O proxecto conta co co-financiamento da Xunta de Galicia, a través dos fondos do 0.7% do IRPF da declaración da renda procedentes de marcar o cadro de “Actividades de interese xeral consideradas de interese social” 

A asociación Íntegro vén de completar un proxecto de mellora das instalacións do seu Centro de Recursos de Nantón, situado no Concello de Cabana de Bergantiños, co que se beneficiarán directamente as 46 persoas usuarias do servizo, maioritariamente persoas con discapacidade intelectual procedentes da Costa da Morte.

A actuación centrouse na redistribución e optimización dos espazos interiores do centro, co obxectivo de mellorar a funcionalidade e o confort das instalacións. Entre as intervencións máis destacadas figuran a ampliación do comedor e do ximnasio, así como a reubicación da aula empregada como centro de día nun novo espazo que agora conta con ventilación e iluminación natural, mellorando así as condicións ambientais para as persoas usuarias e profesionais.

Este proxecto foi posible grazas ao apoio da Consellería de Política Social e Igualdade da Xunta de Galicia, que financiou arredor do 90% do custo total a través de COGAMI (Confederación Galega de Persoas con Discapacidade), con cargo aos fondos procedentes do IRPF, concretamente da asignación voluntaria do cadro 106 da declaración da renda destinado a “Actividades de Interese Social”.

A asociación Íntegro, con sede en Nantón, é unha entidade sen ánimo de lucro que dende o ano 1992 traballa pola inclusión social e laboral das persoas con diversidade funcional das comarcas de Bergantiños, Soneira e Fisterra. Na actualidade, xestiona un Centro de Día e un Centro Ocupacional e forma parte tanto de COGAMI como da Confederación Española de Persoas con Discapacidade Física e Orgánica (COCEMFE).

Con esta intervención, Íntegro reforza o seu compromiso coa calidade dos servizos que presta, apostando por espazos máis accesibles, confortables e adaptados ás necesidades das persoas usuarias.

Íntegro patrocina ao equipo C.A.R. O Bosque, que debutará coas novas camisetas o 12 de abril na carreira que se celebrará en Vimianzo

A asociación Íntegro únese ao equipo C.A.R (Centro de Alto Rendemento) O Bosque como patrocinador oficial, reafirmando así o seu compromiso coa inclusión social a través do deporte. A este grupo de corredores afeccionados, cuxos rostros son xa ben coñecidos no circuíto “Correndo pola Costa”, móveo o deporte, a amizade, a natureza e as gañas de pasalo ben. E, a partir de agora, un novo lema: o que lucirán nas súas novas camisetas: A meta é a inclusión. Porque cada paso conta e cada carreira é unha oportunidade para facer do deporte un espazo máis xusto e accesible para todos e todas.

O C.A.R O Bosque vestirá por primeira vez a súa nova camiseta o próximo 12 de abril en Vimianzo, disposto a demostrar que cando corres con valores, sempre chegas primeiro.

Desde Íntegro desexámoslles toda a sorte do mundo (aínda que sabemos que xa gañaron co seu espírito e actitude) e convidamos a toda a veciñanza a animar e a correr con eles. Porque ao final, a carreira máis importante é a da loita pola igualdade e a inclusión.

Arredor de 700 escolares da Costa da Morte participarán nas actividades de sensibilización levadas a cabo a través de iniciativas como a Diverescola, Visítanos, Diversiplás ou a campaña de prevención de lesións medulares

A asociación Íntegro pon en marcha unha nova edición de CapacítaT, un programa educativo que busca sensibilizar ao alumnado en materia de diversidade promovendo actitudes positivas cara a inclusión. A través de diversas actividades interactivas, arredor duns 700 escolares da Costa da Morte terán a oportunidade de reflexionar sobre crenzas erróneas e descubrir as potencialidades das persoas con diferentes capacidades.

Diverescola: sensibilizando dende a infancia

Unha das primeiras actividades de sensibilización postas en marcha nesta nova edición chegou da man da Diverescola, un programa encamiñado a achegar ao alumnado de 6º de educación infantil e 2º de primaria o concepto de diversidade e inclusión real. As primeiras paradas tiveron lugar xa en varios centros de ensino dos concellos de Zas e Cabana de Bergantiños. A través de actividades didácticas e participativas, como a lectura do conto “Súper Lucía” e o visionado da curtametraxe “Historia do ourizo”, o alumnado de 2º de educación primaria pode descubrir a riqueza da diversidade e a importancia de respectar e tratar ben a todas as persoas. Pola súa banda, os pequenos/as de 6º de infantil fano a través dun contacontos guiado, adaptado ás súas capacidades e nivel de comprensión.

No que vai de ano, xa visitamos as aulas do CPI de Zas (xaneiro) e do CEIP Labarta Pose de Baio (12/02), ademais do CPI As Revoltas, en Cabana de Bergantiños, o pasado día 18. Para o mes de marzo, está previsto un encontro cos nenos e nenas do CIP Plurilingüe Cabo de Area de Laxe (luns 3) e xa en abril (día 8), cos do CEIP Plurilingüe Nétoma-Razo, en Carballo.

Visítanos: convivencia e aprendizaxe

Dentro das accións de visibilidade e inclusión efectiva, en Íntegro levamos a cabo outro programa denominado Visítanos, que permite ao alumnado de 4º e 5º de educación primaria compartir unha xornada coas persoas usuarias do centro, promovendo o intercambio, a convivencia e o desenvolvemento da empatía.

Hoxe mesmo, un grupo de alumnos/as do CEIP Labarta Pose de Baio (Zas) achegáronse a Nantón para gozar dunha xornada repleta de actividades que incluíu unha breve recepción e presentación sobre diversidade e inclusión; un taller de reciclaxe de plásticos para elaborar un obsequio; visita á nosa escola de cociña para preparar petiscos en colaboración cos nosos usuarios/as; elaboración de xabóns e pulseiras nos talleres ocupacionais; creación dun mural con recordo para o colexio e realización do circuíto con cadeira de rodas “Ponte no meu lugar” para experimentar en primeira persoa a mobilidade reducida. Para o mes de marzo, agardamos a visita do alumnado do CIP Plurilingüe Cabo de Area de Laxe (día 27); en abril, farano os nenos e nenas do CEIP Plurilingüe de Nétoma- Razo (día 10) e xa en xuño será a quenda dos escolares do CEIP Plurilingüe San Vicenzo de Vimianzo (día 5).

Campaña de Prevención de Lesións Medulares

Outra das accións centrais de Capacíta-T é campaña de prevención de lesións medulares dirixida ao alumnado de secundaria. A partir da presentación dun vídeo sobre as causas e consecuencias de sufrir un accidente medular, xérase un escenario de aprendizaxe grupal, para debater e resolver dúbidas, explicando en profundidade todas as cuestións relativas a este tipo de lesións. Con estas charlas, inténtase contribuír á paulatina redución dos índices de discapacidade adquirida na poboación en xeral, e entre a xuventude en particular.

A primeira parada deste 2025 xa está fixada no calendario para o vindeiro mes de abril no CPI Plurilingüe Cabo da Area de Laxe. Así mesmo, tamén está confirmada a participación dos tres institutos carballeses pero sen data establecida.

Na actualidade a asociación Íntegro atende directamente a 48 persoas con diversidade funcional da Costa da Morte e ás súas familias. Desde os nosos centros de Día e Ocupacional, proporcionamos apoios para mellorar a autonomía persoal e social das persoas con discapacidade.

Diversiplás: Concienciación sobre a Reciclaxe

Diversiplás é un proxecto destinado á recuperación e valorización de residuos plásticos. No marco do programa CapacítaT desenvolvemos diversas actividades de sensibilización a través do xogo, para concienciar sobre a importancia da reciclaxe de residuos plásticos dende a infancia.

As actividades propostas para a edición 2025 teñen como obxectivo a adquisición de coñecementos relacionados coa reciclaxe, identificar e diferenciar os diferentes tipos de plásticos que existen e a importancia de darlle unha segunda vida aos produtos que forman parte da nosa vida cotiá.

Voluntariado xuvenil

Neste 2025, en Íntegro volvemos apostar polas persoas voluntarias para poñer en marcha un novo proxecto interxeracional que dará comezo no mes de marzo. Se es unha persoa activa e comprometida coa sociedade e a contorna, tes entre 16 e 35 anos, e un gran espírito solidario, chama ao 981 734 985 e infórmate!

PIMD Rural

Por outra banda, queremos lembrar que ao longo do ano permanecerá aberto o Punto de Intervención para Mulleres con Diversidade do Rural (PIMDRural), promovido por Íntegro e co-financiado polo Fondo Social Europeo (FSE) ao abeiro do programa operativo FSE Galicia 2014-2020. Se es muller con ou sen discapacidade, resides no rural e queres recibir formación ou precisas apoio e/ou asesoramento, non dubides en poñerte en contacto con nós por teléfono ou enviando un mail a info@integro.es.

As actuacións foron financiadas a través do Plan de Prioridades da entidade

O Centro de Recursos Íntegro segue avanzando na mellora das súas instalacións para ofrecer un servizo de maior calidade e adaptado ás necesidades das persoas usuarias. Neste 2025, grazas ao apoio da Fundación ONCE, executáronse diversas actuacións no marco do programa “Equipamento, axudas técnicas e seguridade do Centro de Recursos Íntegro”, co obxectivo de optimizar tanto o confort como a accesibilidade do centro.

A través deste programa, a Fundación ONCE destinou 10.000 €, que foron investidos na renovación do mobiliario, a adquisición dunha grúa, a instalación de armarios e a mellora dos sistemas de seguridade e vixilancia, reforzando así a protección e benestar das persoas usuarias.

A Asociación Íntegro, fundada en 1992, é unha entidade social sen ánimo de lucro que traballa pola inclusión social e laboral das persoas con diversidade funcional na Costa da Morte. Actualmente, conta cun Centro de Día e un Centro Ocupacional, que atenden a 45 persoas das comarcas de Bergantiños, Soneira e Fisterra. A entidade forma parte da Confederación Galega de Persoas con Discapacidade (COGAMI) e está integrada na Confederación Española de Persoas con Discapacidade Física e Orgánica (COCEMFE).