Arquivos da etiqueta: baio ten a pelota

post

Máis de 200 persoas participarán mañá en Baio na Marcha do Día da Inclusión

Publicado a

Xa está todo preparado para a celebración da 4ª Xornada da Inclusión que este ano terá lugar na localidade de Baio (Zas) coincidindo coa II edición de Baio ten a Pelota. En poucas horas dará comezo un amplo programa de actividades dirixidas a toda a poboación para reivindicar e concienciar sobre a importancia da inclusión e a diversidade.

SAMSUNG CAMERA PICTURES

A Marcha pola Diversidade será un dos actos centrais da xornada

Un dos actos centrais da xornada será Marcha Diversa pola Rúa que nesta edición contará coa participación de máis de 200 persoas pertencentes a diversas entidades sociais da provincia de A Coruña ademais doutros colectivos e institucións públicas que tamén se sumarán xunto aos veciños e veciñas que queiran asistir. Os actos darán comezo ás 11h cunha xuntanza de todos os participantes na praza Obispo Romero Lema. Media hora máis tarde, arrincará a Marcha Diversa que concluirá ás 12h coa lectura dun manifesto, elaborado polas entidades participantes, para reivindicar a inclusión social das persoas con diversidade funcional.  A continuación, como xa é costume, procederase á tradicional solta de globos.

Ruta do pincho inclusivo (1)

Os locais participantes na Ruta do Pincho Inclusivo disporán de ramplas móbiles para garantir a accesibilidade

Os actos institucionais darán paso a unhas das novidades con máis sabor desta edición: a ruta do pincho inclusivo, unha actividade froito da colaboración entre a Asociación de Empresarios Comarca de Soneira, os hostaleiros de Baio e a Asociación Íntegro, a través da súa área de traballo Costa da Morte Accesible (CMA). Esta peculiar iniciativa consistirá na instalación de ramplas móbiles, elaboradas polos usuarios/as do obradoiro de carpintería do centro ocupacional,  nos diferentes locais de hostalería que participan en Baio ten a Pelota para facilitar o acceso a persoas con mobilidade reducida e así garantir o dereito de todos/as a gozar do seu tempo de ocio e dun pinchos que lles deixarán moi bo sabor de boca.

A xornada matinal chegará ao seu remate a ritmo de zumba cunha divertidísima masterclass na que poderán participar todas as persoas que o desexen. Logo de tanta actividade tocará repoñer forzas cun xantar popular no pavillón municipal. Para os que quedaran con gañas de máis festa e diversión haberá karaoke e baile ata as 17h.

Stand Íntegro

ATURE

Pero a nosa presencia en Baio ten a Pelota continuará toda a fin de semana. Tanto o sábado como o domingo, Íntegro estará presente cun stand ubicado na rúa Obispo Romero Lema, no que poderás atopar ampla información sobre as nosas actividades e proxectos máis recentes, como o Punto de Intervención para Mulleres con Diversidade (PIMD Rural), Costa da Morte Accesible (CMA) ou Bicos de Amora, a nova liña de xabóns naturais de glicerina que imos presentar nesta feira. Ademais, haberá un posto permanente de venta de artigos onde non faltarán as últimas creacións elaboradas polos usuarios/as do centro ocupacional como as pulseiras de macramé ou as tellas personalizadas. O horario de atención ao público será de 10:30 a 20h.

Dende Íntegro queremos dar as grazas de antemán á Asociación de Empresarios Comarca de Soneira, encargados da organización de Baio ten a Pelota, así como ao Concello de Zas por permitirnos compartir con eles estas datas tan importantes para a localidade e pola súa estreita colaboración na preparación da nosa 4ª Xornada da Inclusión. Así mesmo, agradecemos tamén a participación na Marcha pola Diversidade de todos os compañeiros/as procedentes doutras agrupacións da provincia e dos veciños/as que queiran sumarse ao gran Día da Inclusión. “No único no que somos = é que somos #”.

inclusion final 1

post

A Asociación Íntegro crea Bicos de Amora, unha liña de xabóns de glicerina que presentará en Baio ten a Pelota

Publicado a

A 4ª Xornada da Inclusión que a Asociación Íntegro celebrará este venres 6 de maio en Baio, coincidindo co evento comercial Baio ten a Pelota, vén cargada de actividades e moitas novidades. Unha das máis agardadas polos usuarios/as do centro ocupacional de Nantón será a presentación do seu último proxecto: unha liña de xabóns de glicerina que se van comercializar coa marca Bicos de Amora.

Esta singular iniciativa é froito da mestura entre o traballo e a creatividade que caracteriza o obradoiro de Artes Manuais do noso centro ocupacional. Unha andaina que comezou hai algo máis de un ano coa implantación de varios cursos de formación ata converternos en fabricantes dos nosos propios produtos. Dende entón percorremos un longo camiño que xa comeza a dar os seus froitos, porque cada vez son máis as persoas e entidades que depositan a súa confianza en nós para realizar os seus agasallos e encargos institucionais. A nosa ampla gama de deseños de xabón, con multitude de formas, cores e olores, convérteno no regalo perfecto: útil, orixinal e personalizado. Un produto idóneo para calquera persoa, evento ou circunstancia.

IMG_20160503_121208Ademais, toda a liña de xabóns de glicerina son 100% naturais e están elaborados artesanalmente, respectando os tempos de fabricación e reforzando o noso compromiso co medio ambiente. Unha produción artesanal que lle outorga a cada peza un toque único e diferente, con selo propio e garantía de calidade.

Pero Bicos de Amora pretende ser moito máis! É unha porta aberta ao mercado laboral para persoas con diversidade funcional, capaces de traballar, de crear e de poñer en valor todas as súas habilidades e coñecementos. Dende Íntegro agardamos e confiamos en que o lanzamento desta nova marca veña acompañado de novas oportunidades que melloren o emprego e avancen cara a inclusión do colectivo.

Un nome con esencia

E como nada é casual, o seu nome non podía ser menos. A elección de Bicos de Amora pretende ser unha viaxe ás orixes, á terra, ás amoras mermelada-casera-de-mora-500x375da nosa infancia e aos beizos tinguidos pola súa cor morada. Un salto agarimoso ao pasado e á natureza salvaxe da Costa da Morte, sempre presente nas nosas vidas e cada vez máis accesible. Formas, olores e cores que evocan cada un dos elementos que conforman a paisaxe da nosa costa. Un mar de sensacións, intensas e pracenteiras, capaz de debuxar sobre a nosa pel suavidade, frescura e forza como sinais de identidade. Unha marca viva e con esencia deseñada para coidar da túa saúde e do benestar de toda a familia.

Esta fin de semana, en Baio ten a Pelota, o stand de Íntegro encherase de Bicos de Amora para todos e todas. Agardámosvos no noso punto de venta, situado na rúa Obispo Romero Lema, cunha ampla variedade de mostras de xabóns e moitos máis artigos, algún tan novidosos como as pulseiras de macramé ou as tellas decoradas á man e personalizadas polos nosos usuarios/as.

post

A Asociación Íntegro e a hostalería de Baio avanzan cara a accesibilidade universal coa Ruta do Pincho Inclusivo

Publicado a

Xa queda menos para o Día da Inclusión, que este ano terá lugar o 6 de maio en Baio, coincidindo co evento comercial “Baio ten a Pelota”, organizado pola Asociación de Empresarios Comarca de Soneira para esa fin de semana.

Co lema “Nós tamén temos a pelota” desenvolveremos un amplo programa de actividades dirixidas a toda a poboación coa finalidade de reivindicar a inclusión social das persoas con diversidade funcional. Ademais de actos como a Marcha pola Diversidade, os obradoiros ou a instalación do stand da asociación, este ano incorporaremos algunhas novidades moi atractivas e tamén moi saborosas. Tomade boa nota!

Por primeira vez, grazas á colaboración entre Íntegro, a través da área de traballo Costa da Morte Accesible, e a Asociación de Empresarios Comarca de Soneira, celebraremos a Ruta do Pincho Inclusivo, na que se garantirá a accesibilidade das persoas con mobilidade reducida aos locais de hostalería mediante a colocación dunha serie de ramplas móbiles elaboradas polos usuarios/as do noso obradoiro ocupacional de carpintería.

pincho inclusivo

Os locais de hostalería disporán de ramplas móbiles para a Ruta do Pincho Inclusivo

Dende a asociación Íntegro pretendemos reivindicar o dereito de todos e todas a gozar por igual do tempo de ocio, dotando de infraestruturas e recursos necesarios os espazos públicos, ademais de concienciar á sociedade para seguir dando pasos de cara a acadar a necesaria accesibilidade universal no ámbito da Costa da Morte.

Querer é poder. Esa é a nosa filosofía. E estamos convencidos de que co esforzo, o compromiso e o traballo de todos/as podemos conseguilo.

A Ruta do Pincho Inclusivo é unha das novas accións enmarcadas nunha xornada repleta de novidades que che deixará, polo de agora, moi bo sabor de boca. En breve contarémosche máis. Anímate e participa! Nós tamén temos a pelota, e ti?

post

Íntegro celebrará o vindeiro 6 de maio a IV Xornada da Inclusión en “Baio ten a pelota”

Publicado a

En Íntegro xa estamos a traballar na IV Xornada da Inclusión, que terá lugar o vindeiro 6 de maio na localidade de Baio (Zas), coincidindo coa celebración de “Baio ten a pelota”, un evento comercial organizado pola Asociación de Empresarios do municipio, que xa vai a pola súa segunda edición logo do gran éxito acadado o ano pasado.

Baixo o lema “Nós tamén temos a pelota” poremos en marcha un amplo programa de actividades deseñado para dar visibilidade e reivindicar unha sociedade inclusiva, igualitaria e xusta para toda a cidadanía e, especialmente para as persoas con diversidade funcional. Ao longo do día levaranse a cabo diferentes actos entre os que destacan un encontro con entidades sociais e a Marcha Diversa pola Rúa, que rematará coa lectura dun manifesto en favor dos dereitos e a inclusión social. Tamén haberá tempo para o ocio coa celebración dun Tapeo e Xantar Inclusivo e actividades de lecer ao aire libre para todas as idades.

globos

Solta de globos durante a III Xornada da Inclusión celebrada o ano pasado en Malpica de Bergantiños

Se formas parte dunha entidade social e/ou se estás interesado/a en participar nesta actividade, non tes máis que poñerte en contacto con nós chamando ao 981/734 985, de luns a venres en horario de 9 a 17h, e enviarémosche o programa e a ficha de inscrición. Vén a Baio o vindeiro día 6 e ti tamén terás a pelota! A inclusión depende de ti porque “o único no que todos somos = é en que somos #”.

 

Dende Íntegro tamén queremos dar as grazas a todas as institucións, asociacións e organismos colaboradores, especialmente á Asociación de Empresarios Comarca de Soneira e ao Concello de Zas por permitirnos compartir con eles un día e un evento tan importante para a localidade.

post

Grazas por convidarnos a “Baio ten a pelota”

Publicado a

Dende Íntegro queremos agradecer á Asociación de Empresarios de Baio a súa amable invitación para participar na feira de artesanía “Baio ten a pelota”, que se celebrou esta fin de semana polas rúas da localidade.

NOVA 1

NOVA 3

Foi para nós un pracer poder compartir estes días rodeados de tantos amig@s e veciñ@s que se achegaron ata o noso stand para coñecer o traballo desenvolvido polos usuarios e usuarias do centro, os que tamén nos visitaron acompañados dos seus familiares.NOVA 4

Sen dúbida, o bo tempo contribuíu a que houbese maior afluencia de visitantes e algunha que outra compra solidaria. Aquí queda unha pequena escolma dos mellores momentos. Grazas a tod@s!

post

Íntegro estará esta fin de semana en “Baio ten a pelota”

Publicado a

Esta fin de semana imos participar nunha feira de artesanía con moitas pelotas, amarillas. Será en Baio ten a pelota, que así é como se chama a campaña comercial organizada por la Asociación de Empresarios para promover e revitalizar o comercio na zona. Tanto o sábado coma o domingo os nos@s usuari@s estarán ao pé do noso posto no mercado demostrando que non existen barreiras nin obstáculos que limiten as súas capacidades. Boa mostra dilo serán os artigos que tendremos expostos e que poderedes ver pero tamén mercar.

baio ten a pelota

 

Pulseiras de coiro, pezas de bixutería e ata fermosas esculturas en escaiola completarán a amplia variedade de produtos elaborados a man polos usuarios e usuarias do centro ocupacional. Esforzo, adicación e constancia que seguro saberedes agradecer coa vosa visita e, quizais, algunha que outra compra solidaria. O stand permanecerá aberto ao público en horario de  11:00 a 20:00 horas.