post

O PIMDRural ofrecerá en xuño un taller sobre “sexting seguro” para mulleres con discapacidade

O prazo de inscrición xa está aberto. As prazas son limitadas!

Desde o Punto de Intervención para Mulleres con Discapacidade do Rural, promovido pola asociación Íntegro e co-financiado polo polo Fondo Social Europeo (FSE) ao abeiro do programa operativo FSE+ Galicia 2021-2027, chega unha nova edición do ciclo formativo que a entidade ten en marcha coa finalidade de dotar de recursos a un dos colectivos máis vulnerables da sociedade. Desta volta, a nova acción xirará arredor do “Sexting seguro”, unha practica moi estendida e normalizada desde a pandemia baseada no intercambio de fotografías e outros contidos audiovisuais con fins eróticos, sobre a que convén poñer o foco de atención.

Para elo, no mes de xuño a psicóloga do centro María Redonda impartirá un taller especializado nesta temática para que as mulleres participantes saiban como protexerse e cales son as canles máis seguras para facelo. Será durante o mes de xuño.

As persoas interesadas en participar deberán inscribirse canto antes  chamando ao 981 734 985 – 650 961 649 ou enviando un mail a info@integro.es. Dado que está orientado a grupos reducidos, as prazas son limitadas. Bule e non quedes sen a túa!

post

Un grupo de mulleres do PIMDRural visita unha empresa de reciclaxe téxtil

  • Esta iniciativa, na que tamén participaron persoas usuarias do centro ocupacional, desenvolveuse dentro do programa de acompañamento na busca de emprego 
  • O Punto de Intervención para Mulleres con Diversidade do Rural está promovido por Íntegro e co-financiado polo Fondo Social Europeo (FSE) ao abeiro do programa operativo FSE+ Galicia 2021-2027 

No que vai de ano, o Punto de Intervención para Mulleres con Diversidade Funcional do Rural (PIMD Rural), que promove a asociación Íntegro, continúa a desenvolver a súa labor no ámbito da Costa da Morte a favor das mulleres prioritariamente con discapacidade das zonas rurais.

Durante o período 2022-2023, prestouse atención a 68 mulleres da nosa contorna, a maioría delas con algún tipo de discapacidade. Unha psicóloga, unha educadora social e unha traballadora social son as encargadas de prestar unha ampla variedade de servizos para atender as demandas de todas as usuarias. Ademais de ofrecer información, orientación e asesoramento en cuestións relativas á discapacidade e á dependencia, o  apoio na busca activa de emprego e orientación laboral, encamiñada á adquisición de habilidades persoais e sociais, e os acompañamentos na prospección laboral das participantes a través de visitas a diferentes empresas, figura entre as prestacións máis solicitadas. Neste senso, un grupo de mulleres do Punto de Intervención veñen de realizar, xunto a algunhas persoas usuarias do noso centro ocupacional, unha visita ás instalación da empresa Coleo Recycling, pioneira na reciclaxe de téxtil a través dun  proceso completamente circular no que as prendas recicladas convértense en teas ou fíos coas que se confeccionan outras pezas e se reduce o gran volume deste tipo de residuo. Así mesmo, esta compañía tamén está comprometida coa diversidade, xa que o 90% dos seus traballadores son persoas cun grao de discapacidade recoñecida igual ou superior ao 33%.

Outros servizos

A atención psicolóxica ou o de mediación tamén figura entre as prestacións máis demandadas xunto co acompañamento na xestión de calquera tipo de trámite ou o apoio directo nas relacións con outras entidades, organismos e servizos para facilitar ás persoas usuarias a súa integración social. No caso de mulleres con mobilidade reducida, dispoñemos de transporte adaptado para facilitar os seus desprazamentos. De feito, un dos máis demandados foi a visita a centros sanitarios e outras administracións públicas ou en entidades bancarias para a realización de trámites básicos.

Este programa está co-financiado pola Secretaría Xeral da Igualdade a través de subvencións a entidades de iniciativa social sen ánimo de lucro para programas dirixidos a mulleres en situación de especial vulnerabilidade e para o desenvolvemento das actuacións do Plan Corresponsables, subvencionado parcialmente pola Unión Europea no marco do Programa Operativo FSE+ Galicia 2021-2027.

Se es muller con ou sen discapacidade, resides no rural e queres recibir formación ou precisas apoio e/ou asesoramento, non dubides en poñerte en contacto con Íntegro chamando ao 981 734 985 ou enviando un mail a info@integro.es. As persoas interesadas tamén poden acudir ao noso centro de Nantón (Cabana de Bergantiños) sen necesidade de cita previa. Desde o Punto de Intervención achegarémonos ata calquera punto da Costa da Morte para facilitar o acceso de todas as mulleres que o precisen aos nosos recursos e servizos.

post

Íntegro amplía o parque móbil coa adquisición dun furgón

Dita adquisición está financiada con cargo ao Plan de recuperación, transformación e resiliencia da Unión Europea-NextGenerationEU e o apoio da Xunta de Galicia a través da Consellería de Política Social e Xuventude

A asociación Íntegro das persoas con Diversidade Funcional da Costa da Morte vén de adquirir un novo vehículo adaptado, con capacidade para nove persoas, que permitirá mellorar o servizo de transporte dos seus usuarios e usuarias e incrementar o actual parque móbil, posibilitando así o desdobramento dalgunhas rutas e a incorporación de novas prazas. Así mesmo, con este novo vehículo a entidade vén a modernizar a actual flota coa finalidade de mellorar a eficiencia da mesma e diminuír as emisións contaminantes contribuíndo así a unha economía sostible.

Dita adquisición foi posible grazas ao financiamento da Unión Europea, a través dos fondos NextGenerationEU, no marco do Plan de Recuperación, Transformación e Resilencia, e o apoio da Consellería de Política Social e Xuventude da Xunta de Galicia.

O presidente de Íntegro, Adolfo López Baña, amosou a súa satisfacción por dispoñer dunha flota ampla e renovada, adaptada ás necesidades das persoas con diversidade funcional e lembrou a importancia de dotar ás entidades sociais dos medios e recursos necesarios para eliminar os problemas de accesibilidade e transporte á hora de facilitar ás persoas usuarias a súa chegada aos centros”.

post

O PIMDRural organiza novas accións formativas para mulleres en situación de especial vulnerabilidade

  • O Punto de Intervención para Mulleres con Diversidade do Rural, promovido por Íntegro e co-financiado polo Fondo Social Europeo Plus(FSE) ao abeiro do programa operativo FSE+Galicia 2021-2027, conta xa coa participación activa de 45 mulleres desde o pasado mes de setembro 
  • Ademais dun plan de formación continuada, desde este servizo de apoio ofrécese asesoramento, orientación laboral, acompañamento e atención psicolóxica a mulleres en situación de especial vulnerabilidade

O Punto de Intervención para Mulleres con Diversidade do Rural (PIMDRural), promovido por Íntegro e co-financiado polo Fondo Social Europeo Plus (FSE) ao abeiro do programa operativo FSE + Galicia 2021-2027, vén de superar o ecuador da edición correspondente ao período 2022-2023 cun balance moi esperanzador e positivo, contando xa coa participación activa de máis de 45 mulleres en situación de especial vulnerabilidade.

A principal finalidade deste servizo de apoio á muller, que está operativo desde 2016, é a de promover a igualdade de oportunidades para contribuír á redución da tripla discriminación que sofren diariamente as usuarias, dotándoas así dunha maior autonomía e independencia para mellorar a súa situación persoal e lograr a plena inclusión social e laboral. Neste senso, o equipo de profesionais do PIMD Rural, formado por unha psicóloga, unha traballadora social e unha educadora social, desenvolven de xeito continuado unha atención personalizada e especializada nas seguintes áreas e programas:

  • Recursos integrais de atención personalizada e especializada para mulleres en situación de especial vulnerabilidade, pertencentes a diferentes colectivos.
  • Servizo de orientación e información sobre recursos singularizados, de atención, orientación e asesoramento persoal e social, así como de apoio directo nas relacións con outras entidades, organismos e servizos que lles faciliten ás persoas usuarias o seu proceso de integración social.
  • Atención psicolóxica.
  • Mediación intercultural e/ou familiar.
  • Actividades para a adquisición de habilidades persoais e sociais básicas e/ou de competencias para a mellora da empregabilidade.
  • Medidas de orientación laboral e acompañamento na busca de emprego, incluído o emprego por conta propia e o emprendemento, así como a prospección do mercado de traballo, a intermediación e a titorización laboral e profesional.

Programa formativo

A posta en marcha de accións formativas tamén contribúe notablemente a unha maior capacitación das participantes e, polo tanto, mellora a súa autoestima e diminúe a discriminación social e laboral á que habitualmente están sometidas as mulleres con disCapacidade e/ou en situación de especial vulnerabilidade. Neste sentido, ata o de agora levamos a cabo con gran éxito de participación varios talleres sobre afectividade e sexualidade, habilidades sociais, uso correcto de internet e busca activa de emprego.

Así mesmo, nos vindeiros meses (maio, xuño e xullo) daremos continuidade ao noso plan de formación coa posta en marcha de novos talleres sobre diferentes temáticas. O primeiro, que arrincará xa a vindeira semana (martes 2), baixo o título “Coidando a quen me coida”, abordará a atención á figura da coidadora, en feminino, xa que maioritariamente- e sobre todo nas zonas rurais- a atención ás persoas dependentes segue recaendo nas mulleres. A continuación, está previsto que dea comezo o segundo obradoiro deste ciclo, que xirará arredor da “Xestión da ansiedade e autocoidado emocional”. O plan de formación terá continuidade durante os meses de xuño e xullo con outros talleres sobre risoterapia, manexo do teléfono móbil e redes sociais, e autocoidados.

Se es muller con ou sen discapacidade, resides no rural e queres recibir formación ou precisas apoio e/ou asesoramento, non dubides en poñerte en contacto coa asociación Íntegro chamando ao 981 734 985 ou enviando un mail a info@integro.es.

post

O PIMD Rural atendeu a máis de 60 mulleres en situación de vulnerabilidade da Costa da Morte

  • O Punto de Intervención para Mulleres con Diversidade do Rural, promovido por Íntegro e co-financiado polo Fondo Social Europeo (FSE) ao abeiro do programa operativo FSE Galicia 2014-2020, prestou atención a 62 mulleres desde o pasado mes de outubro 
  • Ademais de accións formativas presenciais, ofrecéronse servizos de asesoramento, orientación laboral, acompañamento e atención psicolóxica a colectivos en risco de exclusión social

O Punto de Intervención para Mulleres con Diversidade Funcional do Rural (PIMD Rural) clausura neste mes de agosto a edición correspondente ao período 2021/2022 cun balance máis que positivo e un notable incremento de usuarias con respecto ao últimos anos. Dende o pasado 1 de outubro, foron atendidas  62 mulleres, a maioría delas con disCapacidade e residentes en concellos rurais da Costa da Morte con baixa densidade de poboación, neste servizo promovido pola asociación Íntegro e co-financiado pola Secretaría Xeral de Igualdade de Xunta de Galicia e o Fondo Social Europeo (FSE), ao abeiro do programa operativo FSE Galicia 2014-2020, para fomentar a igualdade de oportunidades e contribuír a diminuír a tripla discriminación á que se ven sometidas moitas das beneficiarias do programa.

Ao longo deste exercicio, realizáronse numerosas actuacións encamiñadas á orientación e información sobre recursos singularizados, de atención e asesoramento persoal e social, así como de apoio directo nas relacións con outras entidades, organismos e servizos para facilitar ás persoas usuarias a súa integración social. De feito, un dos máis demandados nos últimos meses foi o acompañamento a centros sanitarios e outras administracións públicas ou en entidades bancarias para a realización de trámites básicos. A orientación laboral e o seguimento na busca de emprego foi, xunto coa realización de actividades para a mellora da empregabilidade, unha das prestacións máis requiridas polas usuarias, que tamén precisaron do noso servizo de atención psicolóxica e mediación familiar e/ou intercultural para a resolución de conflitos no ámbito doméstico.

Programa formativo

Por outra banda, a posta en marcha de novas accións formativas contribuíu notablemente a promover a igualdade de oportunidades e diminuír a discriminación á que habitualmente están sometidas as mulleres con disCapacidade e/ou en situación de especial vulnerabilidade. Neste último ano, levamos a cabo con gran éxito varios talleres sobre habilidades pre-laborais, habilidades sociais e domésticas, resolución de conflitos, auto-coidados, manexo do teléfono móbil e busca activa de emprego.

Se es muller con ou sen discapacidade, resides no rural e queres recibir formación ou precisas apoio e/ou asesoramento, non dubides en poñerte en contacto con Íntegro chamando ao 981 734 985 ou enviando un mail a info@integro.es.

post

A conselleira de Emprego e Igualdade destaca o labor do PIMDRural na súa visita a Nantón

  • María Jesús Lorenzana desprazouse esta mañá a Nantón, acompañada polo alcalde de Cabana e varios membros do goberno local, para coñecer de primeira man os programas desenvolvidos pola entidade en materia de emprego e igualdade  
  • Ademais de interesarse polo funcionamento do Centro de Día e Ocupacional, e do Centro Especial de Emprego, mantivo unha xuntanza con varias usuarias do PIMDRural para coñecer polo miúdo este servizo, que conta co financiamento da Xunta de Galicia desde a súa creación en 2016  

A conselleira de Emprego e Igualdade, María Jesús Lorenzana, visitou esta mañá, xunto ao alcalde do Concello de Cabana, as instalacións da asociación Íntegro para coñecer de primeira man o seu funcionamento e os diferentes servizos e programas que se levan a cabo para promover a igualdade e a inclusión social e laboral das persoas con diversidade funcional da Costa da Morte. Durante a súa estancia en Nantón estivo acompañada polo presidente da entidade, Adolfo López Baña; o tesoureiro, Silvestre Couto Torrado, e a directora Noelia Barreira, ademais de varios concelleiros do goberno local e traballadoras da entidade.

A xornada arrincou cunha visita polas dependencias para coñecer polo miúdo o día a día das persoas usuarias da entidade, coas que conversou de forma distendida sobre os diferentes talleres e obradoiros nos que participan. Ademais de interesarse polos diferentes proxectos e servizos que se están a desenvolver tanto no Centro de Día como no Centro Ocupacional, onde tivo ocasión de ver algúns dos produtos da liña comercial Bicos de Amora, especializada en artigos de elaboración artesanal (xabóns de glicerina, pulseiras, candeas, chapas…),  prestou especial atención ás accións formativas e de empregabilidade posta en marcha no noso Centro Especial de Emprego.

Así mesmo, Lorenzana mantivo unha xuntanza coas responsables do Punto de Intervención para Mulleres con Diversidade Funcional do Rural (PIMDRural), desde o que se presta servizo a usuarias de toda a Costa da Morte e que conta co apoio e o financiamento do ente autonómico desde a súa creación en 2016 porque “iniciativas como esta posibilitan chegar a persoas que se atopan en situacións máis complicadas e desfavorecidas, prestando, de maneira personalizada, servizos de proximidade e dotando de novos recursos ao noso medio rural”, subliñou a titular de Emprego e Igualdade.

No que vai de 2022, o Punto de Intervención atendeu xa a 22 mulleres en situación de vulnerabilidade prestándolles información, asesoramento e apoio na adquisición de habilidades persoais e sociais, así como na busca de emprego e/ou mellora da súa capacitación profesional. Así mesmo, estanse a promover diversas accións para incentivar a súa participación na vida social, a atención psicolóxica e a mediación familiar e a posta en marcha de campañas de sensibilización contra a violencia de xénero e a discriminación, que, no caso deste colectivo “atópase nunha situación de maior vulnerabilidade, xa que son as mulleres con discapacidade que viven no medio rural e, polo tanto, sofren unha dobre ou mesmo tripla discriminación: por razón de xénero, de discapacidade e de falta de acceso aos recursos”, matizou a Conselleira.

30 anos de historia

Lorenzana non quixo rematar a súa estancia en Nantón sen antes trasladar os seus parabéns á nosa entidade polo seu 30º aniversario, destacando o importante labor desempeñado “desde este espazo inclusivo que traballa día a día na defensa dos dereitos das persoas con discapacidade, ofrecendo unha atención integral e adaptada ás necesidades de cada usuario e usuaria e traballando para conseguir unha contorna máis acolledora que poña en valor a diversidade”, puntualizou.

Pola súa banda, o presidente de Íntegro agradeceu a visita e recordou “a necesidade de seguir traballando cóbado con cóbado para seguir avanzando na inclusión social e laboral das persoas con discapacidade no medio rural”.

post

30 anos camiñando cara a inclusión das persoas con diversidade funcional da Costa da Morte

Ademais de facer un repaso polas súas tres décadas de historia, a entidade presentou a programación conmemorativa para este 2022 

Con motivo da conmemoración do seu 30º aniversario, celebrado o pasado 1 de febrero, a asociación Íntegro deu a coñecer o calendario de actividades que vén de elaborar para este 2022. A presentación tivo lugar o pasado venres na sede de Nantón, en Cabana de Bergantiños, e contou coa presenza do presidente de Íntegro, Adolfo López Baña; o tesoureiro, Sil Couto (ambos co-fundadores e integrantes da asociación desde as súas orixes); a directora do Centro de Recursos, Noelia Barreira e outros membros da directiva, traballadoras, socios/as e usuarios/as do centro.

Inclusión, igualdade e visibilidade son os tres piares nos que se sustenta a longa e difícil traxectoria de Íntegro desde as súas orixes ata a actualidade. E agora, son tamén os tres conceptos que pretenden achegar aos nenos e nenas da Costa da Morte a través da que será a primeira das actividades programadas para este ano: o concurso escolar de debuxo, poesía e narrativa “camiñando cara a inclusión”, que xa se puxo en marcha o pasado día 1 nos centros educativos de primaria para concienciar aos escolares sobre a disCapacidade e a diversidade, e promover a inclusión e a igualdade entre os máis cativos/as. Os traballos gañadores daranse a coñecer no mes de abril.

O acto central da programación conmemorativa deste 2022, desenvolverase o vindeiro mes de xuño no auditorio municipal de Cabana de Bergantiños e terá como protagonistas ás persoas usuarias do centro, que serán as encargadas de realizar unha viaxe a través do tempo para dar a coñecer a historia da entidade desde os seus comezos en 1992.

Xa en pleno verán, celebrarse a “Romaría da Inclusión”, un evento festivo e reivindicativo, aberto a toda a veciñanza, que terá como escenario o Centro de Recursos Íntegro, en Nantón. Será unha xornada para o rencontro e a celebración ao que asistirán usuarios/as, socios/as, familiares, membros da directiva, etc… O programa completarase cun ciclo de conferencias sobre inclusión e diversidade, previsto para o 2º semestre do ano, no que se abordarán cuestións relativas á sexualidade, o emprego, etc. Ademais, haberá unha edición especial do programa de “Prevención da lesión medular”.

30 anos pasaron desde aquel 1 de febrero de 1992, no que 7 persoas con discapacidade de Ponteceso e Cabana decidiron unir esforzos para crear unha entidade que na actualidade conta xa con 45 persoas usuarias, das que 22 son públicas (10 Centro de Día e 12 Centro Ocupacional). Agora Íntegro asume un novo reto: acadar as 63 prazas de ocupación e seguir arrincando sorrisos cada día entre aos nosos usuarios e usuarias.

TRES DÉCADAS DE HISTORIA.  Adolfo López Baña, presidente da asociación Íntegro

Choveu moito desde aquel 1 de febreiro de 1992, cando sete persoas con Discapacidade de Ponteceso e Cabana decidiron unir esforzos para constituír unha entidade, que inicialmente recibiu o nome de Asociación de Minusválidos PONTE-CABANA. Desde entón, un gran número de persoas foron sumando folgos, ideas e moito traballo ata formar o que hoxe coñecemos como a Asociación INTEGRO dás persoas con Diversidade Funcional da Costa da Morte. Co traballo de todos foise crecendo de forma estruturada para fortalecer todas as iniciativas e profesionalizar os servizos postos en marcha ata a actualidade.

As orixes

As primeiras xuntanzas da entidade celebrábanse cada sábado no bar A Pesqueira de Ponteceso. E desde alí, dado que a maioría dos integrantes da entidade eramos lesionados medulares,  decidimos poñer en marcha as primeiras accións de sensibilización para informar á poboación sobre as causas e consecuencias de sufrir un accidente medular. Así botou andar polos centros educativos da Costa da Morte a “campaña de prevención da lesión medular”,  coa que seguimos percorrendo os colexios para concienciar aos máis novos.

Os comezos non foron doados. Ademais de atrancos burocráticos, os recursos económicos escaseaban. Así que, tiramos de imaxinación e comezamos a realizar actividades sociais para recadar fondos. Un dos eventos con máis sona e arraigo entre a veciñanza da comarca foron os desfiles de moda. Xa por aquel entón, tiñamos claro que todas as actividades tiñan que se integradoras (descoñeciamos o termo inclusión), e por iso nos pases de moda participaban modelos con e sen discapacidade. Ademais, este tipo de eventos eran a ocasión perfecta para convivir durante días todos xuntos e en igualdade. Que tempo aqueles!

A medida que a entidade medraba en socios/as e actividades, a necesidade de dispoñer dun local comezou a ser prioritario. Despois de moitas conversas cos alcaldes de Ponteceso e Cabana, o rexedor cabanés, que naquela época era o Sr. Fariña, facilitou non só un local, senón tamén o contacto con outros alcaldes e empresarios da contorna, así como con outras administracións públicas, como a Deputación da Coruña, para darnos a coñecer e arrincar a nosa particular andaina na defensa dos dereitos das persoas con diversidade. Así puxemos en marcha unha primeira sede, baleira de material, pero chea de ideas, soños, ilusións e proxectos. Entre os primeiros destaca a creación do equipo de baloncesto adaptado Ponte-Cabana, único participante galego na Liga Autonómica formado integramente por lesionados medulares. Ao mesmo tempo, constituíuse ademais o grupo de xadrez.

Emprego e formación

Desde as nosas orixes, comprometémonos coa formación e a busca de emprego como elementos determinantes para a consecución dunha vida plena autónoma. Grazas a COGAMI logramos os apoios necesarios para poñer en valor ao noso colectivo e iniciar proxectos tan innovadores como ECOEMPREGO, unha iniciativa medioambiental enmarcada no programa europeo HORIZON, pioneiro na recollida e reciclaxe de electrodomésticos, papel e cartón, porta a porta, no que colaboraron ademais case todos os concellos da comarca. Con este proxecto apareceron os primeiros contedores de papel e cartón na zona, pero tamén algunhas carencias, como a ausencia de traballadores con discapacidade na zona rural, o que provocou que tiveramos que recorrer a varias asociacións da Coruña para poder poñer en funcionamento dito proxecto. Este feito, propiciou a realización dun estudo sobre a poboación con diversidade da Costa da Morte e os datos foron reveladores: elevada taxa de analfabetismo, escasa incorporación ao mercado laboral e unha visión demoledora da sociedade sobre o noso colectivo que propiciou a nosa presenza, máis ca nunca, en todos os foros, xornadas, congresos e eventos de calquera índole para alzar a nosa voz e gañar maior visibilidade.

Aproveitando as instalacións das Torres do Allo (Zas), nas que se desenvolvía o proxecto Ecoemprego, puxéronse en marcha as primeiras accións formativas da entidade: uns cursos sobre xardinería e invernadoiros, nos que participaron por primeira vez persoas con discapacidade residentes na contorna, e nos que ademais de coñecementos específicos, poñíase en valor a formación e o traballo abordando cuestións relacionadas coa independencia económica e familiar, valor social, crear familia, poder adquisitivo, empoderamento, etc… A estes obradoiros seguiron outros de carpintería e coiro nun local cedido polo Concello de Cabana no lugar do Pendón. Co paso do tempo, a demanda de formación e asesoramento ía en aumento e moi pronto xurdiu a necesidade de crear un centro de rehabilitación integral capaz de atender as necesidades do noso colectivo. Unha construción que foi posible grazas á cesión duns terreos por parte do Concello de Cabana, e aos apoios recibidos desde outras institucións como a Xunta de Galicia, a Deputación da Coruña, as administracións locais da Costa da Morte, e entidades como COGAMI, a Fundación ONCE, asociación NERIA, etc… Así nace o noso Centro de Recursos Íntegro.

A falta de contratación laboral de persoas con discapacidade por parte do tecido empresarial da contorna propiciou a creación do Centro Especial de Emprego ÍNTEGRO Xardinería e Medioambiente, nun terreo de 5.000 m2 cedido pola familia do ex-alcalde de Zas Julio Díaz, e especializado en labores de mantemento de xardíns e elaboración de produtos da horta con certificación ecolóxica, que deu emprego a 15 persoas.

No ano 2001, Íntegro inaugura as novas instalacións de Nantón, máis amplas e cómodas, co obxectivo de seguir medrando e atendendo as necesidades da poboación do rural. O concerto de prazas públicas da Consellería de Política Social favorece o crecemento e desenvolvemento do noso centro, que a Xunta de Galicia declara como entidade de Utilidade Publica pola Orde do 22 de outubro de 2010, da Consellería de Presidencia, Administracións Públicas e Xustiza.

Dentro do noso compromiso coa inclusión laboral de persoas con discapacidade, en xullo de 2013 volvemos apostar pola creación de emprego a través da constitución do Centro Especial de Emprego de iniciativa social sen animo de lucro Máis Porvir Xestión Social, un espazo dedicado á prestación de servizos socio-sanitarios e labores auxiliares para empresas e administracións públicas que na actualidade ofrece traballo a 42 persoas,  das que 38 teñen algún tipo de discapacidade. Desde Íntegro traballamos para que estes CEE de iniciativa social sexan o trampolín ao mercado empresarial.

 

O futuro de Integro

Actualmente, as entidades sociais vivimos momentos de cambio e constante evolución. En Íntegro damos a benvida ao 2022 con novos retos e ambiciosos proxectos para seguir medrando, entre os que destacan o incremento de prazas públicas concertadas, fogar residencial,  sustentabilidade económica ou a posta en marcha de novas políticas de conservación ambiental, sen descoidar os valores do que marcan o noso traballo diario. O compromiso social, a igualdade, a defensa dos dereitos, a participación social, a transparencia e a mellora continua seguirán constituíndo os cimentos da nosa historia.

A entidade, no seu desenvolvemento estratéxico para o período 2022-2025, deberá medrar coa pretensión de que cada área de actuación sexa autónoma e autosuficiente. ÍNTEGRO como entidade corporativa, ten que selo de forma completa. Por iso, os retos estratéxicos para os vindeiros anos centraranse no desenvolvemento corporativo, o afondamento nunha metodoloxía de traballo baseada nos apoios personalizados, a incorporación de novos servizos e o desenvolvemento empresarial do noso CEE + Porvir.

O que nunca cambiará, pasen 30 ou 100 anos, é o feito de que seguiremos sendo unha entidade comprometida coa nosa misión de alcanzar a inclusión das persoas con diversidad funcional e recoñecida na sociedade polos nosos valores, o traballo directo coas persoas con diversidade funcional e o compromiso coa inclusión no medio rural.

post

Íntegro amplía o seu cadro de persoal coa contratación dunha psicóloga

Xunto coa educadora e a traballadora social, a nova profesional prestará atención especializada a persoas usuarias e familias da entidade ademais de desenvolver o servizo de atención psicolóxica do PIMDRural

A asociación Íntegro das Persoas con Diversidade  Funcional da Costa da Morte vén de ampliar o seu cadro de persoal coa contratación dunha psicóloga que prestará atención especializada, tanto de xeito individualizado como en intervencións grupais, a persoas usuarias e familias, ademais de desenvolver o servizo de atención psicolóxica do Punto de Intervención para Mulleres con Diversidade do Rural (PIMDRural).

Desde este mes de novembro, a entidade de Nantón suma así unha nova profesional ao seu equipo, integrado xa por unha educadora e unha traballadora social. Entre as súas novas funcións destaca a súa participación na planificación, elaboración, desenvolvemento e avaliación dos Plans Individuais de Atención (PIA) das persoas usuarias, así como ofrecer asesoramento e apoio psicolóxico ás familias que o precisen. Así mesmo,  facilitará ás persoas profesionais de atención directa, pautas e estratexias de intervención sobre os problemas emocionais ou de conduta detectados, ademais de informar, de xeito individualizado, sobre a evolución e necesidades de cada usuario/a aos familiares que así o soliciten.  Outra das facetas a desenvolver será a de  participar na elaboración de proxectos que requiran dun estudo psicolóxico para avaliar posibles beneficios sobre as persoas usuarias.

PIMD Rural

Desde o ano 2015 a asociación Íntegro conta cun Punto de Intervención para Mulleres con Diversidade do Rural (PIMDRural). Trátase dun programa de atención personalizada e especializada,  co-financiado pola Consellería de Emprego e Igualdade a través da Secretaría Xeral de Igualdade e o Fondo Social Europeo (FSE), dirixido a mulleres en situación de especial vulnerabilidade que residen na zona rural da Costa da Morte.

Durante o período comprendido entre o 1 outubro de 2020 e o 30 de setembro de 2021, desde o PIMDRural prestouse atención a preto de medio centenar de mulleres, a maioría delas con disCapacidade. Entre os servizos máis demandados polas usuarias destacan o de información e orientación sobre recursos singularizados de atención e asesoramento persoal e social, así como apoio directo  nas relacións con outras entidades, organismos e servizos que lles faciliten ás persoas o seu proceso de integración social; mediación  intercultural e/ou familiar, a través da posta en marcha de habilidades persoais e sociais básicas ou de competencias para a mellora da empregabilidade, e orientación laboral e de acompañamento na busca de emprego, así como a prospección do mercado de traballo, a intermediación e a titorización laboral. Ademais do acompañamento, ás persoas usuarias tamén dispoñen dun servizo de transporte gratuíto para os seus desprazamentos.

 

Por outra banda, desde o Punto de Intervención para Mulleres leváronse a cabo numerosos acompañamentos na xestión de trámites administrativos, xestións económicas, citas médicas, etc. O desenvolvemento de accións formativas, dirixidas a grupos reducidos para ofrecer unha atención máis personalizada e adaptada ao protocolo COVID, é outro dos piares fundamentais para acadar a igualdade de oportunidades. Neste último ano, leváronse a cabo diversos talleres relacionados coas habilidades sociais e pre-laborais, autocoidado e hixiene persoal, e o manexo do teléfono intelixente, un dos máis demandados polas persoas usuarias do servizo.

 

 

 

post

Preto de 50 mulleres en situación de vulnerabilidade foron atendidas no PMIDRural

  • O Punto de Intervención para Mulleres con Diversidade do Rural, promovido por Íntegro e co-financiado polo Fondo Social Europeo ( FSE) ao abeiro do programa operativo FSE Galicia 2014-2020, prestou atención a 50 mulleres en 2021 
  • Ademais de accións formativas presenciais, ofrecéronse servizos de asesoramento, orientación laboral e acompañamento a colectivos de especial vulnerabilidade 

O Punto de Intervención para Mulleres con Diversidade Funcional do Rural (PIMD Rural) vén de pechar o período 2020/2021 cun balance máis que positivo e un notable incremento de usuarias con respecto aos últimos anos. Dende o pasado 1 de outubro foron atendidas case 50 mulleres, a maioría delas con disCapacidade e residentes en concellos rurais con baixa densidade de poboación, neste servizo promovido pola asociación Íntegro e co-financiado pola Secretaría Xeral de Igualdade de Xunta de Galicia e o Fondo Social Europeo (FSE), ao abeiro do programa operativo FSE Galicia 2014-2020, para fomentar a igualdade de oportunidades e contribuír a diminuír a tripla discriminación á que se ven sometidas moitas das beneficiarias deste programa.

Ao longo do presente exercicio, realizáronse numerosas actuacións encamiñadas á orientación e información sobre recursos singularizados, de atención e asesoramento persoal e social, así como de apoio directo nas relacións con outras entidades, organismos e servizos para facilitar ás persoas usuarias a súa integración social. De feito, un dos máis demandados nos últimos meses foi o acompañamento na realización de trámites básicos en oficinas como o SEPE, administracións públicas ou en entidades bancarias.

 

 

A orientación laboral e o seguimento na busca de emprego foi, xunto coa realización de actividades para a mellora da empregabilidade, unha das prestacións máis requiridas polas usuarias, que tamén precisaron do noso servizo de mediación familiar e/ou intercultural.

Programa formativo

Por outra banda, a posta en marcha de novas accións formativas contribuíu notablemente a promover a igualdade de oportunidades e diminuír a discriminación á que habitualmente están sometidas as mulleres con disCapacidade e/ou en situación de especial vulnerabilidade. Neste último ano, levamos a cabo con gran éxito varios talleres sobre habilidades pre-laborais, habilidades sociais e domésticas, resolución de conflitos, auto-coidado, manexo do teléfono móbil e busca activa de emprego en época de pandemia, este último con excelentes resultados xa que logramos a inserción laboral de varias persoas usuarias en diferentes empresas da contorna.

Logo dun ano de sesións online, puidemos retomamos as clases presenciais, con grupos reducidos para garantir as medidas hixiénico-sanitarias e prestar unha atención personalizada e á medida das necesidades de cada participante.

Se es muller con ou sen discapacidade, resides no rural e queres recibir formación ou precisas apoio e/ou asesoramento, non dubides en poñerte en contacto con Íntegro chamando ao 981 734 985 ou enviando un mail a info@integro.es.

post

O PIMD iniciará o luns 12 un curso para mulleres do rural sobre o manexo do teléfono intelixente

  •  As persoas interesadas en participar, preferentemente con disCapacidade, poden anotarse esta semana chamando ao 981 734 985
  • Esta acción presencial vén a sumarse a outras impartidas nos últimos meses sobre habilidades sociais e pre-laborais, busca activa de emprego e resolución de conflitos

 

O Punto de Intervención para Mulleres con Diversidade do Rural (PIMDRural) iniciará a vindeira semana unha nova acción formativa, dirixida a mulleres, preferentemente con disCapacidade, que residan no medio rural. Desta volta, a actividade consistirá nun taller de manexo de teléfono intelixente, que dará comezo o próximo día 12 nas instalacións da asociación Íntegro en Nantón (Cabana de Bergantiños).

As sesións, de dúas horas de duración, xirarán arredor do uso e manexo responsable dos dispositivos móbiles (whatsapp, correo electrónico, redes sociais, APP´s, …). As participantes dividiranse en grupos reducidos para garantir unha atención individualizada e manter as medidas de seguridade e hixiene fronte á COVID-19. En caso de que a demanda supere as expectativas previstas, ao rematar esta acción, realizarase unha segunda edición para acoller a todas as aspirantes ao curso. As persoas interesadas en participar poden inscribirse ao longo desta semana chamando ao 981 734 985 ata cubrir as prazas aínda dispoñibles.

Esta actividade está incluída no plan formativo da asociación Integro, dentro do PIMD Rural, un programa co-financiado pola Secretaría Xeral de Igualdade da Xunta de Galicia e o programa operativo FSE Galicia 2014-2020.

Balance

Nos últimos meses, tras retomar a actividade presencial, realizamos xa diversos talleres formativos sobre habilidades sociais e pre-laborais, resolución de conflitos, busca activa de emprego, etc. Así mesmo, desde o pasado mes de outubro, o Punto de Intervención á Muller con Diversidade Funcional de Integro prestou atención a máis de 30 mulleres da nosa contorna e cada día seguimos a traballar sen descanso para ofrecer asistencia e dar cobertura ás demandas de mulleres dos concellos limítrofes.