Trátase dun programa dirixido a mulleres en situación de especial vulnerabilidade e para o desenvolvemento das actuacións do Plan Corresponsables, co-financiado pola Consellería de Política Social e Igualdade e pola Unión Europea no marco do programa FSE+ Galicia 2021- 2027
O Punto de Intervención para Mulleres con Diversidade Funcional do Rural (PIMD Rural), impulsado pola asociación Íntegro segue consolidándose como un apoio esencial para as mulleres das zonas rurais pola súa capacidade de resposta e reforzo na atención integral ás persoas usuarias co obxectivo de fomentar a igualdade de oportunidades e contribuír a reducir a tripla discriminación que sofren moitas mulleres por razón de xénero, discapacidade e contorno rural.
A maioría das máis de 70 mulleres atendidas neste servizo (48 presentan algún tipo de discapacidade) son residentes en concellos rurais da Costa da Morte con baixa densidade de poboación, o que consolida a aposta do programa por achegar recursos e servizos ás zonas con maiores dificultades de acceso.
Este exercicio estivo marcado por un incremento considerable nas intervencións de carácter psicolóxico, grazas á incorporación a xornada completa dunha profesional especializada que permitiu reforzar a atención individualizada, así como os servizos de mediación familiar e intercultural para a resolución de conflitos no ámbito doméstico. O equipo profesional, ampliado neste ano a catro integrantes —psicóloga, educadora social, traballadora social e integradora social—, garantiu un servizo de atención continuada, próximo e integral.
Ao longo do curso, realizáronse numerosas actuacións centradas na orientación, información e asesoramento en recursos específicos, así como actividades dirixidas á adquisición de habilidades persoais e sociais. Estas accións desenvolvéronse tanto de xeito individual como en grupos reducidos, co obxectivo de ofrecer unha atención personalizada e de calidade.
Tamén se levou a cabo un amplo labor de acompañamento na xestión de trámites administrativos, sanitarios, laborais e sociais, así como no apoio directo nas relacións coas distintas entidades, organismos e servizos, facilitando así a integración social das mulleres participantes.
Inserción laboral e formación: dous piares fundamentais
A orientación laboral e o seguimento personalizado na busca de emprego continúan a ser dous dos servizos máis demandados polas usuarias. Como resultado, nesta edición conseguiuse novamente a inserción laboral de varias mulleres, o que reafirma a eficacia das accións desenvolvidas neste eido.
Ademais, a formación ocupou un lugar destacado dentro do programa, coa organización de talleres formativos adaptados ás necesidades detectadas. Entre as temáticas abordadas destacan: manexo de smartphones, autonomía persoal, autocoidados, autodefensa emocional, soidade en positivo, orientación laboral, busca de emprego en internet e sexualidade e afectividade baixo o lema “Se o amor aperta, non é da túa talla”.
Actualmente, durante o mes de xuño, estase a impartir un taller sobre sexting seguro, mentres que o de busca de emprego en internet —de gran acollida—terá unha nova edición en xullo para dar resposta á alta demanda.
O PIMD Rural está promovido pola asociación Íntegro e co-financiado pola Consellería de Política Social e Igualdade, a través dun programa dirixido a mulleres en situación de especial vulnerabilidade e para o desenvolvemento das actuacións do Plan Corresponsables, cofinanciadas parcialmente pola Unión Europea no marco do programa FSE+ Galicia 2021- 2027.
Se es muller con ou sen discapacidade, resides no rural e queres acceder a formación ou precisas apoio e/ou asesoramento, podes contactar con Íntegro no teléfono 981 734 985 ou a través do correo electrónico info@integro.es.
