post

Máis de 400 alumnos/as da comarca participaron ao longo de maio nas campañas de sensibilización promovidas por Íntegro

Varios centros de ensino de Carballo, A Laracha e Zas foron os destinatarios das últimas accións formativas levadas a cabo pola entidade antes do remate do curso académico

Coa chegada do bo tempo e o inminente remate do curso escolar, as campañas de sensibilización, promovidas pola asociación Íntegro ao longo do ano, sucédense case a diario nos centros de ensino de toda a Costa da Morte. E non é para menos! Ano tras ano, as estatísticas seguen a reflexar un incremento de accidentes medulares durante a temporada estival. Estradas, praias e piscinas continúan a ser os principais puntos de sinistralidade e os nosos mozos e mozas, o colectivo máis vulnerable. Para loitar con esta lacra, a entidade que preside Adolfo López Baña vén de reforzar ao logo deste mes a súa presencia nos centos educativos da zona con charlas informativas e actividades lúdicas e didácticas, organizadas en colaboración coa comunidade escolar para lograr unha educación inclusiva e responsable, capaz de transmitir coñecemento, diversión e maior concienciación social como aconteceu nas últimas visitas levadas a cabo en Carballo, A Laracha e Baio (Zas).

Así, nas últimas semanas, a campaña de prevención de lesións medulares cobrou especial protagonismo na capital de Bergantiños, onde fixo a súa primeira parada para visitar aos alumnos/as de 2º curso do IES Isidro Parga Pondal mentres que a última tivo lugar hai escasos días nas aulas de Formación Profesional Básica do IES Monte Neme, onde se puxo o punto e final á temporada. Entre ambos centros, un total de 145 estudantes participaron activamente, tanto nas conferencias ofrecidas polos representantes de Íntegro como nas posteriores sesións prácticas, que lle permitiron a todos e a todas, poñerse por uns intres na pel dun usuario/a de cadeira de rodas.

Os/as que tamén tiveron que sortear obstáculos e, por certo, con gran habilidade e destreza, foron os alumnos/as de 1º e 2º da ESO do IES Maximino Romero de Baio (Zas), que formaron parte dunha xornada de educación viaria, organizada pola Policía Local da localidade, coa que colaborou a asociación Íntegro a través da realización dun circuíto de mobilidade e varias probas que serviron para conciencialos/as sobre a importancia de evitar prácticas de risco nas estradas como peóns como futuros condutores de vehículos.

 

 

 

 

 

 

Diverescola

Este mes tamén nos deixou unha nova edición da Diverescola, unha iniciativa enmarcada no programa Capacíta-T, promovida para achegar aos máis cativos/as a diversidade e a inclusión a través do xogo e o entretemento. Nesta ocasión, os destinatarios/as foron 150 nenos e nenas de 5º e 6º curso do CEIP Ramón Otero Pedrayo de A Laracha. Ao longo da mañá, o alumnado cambiou as aulas e os pupitres polo patio e o pavillón escolar para poñer a proba os seus coñecementos e habilidades en materia de diversidade. E os resultados foron sorprendentes! Despois de realizar un percorrido cos ollos vendados e nunha cadeira de rodas, todos/as demostraron que a empatía, a destreza e a sensibilidade son materias que dominan á perfección. Parabéns a todos!

 

 

 

 

 

 

Desde Íntegro queremos agradecer a implicación e a colaboración de toda a comunidade educativa na posta en marcha dos diferentes programas de prevención e sensibilización nos centros de ensino co obxectivo de fomentar entre o alumnado un maior coñecemento da súa contorna e unha educación responsable e inclusiva. Grazas e a gozar do verán, con precaución!!

post

160 estudantes carballeses toman conciencia sobre a prevención de lesións medulares

Responsables de Íntegro achegáronse nos últimos días ata as aulas do IES Monte Neme e Parga Pondal

160 alumnos e alumnas de dous institutos carballeses participaron nas últimas xornadas de sensibilización promovidas pola asociación Íntegro, dentro da campaña de prevención de lesións medulares que está a percorrer os centros educativos de primaria e secundaria da Costa da Morte.

O pasado martes, varios responsables da entidade con sede en Nantón (Cabana), entre os que se atopaba o seu presidente Adolfo López Baña, achegáronse ata as aulas do IES Monte Neme de Carballo para manter un encontro cos estudantes de 3º e 4º da ESO. Ademais da proxección do vídeo “A ti tamén che pode pasar”, no que se narran as principais causas e consecuencias de sufrir un accidente medular, o alumnado seguiu con atención o relato de varias testemuñas reais que deron conta do seu día a día sobre unha cadeira de rodas. Durante a mañá celebráronse dúas sesións informativas nas que participaron un total 110 mozos/as. Ao remate, moitos deles/as aseguraron sentirse máis concienciados/as sobre a importancia de evitar prácticas de risco, especialmente en zonas como praias e piscinas onde os mergullos de cabeza son moi habituais.

Os/as que tamén terán que poñer en práctica os consellos recibidos o pasado venres son os 50 alumnos/as de 2º da ESO do IES Isidro Parga Pondal, o outro centro carballés que estes días abriu as súas portas á campaña de prevención de Íntegro. Logo da charla informativa, celebrouse un pequeno coloquio para intercambiar impresións sobre a xornada e conversar sobre as dificultades de vivir cunha lesión medular. Esperemos que todos/as vaian coa lección aprendida. Ata a próxima!

post

A campaña de lesións medulares de Íntegro aterriza no IES Monte Neme de Carballo

Os poñentes, Ramón Pombo e David Pombo, insistiron na importancia de evitar prácticas de risco

O vicepresidente de Íntegro, Ramón Pombo, e o vogal da entidade, David Pombo, estiveron esta semana de visita no IES Monte Neme de Carballo para dar a coñecer aos alumnos e alumnas de secundaria a campaña de prevención de lesións medulares coa que, dende hai algo máis dun ano, estamos a percorrer os diferentes centros educativos da Costa da Morte.

copia poñentes

Ramón, Teresa e David trasladaron as súas vivencias aos estudantes do IES Monte Neme

Pero nesta ocasión contaron, ademais, co testemuño dunha socia e voluntaria da agrupación que quixo sumarse á esta xornada de sensibilización escolar aportando a súa propia vivencia. Con esta iniciativa, co-financiada pola Xunta de Galicia e a Deputación de A Coruña ademais da colaboración das administracións locais e de varias entidades privadas, preténdese educar e concienciar aos máis novos/as sobre a necesidade de evitar prácticas de risco que poidan derivar en doenzas irreparables.

DSC_0685

Un circuíto de velocidade puxo a proba a destreza dos participantes

 

Pese a que esta sesión foi a primeira do ano no centro carballés, os/as estudantes fixeron gala dos seus coñecementos, grazas ás campañas de edicións anteriores, e de seguido pasaron á acción amosándose moi interesados/as e participativos/as durante as explicacións dos nosos representantes, que non dubidaron en expoñer os seus casos persoais para ilustrar o día a día sobre unha cadeira de rodas. Durante a charla informativa fíxose especial fincapé na importancia de previr situacións perigosas e imprudentes en praias, piscinas e estradas, como principais causantes do maior número de lesións medulares irreversibles entre a mocidade. Neste senso, incidiuse de maneira especial na importancia de non tirarse á auga de cabeza para evitar accidentes medulares mortais ou de consecuencias irreparables de cara á temporada de verán que está a piques de comezar.

DSC_0701Como en todo aprendizaxe, logo da teoría ven a práctica. E esta foi, sen dúbida, a parte máis entretida e didáctica da xornada. Ademais de experimentar en primeira persoa as dificultades de desprazarse coa mobilidade reducida, os estudantes puideron poñer a proba a súa destreza sobre unha cadeira de rodas e a súa capacidade de empatía coas persoas que a diario deben enfrontarse a todo tipo de barreiras, tanto físicas como mentais.  Unha boa maneira de comprobar que a vida é cuestión de capacidades e que a mellor educación é a prevención. Unha lección superada por todos e todas e con nota! Ata a próxima!

post

A campaña de prevención de lesións medulares de Íntegro chega aos IES de Carballo

Este mes realizaranse varias charlas informativas no Isidro Parga Pondal e no Alfredo Brañas

Esta semana Íntegro volve ás aulas coa campaña de prevención de lesións medulares que estamos a impartir nos centros educativos de primaria e secundaria da Costa da Morte co obxectivo de informar aos estudantes sobre as causas e consecuencias de sufrir un accidente medular e sensibilizalos/as sobre a importancia de evitar situacións de risco que poidan derivar nesta doenza. Esta iniciativa, que xa leva máis dun ano percorrendo os colexios das comarcas de Soneira, Fisterra e Bergantiños, está cofinanciada pola Xunta de Galicia e a Deputación da Coruña e conta ademais coa colaboración de todos os concellos e a implicación de varias empresas de ámbito privado.

la-foto-1

Alumnos/as do CEIP Canosa-Rus de Coristanco

Tras visitar recentemente aos alumnos/as do CEIP Canosa-Rus de Coristanco, este mes achegámonos ata dous centros de secundaria do Concello de Carballo. Así, mañá será a segunda quenda para os mozos e mozas do IES Isidro Parga Pondal de Carballo, onde xa estivemos tamén a semana pasada gozando dunha xornada moi positiva e enriquecedora. Nesta ocasión, o presidente de Íntegro, Adolfo López Baña, acompañado doutros membros da directiva e de varios técnicos da entidade, ofrecerá unha charla informativa para dar a coñecer aos estudantes da ESO en que consiste unha lesión medular e cales son algunhas das súas consecuencias, facendo especial fincapé na prevención de prácticas de risco asociadas á adolescencia, especialmente, en estradas, praias e piscinas, onde se están a rexistrar o maior número de accidentes entre os máis novos.

img_1105

Mañá terá lugar a segunda charla informativa no IES Isidro Parga Pondal de Carballo

Ao longo da xornada, os asistentes poderán escoitar por boca dos seus protagonistas o relato das súas propias vivencias e as dificultades de vivir sobre unha cadeira de rodas nunha sociedade na que as barreiras físicas e mentais seguen a ser unha materia pendente. Obstáculos e limitacións que o alumnado poderá comprobar en primeira persoa poñéndose no lugar das persoas con mobilidade reducida. Unha experiencia única para poñer a proba a destreza dos rapaces e rapazas pero tamén a súa capacidade de empatía con quen sofre este tipo de situacións na súa vida diaria.

Próximas citas

programas-escolares

Estudantes carballeses do IES Monte Neme

A campaña de prevención de lesións medulares chega ao municipio carballés para quedarse. Logo de visitar o IES Isidro Parga Pondal, os nosos representantes tamén acudirán ao IES Alfredo Brañas para continuar coas actividades de sensibilización dirixidas aos alumnos/as de educación secundaria. Os días elixidos serán o 22 e o 29. Deste xeito, completamos a ronda de visitas aos centros da capital de Bergantiños, iniciada o curso pasado cunha xornada informativa no IES Monte Neme.

img_1106

 

Dende Íntegro queremos dar as grazas a todas as empresas e institucións participantes nesta campaña así como aos centros educativos pola excelente acollida que está a ter entre os mesmos. Esperamos que esta iniciativa logre xerar unha maior concienciación social e dea moi pronto os seus froitos porque o mellor tratamento sempre é a prevención. Vémonos nas aulas!

 

 

00020001

post

O IES Monte Neme avanza cara a inclusión con Íntegro

O presidente de Íntegro, Adolfo López Baña, acompañado de Ramón Pombo e David Pombo, vicepresidente e vogal respectivamente da entidade, estiveron onte e hoxe cos alumnos e alumnas do IES Monte Neme de Carballo para explicarlles as causas e consecuencias de sufrir unha lesión medular. Os accidentes de tráfico e as prácticas de risco en praias e piscinas son os motivos máis frecuentes e principais causantes de danos moitas veces irreparables.

IMG-20151218-WA0002Durante as dúas xornadas que durou esta actividade, subvencionada polo Concello de Carballo, os protagonistas ofreceron charlas teóricas que exemplificaron con casos prácticos, os seus, grazas ao relato da súas propias experiencias persoais. De feito, espertaron gran interese entre os rapaces e rapazas que non dubidaron en facer todo tipo de preguntas relacionadas coas dificultades e a complexidade de vivir sobre unha cadeira de rodas. E que mellor maneira de sabelo que comprobalo eles mesmos! Esta foi, sen dúbida, a parte máis esperada polos alumn@s e a máis sorprendente, porque comprobaron o complexo que pode chegar a ser realizar accións tan sinxelas como desprazarse ou subir e baixar unha beirarrúa.

IMG-20151217-WA0060Ademais, @s escolares enseguida tomaron conciencia do gran número de obstáculos que de cote deben sortear as persoas con mobilidade reducida, algo que, agardamos, serva para avanzar un pouquiño máis cara a inclusión. Superación, ilusión, barreiras e forza foron algunhas das palabras máis repetidas.

 

 

Grazas ao Concello de Carballo por brindarnos a oportunidade de achegarnos aos mozos e mozas do IES Monte Neme para construír unha sociedade máis diversa, igualitaria e capacitada e grazas aos alumnos pola súa participación e acollida. Parabéns!