Arquivos do Autor: Asociación Íntegro

post

Íntegro impulsa a segunda edición do proxecto de voluntariado interxeracional “Saberes e Sabores”

Publicado en por

A iniciativa, financiada maioritariamente pola Consellería de Cultura, Lingua e Xuventude da Xunta de Galicia cunha subvención de 18.000 euros, abrangue do 1 de xaneiro ao 15 de maio

A asociación Íntegro vén de poñer en marcha a segunda edición do proxecto de voluntariado interxeracional “Saberes e Sabores”, unha iniciativa comunitaria que busca fomentar a convivencia, a colaboración e a aprendizaxe mutua entre persoas de diferentes xeracións arredor da cociña, da terra e do coidado interxeracional.

O proxecto, que se desenvolverá entre o 1 de xaneiro e o 15 de maio, está financiado pola Consellería de Cultura, Lingua e Xuventude da Xunta de Galicia, cunha achega de 18.000 euros, e dá continuidade a unha experiencia piloto que obtivo unha valoración moi positiva pola súa capacidade de xerar impacto social e vínculos humanos. Ao igual que o ano pasado, esta iniciativa está vinculada ao proxecto Talento Interxeracional da Xunta de Galicia no marco do Plan de Recuperación, Transformación e Resilencia, cofinanciado pola Unión Europea, a través dos fondos NextGenerationEU.

“Saberes e Sabores” promove a participación activa de persoas mozas, persoas maiores e persoas con discapacidade, creando espazos de encontro nos que se comparten coñecementos tradicionais, habilidades prácticas e ferramentas dixitais, ao tempo que se reforza a autonomía persoal, a inclusión social e as redes de apoio solidario.

Tres liñas de acción

Nesta segunda edición, o proxecto estrutúrase arredor de tres actividades principais, que conforman un ciclo completo de cultivo, cociña e coidado comunitario.

  • Medrando Xuntos na Terra: Agricultura Ecolóxica e Tradicional con Tecnoloxía

Esta actividade céntrase na transmisión de saberes vinculados á agricultura ecolóxica e tradicional mediante o traballo práctico nun invernadoiro. As persoas maiores de 55 anos achegarán a súa experiencia en técnicas de cultivo sostible, mentres que as persoas mozas, menores de 35, introducirán o uso da tecnoloxía, ensinando a gravar e documentar os procesos a través do teléfono móbil e a difundilos en redes sociais.

A iniciativa promove a sustentabilidade, a economía circular e o intercambio interxeracional, ao tempo que contribúe á alfabetización dixital das persoas maiores e á difusión de boas prácticas agrícolas.

  • Sabores que Acompañan: Sabores Tradicionais e Tecnoloxía Compartida

Durante 35 días, as parellas interxeracionais compartirán coñecementos culinarios na cociña. As persoas maiores ensinarán receitas tradicionais e adaptadas a unha alimentación saudable, tendo en conta patoloxías frecuentes como diabetes, colesterol ou hipertensión.

Pola súa banda, as persoas mozas acompañarán ás maiores no uso da tecnoloxía para gravar os procesos, documentar receitas e crear un receitario dixital. A actividade combina práctica culinaria con formación en nutrición, promovendo hábitos saudables e o respecto polo patrimonio gastronómico.

  • Tecendo Redes de Coidado: Solidariedade Interxeracional e Alimentación con Apego

A terceira liña do proxecto céntrase no reparto dos alimentos cultivados e elaborados a persoas maiores da contorna en situación de vulnerabilidade, con baixos recursos ou necesidades de apoio. As parellas encárganse da entrega presencial, promovendo non só unha alimentación saudable, senón tamén o acompañamento emocional e a creación de vínculos sociais.

O equipo do invernadoiro destinará dúas horas diarias á entrega de produtos frescos a persoas maiores, mentres que o equipo de cociña fará o propio cos pratos preparados. Esta acción pecha o ciclo de cultivo-cociña-coidado comunitario, consolidando unha rede local baseada na solidariedade, o respecto e a reciprocidade.

Con esta segunda edición de “Saberes e Sabores”, a asociación Íntegro reafirma o seu compromiso coa innovación social, o envellecemento activo, a participación xuvenil e a atención ás persoas máis vulnerables, apostando por proxectos que poñen no centro ás persoas e fortalecen o tecido comunitario desde o local.

post

Íntegro e Fundación “la Caixa” promoven a inclusión a través da creatividade e da tecnoloxía

Publicado en por

A achega, realizada a través da Acción Social da Oficina de CaixaBank de Baio, está dotada con 5.000 €

A asociación Íntegro e a Fundación “la Caixa”, a través da Acción Social da Oficina de CaixaBank de Baio, veñen de asinar un convenio de colaboración para a posta en marcha do proxecto “Promovendo a inclusión a través da creatividade e da tecnoloxía”, unha iniciativa destinada a mellorar a calidade de vida das persoas con discapacidade intelectual do rural da Costa da Morte. A axuda, cun importe total de 5.000 euros, foi canalizada pola Oficina de CaixaBank en Baio, dirixida por María Martínez Vidal, cuxo compromiso co territorio resulta fundamental para a materialización de accións sociais de impacto.

O proxecto está orientado ás persoas usuarias do Centro Ocupacional da asociación Íntegro, que presentan distintos niveis de autonomía e capacidades. As actividades serán deseñadas e adaptadas de maneira individualizada, garantindo a participación activa e un aprendizaxe significativo para cada participante.

A iniciativa pretende favorecer a adquisición de habilidades técnicas, creativas e laborais mediante talleres centrados en tecnoloxías e procesos de produción personalizada, tales como sublimación en diferentes soportes, personalización con vinilos, gravado en madeira e metacrilato, e impresión 3D. Estes contidos permitirán abrir novos camiños cara á autonomía persoal e a inclusión social, á vez que fomentan o desenvolvemento de competencias profesionais no ámbito creativo e tecnolóxico.

Entre os obxectivos principais do programa destacan o fomento da autonomía persoal e o desenvolvemento de competencias laborais en persoas con discapacidade intelectual; promover o aprendizaxe de ferramentas tecnolóxicas vinculadas a habilidades prácticas e creativas., potenciar a autoestima, a visibilidade social e a integración comunitaria, crear produtos con valor comercial que incrementen a motivación e o sentido de logro, e estimular a creatividade, a responsabilidade e o traballo en equipo.

Dende Íntegro destacan que esta colaboración supón “un impulso esencial para continuar promovendo espazos de formación, innovación e inclusión no rural”, agradecendo expresamente o apoio da Fundación “la Caixa” e o compromiso da oficina de CaixaBank de Baio.

Co desenvolvemento deste proxecto, Íntegro reforza o seu labor no territorio e continúa avanzando nun modelo de inclusión real, baseado en oportunidades, participación e igualdade.

post

Aprendizaxe, compromiso e colaboración a través dos programas de voluntariado de Íntegro

Publicado en por

A asociación Íntegro vén de facer balance dun ano especialmente activo e enriquecedor no eido do voluntariado social e ambiental, grazas ao desenvolvemento de tres programas complementarios que puxeron o foco na inclusión, o medio ambiente e a cooperación interxeracional: o proxecto piloto “Da horta á cociña”, o programa xuvenil Reacciona e as accións de voluntariado coa diversidade Recicla-T. 

Da horta á cociña: talento e aprendizaxe interxeracional no rural

Durante todo o ano, Íntegro desenvolveu o proxecto “Da horta á cociña”, unha iniciativa pioneira no ámbito rural galego que forma parte do proxecto piloto Talento Interxeracional da Xunta de Galicia, no marco do Plan de Recuperación, Transformación e Resiliencia, cofinanciado pola Unión Europea a través dos fondos NextGenerationEU.

O programa, posto en marcha entre febreiro e outubro, apostou por unir xeracións a través da agricultura, a cociña e a artesanía, implicando a persoas maiores de 55 anos e mozos e mozas menores de 35. O obxectivo foi fomentar a aprendizaxe mutua, reducir o illamento social e ofrecer novas oportunidades de futuro á mocidade do rural, especialmente na Costa da Morte.

O proxecto estruturouse arredor de tres eixos principais:

  • Cultivando Sabedoría, centrado na transmisión de técnicas agrícolas tradicionais e ecolóxicas combinadas co uso das novas tecnoloxías.
  • Cociñando Xuntos, dedicado á recuperación de receitas tradicionais e á creación dun receitario dixital.
  • Tecendo Conexións, enfocado na preservación de técnicas artesanais de tecido e teares.

O presidente de Íntegro, Adolfo López Baña, destacou que esta experiencia “debe ser un sementeiro de ideas e relacións que fortalezan o rural, demostrando que as xeracións teñen moito que achegarse mutuamente”.

Reacciona: xuventude, reciclaxe e inclusión

Tamén ao longo de 2025, Íntegro desenvolveu o programa Reacciona, unha iniciativa de educación ambiental e inclusión social posta en marcha coa colaboración da Consellería de Cultura, Lingua e Xuventude, dirixida a mozos e mozas de entre 16 e 35 anos.

O obxectivo principal foi concienciar sobre a importancia da reciclaxe dos materiais plásticos, promovendo ao mesmo tempo a participación activa de persoas con discapacidade en accións de alto valor social e educativo.

As actividades —realizadas entre xullo e setembro— incluíron visitas didácticas, obradoiros formativos e encontros con proxectos e profesionais da economía circular, como SOGAMA, Aula do Freixo, Aquarium Finisterrae, Aspaneps (proxecto Ártabro Inclusivo), Netcycle, Antonia Studio. Ademais, impartiuse unha charla titulada “SOS Planeta Terra” e un obradoiro Diversiplás, centrado na transformación de plásticos reciclados en novos obxectos.

Voluntariado xuvenil Reciclat: compromiso coa diversidade e o medio ambiente

Paralelamente, a entidade continuou impulsando o seu programa de voluntariado xuvenil coa diversidade “Recicla-T”, no que participaron arredor de 12 persoas voluntarias menores de 30 anos. Estas colaboraron en accións de coidado do medio ambiente, reciclaxe de plásticos e apoio a persoas con discapacidade, principalmente durante os meses de verán.

O obxectivo de Íntegro é consolidar un equipo de voluntariado estable e formado, que participe de forma regular nas actividades da entidade e sirva tamén como espazo de aprendizaxe e sensibilización para a mocidade da Costa da Morte. Ademais, o programa permitiu identificar perfís novos que poderían incorporarse no futuro ao equipo profesional do Centro de Recursos Íntegro.

As accións levadas a cabo contaron ademais co apoio e o financiamento da Consellería de Cultura, Lingua e Xuventude da Xunta de Galicia.

Con estes programas, Íntegro reafirma o seu compromiso co territorio, coa xuventude e coas persoas con discapacidade, apostando por proxectos transformadores que combinan innovación social, sostibilidade e cooperación.

Desde a entidade queremos agradecer o alto grao de participación, implicación e aprendizaxe colectiva acadado ao longo de 2025, consolidando unha rede de colaboración entre entidades, institucións e persoas voluntarias que seguirá medrando nos próximos anos.

post

Íntegro e Máis Porvir organizan unha xornada formativa arredor da sexualidade e a diversidade funcional sen tabús

Publicado en por

A iniciativa, que terá lugar o día 29 no Fórum Carballo, conta co apoio institucional do Concello de Carballo, a Deputación da Coruña e a Xunta de Galicia

A asociación Íntegro, en colaboración con Máis Porvir Xestión Social, organiza por primeira vez a xornada “Sexualidade sen barreiras”, un encontro formativo e divulgativo que se celebrará o sábado 29 de novembro no Fórum Carballo. A actividade, de carácter presencial e dirixida a profesionais, familias, persoas con diversidade funcional e público xeral, pretende ofrecer un espazo seguro para abordar a educación afectivo-sexual, o pracer, o consentimento e os dereitos sexuais desde unha perspectiva inclusiva e respectuosa.

A xornada conta co apoio institucional do Concello de Carballo, a Xunta de Galicia e a Deputación da Coruña, e representa a primeira convocatoria específica deste tipo promovida pola nosa entidade, coa intención de visibilizar necesidades, compartir boas prácticas e fomentar o debate informado no eido da sexualidade e a diversidade funcional.

Con esta iniciativa, que combina faladoiros e espazos de debate para favorecer a participación activa e o intercambio de coñecementos, non só se pretende normalizar a conversa sobre sexualidade entre persoas con diversidade funcional, profesionais e familias, senón ofrecer tamén ferramentas prácticas para o acompañamento afectivo e sexual, e promover espazos seguros e técnicas de intervención centradas na autonomía, o respecto e o consentimento.

Desde a organización subliñan que tratar a sexualidade como parte integrante do benestar é un paso necesario para garantir o pleno exercicio dos dereitos das persoas con diversidade funcional e avanzar nun modelo social máis inclusivo.

Programa ao completo

9:30–9:45 h — Recepción das persoas inscritas

9:45–10:00 h — Acto inaugural

10:00–10:45 h — Sexo, saúde e pracer: realidades que importan

Poñente: Paula Pombar Pérez

Unha reflexión sobre a importancia de abordar o pracer e a saúde sexual desde a perspectiva das persoas con diversidade funcional, subliñando a necesidade da educación afectivo-sexual e do acceso a recursos especializados.

10:45–11:30 h — Espazos seguros para falar de sexualidade (asoc. Íntegro)
Obradoiro e sesión práctica centrados en impulsar dinámicas, metodoloxías e recursos que permitan crear contextos de confianza, comunicación e acompañamento para falar de sexualidade.

11:30–12:00 h — Pausa para o café

12:00–12:45 h — Sexualidade e grandes apoios: dereito a sentir, dereito a vivir

Poñente: Sofía Torres Fernández

Análise das necesidades e dos dereitos das persoas que precisan grandes apoios, abordando como acompañar desde a empatía, a protección dos dereitos e a promoción da autonomía emocional e sexual.

12:45–13:30 h — Educación sexual nas entidades. Programa FADAS, un exemplo de boas prácticas

Poñente: Verónica Ramilo Graña

Presentación do Programa FADAS e das súas liñas de traballo como referente para a implementación de programas de educación sexual en entidades sociais.

13:30–13:50 h — Debate aberto (quenda de preguntas e intervencións)

13:50–14:00 h — Acto de clausura

Debido ao aforo limitado do auditorio, é recomendable inscribirse previamente cubrindo o seguinte formulario: https://forms.gle/vXuurC8YaeGV6YaS7.

O prazo rematará o 24 de novembro ou ao completar as prazas dispoñibles. O prezo da entrada (5€ público xeral e 2€ socios/as), deberá ser aboado mediante tranferencia bancaria ou Bizum no momento da inscrición. Ao remate da xornada entregarase un certificado de asistencia ás persoas participantes.

Máis información na web e nas redes sociais de Íntegro e Máis Porvir.

 

post

Deporte, convivencia e inclusión protagonizan os Xogos Inclusivos de Íntegro

Publicado en por

Na xornada participaron cinco entidades sociais e o alumnado do CPI As Revoltas de Cabana

A asociación Íntegro vén de celebrar unha nova edición dos Xogos Inclusivos Íntegro, unha actividade que se converteu nunha auténtica festa do deporte, a convivencia e a amizade.

Na xornada celebrada o pasado venres participaron cinco entidades sociais —Íntegro, Avante, Amarai, Misela e Adibismur— xunto co CPI As Revoltas de Cabana de Bergantiños, cuxo alumnado formou parte dos equipos para favorecer a inclusión e o traballo en equipo. Cada equipo estivo composto por cinco persoas usuarias e un neno ou nena, competindo en distintos xogos que combinaron diversión, creatividade e cooperación.

Ao longo da mañá desenvolvéronse varias probas: o Xogo do Paquete, o Xogo da Rá, o Xogo das Bolas, o Xogo do Tangram e, como broche final, unha gran Oca xigante na que reinou o entusiasmo e o espírito deportivo.

O pavillón estivo dividido en dúas zonas, permitindo celebrar dous xogos simultáneos, e contou cun ambiente festivo amenizado con música, aplausos e moitas risas. A xornada concluíu coa entrega de trofeos aos tres mellores equipos de cada xogo, recoñecendo o esforzo, a cooperación e a ilusión de todas as persoas participantes.

Desde a asociación Íntegro, queremos agradecer a todas as entidades participantes polo seu entusiasmo e implicación, e por facer deste día unha auténtica xornada de convivencia, valores e diversión, demostrando que o deporte é unha poderosa ferramenta para fomentar a igualdade, a inclusión e a amizade. Vémonos o ano que vén!

 

post

Íntegro e Máis Porvir organizan en Corme o Campionato Estatal de Balonmán en Cadeira de Rodas

Publicado en por

O deporte inclusivo volve ser protagonista na Costa da Morte coa celebración do Campionato Estatal de Balonmán en Cadeira de Rodas, unha cita deportiva que se celebrará o sábado 25 no pavillón polideportivo de Corme (Rúa do Cubeiro, Corme – Ponteceso).

O evento, organizado pola asociación Íntegro e a entidade Máis Porvir Xestión Social S.L., contará coa participación dos equipos ICB Coruña e Inclusport, que se enfrontarán en dúas apaixonantes sesións. A primeira, ás 18.00 horas, será para disputar o partido oficial da copa e, unha hora despois (ás 19.00h) terá lugar un encontro amigable.

A cita, promovida pola Federación Galega de Balonmán, A Federación Española de Balonmán e o Concello de Ponteceso, conta coa colaboración de Deporte Galego, Xunta de Galicia, Deputación da Coruña e varias empresas da contorna. Con eventos deste tipo, preténdese fomentar e dar visibilidade á práctica deportiva inclusiva, promovendo valores como a igualdade, o esforzo e o traballo en equipo.

A entrada é totalmente gratuíta, polo que se convida a toda a veciñanza a achegarse para apoiar aos deportistas e gozar dun espectáculo cheo de emoción, compañeirismo e superación.

post

Xornada de portas abertas do proxecto de voluntariado interxeracional “Da horta á cociña”

Publicado en por

A actividade, de balde e aberta á participación de toda a veciñanza, celebrarase o venres 17 de 11 a 13 horas en Nantón (Cabana de Bergantiños)

O Centro de Recursos Íntegro acollerá o venres 17 unha xornada de portas abertas do proxecto “Da horta á cociña”, unha iniciativa vinculada ao proxecto piloto Talento Interxeracional da Xunta de Galicia no marco do Plan de Recuperación, Transformación e Resilencia, cofinanciado pola Unión Europea, a través dos fondos NextGenerationEU, que aposta pola colaboración entre persoas maiores de 55 anos e mozos e mozas menores de 35, co obxectivo de fomentar a aprendizaxe mutua, reducir o illamento social e ofrecer novas oportunidades de futuro á mocidade do rural.

O vindeiro venres, das 11 ás 13 horas, a sede de Íntegro en Nantón (Cabana de Bergantiños) converterase nun espazo de encontro entre persoas de diferentes idades, fomentando a participación comunitaria, a transmisión de saberes tradicionais e o intercambio de experiencias vitais, combinando actividades de horticultura, cociña e artesanía, co obxectivo de favorecer o envellecemento activo, a inclusión social e a solidariedade entre xeracións. Neste sentido, o presidente de Íntegro Adolfo López Baña destacou que “Da horta á cociña é moito máis que un proxecto; é unha forma de crear comunidade, aprender uns dos outros e construír un futuro máis sostible e inclusivo”.

Durante a xornada de portas abertas, coa que se clausurará esta primeira edición do programa posto en marcha o pasado mes de febreiro, as persoas asistentes poderán participar, previa inscrición, en tres obradoiros prácticos:

  • Obradoiro de sementeiros, onde se aprenderán técnicas básicas de plantación e cultivo sostible.
  • Obradoiro de cociña, centrado no aproveitamento dos produtos da horta e na alimentación saudable.
  • Obradoiro de tecidos (calceta), como espazo de convivencia, creatividade e aprendizaxe compartida.

 

As persoas interesadas en participar nesta actividade, aberta á participación de toda a veciñanza e totalmente de balde, deben reservar praza chamando aos teléfonos 981 734 985/650 961 649.

post

Íntegro presenta á Xunta o seu proxecto de educación ambiental Sementes de futuro

Publicado en por

A Consellería de Medio Ambiente e Cambio Climático anunciou que estudará as vías de colaboración para impulsar esta iniciativa de reforestación e sensibilización escolar

A asociación Íntegro mantivo recentemente unha reunión coa conselleira de Medio Ambiente e Cambio Climático, Ángeles Vázquez, para presentar o seu novo proxecto de educación ambiental “Sementes de futuro”. O encontro contou tamén coa presenza do alcalde de Cabana de Bergantiños, José Muíño, e outros representantes da entidade.

Durante a reunión, o presidente de Íntegro, Adolfo López Baña, explicou os obxectivos principais desta proposta, que nace cunha dobre vocación formativa e medioambiental. O proxecto pretende recuperar zonas degradadas mediante a reforestación con especies autóctonas galegas, ao tempo que busca concienciar á comunidade escolar e á poboación en xeral sobre a importancia da biodiversidade e dos bosques autóctonos.

Entrega dun obsequio elaborado no taller Diversiplás con plástico reciclado

A través de Sementes de futuro, Íntegro aposta por implicar a diferentes xeracións e colectivos sociais nun proceso participativo que combine educación ambiental, inclusión e acción comunitaria, favorecendo así a aprendizaxe compartida e o respecto polo medio natural.

Desde a entidade, valórase moi positivamente a boa acollida da proposta por parte da Consellería, que se comprometeu a analizar posibles vías de colaboración para facer realidade este proxecto, co obxectivo de que poida contar con apoio institucional e financiamento público. “Para Íntegro, é unha gran satisfacción comprobar que a Xunta comparte a nosa preocupación pola protección do medio ambiente e a educación en valores sostibles. Agardamos que esta colaboración poida materializarse nun proxecto conxunto que beneficie á mocidade, ás persoas con diversidade funcional e ao noso territorio”, sinalou Adolfo López Baña, presidente da entidade.

Con iniciativas como Sementes de futuro, Íntegro continúa ampliando o seu compromiso coa sustentabilidade, a inclusión e a mellora da calidade de vida na Costa da Morte, unindo esforzos entre administracións, comunidade educativa e sociedade civil para crear un futuro máis verde e solidario.

post

30 setembro: Día da accesibilidade universal

Publicado en por

Manifesto

Hoxe celebramos o Día da Accesibilidade Universal, unha data que non é só símbolo, senón compromiso. Porque falar de accesibilidade é falar de dereitos, de dignidade e de igualdade real. É falar da sociedade que queremos ser: unha sociedade inclusiva, xusta e aberta, na que todas as persoas poidan participar e vivir en plenitude.

Desde Íntegro sabemos que a accesibilidade non é un luxo, nin unha concesión. É un dereito fundamental que constrúe pontes onde antes había barreiras. É a posibilidade de abrir portas, de garantir que ninguén quede atrás nin quede fóra.

Non se trata unicamente de rampas, de sinais ou de tecnoloxías. Trátase de actitudes, de vontade política, de empatía colectiva. Trátase de recoñecer que a diversidade é a nosa forza, e que só respectándoa e acolléndoa seremos unha sociedade máis humana.

Por iso, hoxe reclamamos espazos públicos e privados sen obstáculos, comunicación accesible para todas as persoas, educación inclusiva que abrace as diferenzas e unha economía e un emprego que dean oportunidades reais.

Soñamos cun país no que a palabra “accesibilidade” non faga falta, porque todo será naturalmente accesible. Ese é o horizonte que perseguimos, e cara a el avanzamos cada día.

Que este Día da Accesibilidade Universal sexa un recordatorio de que xuntas e xuntos podemos facer posible o imposible. Porque cando eliminamos barreiras, abrimos camiños. E cando abrimos camiños, avanzamos como pobo.

Accesibilidade é liberdade. Accesibilidade é igualdade. Accesibilidade é futuro.

Moitas grazas.

Adolfo López Baña. Presidente asoc. Íntegro

Consideracións xerais.-

A accesibilidade universal é o principio segundo o cal todas as contornas, produtos, bens e servizos deben poder ser utilizados e gozados por todas as persoas, independentemente da súa idade, xénero, condición ou grao de discapacidade. Noutras palabras: significa que calquera persoa debe poder acceder, comprender e participar en igualdade de condicións na vida social, cultural, educativa, laboral e comunitaria.

As súas características principais:

  1. Integral: aplícase a todos os ámbitos (arquitectura, transporte, comunicación, educación, lecer, tecnoloxía…).
  2. Universal: non está pensada só para persoas con discapacidade, senón para toda a sociedade.
  3. Deseño para todas as persoas: busca crear espazos e servizos desde o inicio pensando na diversidade de usuarios, evitando ter que facer adaptacións posteriores.
  4. Independencia e autonomía: permite que as persoas poidan moverse, informarse e decidir por si mesmas sen depender de apoios externos innecesarios.

A día de hoxe, en España, aínda que existe unha normativa clara sobre accesibilidade universal (Lei Xeral de Discapacidade, Código Técnico da Edificación, normativas autonómicas e municipais), nas contornas rurais o seu cumprimento adoita ser máis limitado e irregular que nas cidades.

Agarrámonos á Convención da ONU para falar sobre os Dereitos das Persoas con Discapacidade (CDPD, 2006) —ratificada por España en 2008— que dedica varios artigos á accesibilidade universal, e é un piar fundamental de todo o tratado.

Recordemos que a convención está por riba de calquera lei ou tratado.

Puntos clave que di a Convención:

1.- Artigo 3: Principios xerais. A accesibilidade é un dos principios básicos da Convención. Vinculase coa igualdade de oportunidades e a participación plena das persoas con discapacidade na sociedade.

2.- Artigo 9: Accesibilidade. Os Estados parte deben adoptar medidas adecuadas para:                                                                                                                        – Garantir o acceso das persoas con discapacidade, en igualdade de condicións coas demais, á contorna física, ao transporte, á información e comunicacións, e a outros servizos e instalacións abertas ao público ou de uso público, tanto en zonas urbanas como rurais.                                                   – Eliminar obstáculos e barreiras á accesibilidade. Reclamar a accesibilidade non e ir contra ninguén se non ir a favor de todas as persoas.

Desenvolver normas mínimas e directrices sobre accesibilidade.

1.- Asegurar que os edificios, estradas, transporte, escolas, vivendas, instalacións médicas e lugares de traballo sexan accesibles.

2.- Promover a accesibilidade en servizos de información, comunicación e medios electrónicos.

3.- Ofrecer formación a todas as persoas implicadas (arquitectos, urbanistas, persoal de transporte etc.)/ etc.).

4.- Artigo 19 (Vida independente e en comunidade) e Artigo 20 (mobilidade persoal).

5.- Todo isto reforza que a accesibilidade é esencial para que as persoas con discapacidade poidan elixir onde e con quen vivir, e para desprazarse con autonomía.

6.- Artigo 30 (Participación na vida cultural, recreativa e deportiva).

7.- Esixe que os lugares culturais, recreativos e deportivos sexan accesibles para garantir o goce en igualdade de condicións.

33 anos despois en Integro seguimos reclamando que se cumpra coa accesibilidade universal. Avanzamos! E debemos seguir avanzando.

post

Íntegro inicia unha campaña de limpeza de praias na Costa da Morte da man de Diversiplás

Publicado en por
  • A primeira terá lugar este sábado 13, ás 13.30 horas, na praia cabanesa do Pendón. As persoas interesadas en participar poden inscribirse chamando ao 981 734 985
  • Trátase dun proxecto da asociación Íntegro que conta co apoio do Galp Costa da Morte, a Consellería do Mar e a FEMPA (UE)

A asociación Íntegro, a través do proxecto Diversiplás, pon en marcha unha nova campaña de sensibilización ambiental centrada na limpeza de praias e espazos naturais pola Costa da Morte. Do 13 de setembro ao 2 de outubro, realizaranse diversas actuacións en diferentes areais e zonas verdes do noso litoral co obxectivo de reducir o impacto dos plásticos mariños, darlles unha segunda vida e, ao mesmo tempo, concienciar sobre o coidado do medio ambiente.

Ademais de retirar residuos, as limpezas buscan concienciar á cidadanía sobre a importancia de coidar o mar e o litoral, lembrando que unha parte importante dos plásticos que chegan ao océano proceden da actividade pesqueira e marisqueira. Desde Diversiplás, estes materiais recóllense, transfórmanse e convértense en novos produtos, reducindo a contaminación e xerando novas oportunidades para persoas con diversidade funcional.

Esta nova acción está dirixida a todas as persoas preocupadas polo coidado da nosa contorna.  Para participar, abonda con inscribirse chamando ao 981 734 985 ou ao 650 961 649.

Calendario de limpezas

  • Sábado 13 de setembro, 13:30 h – Praia do Pendón (Cabana de Bergantiños)
  • Mércores 17 de setembro, 11:00 h – Praia de Muxía
  • Martes 23 de setembro, 10:30 h – Praia por confirmar no Concello de Carballo. Acción desenvolvida en colaboración coa Cruz Vermella Carballo
  • Xoves 2 de outubro, 11:00 h – Praia e zonas verdes de Ariño (Camariñas)

Esta iniciativa conta co apoio do GALP Costa da Morte, da Consellería do Mar e do FEMPA (Fondo Europeo Marítimo, da Pesca e da Acuicultura da Unión Europea), entidades que fan posible levar a cabo este proxecto de economía circular e sensibilización ambiental.