post

Restituído o servizo de atención presencial individualizada do PIMD Rural

  • As interesadas, prioritariamente mulleres con discapacidade do rural, deberán solicitar cita previa a través do 981 734 985 ou en info@integro.es
  • Esta prestación forma parte do Punto de Intervención para Mulleres, financiado pola Secretaría Xeral de Igualdade da Xunta de Galicia e o Fondo Social Europeo (FSE)

Tras finalizar o estado de alarma, o Punto de Intervención para Mulleres con Diversidade Funcional do Rural (PIMD Rural) vai, pouco a pouco, recuperando o seu funcionamento habitual, aínda que adaptado ás novas restricións para garantir as medidas de protección e hixiene establecidas para evitar futuros contaxios. A atención telefónica e online, prestada desde Íntegro durante o período de confinamento, deu paso nesta etapa de transición cara unha nova normalidade a un servizo de atención presencial e individualizada nas nosas instalacións de Nantón (Cabana de Bergantiños), a través do sistema de cita previa, co fin de continuar ofrecendo asesoramento e información integral a un dos colectivos máis vulnerables, especialmente, na contorna rural.

Ademais de prestar colaboración en materia de orientación e intermediación laboral e profesional para a mellora da empregabilidade, desde o punto de intervención tamén se está a ofrecer axuda en materia de recursos, apoio psicolóxico e mediación familiar para a resolución de posibles conflitos xurdidos no ámbito doméstico durante a corentena.   

As mulleres, prioritariamente, con diversidade funcional que residan no ámbito rural e estean interesadas en solicitar este servizo de atención presencial, deberán poñerse en contacto con Íntegro chamando previamente ao 981 734 985 ou enviando un correo electrónico a info@integro.es para concertar a súa cita. No momento de acudir ao centro, deberán levar tapabocas, manter a distancia de seguridade e facer uso dos xeles que temos a disposición do público.

PIMD Rural

O programa PIMD Rural, así como todas as accións que o integran, están financiadas pola Secretaría Xeral de Igualdade da Xunta de Galicia e o Fondo Social Europeo (FSE). Entre os seus obxectivos destaca fomentar a igualdade de oportunidades para contribuír á redución da dobre discriminación na que se atopan as mulleres en situación de especial vulnerabilidade, dotándoas dunha maior autonomía e independencia de cara á mellora da súa situación persoal, social e laboral, e ofrecéndolles unha atención personalizada e especializada para a súa integración na sociedade e no mercado de traballo.

post

Os concellos de Cabana e Ponteceso doaron, xunto coa empresa ceense Cubiertas Javier Fidalgo, material de protección individual para as visitas domiciliarias

Ademais da atención telefónica e on line, a entidade presta un servizo a domicilio de atención psico-social e laboral, a través de programas co-financiados pola Xunta de Galicia como Avanza Inclusión e PIMD Rural, para supervisar e garantir o benestar das persoas con diversidade funcional do rural durante a corentena

Hai case dous meses que o Centro de Recursos de Nantón (Cabana), no que se atopan o Centro de Día e Ocupacional así como a Área de Servizos (INFOASE, Avanza Inclusión e PIMD Rural) de atención a persoas con discapacidade, permanece pechado ao público por mor da crise sanitaria provocada polo COVID-19. Sen embargo, desde entón e ata a actualidade, en Íntegro continuamos traballando para achegar aos nosos usuarios/as e ás súas familias, así como ás persoas con discapacidade e/ou en risco de exclusión social da Costa da Morte un servizo de atención psico-social e formativo de calidade e adaptado ás necesidades da nova realidade que estamos a vivir.  

Desde os inicios deste confinamento, o contacto cos usuarios/as foi unha das nosas prioridades co fin de manter activos hábitos e rutinas capaces de garantir o desenvolvemento dunha vida diaria saudable, plena e equilibrada. As clases presenciais deron paso ás sesións on line e ás videochamadas, coas que comprobamos o ben que se lles dan aos nosos usuarios as novas tecnoloxías. Ademais, demos continuidade a programas como Avanza Inclusión, co-financiado pola Consellería de Política Social da Xunta de Galicia, e ao Punto de Intervención para Mulleres con Diversidade Funcional do Rural (PIMD Rural) a través dun servizo de axuda telefónica e telemática destinado ao asesoramento e apoio de cuestións socio-laborais, ao que a nosa entidade sumou o apoio presencial con visitas domiciliadas, previamente concertadas, que posibilitan ademais a supervisión e o seguimento continuado dos nosos usuarios/as, as súas familias e das persoas con discapacidade e/ou en risco de exclusión que reside no rural, para garantir e preservar o seu benestar e detectar novas necesidades e/ou conflitos, e a súa resolución.

Doazón de material

 

 

 

 

 

 

Pero as visitas domiciliarias non serían posible sen a inestimable colaboración de concellos como o de Cabana de Bergantiños e Ponteceso. Ambas administracións fixéronnos entrega do material de protección individual necesario para garantir a seguridade das nosas traballadoras nos seus desprazamentos e preservar tamén a saúde e o benestar das familias receptoras evitando posibles contaxios. Así mesmo, desde Íntegro queremos expresar tamén o noso agradecemento a Cubiertas Javier Fidalgo, unha empresa de Cee que doou un lote de mascarillas cirúrxicas para o noso persoal. Grazas a todos polo seu apoio e solidariedade nestes difíciles momentos!  

Desescalada. Fase 1

Como xa saberedes, o luns 11 a nosa comunidade entrará na Fase 1 do Plan de transición cara unha nova normalidade co obxectivo de ir, pouco a pouco e con cautela, recuperando o noso día a día, restablecendo as relacións sociais, reactivando a economía, xerando emprego, etc. Pero nesta nova etapa tamén debemos continuar traballando unidos para evitar a propagación do COVID-19. Pare elo, desde Íntegro queremos apelar á responsabilidade social  e concienciación cidadá no que respecta ao cumprimento e utilización dos mecanismos de seguridade que temos ao noso alcance para evitar posibles novos contaxios. Neste senso, é fundamental que sigades empregando sistemas de protección individual como guantes, máscaras e/ou pantallas de protección, xel hidroalcohólico e un correcto e frecuente lavado de mans, ademais de manter o distanciamento social, gardando as distancias de seguridade recomendadas (2 metros) para evitar resultar contaxiados/as. Extremar as precaucións e non baixar a garda é prioritario para lograr unha desescalada segura e sen máis vítimas. Só así poderemos gañarlle a batalla ao coronavirus e reencontrarnos moi pronto. Estámolo desexando!          

Se precisas información, asesoramento e/ou apoio en materia laboral, mediación familiar e/ou asistencia a persoas con diversidade funcional, non dubides en contactar con nós chamando aos teléfonos 981 7349 85 / 650961649 ou enviando un correo electrónico a info@integro.es.

 

post

Íntegro combate a corentena con formación e servizos de atención psico-social e laboral

A entidade combina o apoio telefónico e on-line coas visitas presenciais para achegar aos usuarios/as e ás súas familias, así como ás persoas con disCapacidade e/ou en risco de exclusión,  asesoramento e apoio a través de programas como Avanza Inclusión e o PIMD Rural

A raíz de decretarse o estado de alarma, o pasado 14 de marzo, a asociación Íntegro viuse na obriga de pechar as instalacións do Centro de Recursos, onde están situados o Centro de Día e Ocupacional así como a Área de Servizos (INFOASE, Avanza Inclusión e PIMD Rural) de atención a persoas con discapacidade, co fin de facer fronte á situación de emerxencia sanitaria provocada polo COVID-19. Sen embargo, dita medida non logrou frear moitos dos servizos e actividades que viña desenvolvendo a entidade en materia de atención formativa e psico-social para garantir o correcto desenvolvemento dos nosos usuarios/as e as súas familias, así como o das persoas con disCapacidade e/ou en risco de exclusión social.

Así, a través do programa “Avanza Inclusión”, cofinanciado pola Consellería de Política Social da Xunta de Galicia, podemos continuar desenvolvendo o labor de acompañamento social e apoio na xestión de trámites burocráticos aos nosos usuarios e usuarias, ás súas familias e ás persoas con disCapacidade e/ou en risco de exclusión social, tan necesario nestes difíciles momentos. Ademais dos servizos de axuda telefónica e on-line, que a entidade vén prestando desde o inicio da corentena, estase a ofrecer apoio presencial a través de visitas domiciliadas, previamente concertadas, que posibilitan a detección de novas necesidades e/ou conflitos e a súa resolución.
As persoas interesadas en solicitar a nosa axuda e/ou formularnos as súas dúbidas, poden poñerse en contacto coa entidade chamando aos teléfonos 981 7349 85 / 650961649 ou enviando un correo electrónico a info@integro.es e unha das nosas traballadoras porase en contacto con elas á maior brevidade posible para atopar as respostas que precisen.

PIMD Rural

Outro dos programas que non para de medrar en número de usuarias e actividades é o Punto de Intervención para Mulleres con Diversidade Funcional do Rural (PIMD Rural), que continúa desenvolvendo numerosas accións como vén facendo desde a súa implantación en 2016. Tras a declaración do estado de alarma, tivemos que modificar o sistema de traballo e a comunicación coas mulleres beneficiarias do programa, centrándonos na atención telefónica e online para seguir prestándolle todos os servizos e cubrir as súas novas necesidades (información sobre prestacións económicas, recursos individuais, formación telemática, mediación telefónica con empresas…).

Este ano, desde a asociación Íntegro estamos a traballar arreo en dous eixes fundamentais para a consecución dunha vida plena e autónoma: a prospección do emprego, a través da colaboración con varias empresas da contorna, e a mediación familiar, ofrecendo asesoramento e apoio na resolución de cuestións de carácter laboral (renovación tarxeta demandante, prestación SEPE…), agora incrementadas a raíz da crise sanitaria-económica. Así mesmo, desde a entidade continuamos traballando o fomento da igualdade de oportunidades entre
mulleres e homes como elemento básico da atención especializada.

O PIMD Rural, é un programa subvencionado pola Secretaría Xeral de Igualdade da Xunta de Galicia, dirixido, prioritariamente, a mulleres con disCapacidade pero tamén a toda a poboación feminina que resida no rural. Entre as actuacións desenvolvidas destacan a mediación intercultural e/ou familiar e as medidas de orientación laboral e de acompañamento na busca de emprego, por conta propia e o emprendemento, así como a
prospección do mercado de traballo, a intermediación e a titorización, laboral e profesional. Debido á situación de emerxencia sanitaria que estamos a vivir, desde Íntegro estase a ofrecer asistencia telefónica permanente a todas as mulleres con ou sen diversidade funcional que viven no rural. No caso de precisar axuda con algún trámite laboral ou de mediación, abonda con chamar ao teléfono 981 743 985 ou enviar un mail a info@integro.es.

post

A Diverescola chega ás aulas de infantil e primaria do CPI de Zas e do CEIP Nétoma–Razo de Carballo

71 nenos e nenas participaron nas xornadas de sensibilización promovidas pola entidade de Nantón, no marco do programa Capacíta-T, para achegar a diversidade á cativada

Setenta e un nenos e nenas de infantil e primaria do CPI de Zas e do CEIP Nétoma-Razo (Carballo) convertéronse nas últimas semanas en protagonistas das primeiras sesións dunha nova edición da Diverescola, unha iniciativa promovida por Íntegro, no marco do programa Capacíta-T, para achegar aos máis cativos/as a diversidade e a inclusión a través do xogo e o entretemento.

Sen ir máis lonxe, este xoves as aulas do centro carballés de educación infantil e primaria de Nétoma-Razo mudaron o seu tradicional aspecto para converter os pupitres en improvisados circuítos de obstáculos e os libros en leccións orais de vida e superación. Desde primeira hora da mañá, a nosa monitora de ocio e tempo de lecer Lucía Blanco protagonizou, xunto aos nosos usuarios Noé e Yoli, unha xornada de sensibilización repleta de xogos e diversión na que participaron 51 nenos e nenas divididos en tres grupos, dous de infantil e outro de 1º e 2º de primaria, que agardaban ansiosos/as e con expectación a visita da nosa asociación.  

Aprendizaxe e entretemento tamén houbo hai unhas semanas no CPI de Zas, onde unha vintena de alumnos e alumnas tiveron a oportunidade de achegarse á diversidade da man de Rubén e Jessi, dous usuarios/as do centro, cos que pasaron unha mañá moi amena e proveitosa realizando divertidas probas e escoitando sorprendentes historias que falaban de igualdade e inclusión.

Aínda que moitos/as aseguraron coñecer a persoas con disCapacidade na súa contorna, moi poucos sabían do seu día a día. E para descubrilo, non dubidaron en poñerse na súa propia pel demostrando as súas habilidades e destrezas nunha serie de probas con mobilidade reducida e os ollos tapados. Por suposto, todos/as lograron superar e con nota as actividades propostas dando exemplo da súa capacidade de empatía e dunha naturalidade e espontaneidade sorprendentes. Un dos momentos máis divertidos chegou cando os máis pequenos/as se dispuxeron a facer bocadillos empregando unha soa man. E non o fixeron nada mal!

 

 

 

 

 

 

 

 

 

 

 

 

 

Desde Íntegro queremos agradecer a participación de todos os centros educativos da Costa da Morte neste proxecto co que se pretende promover unha aprendizaxe en valores e unha aposta pola educación inclusiva dende a infancia. Vémonos nas aulas!

post

A conselleira de Política Social Fabiola García visita Íntegro para coñecer as principais demandas da entidade

Estivo acompañada polo delegado territorial da Xunta de Galicia, o alcalde de Cabana e varios membros do goberno local que reafirmaron o seu apoio e compromiso co centro

A conselleira de Política Social, Fabiola García, achegouse ata Íntegro para coñecer de primeira man o funcionamento do Centro de Día e do Centro Ocupacional así como as principais necesidades da nosa entidade e os nosos proxectos de futuro máis inmediatos. Durante a visita tamén estivo acompañada polo alcalde de Cabana de Bergantiños, José Muíño; os concelleiros Carlos Allo e Begoña Torrado, e o delegado territorial da Xunta de Galicia, Ovidio Rodeiro.

O presidente de Íntegro Adolfo López Baña; o tesoureiro Silvestre Couto; a directora Noelia Barreira; a traballadora social e coordinadora de proxectos Sandra Reimúndez; a educadora social Tania Bartucca; a xerente de MáisPorvir Sandra Caamaño e un nutrido grupo de traballadoras e usuarios/as, que exerceron de excelentes anfitrións/as, foron os encargados de dirixir a visita da titular de Política Social polas instalacións de Nantón para amosarlle, unha a unha, as aulas e os talleres nos que se desenvolven boa parte dos programas de inserción socio-laboral que se están levando a cabo, no marco dos programas operativos FSE Galicia 2014-2020, promovidos pola Consellería e co-financiados polo Fondo Social Europeo (FSE). Ademais de interesarse polo traballo levado nos obradoiros ocupacionais como o de elaboración de xabóns de glicerina, bixutería ou candeas personalizadas, a comitiva prestou especial atención ao labor desempeñado nos invernadoiros como instrumento para a adquisición de valores, coñecementos e autonomía persoal.

 

 

 

 

 

 

 

 

 

 

Así mesmo, Fabiola García non quixo perder a oportunidade de compartir conversa e algún que outro xogo cos usuarios e usuarias para coñecer de primeira man a realidade das persoas co diversidade funcional e recoller as principais necesidades dunha entidade que cualificou de “referencia non só na comarca de Bergantiños, senón en toda Galicia na atención á discapacidade” e á que trasladou os seus parabéns polo excelente traballo desenvolvido neste eido. Neste sentido, Adolfo López Baña asegurou que a ampliación do centro é unhas das prioridades de Íntegro a curto prazo “para poder satisfacer a demanda existente e mellorar así na atención aos usuarios/as, que ascenden xa a 43, e no volume de actividades ofertadas”, puntualizou. Para elo, afirmou contar coa compromiso do alcalde de Cabana para a cesión duns terreos municipais próximos á entidade, que agardamos se faga realidade tras a aprobación do PXOM, e un posible incremento de prazas por parte da Xunta de Galicia, que na actualidade está a financiar 14: 8 no Centro Ocupacional e 6 no Centro de Día. 

Ao rematar a visita fíxose entrega dun lote de obsequios ás autoridades, entre as que figuraba o calendario solidario de Íntegro para o 2020 e algúns productos elaborados á man polos propios usuarios/as.

 

post

Trece usuarios/as lánzanse a auga para gozar dos beneficios da natación terapéutica

A entidade leva xa unha década realizando esta actividade, que se desenvolve unha vez á semana na piscina municipal de Cabana

Unha década levan xa os usuarios e usuarias do Centro de Día e do Centro Ocupacional de Íntegro lanzándose á auga da piscina municipal de Cabana unha vez á semana co obxectivo de mellorar a súa coordinación, equilibrio e autonomía persoal pero tamén para desfrutar dunha morea de xogos e actividades no medio acuático. Trátase dunha actividade deportiva complementaria, enmarcada no programa de saúde e benestar do noso departamento de Fisioterapia, que utiliza a auga cun fin correctivo e preventivo. De feito, a súa práctica está recomendada por médicos e especialistas como terapia continuada, especialmente, no caso de persoas con diversidade funcional e/ou pacientes con algún tipo de doenza lumbar ou lesión medular.

Como todos os anos, de outubro a maio, un grupo de usuarios/as da entidade participan nun curso de natación terapéutica acompañados/as de dúas monitoras de apoio e unha profesora especializada en natación adaptada que, ademais de ensinarlles a nadar, realiza diversos exercicios de estimulación para contribuír a mellorar o funcionamento muscular e articular dos alumnos/as. Pero, ademais dos innumerables beneficios físicos, estas sesións, dunha hora de duración, repercuten positivamente na adquisición dunha maior independencia, auto-confianza e capacidade de socialización.

Coa finalidade de adaptar as clases ás necesidades individuais de cadaquén e prestar unha atención totalmente personalizada, o número de participantes é sempre moi reducido. Este ano, son trece os beneficiarios deste programa que, cada edición, renova o alumnado para garantir a participación de todos/as e cubrir así a demanda existente.

Agardamos que este curso dea resultados tan positivos como en anos anteriores e que os nosos usuarios/as gocen dunha experiencia tan saudable como divertida. E quen sabe se este pode ser o comezo dunha longa e prometedora carreira deportiva!! Non os/as perdades de vista! Seguirémosvos informando dos seus progresos.

post

Íntegro e MáisPorvir entregan os diplomas do curso de actividades auxiliares de agricultura e xardinería

Nesta acción formativa, enmarcada no POISES e co-financiada polo Fondo Social Europeo, participaron doce persoas con diversidade funcional da Costa da Morte

O pasado martes, o presidente da asociación Íntegro Adolfo López Baña e a xerente do Centro Especial de Emprego, Sandra Caamaño Gómez, fixeron entrega dos diplomas do Curso Actividades Auxiliares de Agricultura e Xardinería, impartido en Nantón (Cabana) de abril e novembro deste ano.

Doce persoas con discapacidade, procedentes de diferentes concellos da Costa da Morte, participaron nesta acción formativa de 305 horas de duración enmarcada na Convocatoria de Axudas económicas da Fundación ONCE no marco do Programa Operativo de Inclusión Social e Economía Social 2014-2020, cofinanciado polo Fondo Social Europeo (FSE).

Tras sete meses de formación, o alumnado superou con éxito e gran satisfacción as sesións teórico-prácticas levadas a cabo para proporcionarlles os coñecementos necesarios sobre a materia e facilitarlles unha capacitación profesional para acceder en mellores condicións ao mercado laboral. A parte específica de agricultura e xardinería foi impartida polo Centro Especial de Emprego Mais Porvir.

post

Íntegro conmemorou o Día da Diversidade con actividades de sensibilización para os máis cativos/as

Unha xornada de convivencia no CEIP Eduardo Pondal de Ponteceso e un espectáculo infantil na Biblioteca Rego da Balsa de Carballo con Mamá Cabra centraron os actos festivos e reivindicativos

Reivindicativo e festivo. Así foi o Día Internacional das Persoas con Diversidade Funcional para a asociación Íntegro. Este ano, a entidade que preside Adolfo López Baña quixo conmemorar esta data tan sinalada cun programa de actividades aberto a toda a cidadanía e, moi especialmente, aos máis cativos/as co obxectivo de involucralos e conciencialos sobre a importancia de lograr unha sociedade máis xusta, igualitaria, inclusiva e diversa. A educación e o xogo foron as ferramentas elixidas para logralo. E o balance deste 3 de decembro non podía ser máis positivo.

A programación deu comezo a primeira hora da mañá coa celebración dunha xornada de convivencia con escolares, que se desenvolveu no CEIP Eduardo Pondal de Ponteceso. Arredor de 100 nenos e nenas, de 3º a 6º de educación primaria, participaron durante unha hora e media dunha experiencia única e moi enriquecedora que resultou ser un gran éxito debido á excelente combinación de xogo, aprendizaxe e diversión.

 

Ao longo da mañá, as aulas do centro abriron as súas portas á diversidade e á inclusión a través da realización dalgúns dos obradoiros máis tradicionais (e máis agardados) pola cativada como o de realización de xabóns de glicerina ou bixutería, que levaron a cabo os alumnos de 5º e 6º curso. Estes últimos tamén se atreveron cun taller de robótica, no que puxeron a proba as súas habilidades coas últimas tecnoloxías. Mentres tanto, os/as estudantes de 3º tamén tiveron ocasión de innovar no obradoiro de experimentos que levaron a cabo coa axuda dos nosos usuarios/as e as súas monitoras. Por último, os máis pequenos/as (3º) participaron nun concurso de debuxo, no que puxeron de manifesto as súas habilidades artísticas e creativas baixo o lema “Todos somos iguais”.

 

 

 

 

 

 

Espectáculo infantil con Mamá Cabra

Os máis pequenos/as da casa foron xunto coas súas familias os/as protagonistas do acto central da xornada organizada por Íntegro para conmemorar o Día Internacional das Persoas con Diversidade. O espectáculo de Mamá Cabra “Contos para un mundo mellor”, protagonizado por Gloria Mosquera e Diego Maceiras ao acordeón encheu de música, aventuras e moitas risas a Biblioteca Rego da Balsa de Carballo, ateigada de público de primeira a última hora como era de esperar, xa que os convites para acudir ao acto esgotáronse o primeiro día.

A través do conto e da palabra, peques e maiores tiveron a oportunidade de achegarse á diversidade e concienciarse sobre a necesidade de eliminar os prexuízos sociais que existen arredor das persoas don disCapacidade. Logo dunha animada actuación, todos os/as asistentes puideron desfrutar dunha deliciosa e saudable merenda a base de froita (e algún que outro doce) elaborada polos propios usuarios/as.

 

Por outra banda, o día tamén nos deixou momentos para a reivindicación como o que viviron os usuarios e usuarias que se desprazaron ata Cee para participar na concentración “Baixo o mesmo paraugas”, convocada por APEM-Cee. Xunto a compañeiros/as doutras entidades asistiron na Praza 8 de Marzo á lectura do manifesto do 3 de decembro en favor das persoas con diversidade funcional.

Grazas a todos/as por participar! 

post

Íntegro celebrará o Día da Diversidade en Carballo cun espectáculo de Mamá Cabra para todos os públicos

Os convites para asistir á actuación, que terá lugar na Biblioteca Rego da Balsa de Carballo,  poden retirarse a partir do mércores 27 na biblio ata completar o aforo

O Día Internacional da Diversidade vense celebrando dende o ano 1992 co obxectivo de promover os dereitos e o benestar das persoas con discapacidades en todos os ámbitos da sociedade e o desenvolvemento, pero tamén de concienciar sobre a súa situación en todos os aspectos da vida política, social, económica e cultural. O 3 de decembro é, polo tanto, unha data para a reivindicación, pero tamén para a visibilización das diversidades e para a celebración. A Asociación Íntegro aposta este ano por unha conmemoración en clave festiva, tratando de achegar á cativada a ese modelo de sociedade inclusiva polo que levamos tantos anos traballando.

O Día da Diversidade celebrarase na Biblioteca Rego da Balsa de Carballo cun espectáculo de Mamá Cabra, protagonizado por Gloria Mosquera e Diego Maceiras ao acordeón. Cos “Contos para un mundo mellor” queremos seguir avanzando na eliminación dos prexuízos sobre as persoas con discapacidade, e por iso convidamos ás familias a participar con nós dunha tarde de música e diversión.

A actuación comezará ás 18.00 horas, e ao remate teremos a oportunidade de compartir con todas as persoas asistentes unha merenda saudable elaborada polos usuarios e as usuarias de Íntegro. Tamén contaremos cun pequeno stand no que poderedes ver algún dos traballos que facemos no noso centro ocupacional. E, sobre todo, teremos a ocasión de cantar e bailar con dous dos artistas máis queridos polo público infantil.

A asistencia ao espectáculo é de balde, pero por cuestións de aforo é preciso recoller convite na propia Biblioteca Rego da Balsa. As familias interesadas poderán achegarse a partir de mañá mércores, 27 de novembro, e ata fin de existencias.

post

Íntegro amplía o seu cadro de persoal a través do Programa Operativo de Emprego Xuvenil

A nova traballadora, técnica en Educación Infantil, permanecerá en Íntegro ata o vindeiro mes de xuño grazas a unha subvención concedida polo Fondo Social Europeo e a Xunta de Galicia

O Centro de Recursos de Íntegro está a experimentar un crecemento constante no volume de actividades e programas dirixidos a persoas con diversidade funcional da Costa da Morte coa finalidade de mellorar así a súa calidade de vida e acadar a plena inclusión na sociedade. Dita ampliación da oferta formativa leva parella, ademais dun notable incremento de contidos en materia de capacitación, emprego ou sensibilización social, a ampliación do noso cadro de persoal para atender unha demanda cada vez maior, máis esixente e con novas necesidades. Así, desde a entidade de Nantón (Cabana) apostamos pola formación continuada dos nosos traballadores/as e a adhesión a programas de cooperación que promovan a contratación de novos profesionais destinados a favorecer a diversidade social dos colectivos máis vulnerables e/ou en risco de exclusión.

Neste sentido, o pasado día 15 o noso cadro de persoal viuse ampliado grazas á incorporación dunha nova traballadora. Trátase dunha técnica especialista en Educación Infantil contratada a través dun programa de cooperación posto en marcha pola Consellería de Economía, Emprego e Industria da Xunta de Galicia e as entidades sen ánimo de lucro, coa finalidade de mellorar a empregabilidade e a inserción profesional daqueles mozos e mozas inscritos/as no Sistema Nacional de Garantía Xuvenil, dentro do ámbito do Programa Operativo de Emprego Xuvenil. Dita subvención está co-financiada nun 91,89% polo Fondo Social Europeo (FSE) e a Iniciativa de Emprego Xuvenil.

Ao longo dos vindeiros sete meses, a nova profesional encargarase de levar a cabo a planificación, deseño e desenvolvemento dalgúns dos talleres do Centro de Día e do Centro Ocupacional, así como da formación das persoas con diversidade funcional que asisten de forma regular aos nosos obradoiros ocupacionais e das que participan esporadicamente nalgunha acción formativa concreta ao longo do ano. Ademais, participará activamente no noso programa de ocio e tempo de lecer para complementar e ampliar os servizos prestados polo equipo de monitores/as. Un axuda extra que será ben recibida tendo en conta que nos últimos meses incrementouse o número de usuarios/as chegando a situarse na actualidade en 42 persoas.

Funcións

  • Organización e desenvolvemento de talleres de artes manuais (bixutería, elaboración de xabóns, pintura…).
  • Realización de obradoiros de formación e capacitación (escola de adultos, novas tecnoloxías, formación especifica para a ESA, competencias clave…).
  • Programa e avalía os procesos educativos.
  • Desenvolvemento de actividades destinadas á creación de hábitos para o fomento da autonomía.
  • Realización de metodoloxías de xogo para estimular a creatividade, a iniciativa e a disciplina.
  • Deseñar saídas de ocio e lecer adaptadas ás preferencias e necesidades dos usuarios/as do centro.

Con esta nova contratación, englobada no Programa Operativo de Emprego Xuvenil, esperamos poder mellorar e incrementar a atención ás persoas con diversidade funcional da Costa da Morte e ás súas familias para a consecución dunha vida independente e autónoma.