post

Íntegro amplía o parque móbil coa adquisición dun furgón

Dita adquisición está financiada con cargo ao Plan de recuperación, transformación e resiliencia da Unión Europea-NextGenerationEU e o apoio da Xunta de Galicia a través da Consellería de Política Social e Xuventude

A asociación Íntegro das persoas con Diversidade Funcional da Costa da Morte vén de adquirir un novo vehículo adaptado, con capacidade para nove persoas, que permitirá mellorar o servizo de transporte dos seus usuarios e usuarias e incrementar o actual parque móbil, posibilitando así o desdobramento dalgunhas rutas e a incorporación de novas prazas. Así mesmo, con este novo vehículo a entidade vén a modernizar a actual flota coa finalidade de mellorar a eficiencia da mesma e diminuír as emisións contaminantes contribuíndo así a unha economía sostible.

Dita adquisición foi posible grazas ao financiamento da Unión Europea, a través dos fondos NextGenerationEU, no marco do Plan de Recuperación, Transformación e Resilencia, e o apoio da Consellería de Política Social e Xuventude da Xunta de Galicia.

O presidente de Íntegro, Adolfo López Baña, amosou a súa satisfacción por dispoñer dunha flota ampla e renovada, adaptada ás necesidades das persoas con diversidade funcional e lembrou a importancia de dotar ás entidades sociais dos medios e recursos necesarios para eliminar os problemas de accesibilidade e transporte á hora de facilitar ás persoas usuarias a súa chegada aos centros”.

post

Íntegro lanza unha campaña divulgativa para promover o CMA turismo para todas

Trátase dunha área de traballo orientada a estudar, avaliar e promover unha sociedade máis inclusiva e igualitaria en materia de accesibilidade universal na Costa da Morte 

A Lei 51/2003, do 2 de decembro, de igualdade de oportunidades, non discriminación e accesibilidade universal entende a accesibilidade universal como a condición que deben cumprir todas as contornas, procesos, bens, produtos e servizos, así como os obxectos ou instrumentos, ferramentas e dispositivos para ser comprensibles, utilizables e practicables por todas as persoas en condicións de seguridade e comodidade, e de forma autónoma e natural. Pero non hai máis que mirar ao noso redor para ver que non é así!

Na actualidade, Galicia é a comunidade autónoma con maior número de persoas con discapacidade (116 por cada 1.000 habitantes) e, en comparación co resto de España, sitúase moi por debaixo da media en materia de accesibilidade. Na Costa da Morte, arredor de 9.385 persoas posúen un grao de discapacidade igual ou superior ao 33%, segundo datos de 2022. Ante esta situación, desde a asociación Íntegro creouse unha área de traballo destinada a estudar, avaliar e promover unha sociedade máis inclusiva e igualitaria en materia de accesibilidade universal na Costa da Morte: o CMA Turismo para todas, desde onde se impulsan iniciativas específicas para a mellora do turismo accesible na nosa contorna e se ofrece asesoramento profesional en materia de accesibilidade e eliminación de barreiras a empresas, asociacións e institucións públicas e privadas.

Campaña divulgación

Para dar a coñecer esta nova liña de traballo, o departamento de accesibilidade de Nantón vén de poñer en marcha unha campaña de divulgación, a través da edición dun folleto informativo que se distribuirá nos principais puntos turísticos da Costa da Morte así como en festivais e eventos durante o período estival, no que se recollen algunhas das principais características da accesibilidade e “os motivos que nos deben levar a camiñar xuntos na construción dun novo mapa turístico e unha nova realidade máis accesible para todas”, subliñou o presidente de Íntegro, Adolfo López Baña. Entre outras razóns, destacan o notable crecemento da contorna como destino turístico, a importancia de cubrir as necesidades dos principais demandantes de recursos turísticos (persoas maiores e con discapacidade), promover a accesibilidade como incentivo de calidade, atraer un novo segmento de viaxeiros, desestacionar o turismo e facer valer os dereitos de todas as persoas.

Se ti tamén es empresa, asociación, administración pública ou tes un proxecto, idea ou actividade profesional vinculada ao sector turístico, achégate á oficina do CMA Turismo para todas, situada no lugar de A Pedra, 30. Nantón (Cabana de Bergantiños), ou solicítanos información a través do correo electrónico accesibilidade@integro.es, na web  www.integro.es e/ou no teléfono 650 961 649.

post

A accesibilidade nas praias

Sol, calor, area, hamacas, baño no mar….

Achégase o verán e dá comezo a tempada de praias. As persoas somos diversas, e segundo os gustos de cada unha pode agradar máis ou menos desfrutar do ocio nas praias, pero estas, sendo un servizo público, deben estar accesibles para TODAS as persoas.

Se nos poñemos a buscar praias accesibles, debemos de ter en conta as que posúen bandeira azul, distinción que a Fundación Europea de Educación Ambiental outorga anualmente a praias e portos cunha serie de condicións nas súas instalacións e uns requisitos ambientais.

Para que unha praia sexa posuidora de bandeira azul, debe cumprir uns criterios como a calidade da auga, a seguridade, a prestación de servizos xerais e a xestión e sustentabilidade ambiental. Estes criterios son avaliados para garantir unhas instalacións en bo estado, pero isto non quere dicir que sexan praias accesibles, xa que, os seus puntos adaptados que existen poden non satisfacer a todas as persoas, ou ser nulos. 

A accesibilidade debe transformarse e tela en conta para todo, abrangue máis que adaptar un lugar para unha cadeira de rodas. A accesibilidade ten que ser pensada e creada para TODAS as persoas, incluíndo persoas con mobilidade reducida, que empreguen bastón, muleta, andador; pais e nais con carriños de bebé, persoas con discapacidade auditiva, visual (ou ambas)… e non ser excluínte como ocorre na maioría das ocasións.

Debemos favorecer a adaptación ao medio sabendo que a lexislación non ampara ás praias da Costa da Morte, xa que son praias naturais e non teñen que cumprir coa normativa. Non estaría de máis, o apoio das administracións públicas. Axudaría a poñer o enfoque nunha sociedade máis INCLUSIVA.

As persoas maiores e as persoas con discapacidade son os colectivos que máis consumen os produtos e servizos turísticos. O turismo é unha fonte de riqueza, e ten que ser sustentable, accesible e un turismo para todas as persoas.

Por VIRGINIA VÁZQUEZ.- Departamento accesibilidade INTEGRO

post

30 anos camiñando cara a inclusión das persoas con diversidade funcional da Costa da Morte

Ademais de facer un repaso polas súas tres décadas de historia, a entidade presentou a programación conmemorativa para este 2022 

Con motivo da conmemoración do seu 30º aniversario, celebrado o pasado 1 de febrero, a asociación Íntegro deu a coñecer o calendario de actividades que vén de elaborar para este 2022. A presentación tivo lugar o pasado venres na sede de Nantón, en Cabana de Bergantiños, e contou coa presenza do presidente de Íntegro, Adolfo López Baña; o tesoureiro, Sil Couto (ambos co-fundadores e integrantes da asociación desde as súas orixes); a directora do Centro de Recursos, Noelia Barreira e outros membros da directiva, traballadoras, socios/as e usuarios/as do centro.

Inclusión, igualdade e visibilidade son os tres piares nos que se sustenta a longa e difícil traxectoria de Íntegro desde as súas orixes ata a actualidade. E agora, son tamén os tres conceptos que pretenden achegar aos nenos e nenas da Costa da Morte a través da que será a primeira das actividades programadas para este ano: o concurso escolar de debuxo, poesía e narrativa “camiñando cara a inclusión”, que xa se puxo en marcha o pasado día 1 nos centros educativos de primaria para concienciar aos escolares sobre a disCapacidade e a diversidade, e promover a inclusión e a igualdade entre os máis cativos/as. Os traballos gañadores daranse a coñecer no mes de abril.

O acto central da programación conmemorativa deste 2022, desenvolverase o vindeiro mes de xuño no auditorio municipal de Cabana de Bergantiños e terá como protagonistas ás persoas usuarias do centro, que serán as encargadas de realizar unha viaxe a través do tempo para dar a coñecer a historia da entidade desde os seus comezos en 1992.

Xa en pleno verán, celebrarse a “Romaría da Inclusión”, un evento festivo e reivindicativo, aberto a toda a veciñanza, que terá como escenario o Centro de Recursos Íntegro, en Nantón. Será unha xornada para o rencontro e a celebración ao que asistirán usuarios/as, socios/as, familiares, membros da directiva, etc… O programa completarase cun ciclo de conferencias sobre inclusión e diversidade, previsto para o 2º semestre do ano, no que se abordarán cuestións relativas á sexualidade, o emprego, etc. Ademais, haberá unha edición especial do programa de “Prevención da lesión medular”.

30 anos pasaron desde aquel 1 de febrero de 1992, no que 7 persoas con discapacidade de Ponteceso e Cabana decidiron unir esforzos para crear unha entidade que na actualidade conta xa con 45 persoas usuarias, das que 22 son públicas (10 Centro de Día e 12 Centro Ocupacional). Agora Íntegro asume un novo reto: acadar as 63 prazas de ocupación e seguir arrincando sorrisos cada día entre aos nosos usuarios e usuarias.

TRES DÉCADAS DE HISTORIA.  Adolfo López Baña, presidente da asociación Íntegro

Choveu moito desde aquel 1 de febreiro de 1992, cando sete persoas con Discapacidade de Ponteceso e Cabana decidiron unir esforzos para constituír unha entidade, que inicialmente recibiu o nome de Asociación de Minusválidos PONTE-CABANA. Desde entón, un gran número de persoas foron sumando folgos, ideas e moito traballo ata formar o que hoxe coñecemos como a Asociación INTEGRO dás persoas con Diversidade Funcional da Costa da Morte. Co traballo de todos foise crecendo de forma estruturada para fortalecer todas as iniciativas e profesionalizar os servizos postos en marcha ata a actualidade.

As orixes

As primeiras xuntanzas da entidade celebrábanse cada sábado no bar A Pesqueira de Ponteceso. E desde alí, dado que a maioría dos integrantes da entidade eramos lesionados medulares,  decidimos poñer en marcha as primeiras accións de sensibilización para informar á poboación sobre as causas e consecuencias de sufrir un accidente medular. Así botou andar polos centros educativos da Costa da Morte a “campaña de prevención da lesión medular”,  coa que seguimos percorrendo os colexios para concienciar aos máis novos.

Os comezos non foron doados. Ademais de atrancos burocráticos, os recursos económicos escaseaban. Así que, tiramos de imaxinación e comezamos a realizar actividades sociais para recadar fondos. Un dos eventos con máis sona e arraigo entre a veciñanza da comarca foron os desfiles de moda. Xa por aquel entón, tiñamos claro que todas as actividades tiñan que se integradoras (descoñeciamos o termo inclusión), e por iso nos pases de moda participaban modelos con e sen discapacidade. Ademais, este tipo de eventos eran a ocasión perfecta para convivir durante días todos xuntos e en igualdade. Que tempo aqueles!

A medida que a entidade medraba en socios/as e actividades, a necesidade de dispoñer dun local comezou a ser prioritario. Despois de moitas conversas cos alcaldes de Ponteceso e Cabana, o rexedor cabanés, que naquela época era o Sr. Fariña, facilitou non só un local, senón tamén o contacto con outros alcaldes e empresarios da contorna, así como con outras administracións públicas, como a Deputación da Coruña, para darnos a coñecer e arrincar a nosa particular andaina na defensa dos dereitos das persoas con diversidade. Así puxemos en marcha unha primeira sede, baleira de material, pero chea de ideas, soños, ilusións e proxectos. Entre os primeiros destaca a creación do equipo de baloncesto adaptado Ponte-Cabana, único participante galego na Liga Autonómica formado integramente por lesionados medulares. Ao mesmo tempo, constituíuse ademais o grupo de xadrez.

Emprego e formación

Desde as nosas orixes, comprometémonos coa formación e a busca de emprego como elementos determinantes para a consecución dunha vida plena autónoma. Grazas a COGAMI logramos os apoios necesarios para poñer en valor ao noso colectivo e iniciar proxectos tan innovadores como ECOEMPREGO, unha iniciativa medioambiental enmarcada no programa europeo HORIZON, pioneiro na recollida e reciclaxe de electrodomésticos, papel e cartón, porta a porta, no que colaboraron ademais case todos os concellos da comarca. Con este proxecto apareceron os primeiros contedores de papel e cartón na zona, pero tamén algunhas carencias, como a ausencia de traballadores con discapacidade na zona rural, o que provocou que tiveramos que recorrer a varias asociacións da Coruña para poder poñer en funcionamento dito proxecto. Este feito, propiciou a realización dun estudo sobre a poboación con diversidade da Costa da Morte e os datos foron reveladores: elevada taxa de analfabetismo, escasa incorporación ao mercado laboral e unha visión demoledora da sociedade sobre o noso colectivo que propiciou a nosa presenza, máis ca nunca, en todos os foros, xornadas, congresos e eventos de calquera índole para alzar a nosa voz e gañar maior visibilidade.

Aproveitando as instalacións das Torres do Allo (Zas), nas que se desenvolvía o proxecto Ecoemprego, puxéronse en marcha as primeiras accións formativas da entidade: uns cursos sobre xardinería e invernadoiros, nos que participaron por primeira vez persoas con discapacidade residentes na contorna, e nos que ademais de coñecementos específicos, poñíase en valor a formación e o traballo abordando cuestións relacionadas coa independencia económica e familiar, valor social, crear familia, poder adquisitivo, empoderamento, etc… A estes obradoiros seguiron outros de carpintería e coiro nun local cedido polo Concello de Cabana no lugar do Pendón. Co paso do tempo, a demanda de formación e asesoramento ía en aumento e moi pronto xurdiu a necesidade de crear un centro de rehabilitación integral capaz de atender as necesidades do noso colectivo. Unha construción que foi posible grazas á cesión duns terreos por parte do Concello de Cabana, e aos apoios recibidos desde outras institucións como a Xunta de Galicia, a Deputación da Coruña, as administracións locais da Costa da Morte, e entidades como COGAMI, a Fundación ONCE, asociación NERIA, etc… Así nace o noso Centro de Recursos Íntegro.

A falta de contratación laboral de persoas con discapacidade por parte do tecido empresarial da contorna propiciou a creación do Centro Especial de Emprego ÍNTEGRO Xardinería e Medioambiente, nun terreo de 5.000 m2 cedido pola familia do ex-alcalde de Zas Julio Díaz, e especializado en labores de mantemento de xardíns e elaboración de produtos da horta con certificación ecolóxica, que deu emprego a 15 persoas.

No ano 2001, Íntegro inaugura as novas instalacións de Nantón, máis amplas e cómodas, co obxectivo de seguir medrando e atendendo as necesidades da poboación do rural. O concerto de prazas públicas da Consellería de Política Social favorece o crecemento e desenvolvemento do noso centro, que a Xunta de Galicia declara como entidade de Utilidade Publica pola Orde do 22 de outubro de 2010, da Consellería de Presidencia, Administracións Públicas e Xustiza.

Dentro do noso compromiso coa inclusión laboral de persoas con discapacidade, en xullo de 2013 volvemos apostar pola creación de emprego a través da constitución do Centro Especial de Emprego de iniciativa social sen animo de lucro Máis Porvir Xestión Social, un espazo dedicado á prestación de servizos socio-sanitarios e labores auxiliares para empresas e administracións públicas que na actualidade ofrece traballo a 42 persoas,  das que 38 teñen algún tipo de discapacidade. Desde Íntegro traballamos para que estes CEE de iniciativa social sexan o trampolín ao mercado empresarial.

 

O futuro de Integro

Actualmente, as entidades sociais vivimos momentos de cambio e constante evolución. En Íntegro damos a benvida ao 2022 con novos retos e ambiciosos proxectos para seguir medrando, entre os que destacan o incremento de prazas públicas concertadas, fogar residencial,  sustentabilidade económica ou a posta en marcha de novas políticas de conservación ambiental, sen descoidar os valores do que marcan o noso traballo diario. O compromiso social, a igualdade, a defensa dos dereitos, a participación social, a transparencia e a mellora continua seguirán constituíndo os cimentos da nosa historia.

A entidade, no seu desenvolvemento estratéxico para o período 2022-2025, deberá medrar coa pretensión de que cada área de actuación sexa autónoma e autosuficiente. ÍNTEGRO como entidade corporativa, ten que selo de forma completa. Por iso, os retos estratéxicos para os vindeiros anos centraranse no desenvolvemento corporativo, o afondamento nunha metodoloxía de traballo baseada nos apoios personalizados, a incorporación de novos servizos e o desenvolvemento empresarial do noso CEE + Porvir.

O que nunca cambiará, pasen 30 ou 100 anos, é o feito de que seguiremos sendo unha entidade comprometida coa nosa misión de alcanzar a inclusión das persoas con diversidad funcional e recoñecida na sociedade polos nosos valores, o traballo directo coas persoas con diversidade funcional e o compromiso coa inclusión no medio rural.

post

O Concello de Carballo e Íntegro conciencian sobre o aparcamento en prazas de mobilidade reducida

Usuarios/as e representantes da entidade ocuparon varias prazas con cadeiras de rodas e carteis para concienciar á cidadanía sobre a importancia de respectar este tipo de estacionamentos

“Son só 5 minutiños”, “Será só un momentiño”, “Volvo nun santiamén”, “Non teño tarxeta… pero non pasa nada, non?”, “Non sabía que aquí non podía aparcar”… Estas son algunhas das “escusas” máis empregadas polos condutores/as que ocupan as prazas de aparcamento reservadas para persoas con mobilidade reducida. E estas foron, precisamente, as frases que hoxe utilizaron os nosos usuarios e usuarias durante a xornada de sensibilización, levada a cabo en colaboración co Concello de Carballo, para poñer de manifesto a necesidade de respectar os estacionamentos reservados.

Acompañados polo concelleiro de Mobilidade, Juan Seoane, e a concelleira de Igualdade e Benestar, Maica Ures, usuarios/as e representantes de Íntegro ocuparon varias prazas de aparcamento da avenida do Ambulatorio de Carballo, con cadeiras de rodas e algúns carteis coas “escusas” máis utilizadas, coa intención de “simbolizar como se sente un cidadá cando lle ocupan unha praza de aparcamento e non pode aparcar como moitas veces nos pasa a nós”, explicaron. Con esta acción, enmarcada na Semana Mundial das Nacións Unidas para a Seguridade Viaria que se celebra do 17 ao 23 de maio, ademais de reivindicar que o tempo das persoas con diversidade funcional vale o mesmo que o das demais, tamén se recalcou que estas prazas non son un capricho, senón unha necesidade. Así mesmo, desde a asociación púxose o foco sobre o uso indebido das tarxetas de aparcamento por parte de usuarios/as que non teñen discapacidade.

Imaxe da rúa Cervantes durante a celebración do Día da Accesibilidade en setembro de 2020

Esta iniciativa, que non é a primeira nin será a última que se realiza no municipio carballés, é froito do compromiso e a implicación do Concello de Carballo para mellorar a accesibilidade e a mobilidade das persoas con diversidade funcional. Desde Íntegro, queremos agradecer a súa permanente colaboración e dispoñibilidade en todas as actividades que realizamos conxuntamente, e que seguro repetiremos moi pronto. 

 

post

Íntegro realiza o Camiño Inglés sen saír da Costa da Morte

Trátase dunha curiosa e divertida actividade impulsada pola entidade para promover hábitos de vida saudable e o contacto coa natureza

Sumaranse os quilómetros das andainas realizadas pola contorna ata completar os preto de 120 kms que hai desde Ferrol ata Santiago de Compostela. Ao finalizar cada unha das 6 etapas, realizarase unha visita “virtual” polos lugares máis emblemáticos

Dentro do programa de sensibilización Vida Saudable de Íntegro, cada vez son máis numerosas e frecuentes as accións formativas e de concienciación levadas a cabo pola entidade para promover hábitos de vida saudables entre os osos usuarios/as e mellorar o seu benestar físico e mental. Neste sentido, ademais de coidar a alimentación cunha dieta variada e equilibrada e a práctica de exercicio físico diario, vimos de poñer e marcha unha novidosa actividade, na que saúde, diversión e aprendizaxe camiñarán da man para proporcionarnos experiencias únicas e inesquecibles.

Aproveitando a mobilidade xeográfica permitida na actualidade e a chegada da primavera, con máis horas de luz e sol, botámonos a andar pola contorna para facer deporte e, ao mesmo tempo, reencontrarnos coa natureza desfrutando da beleza paisaxística que nos rodea. E xa que temos as botas postas e moitas ganas de movernos, decidimos iniciar unha andaina máis longa do habitual, denominada “o noso camiño”, para realizar o Camiño de Santiago “á nosa maneira”. En que consistirá? En facer o Camiño Inglés “virtual”(tramo Ferrol- Santiago de Compostela), que consta de 6 etapas e un total de 119,70 kms. De agora en diante, rexistraremos os quilómetros das andainas que realicemos pola Costa da Morte e, cando completemos o equivalente á distancia de cada etapa, faremos unha visita telemática polos lugares máis fermosos e emblemáticos de cada unha.

Primeiros pasos

A semana pasada xa puxemos o contador a andar cun percorrido polo estuario do Anllóns, en Cabana de Bergantiños, que sumou os primeiros pasos desta divertida e curiosa iniciativa. A diferenza do resto, a última etapa (Monte do Gozo-Santiago de Compostela), de 16,7 quilómetros, está previsto realizala de forma presencial, e coa vestimenta de peregrino, xa que se trata dun tramo adaptado para persoas con mobilidade reducida e con todas as garantías de seguridade.  Vémonos no Camiño!

 

 

post

Íntegro participará en Carballo na Semana Europea da Mobilidade coa celebración do Día da Accesibilidade  

  • Levarase a cabo o luns 21 para dar visibilidade aos problemas que sofren a diario ás persoas con mobilidade reducida
  • A entidade súmase así, un ano máis, ao programa de actos que organiza a Concellería de Mobilidade, do 16 ao 22 deste mes, coa colaboración ademais da área de Igualdade, o Club Ciclista Carballo e a Asociación Ambiental Senda Nova

O presidente de Íntegro, Adolfo López  Baña, e a Educadora Social Tania Bartucca Nión, asistiron onte en Carballo á presentación do programa de actividades que o consistorio carballés vai poñer en marcha do 16 ao 22 de setembro con motivo da conmemoración da Semana Europea da Mobilidade. Trátase dunha programación ampla e variada, deseñada desde a Concellaría de Mobilidade coa colaboración da área municipal de Igualdade, o Club Ciclista Carballo Vázquez y Reino, Senda Nova e a nosa entidade, que non quixo faltar, un ano máis, a esta importante cita para aportar o noso gran de area na organización de varias accións encamiñadas a sensibilizar e implicar á cidadanía no difícil reto de converter as nosas rúas en espazos seguros e accesibles para todos e todas. No acto, celebrado nas inmediacións do Fórum,  tamén estiveron presentes o concelleiro de Mobilidade, Juan Seoane; a concelleira de Igualdade, Maica Ures, e Eva Cameán, da asociación ambiental Senda Nova.

Juan Seoane, Eva Cameán, Adolfo López, Tania Bartucca e Maica Ures durante a presentación na contorna do Fórum

Desde a asociación Íntegro colaboraremos, nesta ocasión, na organización do Día da Accesibilidade, que terá lugar o luns 21 nunha xornada con marcado carácter reivindicativo e repleta de actividades tan singulares como novidosas, orientadas a dar visibilidade aos problemas cos que se atopan a diario as persoas con mobilidade reducida. A primeira delas, denominada “Son só 5 minutiños”, desenvolverase pola mañá, entre as 11.00 e as 13.00 horas, e consistirá na ocupación de varias prazas de aparcamento da rúa Cervantes con cadeiras de rodas, muletas e carteis coas desculpas máis empregadas cando se utilizan prazas PMR sen tarxeta “para que a xente que ocupa as prazas para persoas con mobilidade reducida vexa o mal que se sentiría se lle pasase a eles. Non hai prazas para persoas con mobilidade reducida porque queiramos, senón porque as precisamos”, aclarou Adolfo López. Xa pola tarde celebrarase a segunda, unha ruta en cadeira de rodas polas rúas da contorna do Fórum para avaliar as melloras feitas en accesibilidade e detectar posibles novos puntos nos que sexa preciso actuar. Será das 17.00 ás 18.30 horas.

Este ano, debido ás restricións impostas pola COVID-19 e para garantir a seguridade dos/as participantes, formaranse grupos reducidos nas diferentes actividades e extremarase as medidas de prevención (uso de tapabocas, distanciamento social e desinfección de obxectos), segundo detallou Juan Seoane, encargado de debullar toda a programación, na que figuran propostas tan atractivas como o “Día sen Coches”, unha iniciativa que se desenvolverá por primeira vez e que consistirá en cortar ao tráfico rodado varias rúas para que as usen os peóns  con xogos e actividades co obxectivo de dar visibilidade á transformación urbana da vila. Esta acción, que se realizará de forma simultánea en diferentes barrios da vila, coincidirá tamén coa celebración de “Pedaleando pola igualdade”, unha actividade que a Concellaría de Igualdade tivo que suspender no mes de marzo e que agora retoma, en colaboración co Club Ciclista Carballo, para “darlles recursos ás mulleres para poder andar en bicicleta e que se sintan libres”, manifestou Maica Ures. O programa complétase cunha ruta a pé pola beira do Anllóns para poñer en valor as marxes dos ríos da man de Senda Nova, e unha morea de actividades máis que non podes perder. Bótalle un ollo e participa!

post

Natureza, diversión e aprendizaxe nas novas rutas de sendeirismo de Íntegro

  • Trátase dunha actividade dirixida a mozos e mozas de 16 a 35 anos, incluída no programa Iniciativa Xove, financiada pola Dirección Xeral de Xuventude, Participación e Voluntariado da Xunta de Galicia 
  • A vindeira semana, as instalacións de Nantón tamén acollerán un interesante obradoiro sobre as “3R” 

A nova realidade imposta tras a pandemia e as medidas anti-COVID recomendadas para frear a súa propagación, están a poñer de manifesto a necesidade de mudar os nosos hábitos sociais e procurar novas formas de entretemento e diversión para o noso tempo de lecer. Neste senso, as actividades ao aire e o contacto directo coa natureza están a converterse nunha alternativa ideal para o tempo de ocio, capaz de garantir o cumprimento das novas restricións sanitarias, ademais de fomentar novos valores para o desenvolvemento dunha vida máis saudable e respectuosa coa contorna.

En Íntegro sabémolo moi ben e por iso estamos a promover, desde o programa Iniciativa Xove, financiado pola Dirección Xeral de Xuventude, Participación e Voluntariado da Consellería de Política Social da Xunta de Galicia, diversas rutas de sendeirismo pola Costa da Morte encamiñadas á aprendizaxe, observación e interpretación da natureza polo miúdo así como a sensibilizar e concienciar á cidadanía sobre a importancia de respectar e protexer o medio ambiente.

Coa finalidade de preservar a saúde dos/as participantes e cumprir estritamente coas medidas de prevención establecidas para evitar a propagación da COVID-19, cada grupo estará formado por un número moi reducido de persoas, que deberán someterse a un control de temperatura e hixiene de mans antes da saída así como o uso obrigatorio de mascarilla durante a camiñada. Ademais, os sendeiristas deberán levar roupa e calzado cómodos, protección solar, gorra e bebida abundante para combater o calor.  

Rutas e recomendacións

Os percorridos elixidos para as rutas que imos levar a cabo discorrerán por diferentes localidades da Costa da Morte, de gran beleza paisaxística e riqueza medioambiental como a de Caión-Baldaio, Camelle-Arou ou os paseos marítimo-fluviais de Laxe e Cabana de Bergantiños. A data e o horario de cada ruta concretarase cos/as asistentes unha vez rematado o período de inscrición.  

Esta actividade vai dirixida a mozos e mozas con idades comprendidas entre os 16 e os 35 anos. Se estás interesado/a en participar, inscríbete canto antes enviando un mail a info@integro.es e prepárate para desfrutar dunha xornada na que aventura, diversión e aprendizaxe estarán aseguradas.   

Obradoiro 3R

Por outra banda, e seguindo coa nosa política de protección medioambiental para lograr un mundo máis equilibrado e sostible, a vindeira semana poremos en marcha unha nova acción formativa incluída no programa Iniciativa Xove da Xunta de Galicia. O contido do obradoiro, que se desenvolverá en horario de tarde nas nosas instalacións de Nantón, en Cabana de Bergantiños, xirará arredor da regra das “3R” (Reducir, Reciclar e Reutilizar) e a importancia de aplicalas na nosa vida cotiá para salvar o planeta e xerar hábitos de consumo responsable. Apúntaste? Agardámoste!

 

post

Íntegro amplía o seu servizo de transporte cun novo vehículo adaptado de nove prazas

Para a adquisición da furgoneta, valorada en máis de 42.000 €, a entidade contou coa financiación do AGADER, o Fondo Europeo Agrícola de Desenvolvemento Rural e a Xunta de Galicia, a través dos fondos do 0,7% do IRPF 2018

A asociación Íntegro das persoas con Diversidade Funcional da Costa da Morte vén de adquirir un novo vehículo adaptado que permitirá mellorar o servizo de transporte dos nosos usuarios e usuarias e incrementar o actual parque móbil, posibilitando así o desdobramento dalgunhas rutas e a incorporación de novas prazas.

O novo vehículo, valorado en máis de 42.000 €, ten capacidade para nove persoas e está dotado cunha plataforma e un chanzo eléctricos para facilitar o acceso ao mesmo ás persoas que se desprazan en cadeira de rodas.

Dita adquisición foi posible grazas á implicación de diversos organismos que contribuíron á súa financiación cunha aportación pública que ascende a un total de 36.665,55 €, importe sufragado en parte polo AGADER (GDR Costa da Morte), o Fondo Europeo Agrícola de Desenvolvemento Rural (Feader), no marco da medida 19 (Leader) do PDR de Galicia 2014-2020 e dentro da prioridade ou área focal 6B, dirixida a promover o desenvolvemento local nas zonas rurais, e coa financiación da Xunta de Galicia, xestionada por COGAMI, a través de fondos do 0,7% do IRPF 2018.

O presidente de Íntegro, Adolfo López Baña, amosou a súa satisfacción por dispoñer dunha flota ampla e renovada, adaptada ás necesidades das persoas con diversidade funcional e salientou “a necesidade de dotar ás entidades sociais dos medios e recursos necesarios para contribuír a eliminar os atrancos que existen á hora de facilitar ás persoas usuarias a súa chegada aos centros”.

post

250 persoas mobilizáronse esta mañá en Ponteceso para esixir a accesibilidade universal

Íntegro e o CEIP Eduardo Pondal de Ponteceso protagonizaron a única concentración celebrada na Costa da Morte na que tamén participaron varios responsables municipais e numerosos veciños e veciñas

Esta mañá usuarios/as, traballadores/as, familiares e directivos/as da asociación Íntegro participaron xunto á comunidade escolar do CEIP Eduardo Pondal de Ponteceso ao completo, o concelleiro de educación, Carlos Penedo, e un grupo de veciños e veciñas nunha concentración conxunta en favor da accesibilidade universal de contornas, bens, produtos e servizos, promovida por COCEMFE de forma simultánea en todo o territorio nacional. Pese a que, por mor da choiva, houbo que cambiar de escenario e trasladarse ao patio do centro educativo- con aforo limitado- a asistencia ao acto foi masiva cumpríndose así as expectativas previstas.

Arredor de 250 persoas esixiron hoxe en Ponteceso a eliminación de todo tipo de barreiras para dar cumprimento ao mandato da Lei Xeral de Dereitos de Persoas con Discapacidade y e da súa Inclusión Social, que establece o 4 de decembro de 2017 como límite temporal para que todos os produtos, bens, contornas e servizos sexan accesibles. Neste senso, tanto os representantes do colexio como os/as integrantes da entidade de Nantón solicitaron a inmediata posta en marcha de medidas urxentes encamiñadas á erradicación de elementos que vulneren os dereitos e liberdades das persoas con discapacidade impedindo así a consecución dunha vida autónoma e independente.

Durante a lectura do manifesto, o presidente de Íntegro, Adolfo López Baña, apelou ao compromiso institucional e á concienciación social de todos os cidadáns destacando que “unha sociedade baseada na accesibilidade e o deseño para todas as persoas facilitaríanos a participación e a normalización en todo o que realiza o resto da poboación”. Deste xeito, destacou á importancia de garantir a igualdade de oportunidades e dereitos de todos/as. Neste punto tamén coincidiron os alumnos e alumnas do CEIP Eduardo Pondal que subliñaron no seu discurso que “un mundo accesible é un mundo cómodo, moderno e integrador  ao alcance do noso colectivo e, polo tanto, tamén máis amigable para todas as persoas”, matizaron.

A continuación, varios membros da asociación conversaron cos estudantes para intercambiar impresións sobre a xornada. Moitos deles/as tamén se animaron a contar as súas propias experiencias cando, por mor dunha lesión ou enfermidade, sufriron na súa propia pel unha limitación temporal da mobilidade e as conseguintes dificultades derivadas da falta de accesibilidade.

Máis concentracións

Concentración esta mañá en A Coruña

Pese a que esta foi a única concentración celebrada na Costa da Morte, esta mañá tamén se realizaron de forma simultánea mobilizacións en 35 cidades españolas, 11 delas galegas, nas que participaron preto de 3.000 persoas. En Galicia, cidades como Santiago, A Coruña, Noia, Ourense, Lugo, Monforte, Pontevedra, Mos, Pobra do Caramiñal e O Carballiño foron os outros escenarios elixidos por COGAMI e as súas entidades para reivindicar #AccesibilidadYA, como rezaba o lema da campaña.

Desde Íntegro queremos dar as grazas a todos os/as participantes pola súa asistencia así como á dirección do colexio pontecesán pola cesión das súas instalacións para a realización desta concentración.