post

Íntegro recompilará material plástico da campaña de Nadal do CCA Carballo para o novo taller de reciclaxe de Diversiplás

  • Máis de 20.000 bolas de plástico serán utilizadas como materia prima para a fabricación de novos produtos no taller de aproveitamento e tratamento de residuos que se porá en marcha en Íntegro en 2022
  • Este Nadal, o Centro Comercial Aberto tamén contribuirá á inclusión laboral de persoas con discapacidade mediante a contratación de dous traballadores da nosa empresa de xestión social MáisPorvir   

O proxecto medioambiental da asociación Íntegro para a reciclaxe e transformación de residuos plásticos Diversiplás, + diverso – plástico segue avanzando no seu camiño cara unha Costa da Morte máis sostible, máis diversa e con menos plástico. E, desta volta, faino captando novos colaboradores e participando nun fermoso proxecto no que a ilusión, a maxia e, por suposto, a reciclaxe serán co-protagonistas xunto cos máis pequenos da casa.

Grazas ao Centro Comercial Aberto de Carballo e á súa campaña de Nadal, nas vindeiras semanas teremos a oportunidade de recompilar un gran volume de residuo plástico. Nada menos que máis 20.000 bolas, as mesmas que agocha no seu interior a casiña de Nadal,  que o CCA ten instalado na Praza do Concello para repartir ilusión, sorrisos e premios entre a cativada. Para conseguilas, bastará con mercar este Nadal nos 76 establecementos comerciais e de hostalaría adheridos á campaña. A cambio, cada cliente recibirá un vale que os e as máis peques da casa poderán cambiar por unha tirada na casiña e obter así unha bola con premio seguro e directo.

 

Unha vez obtido o agasallo, os envases poderán ser depositados nun tragabolas para o seu almacenamento e posterior utilización como materia prima no taller de aproveitamento e reciclado, que imos poñer en marcha en 2022 co apoio e asesoramento de Adrián Coira, de Just Fair Enough, para a creación de novos produtos con diferentes utilidades (chaveiros, macetas, mobiliario urbano….). Neste senso, desde a asociación Íntegro queremos solicitar a colaboración de toda a cidadanía para lograr recompilar o maior número posible de bolas, e darlles así unha segunda vida a través da reciclaxe.

Diversiplás é un proxecto de economía circular, xurdido ao abeiro do proxecto Tanza, dirixido á recuperación e valorización de residuos plásticos. Coordinado pola asociación Integro, conta co apoio do Galp Costa da Morte e o financiamento do Fondo Europeo Marítimo e de Pesca, a través da Consellería do Mar da Xunta de Galicia.

 

 

 

 

 

 

 

Máis Porvir Xestión Social

Ademais da súa aportación ao proxecto medioambiental Diversiplás, este Nadal o CCA de Carballo contribuirá tamén á inclusión social e laboral de persoas con diversidade funcional. Dous traballadores de Máis Porvir Xestión Social, a empresa de economía social da asociación Íntegro, serán os encargados de repartir ilusión, sorrisos e premios entre a cativada que se achegue ata a casiña de Nadal do CCA.  Unha colaboración que pon de manifesto  o compromiso e a implicación do Centro Comercial Aberto de Carballo cos colectivos sociais máis desfavorecidos. Grazas e parabéns pola iniciativa!

 

 

 

post

Clausurado o obradoiro de acondicionamento de exteriores organizado polo Concello de Ponteceso para persoas en risco de exclusión

Hoxe foi clausurado o obradoiro de acondicionamento de exteriores organizado polo Concello de Ponteceso e subvencionado pola Deputación Provincial da Coruña co obxectivo de mellorar a empregabilidade das persoas en risco de exclusión social. Un total de 14 alumnos/as participaron na acción formativa impartida dende o mes de xuño pola empresa de economía social Máis Porvir, participada ao 100 % pola Asociación Íntegro.

No acto de clausura, celebrado na Casa da Cultura de Ponteceso, participaron o alcalde, Lois García Carballido, e a concelleira de Servizos Sociais, Isabel Vuelta, en representación do Concello. Por parte de Máis Porvir asistiron o administrador e a xerente da empresa, Adolfo López Baña e Sandra Caamaño. A acción formativa incluíu módulos de carpintería e xardinería, busca activa de emprego e habilidades sociais. O alumnado recibiu os seus diplomas e rematou a participación no curso compartindo un aperitivo.

O obradoiro de acondicionamento de exteriores non só cumpriu o obxectivo de formar a un grupo de persoas para mellorar as súas posibilidades de inserción laboral en dúas áreas nas que hai demanda de persoal, como son a xardinería e o mantemento de mobiliario urbano, senón que ademais permitiu recuperar espazos verdes e restaurar elementos do mobiliario urbano pontecesán deteriorados polos efectos do vandalismo. “Grazas a estas iniciativas e á colaboración dos concellos conseguiremos que se xere emprego, e polo tanto riqueza, na zona”, destacou o administrador de Máis Porvir. O alcalde de Ponteceso, pola súa banda, reiterou o seu compromiso de implicación para acadar o obxectivo da inserción laboral.

post

+Porvir xestiona o Programa de Envellecemento Activo do Concello de Malpica no que participan 50 persoas

Xa está en marcha o Programa de Envellecemento Activo promovido pola Concellería de Servizos Sociais de Malpica e subvencionado pola Deputación Provincial da Coruña.  Por segundo ano consecutivo, a xestión do programa correspóndelle a + Porvir, a empresa de economía social da Asociación Íntegro. Con esta actividade preténdese dotar ás persoas maiores das ferramentas necesarias para poder manter a súa autonomía, ademais de evitar o seu illamento e favorecer a súa participación social. Este ano participan un total de 50 persoas, repartidas practicamente a partes iguais entre Buño e Malpica. Os obxectivos fixados para esta segunda edición son os seguintes:

envellecemento-malpica-1

Presentación en Malpica

  • Previr o deterioro cognitivo a través de exercicios prácticos, favorecendo así a autonomía persoal.
  • Ofrecer estratexias para un envellecemento feliz, para a mellora das relacións persoais e sociais de xeito que se optimicen as relacións das persoas participantes no obradoiro co seu entorno.
  • Aprender novas formas de comunicación e participación a través das TIC’s.
  • Previr o deterioro físico e ensinar unha serie de exercicios sinxelos para o mantemento físico que as persoas participantes poidan reproducir con facilidade no seu fogar.
  • Realizar pequenos traballos manuais cos que estimular e mellorar a coordinación motora fina.
  • Fomentar o consumo saudable.
  • Previr o deterioro físico a través do exercicio ao tempo que se fomenta o coñecemento das diferentes músicas típicas dos países escollidos.
  • envellecemento-buno-1

    Presentación en Buño

    Dotar ás persoas participantes de ferramentas coas que mellorar o seu autoconcepto e as súas relacións persoais.

  • Dar a coñecer os beneficios da lectura para manter a mente activa.
  • Ofrecer os beneficios das augas termais para a mellora das diferentes patoloxías das persoas participantes.

 

Para acadar eses obxectivos desenvolverase unha serie de actividades de estimulación cognitiva, xogos de mesa e campionatos, corpo e mente en movemento, taller afectivo sexual, obradoiro de mantemento físico con pilates, cachibol, elaboración de xabóns, recuperación de receitas tradicionais, elaboración menú e degustación conxunta, charla de reumatoloxía, balneario e festa de clausura. “É un Programa de Envellecemento Activo que, como se pode comprobar, favorece a participación activa dos/das veciños e veciñas dun xeito dinámico e lúdico”, explicou Marisol Blanco na presentación do programa, na que tamén participou o administrador de + Porvir e presidente de Íntegro, Adolfo López Baña, acompañado polo alcalde de Malpica, Eduardo Parga, e o tenente de alcalde, Miguel Fernández.

post

Asinado o contrato entre a UTE Máis Porvir – Combina Social e o Concello de Malpica para a prestación de servizos de conserxería

O alcalde de Malpica, Eduardo Parga Veiga, e os administradores das empresas integradas na UTE Máis Porvir-Combina Social (Íntegro e Cogami), Adolfo López Baña e Álvaro García Bustelo, respectivamente, asinaron hoxe o contrato para a prestación de servizos de conserxería no CEIP Milladoiro e no pavillón polideportivo de Malpica, o que permitirá a integración laboral de dúas persoas con diversidade funcional.

O contrato, como destacou Álvaro García, supón “unha oportunidade dado o carácter social de Íntegro e Cogami, porque ademais de que unhas persoas con discapacidade poidan prestar un servizo que está ao seu alcance, permítenos xerar recursos para seguir desenvolvendo o noso labor social”. O administrador de Combina Social e membro da xunta directiva de Cogami encargado, precisamente, das actividades de xeración de recursos para servizos de interese social, destacou a ampla experiencia de Combina Social na prestación deste tipo de servizos en institución públicas como os concellos de Santiago e Ourense e tamén en empresas privadas. Combina Social achega, polo tanto, solvencia e experiencia á UTE formada con Máis Porvir.

Eduardo Parga, pola súa banda, reiterou o compromiso do goberno municipal de Malpica coa integración das persoas con diversidade funcional, e asegurou que as Administracións públicas son as primeiras que deben dar exemplo. O contrato terá unha vixencia dun ano, prorrogable por outro, e permitirá a inserción laboral de dúas persoas con discapacidade física.