post

Tres centros de primaria da Costa da Morte, gañadores do concurso escolar 30 aniversario de Íntegro

  • Tratase do CPI As Revoltas de Cabana, o CEIP Labarta Pose de Baio (Zas) e o centro de primaria O Areal de Camariñas
  • Os gañadores/as recibirán da man dos usuarios/as da entidade unha tablet e un diploma acreditativo para a clase e chapas para todos os nenos e nenas premiados/as

O concurso escolar 30 aniversario “Camiñando cara a inclusión”, convocado pola asociación Íntegro dentro do programa de actividades conmemorativas deste 2022, xa ten finalistas. Desde o pasado mes de febreiro, máis de 20 centros de educación primaria da Costa da Morte participaron nesta iniciativa, encamiñada a promover valores como a inclusión e a igualdade no ámbito educativo, que resultou ser todo un éxito entre a cativada.

Rematado o prazo de presentación dos traballos e tras unha “longa e moi difícil” deliberación do xurado, formado por un traballador/a e un usuario/a de Íntegro; un patrocinador/colaborador do 30 aniversario, un representante dos escolares e un profesional do ámbito cultural, estes foron os finalistas das diferentes categorías:

A. DEBUXO (alumnado de 1º e 2º de EP): 1º de primaria do CPI As Revoltas (Cabana de Bergantiños)

B. POESÍA (alumnado 2º e 3º de EP): 4º primaria do CEIP Labarta Pose (Baio-Zas)

C. NARRATIVA (alumnado de 5º e 6º de EP): 6º de primaria do CEIP O Areal (Camariñas)

A elección dos gañadores levouse a cabo seguindo os criterios establecidos nas bases da convocatoria, entre os que destacaban a creatividade, orixinalidade e calidade dos traballos ademais doutros valores engadidos como a mensaxe, a accesibilidade e a implicación máis alá da aula.

Entrega premios

Debuxo gañador de 1º primaria do CPI As Revoltas de Cabana

 

Esta semana, as aulas gañadoras serán premiadas cunha tablet e un diploma acreditativo como agasallo colectivo, e unha chapa conmemorativa do concurso para cada neno/a galardoado/a. Os primeiros/as premiados foron os alumnos e alumnas de Cabana, que esta mesma mañá recibiron a visita dos nosos usuarios/as para facerlles entrega dos seus agasallos nun acto celebrado ás 12.00 horas no salón de actos do centro educativo. Mañá 5, ás 10.30 horas, será a quenda dos escolares de Camariñas e ás 12.30 horas, os de Baio, en Zas.

Desde Íntegro queremos dar a grazas a toda a comunidade educativa pola súa participación e implicación nesta iniciativa destinada a fomentar a inclusión e a igualdade na contorna e a promover novos espazos para a reflexión achegando á cativada conceptos tan importantes como a accesibilidade ou a disCapacidade.

 

 

 

 

post

A campaña de prevención da lesión medular de Íntegro visita o CPI Cabo da Area de Laxe

29 escolares de 3º e 4º da ESO participaron no día de onte nunha xornada de sensibilización que contou cunha charla informativa, a proxección dun vídeo e o testemuño dun lesionado medular

Neste mes de marzo, a campaña de prevención da lesión medular de Íntegro volveu ás aulas coa celebración dunha xornada de sensibilización no CPI Plurilingüe Cabo da Area de Laxe, na que participaron 29 alumnos de 3º e 4º da ESO. A actividade, incluída na programación conmemorativa do 30º aniversario da entidade, xirou arredor das causas e consecuencias dos accidentes medulares para concienciar aos máis novos sobre a importancia de evitar situacións de risco en estradas, praias e piscinas, como principais focos de sinistralidade entre a mocidade.

A sesión informativa, celebrada onte á mañá, contou coa participación do presidente de Íntegro Adolfo López Baña, encargado de explicar ao alumnado os motivos que se agochan tras os accidentes medulares, e José Manuel, un voluntario do programa, que expuxo o seu caso e deixou impresionado tanto ao alumnado como ao profesorado co seu exemplo de forza, coraxe e superación. A xornada completouse coa proxección do vídeo “A ti tamén che pode pasar”. Ao remate, celebrouse un breve coloquio que os alumnos/as aproveitaron para despexar dúbidas e coñecer o día a día dunha persoa con lesión medular. Nesta ocasión, debido á situación actual derivada da COVID-19, non se realizaron as habituais sesións prácticas, que agardamos poder retomar en breve.

Desde Íntegro queremos agradecer a implicación e colaboración da comunidade educativa na difusión desta campaña co dobre obxectivo de crear conciencia entre os máis novos/as e apostar por unha educación en valores, máis responsable e inclusiva.

Os centros educativos que estean interesados en adherirse a esta campaña ou a calquera dos programas de sensibilización postos en marcha pola entidade, non teñen máis que poñerse en contacto co centro a través do enderezo electrónico formacion@integro.es ou nos teléfonos 981 734 985 e 650 961 649.

post

A conselleira de Emprego e Igualdade destaca o labor do PIMDRural na súa visita a Nantón

  • María Jesús Lorenzana desprazouse esta mañá a Nantón, acompañada polo alcalde de Cabana e varios membros do goberno local, para coñecer de primeira man os programas desenvolvidos pola entidade en materia de emprego e igualdade  
  • Ademais de interesarse polo funcionamento do Centro de Día e Ocupacional, e do Centro Especial de Emprego, mantivo unha xuntanza con varias usuarias do PIMDRural para coñecer polo miúdo este servizo, que conta co financiamento da Xunta de Galicia desde a súa creación en 2016  

A conselleira de Emprego e Igualdade, María Jesús Lorenzana, visitou esta mañá, xunto ao alcalde do Concello de Cabana, as instalacións da asociación Íntegro para coñecer de primeira man o seu funcionamento e os diferentes servizos e programas que se levan a cabo para promover a igualdade e a inclusión social e laboral das persoas con diversidade funcional da Costa da Morte. Durante a súa estancia en Nantón estivo acompañada polo presidente da entidade, Adolfo López Baña; o tesoureiro, Silvestre Couto Torrado, e a directora Noelia Barreira, ademais de varios concelleiros do goberno local e traballadoras da entidade.

A xornada arrincou cunha visita polas dependencias para coñecer polo miúdo o día a día das persoas usuarias da entidade, coas que conversou de forma distendida sobre os diferentes talleres e obradoiros nos que participan. Ademais de interesarse polos diferentes proxectos e servizos que se están a desenvolver tanto no Centro de Día como no Centro Ocupacional, onde tivo ocasión de ver algúns dos produtos da liña comercial Bicos de Amora, especializada en artigos de elaboración artesanal (xabóns de glicerina, pulseiras, candeas, chapas…),  prestou especial atención ás accións formativas e de empregabilidade posta en marcha no noso Centro Especial de Emprego.

Así mesmo, Lorenzana mantivo unha xuntanza coas responsables do Punto de Intervención para Mulleres con Diversidade Funcional do Rural (PIMDRural), desde o que se presta servizo a usuarias de toda a Costa da Morte e que conta co apoio e o financiamento do ente autonómico desde a súa creación en 2016 porque “iniciativas como esta posibilitan chegar a persoas que se atopan en situacións máis complicadas e desfavorecidas, prestando, de maneira personalizada, servizos de proximidade e dotando de novos recursos ao noso medio rural”, subliñou a titular de Emprego e Igualdade.

No que vai de 2022, o Punto de Intervención atendeu xa a 22 mulleres en situación de vulnerabilidade prestándolles información, asesoramento e apoio na adquisición de habilidades persoais e sociais, así como na busca de emprego e/ou mellora da súa capacitación profesional. Así mesmo, estanse a promover diversas accións para incentivar a súa participación na vida social, a atención psicolóxica e a mediación familiar e a posta en marcha de campañas de sensibilización contra a violencia de xénero e a discriminación, que, no caso deste colectivo “atópase nunha situación de maior vulnerabilidade, xa que son as mulleres con discapacidade que viven no medio rural e, polo tanto, sofren unha dobre ou mesmo tripla discriminación: por razón de xénero, de discapacidade e de falta de acceso aos recursos”, matizou a Conselleira.

30 anos de historia

Lorenzana non quixo rematar a súa estancia en Nantón sen antes trasladar os seus parabéns á nosa entidade polo seu 30º aniversario, destacando o importante labor desempeñado “desde este espazo inclusivo que traballa día a día na defensa dos dereitos das persoas con discapacidade, ofrecendo unha atención integral e adaptada ás necesidades de cada usuario e usuaria e traballando para conseguir unha contorna máis acolledora que poña en valor a diversidade”, puntualizou.

Pola súa banda, o presidente de Íntegro agradeceu a visita e recordou “a necesidade de seguir traballando cóbado con cóbado para seguir avanzando na inclusión social e laboral das persoas con discapacidade no medio rural”.

post

Máis Porvir Xestión Social avanza na inclusión laboral de persoas con diversidade funcional da Costa da Morte

A empresa de iniciativa social de Íntegro, que conta xa con 40 trabajadores con discapacidade da Costa da Morte, está especializada na prestación de servizos auxiliares a empresas, institucións e particulares

A empresa de iniciativa social de Íntegro Máis Porvir Xestion Social segue avanzando con paso firme na inclusión laboral das persoas con diversidade funcional da Costa da Morte. Na actualidade, o noso Centro Especial de Emprego conta xa con 40 traballadores/as, que desempeñan numerosos servizos auxiliares a empresas, organismos públicos e particulares da contorna, entre os que destacan diferentes traballos de limpeza de superficies e inmobles, labores de conserxería e hidrolimpezas en exteriores.

Un dos últimos municipios da Costa da Morte en sumarse a este proxecto empresarial sustentable e competitivo foi o Concello de Muxía. Desde o pasado mes de novembro, un grupo de persoas con discapacidade encárgase da realización das labores de limpeza nos centros de educación infantil e primaria de Vilarmide-Eduardo Noya, Virxe da Barca e Os Muíños.

 

Por outra banda, localidades como Mazaricos e Zas xa hai anos que depositaron a súa confianza e compromiso en Máis Porvir para garantir o acceso ao mercado laboral das persoas con discapacidade. No caso do primeiro, a través da contratación do servizo de limpeza da gardería e o ximnasio municipais, así como do CEIP de Pino de Val (antes de que pechara as súas portas), e do CPI A Picota e CEIP San Cosme, onde tamén se realizan labores de conserxería. En Zas, estanse a efectuar tamén traballos de limpeza nos dous centros de saúde, na gardería municipal e no CEIP Labarta Pose de Baio.

Ademais destas accións empresariais, desde a nosa entidade de iniciativa social promóvense tamén numerosas actividades formativas ao longo do ano para proporcionar  aos nosos traballadores/as novas capacidades e habilidades que dean como resultado un cambio social real que contribúa a mellorar a vida das persoas con diversidade funcional.

RURALÍZATE 2022

Outra das iniciativas que un ano máis vimos de poñer en marcha en colaboración co Concello de Cabana é o programa de actividades para persoas maiores de 55 anos Ruralízate, organizado polo consistorio cabanés e xestionado por Máis Porvir.

Hai unha semana arrincou a nova edición, que neste 2022 desenvolverase nas instalacións da Escola de Vela (os mércores) e no Centro de Recursos Íntegro (os xoves) debido ao elevado volume de inscricións. O primeiro obradoiro, que xira arredor das artes manuais, levarase a cabo de febreiro a marzo en horario de 17.30 a 19.30 horas. De abril a maio, haberá outro de arranxos florais que dará paso, no mes de xuño, a un taller de risoterapia. Xa para o último trimestre do ano, están programados outros dous: restauración de mobles (de setembro a novembro) e arranxos de Nadal (de novembro a decembro).

post

30 anos camiñando cara a inclusión das persoas con diversidade funcional da Costa da Morte

Ademais de facer un repaso polas súas tres décadas de historia, a entidade presentou a programación conmemorativa para este 2022 

Con motivo da conmemoración do seu 30º aniversario, celebrado o pasado 1 de febrero, a asociación Íntegro deu a coñecer o calendario de actividades que vén de elaborar para este 2022. A presentación tivo lugar o pasado venres na sede de Nantón, en Cabana de Bergantiños, e contou coa presenza do presidente de Íntegro, Adolfo López Baña; o tesoureiro, Sil Couto (ambos co-fundadores e integrantes da asociación desde as súas orixes); a directora do Centro de Recursos, Noelia Barreira e outros membros da directiva, traballadoras, socios/as e usuarios/as do centro.

Inclusión, igualdade e visibilidade son os tres piares nos que se sustenta a longa e difícil traxectoria de Íntegro desde as súas orixes ata a actualidade. E agora, son tamén os tres conceptos que pretenden achegar aos nenos e nenas da Costa da Morte a través da que será a primeira das actividades programadas para este ano: o concurso escolar de debuxo, poesía e narrativa “camiñando cara a inclusión”, que xa se puxo en marcha o pasado día 1 nos centros educativos de primaria para concienciar aos escolares sobre a disCapacidade e a diversidade, e promover a inclusión e a igualdade entre os máis cativos/as. Os traballos gañadores daranse a coñecer no mes de abril.

O acto central da programación conmemorativa deste 2022, desenvolverase o vindeiro mes de xuño no auditorio municipal de Cabana de Bergantiños e terá como protagonistas ás persoas usuarias do centro, que serán as encargadas de realizar unha viaxe a través do tempo para dar a coñecer a historia da entidade desde os seus comezos en 1992.

Xa en pleno verán, celebrarse a “Romaría da Inclusión”, un evento festivo e reivindicativo, aberto a toda a veciñanza, que terá como escenario o Centro de Recursos Íntegro, en Nantón. Será unha xornada para o rencontro e a celebración ao que asistirán usuarios/as, socios/as, familiares, membros da directiva, etc… O programa completarase cun ciclo de conferencias sobre inclusión e diversidade, previsto para o 2º semestre do ano, no que se abordarán cuestións relativas á sexualidade, o emprego, etc. Ademais, haberá unha edición especial do programa de “Prevención da lesión medular”.

30 anos pasaron desde aquel 1 de febrero de 1992, no que 7 persoas con discapacidade de Ponteceso e Cabana decidiron unir esforzos para crear unha entidade que na actualidade conta xa con 45 persoas usuarias, das que 22 son públicas (10 Centro de Día e 12 Centro Ocupacional). Agora Íntegro asume un novo reto: acadar as 63 prazas de ocupación e seguir arrincando sorrisos cada día entre aos nosos usuarios e usuarias.

TRES DÉCADAS DE HISTORIA.  Adolfo López Baña, presidente da asociación Íntegro

Choveu moito desde aquel 1 de febreiro de 1992, cando sete persoas con Discapacidade de Ponteceso e Cabana decidiron unir esforzos para constituír unha entidade, que inicialmente recibiu o nome de Asociación de Minusválidos PONTE-CABANA. Desde entón, un gran número de persoas foron sumando folgos, ideas e moito traballo ata formar o que hoxe coñecemos como a Asociación INTEGRO dás persoas con Diversidade Funcional da Costa da Morte. Co traballo de todos foise crecendo de forma estruturada para fortalecer todas as iniciativas e profesionalizar os servizos postos en marcha ata a actualidade.

As orixes

As primeiras xuntanzas da entidade celebrábanse cada sábado no bar A Pesqueira de Ponteceso. E desde alí, dado que a maioría dos integrantes da entidade eramos lesionados medulares,  decidimos poñer en marcha as primeiras accións de sensibilización para informar á poboación sobre as causas e consecuencias de sufrir un accidente medular. Así botou andar polos centros educativos da Costa da Morte a “campaña de prevención da lesión medular”,  coa que seguimos percorrendo os colexios para concienciar aos máis novos.

Os comezos non foron doados. Ademais de atrancos burocráticos, os recursos económicos escaseaban. Así que, tiramos de imaxinación e comezamos a realizar actividades sociais para recadar fondos. Un dos eventos con máis sona e arraigo entre a veciñanza da comarca foron os desfiles de moda. Xa por aquel entón, tiñamos claro que todas as actividades tiñan que se integradoras (descoñeciamos o termo inclusión), e por iso nos pases de moda participaban modelos con e sen discapacidade. Ademais, este tipo de eventos eran a ocasión perfecta para convivir durante días todos xuntos e en igualdade. Que tempo aqueles!

A medida que a entidade medraba en socios/as e actividades, a necesidade de dispoñer dun local comezou a ser prioritario. Despois de moitas conversas cos alcaldes de Ponteceso e Cabana, o rexedor cabanés, que naquela época era o Sr. Fariña, facilitou non só un local, senón tamén o contacto con outros alcaldes e empresarios da contorna, así como con outras administracións públicas, como a Deputación da Coruña, para darnos a coñecer e arrincar a nosa particular andaina na defensa dos dereitos das persoas con diversidade. Así puxemos en marcha unha primeira sede, baleira de material, pero chea de ideas, soños, ilusións e proxectos. Entre os primeiros destaca a creación do equipo de baloncesto adaptado Ponte-Cabana, único participante galego na Liga Autonómica formado integramente por lesionados medulares. Ao mesmo tempo, constituíuse ademais o grupo de xadrez.

Emprego e formación

Desde as nosas orixes, comprometémonos coa formación e a busca de emprego como elementos determinantes para a consecución dunha vida plena autónoma. Grazas a COGAMI logramos os apoios necesarios para poñer en valor ao noso colectivo e iniciar proxectos tan innovadores como ECOEMPREGO, unha iniciativa medioambiental enmarcada no programa europeo HORIZON, pioneiro na recollida e reciclaxe de electrodomésticos, papel e cartón, porta a porta, no que colaboraron ademais case todos os concellos da comarca. Con este proxecto apareceron os primeiros contedores de papel e cartón na zona, pero tamén algunhas carencias, como a ausencia de traballadores con discapacidade na zona rural, o que provocou que tiveramos que recorrer a varias asociacións da Coruña para poder poñer en funcionamento dito proxecto. Este feito, propiciou a realización dun estudo sobre a poboación con diversidade da Costa da Morte e os datos foron reveladores: elevada taxa de analfabetismo, escasa incorporación ao mercado laboral e unha visión demoledora da sociedade sobre o noso colectivo que propiciou a nosa presenza, máis ca nunca, en todos os foros, xornadas, congresos e eventos de calquera índole para alzar a nosa voz e gañar maior visibilidade.

Aproveitando as instalacións das Torres do Allo (Zas), nas que se desenvolvía o proxecto Ecoemprego, puxéronse en marcha as primeiras accións formativas da entidade: uns cursos sobre xardinería e invernadoiros, nos que participaron por primeira vez persoas con discapacidade residentes na contorna, e nos que ademais de coñecementos específicos, poñíase en valor a formación e o traballo abordando cuestións relacionadas coa independencia económica e familiar, valor social, crear familia, poder adquisitivo, empoderamento, etc… A estes obradoiros seguiron outros de carpintería e coiro nun local cedido polo Concello de Cabana no lugar do Pendón. Co paso do tempo, a demanda de formación e asesoramento ía en aumento e moi pronto xurdiu a necesidade de crear un centro de rehabilitación integral capaz de atender as necesidades do noso colectivo. Unha construción que foi posible grazas á cesión duns terreos por parte do Concello de Cabana, e aos apoios recibidos desde outras institucións como a Xunta de Galicia, a Deputación da Coruña, as administracións locais da Costa da Morte, e entidades como COGAMI, a Fundación ONCE, asociación NERIA, etc… Así nace o noso Centro de Recursos Íntegro.

A falta de contratación laboral de persoas con discapacidade por parte do tecido empresarial da contorna propiciou a creación do Centro Especial de Emprego ÍNTEGRO Xardinería e Medioambiente, nun terreo de 5.000 m2 cedido pola familia do ex-alcalde de Zas Julio Díaz, e especializado en labores de mantemento de xardíns e elaboración de produtos da horta con certificación ecolóxica, que deu emprego a 15 persoas.

No ano 2001, Íntegro inaugura as novas instalacións de Nantón, máis amplas e cómodas, co obxectivo de seguir medrando e atendendo as necesidades da poboación do rural. O concerto de prazas públicas da Consellería de Política Social favorece o crecemento e desenvolvemento do noso centro, que a Xunta de Galicia declara como entidade de Utilidade Publica pola Orde do 22 de outubro de 2010, da Consellería de Presidencia, Administracións Públicas e Xustiza.

Dentro do noso compromiso coa inclusión laboral de persoas con discapacidade, en xullo de 2013 volvemos apostar pola creación de emprego a través da constitución do Centro Especial de Emprego de iniciativa social sen animo de lucro Máis Porvir Xestión Social, un espazo dedicado á prestación de servizos socio-sanitarios e labores auxiliares para empresas e administracións públicas que na actualidade ofrece traballo a 42 persoas,  das que 38 teñen algún tipo de discapacidade. Desde Íntegro traballamos para que estes CEE de iniciativa social sexan o trampolín ao mercado empresarial.

 

O futuro de Integro

Actualmente, as entidades sociais vivimos momentos de cambio e constante evolución. En Íntegro damos a benvida ao 2022 con novos retos e ambiciosos proxectos para seguir medrando, entre os que destacan o incremento de prazas públicas concertadas, fogar residencial,  sustentabilidade económica ou a posta en marcha de novas políticas de conservación ambiental, sen descoidar os valores do que marcan o noso traballo diario. O compromiso social, a igualdade, a defensa dos dereitos, a participación social, a transparencia e a mellora continua seguirán constituíndo os cimentos da nosa historia.

A entidade, no seu desenvolvemento estratéxico para o período 2022-2025, deberá medrar coa pretensión de que cada área de actuación sexa autónoma e autosuficiente. ÍNTEGRO como entidade corporativa, ten que selo de forma completa. Por iso, os retos estratéxicos para os vindeiros anos centraranse no desenvolvemento corporativo, o afondamento nunha metodoloxía de traballo baseada nos apoios personalizados, a incorporación de novos servizos e o desenvolvemento empresarial do noso CEE + Porvir.

O que nunca cambiará, pasen 30 ou 100 anos, é o feito de que seguiremos sendo unha entidade comprometida coa nosa misión de alcanzar a inclusión das persoas con diversidad funcional e recoñecida na sociedade polos nosos valores, o traballo directo coas persoas con diversidade funcional e o compromiso coa inclusión no medio rural.

post

Aberto o prazo de inscrición para o curso de limpeza de superficies e mobiliario en edificios e locais

  • Trátase dunha acción formativa, dirixida a persoas con disCapacidade e en situación de desemprego, que vén de conceder a Fundación ONCE, e co-financiada polo Fondo Social Europeo (FSE), no marco do Programa Operativo POISES 2014-2020
  • O obradoiro, de 284 horas de duración, dará comezo o vindeiro día 26 e prolongarase ata o 12 de maio

Dentro da convocatoria de axudas económicas a proxectos de reforzo da empregabilidade de persoas con discapacidade “UNO a UNO”, a asociación Íntegro vén de recibir unha subvención para a realización dunha acción formativa adaptada sobre “limpeza de superficies e mobiliario en edificios e locais”, no marco do Programa Operativo POISES 2014-2020, co-financiado pola Fundación ONCE e o Fondo Social Europeo (FSE).

O curso, que terá unha duración de 284 horas, incluirá formación teórica específica en materia de limpeza así como as correspondentes sesións prácticas en empresas. Ademais, levarase a cabo un programa de aprendizaxe transversal e de apoio na posterior busca activa de emprego para promover a inclusión laboral deste colectivo. As clases, que se desenvolverán nas instalacións de Íntegro, darán comezo o vindeiro 26 de xaneiro e rematarán o 12 de maio.

As persoas interesadas en participar nesta formación deberán ter recoñecida unha discapacidade igual ou superior ao 33% e atoparse en situación de desemprego e/ou inactividade. Os interesados/as poderán obter máis información chamando ao 981 734 985, de luns a venres en horario de 09.00 a 17.00 horas, ou enviando un mail ao enderezo electrónico info@integro.es. O 10 de xaneiro arrincarán as primeiras entrevistas do proceso de selección de candidatos/as. Non o deixes pasar!

post

Manifesto Día Internacional e Europeo das Persoas con Discapacidade

Pola culminación da primeira reforma social da Constitución Española

Con motivo do Día Internacional e Europeo das Persoas con Discapacidade, que cada ano se celebra o día 3 de decembro, no correspondente ao ano 2021, o movemento social da discapacidade agrupado de xeito unitario en torno ao CERMI fai público o seguinte

M A N I F E S T O

Nas sociedades democráticas, a Constitución é a máxima e superior expresión do ordenamento xurídico; a que establece os dereitos e deberes da cidadanía; a que ordena a convivencia social conforme ós principios e valores da liberdade, a igualdade e o pluralismo; a que define e asegura as formas democráticas de goberno e a que regula o funcionamento dos poderes públicos, que deben estar ó servizo da comunidade, promovendo o ben común. As persoas con discapacidade, como parte valiosa da familia humana e das comunidades sociais e políticas nas que esta se organiza, deben ter reflexo nas Constitucións dende un enfoque esixente de dereitos humanos, que
garanta a súa inclusión, participación e benestar, sen discriminacións ni relegacións de ningún tipo.

A Constitución Española de 1978, vixente na actualidade, incorporou expresamente ás persoas con discapacidade ao seu texto, dedicándolles o artigo 49, o que representou un gran avance por canto este grupo social, tantas veces omitido e desconsiderado ó longo da historia, gozaba de visibilidade, sendo relevante aos efectos da promoción e a protección constitucionais dos seus dereitos.

A pesar de ese logro -poucas Constitucións no mundo nese momento tiñan presente as persoas con discapacidade-, tras mais de corenta anos dende a aprobación da Constitución Española, o seu artigo 49 precisa unha renovación, porque nin a terminoloxía empregada nin o contido están alienados ca visión plena de dereitos humanos, que é o único abordaxe admisible na relación ca discapacidade. A Constitución de 1978 mellórase a si mesma, afonda e estende os seus principios, valores e mandatos se actualiza a súa mirada
sobre as persoas con discapacidade.

Reforma do art.49

Consciente desta necesidade de cambio, o movemento social da discapacidade leva anos propoñendo a reforma do artigo 49 da Constitución Española, pasando a ser a primeira de contido nitidamente social do Texto Legal máximo nas máis de catro décadas de vixencia. E isto, sempre co maior dos consensos políticos e sociais, pois os dereitos das persoas con discapacidade son un elemento do acervo compartido das sociedades democráticas avanzadas, que serven para superar as disputas e as fracturas
tan estendidas hoxe na vida política.

Tras anos de esforzo do sector social da discapacidade, auténtico promotor deste proceso de modificación constitucional, na primavera deste ano 2021 chegaba por fin as Cortes Xerais, remitido polo Goberno de España, un proxecto de reforma do artigo 49 da Constitución Española, que agarda ser debatido e tramitado, se reúne as maiorías reforzadas precisas cando se trata de cambios no texto constitucional, para resultar aprobado e entrar finalmente en vigor.

A reforma proposta, produto de debates parlamentarios, sociais e académicos previos, que acadaron un elevado grado de coincidencia, desterra expresións ferintes e insostibles por mais tempo para referirse as persoas con discapacidade (“diminuídos”) e dota dun novo contido o artigo con arranxo aos conceptos, valores e propósitos que hoxe configuran un entendemento e práctica apropiados dos dereitos e deberes das persoas con discapacidade, incluídas as mulleres e nenas, a quen nomean expresamente. O clamor cidadán que alentou esta reforma -que en si e por si mesma é unha mellora do país, que eleva a calidade de texto constitucional e o seu nivel de esixencia ética, política e xurídica, ao comprometerse máis intensamente cos dereitos, a inclusión e o benestar con esa parte da diversidade social que son
as persoas con discapacidade- debe verse necesariamente acompañado por tódalas forzas políticas con representación parlamentaria, mediante a expresión dun apoio firme e claro.

Ante este fito social, que despois de moitos avatares e dilacións hoxe é mais real e próximo ca nunca, dende o movemento CERMI, no Día Internacional e Europeo das Persoas con Discapacidade, reclamamos a todos os partidos políticos, e en especial a aqueles que mostraron reticencias, que se sumen, co seu respaldo, intervindo no Parlamento para perfeccionar o texto de partida, á primeira reforma social da Constitución Española, que vén da man das persoas con discapacidade e das súas familias, e que non pretende senón facer do noso país un proxecto máis suxestivo e decente de vida en común.

3 de decembro de 2021

post

Íntegro amplía o seu cadro de persoal coa contratación dunha psicóloga

Xunto coa educadora e a traballadora social, a nova profesional prestará atención especializada a persoas usuarias e familias da entidade ademais de desenvolver o servizo de atención psicolóxica do PIMDRural

A asociación Íntegro das Persoas con Diversidade  Funcional da Costa da Morte vén de ampliar o seu cadro de persoal coa contratación dunha psicóloga que prestará atención especializada, tanto de xeito individualizado como en intervencións grupais, a persoas usuarias e familias, ademais de desenvolver o servizo de atención psicolóxica do Punto de Intervención para Mulleres con Diversidade do Rural (PIMDRural).

Desde este mes de novembro, a entidade de Nantón suma así unha nova profesional ao seu equipo, integrado xa por unha educadora e unha traballadora social. Entre as súas novas funcións destaca a súa participación na planificación, elaboración, desenvolvemento e avaliación dos Plans Individuais de Atención (PIA) das persoas usuarias, así como ofrecer asesoramento e apoio psicolóxico ás familias que o precisen. Así mesmo,  facilitará ás persoas profesionais de atención directa, pautas e estratexias de intervención sobre os problemas emocionais ou de conduta detectados, ademais de informar, de xeito individualizado, sobre a evolución e necesidades de cada usuario/a aos familiares que así o soliciten.  Outra das facetas a desenvolver será a de  participar na elaboración de proxectos que requiran dun estudo psicolóxico para avaliar posibles beneficios sobre as persoas usuarias.

PIMD Rural

Desde o ano 2015 a asociación Íntegro conta cun Punto de Intervención para Mulleres con Diversidade do Rural (PIMDRural). Trátase dun programa de atención personalizada e especializada,  co-financiado pola Consellería de Emprego e Igualdade a través da Secretaría Xeral de Igualdade e o Fondo Social Europeo (FSE), dirixido a mulleres en situación de especial vulnerabilidade que residen na zona rural da Costa da Morte.

Durante o período comprendido entre o 1 outubro de 2020 e o 30 de setembro de 2021, desde o PIMDRural prestouse atención a preto de medio centenar de mulleres, a maioría delas con disCapacidade. Entre os servizos máis demandados polas usuarias destacan o de información e orientación sobre recursos singularizados de atención e asesoramento persoal e social, así como apoio directo  nas relacións con outras entidades, organismos e servizos que lles faciliten ás persoas o seu proceso de integración social; mediación  intercultural e/ou familiar, a través da posta en marcha de habilidades persoais e sociais básicas ou de competencias para a mellora da empregabilidade, e orientación laboral e de acompañamento na busca de emprego, así como a prospección do mercado de traballo, a intermediación e a titorización laboral. Ademais do acompañamento, ás persoas usuarias tamén dispoñen dun servizo de transporte gratuíto para os seus desprazamentos.

 

Por outra banda, desde o Punto de Intervención para Mulleres leváronse a cabo numerosos acompañamentos na xestión de trámites administrativos, xestións económicas, citas médicas, etc. O desenvolvemento de accións formativas, dirixidas a grupos reducidos para ofrecer unha atención máis personalizada e adaptada ao protocolo COVID, é outro dos piares fundamentais para acadar a igualdade de oportunidades. Neste último ano, leváronse a cabo diversos talleres relacionados coas habilidades sociais e pre-laborais, autocoidado e hixiene persoal, e o manexo do teléfono intelixente, un dos máis demandados polas persoas usuarias do servizo.

 

 

 

post

Diversiplás camiña con paso firme cara a sostibilidade da Costa da Morte

  • Tras a excelente acollida que tiveron as actividades do programa de sensibilización levadas a cabo en setembro e no que participaron preto de 75 persoas
  • Trátase dun proxecto coordinado por Íntegro, co apoio do Galp Costa da Morte, e financiado polo Fondo Europeo Marítimo e de Pesca (FEMP), a través da Consellería do Mar

Co obxectivo de promover a redución do lixo mariño e a mellora da biodiversidade, desde a inclusión social e laboral das persoas con diversidade funcional, o pasado mes botou a andar na Costa da Morte Diversiplás, + diverso – plástico: un proxecto dirixido á recuperación e valorización de residuos plásticos derivados da actividade marisqueira e da pesca, xurdido ao abeiro do Programa Tanza e coordinado pola asociación Íntegro, co apoio do Galp Costa da Morte, e o financiamento do Fondo Europeo Marítimo e da Pesca (FEMP), a través da Consellería do Mar da Xunta de Galicia.

Precisamente, as persoas usuarias de Íntegro, principais protagonistas desta iniciativa, foron as encargadas de dar os primeiros pasos dun camiño que xa avanza cara unha contorna máis sostible e respectuosa co medio ambiente. Así, coincidindo coa chegada de setembro, arrincaron as primeiras accións de dinamización deste 2021, destinadas a  sensibilizar sobre a presenza e o impacto do lixo nas zonas costeiras- tanto en praias como no litoral e nas zonas marítimo-pesqueiras- e poñer en valor as utilidades da reciclaxe do plástico, a través da creación de proxectos de economía circular.

Setembro en ruta

A primeira saída á rúa non podía ter unha estrea mellor. Dentro da programación das Festiletras (Ponteceso), o pasado día 3 Divesiplás participou no Festival da Ciencia do Couto (Festiciencias) para dar a coñecer o proxecto ambiental entre a rapazada e activar a futura rede de colaboracións cos centros de ensino da contorna para a recollida de plásticos, previsto para os vindeiros meses. Ademais, ao longo da xornada, realizouse unha actividade demostrativa do proxecto Precius Plastic a cargo de Adrián Coira, colaborador de Diversiplás e experto en reciclaxe de residuos, que nos deixou moi claro o proceso de transformación dos refugallos. A segunda actividade, celebrada en Nantón o mércores 8, consistiu na realización dun taller informativo sobre o proxecto, dirixido á comunidade de usuarios/as de Integro, xunto cunha actividade de sensibilización centrada nos plásticos e o seu impacto no medio mariño.

Na segunda quincena de setembro continuaron as saídas pola Costa da Morte para achegarse ao traballo que realizan os e as profesionais do mar, que tamén colaboran no proxecto. A primeira parada tivo lugar o día 15 no peirao de Corme (Ponteceso) para manter un encontro coa Asociación de Redeiras Illa da Estrela de Corme, na que participaron preto de 30 persoas. Tras visitar o taller e coñecer de primeira man a súa actividade diaria, centrada na reparación de redes e os novos usos, tamén se interesaron por coñecer outros aspectos derivados do seu traballo como enfermidades e riscos laborais, asociacionismo, etc. Así mesmo, a diversificación do sector, orientado á confección e deseño de pezas artesanais, complementos de moda, deseño de lámpadas e/ou accesorios deportivos acaparou a atención dos/as participantes que non dubidaron en preguntar pola nova vida que lles dan aos útiles de pesca, contribuíndo así ao coidado do planeta e á súa propia reciclaxe laboral.  A xornada rematou co compromiso de futuras colaboracións na recollida e clasificación de refugallos, e algúns usuarios/as probando sorte na confección de nós con cabos de rede.

 

A visita á Agrupación de mariscadoras da Confraría de Camariñas, realizada o pasado día 22, puxo o punto e final ao programa de actividades previsto para este mes e no que participaron preto de 75 persoas. Nunha xornada moi interesante e participativa, as persoas usuarias achegáronse ao mundo do marisqueo para coñecer a profesión máis de preto e desde dentro, da man dunha das integrantes da asociación (zonas, capturas, especies, mareas,…).

Tamén se abordou a presenza de lixo mariño no medio, en boa parte derivado da actividade pesqueira, e a importancia de reciclar e manter limpo o litoral. De feito, a limpeza e recollida de refugallos que se ía desenvolver na zona de marisqueo, trasladouse á terra, ao merendeiro de Ariño, onde se procedeu á recollida dunha gran cantidade de microplásticos, que levaban días na zona e que o vento estaba empuxando cara o mar. Con paciencia e un traballo case artesanal, recolléronse un a un todos os restos de plástico, diversos fragmentos, papeis e moitas cabichas.

Futuras accións

Tras esta primeira fase de divulgación e sensibilización, en Diversiplás seguimos a traballar desde a inclusión para unha Costa da Morte máis sostible. E entre os novos obxectivos figuran xa a posta en marcha dunha Rede de entidades colaboradoras (centros de ensino, concellos e confrarías da Costa da Morte) para a xestión de puntos de recollida de plásticos e a creación dun taller para o aproveitamento e tratamento dos residuos plásticos obtidos do mar, que terá que agardar ao 2022.

Permanecede atentos/as porque moi pronto volveremos con máis actividades, moitas novidades e un montón de sorpresas que vos van encantar. E se o que che apetece é  colaborar e participar nas accións de sensibilización que levamos a cabo, non perdas a oportunidade de facelo. Chama xa ao 650 961 649 e únete ao noso equipo!

               

post

Íntegro recibe unha axuda da Consellería do Mar para a posta en marcha de Diversiplás, + diverso – plástico

  • Trátase dun proxecto medioambiental promovido pola entidade e co-financiado a través do programa operativo do Fondo Europeo Marítimo e da Pesca (FEMP)
  • Ademais de promover a inclusión social e laboral de persoas con discapacidade, desenvolverá accións de sensibilización ambiental e tratamento de residuos plásticos en colaboración con concellos, centros educativos e o sector pesqueiro da Costa da Morte

A asociación Íntegro vén de recibir unha subvención procedente da Dirección Xeral de Desenvolvemento Pesqueiro da Consellería do Mar, a través do programa operativo do Fondo Europeo Marítimo e da Pesca (FEMP), para a posta en marcha dun ambicioso proxecto denominado Diversiplás, + Diverso – Plástico, dirixido a promover e fomentar o crecemento económico, a inclusión social, a creación de emprego e o apoio á empregabilidade así como a mobilidade laboral nas comunidades costeiras e de interior, dependentes da pesca e a acuicultura, incluíndo a diversificación das actividades realizadas no marco da pesca e respecto doutros sectores da economía marítima.

O proxecto, que se desenvolverá en dúas anualidades (2021-2022), contempla diversas liñas de actuación entre as que destaca a creación dun taller para o aproveitamento e tratamento de residuos plásticos obtidos do mar así como o desenvolvemento dun programa de divulgación, sensibilización e concienciación orientado á erradicación e valorización dos residuos, tanto mariños como costeiros, que contará coa colaboración e implicación de diferentes entidades, administracións locais e outros colectivos da Costa da Morte (confrarías, redeiras, sector pesqueiro, comunidade escolar, colectivo de inclusión social), procurando así a implicación de toda a sociedade para contribuír a reforzar o dinamismo social, económico e ambiental do noso litoral. Deste xeito, ademais de promover a redución do lixo mariño e a mellora da biodiversidade e dos ecosistemas mariños, potenciaremos a autonomía e a inclusión das persoas con discapacidade no ámbito social e laboral.