Category Archives: Concello de Cabana

post

Íntegro e Máis Porvir reunirán a profesionais da contorna para abordar os dereitos das persoas con discapacidade

Publicado en por

A xornada terá lugar en Nantón o 28 de abril coa finalidade de abrir un novo espazo de diálogo

A asemblea xeral de persoas socias e a 3ª andaina solidaria serán outras citas clave marcadas para o sábado 25

A asociación Íntegro e a empresa de xestión social Máis Porvir promoverán o vindeiro 28 de abril un espazo de diálogo arredor dos dereitos das persoas con discapacidade, nun encontro que reunirá a profesionais dos ámbitos educativo e social co obxectivo de analizar a súa aplicación na práctica diaria.

Baixo o título “Os dereitos das persoas con discapacidade”, a sesión nace coa vocación de xerar unha reflexión compartida e poñer o foco nos avances e retos existentes, tomando como marco a Convención das Nacións Unidas sobre os Dereitos das Persoas con Discapacidade.

O encontro contará coa participación de Ramón Sestayo, presidente do CERMI Galicia, e de Adolfo López, presidente da asociación Íntegro, que achegarán unha visión experta e pegada á realidade do sector.

A actividade desenvolverase nas instalacións da entidade, en A Pedra, 30 (Nantón, Cabana de Bergantiños), en horario de 11:30 a 12:30 horas.

Desde a organización anímase ás persoas interesadas a participar e confirmar a súa asistencia ao longo desta semana a través do correo electrónico info@integro.es ou nos teléfonos 981 734 985 e 650 961 649, co fin de garantir unha mellor organización do encontro.

Andaina solidaria e asemblea xeral

Antes desa xornada, Íntegro e Máis Porvir terán outra cita importante: a celebración da 3ª andaina solidaria “Por un millón de pasos”, que terá lugar o sábado 25, a partir das 16:00 horas. A actividade, que contará coa colaboración do Concello de Cabana, constará dun percorrido accesible de 4,5 quilómetros, con saída na Praza de Canduas e chegada na Praza do Pendón.

O prazo de inscrición xa está aberto, cun custo de 5 euros para persoas adultas e 3 euros para menores de 12 anos, incluíndo avituallamento. Ademais, ofrecerase a posibilidade de adquirir unha camiseta conmemorativa por 5 euros.

Desde a organización convídase á participación da veciñanza neste evento que combina deporte, inclusión e solidariedade, aberto a persoas de todas as idades. Para inscribirse, é necesario cubrir o formulario habilitado en https://shre.ink/AndainaSolidaria2026 ou contactar coa entidade a través do correo info@integro.es ou dos teléfonos 981 734 985 e 650 961 649.

Como antesala da xornada, ambas entidades celebrarán ese mesmo día, ás 11:30 horas, a súa Asemblea Xeral de persoas socias na sede da asociación. Durante a sesión, darase conta das actividades desenvolvidas e abordaranse as liñas de traballo futuro, fomentando a participación activa das persoas socias no desenvolvemento do proxecto.

Desde Íntegro anímase á asistencia a esta convocatoria, considerada clave para o fortalecemento da entidade e a mellora continua dos seus servizos e iniciativas. As persoas interesadas poden confirmar a súa presenza a través  dos teléfonos e o correo electrónico habilitados. Ao remate, ofrecerase un pequeno aperitivo para favorecer o encontro e a convivencia entre as persoas asistentes.

post

Deporte, inclusión e solidariedade na 3ª andaina solidaria

Publicado en por

O prazo de inscrición xa está aberto e terá un custo de 5€ para adultos e 3€ para menores de 12 anos

A asociación Íntegro e o centro especial de emprego Máis Porvir poñen en marcha, coa colaboración do Concello de Cabana, a terceira edición da andaina solidaria “Por un millón de pasos”, unha iniciativa que combina deporte, lecer e compromiso social, e que se celebrará o vindeiro 25 de abril, a partir das 16:00 horas.

Tras o éxito acadado nas anteriores edicións, o evento consolídase como unha cita destacada no calendario local, co obxectivo de fomentar hábitos saudables, promover a inclusión e apoiar o labor social da entidade a través dunha actividade aberta a toda a veciñanza.

A andaina contará cun percorrido accesible de 4,5 quilómetros e de baixa dificultade, que permitirá a participación de persoas de todas as idades e condicións físicas. A ruta partirá da Praza de Canduas, continuará pola Praia do Curro e rematará na Praza do Pendón, en Cabana de Bergantiños, ofrecendo a posibilidade de gozar dunha contorna natural privilexiada. Ademais, co obxectivo de fomentar a participación das familias e, especialmente, dos máis pequenos e pequenas, a organización ten previstas sorpresas e pequenos agasallos dirixidos ao público infantil, co propósito de facer da xornada unha experiencia aínda máis atractiva e divertida para todos os públicos. Deste xeito, Íntegro reforzará o carácter inclusivo e familiar da andaina, promovendo a implicación das novas xeracións en actividades saudables e solidarias.

Durante a xornada, as persoas participantes poderán desfrutar non só do paseo, senón tamén dun ambiente festivo e inclusivo, con propostas complementarias que contribuirán a facer da actividade unha experiencia completa para familias, amizades e grupos.

Inscricións abertas

O prazo de inscrición xa está aberto. O prezo será de 5 euros para persoas adultas e de 3 euros para nenos e nenas ata 12 anos, incluíndo avituallamento. Ademais, quen o desexe poderá adquirir a camiseta conmemorativa do evento por 5 euros.

Para formalizar a inscrición, as persoas interesadas deberán cubrir o seguinte formulario https://shre.ink/AndainaSolidaria2026 ou solicitar máis información a través dos teléfonos 981 734 985 ou 650 961 649, así como no correo electrónico info@integro.es.

Desde Íntegro anímase a toda a cidadanía a participar nesta terceira edición da andaina solidaria, unha oportunidade para practicar deporte ao aire libre, gozar da contorna natural da Costa da Morte e contribuír, ao mesmo tempo, a unha causa social que promove a inclusión e a igualdade de oportunidades.

 

post

Novos programas de participación social para reforzar o voluntariado na Costa da Morte

Publicado en por

A asociación Íntegro continúa apostando de maneira firme e continuada polo voluntariado como ferramenta de participación social, cohesión e promoción de valores solidarios. A entidade desenvolve diferentes programas que permiten á cidadanía implicarse activamente na mellora da calidade de vida das persoas con diversidade funcional e no coidado do entorno, consolidando un modelo de voluntariado comprometido co territorio e coa inclusión.

Entre as iniciativas máis destacadas atópase o novo programa de voluntariado xuvenil “Mocidade en Acción”, unha proposta dirixida a fomentar a participación activa das persoas menores de 30 anos na vida comunitaria. O proxecto pretende crear un grupo estable de voluntariado xuvenil que colabore de maneira regular nas distintas áreas de intervención da entidade, promovendo valores como a solidariedade, a responsabilidade social e o compromiso co medio ambiente.

O programa está dirixido a 8 mozas e mozos de entre 16 e 30 anos, residentes nalgún dos concellos da Costa da Morte, interesados en participar en accións de voluntariado social, inclusivo e ambiental. A través desta experiencia, as persoas participantes poderán desenvolver competencias persoais e sociais, adquirir novos coñecementos e contribuír activamente á mellora da comunidade.

Entre os principais obxectivos desta iniciativa destacan a promoción da implicación da mocidade en proxectos de carácter social e ambiental, o achegamento á realidade das persoas con diversidade funcional, a sensibilización en materia de inclusión e igualdade de oportunidades e o fomento da participación en iniciativas de sustentabilidade e economía circular.

O proxecto desenvolverase entre o 1 de xaneiro e o 30 de setembro combinando accións de voluntariado en dúas áreas principais. Por unha banda, a inclusión social, mediante a participación nas actividades que se desenvolven no Centro de Día e no Centro Ocupacional de Íntegro, apoiando aos equipos profesionais en programas de promoción da autonomía persoal, habilidades sociais, ocio inclusivo e participación comunitaria.

Por outra banda, o programa incorpora tamén unha dimensión ambiental, a través da colaboración no proxecto Diversiplás, iniciativa de economía circular centrada na recuperación, clasificación e valorización de residuos plásticos procedentes da actividade mariñeira e pesqueira da Costa da Morte, así como en accións de sensibilización ambiental dirixidas á cidadanía.

Para impulsar esta iniciativa, Íntegro desenvolverá ademais unha campaña de captación de voluntariado dirixida á mocidade da zona, co obxectivo de dar a coñecer esta oportunidade de participación social e implicación comunitaria. As persoas voluntarias recibirán tamén formación específica en ámbitos como diversidade funcional, medio ambiente, igualdade de oportunidades, primeiros auxilios ou economía circular, garantindo así unha participación responsable, informada e de calidade.

Voluntariado Interxeracional: Saberes e sabores

Xunto a este programa, a entidade tamén vén de poñer en marcha a segunda edición do proxecto de voluntariado interxeracional “Saberes e Sabores”, unha iniciativa que promove a convivencia, a aprendizaxe mutua e a colaboración entre persoas mozas, maiores e con discapacidade arredor da cociña tradicional, o cultivo da terra e o coidado compartido.

O programa desenvolverase ata o 15 de maio e conta co financiamento da Consellería de Cultura, Lingua e Xuventude da Xunta de Galicia, cunha achega de 18.000 euros procedente de fondos europeos, no marco do proxecto Talento Interxeracional e do Plan de Recuperación, Transformación e Resiliencia, cofinanciado pola Unión Europea a través dos fondos NextGenerationEU.

Nesta segunda edición, “Saberes e Sabores” estrutúrase en tres liñas de acción principais: o cultivo ecolóxico interxeracional con apoio tecnolóxico, a elaboración e dixitalización de receitas tradicionais saudables e o reparto solidario dos produtos cultivados e cociñados a persoas maiores en situación de vulnerabilidade.

A través destas iniciativas, Íntegro continúa fortalecendo o seu compromiso coa innovación social, a inclusión, o envellecemento activo e o fortalecemento das redes comunitarias, situando o voluntariado como un eixo fundamental para avanzar cara a unha sociedade máis xusta, participativa e solidaria na Costa da Morte.

post

Deporte, convivencia e inclusión protagonizan os Xogos Inclusivos de Íntegro

Publicado en por

Na xornada participaron cinco entidades sociais e o alumnado do CPI As Revoltas de Cabana

A asociación Íntegro vén de celebrar unha nova edición dos Xogos Inclusivos Íntegro, unha actividade que se converteu nunha auténtica festa do deporte, a convivencia e a amizade.

Na xornada celebrada o pasado venres participaron cinco entidades sociais —Íntegro, Avante, Amarai, Misela e Adibismur— xunto co CPI As Revoltas de Cabana de Bergantiños, cuxo alumnado formou parte dos equipos para favorecer a inclusión e o traballo en equipo. Cada equipo estivo composto por cinco persoas usuarias e un neno ou nena, competindo en distintos xogos que combinaron diversión, creatividade e cooperación.

Ao longo da mañá desenvolvéronse varias probas: o Xogo do Paquete, o Xogo da Rá, o Xogo das Bolas, o Xogo do Tangram e, como broche final, unha gran Oca xigante na que reinou o entusiasmo e o espírito deportivo.

O pavillón estivo dividido en dúas zonas, permitindo celebrar dous xogos simultáneos, e contou cun ambiente festivo amenizado con música, aplausos e moitas risas. A xornada concluíu coa entrega de trofeos aos tres mellores equipos de cada xogo, recoñecendo o esforzo, a cooperación e a ilusión de todas as persoas participantes.

Desde a asociación Íntegro, queremos agradecer a todas as entidades participantes polo seu entusiasmo e implicación, e por facer deste día unha auténtica xornada de convivencia, valores e diversión, demostrando que o deporte é unha poderosa ferramenta para fomentar a igualdade, a inclusión e a amizade. Vémonos o ano que vén!

 

post

Íntegro presenta á Xunta o seu proxecto de educación ambiental Sementes de futuro

Publicado en por

A Consellería de Medio Ambiente e Cambio Climático anunciou que estudará as vías de colaboración para impulsar esta iniciativa de reforestación e sensibilización escolar

A asociación Íntegro mantivo recentemente unha reunión coa conselleira de Medio Ambiente e Cambio Climático, Ángeles Vázquez, para presentar o seu novo proxecto de educación ambiental “Sementes de futuro”. O encontro contou tamén coa presenza do alcalde de Cabana de Bergantiños, José Muíño, e outros representantes da entidade.

Durante a reunión, o presidente de Íntegro, Adolfo López Baña, explicou os obxectivos principais desta proposta, que nace cunha dobre vocación formativa e medioambiental. O proxecto pretende recuperar zonas degradadas mediante a reforestación con especies autóctonas galegas, ao tempo que busca concienciar á comunidade escolar e á poboación en xeral sobre a importancia da biodiversidade e dos bosques autóctonos.

Entrega dun obsequio elaborado no taller Diversiplás con plástico reciclado

A través de Sementes de futuro, Íntegro aposta por implicar a diferentes xeracións e colectivos sociais nun proceso participativo que combine educación ambiental, inclusión e acción comunitaria, favorecendo así a aprendizaxe compartida e o respecto polo medio natural.

Desde a entidade, valórase moi positivamente a boa acollida da proposta por parte da Consellería, que se comprometeu a analizar posibles vías de colaboración para facer realidade este proxecto, co obxectivo de que poida contar con apoio institucional e financiamento público. “Para Íntegro, é unha gran satisfacción comprobar que a Xunta comparte a nosa preocupación pola protección do medio ambiente e a educación en valores sostibles. Agardamos que esta colaboración poida materializarse nun proxecto conxunto que beneficie á mocidade, ás persoas con diversidade funcional e ao noso territorio”, sinalou Adolfo López Baña, presidente da entidade.

Con iniciativas como Sementes de futuro, Íntegro continúa ampliando o seu compromiso coa sustentabilidade, a inclusión e a mellora da calidade de vida na Costa da Morte, unindo esforzos entre administracións, comunidade educativa e sociedade civil para crear un futuro máis verde e solidario.

post

Íntegro recibe a visita da delegada da Xunta na Coruña, Belén do Campo

Publicado en por

A asociación Íntegro recibiu esta semana nas súas instalacións de Nantón (Cabana de Bergantiños) a visita da delegada territorial da Xunta na Coruña, Belén do Campo, acompañada polo alcalde do municipio, José Muíño, e polo director territorial da Consellería de Emprego, Comercio e Emigración, Juan José Couce. A visita enmárcase dentro das accións de seguimento e apoio aos proxectos sociais que desenvolven entidades da comarca da Costa da Morte.

Durante o encontro, os representantes institucionais puideron coñecer de primeira man o labor que desde 1992 desenvolve Íntegro a prol da inclusión social e laboral das persoas con diversidade funcional. A entidade conta cun centro de día ocupacional e cun centro especial de emprego, desde os que promove programas de capacitación, formación, inserción laboral e mellora da calidade de vida para as persoas usuarias.

A delegada da Xunta puxo en valor o traballo desenvolvido pola entidade, destacando a súa “traxectoria exemplar e pioneira en programas que promoven a inclusión, a autonomía persoal e a igualdade de oportunidades”. Así mesmo, anunciou que a Xunta manterá o seu compromiso de apoio a través de diferentes vías de financiamento, cun investimento global próximo aos 500.000 euros no ano 2025.

Entre as liñas de colaboración previstas figuran axudas da Consellería de Emprego, Comercio e Emigración para a contratación de persoas mozas e o mantemento de postos de traballo nos centros especiais de emprego. Ademais, Íntegro é beneficiaria do programa Iniciativa Xove da Consellería de Cultura, Lingua e Xuventude, así como de varias subvencións para actividades de voluntariado e programas interxeracionais en contornas rurais, como o proxecto Talento Interxeracional, financiado pola Unión Europea.

No ámbito dos servizos sociais, a Consellería de Política Social e Igualdade colabora mediante o financiamento de 30 prazas concertadas no centro de día e centro ocupacional a través do IRPF autonómico, cunha achega superior aos 400.000 euros. A isto súmase a labor do Punto de Intervención para Mulleres con Diversidade Funcional, un servizo especializado de atención no rural a mulleres en situación de especial vulnerabilidade. Neste sentido, o presidente da entidade, Adolfo López Baña, agradeceu a colaboración e o compromiso mantido e continuado da administración pública a través da posta en marcha de proxectos innovadores, que permiten ampliar servizos e, sobre todo, ofrecer oportunidades reais ás persoas que máis o necesitan.

A visita institucional rematou cun percorrido polas instalacións e un encontro co equipo técnico da entidade, no que se compartiron experiencias e proxectos de futuro. Desde Íntegro valoramos moi positivamente este encontro, que reafirma o apoio das administracións ao noso traballo e dá visibilidade ao esforzo colectivo para a construción dunha sociedade máis xusta e inclusiva.

 

post

Íntegro celebrou o Día das Familias poñendo en valor o papel esencial do fogar no camiño cara a inclusión

Publicado en por

O pasado sábado 19, a asociación Íntegro celebrou unha nova edición do tradicional Día das Familias, unha xornada marcada pola emoción, o recoñecemento e o sentimento de pertenza. O encontro reuniu a persoas usuarias, familiares, persoal da entidade e representantes da comunidade, consolidándose como un espazo de encontro, reflexión e celebración.

Desde primeira hora da mañá, o ambiente foi festivo e acolledor. Música, animación, propostas gastronómicas, baile, risas e moitos premios protagonizaron unha xornada que quedará na memoria de todos os e as presentes. Pero o máis importante foi a compañía: familiares, amigos/as, veciños/as, socios/as, directivos/as e usuarios/as acudiron á cita para compartir, un ano máis, este momento especial de encontro, que nesta ocasión xirou arredor dunha temática moi singular: o oeste!

Durante o acto de inauguración, o presidente da entidade Adolfo López Baña quixo render, en nome de toda a Xunta Directiva, unha sentida homenaxe ás familias, destacando o seu papel insubstituíble no acompañamento das persoas con diversidade funcional: “A familia é o primeiro abrazo, o primeiro apoio, a primeira mirada que di: ‘Ti podes’”, afirmou, nun discurso cheo de humanidade e compromiso. Ao longo da intervención tamén puxo en valor o esforzo diario de nais, pais, irmáns e avós, que, como dixo, “convértense en terapeutas, en mestres, en defensores… sen deixar de ser simplemente familia”. Tamén destacou a importancia de que estas non camiñen soas: “Necesitan apoio, redes, descanso e sentirse escoitadas pola sociedade”.

As charlas informativas da mañá, nas que se deu conta das actividades e os diferentes programas que se están a desenvolver en Nantón, deron paso a un xantar popular co que chegou o entretemento e a diversión. A sesión de tarde foi do máis distendida e divertida: baile, música, conversas e moitos premios, entregados durante o sorteo levado a cabo grazas   doazóns realizadas por empresas e comercios da contorna. Ademais, os membros da directiva quixeron homenaxear a dúas persoas moi especiais para a entidade: Ricardo Martínez, de 92 anos, socio sénior da asociación e Mª Luisa Fernández, autora de “La mirada de Ángel” e antiga colaboradora e amiga de Íntegro. A ambos, fíxoselles entrega duns agasallos como mostra de agradecemento polo seu compromiso e dedicación.

A xornada serviu tamén para reforzar o sentimento de comunidade que define á asociación. “Ser parte de Íntegro é sentir que pertencemos a un proxecto colectivo e comprometido coa igualdade”, asegurou o presidente, quen fixo un chamamento a seguir construíndo unha sociedade máis inclusiva, especialmente no ámbito rural.

Nun ambiente distendido e cheo de emocións compartidas, as familias foron as auténticas protagonistas dun día que rematou cun agradecemento colectivo e unha mensaxe de esperanza: “O que sementemos hoxe, florecerá mañá”.

post

Nantón prepárase para o FestIgual: música, gastronomía e inclusión na 3ª edición do festival máis diverso da comarca

Publicado en por

Todo listo en Nantón para a celebración da 3ª edición do FestIgual, diversamente iguais, un evento que xa se consolida como unha das citas imprescindibles do calendario festivo da Costa da Morte. A xornada, organizada pola asociación Íntegro en colaboración coa empresa Máis Porvir Xestión Social e o Concello de Cabana, terá lugar o sábado 31 de maio a partir das 12.00 horas.

O FestIgual busca, un ano máis, crear un espazo de encontro e celebración en torno á diversidade, reivindicando a inclusión e a igualdade de oportunidades a través dunha xornada pensada para todas as idades. Música tradicional, gastronomía, artesanía e propostas para a cativada conforman un programa pensado para gozar en familia e con amigos.

A festa arrincará ao mediodía co pasarrúas dos Gaiteiros de Anos e continuará coa sesión vermú a cargo de O Tren da Unha. Pola tarde, ás 16.30 horas, o grupo Versión Imposible tomará o escenario para poñer a nota máis festiva e versionar grandes éxitos.

Por outra banda,  ao longo da tarde, realizaranse varias rondas de sorteos. Preto de medio centenar de premios directos, entre os que haberá produtos, experiencias e cheques compra.

Os amantes da boa mesa tamén terán a súa cita obrigada cunha variada oferta gastronómica a base de petiscos e racións variadas. As entradas poderán adquirirse en venda anticipada dende a próxima semana chamando ao 981 734 985 ou 650 961 649, enviando un correo a info@integro.es ou directamente nas instalacións da entidade.

Artesanía e animación para os máis pequenos

Durante toda a tarde, de 16.00 a 20.00 horas, os máis cativos poderán desfrutar de inchables, xogos e pintacaras, mentres que os amantes da artesanía terán á súa disposición postos con produtos locais e ecolóxicos de 13.00 a 20.30 horas.

Ademais, como mostra de compromiso co medio ambiente, os asistentes poderán mercar por un prezo simbólico envases reutilizables, que serán de uso obrigatorio durante toda a festa, reafirmando así a aposta do FestIgual pola sostibilidade.

Durante a presentación oficial do cartel, o presidente de Íntegro, Adolfo López Baña, destacou que o FestIgual “é xa unha cita ineludible tanto para o público asistente como para os expositores, que atopan aquí unha gran oportunidade de participación”. Pola súa parte, o alcalde de Cabana, José Muíño, subliñou o éxito das edicións anteriores e animou a toda a veciñanza a sumarse a esta xornada de convivencia: “Queremos repetir e mesmo superar a participación do ano pasado”.

O FestIgual é unha festa de acceso libre e totalmente gratuíta, na que o único requisito é ter gañas de compartir, bailar, desfrutar e reivindicar o valor dunha sociedade plural e inclusiva.

post

O conselleiro de Emprego, Comercio e Emigración José González, de visita en Máis Porvir

Publicado en por
O conselleiro de Emprego, Comercio e Emigración, José González, destacou hoxe, durante a súa visita a Máis Porvir, o papel clave que desempeñan os Centros Especiais de Emprego (CEE) na inclusión laboral das persoas con diversidade funcional. Durante o seu percorrido polas instalacións tivo a oportunidade de comprobar o día a día do taller de carpintaría de madeira e plástico, poñendo en valor o traballo realizado no eido da orientación, formación e apoio personalizado aos traballadores/as para facilitar así a superación de barreiras no mercado laboral.
 
Acompañando ao responsable autonómico estiveron o presidente de Íntegro Adolfo López Baña; a delegada territorial da Xunta na Coruña, Belén do Campo; a directora xeral de Traballo Autónomo e Economía Social, Marta Mariño; o presidente de Cegasal, Mino Martínez; representantes de Íntegro e do centro Máis Porvir, así como o alcalde do Concello de Cabana de Bergantiños José Muíño e o edil Carlos Allo.
Aproveitando a súa estancia en Nantón, o titular de Emprego anunciou que nas vindeiras semanas lanzarase a convocatoria de axudas para os CEE correspondente a 2025. Estas achegas forman parte dos case 45 millóns de euros que o goberno galego ten orzamentados este ano para fomentar a economía social, cun enfoque centrado na simplificación administrativa e na mellora da eficacia na atención ás entidades e aos seus beneficiarios.
O noso centro especial de emprego Máis Porvir forma parte de Cegasal é é un dos 135 CEE que existen actualmente en Galicia. Agradecemos á Xunta de Galicia o seu esforzo e apoio económico a través de diversas achegas que permiten impulsar proxectos tan valiosos como a carpintaría de madeira e plástico que desenvolvemos no noso centro.
post

Volve a Andaina Solidaria de Íntegro: deporte, solidariedade e moita diversión

Publicado en por

Xa está aberto o prazo de inscrición para participar na segunda edición, que se celebrará o 26 de abril, a partir das 16.30 horas

A asociación Íntegro pon en marcha a segunda edición da andaina solidaria Por un millón de pasos, unha iniciativa que busca fomentar hábitos saudables, inclusión e solidariedade a través do deporte e o lecer. O evento, que terá lugar o vindeiro 26 de abril, foi presentado esta mañá nun acto ao que asistiu o presidente da entidade Adolfo López Baña, acompañado de varios directivos e persoas usuarias; o alcalde de Cabana José Muíño e o edil Carlos Allo, así como o responsable do Concello de Ponteceso José Manuel Mato, que tamén colaboran no desenvolvemento da actividade.

Durante a xornada, ademais de gozar das incribles visitas que ofrece esta ruta a pé, cun percorrido totalmente accesible que partirá da Praza do Recheo de Ponteceso ás 16:30 horas e rematará na Praza do Pendón, en Cabana de Bergantiños, os e as participantes poderán desfrutar dun paseo en tren turístico, animación e moitas outras sorpresas nas que xa se están a traballar desde a organización.

Inscricións

As inscricións xa están abertas e poden realizarse a través da seguinte ligazón: https://forms.gle/fdCiFSD1H4FF1Php9. O prezo da inscrición é de 3€ para nenos e nenas de 0 a 12 anos, mentres que para adultos (+13 anos) será de 5€. Ademais, aquelas persoas que non participaron na primeira edición e aínda non teñan a camiseta conmemorativa do evento, poderán adquirila por tan só 5€.

Para máis información, as persoas interesadas poden contactar a través do teléfono 981 734 985, o móbil 650 961 649 ou o correo electrónico info@integro.es.

Desde Íntegro animamos a toda a veciñanza a participar nesta andaina solidaria, unha oportunidade perfecta para practicar deporte, gozar da natureza, compartir tempo en familia e con amigos/as e contribuír a unha gran causa social.