post

Íntegro crea conciencia sobre o abandono e a adopción animal

Publicado a

A entidade presentou onte en Nantón o calendario solidario para 2025

A Asociación Íntegro de Persoas con Discapacidade da Costa da Morte vén de presentar o seu calendario solidario para o 2025. O acto, que tivo lugar onte no Centro de Recursos de Nantón, en Cabana de Bergantiños, contou coa presenza do presidente da entidade, Adolfo López Baña; a directora do centro, Noelia Barreira; a coordinadora, Tania Bartucca Nión, traballadores/as, usuarios/as, entidades colaboradoras e fotógrafos participantes na edición deste ano. Ademais, o alcalde cabanés José Muíño e o edil Carlos Allo tamén estiveron presentes no evento.

A temática escollida para a nova edición busca sensibilizar á poboación sobre a problemática do abandono animal e fomentar a adopción como unha alternativa ética e responsable. O calendario, elaborado grazas ao traballo colaborativo das persoas usuarias do centro, pretende dar visibilidade a realidade que viven os animais rescatados, así como recoñecer o labor inestimable das persoas e organizacións que lles dedican o seu tempo e esforzo.

Para a creación deste proxecto, as persoas participantes tiveron a oportunidade de coñecer de preto a realidade do abandono animal. Como parte da experiencia, realizaron visitas a tres entidades que traballan activamente na protección e rescate de animais: XEA, Vila Regina e Acougo. Durante estas xornadas de convivencia e aprendizaxe, non só se familiarizaron cos casos reais de abandono, senón que tamén tiveron a oportunidade de compartir momentos entrañables posando ante as cámaras dos fotógrafos Ismael Vigo e Mili, capturando a esencia de cada animal e promovendo a súa adopción. Neste sentido, os responsables das diferentes entidades destacaron a sensibilidade e concienciación das persoas usuarias a prol dos animais e fixeron especial fincapé na importancia de recuperar as nosas raíces, a vida no rural, o contacto coa natureza, a nosa música e costumes… O alcalde de Cabana, José Muíño, tamén lembrou a súa infancia no campo e incidiu na necesidade de recuperar os vínculos coa terra.

Por outra banda, este proxecto serviu para fortalecer os lazos entre as distintas organizacións e fomentar sinerxías de colaboración no ámbito do benestar animal. A participación altruísta de todas as persoas implicadas, fixo posible a edición deste calendario, cuxo obxectivo é amosar á sociedade a importancia do coidado e protección dos animais máis vulnerables. Así, o presidente de Íntegro, Adolfo López Baña, agradeceu a implicación de todos os colaboradores “neste proxecto que vai máis alá da edición dun calendario porque cada fotografía agocha unha historia e unha mensaxe que agardamos deixe pegada na sociedade para ir xerando novas conciencias”, apuntou.

Agardamos que esta iniciativa volva ter tan boa acollida entre o público como en anos anteriores para seguir xerando conciencia sobre esta temática e continuar destinando novos fondos á mellora da calidade de vida das persoas con diversidade funcional da Costa da Morte.

post

Seis entidades da provincia participaron nunha xornada inclusiva de Xogos Populares

Publicado a

O pavillón municipal de Cabana de Bergantiños acolleu unha nova edición desta competición lúdico-deportiva que logrou reunir a representantes de diferentes asociacións da provincia

O polideportivo de Cabana de Bergantiños foi o escenario elixido pola asociación Íntegro para celebrar os seus tradicionais Xogos Populares, un evento lúdico-deportivo que logrou reunir esta mesma mañá a representantes de diferentes entidades sociais da provincia nunha xornada que mesturou deporte, diversión e convivencia coa posta en valor dos xogos tradicionais.

Integrantes das asociacións Ambar, Adisbismur, Misela, A Creba Saúde Mental e Avante foron os protagonistas desta edición xunto cun nutrido grupo de escolares do CPI As Revoltas, convertida xa en punto de encontro anual e nun referente en toda a Costa da Morte.

A xornada inclusiva deu comezo ás 11.30 horas con dous grandes clásicos: a agardada “carreira de peixes” e o xogo da “pesca”, que deron paso á “cruz de espigos” e a unha entretida “encesta de castañas”. Ata as 13.15 horas, todos os/as participantes compartiron vivencias, diversión e moitas risas, sen descoidar a competición e as ganas de facerse co podio. Ao finalizar, o presidente de Íntegro Adolfo López Baña e o alcalde de Cabana José Muíño xunto ao concelleiro de Obras e Servizos Carlos Allo foron os encargados de facer entrega dos premios aos equipos gañadores, que foron os seguintes:

  • Carreira de  peixes: 1º Ambar; 2º Íntegro; 3º Avante
  • Pesca: 1º Avante; 2º Adisbismur; 3º Íntegro
  • Cruz de espigos: 1º Íntegro; 2º Ambar; 3º Misela
  • Encesta de castañas: 1º A Creba; 2º Íntegro; 3º Ambar

A xornada rematou cun xantar popular para todos os asistentes, que tivo lugar no pavillón municipal, e no que non faltou boa música, moito baile e unha espectacular sesión de karaoke coa que se puxo o broche final a unha xornada para o recordo. Vémonos en 2025!

post

O presidente de Íntegro e o alcalde de Cabana visitan as novas vivendas sociais para persoas con discapacidade

Publicado a

Esta Experiencia Piloto de Vida Independente, co-financiada pola Xunta de Galicia, a través da COGAMI con fondos procedentes do 0,7% do IRPF, pretende sentar as bases para a futura xestión de novos programas de vivenda con apoio

O presidente da asociación Íntegro Adolfo López Baña visitou esta mañá, xunto ao alcalde de Cabana de Bergantiños José Muiño e a directora do centro de recursos Noelia Barreira, as antigas casas dos mestres, nas que a entidade está a desenvolver unha Experiencia Piloto de Vida Independente, grazas á cesión de dúas vivendas sociais realizada polo consistorio cabanés, e ao co-financiamento da Xunta de Galicia, a través da COGAMI con fondos procedentes do 0,7% do IRPF (casiña 106 da declaración da renda para fins sociais).

O proxecto, que deu comezo o pasado 1 de setembro, pretende mellorar a calidade de vida das persoas con discapacidade do rural da Costa da Morte dotándoas de habilidades para levar a cabo unha vida autónoma e independente. Trátase dun recurso baseado na prestación de servizos de proximidade, centrado na persoa e adaptado de forma individualizada a cada usuario/a, tendo en conta os perfís tan similares e á vez dispares, debido ás características da súa discapacidade (principalmente, intelectual). Deste xeito, procuramos que os/as beneficiarias deste programa permanezan na súa zona de influencia, evitando o desarraigamento e a realización de desprazamentos innecesarios e custosos, por mor da gran dispersión xeográfica que existe na Costa da Morte. Neste senso, López Baña destacou a importancia de “contar con novos recursos de proximidade e apoio tan demandados polas familias das persoas usuarias do noso centro de día e ocupacional para evitar o distanciamento que se produce cando unha persoa se despraza a unha residencia fóra da súa contorna”. Pola súa banda, o rexedor cabanés asegurou que “este tipo de iniciativas, que posibilitan o acceso á vivenda, son as garanten a plena inclusión de persoas con discapacidade”.

Cada un dos apartamentos, situados nas antigas casas dos mestres xunto ao CPI As Revoltas, en Cabana de Bergantiños, conta con cociña, salón-comedor, baño con ducha e tres habitacións totalmente equipadas para habitar. Ademais, todos os espazos son accesibles e están adaptados para persoas con mobilidade reducida.

Actualmente, benefícianse deste proxecto dúas persoas con discapacidade, que  reciben diariamente supervisión e apoio para a realización das actividades básicas da vida diaria.

post

Inclusión e solidariedade a través da formación do voluntariado

Publicado a
  • As actividades, incluídas no programa de captación, sensibilización e formación do voluntariado financiado pola Consellería de Cultura, Lingua e Xuventude, xiraron arredor da diversidade, a perspectiva de xénero, os primeiros auxilios e a reconversión do plástico
  • Un grupo de 9 persoas menores de 30 anos integra ademais o grupo de voluntariado xuvenil centrado no desenvolvemento de accións en favor do coidado medioambiental e a reciclaxe de plástico

O voluntariado é unha forma de participación da cidadanía na sociedade a través das organizacións do terceiro sector. Por iso, desde Íntegro volvemos apostar, un ano máis, pola posta en marcha dun programa orientado á capacitación e formación de persoas voluntarias que decidan formar parte do equipo da entidade para sumar en positivo nas accións de visibilidade e inclusión efectiva das persoas con diversidade.

Actualmente, a asociación Íntegro conta cun grupo de voluntariado formado por 17 persoas, das que 9 son menores de 30 anos e integrantes do equipo de voluntariado xuvenil que participa no proxecto “O voluntariado coa diversidade Recícla-T”, orientado ao desenvolvemento de accións vinculadas co coidado e a conservación do medio e a reciclaxe de plástico.

Subvencionado pola Consellería de Cultura, Lingua e Xuventude, desde o pasado 1 de xaneiro, estamos a levar a cabo un proxecto de actividades de captación, sensibilización e formación dirixido á mocidade, ás persoas con discapacidade e calquera outra persoa que resida nalgún concello da Costa da Morte, e que estea interesada en realizar actividades de voluntariado na área de persoas con diversidade funcional.

Así, desde a área de sensibilización e formación organizáronse numerosos obradoiros enfocados ao público en xeral como o curso de voluntariado e diversidade funcional, realizado nos meses de febreiro e xullo, co obxectivo de promover a igualdade de oportunidades, proporcionando  coñecementos básicos en materia de diversidade e inclusión (diferenzas entre integración, inclusión e segregación ou as pautas para unha inclusión real) ou ofrecendo unha formación básica sobre medio ambiente para concienciar e sensibilizar arredor da problemática ambiental coa intención de incentivar valores e actitudes positivas e respectuosas co medio natural. O mes de xuño tamén nos deixou unha interesante aprendizaxe arredor da igualdade de oportunidades entre homes e mulleres, a través do curso “Introdución á perspectiva de xénero e igualdade de oportunidades”, que resultou un éxito entre a mocidade.

Reciclaxe e reconversión

Setembro tamén resultou ser un mes de intensa actividade formativa con accións encamiñadas á formación de persoas voluntarias arredor do noso proxecto de reciclaxe de plásticos Diversiplás. Neste senso, tras o éxito acadado no mes de abril o pasado día 18 arrincou a segunda edición da “Formación básica: Identificación de plásticos” para aprender a identificar os plásticos e cales son as súas propiedades e principais aplicacións. Nesta liña, esta mesma semana levamos a cabo a terceira edición, tras a de abril e xullo, do obradoiro de reciclaxe e reconversión de plásticos centrada no manexo da maquinaria que temos no noso taller (trituradora, inxectora e extrusora).

Por outra banda, o pasado día 13 puxemos en marcha un taller de “Nocións básicas sobre primeiros auxilios”, que permitiu ao alumnado adquirir coñecementos básicos en materia de prevención de accidentes, procedementos e técnicas de auto-protección e identificación de situacións de urxencia.

Desde Íntegro queremos convidar aos mozos e mozas con idades comprendidas entre os 16 e os 35 anos, a sumarse ao equipo de persoas voluntarias de Íntegro. Ademais de visitar os institutos da Costa da Morte para informar e concienciar aos máis novos, a campaña de captación de voluntariado permanece aberta durante todo o ano a través do 981 734 985 ou en info@integro.es.

post

Preto de 70 mulleres en situación de vulnerabilidade acudiron ao PIMD Rural de Íntegro

Publicado a
  • Desde o pasado mes de setembro, o Punto de Intervención para Mulleres con Diversidade do Rural, promovido por Íntegro e co-financiado polo Fondo Social Europeo (FSE) ao abeiro do programa operativo FSE Galicia 2014-2020, atendeu a 69 mulleres das zonas rurais da Costa da Morte
  • As accións de orientación laboral e acompañamento na busca de emprego seguen a incrementarse ano tras ano

O Punto de Intervención para Mulleres con Diversidade Funcional do Rural (PIMD Rural) vén de clausurar a edición correspondente ao período 2023/2024 cun balance máis que positivo e un notable incremento de usuarias con respecto ao últimos anos. Dende o pasado mes de setembro, foron atendidas preto de 70 mulleres (69), a maioría delas (48) con disCapacidade, sendo as restantes residentes en concellos rurais da Costa da Morte con baixa densidade de poboación.

Ao longo deste exercicio rexistrouse un maior incremento de intervencións na área psicolóxica debido á dispoñibilidade a xornada completa de persoal especializado na atención individualizada e a mediación familiar e/ou intercultural para a resolución de conflitos no ámbito doméstico. Desde O PIMDRural ofrecemos un servizo de continuidade, integrado por tres profesionais: unha psicóloga, unha educadora social e unha traballadora social.

Por outra banda, realizáronse numerosas actuacións encamiñadas á orientación e información e asesoramento en recursos singularizados, actividades para a adquisición de habilidades persoais e/ou sociais, tanto individuais como grupais, dirixidas a grupos reducidos para ofrecer un servizo individualizado, apoio na prospección laboral… Acompañamentos na xestión de todo tipo de trámites (administrativos, de saúde, laborais, de atención e asesoramento persoal e social, así como de apoio directo nas relacións con outras entidades, organismos e servizos para facilitar ás persoas usuarias a súa integración social.

As accións de orientación laboral e o seguimento na busca de emprego seguen sendo, xunto coa realización de actividades para a mellora da empregabilidade, unhas das prestacións máis requiridas polas usuarias, que nesta edición posibilitaron a inserción laboral de seis persoas.

Este servizo, promovido pola asociación Íntegro e co-financiado pola Secretaría Xeral de Igualdade de Xunta de Galicia e o Fondo Social Europeo (FSE), ao abeiro do programa operativo FSE Galicia 2014-2020, está encamiñado a fomentar a igualdade de oportunidades e contribuír a diminuír a tripla discriminación á que están sometidas moitas das beneficiarias do programa.

Programa formativo

Así mesmo, neste último ano, levamos a cabo con gran éxito varios talleres formativos para grupos reducidos sobre diferentes temáticas en atención á demanda das nosas usuarias: manexo do smartphone, autonomía persoal, autocoidados, autodefensa emocional, soidade en positivo, orientacion laboral, busca de emprego en internet, sexting seguro e sexualidade e afectividade baixo o título “se o amor apreta, non é da túa talla”.

Se es muller con ou sen discapacidade, resides no rural e queres recibir formación ou precisas apoio e/ou asesoramento, non dubides en poñerte en contacto con Íntegro chamando ao 981 734 985 ou enviando un mail a info@integro.es.

post

Aberto o prazo de inscrición para participar na I andaina solidaria “Por un millón de pasos”

Publicado a
  • A iniciativa, que terá lugar o 5 de outubro, conta coa colaboración de Máis Porvir Xestión Social e os concellos de Cabana de Bergantiños e Ponteceso
  • Con cada inscrición entregarase unha camiseta conmemorativa e unha viaxe en tren turístico

O vindeiro 5 de outubro, as localidades de Ponteceso e Cabana converteranse no escenario da primeira edición da andaina solidaria Por un Millón de Pasos, un evento aberto á participación de toda a comunidade que promete converterse unha xornada chea de deporte, diversión e solidariedade.

O evento, organizado pola asociación Íntegro en colaboración con Máis Porvir Xestión Social S.L.U., e os concellos de Ponteceso e Cabana, ten como obxectivo compartir novas experiencias coa veciñanza e poñer en valor o patrimonio natural da nosa contorna e a súa accesibilidade para todos e todas.

A andaina, de dificultade baixa e un percorrido de catro quilómetros, dará comezo ás 16:30 horas na Praza do Pendón, en Cabana de Bergantiños, e finalizará na Praza do Recheo, en Ponteceso. A ruta, que transcorrerá maioritariamente polo paseo de Cabana, é apta para todas as idades. Ademais, a entidade facilitará medios técnicos de apoio e transporte para promover a participación de todas as persoas que desexen unirse. Durante a ruta, proporcionarase avituallamento (auga, froita e doce) a todos os/as participantes para coller folgos durante o camiño.

A xornada rematará ás 19:00 horas cun concerto do grupo “Versión Imposible”, que poñerá o broche de ouro na Praza do Recheo a un día dedicado á solidariedade e á inclusión.

As persoas interesadas en participar xa poden inscribirse chamando aos teléfonos 981 73 49 85 ou 650 961 649. Con cada inscrición, que ten un custe de 5 euros, farase entrega dunha camiseta conmemorativa e unha viaxe no tren turístico que ese día estará percorrendo a localidade pontecesán. Ademais, haberá agasallos, cedidos por empresas colaboradoras e outros elaborados no noso centro ocupacional,  para os/as participantes que se animen a facer o percorrido con elementos decorativos ou disfraces na cabeza. A organización premiará a orixinalidade dos deseños e a quen o faga en grupo (a modo de comparsa). Valorarase a utilización de materiais sostibles e reciclados.

Desde a asociación Íntegro animamos a toda a veciñanza a sumarse a esta iniciativa solidaria, cuxos fondos recadados irán destinados a mellorar a calidade de vida das persoas con diversidade funcional da Costa da Morte.

post

Íntegro e o Concello de Cabana asinan un convenio para a posta en marcha dunha experiencia piloto de vida independente para persoas con discapacidade

Publicado a
  • Trátase da cesión temporal de dúas vivendas sociais, totalmente equipadas e adaptadas, situadas nas antigas casas dos mestres xunto ao CIP As Revoltas
  • Esta iniciativa experimental pretende sentar as bases para a futura xestión de novos programas de vivenda con apoio

A asociación Íntegro vén de asinar un convenio de colaboración co Concello de Cabana para a cesión de uso temporal de dúas vivendas sociais destinadas a promover a inclusión e autonomía persoal de persoas con diversidade funcional.

A través da posta en marcha do proxecto “Experiencia piloto Vida Independente”, a entidade que preside Adolfo López Baña desenvolverá, ao longo do segundo semestre de 2024, unha iniciativa pioneira e experimental que proporcione as claves necesarias para a futura xestión de novos programas de vivenda con apoio.

O acto de sinatura, celebrado o pasado venres na Casa do Concello, contou coa presenza do presidente de Íntegro, Adolfo López Baña; a directora do Centro de Recursos, Noelia Barreira; un dos vogais da Xunta Directiva, David Pombo, e o alcalde de Cabana, José Muíño. “Este é un primeiro paso para sentar as bases de novos recursos de proximidade e apoio, moi demandado polas familias das persoas usuarias do noso centro de día e ocupacional para evitar o desarraigo familiar que moitas veces se produce cando unha persoa ten que desprazarse a unha residencia fóra da súa contorna”, destacou López Baña. Neste senso, o rexedor cabanés incidiu tamén na importancia deste tipo de iniciativas que “favorecerán a plena inclusión de persoas con discapacidade comezando por un dereito tan básico como o acceso a unha vivenda”, recalcou.

Cada un dos apartamentos, situados nas antigas casas dos mestres xunto ao CPI As Revoltas, en Cabana de Bergantiños, conta con cociña, salón-comedor, baño con ducha e tres habitacións totalmente equipadas para habitar. Ademais, todos os espazos son accesibles e están adaptados para persoas con mobilidade reducida.

De cara a lograr unha inclusión plena e integral, todas as persoas que participen nesta experiencia piloto recibirán os coñecementos e ferramentas necesarias para o desenvolvemento da súa autonomía e habilidades básicas, ao tempo que se fomentará o ocio e a utilización dos propios recursos da contorna para favorecer a economía local.

Desde Íntegro queremos agradecer ao Concello de Cabana a súa permanente aposta e implicación na posta en marcha de iniciativas que promoven a inclusión social das persoas con diversidade funcional, e a confianza depositada na nosa entidade para o desenvolvemento de proxectos tan relevantes para a nosa comunidade como este.

post

A deputada de Política Social Mar García visita as instalacións de Íntegro

Publicado a

Ademais de comprobar a boa marcha dos programas de formación ocupacional e promoción da vida autónoma que financia a entidade provincial, comprometuese a seguir colaborando en novas liñas de axuda

Esta semana, a deputada de Política Social Mar García Vidal desprazouse ata a sede da nosa entidade en Nantón (Cabana de Bergantiños) para comprobar de primeira man a boa marcha dos programas de formación ocupacional e promoción da vida autónoma que financia a entidade provincial.

Xunto ao presidente de Íntegro, Adolfo López Baña; a directora do centro, Noelia Barrera; a xerente do centro especial de emprego Máis Porvir, Sandra Caamaño; o tesoureiro, Silvestre Couto, e varios representantes da xunta directiva, a deputada visitou cada unha das dependencias e interesouse polos distintos servizos e actividades que se desenvolven no centro, como os programas de formación ocupacional, o servizo de rehabilitación física, fisioterapia e psicoloxía e as diferentes accións para o fomento da autonomía persoal e de ocio e tempo libre, que subvenciona a área de Política Social. Ademais, de conversar animadamente coas persoas usuarias, tamén estivo falando cos mozos e mozas do programa de voluntariado que estes días nos visita, como xa é costume durante a temporada estival.

Durante a súa estancia en Nantón, Mar García destacou “o excelente labor que desde hai máis de tres décadas desenvolve esta entidade en favor da inclusión e a autonomía das persoas con discapacidade, un gran traballo que o ano pasado foi merecedor dun dos premios de Boas Prácticas en Servizos Sociais que outorga a Deputación”, lembrou.

Pola súa banda, López Baña aproveitou a súa presenza para agradecer o compromiso e apoio permanente da Deputación da Coruña, tanto no financiamento de actividades do centro ocupacional como na optimización dos servizos e transporte adaptado, ao tempo que solicitou unha vez máis a súa colaboración para seguir acometendo obras de reforma interior e mellora das instalacións que redunde nunha maior calidade de vida e benestar dos nosos usuarios/as. Neste senso, a deputada provincial comprometeuse a estudar e analizar todas as propostas.

post

Novas incorporacións á Xunta Directiva elixida este sábado en asemblea extraordinaria  

Publicado a
  • Entre as novidades deste ano, deuse a coñecer a posta en marcha dun proxecto sobre inclusión laboral e a realización da andaina solidaria “por un millón de pasos”
  • Desde Máis Porvir Xestión Social destacouse o crecemento da entidade en número de traballadores, pasando de 52 a 65, e en prestacións a novos concellos como Ponteceso, Muxía e Camariñas

O Centro de Recursos Íntegro acolleu este sábado a celebración da súas asembleas anuais, tanto a ordinaria como a extraordinaria. A primeira deu comezo segundo o previsto coa lectura da acta anterior e a exposición das actividades desenvolvidas en 2023, resumidas a través dun breve vídeo explicativo a cargo da directora do Centro de Recursos Noelia Barreira. A continuación, o tesoureiro Silvestre Couto deu a coñecer o estado contable da entidade, salientando que no pasado exercicio o investimento en gasto salarial e de persoal achegouse ao 57% do orzamento xeral mentres que a maior parte dos gastos xerais foron destinados a comedor e combustible. No que respecta ao actual exercicio, destacou a sinatura do concerto social da Xunta de Galicia, que proporcionará á asociación unha maior estabilidade económica para facer fronte aos pagos ordinarios.

Aprobadas as contas, procedeuse a detallar as actividades previstas para este ano, facendo especial fincapé na posta en marcha dun programa experimental sobre inclusión laboral orientado ás persoas usuarias do noso centro ocupacional coa intención de que coñezan de primeira man a realidade dun traballo ordinario. Esta iniciativa é posible grazas a un acordo de colaboración cunha empresa externa especializada na materia. Outra das novidades deste 2024 será a celebración cara finais de ano da andaina solidaria “por un millón de pasos”, unha iniciativa que ten como finalidade promover a práctica da actividade física a través da organización de paseos en grupo.

Por outra banda, a xerente de Máis Porvir Xestión Social, Sandra Caamaño, foi a encargada de dar a coñecer o balance económico anual da nosa empresa de economía social, da que xa forman parte máis de 65 traballadores/as (+ 87% con disCapacidade), 13 máis que en 2023, e as actividades e servizos prestados en concellos xa habituais como o de Mazaricos, Zas, Laxe, Coristanco e Cabana, onde se desenvolven os diferentes obradoiros do programa de actividades sociais nas parroquias (cestería, artes manuais…), pero tamén noutros de nova adhesión como Ponteceso, Muxía e Camariñas.

Nova Xunta Directiva

Tras a asemblea ordinaria, celebrouse outra extraordinaria para abordar a elección e nomeamento dos novos compoñentes da Xunta Directiva, que resultaron elixidos/as por unanimidade nunha candidatura única, e que son os seguintes:

  • Presidente: Adolfo López Baña
  • Vicepresidente: Ramón Pombo
  • Secretaria: Anabel Castiñeiras
  • Tesoureiro: Silvestre Couto
  • Vogais: David Pombo, Manuel Caramés, Antonio Castiñeiras (representante das persoas usuarias do centro) e Mari Carmen García (enlace coas familias das persoas usuarias).

Así mesmo, aprobouse a reforma dos estatutos para adaptalos á nova normativa que aposta por unha linguaxe máis inclusiva, a celebración de asembleas telemáticas e a incorporación da palabra “curadores” en substitución de “titores” como establece a nova Lei 8/2021. Antes de rematar a xuntanza, o reelixido presidente agradeceu o apoio e o traballo constante de todos os socios e socias da entidade, ao tempo que apelou á súa participación e colaboración para “asegurarnos de que as nosas accións reflicten verdadeiramente as necesidades e desexos de familiares e usuarios/as”, subliñou.

post

Íntegro elixirá este sábado en asemblea extraordinaria a súa nova Xunta Directiva

Publicado a

A xuntanza terá lugar no Centro de Recursos de Nantón, en Cabana de Bergantiños, ás 10.30 horas en primeira convocatoria e tras a celebración da asemblea ordinaria

A asociación Íntegro celebrará este sábado 22 a súas asembleas xerais anuais: a ordinaria e a extraordinaria, ás que están convocados/as todos os socios e socias da entidade. A primeira delas, terá lugar no Centro de Recursos de Nantón, en Cabana de Bergantiños, a partir das 10.30 horas en primeira convocatoria e ás 11:00 horas en segunda. A relación de asuntos a tratar na asemblea ordinaria desenvolverase de acordo á seguinte orde do día:

  1. Lectura e aprobación, se procede, da acta anterior
  2. Actividades levadas a cabo no ano 2023
  3. Estado contable do ano 2023 e a súa aprobación, se procede
  4. Actividades e orzamentos para o ano 2024 e a súa aprobación, se procede
  5. Rogos e preguntas

A continuación, procederase á celebración da asemblea xeral extraordinaria que conterá os seguintes puntos:

  1. Lectura e aprobación, se procede, da acta anterior
  2. Presentación, elección e nomeamento da nova Xunta Directiva e a súa ratificación (para ser candidato/a, débese cumprir cos estatutos da entidade).
  3. Modificacións estatutarias
  4. Rogos e preguntas

Ata o mércores 19, ás 14.00 horas, permanecerá aberto o prazo para a presentación de candidaturas á elección da nova Xunta Directiva. Segundo os estatutos vixentes, as persoas que desexen participar nas xuntanzas, exercendo o seu dereito de voz e voto e beneficiándose dos descontos para socios/as, deberán estar ao corrente no pagamento da cota anual correspondente ao exercicio 2024.