post

Íntegro clausurou a campaña de prevención da lesión medular cunha edición especial polo seu 30º aniversario

  • Ademais do presidente e varios membros da entidade, ao acto asistiron o alcalde de Carballo, Evencio Ferrero, e o xefe da Unidade de Lesionados Medulares do CHUAC, Antonio Rodríguez Sotillo
  • A clausura, na que participaron 90 alumnos/as de 4º da ESO e dos ciclos formativos, tivo lugar hoxe no IES Monte Neme de Carballo

O IES Monte Neme de Carballo foi o escenario elixido pola asociación Íntegro para celebrar esta mesma mañá o acto de clausura da campaña de prevención da lesión medular nunha edición especial que reuniu, ademais de alumnado e profesorado, a uns convidados de excepción para conmemorar o 30º aniversario desta iniciativa, unha das primeiras da historia da entidade. Xunto a Adolfo López Baña, presidente de Íntegro, e outros responsables da entidade, acudiron Evencio Ferrero, alcalde de Carballo, e Antonio Rodríguez Sotillo, xefe da Unidade de Lesionados Medulares do CHUAC.

Adolfo López Baña foi o encargado de inaugurar a xornada, na que participaron 90 alumnos e alumnas de 4º da ESO e os ciclos de Formación Profesional. Tras realizar un repaso pola historia da entidade, explicou a necesidade de seguir mantendo estas campañas de sensibilización para “concienciar á mocidade sobre as consecuencias dun accidente medular, que pode acabar coa nosa vida nun segundo”, puntualizou. Neste sentido, o alcalde de Carballo apelou á responsabilidade dos máis novos/as, aos que lles pediu, agora que comeza a temporada estival e as festas, “que desfruten da etapa que están vivindo e se divirtan pero con sentidiño e sen riscos”. Evencio Ferrero tamén aproveitou a ocasión para narrar a súa experiencia persoal como lesionado medular.

E neste aniversario tan especial, estivo presente o doutor Sotillo, que acompañou á entidade nas súas primeiras charlas sobre prevención e é un dos protagonistas do vídeo de Íntegro “A ti tamén che pode pasar”, proxectado ao finalizar o acto. O xefe da Unidade de Lesionados Medulares do CHUAC explicou en que consiste o seu traballo e enumerou as principais causas e consecuencias de sufrir un accidente destas características. Así mesmo,  fixo especial fincapé no carácter irreversible desta doenza que “non ten cura, só rehabilitación”, sinalou. A xornada concluíu cun breve coloquio, que os alumnos/as aproveitaron para despexar dúbidas e coñecer o día a día dunha persoa con esta doenza. Pola súa banda, os membros da asociación ofreceron os seus testemuños e relataron as súas propias vivencias.

Desde Íntegro queremos agradecer, unha vez máis,  a implicación e colaboración da comunidade educativa na difusión desta campaña, na que participaron durante o presente curso máis de 500 alumnos/as de educación secundaria e formación profesional da Costa da Morte, co obxectivo de crear conciencia entre os máis novos/as e apostar por unha educación en valores, máis responsable e inclusiva. Vémonos o próximo curso!

post

A campaña de prevención da lesión medular de Íntegro visita o CPI Cabo da Area de Laxe

29 escolares de 3º e 4º da ESO participaron no día de onte nunha xornada de sensibilización que contou cunha charla informativa, a proxección dun vídeo e o testemuño dun lesionado medular

Neste mes de marzo, a campaña de prevención da lesión medular de Íntegro volveu ás aulas coa celebración dunha xornada de sensibilización no CPI Plurilingüe Cabo da Area de Laxe, na que participaron 29 alumnos de 3º e 4º da ESO. A actividade, incluída na programación conmemorativa do 30º aniversario da entidade, xirou arredor das causas e consecuencias dos accidentes medulares para concienciar aos máis novos sobre a importancia de evitar situacións de risco en estradas, praias e piscinas, como principais focos de sinistralidade entre a mocidade.

A sesión informativa, celebrada onte á mañá, contou coa participación do presidente de Íntegro Adolfo López Baña, encargado de explicar ao alumnado os motivos que se agochan tras os accidentes medulares, e José Manuel, un voluntario do programa, que expuxo o seu caso e deixou impresionado tanto ao alumnado como ao profesorado co seu exemplo de forza, coraxe e superación. A xornada completouse coa proxección do vídeo “A ti tamén che pode pasar”. Ao remate, celebrouse un breve coloquio que os alumnos/as aproveitaron para despexar dúbidas e coñecer o día a día dunha persoa con lesión medular. Nesta ocasión, debido á situación actual derivada da COVID-19, non se realizaron as habituais sesións prácticas, que agardamos poder retomar en breve.

Desde Íntegro queremos agradecer a implicación e colaboración da comunidade educativa na difusión desta campaña co dobre obxectivo de crear conciencia entre os máis novos/as e apostar por unha educación en valores, máis responsable e inclusiva.

Os centros educativos que estean interesados en adherirse a esta campaña ou a calquera dos programas de sensibilización postos en marcha pola entidade, non teñen máis que poñerse en contacto co centro a través do enderezo electrónico formacion@integro.es ou nos teléfonos 981 734 985 e 650 961 649.

post

Íntegro participará en Carballo na Semana Europea da Mobilidade coa celebración do Día da Accesibilidade  

  • Levarase a cabo o luns 21 para dar visibilidade aos problemas que sofren a diario ás persoas con mobilidade reducida
  • A entidade súmase así, un ano máis, ao programa de actos que organiza a Concellería de Mobilidade, do 16 ao 22 deste mes, coa colaboración ademais da área de Igualdade, o Club Ciclista Carballo e a Asociación Ambiental Senda Nova

O presidente de Íntegro, Adolfo López  Baña, e a Educadora Social Tania Bartucca Nión, asistiron onte en Carballo á presentación do programa de actividades que o consistorio carballés vai poñer en marcha do 16 ao 22 de setembro con motivo da conmemoración da Semana Europea da Mobilidade. Trátase dunha programación ampla e variada, deseñada desde a Concellaría de Mobilidade coa colaboración da área municipal de Igualdade, o Club Ciclista Carballo Vázquez y Reino, Senda Nova e a nosa entidade, que non quixo faltar, un ano máis, a esta importante cita para aportar o noso gran de area na organización de varias accións encamiñadas a sensibilizar e implicar á cidadanía no difícil reto de converter as nosas rúas en espazos seguros e accesibles para todos e todas. No acto, celebrado nas inmediacións do Fórum,  tamén estiveron presentes o concelleiro de Mobilidade, Juan Seoane; a concelleira de Igualdade, Maica Ures, e Eva Cameán, da asociación ambiental Senda Nova.

Juan Seoane, Eva Cameán, Adolfo López, Tania Bartucca e Maica Ures durante a presentación na contorna do Fórum

Desde a asociación Íntegro colaboraremos, nesta ocasión, na organización do Día da Accesibilidade, que terá lugar o luns 21 nunha xornada con marcado carácter reivindicativo e repleta de actividades tan singulares como novidosas, orientadas a dar visibilidade aos problemas cos que se atopan a diario as persoas con mobilidade reducida. A primeira delas, denominada “Son só 5 minutiños”, desenvolverase pola mañá, entre as 11.00 e as 13.00 horas, e consistirá na ocupación de varias prazas de aparcamento da rúa Cervantes con cadeiras de rodas, muletas e carteis coas desculpas máis empregadas cando se utilizan prazas PMR sen tarxeta “para que a xente que ocupa as prazas para persoas con mobilidade reducida vexa o mal que se sentiría se lle pasase a eles. Non hai prazas para persoas con mobilidade reducida porque queiramos, senón porque as precisamos”, aclarou Adolfo López. Xa pola tarde celebrarase a segunda, unha ruta en cadeira de rodas polas rúas da contorna do Fórum para avaliar as melloras feitas en accesibilidade e detectar posibles novos puntos nos que sexa preciso actuar. Será das 17.00 ás 18.30 horas.

Este ano, debido ás restricións impostas pola COVID-19 e para garantir a seguridade dos/as participantes, formaranse grupos reducidos nas diferentes actividades e extremarase as medidas de prevención (uso de tapabocas, distanciamento social e desinfección de obxectos), segundo detallou Juan Seoane, encargado de debullar toda a programación, na que figuran propostas tan atractivas como o “Día sen Coches”, unha iniciativa que se desenvolverá por primeira vez e que consistirá en cortar ao tráfico rodado varias rúas para que as usen os peóns  con xogos e actividades co obxectivo de dar visibilidade á transformación urbana da vila. Esta acción, que se realizará de forma simultánea en diferentes barrios da vila, coincidirá tamén coa celebración de “Pedaleando pola igualdade”, unha actividade que a Concellaría de Igualdade tivo que suspender no mes de marzo e que agora retoma, en colaboración co Club Ciclista Carballo, para “darlles recursos ás mulleres para poder andar en bicicleta e que se sintan libres”, manifestou Maica Ures. O programa complétase cunha ruta a pé pola beira do Anllóns para poñer en valor as marxes dos ríos da man de Senda Nova, e unha morea de actividades máis que non podes perder. Bótalle un ollo e participa!

post

A campaña de prevención das lesións medulares arrincará este venres do IES Alfredo Brañas de Carballo

 

• A Casa do Concello de Carballo acolleu onte a presentación dunha iniciativa que conta xa con 28 anos de andadura

• No acto participaron o presidente de Íntegro, Adolfo López Baña, varios membros da xunta directiva, a educadora social da entidade, o alcalde de Carballo e a concelleira de Igualdade e Benestar

A asociación Íntegro vén de presentar na Casa do Concello de Carballo a campaña de prevención de lesións medulares para o 2020 coa que a entidade ten previsto volver a percorrer os centros de ensino de secundaria da Costa da Morte sensibilizando e concienciando aos nosos mozos e mozas, como xa vén facendo dende hai anos. “Se conseguimos evitar unha soa lesión medular, xa pagou a pena”, así resumía Adolfo López Baña, presidente de Íntegro, o principal obxectivo desta iniciativa que, pese a cambiar de formato e de destinatarios/as, constitúe unha das primeiras actividades organizadas pola entidade desde a súa fundación en 1992, ano no que, segundo lembrou, “eramos un punto negro a nivel estatal”.

Acompañando a Adolfo López Baña tamén estiveron presentes outros membros da xunta directiva de Nantón como David Pombo e José Manuel Mira; a educadora social da entidade, Tania Bartucca; o alcalde de Carballo, Evencio Ferrero, e a concelleira de Igualdade e Benestar, Maica Ures, quen calificou de moi “significativo” o cartel deste ano porque, efectivamente, “calquera descoido ou unha mala caída poden cambiarche a vida para sempre”. O rexedor, pola súa banda, felicitou a Íntegro pola organización desta iniciativa e “por todo o traballo que está a facer conseguir unha sociedade inclusiva, na que toda a xente, á marxe das súas circunstancias físicas, teña a oportunidade de demostrar as súas capacidades”.

Primeiras citas

A campaña 2020 arrincará este venres 24 coa visita ao alumnado de secundaria do IES Alfredo Brañas e continuará nas vindeiras semanas con paradas nos centros de ensino de Coristanco, Vimianzo, Zas e Carnota, entre outros municipios. Durante as xornadas de sensibilización, o alumnado non só terá ocasión de participar nas charlas protagonizadas por persoas con lesións medulares, senón que tamén poderán poñerse no seu lugar para coñecer mellor o seu día a día sobre unha cadeira de rodas.

Pola súa banda, Tania Bartucca apelou á participación de todos os centros de ensino da comarca para contribuír a concienciar aos máis novos sobre a importancia da prevención e a necesidade de evitar prácticas de risco. Neste senso, apuntou que se algún colexio ou instituto non recibiu información e está interesado en formar parte da campaña deste ano, só ten que poñerse en contacto con Íntegro no enderezo electrónico formacion@integro.es ou nos teléfonos 981 734 985 e 650 961 649.

Tras 28 anos de campañas de sensibilización, os datos confirman que as lesións medulares reducíronse de forma notable, especialmente, entre os máis novos/as e, pola contra, aumentaron entre as persoas maiores. Por iso, desde a entidade xa se está a traballar na posta en marcha de accións específicas orientadas a este sector da poboación. Seguirémosvos informando!!

post

Un grupo de nenos e nenas do campamento de verán Xolda Ocio Infantil participou nunha xornada de sensibilización en Íntegro

Tras a visita a Nantón, compartindo xogos e aprendizaxe, os nosos usuarios/as desprazáronse ata Carballo para participar na súa festa de fin de verán

Un grupo de 39 nenos e nenas, de 3 a 12 anos de idade, do campamento de verán de Xolda Ocio Infantil de Carballo achegouse esta semana ata as nosas instalacións de Nantón para participar nunha nova edición do programa Visítanos, co que se pretende sensibilizar aos máis pequenos/as en materia de diversidade e inclusión. Tras unha distendida charla, protagonizada pola directora do Centro de Recursos Noelia Barreira, na que se abordou o significado de ambos conceptos, deu comezo unha xornada de aprendizaxe e diversión polas diferentes aulas para coñecer de preto o funcionamento da nosa entidade e o traballo que se desenvolve nos diferentes talleres, dun xeito ameno, entretido e moi didáctico.

Sen dúbida, os obradoiros de artes manuais foron os que máis chamaron a atención dos participantes xunto co taller de cociña. Se no primeiro aprenderon a elaborar divertidas e coloristas pulseiras de macramé seguindo a técnica que lle explicaron os nosos usuarios e usuarias, no segundo empregáronse a fondo confeccionando uns apetecibles e moi saudables petiscos a base de froitas variadas, que non dubidaron en degustar alí mesmo para repoñer folgos despois de tanta trasfega.

A elaboración de mandalas tamén foi todo un éxito entre a cativada, que apuntou sen dubidalo nin un instante para facer cadanseu deseño. Na sala de ximnasia puxeron a proba a súa habilidade e destreza con diversos xogos de habilidade, que lle serviron para comprobar a dificultade de realizar labores cotiás desde unha cadeira de rodas. Outra das actividades que espertou o interese e a curiosidade dos máis cativos/as foi o taller de fabricación de xabóns de glicerina. Logo de escoitar con moita atención as explicacións dos usuarios/as e monitoras de Íntegro, ningún peque puido resistir a tentación de elaborar o seu propio Bico de Amora. Cunha canteira de artesáns así, o futuro está garantido!

A xornada rematou cunha posta en común de todo o aprendido, que foi moito, e un convite para participar na festa de fin de verán do campamento carballés, á que asistimos o pasado venres 30 e na que tivemos a oportunidade de volver a compartir xogos e diversión, ademais dunha deliciosa merenda en compañía dos nenos e nenas de Xolda Ocio Infantil e de Balonman Xiria. Unha experiencia única e moi enriquecedora que agardamos poder repetir moi pronto.

Moitísimas grazas!  

post

Máis de 400 alumnos/as da comarca participaron ao longo de maio nas campañas de sensibilización promovidas por Íntegro

Varios centros de ensino de Carballo, A Laracha e Zas foron os destinatarios das últimas accións formativas levadas a cabo pola entidade antes do remate do curso académico

Coa chegada do bo tempo e o inminente remate do curso escolar, as campañas de sensibilización, promovidas pola asociación Íntegro ao longo do ano, sucédense case a diario nos centros de ensino de toda a Costa da Morte. E non é para menos! Ano tras ano, as estatísticas seguen a reflexar un incremento de accidentes medulares durante a temporada estival. Estradas, praias e piscinas continúan a ser os principais puntos de sinistralidade e os nosos mozos e mozas, o colectivo máis vulnerable. Para loitar con esta lacra, a entidade que preside Adolfo López Baña vén de reforzar ao logo deste mes a súa presencia nos centos educativos da zona con charlas informativas e actividades lúdicas e didácticas, organizadas en colaboración coa comunidade escolar para lograr unha educación inclusiva e responsable, capaz de transmitir coñecemento, diversión e maior concienciación social como aconteceu nas últimas visitas levadas a cabo en Carballo, A Laracha e Baio (Zas).

Así, nas últimas semanas, a campaña de prevención de lesións medulares cobrou especial protagonismo na capital de Bergantiños, onde fixo a súa primeira parada para visitar aos alumnos/as de 2º curso do IES Isidro Parga Pondal mentres que a última tivo lugar hai escasos días nas aulas de Formación Profesional Básica do IES Monte Neme, onde se puxo o punto e final á temporada. Entre ambos centros, un total de 145 estudantes participaron activamente, tanto nas conferencias ofrecidas polos representantes de Íntegro como nas posteriores sesións prácticas, que lle permitiron a todos e a todas, poñerse por uns intres na pel dun usuario/a de cadeira de rodas.

Os/as que tamén tiveron que sortear obstáculos e, por certo, con gran habilidade e destreza, foron os alumnos/as de 1º e 2º da ESO do IES Maximino Romero de Baio (Zas), que formaron parte dunha xornada de educación viaria, organizada pola Policía Local da localidade, coa que colaborou a asociación Íntegro a través da realización dun circuíto de mobilidade e varias probas que serviron para conciencialos/as sobre a importancia de evitar prácticas de risco nas estradas como peóns como futuros condutores de vehículos.

 

 

 

 

 

 

Diverescola

Este mes tamén nos deixou unha nova edición da Diverescola, unha iniciativa enmarcada no programa Capacíta-T, promovida para achegar aos máis cativos/as a diversidade e a inclusión a través do xogo e o entretemento. Nesta ocasión, os destinatarios/as foron 150 nenos e nenas de 5º e 6º curso do CEIP Ramón Otero Pedrayo de A Laracha. Ao longo da mañá, o alumnado cambiou as aulas e os pupitres polo patio e o pavillón escolar para poñer a proba os seus coñecementos e habilidades en materia de diversidade. E os resultados foron sorprendentes! Despois de realizar un percorrido cos ollos vendados e nunha cadeira de rodas, todos/as demostraron que a empatía, a destreza e a sensibilidade son materias que dominan á perfección. Parabéns a todos!

 

 

 

 

 

 

Desde Íntegro queremos agradecer a implicación e a colaboración de toda a comunidade educativa na posta en marcha dos diferentes programas de prevención e sensibilización nos centros de ensino co obxectivo de fomentar entre o alumnado un maior coñecemento da súa contorna e unha educación responsable e inclusiva. Grazas e a gozar do verán, con precaución!!

post

O alumnado de 3º e 4º do CPI As Revoltas de Cabana participou nunha xornada de sensibilización en Íntegro

Os 28 alumnos/as, que formaron parte desta nova edición do Visítanos, percorreron unha a unha as aulas de Nantón na procura de xogos, diversión e aprendizaxe

Un grupo de escolares de 4º e 5º de primaria do CPI As Revoltas de Cabana de Bergantiños achegáronse esta semana ata o Centro de Recursos Íntegro para participar nunha nova edición do Visítanos, unha actividade de sensibilización incluída no programa Capacíta-T, destinada a concienciar aos máis pequenos en materia de diversidade e inclusión.

A visita deu comezo a primeira hora da mañá cunha recepción e unha pequena charla sobre o funcionamento do centro e o día a día dos nosos usuarios e usuarias para continuar coa proxección dunha curtametraxe, de 5 minutos de duración, na que persoas con diversidade funcional relataban diferentes experiencias da súa vida cotiá. A continuación, os 28 alumnos/as participantes iniciaron o seu particular percorrido polas diferentes aulas tanto do Centro de Día como do Centro de Recursos para coñecer de preto cada unha das actividades que desenvolvemos ao longo do ano.

Os obradoiros de artes manuais, como o de confección de xabóns de glicerina e pulseiras de macramé, foron algúns dos que máis sorprenderon aos escolares, que non dubidaron en poñerse mans á obra para elaborar as súas propias creacións e levalas para as súas casas como recordo do seu paso polo centro.

 

Na cociña e no ximnasio tamén tiveron oportunidade de poñer a proba as súas habilidades coa axuda dos nosos usuarios/as. Ademais de realizar circuítos de mobilidade sobre unha cadeira de rodas, tamén se achegaron á sala de logopedia onde tiveron tempo para xogar e rir a gargalladas con algunhas probas que semellaban resistirse ao principio pero que finalmente superaron sen problema.

Finalmente, os/as estudantes elaboraron un mural conxunto no que plasmaron as súas impresións dunha xornada divertida, emotiva e moi didáctica que rematou cunha fermosa foto de grupo como colofón a unha experiencia gratificante, que agardamos poder repetir canto antes. Grazas a todos e a todas por vir!

post

A campaña de prevención de lesións medulares fixo parada en A Laracha e Coristanco

Alumnos de 1º de bacharelato do IES Agra de Leborís e de 2º e 3º de ESO do CPI Xosé Pichel participaron nas últimas charlas informativas de Íntegro

Despois dun mes de intensa actividade formativa percorrendo diferentes centros educativos da Costa da Morte, o presidente de Íntegro Adolfo López Baña e educadora social Tania Bartucca, visitaron o IES Agra de Leborís de A Laracha e o CPI Alcalde Xosé Pichel de Coristanco para achegar ao alumnado a nova campaña de prevención de lesións medulares coa que se pretende concienciar á mocidade sobre a importancia de evitar situacións de risco tanto nas estradas como en praias e piscinas, principais focos de sinistralidade entre os máis novos/as coa chegada do bo tempo.

Alumnado do IES Agra de Leborís A Laracha)

Estudantes do CPI Xosé Pichel de Coristanco

 

 

 

 

 

 

 

No primeiro centro, arredor de 60 alumnos/as de 1º de bacharelato asistiron a unha charla informativa, na que se abordaron as causas e consecuencias de sufrir un accidente medular, que incluíu ademais a proxección do vídeo “A ti tamén che pode pasar” e un pequeno coloquio que contou coa participación de José Manuel, un voluntario do programa que non dubidou en expoñer o seu caso, como exemplo de forza e superación, co que deixou impresionados tanto aos estudantes como aos profesores. Igual de interesante e emotivo foi o encontro cos estudantes de 2º e 3º da ESO do colexio coristanqués, que seguiron con gran interese e atención as explicacións ofrecidas polos membros da nosa entidade nunha xornada marcada pola aprendizaxe pero tamén pola diversión.

En ambos casos, tras a teoría chegou a práctica. E aí a rapazada volveu a sorprendernos unha vez máis coa súa capacidade de empatía e a súa habilidade e destreza sobre unha cadeira de rodas.

 

 

 

 

 

 

Ao remate, todos os/as participantes comprometéronse a extremar as precaucións evitando correr riscos innecesarios que poidan poñer en perigo as súas vidas. Desde Íntegro, agardamos que así sexa e que vaian coa lección ben aprendida.  O seu futuro pode estar en xogo!

post

Íntegro apela á conciencia cidadá para evitar lesións medulares por mergullos durante a temporada estival

Membros da entidade están a percorrer diferentes praias, peiraos e piscinas da Costa da Morte para comprobar os focos de risco e incidir na  prevención de accidentes

Como xa vén sendo habitual por esta datas, na asociación Íntegro iniciamos unha ronda de visitas polos municipios costeiros da nosa contorna para proceder á comprobación ocular dos focos de alto risco de lesións medulares por mergullos na Costa da Morte e incidir na súa prevención. Cada ano prodúcense en Galicia arredor de 100 accidentes medulares, dos que o 5% teñen a súa orixe nas prácticas de risco que se realizan en piscinas, ríos e praias. E lonxe de evitalas, cada vez son máis os adultos e adolescentes que expoñen as súas vidas en zonas altamente perigosas como as entradas a diques, peiraos e rías con pouco caudal de auga.

Como evitalo? O sentido común é a mellor defensa! En caso de mergullos, é imprescindible inspeccionar o fondo para comprobar tanto o seu interior como a súa profundidade. Aínda que na zona non haxa rocas saíntes do leito mariño, nin chanzos de pedra ou maleza ocultos pola area ou as plantas, NUNCA debemos tirarnos de cabeza. Neste senso, desde a entidade de Nantón faise un chamamento público a todas as administracións e organismos competentes para que procedan á correspondente sinalización de prohibición deste tipo de prácticas, ademais de apelar á concienciación cidadá para a súa erradicación. O verán é para gozalo e este tipo de lesións son evitables no 100% dos casos.

Estas son algunhas recomendacións para desfrutar dunhas vacacións tranquilas e sen correr riscos innecesarios.

. Comprobar sempre a profundidade da auga antes de tirarse de cabeza. (A OMS recomenda que haxa como mínimo 1.5 metros de profundidade).

. Evitar inmersións bruscas.

. Ter moito coidado cos ríos e rías porque o caudal da auga varía continuamente.

. Extremar a precaución en bordos e zonas húmidas de piscinas.

. Evitar bañarse en caso de consumir alcohol.

. Respectar os sinais de advertencia de perigo e normas de conduta en praias e piscinas. No caso de que non as haxa, como usuarios/as destas zonas debemos esixilas aos organismos competentes.

Como actuar en caso de accidente?

  • Avisar aos servizos de emerxencias ou acudir ao socorrista máis próximo da praia ou piscina.
  • Intentar non mobilizar ao accidentado/a. En caso de perigo de afogamento, desprazalo/a sempre entre varias persoas.

Lembra que o verán é para desfrutar. Non xogues coa túa vida. Usa a cabeza!

post

160 estudantes carballeses toman conciencia sobre a prevención de lesións medulares

Responsables de Íntegro achegáronse nos últimos días ata as aulas do IES Monte Neme e Parga Pondal

160 alumnos e alumnas de dous institutos carballeses participaron nas últimas xornadas de sensibilización promovidas pola asociación Íntegro, dentro da campaña de prevención de lesións medulares que está a percorrer os centros educativos de primaria e secundaria da Costa da Morte.

O pasado martes, varios responsables da entidade con sede en Nantón (Cabana), entre os que se atopaba o seu presidente Adolfo López Baña, achegáronse ata as aulas do IES Monte Neme de Carballo para manter un encontro cos estudantes de 3º e 4º da ESO. Ademais da proxección do vídeo “A ti tamén che pode pasar”, no que se narran as principais causas e consecuencias de sufrir un accidente medular, o alumnado seguiu con atención o relato de varias testemuñas reais que deron conta do seu día a día sobre unha cadeira de rodas. Durante a mañá celebráronse dúas sesións informativas nas que participaron un total 110 mozos/as. Ao remate, moitos deles/as aseguraron sentirse máis concienciados/as sobre a importancia de evitar prácticas de risco, especialmente en zonas como praias e piscinas onde os mergullos de cabeza son moi habituais.

Os/as que tamén terán que poñer en práctica os consellos recibidos o pasado venres son os 50 alumnos/as de 2º da ESO do IES Isidro Parga Pondal, o outro centro carballés que estes días abriu as súas portas á campaña de prevención de Íntegro. Logo da charla informativa, celebrouse un pequeno coloquio para intercambiar impresións sobre a xornada e conversar sobre as dificultades de vivir cunha lesión medular. Esperemos que todos/as vaian coa lección aprendida. Ata a próxima!