Didáctico e moi satisfactorio está a resultar o obradoiro de madeira no que participan un grupo de nove usuarios e usuarias de Íntegro dende o pasado 30 de setembro. Trátase dunha actividade desenvolvida dende a nosa entidade e enmarcada no programa Infoase, unha acción de cooperación subvencionada pola Xunta de Galicia para a información e asesoramento en recursos das persoas con diversidade funcional no medio rural e co-financiada polo Fondo Social Europeo.

A creación deste obradoiro, de seis meses de duración, ten coma finalidade a realización de actividades ocupacionais orientadas á mellora do emprego en persoas con diversidade funcional. Para elo, un equipo de docentes encárgase da súa formación práctica ao tempo que posibilitan o desempeño dunha actividade real e produtiva de calidade.

O obradoiro, integrado por 6 alumn@s do centro ocupacional e 3 socios/as da entidade con diversidade funcional, estase a levar a cabo nun taller de carpintería cedido polo Concello de Cabana e situado na parroquia de Anos. Ademais, o consistorio colaborou coa dotación de material e maquinaria precisos para a realización dos traballos de carpintería. Dende a Asociación Íntegro queremos agradecer a súa colaboración neste proxecto así como a súa implicación e compromiso constantes en favor da inclusión e da diversidade.

Aquí vos deixamos algúns dos traballos que están realizando os nosos aventaxad@s alumn@s pero aínda queda moita madeira que cortar ata que finalice a actividade o vindeiro mes de marzo.

Grazas a tod@s!