitualmente no domicilio familiar.

As solicitudes deben presentarse na Consellería de Política Social antes do 30 de maio.

Máis información

Teléfono Social gratuíto: 900 333 666 Para información sobre a xestión dos campamentos, envío de documentación, valoración de solicitudes e concesión de prazas:

Para información sobre as instalacións nas que se desenvolve o programa pódese consultar a páxina web http://politicasocial.xunta.gal/web/portal/portada ou dirixirse directamente ás propias instalacións.

post

Íntegro contará cunha educadora social grazas ao Programa Operativo de Emprego Xuvenil

Dita contratación está subvencionada polo Fondo Social Europeo e a Xunta de Galicia

Cada vez son máis as persoas con diversidade funcional da Costa da Morte que solicitan os servizos especializados do Centro de Recursos e do Centro de Día da asociación Íntegro. Coa finalidade de atender esta incesante demanda, dende a entidade de Nantón (Cabana) estase a incrementar o volume de actividades e programas dirixidos a tal fin. A ampliación da oferta formativa non só pasa pola ampliación de contidos en áreas como a formación, o emprego ou a sensibilización social senón que tamén require da contratación de novos/as profesionais orientados/as á programación e desenvolvemento de iniciativas que favorezan a inclusión e a diversidade social dos colectivos máis vulnerables e/ou en risco de exclusión.

Neste senso, este mes o cadro de persoal de Íntegro veuse ampliado coa incorporación dunha nova traballadora. Trátase dunha educadora social contratada dende o pasado día 19 a través dun programa de cooperación entre a Consellería de Economía, Emprego e Industria da Xunta de Galicia e as entidades sen ánimo de lucro, coa finalidade de mellorar a empregabilidade e a inserción profesional de persoas mozas incluídas no ficheiro do Sistema Nacional de Garantía Xuvenil, no ámbito do Programa Operativo de Emprego Xuvenil. Dita subvención está cofinanciada polo Fondo Social Europeo (FSE) e a Iniciativa de Emprego Xuvenil nun 91,89%, a través do Programa Operativo de Emprego Xuvenil.

Entre as funcións a desempeñar pola nova educadora social nos vindeiros sete meses destaca a de potenciar as habilidades sociais e a inclusión laboral dos usuarios e usuarias do Centro Ocupacional Íntegro así como das persoas con diversidade e/ou con especial necesidade de atención en áreas ou servizos específicos. Para elo, poranse en marcha accións encamiñadas a favorecer o desenvolvemento persoal e social e de apoio en campañas de sensibilización ou actividades de ocio así como na realización dos diferentes obradoiros que se leven a cabo na entidade. Así mesmo, cómpre facer mención especial ao programa integral de emprego que se levará a cabo tanto a nivel grupal como individual e que consistirá nunha atención educativa e formativa especializada, permanente orientación e acompañamento ao emprego e a prospección e intermediación no mercado laboral coa finalidade de adecuar oferta ás necesidades da demanda.

Funcións

  • Favorecer o desenvolvemento persoal e social pleno das persoas con diversidade funcional (potenciando a súa capacidade de decisión e de resolución de problemas).
  • Dar apoio nas actividades da comunidade (execución de talleres de habilidades sociais, acompañamento en ocio, …).
  • Atención educativa e formación especifica para o emprego (cursos de alfabetización, preparación de oposicións, obradoiros especificos…).
  • Orientación e acompañamento ao emprego (análise de postos de traballo e busca de seguemento, interacción cos equipos de RRHH, compromiso coas políticas de Responsabilidade Social Corporativa e apoio na xestión da diversidade).
  • Prospección e intermediación no mercado laboral ( labor de prospección do mercado de traballo e das ofertas de emprego, ao tempo que se ofrece un sistema de intermediación ás empresas co obxectivo de encaixar oferta e demanda. Bolsa de Emprego con perfís adaptados as necesidades de cada empresa).
  • Apoio nas campañas de Sensibilización levadas a cabo pola entidade (Capacíta-T, Visítanos! Campaña de prevención de lesións medulares…).

Grazas a esta nova acción de contratación, englobada no Programa Operativo de Emprego Xuvenil, confiamos en poder seguir proporcionando novos servizos ás persoas con diversidade funcional da Costa da Morte e ás súas familias para lograr a súa inclusión social e a consecución dunha vida independente e autónoma.

 

 

post

A Secretaria Xeral de Igualdade visita Íntegro para asistir á presentación do PIMD Rural 2016-2017

Susana López acudirá o vindeiro luns á firma dos novos convenios de colaboración coas entidades locais  

A Secretaria Xeral de Igualdade da Xunta de Galicia, Susana López Abella, visitará o vindeiro luns o Centro de Recursos de Íntegro para asistir, xunto aos alcaldes e representantes dos concellos de Cabana,  Ponteceso, Malpica e Laxe, á presentación do novo Punto de Intervención para Mulleres con Diversidade Funcional no ámbito Rural (PIMD Rural) 2016-2017, co-financiado polo ente autonómico e o Fondo Social Europeo (FSE). Ao remate, realizarase un percorrido polas instalacións para coñecer de primeira man os diferentes obradoiros ocupacionais.

IMG_20160308_121417

Sinatura do primeiro convenio de colaboración cos 4 concellos participantes

O acto dará comezo ás 12h coa exposición do balance relativo ao período 2015-2016, no que se analizarán polo miúdo os resultados obtidos durante o primeiro ciclo do PIMD Rural, no que 108 mulleres- prioritariamente con disCapacidade- se beneficiaron das accións formativas levadas a cabo nos catro municipios adheridos ao plan coa finalidade de erradicar a discriminación e a desigualdade de oportunidades mediante o desenvolvemento de actividades que facilitan o empoderamento das mulleres e reforzan o seu papel no ámbito rural. Ademais, daranse a coñecer outros datos de interese relacionados coa formación, o emprego e o número de intervencións realizadas.

A continuación, procederase á firma dos novos convenios de colaboración do PIMD Rural 2016-2017 coas entidades locais. Na grafico-todossinatura estarán presentes alcaldes e representantes dos municipios de Malpica, Laxe, Ponteceso e Cabana, que renovan así o seu compromiso cun dos colectivos sociais máis desfavorecidos.

Coa posta en marcha desta segunda etapa, que terá unha duración dun ano, reforzaranse os puntos de intervención municipais posibilitando traballar, man a man, cos servicios sociais de base, axentes de emprego e orientadores laborais co obxectivo de dar continuidade á labor de inclusión laboral e social das mulleres do rural, especialmente das que están en situación de vulnerabilidade e centrándonos nas máis desfavorecidas, como son as que teñen algún tipo de diversidade funcional.

IMG-20160308-WA0016

A xornada rematará cunha visita de todos os asistentes polas instalacións de Nantón que estará protagonizada polos nosos usuarios e usuarias xa que serán os encargados/as de dar a coñecer o traballo que desempeñan día a día tanto nos obradoiros do Centro de Día como do Centro Ocupacional.