Arquivos da etiqueta: reciclaxe

post

Íntegro recompilará material plástico da campaña de Nadal do CCA Carballo para o novo taller de reciclaxe de Diversiplás

Publicado a
  • Máis de 20.000 bolas de plástico serán utilizadas como materia prima para a fabricación de novos produtos no taller de aproveitamento e tratamento de residuos que se porá en marcha en Íntegro en 2022
  • Este Nadal, o Centro Comercial Aberto tamén contribuirá á inclusión laboral de persoas con discapacidade mediante a contratación de dous traballadores da nosa empresa de xestión social MáisPorvir   

O proxecto medioambiental da asociación Íntegro para a reciclaxe e transformación de residuos plásticos Diversiplás, + diverso – plástico segue avanzando no seu camiño cara unha Costa da Morte máis sostible, máis diversa e con menos plástico. E, desta volta, faino captando novos colaboradores e participando nun fermoso proxecto no que a ilusión, a maxia e, por suposto, a reciclaxe serán co-protagonistas xunto cos máis pequenos da casa.

Grazas ao Centro Comercial Aberto de Carballo e á súa campaña de Nadal, nas vindeiras semanas teremos a oportunidade de recompilar un gran volume de residuo plástico. Nada menos que máis 20.000 bolas, as mesmas que agocha no seu interior a casiña de Nadal,  que o CCA ten instalado na Praza do Concello para repartir ilusión, sorrisos e premios entre a cativada. Para conseguilas, bastará con mercar este Nadal nos 76 establecementos comerciais e de hostalaría adheridos á campaña. A cambio, cada cliente recibirá un vale que os e as máis peques da casa poderán cambiar por unha tirada na casiña e obter así unha bola con premio seguro e directo.

 

Unha vez obtido o agasallo, os envases poderán ser depositados nun tragabolas para o seu almacenamento e posterior utilización como materia prima no taller de aproveitamento e reciclado, que imos poñer en marcha en 2022 co apoio e asesoramento de Adrián Coira, de Just Fair Enough, para a creación de novos produtos con diferentes utilidades (chaveiros, macetas, mobiliario urbano….). Neste senso, desde a asociación Íntegro queremos solicitar a colaboración de toda a cidadanía para lograr recompilar o maior número posible de bolas, e darlles así unha segunda vida a través da reciclaxe.

Diversiplás é un proxecto de economía circular, xurdido ao abeiro do proxecto Tanza, dirixido á recuperación e valorización de residuos plásticos. Coordinado pola asociación Integro, conta co apoio do Galp Costa da Morte e o financiamento do Fondo Europeo Marítimo e de Pesca, a través da Consellería do Mar da Xunta de Galicia.

 

 

 

 

 

 

 

Máis Porvir Xestión Social

Ademais da súa aportación ao proxecto medioambiental Diversiplás, este Nadal o CCA de Carballo contribuirá tamén á inclusión social e laboral de persoas con diversidade funcional. Dous traballadores de Máis Porvir Xestión Social, a empresa de economía social da asociación Íntegro, serán os encargados de repartir ilusión, sorrisos e premios entre a cativada que se achegue ata a casiña de Nadal do CCA.  Unha colaboración que pon de manifesto  o compromiso e a implicación do Centro Comercial Aberto de Carballo cos colectivos sociais máis desfavorecidos. Grazas e parabéns pola iniciativa!

 

 

 

post

Usuarios e usuarias de Íntegro participaron na campaña “Separemos ben, reciclaremos mellor”

Publicado a

Trátase dunha iniciativa de sensibilización medioambiental dirixida a colectivos sociais

Na asociación Íntegro apostamos pola conservación da nosa contorna e a protección do medio natural coa posta en marcha de actividades encamiñadas á educación e á sensibilización ambiental. Neste senso, esta semana, os nosos usuarios e usuarias tiveron a oportunidade de aprender novos conceptos relacionados coa reciclaxe e a correcta xestión dos residuos urbanos a través do programa “Separemos ben, reciclaremos mellor”, promovido conxuntamente pola Consellería de Medio Ambiente, Territorio e Infraestruturas e Sogama.

_mg_1029

_mg_0981

 

 

 

 

 

A actividade, realizada o pasado luns nas instalacións de Nantón, consistiu na realización de dous obradoiros temáticos, impartidos por educadoras ambientais especializadas da Xunta de Galicia, para informar e asesorar sobre a importancia de reducir o impacto ambiental, económico e social que supón, a día de hoxe, a elevada xeración de lixo, colaborando na súa axeitada xestión e tratamento. Neste senso, as monitoras puideron comprobar a correcta separación selectiva de refugallos que se realiza a diario na nosa entidade, clasificándoos e depositándoos nos contedores correspondentes para a súa posterior reciclaxe. Tamén coñeceron de primeira man o aproveitamento dos residuos orgánicos do centro, empregados como compost para os nosos invernadoiros.

_mg_1003

_mg_1032

 

 

 

 

 

A parte máis divertida e creativa chegou cando tocou poñer en práctica o principio europeo dos tres erres (redución, reutilización e reciclaxe) co fin de aprender tamén a dar novos usos a aqueles produtos que xa non serven e que sempre desbotamos. Con un pouco de imaxinación, algúns tapóns e uns tubos de papel baleiros lograron crear pequenas obras de arte, que resultaron moi orixinais e sorprendentes grazas a súa máis que probada experiencia na realización de traballos manuais. Cofres, estoxos, calcapapeis ou lapiseiros foron algunhas das creacións elaboradas polos propios usuarios/as. Foi unha xornada educativa e moi produtiva na que, ademais de pasalo xenial, aprendemos a separar ben para reciclar mellor. Sen dúbida, un paso moi importante cara a consecución dun desenvolvemento sostible.

_mg_0999