post

clubEmprego, o novo espazo de encontro para a inserción laboral da muller

Trátase dunha acción formativa englobada no PIMD Rural que botará a andar o 1 de abril en Íntegro e nos concellos de Malpica, Laxe, Cabana e Ponteceso

As interesadas poderán inscribirse a partir de mañá no Centro de Recursos de Nantón, coincidindo co Día da Muller

Mañá conmemórase o Día da Muller e en Íntegro queremos celebralo dándolle, unha vez máis, todo o protagonismo a elas. Por iso, o día 8 poñemos en marcha unha nova acción formativa dentro do Punto de Intervención para Mulleres con Diversidade Funcional no ámbito Rural (PIMD Rural) que consistirá na creación dun clubEmprego, o novo espazo de encontro para a inserción laboral da muller.

CARTEL PIMD XERALEsta novidosa experiencia está dirixida a mulleres, preferentemente con disCapacidade e residentes nalgúns dos 4 concellos adheridos ao plan (Cabana, Malpica, Laxe e Ponteceso), activas e con ganas de incorporarse ao mercado de traballo. Tamén poderán anotarse aquelas que, sen cumprir estes requisitos, estean interesadas en participar.

_MG_3993

O clubEmprego posibilitará a busca de emprego en grupo e a prestación de asesoramento individual e grupal para dotar de ferramentas útiles e necesarias a un dos colectivos en maior situación de vulnerabilidade social. Para elo, en cada sesión haberá grupos reducidos de traballo aos que se lles facilitará apoio formativo individualizado relacionado con Tic´s, trámites administrativos ou empoderamento, así como accións grupais dirixidas á realización de  procuras dixitais, entrega de currículos, rastrexos a pé de rúa, creación de bolsas de emprego ou intermediación laboral con empresas, entre outras. Ademais, faranse prospeccións de mercado periódicas para coñecer, a curto e medio prazo, as necesidades de mercado da zona e adecuar a formación das alumnas ás mesmas.

Así mesmo, en caso que a demanda o requirise, tamén se poría en marcha un clubEmprendemento para mulleres emprendedoras, interesadas no autoemprego, coa finalidade de poñer ao seu alcance as medidas, coñecementos e axudas necesarias para crear o seu propio negocio ou empresa.     _mg_0981

Para garantir o éxito e a viabilidade das novas accións traballaremos cóbado con cóbado cos departamentos de orientación laboral e desenvolvemento local ademais de continuar colaborando cos servizos sociais dos municipios implicados.

Inscricións

Os encontros levaranse a cabo na sede que a asociación Íntegro ten en Nantón e nos concellos que forman parte do programa PIMD Rural, co-financiado pola Secretaría Xeral de Igualdade da Xunta e o Fondo Social Europeo (FSE).
Pimd malpicaO prazo de inscrición para formar parte do noso clubEmprego abrirase mañá no Centro de Recursos de Nantón coincidindo co Día da Muller. Se estás interesada en participar ou desexas recibir información, non dubides en chamar ao 981 734 985 e contarémosche todo o que precises saber. Os primeiros encontros ceebraranse o 1 de abril en Íntegro e nos concellos de Malpica, Laxe, Ponteceso e Cabana. Anímate e participa!

post

43 escolares do CEIP Canosa-Rus de Coristanco protagonizan unha nova edición de Visítanos!

Hoxe en Íntegro comezamos a semana coas portas abertas para recibir a un grupo de escolares que se desprazaron ata Nantón para participar nunha nova edición de Visítanos!, unha actividade educativa incluída no programa Capacíta-T coa que a nosa entidade pretende concienciar, educar e capacitar en materia de diversidade aos máis pequenos.

Esta mañá 43 alumnos e alumnas de 5º e 6º de primaria do CEIP Canosa-Rus de Coristanco visitaron as nosas instalacións para coñecer de preto o funcionamento do centro e descubrir o día a día dos nosos usuarios e usuarias. A xornada comezou cunha breve presentación da entidade para explicar os obxectivos e valores cos que traballamos en favor das persoas con diversidade funcional. Dende o primeiro momento,  os estudantes amosáronse moi participativos/as e interesados/as en achegarse á inclusión partindo das súas propias ideas, moitas delas preconcibidas e ditadas por unha sociedade desigual. A continuación, proxectouse un vídeo resumo coas actividades e os obradoiros que se levan a cabo tanto no Centro de Día como no Centro Ocupacional.

Obradoiros

_MG_4507Durante algo máis de dúas horas os escolares, divididos en grupos reducidos,  realizaron un percorrido polas instalacións para coñecer con máis detalle o traballo que realizan diariamente os nosos usuarios/as nos diferentes obradoiros ocupacionais. O taller de artes manuais foi parada obrigada. Alí tiveron a oportunidade de descubrir algunhas das técnicas empregadas para confeccionar os produtos de artesanía que comercializamos, e que máis dun escolar tamén se animou a elaborar poñendo a proba as súas habilidades e imaxinación na confección, por exemplo, de xabóns de glicerina da colección Bicos de Amora. O resultado foi gratamente sorprendente!  _MG_4406

A visita ao invernadoiro foi, sen dúbida, unha das que causou maior expectación entre os escolares que non dubidaron en poñer en práctica os coñecementos facilitados polo persoal do centro e polos propios usuarios e usuarias. Logo dunha divertida sesión plantando leitugas, traballaron con algunhas das plantas aromáticas do noso xardín terapéutico e realizaron varios talleres de identificación de especies autóctonas. Ao remate, cada alumno/a levou como agasallo unha semente de gladíolo para _MG_4414lembrar o seu paso polo centro.

Pero un dos momentos máis divertidos chegou ao final da mañá coa realización dun circuíto de mobilidade e desprazamento en cadeira de rodas para achegar aos máis pequenos a realidade da diversidade, xogando coas barreiras ás que cada día deben facer fronte moitas persoas con discapacidade. Unha proba moi entretida e novidosa na que fixeron gala do seu enxeño e habilidade sorteando todo tipo de obstáculos. Dende logo, a mellor maneira de comprobar que a diversidade é cuestión de capacidades, non de discapacidades. Grazas a todos e a todas por participar!

_MG_4502_MG_4444

post

Íntegro participará en Cee na 2ª Xornada sobre Inclusión Social e Educativa

Con esta iniciativa preténdese dar a coñecer as accións formativas e educativas que se levan a cabo nas diferentes entidades sociais 

A asociación Íntegro participará o vindeiro venres, 3 de febreiro, na 2ª Xornada de Inclusión Social e Educativa que organiza o Concello de Cee, a través da concellería de Presidencia, Benestar Social, Igualdade e Emprego, para dar a coñecer as diferentes accións formativas e educativas que se desenvolven na actualidade na nosa comunidade en favor das persoas con diversidade funcional.

A iniciativa, que terá lugar no salón de actos da Casa da Cultura en horario de 10 a 14h, consistirá na realización de varias charlas informativas protagonizadas por profesionais e usuarios/as das diversas entidades sociais convidadas ao acto. Ao remate, procederase á inauguración dunha exposición temática cos algúns dos produtos e traballos elaborados polos participantes. A mostra permanecerá aberta ese día, de 16:30 a 19:30h, e do 6 ao 10 de febreiro no mesmo horario.

img_5082A media mañá chegará a quenda da nosa entidade coa proxección dun vídeo explicativo sobre o funcionamento do Centro de Día e do Centro Ocupacional. A continuación, a psicóloga do centro, Begoña Rial, intervirá para falar sobre “a sensibilización como ferramenta permanente da educación” tomando como referencia o noso programa de concienciación social Capacíta-T e, concretamente, a importante labor de sensibilización levada a cabo en numerosos centros educativos de primaria e secundaria da Costa da Morte grazas á campaña de prevención de lesións medulares, que este ano verase tamén ampliada a outros colectivos sociais para evitar prácticas de risco en ámbitos tan cotiáns como o fogar, o campo, etc…IMG-20160704-WA0020

Ademais, a técnica de Íntegro abordará a necesidade de desenvolver novas liñas ocupacionais que contribúan a mellorar a formación e a empregabilidade das persoas con diversidade como acontece no noso centro de Nantón coa posta en marcha de diferentes obradoiros temáticos entre os que destacan o de Artes Manuais, no que se elaboran artigos artesanais para a súa comercialización; Exteriores, coa creación e mantemento de invernadoiros e zonas verdes de onde se obteñen produtos para consumo dos propios usuarios/a
s ou a colección de xabóns de glicerina Bicos de Amora, lanzada ao mercado o pasado mes de maio.

Como unha imaxe vale máis que mil palabras, Íntegro tamén estará presente na exposición, que se inaugurará a última hora da mañá, cunha selección dos principais produtos e artigos elaborados artesanalmente polos alumnos/as dos diferentes obradoiros ocupacionais.

Se estás interesado/a en asistir, inscríbete e reserva a túa praza. Aquí che deixamos toda a información sobre a xornada! Vémonos en Cee!

Xornadas_febreiro_2017_cartel

 

 

 

post

Unha terapeuta ocupacional e unha logopeda amplían o cadro de persoal de Íntegro

Con estas novas incorporacións xa son cinco os/as profesionais contratados a través de programas de cooperación coa Xunta de Galicia

Para a asociación Íntegro o 2017 comeza cheo de novos retos e moitos soños por cumprir pero tamén de novas caras que nos acompañarán ao longo do presente ano. Grazas a un programa de cooperación entre a Xunta de Galicia e as entidades sociais sen ánimo de lucro, subvencionado pola Consellería de Economía, Emprego e Industria e cofinanciado polo Servizo Público de Emprego, o noso centro de Nantón acaba de incrementar o seu cadro de persoal coa contratación de dúas novas traballadoras (1 terapeuta ocupacional e 1 logopeda) para mellorar a atención individualizada aos nosos usuarios e usuarias e incrementar a oferta formativa e pre-laboral para a súa plena inserción no mercado de traballo.

_MG_3383

Sen dúbida, o máis novidoso é a incorporación ao centro dunha logopeda que, dende o pasado luns, xa está ao fronte dun novo servizo que repercutirá positivamente sobre a calidade de vida dos nosos usuarios/as e as súas familias. Esta profesional, especializada en audición e linguaxe, desempeñará ao longo dos vindeiros 12 meses as seguintes funcións: 

  • Detección, identificación e avaliación de posibles alteracións de comunicación, linguaxe, fala, voz e deglutición.
  • Intervencións adaptadas ás necesidades de cada usuario/a individualmente.
  • Realizar actividades grupais.
  • Participación na elaboración dos Plans Individuais de Atención Social (PIAS).
  • Asesoramento familiar sobre os exercicios realizados para mellorar a súa xeneralización.
  • Axudar aos usuarios/as para que sexan o máis autónomos posibles.

_MG_3368

Pola súa banda, a terapeuta ocupacional é, dende o pasado día 9, a encargada de levar a cabo os obradoiros do Centro de Día e do Centro Ocupacional nos que se desenvolverán diferentes programas formativos para fomentar tanto as habilidades sociais e persoais dos usuarios/as como as ocupacionais e pre-laborais. Neste senso, desenvolveranse novos talleres especializados en formación, orientación e inserción laboral así como en auto-coidado, tarefas do fogar ou aprendizaxe individual. Tamén será a responsable de coordinar a escola de adultos.  Neste caso, a duración da subvención será de 9 meses.

Íntegro medra

Con estas dúas incorporacións xa son 5 os/as profesionais que nos últimos meses pasaron a formar parte da nosa entidade, logo da contratación a finais de 2016 dun xardineiro, unha técnica audiovisual e unha monitora de ocio e tempo libre. A familia Íntegro medra e con ela tamén o fan os nosos proxectos, os nosos servizos e as nosas ilusións. Por iso, queremos agradecer o apoio e a implicación das institucións poñendo ao noso alcance os recursos e as ferramentas axeitadas para proporcionar ás persoas con diversidade funcional e aos seus familiares todos os servizos necesarios para o desenvolvemento dunha vida plena, digna, autónoma e independente.

_MG_3364

Este ano propuxémonos seguir avanzando na construción dunha sociedade máis inclusiva e igualitaria para todos e todas e ímolo conseguir. Baixo o lema #porunanoconmenosbarreiras continuaremos traballando para erradicar todo tipo de obstáculos, físicos e mentais, porque como dicimos en Íntegro “os límites están onde ti os poñas” e nós este ano non queremos poñer ningún! E ti, onde pos os teus?

post

Íntegro lanza a súa propia consigna no Día da Diversidade para avanzar na eliminación de prexuízos do mesmo xeito que na supresión de barreiras físicas

“Avanzouse moito na eliminación de barreiras físicas, pero non se avanzou na eliminación de prexuízos sobre as persoas con discapacidade”. Con esta frase resumiu o presidente de Íntegro, Adolfo López Baña, a mensaxe que a asociación quixo trasladar á sociedade no Día da Diversidade. Neste 3 de decembro Íntegro elixiu o Fórum Carballo como lugar de celebración e como punto de encontro para presentar en sociedade o primeiro calendario da historia da entidade.

Pero o almanaque é moito máis ca iso:

mesa-2En primeiro lugar, porque está protagonizado por usuarios e usuarias de Íntegro e por persoeiros dos mundos da canción, a universidade, a literatura, o xornalismo, a restauración, o deporte… e moitos outros ámbitos que, dunha maneira desinteresada, brindáronse para compartir unha fotografía e unha xornada cos nosos usuarios e usuarias. Para eles foi o primeiro agradecemento, por prestar a súa imaxe “para axudar a visibilizar a outras persoas ás que a día de hoxe aínda nos sigue costando ser visibles en moitos eidos da vida”, sinalou Adolfo López. O presidente de Íntegro tampouco se esqueceu dos fotógrafos e fotógrafas, 11 en total, que tamén dun xeito altruísta, nos agasallaron co seu tempo e o seu traballo e que conseguiron “visionar tan ben o obxectivo deste calendario, que é a inclusión das persoas que funcionan de forma diferente, e que hoxe en día xa non se agochan nas súas casas, senón que estamos dicindo ao mundo: cambia a mirada”.

En segundo lugar, porque coa venda do calendario, que custa só 5 euros, será posible contribuír ao financiamento do servizo de ximnasia terapéutica que ofrece Íntegro no seu centro de Nantón (Cabana de Bergantiños), e que resulta imprescindible para que as persoas con diversidade funcional gocen dunha vida saudable e de calidade.

E, en terceiro lugar, porque grazas ao traballo de moitas persoas e empresas, como a carballesa donCLIC, que se encargou do deseño e a maquetación, ou a tamén carballesa Comunicar, que se ocupou da produción e xestión, a Asociación Íntegro dá un paso máis cara o seu obxectivo de cambiar a mirada da sociedade cara as persoas con diversidade funcional. Hoxe, e grazas a este proxecto, o obxectivo é un pouco máis compartido.

presentacion-1O acto de hoxe encheu o auditorio do Fórum Carballo, ata o que se achegaron tamén a concelleira de Igualdade e Benestar, Maica Ures, que destacou a calidade dos traballos que desenvolven os usuarios e usuarias de Íntegro, e o alcalde, Evencio Ferrero, que reforzou o chamamento da asociación neste Día da Diversidade: “A única diversidade que eu non comparto é a das persoas que non entenden que a diversidade enriquece a sociedade”, manifestou. O acto rematou coa entrega de agasallos de agradecemento e un animado café.

xabon-personalizado

O alcalde de Carballo e a concelleira de Igualdade e Benestar foron agasallados cuns orixinais xabóns de glicerina nos que aparecía gravado o logotipo do concello

Puntos de venta do calendario:

Marcos Monterroso (Lugo), donCLIC (Carballo), Modas Suárez (Carballo), Cafetería Valle-Inclán (Carballo), Fisioterapia Eva Senande (Canduas- Cabana), Floristería Amamber (Cabana), Cavident (Ponte do Porto), Centro de Estética Mónica Coscoñas (Vimianzo), Parafarmacia Horizonte (Baio), Fisioterapia Vértebra (Baio), Lencería Marta (Baio), Papelería A Pesqueira (Ponteceso), Panadería Forno Novo (Malpica), e Restaurante A Mundiña (A Coruña).

persoeiros

Entre os asisetntes estaban algúns dos rostros máis famosos que participaron no calendario benéfico de Íntegro

 

Dende Íntegro queremos dar as grazas a todos/as os participantes pola súa colaboración, amabilidade e xenerosidade, prestando a súa imaxe e/ou traballo en favor dunha causa que, nesta ocasión, reza baixo o lema #porunanoconmenosbarreiras, especialmente,  para as persoas con diversidade funcional.

post

Íntegro e La Caixa de Baio formalizan un convenio de colaboración para o programa Respiro Familiar Vacacional

A asociación Íntegro e La Caixa de Baio (Zas) veñen de asinar un convenio de colaboración entre ambas entidades para cofinanciar o Programa Respiro Familiar Vacacional 2016 para a Diversidade Funcional de Bergantiños, Terra de Soneira e Fisterra. Trátase dun proxecto de recente implantación que pretende ofrecer ás familias unhas xornadas de respiro e merecido descanso ao tempo que posibilita aos usuarios e usuarias a realización dunha viaxe de varios días de duración lonxe do seu fogar.

No acto de sinatura participaron a directora da oficina bancaria, Inmaculada Pérez García, e o presidente de Íntegro, Adolfo López Baña. Ámbolos dous destacaron a importancia de poñer en marcha accións conxuntas de financiamento para posibilitar a realización de proxectos deste tipo, que polo seu coste económico serían inviables para calquera entidade social sen ánimo de lucro. Neste senso, López Baña amosouse moi agradecido a La Caixa de Baio “por contribuír a facer realidade este ansiado soño que acaba de ver a luz e que doutro xeito non sería posible”.

O programa de colaboración arrancou o día 5. O resultado non puido ser mellor, xa que participaron o 90% dos usuarios e usuarias que acoden diariamente tanto ao noso Centro de Día como ao Centro Ocupacional. Nesta ocasión realizouse unha viaxe cultural a Madrid durante a primeira semana de setembro para gozar de catro días de ocio e pracer visitando algúns dos monumentos e áreas culturais máis emblemáticas da capital entre as que non faltaron o Zoo-Acuario, o estadio Santiago Bernabéu ou o Parque do Retiro, onde estiveron acompañados polo Presidente de COCEMFE, Anxo Queiruga. Ademais, houbo tempo para perderse polas céntricas rúas madrileñas e visitar a marabillosa cidade de Segovia.

la-foto-4la-foto-3la foto 4

Sen dúbida, foi unha experiencia inesquecible e moi divertida, chea de actividades, que resultou moi positiva para os/as participantes xa que ademais de desfrutar dun tempo de ocio tamén puideron poñer en práctica capacidades tan importantes como a autonomía e o desenvolvemento persoal.

la foto 4

O grao de satisfacción entre os familiares e os usuarios/as foi tan elevado que xa estamos a pensar no destino do ano que vén, para o que agardamos poder seguir contando coa inestimable colaboración de La Caixa de Baio, unha entidade comprometida coa posta en marcha de iniciativas en favor da igualdade e a inclusión de persoas con diversidade funcional.

post

Clausurado en Laxe o sétimo curso do PIMD Rural organizado pola Asociación Íntegro

Trátase dun programa formativo financiado pola Secretaría Xeral de Igualdade e o Fondo Social Europeo (FSE)

Hai uns días clausuramos o curso de Artes Manuais levado a cabo no Concello de Laxe dentro do programa do Punto de Intervención para Mulleres con Diversidade (PIMD Rural), financiado pola Secretaría Xeral de Igualdade da Xunta de Galicia e o Fondo Social Europeo (FSE).

CLAUSURA TAPAS E APERITIVOS 1

Dúas alumnas do curso de Cociña de Malpica xa conseguiron traballo

Na entrega de diplomas estiveron presentes cinco das oito mulleres que participaron nesta acción formativa, acompañadas de varios representantes da Asociación Íntegro e dos  responsables do departamento municipal de Servizos Sociais. Esta actividade, realizada o pasado mes de xullo nos locais sociais de Traba e de Laxe, concluíu con gran éxito de participación superando as expectativas previstas. Ademais, ao igual que aconteceu noutros concellos incluídos neste programa formativo, as alumnas- mulleres, prioritariamente, con disCapacidade- amosaron gran interese e implicación durante a súa formación co obxectivo de sentar as bases para a súa posterior inserción laboral. Este foi o caso de dúas usuarias do curso de Tapas e Aperitivos de Malpica que atoparon traballo antes de rematar o obradoiro.

Balance

Dende a posta en marcha do PIMD Rural, implantado en catro concellos da Costa Bergantiñá- Cabana, Malpica, Ponteceso e Laxe-, xa se desenvolveron sete accións destinadas á formación de mulleres con diversidade funcional: 4 no Centro de Recursos de Nantón (Cabana), 2 en Malpica e 1 en Laxe. No mes de setembro terá lugar a oitava no municipio de Ponteceso, para a que xa están cubertas todas as prazas. As especialidades impartidas abarcan diferentes temáticas segundo as preferencias das alumnas: Artes Manuais, Informática e Mecanografía, Redes Sociais e Cociña.

Pero as noticias en torno ao PIMD non rematan aquí! Despois do verán agárdannos importantes novidades orientadas á inserción laboral e á mellora do emprego. Un paso máis que esperemos sexa firme e definitivo na procura da inclusión das persoas con diversidade e, especialmente, dun dos colectivos máis vulnerables: as mulleres.

Bo verán!

IMG-20160622-WA0083CLAUSURA TAPAS E APERITIVOS 2

IMG-20160623-WA0002

IMG-20160711-WA0001

 

 

 

 

 

 

 

post

Íntegro lanza un proxecto de crowdfunding para a creación dun xardín terapéutico adaptado

O proxecto está aberto á participación da cidadanía a través da páxina web da Fundación Develop

Para a Asociación Íntegro, o 2016 está a ser un ano repleto de proxectos e iniciativas en favor das persoas con diversidade funcional das comarcas de Bergantiños, Terra de Soneira e Fisterra. E agora, coa colaboración da cidadanía, queremos ir un paso máis alá. En Íntegro vimos de poñer en marcha un novidoso e ilusionante proxecto de crowdfunding para facer realidade un fermoso e moi ansiado soño: construír un xardín terapéutico adaptado para uso e gozo dos nosos usuarios/as, así como das persoas con diversidade funcional da Costa da Morte.

IMG_5670Con esta iniciativa, que conta co apoio da Fundación Develop e COGAMI, preténdese crear un novo espazo axardinado ao aire libre, deseñado especificamente para desenvolver e potenciar as capacidades e habilidades das persoas con disCapacidade, obtendo importantes beneficios físicos, psicolóxicos e sociais na súa vida diaria. A través das cores, dos aromas e das texturas poderemos estimular a memoria e a mente, mellorar a percepción do tempo, aumentar a autoestima e fomentar a actividade física. O xardín terapéutico tamén brindará a oportunidade de manter un contacto permanente coa natureza propiciando as relacións interpersoais e novas formas de expresión social.

Esta zona verde adaptada contará con sendeiros accesibles para persoas con mobilidade reducida, xardineiras a diferentes alturas e espazos habilitados para a realización de todo tipo de actividades. O mobiliario (bancos, macetas…) será construído en madeira polos usuarios e usuarias do obradoiro de carpintería do noso Centro de Recursos de Nantón ao igual que a plantación de herbas aromáticas, arbustos, céspede e outro tipo de árbores froiteiras.IMG-20160704-WA0020

Financiamento

Ao tratarse dun proxecto de crowdfunding, a súa viabilidade depende exclusivamente da colaboración solidaria e desinteresada da cidadanía. Trátase dun método de financiación colectiva xestionado integramente dende unha páxina web que colabora facendo posible a realización de proxectos sociais singulares e moi innovadores. As persoas que desexen contribuír a facer realidade este soño poderán participar, ata o vindeiro mes de setembro, con doazóns económicas (de 10 a 500 €, en función da capacidade de cadaquén) a través da páxina www.grupodevelop.com, apartado crowdfunding, proxecto Xardín terapéutico adaptado Asociación Íntegro. Para máis información tamén podes chamar ao 981 734. Esta vez a nosa terapia está nas túas mans. Non o dubides! Axúdanos a conseguilo! Contigo é posible!

post

Dúas alumnas do curso de Tapas e Aperitivos do PIMD Rural de Íntegro xa acadaron a inserción laboral

CLAUSURA TAPAS E APERITIVOS 1Onte tivo lugar no Concello de Malpica a clausura do curso de Tapas e Aperitivos organizado pola Asociación Íntegro e o Departamento de Servizos Sociais dentro do PIMD Rural. Seis das oito participantes recibiron os seus diplomas de mans do presidente da nosa entidade, Adolfo López, e a concelleira da área, Marisol Blanco.  As outras dúas alumnas non puideron completar o curso porque xa conseguiron traballo, principal finalidade desta acción formativa co-financiada pola Secretaría Xeral de Igualdade da Xunta de Galicia e o Fondo Social Europeo (FSE).

Tanto a responsable municipal como o noso presidente amosaron a súa satisfacción pola inserción laboral de ambas usuarias e destacaron a importancia de continuar desenvolvendo programas conxuntos de colaboración para que este tipo de iniciativas dean os seus froitos e posibiliten o acceso ao mercado laboral, que no caso do Punto de Intervención para Mulleres con Diversidade Funcional van especialmente dirixidas ás mulleres con disCapacidade para seguir avanzando cara a súa inclusión real.CURSO TAPAS E APERITIVOS

As alumnas demostraron o resultado da súa formación preparando e servindo tomates recheos e quiche de verduras, dous pratos que acadaron a máxima cualificación tanto pola súa presentación como polo seu sabor. Parabéns a todas polo excelente traballo realizado!

post

Íntegro clausurou esta mañá o curso de informática do PIMD Rural

A entidade iniciará en agosto novas accións formativas para mellorar o emprego feminino

Esta mañá en Íntegro clausuramos o curso de Informática para mulleres con disCapacidade enmarcado no programa do Punto de Intervención para Mulleres con Diversidade (PIMD Rural), co-financiado pola Secretaría Xeral de Igualdade da Xunta de Galicia e o Fondo Social Europeo (FSE). Con este acto puxemos o punto e final ás tres primeiras accións formativas desenvolvidas dende o pasado mes de maio no noso Centro de Recursos de Nantón. A finais do mes pasado tamén concluíron os talleres de Cociña: tapas e aperitivos e Artes Manuais: xabóns, pintura e bixutería.

IMG-20160623-WA0002

Clausura do curso de Artes Manuais

Durante dous meses, as alumnas do obradoiro que concluímos hoxe tiveron a oportunidade de adquirir coñecementos básicos de informática e mecanografía ademais de realizar unha primeira toma de contacto coas redes sociais e internet, dúas ferramentas moi útiles na actualidade e polas que amosaron moito interese.

IMG-20160622-WA0078

Curso de Cociña impartido en Íntegro durante os meses de maio e xuño

 

Por outra banda, as que aínda continuarán a súa formación ata finais deste mes son as participantes dos obradoiros de Malpica, Laxe e Ponteceso.

+iniciativas

Pero as actividades do PIMD Rural non fixeron máis que comezar! Este verán preséntase cheo de novidades e de aprendizaxe en Íntegro porque en agosto porase en marcha unha nova iniciativa do PIMD, dirixida tamén a mulleres con disCapacidade, centrada nas posibilidades persoais e profesionais para mellorar a súa empregabilidade.

MULLERPara elo, crearemos un grupo de traballo integrado por un máximo de seis alumnas para facilitar e garantir unha atención individual e personalizada. Entre os principais obxectivos deste obradoiro destacan o estudo da oferta e a demanda de emprego na nosa contorna, a elaboración dun currículo, o desenvolvemento de ideas e posibilidades de emprego, a busca directa e indirecta e o asesoramento en recursos, entre outras materias. No mes de setembro está previsto a súa ampliación aos concellos de Malpica, Cabana, Ponteceso e Laxe.

O prazo de inscrición para a primeira quenda aínda continúa aberto. As persoas interesadas poden poñerse en contacto con nós chamando ao 981 734 985 de luns a venres, en horario de 9 a 17h, ou no noso centro de Nantón (Cabana).

Se es muller e buscas emprego ou tes unha idea de negocio esta é a túa oportunidade. Non a deixes pasar!