Category Archives: Formación

post

Asinado un convenio coa Fundación “la Caixa” para impulsar un novo espazo de estimulación multisensorial

Publicado en por

A entidade e a oficina de CaixaBank en Baio asinan un convenio de 5.000 euros para desenvolver o proxecto “Do Residuo ao Benestar”

A asociación Íntegro e a Fundación “la Caixa”, a través da acción social da oficina de CaixaBank en Baio, dirixida por María Martínez, veñen de asinar un convenio de colaboración que permitirá poñer en marcha o proxecto “Do Residuo ao Benestar”, unha iniciativa destinada a mellorar a calidade de vida das persoas con discapacidade intelectual e grandes necesidades de apoio do rural da Costa da Morte.

O acordo, dotado cunha achega de 5.000 euros, fará posible a creación dunha aula de estimulación multisensorial no Centro de Día de Íntegro, un recurso pensado para ofrecer terapias especializadas ás persoas usuarias con maiores necesidades de apoio. A través de diferentes estímulos sensoriais, este espazo contribuirá a favorecer o seu benestar emocional, a comunicación, a estimulación cognitiva e a relaxación, adaptando cada intervención ás capacidades e intereses de cada persoa.

O proxecto inclúe tamén unha segunda liña de actuación no Centro Ocupacional, onde as persoas usuarias participarán na elaboración de materiais destinados ás propias terapias mediante o uso das novas tecnoloxías. Deste xeito, foméntase a adquisición de competencias dixitais, a creatividade e a participación activa nun proceso que ten un impacto directo no seu propio benestar e no dos seus compañeiros e compañeiras.

Todas as actividades desenvolveranse desde unha metodoloxía centrada na persoa, con propostas individualizadas que garantan unha participación real e unha aprendizaxe significativa, respectando os ritmos, capacidades e preferencias de cada participante.

Desde Íntegro agradecen o apoio da Fundación “la Caixa”, que permitirá incorporar novos recursos terapéuticos e continuar avanzando na mellora da atención ás persoas con discapacidade intelectual do medio rural. A entidade destaca que colaboracións coma esta resultan fundamentais para impulsar proxectos innovadores que promovan a inclusión, a autonomía persoal e a igualdade de oportunidades.

Con este convenio, a Fundación “la Caixa”, a través da acción social de CaixaBank, reforza o seu compromiso co desenvolvemento de iniciativas sociais de proximidade que contribúan a mellorar a calidade de vida das persoas en situación de vulnerabilidade e a fortalecer o tecido asociativo do territorio.

post

Formación para impulsar o voluntariado inclusivo e a sustentabilidade entre a mocidade da Costa da Morte

Publicado en por

A iniciativa, financiada a través de Iniciativa Xove, inclúe accións sobre diversidade funcional, igualdade, medio ambiente, economía circular e eco-deseño

A asociación Íntegro vén de poñer en marcha un amplo programa de formación dirixido á mocidade, que se desenvolverá ao longo dos vindeiros meses co obxectivo de fomentar a participación social, o voluntariado inclusivo e a sensibilización ambiental. A iniciativa, impulsada ao abeiro do programa Iniciativa Xove da Consellería de Cultura, Lingua e Xuventude da Xunta de Galicia, permitirá ás persoas participantes adquirir coñecementos e competencias relacionadas coa inclusión social, a igualdade de oportunidades e a protección do medio ambiente.

O programa arrincou este mes de xuño co Curso de voluntariado e diversidade funcional, unha acción destinada a ofrecer unha aproximación á realidade das persoas con discapacidade desde unha perspectiva baseada nos dereitos, a accesibilidade e a inclusión. As persoas participantes poderán coñecer os diferentes tipos de discapacidade, comprender a evolución dos modelos de atención e adquirir ferramentas para establecer relacións respectuosas, empáticas e inclusivas.

Tamén durante este mes celebrarase a Formación básica en Medio Ambiente, que abordará cuestións relacionadas coa contaminación, a correcta xestión dos residuos, a reciclaxe, o consumo responsable e a conservación dos recursos naturais. A finalidade é reforzar o compromiso ambiental da mocidade e promover hábitos sostibles que contribúan á protección da contorna.

Xa no mes de xullo desenvolverase a acción formativa Empoderamento e inclusión: a igualdade de oportunidades no voluntariado, centrada na análise das desigualdades de xénero e na realidade específica das mulleres con discapacidade. A formación permitirá reflexionar sobre os estereotipos e barreiras existentes, así como promover prácticas máis inclusivas e equitativas tanto no ámbito do voluntariado como na sociedade en xeral.

O calendario continuará en agosto con Voluntariado inclusivo: comunicación e trato adecuado, un curso orientado a mellorar as habilidades sociais e comunicativas das persoas voluntarias, favorecendo unha interacción baseada no respecto, a empatía e a eliminación de prexuízos asociados á discapacidade.

Economía circular e innovación social

Un dos aspectos máis innovadores do programa está relacionado coa sustentabilidade e a re-utilización de materiais. A través da formación Plásticos que cobran vida: do residuo á re-utilización, as persoas participantes aprenderán a identificar, clasificar e transformar distintos tipos de plástico mediante o uso de maquinaria específica como trituradoras, inxectoras e extrusoras.

Esta actividade enmárcase dentro de Diversiplás, un proxecto impulsado por Íntegro que combina inclusión social, innovación e economía circular mediante a transformación de residuos plásticos en novos produtos de utilidade.

Complementando esta iniciativa, durante o mes de setembro impartirase a formación Introdución ao eco-deseño con plástico reciclado, na que as persoas participantes se achegarán aos principios do eco-deseño e desenvolverán propostas creativas para a elaboración de produtos sostibles a partir de materiais reciclados.

Un voluntariado comprometido coa inclusión e o medio ambiente

Con este programa, Íntegro pretende fortalecer a participación da mocidade na vida comunitaria e crear unha rede de persoas voluntarias sensibilizadas coa diversidade, a igualdade de oportunidades e a protección ambiental. Neste senso, o presidente da entidade Adolfo López Baña asegurou que “debemos ofrecer á mocidade ferramentas para implicarse activamente na transformación social e ambiental da súa contorna, promovendo valores como a inclusión, a igualdade e a sustentabilidade”.

As persoas interesadas en participar poden inscribirse e/ou solicitar máis información a través dos teléfonos 981 734 985-650 961 649 ou no mail formacion@integro.es.

post

Íntegro e Máis Porvir organizan unha xornada formativa arredor da sexualidade e a diversidade funcional sen tabús

Publicado en por

A iniciativa, que terá lugar o día 29 no Fórum Carballo, conta co apoio institucional do Concello de Carballo, a Deputación da Coruña e a Xunta de Galicia

A asociación Íntegro, en colaboración con Máis Porvir Xestión Social, organiza por primeira vez a xornada “Sexualidade sen barreiras”, un encontro formativo e divulgativo que se celebrará o sábado 29 de novembro no Fórum Carballo. A actividade, de carácter presencial e dirixida a profesionais, familias, persoas con diversidade funcional e público xeral, pretende ofrecer un espazo seguro para abordar a educación afectivo-sexual, o pracer, o consentimento e os dereitos sexuais desde unha perspectiva inclusiva e respectuosa.

A xornada conta co apoio institucional do Concello de Carballo, a Xunta de Galicia e a Deputación da Coruña, e representa a primeira convocatoria específica deste tipo promovida pola nosa entidade, coa intención de visibilizar necesidades, compartir boas prácticas e fomentar o debate informado no eido da sexualidade e a diversidade funcional.

Con esta iniciativa, que combina faladoiros e espazos de debate para favorecer a participación activa e o intercambio de coñecementos, non só se pretende normalizar a conversa sobre sexualidade entre persoas con diversidade funcional, profesionais e familias, senón ofrecer tamén ferramentas prácticas para o acompañamento afectivo e sexual, e promover espazos seguros e técnicas de intervención centradas na autonomía, o respecto e o consentimento.

Desde a organización subliñan que tratar a sexualidade como parte integrante do benestar é un paso necesario para garantir o pleno exercicio dos dereitos das persoas con diversidade funcional e avanzar nun modelo social máis inclusivo.

Programa ao completo

9:30–9:45 h — Recepción das persoas inscritas

9:45–10:00 h — Acto inaugural

10:00–10:45 h — Sexo, saúde e pracer: realidades que importan

Poñente: Paula Pombar Pérez

Unha reflexión sobre a importancia de abordar o pracer e a saúde sexual desde a perspectiva das persoas con diversidade funcional, subliñando a necesidade da educación afectivo-sexual e do acceso a recursos especializados.

10:45–11:30 h — Espazos seguros para falar de sexualidade (asoc. Íntegro)
Obradoiro e sesión práctica centrados en impulsar dinámicas, metodoloxías e recursos que permitan crear contextos de confianza, comunicación e acompañamento para falar de sexualidade.

11:30–12:00 h — Pausa para o café

12:00–12:45 h — Sexualidade e grandes apoios: dereito a sentir, dereito a vivir

Poñente: Sofía Torres Fernández

Análise das necesidades e dos dereitos das persoas que precisan grandes apoios, abordando como acompañar desde a empatía, a protección dos dereitos e a promoción da autonomía emocional e sexual.

12:45–13:30 h — Educación sexual nas entidades. Programa FADAS, un exemplo de boas prácticas

Poñente: Verónica Ramilo Graña

Presentación do Programa FADAS e das súas liñas de traballo como referente para a implementación de programas de educación sexual en entidades sociais.

13:30–13:50 h — Debate aberto (quenda de preguntas e intervencións)

13:50–14:00 h — Acto de clausura

Debido ao aforo limitado do auditorio, é recomendable inscribirse previamente cubrindo o seguinte formulario: https://forms.gle/vXuurC8YaeGV6YaS7.

O prazo rematará o 24 de novembro ou ao completar as prazas dispoñibles. O prezo da entrada (5€ público xeral e 2€ socios/as), deberá ser aboado mediante tranferencia bancaria ou Bizum no momento da inscrición. Ao remate da xornada entregarase un certificado de asistencia ás persoas participantes.

Máis información na web e nas redes sociais de Íntegro e Máis Porvir.

 

post

Íntegro impulsa o novo programa xuvenil Reacciona para fomentar a reciclaxe e a inclusión social a través de actividades sostibles

Publicado en por

Trátase dunha iniciativa subvencionada pola Consellería de Cultura, Lingua e Xuventude

O pasado xoves, a sede da asociación Íntegro (Nantón-Cabana de Bergantiños) acolleu  a presentación do proxecto BOOR, unha iniciativa artística que busca combinar arte e sostibilidade. Durante o obradoiro, impartido pola responsable da empresa, as persoas participantes tiveron a oportunidade de coñecer de preto esta innovadora proposta encamiñada á creación de pezas únicas a partir de materiais recollidos nas praias, como boias e flotadores abandonados, fomentando así a reciclaxe e a conciencia ambiental. Así mesmo, os integrantes do noso grupo xuvenil realizaron un pequeno taller empregando a técnica de debuxo que emprega para as súas creacións artísticas.

Esta acción forma parte do programa de actividades xuvenís Reacciona, posto en marcha o pasado mes de maio. Trátase dunha iniciativa promovida coa colaboración da Consellería de Cultura, Lingua e Xuventude, dirixida a mozos e mozas con idades comprendidas entre os 16 e os 35 anos, que ten como obxectivo principal concienciar sobre a importancia da reciclaxe dos materiais plásticos para o coidado do medio ambiente, promovendo ao mesmo tempo a inclusión social e laboral das persoas con discapacidade.

Reacciona nace como resposta á necesidade de integrar á mocidade nun modelo de desenvolvemento sostible, apostando pola educación ambiental e a colaboración entre entidades sociais e ambientais. As actividades, que se desenvolverán entre xullo e setembro, inclúen visitas didácticas, obradoiros formativos e encontros con proxectos e profesionais do sector da reciclaxe e da economía circular.

Aprendizaxe, visitas e acción social

Entre os obxectivos específicos do programa destacan:

  • Identificar e clasificar os distintos tipos de plásticos e as súas aplicacións.
  • Coñecer os procesos de fabricación e o impacto ambiental dos produtos plásticos.
  • Fomentar a reflexión crítica e a responsabilidade individual no uso, redución e reutilización destes materiais.
  • Promover o traballo colaborativo entre organizacións sociais e ambientais.

O calendario inclúe ademais estes outros espazos e proxectos de referencia:

  • SOGAMA (11/07): coñecemento de primeira man da xestión integral de residuos en Galicia.
  • Aula do Freixo (24/07): Centro de transformación de residuos mariños
  • Exposición no Aquarium da Coruña (07/07): aproximación á contaminación mariña por plásticos.
  • Aspaneps- Proxecto Ártabro Inclusivo (setembro): sensibilización ambiental e dinamización da rede de colaboradores con limpezas costeiras e actividades divulgativas.
  • Netcycle (09/09): proxecto de Ecoplas baseado na reutilización do desperdicio plástico para darlle unha segunda vida útil.
  • Antonia Studio (pendente confirmar cita): deseño sostible e economía circular.

Tamén se impartirá a charla divulgativa “SOS Planeta Terra” o 28 de xullo e un obradoiro formativo Diversiplás, centrado na transformación de plásticos reciclados en novos obxectos.

Con este programa, Íntegro reafirma o seu compromiso coa xuventude, o medio ambiente e a igualdade de oportunidades, favorecendo a participación activa de persoas con discapacidade en accións de alto valor social e educativo.

As prazas son limitadas e xa está aberto o prazo de inscrición a través do teléfono 981 734 985
ou do mail: info@integro.es.

 

post

O PIMD Rural reforza a súa atención ás mulleres do rural cun servizo máis integral e maior participación

Publicado en por

Trátase dun programa dirixido a mulleres en situación de especial vulnerabilidade e para o desenvolvemento das actuacións do Plan Corresponsables, co-financiado pola Consellería de Política Social e Igualdade e pola Unión Europea no marco do programa FSE+ Galicia 2021- 2027

O Punto de Intervención para Mulleres con Diversidade Funcional do Rural (PIMD Rural), impulsado pola asociación Íntegro segue consolidándose como un apoio esencial para as mulleres das zonas rurais pola súa capacidade de resposta e reforzo na atención integral ás persoas usuarias co obxectivo de fomentar a igualdade de oportunidades e contribuír a reducir a tripla discriminación que sofren moitas mulleres por razón de xénero, discapacidade e contorno rural.

A maioría das máis de 70 mulleres atendidas neste servizo (48 presentan algún tipo de discapacidade) son residentes en concellos rurais da Costa da Morte con baixa densidade de poboación, o que consolida a aposta do programa por achegar recursos e servizos ás zonas con maiores dificultades de acceso.

Este exercicio estivo marcado por un incremento considerable nas intervencións de carácter psicolóxico, grazas á incorporación a xornada completa dunha profesional especializada que permitiu reforzar a atención individualizada, así como os servizos de mediación familiar e intercultural para a resolución de conflitos no ámbito doméstico. O equipo profesional, ampliado neste ano a catro integrantes —psicóloga, educadora social, traballadora social e integradora social—, garantiu un servizo de atención continuada, próximo e integral.

Ao longo do curso, realizáronse numerosas actuacións centradas na orientación, información e asesoramento en recursos específicos, así como actividades dirixidas á adquisición de habilidades persoais e sociais. Estas accións desenvolvéronse tanto de xeito individual como en grupos reducidos, co obxectivo de ofrecer unha atención personalizada e de calidade.

Tamén se levou a cabo un amplo labor de acompañamento na xestión de trámites administrativos, sanitarios, laborais e sociais, así como no apoio directo nas relacións coas distintas entidades, organismos e servizos, facilitando así a integración social das mulleres participantes.

Inserción laboral e formación: dous piares fundamentais

A orientación laboral e o seguimento personalizado na busca de emprego continúan a ser dous dos servizos máis demandados polas usuarias. Como resultado, nesta edición conseguiuse novamente a inserción laboral de varias mulleres, o que reafirma a eficacia das accións desenvolvidas neste eido.

Ademais, a formación ocupou un lugar destacado dentro do programa, coa organización de talleres formativos adaptados ás necesidades detectadas. Entre as temáticas abordadas destacan: manexo de smartphones, autonomía persoal, autocoidados, autodefensa emocional, soidade en positivo, orientación laboral, busca de emprego en internet e sexualidade e afectividade baixo o lema “Se o amor aperta, non é da túa talla”.

Actualmente, durante o mes de xuño, estase a impartir un taller sobre sexting seguro, mentres que o de busca de emprego en internet —de gran acollida—terá unha nova edición en xullo para dar resposta á alta demanda.

O PIMD Rural está promovido pola asociación Íntegro e co-financiado pola Consellería de Política Social e Igualdade, a través dun programa dirixido a mulleres en situación de especial vulnerabilidade e para o desenvolvemento das actuacións do Plan Corresponsables, cofinanciadas parcialmente pola Unión Europea no marco do programa FSE+ Galicia 2021- 2027.

Se es muller con ou sen discapacidade, resides no rural e queres acceder a formación ou precisas apoio e/ou asesoramento, podes contactar con Íntegro no teléfono 981 734 985 ou a través do correo electrónico info@integro.es.

post

Aberto o prazo de inscrición para o novo faladoiro da Escola de Familias

Publicado en por

Será o venres 13 e tratará sobre os dereitos das persoas con Discapacidade e o papel das familias

Con motivo do Día Internacional das Persoas con Discapacidade (3 de decembro) e o Día dos Dereitos Humanos (10 de decembro), a asociación Íntegro organiza un faladoiro xurídico enmarcado na súa Escola de Familias. O evento terá lugar en Nantón e contará con dúas intervencións de gran interese.

María Cotón, da Fundación Paideia, abordará os dereitos das persoas con discapacidade, centrando a súa intervención na nova lei de apoio. A continuación, María Luisa Fernández, nai de familia, reflexionará sobre o papel fundamental das familias no ciclo vital das persoas con diversidade funcional e presentará o seu libro “Una sola persona es todo el mundo”, no que reivindica a dignidade e riqueza da diversidade humana.

As persoas interesadas en acudir poden inscribirse en info@integro.es ou chamando ao 981 734 985/650 961 649. Entrada de balde ata completar aforo.

post

Íntegro lanza a nova programación da Escola de Familias

Publicado en por

Un faladoiro sobre disfaxia centrará a primeira acción formativa que terá lugar mañá 21

A asociación Íntegro presenta a nova programación da Escola de Familias para o período 2024-2025, unha iniciativa dirixida a proporcionar apoio, formación e espazos de reflexión para as familias interesadas en ampliar coñecementos sobre coidados, inclusión e recursos dispoñibles no ámbito social e sanitario.

A Escola de Familias arrinca mañá 21 con catro accións formativas pensadas para abordar diferentes temas de interese e necesidades específicas:

  • 21 de novembro: Faladoiro sobre disfaxia, impartido por Fátima Trigo Mallo, logopeda, en horario de 11:00 a 12:30 horas.
  • 13 de decembro:
    • Faladoiro xurídico: Lei 8/2021, impartido por María Cotón, asesora xurídica da Fundación Paideia, de 11:00 a 12:00 horas.
    • Faladoiro: As familias, un piar fundamental, a cargo de María Luisa Fernández, quen presentará o seu libro “Una sola persona es todo el mundo”, de 12:00 a 13:00 horas.
  • 3 de xaneiro: Obradoiro sobre produtos de apoio, impartido por Silvia Grille Lema, Lucila Mendoza Canosa e Virginia Vázquez Varela, terapeutas ocupacionais, en horario de 16:00 a 17:30 horas.
  • 14 de febreiro: Faladoiro “Coidando a quen coida”, a cargo da psicóloga María Redonda Bujeiro, en horario de 16:00 a 17:30 horas.

Inscricións
Para participar en calquera das accións formativas é obrigatoria a inscrición individual. O formulario de inscrición será proporcionado de forma específica para cada sesión.

A Escola de Familias de Íntegro continúa sendo un espazo de aprendizaxe e apoio para fomentar o benestar das familias e das persoas coidadoras, reforzando a súa importante labor e ofrecendo ferramentas útiles para o día a día.

Para máis información, chamar ao teléfono 981 734 985 ou enviar un mail a  info@integro.es

post

Inclusión e solidariedade a través da formación do voluntariado

Publicado en por
  • As actividades, incluídas no programa de captación, sensibilización e formación do voluntariado financiado pola Consellería de Cultura, Lingua e Xuventude, xiraron arredor da diversidade, a perspectiva de xénero, os primeiros auxilios e a reconversión do plástico
  • Un grupo de 9 persoas menores de 30 anos integra ademais o grupo de voluntariado xuvenil centrado no desenvolvemento de accións en favor do coidado medioambiental e a reciclaxe de plástico

O voluntariado é unha forma de participación da cidadanía na sociedade a través das organizacións do terceiro sector. Por iso, desde Íntegro volvemos apostar, un ano máis, pola posta en marcha dun programa orientado á capacitación e formación de persoas voluntarias que decidan formar parte do equipo da entidade para sumar en positivo nas accións de visibilidade e inclusión efectiva das persoas con diversidade.

Actualmente, a asociación Íntegro conta cun grupo de voluntariado formado por 17 persoas, das que 9 son menores de 30 anos e integrantes do equipo de voluntariado xuvenil que participa no proxecto “O voluntariado coa diversidade Recícla-T”, orientado ao desenvolvemento de accións vinculadas co coidado e a conservación do medio e a reciclaxe de plástico.

Subvencionado pola Consellería de Cultura, Lingua e Xuventude, desde o pasado 1 de xaneiro, estamos a levar a cabo un proxecto de actividades de captación, sensibilización e formación dirixido á mocidade, ás persoas con discapacidade e calquera outra persoa que resida nalgún concello da Costa da Morte, e que estea interesada en realizar actividades de voluntariado na área de persoas con diversidade funcional.

Así, desde a área de sensibilización e formación organizáronse numerosos obradoiros enfocados ao público en xeral como o curso de voluntariado e diversidade funcional, realizado nos meses de febreiro e xullo, co obxectivo de promover a igualdade de oportunidades, proporcionando  coñecementos básicos en materia de diversidade e inclusión (diferenzas entre integración, inclusión e segregación ou as pautas para unha inclusión real) ou ofrecendo unha formación básica sobre medio ambiente para concienciar e sensibilizar arredor da problemática ambiental coa intención de incentivar valores e actitudes positivas e respectuosas co medio natural. O mes de xuño tamén nos deixou unha interesante aprendizaxe arredor da igualdade de oportunidades entre homes e mulleres, a través do curso “Introdución á perspectiva de xénero e igualdade de oportunidades”, que resultou un éxito entre a mocidade.

Reciclaxe e reconversión

Setembro tamén resultou ser un mes de intensa actividade formativa con accións encamiñadas á formación de persoas voluntarias arredor do noso proxecto de reciclaxe de plásticos Diversiplás. Neste senso, tras o éxito acadado no mes de abril o pasado día 18 arrincou a segunda edición da “Formación básica: Identificación de plásticos” para aprender a identificar os plásticos e cales son as súas propiedades e principais aplicacións. Nesta liña, esta mesma semana levamos a cabo a terceira edición, tras a de abril e xullo, do obradoiro de reciclaxe e reconversión de plásticos centrada no manexo da maquinaria que temos no noso taller (trituradora, inxectora e extrusora).

Por outra banda, o pasado día 13 puxemos en marcha un taller de “Nocións básicas sobre primeiros auxilios”, que permitiu ao alumnado adquirir coñecementos básicos en materia de prevención de accidentes, procedementos e técnicas de auto-protección e identificación de situacións de urxencia.

Desde Íntegro queremos convidar aos mozos e mozas con idades comprendidas entre os 16 e os 35 anos, a sumarse ao equipo de persoas voluntarias de Íntegro. Ademais de visitar os institutos da Costa da Morte para informar e concienciar aos máis novos, a campaña de captación de voluntariado permanece aberta durante todo o ano a través do 981 734 985 ou en info@integro.es.

post

Preto de 70 mulleres en situación de vulnerabilidade acudiron ao PIMD Rural de Íntegro

Publicado en por
  • Desde o pasado mes de setembro, o Punto de Intervención para Mulleres con Diversidade do Rural, promovido por Íntegro e co-financiado polo Fondo Social Europeo (FSE) ao abeiro do programa operativo FSE Galicia 2014-2020, atendeu a 69 mulleres das zonas rurais da Costa da Morte
  • As accións de orientación laboral e acompañamento na busca de emprego seguen a incrementarse ano tras ano

O Punto de Intervención para Mulleres con Diversidade Funcional do Rural (PIMD Rural) vén de clausurar a edición correspondente ao período 2023/2024 cun balance máis que positivo e un notable incremento de usuarias con respecto ao últimos anos. Dende o pasado mes de setembro, foron atendidas preto de 70 mulleres (69), a maioría delas (48) con disCapacidade, sendo as restantes residentes en concellos rurais da Costa da Morte con baixa densidade de poboación.

Ao longo deste exercicio rexistrouse un maior incremento de intervencións na área psicolóxica debido á dispoñibilidade a xornada completa de persoal especializado na atención individualizada e a mediación familiar e/ou intercultural para a resolución de conflitos no ámbito doméstico. Desde O PIMDRural ofrecemos un servizo de continuidade, integrado por tres profesionais: unha psicóloga, unha educadora social e unha traballadora social.

Por outra banda, realizáronse numerosas actuacións encamiñadas á orientación e información e asesoramento en recursos singularizados, actividades para a adquisición de habilidades persoais e/ou sociais, tanto individuais como grupais, dirixidas a grupos reducidos para ofrecer un servizo individualizado, apoio na prospección laboral… Acompañamentos na xestión de todo tipo de trámites (administrativos, de saúde, laborais, de atención e asesoramento persoal e social, así como de apoio directo nas relacións con outras entidades, organismos e servizos para facilitar ás persoas usuarias a súa integración social.

As accións de orientación laboral e o seguimento na busca de emprego seguen sendo, xunto coa realización de actividades para a mellora da empregabilidade, unhas das prestacións máis requiridas polas usuarias, que nesta edición posibilitaron a inserción laboral de seis persoas.

Este servizo, promovido pola asociación Íntegro e co-financiado pola Secretaría Xeral de Igualdade de Xunta de Galicia e o Fondo Social Europeo (FSE), ao abeiro do programa operativo FSE Galicia 2014-2020, está encamiñado a fomentar a igualdade de oportunidades e contribuír a diminuír a tripla discriminación á que están sometidas moitas das beneficiarias do programa.

Programa formativo

Así mesmo, neste último ano, levamos a cabo con gran éxito varios talleres formativos para grupos reducidos sobre diferentes temáticas en atención á demanda das nosas usuarias: manexo do smartphone, autonomía persoal, autocoidados, autodefensa emocional, soidade en positivo, orientacion laboral, busca de emprego en internet, sexting seguro e sexualidade e afectividade baixo o título “se o amor apreta, non é da túa talla”.

Se es muller con ou sen discapacidade, resides no rural e queres recibir formación ou precisas apoio e/ou asesoramento, non dubides en poñerte en contacto con Íntegro chamando ao 981 734 985 ou enviando un mail a info@integro.es.

post

O PIMDRural ofrecerá en xuño un taller sobre “sexting seguro” para mulleres con discapacidade

Publicado en por

O prazo de inscrición xa está aberto. As prazas son limitadas!

Desde o Punto de Intervención para Mulleres con Discapacidade do Rural, promovido pola asociación Íntegro e co-financiado polo polo Fondo Social Europeo (FSE) ao abeiro do programa operativo FSE+ Galicia 2021-2027, chega unha nova edición do ciclo formativo que a entidade ten en marcha coa finalidade de dotar de recursos a un dos colectivos máis vulnerables da sociedade. Desta volta, a nova acción xirará arredor do “Sexting seguro”, unha practica moi estendida e normalizada desde a pandemia baseada no intercambio de fotografías e outros contidos audiovisuais con fins eróticos, sobre a que convén poñer o foco de atención.

Para elo, no mes de xuño a psicóloga do centro María Redonda impartirá un taller especializado nesta temática para que as mulleres participantes saiban como protexerse e cales son as canles máis seguras para facelo. Será durante o mes de xuño.

As persoas interesadas en participar deberán inscribirse canto antes  chamando ao 981 734 985 – 650 961 649 ou enviando un mail a info@integro.es. Dado que está orientado a grupos reducidos, as prazas son limitadas. Bule e non quedes sen a túa!