post

Íntegro e o Concello de Cabana asinan un convenio para a posta en marcha dunha experiencia piloto de vida independente para persoas con discapacidade

  • Trátase da cesión temporal de dúas vivendas sociais, totalmente equipadas e adaptadas, situadas nas antigas casas dos mestres xunto ao CIP As Revoltas
  • Esta iniciativa experimental pretende sentar as bases para a futura xestión de novos programas de vivenda con apoio

A asociación Íntegro vén de asinar un convenio de colaboración co Concello de Cabana para a cesión de uso temporal de dúas vivendas sociais destinadas a promover a inclusión e autonomía persoal de persoas con diversidade funcional.

A través da posta en marcha do proxecto “Experiencia piloto Vida Independente”, a entidade que preside Adolfo López Baña desenvolverá, ao longo do segundo semestre de 2024, unha iniciativa pioneira e experimental que proporcione as claves necesarias para a futura xestión de novos programas de vivenda con apoio.

O acto de sinatura, celebrado o pasado venres na Casa do Concello, contou coa presenza do presidente de Íntegro, Adolfo López Baña; a directora do Centro de Recursos, Noelia Barreira; un dos vogais da Xunta Directiva, David Pombo, e o alcalde de Cabana, José Muíño. “Este é un primeiro paso para sentar as bases de novos recursos de proximidade e apoio, moi demandado polas familias das persoas usuarias do noso centro de día e ocupacional para evitar o desarraigo familiar que moitas veces se produce cando unha persoa ten que desprazarse a unha residencia fóra da súa contorna”, destacou López Baña. Neste senso, o rexedor cabanés incidiu tamén na importancia deste tipo de iniciativas que “favorecerán a plena inclusión de persoas con discapacidade comezando por un dereito tan básico como o acceso a unha vivenda”, recalcou.

Cada un dos apartamentos, situados nas antigas casas dos mestres xunto ao CPI As Revoltas, en Cabana de Bergantiños, conta con cociña, salón-comedor, baño con ducha e tres habitacións totalmente equipadas para habitar. Ademais, todos os espazos son accesibles e están adaptados para persoas con mobilidade reducida.

De cara a lograr unha inclusión plena e integral, todas as persoas que participen nesta experiencia piloto recibirán os coñecementos e ferramentas necesarias para o desenvolvemento da súa autonomía e habilidades básicas, ao tempo que se fomentará o ocio e a utilización dos propios recursos da contorna para favorecer a economía local.

Desde Íntegro queremos agradecer ao Concello de Cabana a súa permanente aposta e implicación na posta en marcha de iniciativas que promoven a inclusión social das persoas con diversidade funcional, e a confianza depositada na nosa entidade para o desenvolvemento de proxectos tan relevantes para a nosa comunidade como este.

post

A deputada de Política Social Mar García visita as instalacións de Íntegro

Ademais de comprobar a boa marcha dos programas de formación ocupacional e promoción da vida autónoma que financia a entidade provincial, comprometuese a seguir colaborando en novas liñas de axuda

Esta semana, a deputada de Política Social Mar García Vidal desprazouse ata a sede da nosa entidade en Nantón (Cabana de Bergantiños) para comprobar de primeira man a boa marcha dos programas de formación ocupacional e promoción da vida autónoma que financia a entidade provincial.

Xunto ao presidente de Íntegro, Adolfo López Baña; a directora do centro, Noelia Barrera; a xerente do centro especial de emprego Máis Porvir, Sandra Caamaño; o tesoureiro, Silvestre Couto, e varios representantes da xunta directiva, a deputada visitou cada unha das dependencias e interesouse polos distintos servizos e actividades que se desenvolven no centro, como os programas de formación ocupacional, o servizo de rehabilitación física, fisioterapia e psicoloxía e as diferentes accións para o fomento da autonomía persoal e de ocio e tempo libre, que subvenciona a área de Política Social. Ademais, de conversar animadamente coas persoas usuarias, tamén estivo falando cos mozos e mozas do programa de voluntariado que estes días nos visita, como xa é costume durante a temporada estival.

Durante a súa estancia en Nantón, Mar García destacou “o excelente labor que desde hai máis de tres décadas desenvolve esta entidade en favor da inclusión e a autonomía das persoas con discapacidade, un gran traballo que o ano pasado foi merecedor dun dos premios de Boas Prácticas en Servizos Sociais que outorga a Deputación”, lembrou.

Pola súa banda, López Baña aproveitou a súa presenza para agradecer o compromiso e apoio permanente da Deputación da Coruña, tanto no financiamento de actividades do centro ocupacional como na optimización dos servizos e transporte adaptado, ao tempo que solicitou unha vez máis a súa colaboración para seguir acometendo obras de reforma interior e mellora das instalacións que redunde nunha maior calidade de vida e benestar dos nosos usuarios/as. Neste senso, a deputada provincial comprometeuse a estudar e analizar todas as propostas.

post

Novas incorporacións á Xunta Directiva elixida este sábado en asemblea extraordinaria  

  • Entre as novidades deste ano, deuse a coñecer a posta en marcha dun proxecto sobre inclusión laboral e a realización da andaina solidaria “por un millón de pasos”
  • Desde Máis Porvir Xestión Social destacouse o crecemento da entidade en número de traballadores, pasando de 52 a 65, e en prestacións a novos concellos como Ponteceso, Muxía e Camariñas

O Centro de Recursos Íntegro acolleu este sábado a celebración da súas asembleas anuais, tanto a ordinaria como a extraordinaria. A primeira deu comezo segundo o previsto coa lectura da acta anterior e a exposición das actividades desenvolvidas en 2023, resumidas a través dun breve vídeo explicativo a cargo da directora do Centro de Recursos Noelia Barreira. A continuación, o tesoureiro Silvestre Couto deu a coñecer o estado contable da entidade, salientando que no pasado exercicio o investimento en gasto salarial e de persoal achegouse ao 57% do orzamento xeral mentres que a maior parte dos gastos xerais foron destinados a comedor e combustible. No que respecta ao actual exercicio, destacou a sinatura do concerto social da Xunta de Galicia, que proporcionará á asociación unha maior estabilidade económica para facer fronte aos pagos ordinarios.

Aprobadas as contas, procedeuse a detallar as actividades previstas para este ano, facendo especial fincapé na posta en marcha dun programa experimental sobre inclusión laboral orientado ás persoas usuarias do noso centro ocupacional coa intención de que coñezan de primeira man a realidade dun traballo ordinario. Esta iniciativa é posible grazas a un acordo de colaboración cunha empresa externa especializada na materia. Outra das novidades deste 2024 será a celebración cara finais de ano da andaina solidaria “por un millón de pasos”, unha iniciativa que ten como finalidade promover a práctica da actividade física a través da organización de paseos en grupo.

Por outra banda, a xerente de Máis Porvir Xestión Social, Sandra Caamaño, foi a encargada de dar a coñecer o balance económico anual da nosa empresa de economía social, da que xa forman parte máis de 65 traballadores/as (+ 87% con disCapacidade), 13 máis que en 2023, e as actividades e servizos prestados en concellos xa habituais como o de Mazaricos, Zas, Laxe, Coristanco e Cabana, onde se desenvolven os diferentes obradoiros do programa de actividades sociais nas parroquias (cestería, artes manuais…), pero tamén noutros de nova adhesión como Ponteceso, Muxía e Camariñas.

Nova Xunta Directiva

Tras a asemblea ordinaria, celebrouse outra extraordinaria para abordar a elección e nomeamento dos novos compoñentes da Xunta Directiva, que resultaron elixidos/as por unanimidade nunha candidatura única, e que son os seguintes:

  • Presidente: Adolfo López Baña
  • Vicepresidente: Ramón Pombo
  • Secretaria: Anabel Castiñeiras
  • Tesoureiro: Silvestre Couto
  • Vogais: David Pombo, Manuel Caramés, Antonio Castiñeiras (representante das persoas usuarias do centro) e Mari Carmen García (enlace coas familias das persoas usuarias).

Así mesmo, aprobouse a reforma dos estatutos para adaptalos á nova normativa que aposta por unha linguaxe máis inclusiva, a celebración de asembleas telemáticas e a incorporación da palabra “curadores” en substitución de “titores” como establece a nova Lei 8/2021. Antes de rematar a xuntanza, o reelixido presidente agradeceu o apoio e o traballo constante de todos os socios e socias da entidade, ao tempo que apelou á súa participación e colaboración para “asegurarnos de que as nosas accións reflicten verdadeiramente as necesidades e desexos de familiares e usuarios/as”, subliñou.

post

Íntegro elixirá este sábado en asemblea extraordinaria a súa nova Xunta Directiva

A xuntanza terá lugar no Centro de Recursos de Nantón, en Cabana de Bergantiños, ás 10.30 horas en primeira convocatoria e tras a celebración da asemblea ordinaria

A asociación Íntegro celebrará este sábado 22 a súas asembleas xerais anuais: a ordinaria e a extraordinaria, ás que están convocados/as todos os socios e socias da entidade. A primeira delas, terá lugar no Centro de Recursos de Nantón, en Cabana de Bergantiños, a partir das 10.30 horas en primeira convocatoria e ás 11:00 horas en segunda. A relación de asuntos a tratar na asemblea ordinaria desenvolverase de acordo á seguinte orde do día:

  1. Lectura e aprobación, se procede, da acta anterior
  2. Actividades levadas a cabo no ano 2023
  3. Estado contable do ano 2023 e a súa aprobación, se procede
  4. Actividades e orzamentos para o ano 2024 e a súa aprobación, se procede
  5. Rogos e preguntas

A continuación, procederase á celebración da asemblea xeral extraordinaria que conterá os seguintes puntos:

  1. Lectura e aprobación, se procede, da acta anterior
  2. Presentación, elección e nomeamento da nova Xunta Directiva e a súa ratificación (para ser candidato/a, débese cumprir cos estatutos da entidade).
  3. Modificacións estatutarias
  4. Rogos e preguntas

Ata o mércores 19, ás 14.00 horas, permanecerá aberto o prazo para a presentación de candidaturas á elección da nova Xunta Directiva. Segundo os estatutos vixentes, as persoas que desexen participar nas xuntanzas, exercendo o seu dereito de voz e voto e beneficiándose dos descontos para socios/as, deberán estar ao corrente no pagamento da cota anual correspondente ao exercicio 2024.

post

Íntegro renova os sistemas de seguridade con cargo ao programa FOIE 2024 da Deputación da Coruña

A convocatoria do programa de subvencións a entidades sen ánimo de lucro para o investimento de servizos sociais tamén posibilitou a instalación de novo mobiliario e a adquisición dunha grúa 

No centro de recursos Íntegro seguimos a traballar na mellora das nosas instalacións para adaptalas ás necesidades dos nosos usuarios e usuarias. Así, neste 2024 vimos de executar unha serie de obras con cargo á convocatoria do programa de subvencións a entidades sen ánimo de lucro para o investimento de servizos sociais no ano 2024 (FOIE 2024) da Deputación da Coruña.

Dentro do programa “Equipamento do centro ocupacional Íntegro”, o ente provincial realizou unha aportación de 20.160 €, que foi investida na instalación de mobiliario para o noso centro ocupacional, a adquisición dunha grúa e a optimización dos sistemas de seguridade.

A asociación Íntegro é unha entidade social sen ánimo de lucro que desde 1992 promove a inclusión social e laboral das persoas con diversidade funcional da Costa da Morte. Na actualidade, conta cun Centro de Día e un Centro Ocupacional que prestan servizo a 45 persoas das comarcas de Bergantiños, Soneira e Fisterra. A entidade está integrada na Confederación Galega de Persoas con Discapacidade (COGAMI) e forma parte da Confederación Española de Persoas con Discapacidade Física e Orgánica (COCEMFE).

post

O PIMDRural ofrecerá en xuño un taller sobre “sexting seguro” para mulleres con discapacidade

O prazo de inscrición xa está aberto. As prazas son limitadas!

Desde o Punto de Intervención para Mulleres con Discapacidade do Rural, promovido pola asociación Íntegro e co-financiado polo polo Fondo Social Europeo (FSE) ao abeiro do programa operativo FSE+ Galicia 2021-2027, chega unha nova edición do ciclo formativo que a entidade ten en marcha coa finalidade de dotar de recursos a un dos colectivos máis vulnerables da sociedade. Desta volta, a nova acción xirará arredor do “Sexting seguro”, unha practica moi estendida e normalizada desde a pandemia baseada no intercambio de fotografías e outros contidos audiovisuais con fins eróticos, sobre a que convén poñer o foco de atención.

Para elo, no mes de xuño a psicóloga do centro María Redonda impartirá un taller especializado nesta temática para que as mulleres participantes saiban como protexerse e cales son as canles máis seguras para facelo. Será durante o mes de xuño.

As persoas interesadas en participar deberán inscribirse canto antes  chamando ao 981 734 985 – 650 961 649 ou enviando un mail a info@integro.es. Dado que está orientado a grupos reducidos, as prazas son limitadas. Bule e non quedes sen a túa!

post

Un grupo de mulleres do PIMDRural visita unha empresa de reciclaxe téxtil

  • Esta iniciativa, na que tamén participaron persoas usuarias do centro ocupacional, desenvolveuse dentro do programa de acompañamento na busca de emprego 
  • O Punto de Intervención para Mulleres con Diversidade do Rural está promovido por Íntegro e co-financiado polo Fondo Social Europeo (FSE) ao abeiro do programa operativo FSE+ Galicia 2021-2027 

No que vai de ano, o Punto de Intervención para Mulleres con Diversidade Funcional do Rural (PIMD Rural), que promove a asociación Íntegro, continúa a desenvolver a súa labor no ámbito da Costa da Morte a favor das mulleres prioritariamente con discapacidade das zonas rurais.

Durante o período 2022-2023, prestouse atención a 68 mulleres da nosa contorna, a maioría delas con algún tipo de discapacidade. Unha psicóloga, unha educadora social e unha traballadora social son as encargadas de prestar unha ampla variedade de servizos para atender as demandas de todas as usuarias. Ademais de ofrecer información, orientación e asesoramento en cuestións relativas á discapacidade e á dependencia, o  apoio na busca activa de emprego e orientación laboral, encamiñada á adquisición de habilidades persoais e sociais, e os acompañamentos na prospección laboral das participantes a través de visitas a diferentes empresas, figura entre as prestacións máis solicitadas. Neste senso, un grupo de mulleres do Punto de Intervención veñen de realizar, xunto a algunhas persoas usuarias do noso centro ocupacional, unha visita ás instalación da empresa Coleo Recycling, pioneira na reciclaxe de téxtil a través dun  proceso completamente circular no que as prendas recicladas convértense en teas ou fíos coas que se confeccionan outras pezas e se reduce o gran volume deste tipo de residuo. Así mesmo, esta compañía tamén está comprometida coa diversidade, xa que o 90% dos seus traballadores son persoas cun grao de discapacidade recoñecida igual ou superior ao 33%.

Outros servizos

A atención psicolóxica ou o de mediación tamén figura entre as prestacións máis demandadas xunto co acompañamento na xestión de calquera tipo de trámite ou o apoio directo nas relacións con outras entidades, organismos e servizos para facilitar ás persoas usuarias a súa integración social. No caso de mulleres con mobilidade reducida, dispoñemos de transporte adaptado para facilitar os seus desprazamentos. De feito, un dos máis demandados foi a visita a centros sanitarios e outras administracións públicas ou en entidades bancarias para a realización de trámites básicos.

Este programa está co-financiado pola Secretaría Xeral da Igualdade a través de subvencións a entidades de iniciativa social sen ánimo de lucro para programas dirixidos a mulleres en situación de especial vulnerabilidade e para o desenvolvemento das actuacións do Plan Corresponsables, subvencionado parcialmente pola Unión Europea no marco do Programa Operativo FSE+ Galicia 2021-2027.

Se es muller con ou sen discapacidade, resides no rural e queres recibir formación ou precisas apoio e/ou asesoramento, non dubides en poñerte en contacto con Íntegro chamando ao 981 734 985 ou enviando un mail a info@integro.es. As persoas interesadas tamén poden acudir ao noso centro de Nantón (Cabana de Bergantiños) sen necesidade de cita previa. Desde o Punto de Intervención achegarémonos ata calquera punto da Costa da Morte para facilitar o acceso de todas as mulleres que o precisen aos nosos recursos e servizos.

post

Íntegro celebrará a 2ª edición do FestIgual, diversamente iguais cunha gran mexillonada e un concerto en Nantón

  • O evento, que conta coa colaboración do Concello de Cabana e a empresa de Xestión Social Máis Porvir, terá lugar o 1 de xuño a partir das 12.00 horas
  • A pre-venda de tickets arrincará o vindeiro día 29 e prolongarase ata o 17 de maio

A asociación Íntegro vén de celebrar na casa do concello de Cabana de Bergantiños a presentación oficial da 2ª edición do FestIgual, diversamente iguais, unha xornada de convivencia lúdico-festiva, organizada pola entidade con sede en Nantón en colaboración coa empresa de economía social Máis Porvir Xestión Social e o consistorio cabanés.

Tras o éxito acadado o ano pasado, Íntegro volve apostar pola procura de espazos de encontro coa cidadanía poñendo o foco de atención na diversidade como valor dunha sociedade que traballa pola plena inclusión e a igualdade de oportunidades para todos e todas.

A música tradicional, a artesanía, os obradoiros e os xogos para a cativada volven ser os protagonistas desta nova edición, á que se suman dúas importantes novidades: unha velada nocturna amenizada polo grupo Versión Imposible e unha gran mexillonada que poderán degustar todos os/as asistentes a esta gran festa interxeracional, que terá lugar o 1 de xuño, a partir das 12.00 horas, en Nantón (Cabana de Bergantiños).

Esta iniciativa, que contará de novo coa participación de artesáns, produtores locais e diversas entidades da contorna, pretende, un ano máis, converterse nunha xuntanza popular “unindo persoas, sen etiquetas nin apelidos, nunha gran festa para celebrar a diversidade e a pluralidade como elementos enriquecedores dunha sociedade”, apuntou o presidente Adolfo López Baña. Por iso, desde a organización convídase a todos os veciños e veciñas da contorna e de fóra a participar nesta xornada, de acceso libre e totalmente de balde, na que tan só hai que ter ganas de compartir, bailar, desfrutar, conversar e troulear para poñer en valor a importancia de vivir nunha comunidade máis participativa, plural, diversa e inclusiva, na que todos e todas somos diferentes e iguais ao mesmo tempo.

Pola súa banda, o alcalde de Cabana, José Muíño, tamén presente no acto, recordou o éxito de participación da pasada edición e expresou o seu desexo de que este ano volva a repetirse e incluso superarse, polo que animou a toda a veciñanza a sumarse a este día de festa e celebración.

Programa

  • Música

12.00h. Pasarrúas a cargo do grupo de música tradicional O Son do Castro

13.30h. Sesión vermú estendida co Trío Karma

16.30h. Discomóbil FABRIK (DJ CHAFU)

21.30h. Concerto Versión Imposible

  • Gastronomía

Ao mediodía, Gran Mexillonada e ración variadas. E pola noite, degustación dos mellores petiscos ao ritmo da música. Venda anticipada de tickets no 981 734 985/ 650 961 649, a través del correo electrónico info@integro.es  e nas propias instalacións. Pre-venda promocional (bebida + ración mexillóns + pan + petisco a elixir + larpeira= 10€) do 29 de abril ao 17 de maio, ambos inclusive.

  • Animación infantil

16.00h-20.00h. Inchables, xogos e pintacaras para a cativada

  • Artesanía

13.00h-20.30h. Postos de artesanía e produtos ecolóxicos. Participarán produtores locais e entidades sociais da Costa da Morte.

  • Medio ambiente

Polo simbólico prezo de 1€ todos os/as asistentes poderán mercar os seus propios envases reutilizables, de uso obrigatorio durante a festa como mostra de compromiso social no coidado do medio ambiente e a sostibilidade do planeta.

post

Xogos de mesa xigantes na II Xornada Lúdica de Íntegro

  •  Trátase dunha nova xornada de convivencia e diversión, apta para todas as idades, que se celebrará no Centro de Recursos de Nantón o sábado 27, de 16.30 a 19.30 horas
  • A pre-venda de entradas arrincará o luns 8 cun prezo reducido de 6€ para os adultos/as e 4€ para os nenos/as. A recadación irá destinada á adquisición de nova maquinaria para o ximnasio

Tras o éxito acadado o pasado outono coa celebración da I Xornada Lúdica, a asociación Íntegro volve apostar pola organización dunha xornada de convivencia e diversión aberta a toda a veciñanza para continuar intercambiando experiencias e gozar dun día de xogos e entretemento sumando valores e estreitando lazos coa comunidade.

Baixo o título Xoguemos ao grande, a entidade que preside Adolfo López Baña, ofrecerá unha nova edición cargada de tradición e innovación ao mesmo tempo. Desta volta, a temática xirará arredor de xogos de mesa populares, pero a tamaño real. O sábado 27, de 16.30 a 19.30 horas, as instalacións do Centro de Recursos de Nantón (Cabana de Bergantiños) converteranse no taboleiro perfecto para botar unha partida ao Parchís, á Oca, ao Tres en Raia, á Jenga ou á diana. “Deste xeito,  ademais de procurar un espazo de encontro e entretemento para todas as idades, poñeremos en valor os xogos de toda a vida e os valores tan importantes que transmiten como o traballo en equipo, a socialización ou a cooperación fronte ao individualismo de boa parte da tecnoloxía actual”, matizou o presidente de Íntegro. Ao longo da tarde, tamén se servirá café, bebidas para os peques da casa e biscoito de balde, elaborado polas persoas usuarias do centro para adozar a xornada aos asistentes.

Pre-venda de entradas

As persoas interesadas en participar poderán adquirir xa as súas entradas na pre-venda, que arrincará o luns 8 e prolongarase ata o venres 19, a través dos teléfonos 981 734 985 e 650 961 649, ou achegándose ata as instalacións de Nantón de luns a venres, e de 09.00 a 17.00 horas. Durante este período, haberá unha promoción especial de 6€ para os adultos/as e 4€ para os cativos/as xunto con dúas participacións por persoa para os sorteos que se realizarán ao rematar as actividades. Finalizado este prazo, o importe será de 7€ e 5€, respectivamente, e unha participación por persoa.

Ao final da xornada, terá lugar o sorteo dunha cea para dúas persoas no restaurante do Hostal Playa de Camariñas, e un agasallo sorpresa que se rifará entre os máis cativos/as. Así mesmo, os gañadores/as de cada partida tamén recibirán un pequeno obsequio elaborado polas persoas usuarias do Centro de Recursos Íntegro.

A recadación final irá destinada integramente á adquisición de nova maquinaria para o ximnasio de Nantón.

Se tes entre 3 e 100 anos ou máis, non deixes pasar a ocasión de gozar dunha xornada de risas aseguradas e ven xogar coa túa familia e amigos/as a Nantón. Agardámoste!

post

A prevención da lesión medular e Diversiplás espertan conciencias no CPI Alcalde Xosé Pichel de Coristanco

No que vai de ano, a entidade de Nantón xa leva ofrecido accións formativas a máis de 100 alumnos e alumnas da Costa da Morte

A campaña de prevención da Lesión Medular de Íntegro continúa o seu percorrido polos centros educativos da Costa da Morte coa finalidade de reducir os índices de discapacidade adquirida entre a mocidade. O CPI Alcalde Xosé Pichel de Coristanco foi o destino elixido para a segunda xornada de sensibilización deste 2024, tras a sesión informativa levada a cabo o pasado mes de xaneiro no CPI As Revoltas, en Cabana de Bergantiños. No que vai de ano, a entidade de Nantón xa leva ofrecido accións formativas a máis de 100 alumnos e alumnas da Costa da Morte.

O pasado xoves 21, a educadora social de Íntegro Tania Bartucca ofreceu unha charla ao alumnado de 4º da ESO para concienciar a un dos principais grupos de risco sobre a necesidade de evitar graves lesións de consecuencias irreparables. Accidentes domésticos, caídas, mergullos en zonas perigosas e unha condución arriscada son algunhas das principais causas, especialmente entre a poboación máis nova. O presidente de Íntegro, Adolfo López Baña, tamén participou nesta actividade poñendo o foco na importancia da prevención como única medida efectiva para diminuír a sinistralidade entre a mocidade. A xornada completouse coa proxección do vídeo “A ti tamén che pode pasar” e un breve coloquio que os alumnos/as aproveitaron para despexar dúbidas e coñecer o día a día dunha persoa con lesión medular, así como as barreiras físicas e sociais ás que debe facer fronte.

Os centros educativos que estean interesados en adherirse a esta campaña, que constitúe unha das principais accións do programa Capacíta-T, ou a calquera dos programas de sensibilización postos en marcha pola entidade, poden poñerse en contacto co centro a través do enderezo electrónico formacion@integro.es ou nos teléfonos 981 734 985 e 650 961 649.

Diversiplás

Por outra banda, máis de 50 alumnos de 5º e 6º de primaria do CPI Xosé Pichel de Coristanco participaron nunha xornada de sensibilización en materia de recuperación e valorización de residuos plásticos, enmarcada no programa Capacíta-T. Logo de dar a coñecer aos escolares a nosa entidade e o proxecto medioambiental Diversiplás, explicámoslles conceptos relacionados coa reciclaxe e os diferentes tipos de plásticos, facendo especial fincapé na importancia de darlle unha segunda vida ás cousas desde a infancia.

Dentro da campaña que estamos levando a cabo este ano nos colexios da Costa da Morte coa intención de implicar á comunidade educativa na recolecta de residuos, ao centro coristanqués asignóuselle a recollida de tapóns de cor lila, rosa e morado que se destinará á fabricación de novos produtos. Agora só queda esperar á recolecta da nova materia prima e dar as grazas por tanta colaboración e interese.

Desde Íntegro queremos agradecer a implicación de toda a comunidade educativa na difusión das campañas de sensibilización que temos en marcha co obxectivo de crear conciencia entre os máis novos/as apostando por unha educación en valores, máis responsable e inclusiva.