post

O CEIP de Buño transfórmase nunha Diverescola para os/as estudantes de infantil e primaria

Preto de 30 nenos e nenas participaron nunha xornada de sensibilización incluída no programa Capacíta-T

Os alumnos/as de infantil e primaria do CEIP Joaquín Rodríguez Otero de Buño (Malpica) convertéronse onte nos protagonistas dunha nova edición da Diverescola, unha iniciativa promovida por Íntegro, no marco do programa Capacíta-T, para achegar aos máis cativos/as a diversidade e a inclusión a través do xogo e o entretemento.

Durante algo máis de dúas horas, as aulas do centro educativo mudaron o seu aspecto para converter os tradicionais pupitres en improvisados circuítos de obstáculos e os libros en leccións orais de vida e superación. Así, a primeira hora da mañá a nosa monitora de ocio e tempo de lecer, Lucía Blanco, iniciaba unha xornada de sensibilización repleta de xogos na que participaron preto de trinta nenos e nenas que agardaban ansiosos/as e con expectación a visita da asociación Íntegro.

Aínda que moitos/as aseguraron coñecer a persoas con diversidade funcional na súa contorna, moi poucos sabían do seu día a día. E para descubrilo, nada mellor que meterse na súa propia pel poñendo a proba as súas habilidades e destreza a través da realización dunha serie de probas coa mobilidade reducida e os ollos tapados.  Os primeiros en apuntarse ao circuíto de obstáculos foron os/as 17 estudantes de educación infantil, que superaron con nota a actividade, dando exemplo da súa capacidade de empatía. De seguido, 11 nenos e nenas de diferentes ciclos de primaria tamén tiveron a oportunidade de comprobar cales son algunhas das barreiras que han de sortear as persoas que posúen algún tipo de discapacidade. Unha vez máis, os/as máis pequenos da casa volvéronnos a sorprender facendo gala da súa naturalidade e espontaneidade.  

Desde Íntegro queremos agradecer a participación de todos os centros educativos da Costa da Morte neste proxecto co que se pretende promover unha aprendizaxe en valores e unha aposta  pola educación inclusiva dende a infancia.

post

Inaugurado o curso de Acondicionamento de Mobiliario Urbano e Xardíns para persoas con diversidade funcional

Ao acto de presentación, que tivo lugar o pasado día 1 na Casa do Oleiro de Buño, asistiron responsables de Íntegro, MáisPorvir e o Concello de Malpica

A asociación Íntegro vén de inaugurar un curso de Acondicionamento de Mobiliario Urbano e Xardíns dirixido a persoas con diversidade funcional co fin de mellorar a súa capacitación profesional e promover o emprego entre o colectivo. No acto de presentación, celebrado o pasado día 1 na Casa do Oleiro de Buño (Malpica),  estiveron presentes a traballadora social de Íntegro, Sandra Reimúndez; a xerente de MáisPorvir, Sandra Caamaño; o alcalde de Malpica, Eduardo Parga Veiga; a concelleira de Servizos Sociais, Marisol Blanco Gorín, e o primeiro tenente de alcalde, Miguel Fernández.

O novo obradoiro, que terá una duración de dous meses e medio, está integrado tan só por doce alumnos/as procedentes de diversas localidades da Costa da Morte que, na actualidade, figuran como demandantes de emprego. Trátase dun grupo moi reducido para garantir unha atención individualizada e axeitada ás necesidades de cada persoa.

 

As clases levaranse a cabo de luns a venres, de 9:30 a 14:30h. e dividiranse en varios módulos teóricos e prácticos. Así, os primeiros serán impartidos por profesionais de Íntegro na Casa do Oleiro de Buño (Malpica) grazas á cesión realizada polo Concello de Malpica para o desenvolvemento das sesións formativas en materia de xardinaría, carpintaría e competencias transversais. Pero dende o consistorio tamén porán a disposición dos alumnos/as varias zonas verdes e axardinadas, tanto no casco urbano como no rural, para a realización das correspondentes prácticas. Pola súa banda, o municipio de Cabana tamén quixo implicarse nesta iniciativa destinando o local da escola de carpintaría, situado na parroquia de Anos, para a execución dos traballos de reparación, rehabilitación e confección de mobiliario urbano, incluídos na programación do curso e impartidos pola empresa de economía social Máis Porvir.

Con esta nova acción formativa, subvencionada pola Fundación ONCE e co-financiada polo Fondo Social Europeo (FSE) e a asociación Íntegro, agárdase acadar a inserción laboral dunha elevada porcentaxe de participantes, ao igual que sucedeu en ocasións anteriores con outros cursos de características similares.     

post

A Deputación Provincial da Coruña donará a Íntegro un vehículo adaptado para o transporte de usuarios/as

Así o manifestou hoxe a deputada Ánxela Franco durante a súa visita a Nantón acompañada polo concelleiro de Educación de Ponteceso Carlos Penedo

Esta mañá o Centro de Recursos Íntegro recibíu unha visita moi especial que nos deixou boas novas. A deputada provincial de Igualdade e Benestar Social, Ánxela Franco, desprazouse ata Nantón (Cabana) para coñecer de primeira man as obras e actividades financiadas pola Deputación da Coruña a través dun programa de subvencións a entidades sen fins de lucro destinado a investimentos en servizos sociais correspondente ao ano pasado. Xunto á titular da área tamén estivo o concelleiro de Educación, Asociacionismo e Patrimonio de Ponteceso, Carlos Penedo.

O presidente de Íntegro, Adolfo López Baña, e a directora do centro, Noelia Barreira, exerceron de anfitróns nunha visita guiada polo Centro de Día e o Centro Ocupacional, onde foron os propios usuarios/as os que explicaron polo miúdo o funcionamento dos diferentes obradoiros que se levan a cabo, facendo especial fincapé no proceso de elaboración dos xabóns de glicerina da colección Bicos de Amora, unha liña comercial de productos artesanais coa que se pretende mellorar a empregabilidade das persoas con diversidade funcional, e pola que se interesou especialmente a titular provincial.

Os responsables da entidade tamén deron a coñecer as novas actividades e programas postos en marcha ao longo de 2017 e adiantaron as liñas estratéxicas programadas para o período 2017-2020, destinadas a mellorar a formación e o emprego dun colectivo en risco de exclusión. Neste punto, tanto a Deputación como o Concello manifestaron o seu compromiso de colaboración para seguir traballando cóbado con cóbado coa entidade.

Pero as boas novas aínda estaban por chegar e fixérono da man da deputada provincial e o responsable municipal. Así, a primeira, Ánxela Franco, anunciou que en breve a entidade disporá dun novo vehículo adaptado, concedido polo organismo provincial para a mellora dos servizos e/ou prestacions sociais e sociosanitarias. E, pola súa banda,  o concelleiro Carlos Penedo trasladou a intención do Concello de Ponteceso de promover a inclusión transversal desde todas as áreas de goberno que sexa posible coa intención de “facer entre todos/as un concello máis inclusivo e accesible”, matizou.

Desde Íntegro queremos agradecer a colaboración e o traballo conxunto de ambas institucións na procura dunha sociedade máis inclusiva e igualitaria.

post

O Centro Social de Neaño acolleu unha charla sobre lesións medulares dirixida a novos colectivos sociais

Un grupo de 40 veciños/as da localidade e varios responsables do Concello de Cabana participaron neste acto co que se pretende ampliar a campaña a outros ámbitos e colectivos de risco

Hoxe a campaña de prevención de lesións medulares cambiou de escenario e de público traspasando así as aulas dos centros educativos da Costa da Morte ás que nos ten acostumados/as. Nesta ocasión, o Centro Social de Neaño (Cabana) foi o novo emprazamento elixido pola asociación Íntegro para a celebración dunha charla informativa titulada “lesións medulares: causas e consecuencias”. Con esta actividade, na que participaron preto de 40 persoas, a entidade amplía o seu programa de sensibilización social a outros ámbitos e colectivos para concienciar á cidadanía sobre a necesidade de evitar prácticas de risco e extremar as medidas de prevención.

Ás 11h da mañá, a proxección do vídeo “A ti tamén che pode pasar”, editado pola entidade, abriu o acto organizado en colaboración co Centro de Día de Cabana. Ao seu remate , o presidente de Íntegro Adolfo López Baña, e a educadora social Tania Bartucca analizaron as principais causas e consecuencias de sufrir unha lesión medular, facendo especial fincapé na importancia da súa prevención. Neste senso, ambos coincidiron en destacar o notable incremento deste tipo de doenzas entre a poboación adulta, causadas, principalmente, no ámbito doméstico, laboral e no campo debido a unha falta de atención, un exceso de confianza ou como froito de caídas fortuítas. David Pombo e Teresa Alvarellos, vogal e socia da entidade, respectivamente, convertéronse en protagonistas involuntarios da xornada ao narrar as súas propias experiencias tras sufrir un accidente medular. Dous exemplos de vida, forza e superación que non deixaron indiferente a ninguén.

Acompañando aos representantes de Íntegro estiveron tamén varios responsables do Concello de Cabana, institución colaboradora da campaña de prevención que se imparte nos centros educativos de primaria e secundaria. Entre as autoridades locais figuraban o alcalde José Muiño, o concelleiro de Obras e Servizos Sociais, Carlos Allo; a concelleira de Turismo, Medio Ambiente e Medio Rural, Begoña Torrado e a educadora familiar, Cristina Morandeira. Dende o consistorio salientaron, unha vez máis, o importante labor divulgativo e preventivo desta campaña, xa consolidada entre os escolares da Costa da Morte.

Tras hora e media, a xornada rematou cunha quenda de intervencións que o público aproveitou para preguntar sobre o día a día dun lesionado medular e coñecer as principais barreiras ás que deben enfrontarse na súa vida diaria.

Desde Íntegro queremos dar as grazas a veciños/as, usuarios/as e autoridades locais pola súa asistencia a esta nova sesión encamiñada a sensibilizar e concienciar en materia de prevención a toda a poboación porque todos/as podemos ser vítimas dunha doenza medular. Vémonos na seguinte!

post

Visítanos recibe a 47 estudantes do CPI As Revoltas

Os talleres de artes manuais e cociña tiveron gran aceptación entre os alumnos/as do centro educativo de Cabana

Esta semana o Centro de Recursos de Nantón volveu a abrir as súas portas para acoller unha nova edición de Visítanos!, unha actividade educativa incluída no programa Capacíta-T que está dirixida a concienciar e sensibilizar aos escolares en materia de diversidade e inclusión. Onte os/as protagonistas foron os alumnos e alumnas de 5º e 6º de primaria do CPI AS Revoltas de Cabana que, xunto aos nosos usuarios e usuarias, gozaron dunha xornada moi didáctica, lúdica e chea de curiosidades.

As preguntas comezaron case nada máis chegar. A primeira hora da mañá as aulas de Íntegro comezaron a encherse de alumnos/as coas pilas ben cargadas e a lección aprendida, como xa demostraron durante a xuntanza de grupo que tivo lugar antes de dar comezo a visita polas instalacións. Aínda que case todos/as aseguraron coñecer a persoas con discapacidade, a maioría recoñeceu saber moi pouco sobre a realidade do seu día a día ou como relacionarse. E para amosárllelo proxectouse un vídeo titulado “Lo incorrecto” que, a través de situacións tan absurdas como divertidas, intenta cambiar a ollada da sociedade rompendo moitas ideas preconcibidas e falsos estereotipos.

O momento máis agardado por todos/as os/as participantes chegou coa visita aos obradoiros. Se o aprendizaxe é un proceso sinxelo a estas idades, xogando aínda o é máis. Porque iso é o que fixeron ao longo da mañá os 47 alumnos/as do centro cabanés. Entre risas e caras de asombro polos logros acadados, foron percorrendo as diferentes aulas e talleres.

 

 

 

 

 

Actividades

Entre as actividades preferidas dos/as estudantes destacaron as de artes manuais (elaboración de xabóns de glicerina e bixutería) e o taller de cociña. Nesta ocasión, ademais de descubrir habilidades que tiñan ocultas, os escolares levaron para a casa cadansúa pulseira de macramé, feita por eles/as mesmos/as, e a satisfacción de ter elaborado unhas riquísimas rosquillas que tamén tiveron ocasión de degustar. Na sala de logopedia e ximnasia as risas estiveron garantidas cos xogos de coordinación e equilibrio así como nas probas de mobilidade reducida amosando gran destreza sobre a cadeira de rodas e unha capacidade de empatía e adaptación sobresaínte.

Ao remate da xornada tocou valoración e exposición de todo o aprendido. E o resultado foi espectacular! Os/as estudantes confeccionaron un mural no que plasmaron as súas experiencias no centro e algún que outro segredo de taller que nos deixaron como recordo do seu paso polo centro e co que nos animaron a non deixar nunca de voar, e de soñar porque a diversidade, como podedes ver, é cuestión de capacidades. Parabéns chicos/as!

 

 

 

 

 

 

 

 

 

 

Desde Íntegro animamos a todos os centros educativos da Costa da Morte a participar nos diferentes programas educativos que temos en marcha (Diverescola, Visítanos, Prevención de lesións medulares) apostando por unha educación inclusiva, rica en valores e comprometida coa diversidade. Chama ao 981 734 985 e infórmate! 

post

Visítanos! abre a porta da diversidade a estudantes de primaria do CPI de Zas

27 alumnos/as de 4º, 5º e 6 de primaria visitaron o centro de Nantón e participaron en diferentes obradoiros cos nosos usuarios dentro do programa Capacíta-T

Esta semana as portas de Íntegro volveron a abrirse para un grupo de escolares da Costa da Morte cos que celebramos unha nova edición de Visítanos!, unha actividade educativa que forma parte do programa Capacíta-T co que a nosa entidade pretende concienciar, educar e capacitar aos máis pequenos/as en materia de diversidade.

Achegar o día a día das persoas con diversidade funcional aos estudantes de infantil e primaria  é unha ensinanza máis doada, entretida e efectiva cando os/as propios/as protagonistas se converten en mestres/as por unhas horas e os libros en divertidos xogos e actividades coas que imaxinar, crear e descubrir as capacidades e habilidades que todos e todas levamos dentro. Onte foi a quenda de 27 nenos e nenas de 4º, 5º e 6º de primaria do CPI de Zas que participaron, case sen sabelo, nunha xornada de sensibilización que deseguido se transformou nun excelente exercicio de convivencia e interacción cos nosos usuarios e usuarias, dos/as que aprenderon verdadeiras leccións de vida.

Tras a proxección dun vídeo explicativo sobre o funcionamento do centro e as actividades que nel se desenvolven tocou pasar a acción. Divididos en varios grupos, os e as estudantes foron visitando os diferentes obradoiros do Centro Ocupacional. Nesta ocasión, ademais de elaborar xabóns de glicerina e pulseiras de macramé, os alumnos/as tamén tiveron a oportunidade de participar nun obradoiro de exercitación mental a través de xogos de habilidade e rapidez que souberon resolver sen grandes dificultades aínda que, iso si,  axudados/as en ocasións polos nosos usuarios/as.  E se no taller de logopedia aprenderon a rir comezando por eles mesmos, no de cociña demostraron as súas incribles dotes para a repostería elaborando unha riquísima tarta de chocolate, merecedora dunha estrela Michellin.

 

Ao rematar a xornada, os/as estudantes confeccionaron un mural, que exporán no seu colexio, coas súas impresións sobre o centro e as experiencias vividas. Esperemos que fosen tan positivas e gratificantes como para nós. Vémonos na próxima edición de Visítanos!

post

Íntegro amplía a súa oferta formativa con catro novos cursos de capacitación laboral

  • Axudante de cociña, auxiliar de almacén, peón de xardín e limpeza de superficies e mobiliario en edificios e locais son as novas especialidades que se impartirán en 2017-2018
  • O programa está subvencionado pola Consellería de Política Social da Xunta e o Fondo Social Europeo dentro do Programa Operativo de Galicia 2014-2020

A asociación Íntegro está de parabéns porque o plan de formación do Centro de Recursos de Nantón vaise ver notablemente incrementado durante o período 2017-2018. Esta boa nova chega da man da Dirección Xeral de Inclusión Social da Xunta de Galicia que vén de concederlle á entidade un programa de axudas, co-financiado polo Fondo Social Europeo (FSE) a través do Programa Operativo de Galicia 2014-2020, para a realización de accións sociais e inclusivas destinadas a promover a igualdade de oportunidades para persoas con diversidade funcional da Costa da Morte. E que mellor maneira de facelo que a través da formación e o emprego.

Entre o 2017 e o 2018 Íntegro porá en marcha catro novos obradoiros centrados na capacitación laboral dos seus participantes como medida de mellora na procura dun emprego digno e de calidade. Axudante de cociña, auxiliar de almacén, peón de xardín e limpeza de superficies e mobiliario en edificios e locais (este último xa en marcha) son as especialidades dun programa formativo que será impartido nas instalacións do centro por persoal cualificado e cunha ampla traxectoria docente. Íntegro amplía así a súa oferta de formación para facilitar máis recursos aos colectivos máis vulnerables.

 

Curso en marcha

O que si xa comezou é o curso de “limpeza de superficies e mobiliario en edificios e locais”, tamén incluído no novo plan de formación. Nel están a participar, dende o pasado 3 de xullo, 10 persoas con diversidade funcional da Costa da Morte. As clases teñen unha duración de 208 horas lectivas divididas en catro módulos teóricos, un de prácticas profesionais non laborais e outro de competencias transversais. Entre os obxectivos deste obradoiro, incluído no Programa Operativo de Galicia 2014-2020, está a dotar aos alumnos/as das ferramentas necesarias para realizar as tarefas propias de limpeza e mantemento de superficies, así como mobiliario en edificios e locais, seleccionando as técnicas, produtos e maquinaria necesarios para garantir a súa correcta conservación, hixiene e mantemento, baixo a supervisión do profesional competente, cumprindo coa normativa aplicable en materia de seguridade e saúde.

 

 

post

Íntegro lanza un vídeo sobre a prevención de lesións medulares

 “A ti tamén che pode pasar” reforzará a próxima campaña de sensibilización nos centros educativos da Costa da Morte con testemuños reais en primeira persoa, recomendacións e aportacións médicas encamiñadas á prevención    

En Íntegro estamos de estrea. “A ti tamén che pode pasar” é o título do novo vídeo sobre prevención de lesións medulares elaborado pola asociación e presentado esta semana no Hospital Marítimo de Oza, en A Coruña, durante a celebración da I Xornada sobre Lesión Medular, na que se deron cita destacados médicos e investigadores así como varios representantes de entidades de persoas con diversidade funcional para falar sobre os últimos avances científicos, as novas expectativas, a formación e a importancia da prevención. E, precisamente, sobre este último aspecto xirou a intervención do presidente de Íntegro Adolfo López Baña, que afondou na necesidade de reeducar á sociedade e, especialmente, aos máis novos/as co fin de evitar prácticas de risco innecesarias que poidan derivar en situacións tráxicas e irreversibles.

O noso presidente centrou a súa intervención no ámbito da prevención

Os accidentes de tráfico e os mergullos en praias e piscinas son, logo das caídas fortuítas no ámbito doméstico, as principais causas de lesión medular tal como se recolle no novo proxecto audiovisual que Íntegro vén de realizar e no que tamén colaboraron institucións como a Xunta de Galicia, a Deputación de A Coruña, a Dirección General de Tráfico e a Unidade de Lesionados Medulares de A Coruña, ademais da empresa de xestión social +PorVir e a clínica de fisioterapia Eva Senande.

Ciencia e vida 

O novo vídeo foi presentado este martes na I Xornada sobre Lesión Medular que organizou o Sergas en colaboración con Íntegro e outras entidades

Dezasete minutos abondan para explicar cales son as principais causas que orixinan un accidente medular e as múltiples consecuencias e trastornos que sofren as persoas que os padecen. Un médico, unha enfermeira e un terapeuta ocupacional da Unidade de Lesionados do Complexo Hospitalario Universitario de A Coruña son os encargados/as de relatar tanto as situacións que producen este tipo de accidentes como as medidas de prevención que debemos tomar para evitalas. Ademais, analízase paso a paso a evolución médica e psicolóxica do/a doente dende o seu ingreso ata a súa alta sanitaria. Pero a parte máis humana e emocional póñena coma sempre as persoas, protagonistas involuntarios/as de casos reais e moi próximos no tempo como o de David e Teresa, vogal e voluntaria de Íntegro respectivamente, e dous dos nomes propios que poñen voz as súas propias historias para advertir sobre a importancia de evitar riscos, incidir na necesidade de eliminar barreiras físicas e psicolóxicas e transmitirnos valores como a superación, a fortaleza e a confianza nun mesmo/a. Unha lección de vida da que debemos tomar boa nota porque como reza o título “a ti tamén che pode pasar”.

O vídeo, que xa está dispoñible no canal de Youtube e na páxina web da asociación (www.integro.es),  formará parte da próxima campaña de prevención de lesións medulares,  unha actividade que a entidade leva a cabo con gran éxito dende hai anos nos centros educativos de primaria e secundaria da Costa da Morte co obxectivo de informar, concienciar e sensibilizar a un dos colectivos que máis casos rexistra ano tras ano. Así mesmo, dentro deste programa de reeducación social tamén se ofrecen charlas informativas para outros grupos en situación de risco como profesionais do campo ou a construción, persoas de idade avanzada e sesións orientadas á prevención de lesións no ámbito do fogar, primeira causa deste tipo de sinistros.

Esperamos que vos guste e que resulte de moita utilidade para previr accidentes, en moitos casos, evitables e irreparables.

post

Íntegro pon voz a 25 anos de historia

Directivos, fundadores, socios, familiares e usuarios/as protagonizaron un emotivo evento  repleto de discursos, interpretacións, imaxes, música e humor

Apenas pasaban uns minutos das 12 do mediodía cando o auditorio municipal de Cabana de Bergantiños comezou a brillar con luz propia grazas á palabra. E a primeira voz con nome foi a de Dora Mato, unha usuaria da asociación Íntegro, que arrincou os aplausos das máis de 200 persoas alí congregadas cun emotivo poema escrito por ela mesma para conmemorar 25 anos de loita e de superación en favor das persoas con diversidade funcional.

De seguido chegou a quenda do noso presidente Adolfo López Baña. A súa intervención non deixou indiferente a ninguén e arrincou as primeiras bágoas dun público entregado e moi emocionado ao lembrar os precarios pero ilusionantes comezos da asociación que “nestes 25 anos foise caracterizando pola constancia, o compromiso, o esforzo, os ideais, a valentía e a actitude de moitos homes e mulleres que apostaron por un proxecto, sentaron as bases e levantaron os pilares necesarios para unha sociedade inclusiva”, destacou ao tempo que recalcou que “ o decisivo para min é que logo destes 25 anos Íntegro existe e medrou, o que quere dicir que era necesaria e foi aceptada”.

No acto estiveron presentes moitos dos alcaldes e edís dos concellos da Costa da Morte

Tras unha detallada viaxe pola historia da entidade dende as súas orixes en novembro de 1991 nas I Xornadas dos Minusválidos” na Casa dos Veciños do Couto (Ponteceso), organizadas pola Asociación Monte Blanco, López Baña salientou a transformación social e cultural levada a cabo nas últimas décadas xa que “o minusvalismo imperaba en cada mirada, xesto, palabra, nas compras e no papel”. Así, subliñou o importante papel que xogaron a formación e a promoción laboral a través de programas como EcoEmprego (Cogami), Íntegro Xardinería e Medio Ambiente ou a creación da empresa de economía social +Porvir Xestión Social, creada en 2013. Finalmente,  Adolfo López tamén tivo palabras de agradecemento para as institucións públicas polo seu permanente apoio e colaboración e, moi especialmente, para os concellos da Costa da Morte “que cada vez están máis volcados na concesión de servizos coas entidades de iniciativa social da comarca”.  Pero antes de rematar, aproveitou a presenza do conselleiro de Política Social para lembrarlle que “a accesibilidade e a autonomía persoal son de suma importancia en toda Galicia pero no rural axudarán a que non se desvaneza día a día porque, neste asunto, facemos falta todos” recalcou.

Intervencións

Silvestre Couto moderou unha charla con “históricos” de Íntegro para falar sobre os seus inicios

Silvestre Couto (Tesoureiro), Rafael Varela (A Mundiña) e Mario Blanco (A Pesqueira), foron algunhas das voces históricas da entidade que describiron sobre o escenario os duros pero divertidos comezos: as primeiras reunións, as viaxes, as ilusións e os proxectos dos inicios como o desfile de moda Ponte Moda 1993. Anécdotas que deron paso aos eloxios e loanzas do presidente de COGAMI e COCEMFE, Anxo Queiruga, que exaltou a labor desempeñada por Íntegro “sendo capaces de facer realidade un soño sen perder nunca o rumbo”. Na mesma liña, o alcalde de Cabana, José Muíño, transmitiu a súa admiración, respecto e gratitude polo traballo e o legado que deixa a asociación Íntegro. Isto facíao sentando sobre unha cadeira no escenario “para estar a vosa altura” mentres se desculpaba “por non ter feito máis pola inclusión das persoas con diversidade”.

Anabel pronunciou un dos discursos máis emotivos da xornada

Anabel Castiñeira, secretaria da asociación, e Ramón Porteiro, membro da directiva e pai dun usuario, deron voz ás súas vivencias, cargadas de sentimentos e sensibilidade. Primeiro foi Anabel relatando a súa vida como muller con disCapacidade, formación, traballo, autonomía e independencia. E despois, Ramón foi o encargado de dar a coñecer o papel das familias a través da súa propia, e o traballo tan importante que desenvolve o Centro de Recursos, plasmado coa proxección dun vídeo sobre o seu funcionamento. De seguido, patrocinadores/as e responsables das empresas colaboradoras recibiron xunto aos alcaldes dos diferentes concellos da Costa da Morte unha placa conmemorativa como agasallo polo seu apoio e implicación no desenvolvemento de programas inclusivos. Así, o resto de oradores/as tamén foron obsequiados ao remate das súas intervencións ao igual que a responsable da Área de Benestar da Deputación da Coruña, Ánxela Franco, que lembrou a figura de Domingos Dosil- ex-alcalde de Muros con tetraplexia- como defensor da igualdade e dos dereitos das persoas con diversidade.

O conselleiro Rey Varela foi agasallado cunha placa conmemorativa

Pola súa banda, o conselleiro de Política Social, José Manuel Rey Varela, foi o encargado de pechar a quenda de intervencións cun discurso no que falou de futuro e avogou por “seguir sumando esforzos para erradicar as barreiras e as dificultades que na actualidade aínda teñen estas persoas, máis aínda en contornos rurais onde o acceso a determinados servizos é máis dificultoso que nas cidades” e “darlle un impulso social a Galicia, con máis sensibilidade, novas políticas e máis recursos”, concluíu. Xunto a el tamén estaban Ovidio Rodeiro, delegado territorial da Xunta na Coruña, e o deputado popular Aurelio Núñez ademais dos rexedores de Malpica, Coristanco, Ponteceso e Laxe acompañados dos edís de A Laracha e Vimianzo, entre outros.

Os usuarios e usuarias protagonizaron divertidas actuacións

Usuarios e usuarias  

Todas as voces que se oíron onte no salón de actos do auditorio de Cabana brillaron con luz propia. Unhas emocionaron, outras comprometéronse e algunhas ata desvelaron as súas intencións de futuro. Pero foron as dos nosos usuarios e usuarias as que encheron de humor, maxia, enxeño e alegría un escenario que vibraba cada vez que saían a presentar a algún convidado/a, a conversar sobre as melloras do Centro de Día e do Centro Ocupacional ou a relatarnos as súas experiencias persoais, algunhas tan románticas como a do noivado de Toni e Jessi.  Ao final, a música invadiu o salón e todos/as despediron o evento cantando e bailando porque como reza un dos nosos lemas #omellorestáporvir.

O restaurante A Mundiña serviu o aperitivo que se degustou na Escola de Vela de Cabana

Ao rematar os actos de conmemoración, os asistentes desprazáronse no tren turístico, cedido polo Concello de Cabana, ata as instalacións da Escola de Vela para desgustar un exquisito aperitivo elaborado polo restaurante A Mundiña e gozar das incribles vistas do estuario do Anllóns. Un agasallo para os sentidos dos/as comensais e un broche de ouro para 25 anos de vida. A por outros 25 máis!

Grazas a todos e a todas por participar!

post

A campaña de lesións medulares de Íntegro aterriza no IES Monte Neme de Carballo

Os poñentes, Ramón Pombo e David Pombo, insistiron na importancia de evitar prácticas de risco

O vicepresidente de Íntegro, Ramón Pombo, e o vogal da entidade, David Pombo, estiveron esta semana de visita no IES Monte Neme de Carballo para dar a coñecer aos alumnos e alumnas de secundaria a campaña de prevención de lesións medulares coa que, dende hai algo máis dun ano, estamos a percorrer os diferentes centros educativos da Costa da Morte.

copia poñentes

Ramón, Teresa e David trasladaron as súas vivencias aos estudantes do IES Monte Neme

Pero nesta ocasión contaron, ademais, co testemuño dunha socia e voluntaria da agrupación que quixo sumarse á esta xornada de sensibilización escolar aportando a súa propia vivencia. Con esta iniciativa, co-financiada pola Xunta de Galicia e a Deputación de A Coruña ademais da colaboración das administracións locais e de varias entidades privadas, preténdese educar e concienciar aos máis novos/as sobre a necesidade de evitar prácticas de risco que poidan derivar en doenzas irreparables.

DSC_0685

Un circuíto de velocidade puxo a proba a destreza dos participantes

 

Pese a que esta sesión foi a primeira do ano no centro carballés, os/as estudantes fixeron gala dos seus coñecementos, grazas ás campañas de edicións anteriores, e de seguido pasaron á acción amosándose moi interesados/as e participativos/as durante as explicacións dos nosos representantes, que non dubidaron en expoñer os seus casos persoais para ilustrar o día a día sobre unha cadeira de rodas. Durante a charla informativa fíxose especial fincapé na importancia de previr situacións perigosas e imprudentes en praias, piscinas e estradas, como principais causantes do maior número de lesións medulares irreversibles entre a mocidade. Neste senso, incidiuse de maneira especial na importancia de non tirarse á auga de cabeza para evitar accidentes medulares mortais ou de consecuencias irreparables de cara á temporada de verán que está a piques de comezar.

DSC_0701Como en todo aprendizaxe, logo da teoría ven a práctica. E esta foi, sen dúbida, a parte máis entretida e didáctica da xornada. Ademais de experimentar en primeira persoa as dificultades de desprazarse coa mobilidade reducida, os estudantes puideron poñer a proba a súa destreza sobre unha cadeira de rodas e a súa capacidade de empatía coas persoas que a diario deben enfrontarse a todo tipo de barreiras, tanto físicas como mentais.  Unha boa maneira de comprobar que a vida é cuestión de capacidades e que a mellor educación é a prevención. Unha lección superada por todos e todas e con nota! Ata a próxima!