post

Tres centros de primaria da Costa da Morte, gañadores do concurso escolar 30 aniversario de Íntegro

  • Tratase do CPI As Revoltas de Cabana, o CEIP Labarta Pose de Baio (Zas) e o centro de primaria O Areal de Camariñas
  • Os gañadores/as recibirán da man dos usuarios/as da entidade unha tablet e un diploma acreditativo para a clase e chapas para todos os nenos e nenas premiados/as

O concurso escolar 30 aniversario “Camiñando cara a inclusión”, convocado pola asociación Íntegro dentro do programa de actividades conmemorativas deste 2022, xa ten finalistas. Desde o pasado mes de febreiro, máis de 20 centros de educación primaria da Costa da Morte participaron nesta iniciativa, encamiñada a promover valores como a inclusión e a igualdade no ámbito educativo, que resultou ser todo un éxito entre a cativada.

Rematado o prazo de presentación dos traballos e tras unha “longa e moi difícil” deliberación do xurado, formado por un traballador/a e un usuario/a de Íntegro; un patrocinador/colaborador do 30 aniversario, un representante dos escolares e un profesional do ámbito cultural, estes foron os finalistas das diferentes categorías:

A. DEBUXO (alumnado de 1º e 2º de EP): 1º de primaria do CPI As Revoltas (Cabana de Bergantiños)

B. POESÍA (alumnado 2º e 3º de EP): 4º primaria do CEIP Labarta Pose (Baio-Zas)

C. NARRATIVA (alumnado de 5º e 6º de EP): 6º de primaria do CEIP O Areal (Camariñas)

A elección dos gañadores levouse a cabo seguindo os criterios establecidos nas bases da convocatoria, entre os que destacaban a creatividade, orixinalidade e calidade dos traballos ademais doutros valores engadidos como a mensaxe, a accesibilidade e a implicación máis alá da aula.

Entrega premios

Debuxo gañador de 1º primaria do CPI As Revoltas de Cabana

 

Esta semana, as aulas gañadoras serán premiadas cunha tablet e un diploma acreditativo como agasallo colectivo, e unha chapa conmemorativa do concurso para cada neno/a galardoado/a. Os primeiros/as premiados foron os alumnos e alumnas de Cabana, que esta mesma mañá recibiron a visita dos nosos usuarios/as para facerlles entrega dos seus agasallos nun acto celebrado ás 12.00 horas no salón de actos do centro educativo. Mañá 5, ás 10.30 horas, será a quenda dos escolares de Camariñas e ás 12.30 horas, os de Baio, en Zas.

Desde Íntegro queremos dar a grazas a toda a comunidade educativa pola súa participación e implicación nesta iniciativa destinada a fomentar a inclusión e a igualdade na contorna e a promover novos espazos para a reflexión achegando á cativada conceptos tan importantes como a accesibilidade ou a disCapacidade.

 

 

 

 

post

Máis Porvir Xestión Social avanza na inclusión laboral de persoas con diversidade funcional da Costa da Morte

A empresa de iniciativa social de Íntegro, que conta xa con 40 trabajadores con discapacidade da Costa da Morte, está especializada na prestación de servizos auxiliares a empresas, institucións e particulares

A empresa de iniciativa social de Íntegro Máis Porvir Xestion Social segue avanzando con paso firme na inclusión laboral das persoas con diversidade funcional da Costa da Morte. Na actualidade, o noso Centro Especial de Emprego conta xa con 40 traballadores/as, que desempeñan numerosos servizos auxiliares a empresas, organismos públicos e particulares da contorna, entre os que destacan diferentes traballos de limpeza de superficies e inmobles, labores de conserxería e hidrolimpezas en exteriores.

Un dos últimos municipios da Costa da Morte en sumarse a este proxecto empresarial sustentable e competitivo foi o Concello de Muxía. Desde o pasado mes de novembro, un grupo de persoas con discapacidade encárgase da realización das labores de limpeza nos centros de educación infantil e primaria de Vilarmide-Eduardo Noya, Virxe da Barca e Os Muíños.

 

Por outra banda, localidades como Mazaricos e Zas xa hai anos que depositaron a súa confianza e compromiso en Máis Porvir para garantir o acceso ao mercado laboral das persoas con discapacidade. No caso do primeiro, a través da contratación do servizo de limpeza da gardería e o ximnasio municipais, así como do CEIP de Pino de Val (antes de que pechara as súas portas), e do CPI A Picota e CEIP San Cosme, onde tamén se realizan labores de conserxería. En Zas, estanse a efectuar tamén traballos de limpeza nos dous centros de saúde, na gardería municipal e no CEIP Labarta Pose de Baio.

Ademais destas accións empresariais, desde a nosa entidade de iniciativa social promóvense tamén numerosas actividades formativas ao longo do ano para proporcionar  aos nosos traballadores/as novas capacidades e habilidades que dean como resultado un cambio social real que contribúa a mellorar a vida das persoas con diversidade funcional.

RURALÍZATE 2022

Outra das iniciativas que un ano máis vimos de poñer en marcha en colaboración co Concello de Cabana é o programa de actividades para persoas maiores de 55 anos Ruralízate, organizado polo consistorio cabanés e xestionado por Máis Porvir.

Hai unha semana arrincou a nova edición, que neste 2022 desenvolverase nas instalacións da Escola de Vela (os mércores) e no Centro de Recursos Íntegro (os xoves) debido ao elevado volume de inscricións. O primeiro obradoiro, que xira arredor das artes manuais, levarase a cabo de febreiro a marzo en horario de 17.30 a 19.30 horas. De abril a maio, haberá outro de arranxos florais que dará paso, no mes de xuño, a un taller de risoterapia. Xa para o último trimestre do ano, están programados outros dous: restauración de mobles (de setembro a novembro) e arranxos de Nadal (de novembro a decembro).

post

Máis de 400 alumnos/as da comarca participaron ao longo de maio nas campañas de sensibilización promovidas por Íntegro

Varios centros de ensino de Carballo, A Laracha e Zas foron os destinatarios das últimas accións formativas levadas a cabo pola entidade antes do remate do curso académico

Coa chegada do bo tempo e o inminente remate do curso escolar, as campañas de sensibilización, promovidas pola asociación Íntegro ao longo do ano, sucédense case a diario nos centros de ensino de toda a Costa da Morte. E non é para menos! Ano tras ano, as estatísticas seguen a reflexar un incremento de accidentes medulares durante a temporada estival. Estradas, praias e piscinas continúan a ser os principais puntos de sinistralidade e os nosos mozos e mozas, o colectivo máis vulnerable. Para loitar con esta lacra, a entidade que preside Adolfo López Baña vén de reforzar ao logo deste mes a súa presencia nos centos educativos da zona con charlas informativas e actividades lúdicas e didácticas, organizadas en colaboración coa comunidade escolar para lograr unha educación inclusiva e responsable, capaz de transmitir coñecemento, diversión e maior concienciación social como aconteceu nas últimas visitas levadas a cabo en Carballo, A Laracha e Baio (Zas).

Así, nas últimas semanas, a campaña de prevención de lesións medulares cobrou especial protagonismo na capital de Bergantiños, onde fixo a súa primeira parada para visitar aos alumnos/as de 2º curso do IES Isidro Parga Pondal mentres que a última tivo lugar hai escasos días nas aulas de Formación Profesional Básica do IES Monte Neme, onde se puxo o punto e final á temporada. Entre ambos centros, un total de 145 estudantes participaron activamente, tanto nas conferencias ofrecidas polos representantes de Íntegro como nas posteriores sesións prácticas, que lle permitiron a todos e a todas, poñerse por uns intres na pel dun usuario/a de cadeira de rodas.

Os/as que tamén tiveron que sortear obstáculos e, por certo, con gran habilidade e destreza, foron os alumnos/as de 1º e 2º da ESO do IES Maximino Romero de Baio (Zas), que formaron parte dunha xornada de educación viaria, organizada pola Policía Local da localidade, coa que colaborou a asociación Íntegro a través da realización dun circuíto de mobilidade e varias probas que serviron para conciencialos/as sobre a importancia de evitar prácticas de risco nas estradas como peóns como futuros condutores de vehículos.

 

 

 

 

 

 

Diverescola

Este mes tamén nos deixou unha nova edición da Diverescola, unha iniciativa enmarcada no programa Capacíta-T, promovida para achegar aos máis cativos/as a diversidade e a inclusión a través do xogo e o entretemento. Nesta ocasión, os destinatarios/as foron 150 nenos e nenas de 5º e 6º curso do CEIP Ramón Otero Pedrayo de A Laracha. Ao longo da mañá, o alumnado cambiou as aulas e os pupitres polo patio e o pavillón escolar para poñer a proba os seus coñecementos e habilidades en materia de diversidade. E os resultados foron sorprendentes! Despois de realizar un percorrido cos ollos vendados e nunha cadeira de rodas, todos/as demostraron que a empatía, a destreza e a sensibilidade son materias que dominan á perfección. Parabéns a todos!

 

 

 

 

 

 

Desde Íntegro queremos agradecer a implicación e a colaboración de toda a comunidade educativa na posta en marcha dos diferentes programas de prevención e sensibilización nos centros de ensino co obxectivo de fomentar entre o alumnado un maior coñecemento da súa contorna e unha educación responsable e inclusiva. Grazas e a gozar do verán, con precaución!!

post

Éxito de participación nos I Xogos Populares de Íntegro

O pavillón municipal de Baio (Zas) acolleu a primeira edición dunha competición lúdico-deportiva que logrou reunir a representantes de diferentes asociacións da provincia

O polideportivo de Baio (Zas) foi o escenario elixido pola asociación Íntegro para celebrar os seus I Xogos Populares, un evento lúdico-deportivo que logrou reunir no día de onte a representantes de diferentes entidades sociais da provincia nunha xornada que mesturou deporte, diversión e convivencia coa posta en valor dos xogos tradicionais.

A primeira edición desta competición deportiva non puido empezar con mellor pé. Integrantes das asociacións Ambar, Adisbismur, Misela, A Creba Saúde Mental e Avante estiveron presentes nesta primeira convocatoria, que pretende consolidarse co paso do tempo ata converterse nun punto de encontro anual e nun referente en toda a Costa da Morte.

 

As actividades deron comezo ás 11.30 horas con dous grandes clásicos: o “xogo do pano” e os “aros”. Media hora máis tarde, os que puxeron a proba a súa habilidade e destreza, divididos en varias quendas, foron os/as participantes da “carreira de sacos” e do “xogo das chapas”. En ambos casos, os gañadores de cada ronda tiveron que enfrontarse nunha final que resultou do máis emocionante cuns marcadores moi axustados ata o último momento. O mesmo aconteceu coa modalidade de “salto á corda” e a “mariola”, que deu paso á entrega de premios por parte do presidente de Íntegro Adolfo López Baña e a directora do Centro de Recursos, Noelia Barreira. Así mesmo, un grupo de usuarios/as de Íntegro tamén fixo entrega dalgúns galardóns aos vencedores, que consistiron en medallas e recordatorios personalizados e elaborados de maneira artesanal no centro de Nantón.

 

 

 

 

 

Ao longo da mañá tamén houbo tempo para divertirse bailando ao ritmo da música e practicando outras modalidades deportivas como o zumba, no que os nosos usuarios/as son uns auténticos expertos/as. Finalmente, a xornada rematou cun xantar, ao que asistiron todos os/as participantes, e co desexo de volver a vernos moi pronto nos II Xogos Populares. Grazas a todos7as por participar e…..ata a próxima!

post

Un carné con moitos beneficios

  • Esta temporada os socios e socias de Íntegro disporán de importantes vantaxes económicas en preto de trinta empresas, comercios e establecementos de seis concellos da Costa da Morte
  • A entidade premia así a  fidelidadedos asociados ao tempo que promociona o comercio de proximidade

O outono chega a Íntegro e faino cargado de novidades e vantaxes. E unha das primeiras e máis interesantes vai dirixida aos seus socios e socias. Trátase da nova campaña de fidelidade para asociados/as que vén de poñer en marcha a entidade no ano no que celebra o seu 25 aniversario. Grazas á colaboración de numerosas empresas, comercios e establecementos da Costa da Morte, pertencer á familia Íntegro vai ter un valor engadido. A partir de agora, todas as persoas que posúan o carné de socio/a poderán beneficiarse de interesantes descontos e promocións á hora de realizar as súas compras e/ou xestións así como ao contratar determinados servizos. Para o seu presidente Adolfo López Baña, esta iniciativa “pretende ser un pequeno xesto de agradecemento co que recoñecer e premiar a lealdade de todas as persoas que, coa súa colaboración desinteresada, fan posible que sigamos traballando e medrando en recursos e actividades, ademais de axudar a promover o comercio de proximidade”.

Esta temporada mercar un ordenador, ir ao salón de peiteado ou recibir unha masaxe será entre un 5% e un 50% máis barato para todos os socios/as de Íntegro que presenten o seu correspondente carné nalgunha das preto de trinta empresas e comercios adheridos a esta campaña e pertencentes aos concellos de Vimianzo, Laxe, Ponteceso, Cabana, Zas e Carballo. Xunto aos descontos,  ofertas e promocións dunha ampla selección de produtos tamén se realizarán sorteos e agasallos de numerosos artigos e servizos de uso cotiá (alimentación, téxtil, beleza, ocio…). Deste xeito, ademais de gratificar aos aboados e aboadas tamén se pretende promover a economía local e o comercio de proximidade.

Aínda que a campaña xa botou a andar, as persoas que estean interesadas en participar aínda están a tempo de facelo, ben como socios/as da entidade ou como establecemento adherido á rede de empresas colaboradoras. Abonda con chamar ao 981 734 985, de luns a venres en horario de 09 a 17h.

A partir de agora saca o carné de Íntegro cando merques nalgún dos seguintes establecementos e benefíciate das súas vantaxes.

Baio (Zas): Calzados Paco Home, Calzados Paco Muller, Óptica Arjomil, Parafarmacia Horizonte, Fisioterapia Vértebra, Alicia Novas Podoloxía, Centro Dental Baldomar, Muebles Galicia, Lencería marta, Psicoloxía Tania Rojo

Cabana: Fisioterapia Eva Senande, Amamber

DonClic, Modas Suárez, Peluquería DobleV, Deportes San Remo

Laxe: Colaxe

Ponteceso: A Tenda dos Libros, A Pesqueira Zapatería, Xoiería Rey Mira, O Mundo ao Revés, Pettit Moda, Parafarmacia Horizonte

Vimianzo: Arranxos Beatriz, A Tenda de Ma, Centro de Estética Jenn, Mónica Coscoñas, Modas Vigo, Clínica de Podoloxía Mª Cristina Varela Novo

 

post

Íntegro e La Caixa de Baio asinan un convenio para a formación de 12 persoas con diversidade funcional da Costa da Morte

Trátase dunha acción de capacitación e inserción laboral especializada na limpeza de superficies e mobiliario en edificios e locais

As persoas con diversidade funcional da Costa da Morte e, preferentemente, as mulleres, están de parabéns porque dende esta semana xa contan cun novo programa de formación, denominado Capacítate, destinado a mellorar a súa capacitación profesional e facilitar a súa inserción sociolaboral para a procura dun emprego de calidade adaptado aos perfís dos/as solicitantes.

Trátase dunha acción formativa, de 200 horas de duración, orientada á “limpeza de superficies e mobiliario en edificios e locais” coa finalidade de profesionalizar un sector en auxe e potenciar novas alternativas de emprego na zona, especialmente entre os colectivos máis vulnerables. O centro de recursos de Nantón foi onte o lugar escollido para formalizar a sinatura do convenio de cooperación entre a asociación Íntegro e La Caixa de Baio (Zas), entidade co-financiadora do proxecto. Precisamente, a súa directora, Inmaculada Pérez,  destacou a importancia de promover actuacións conxuntas para favorecer a inclusión social, cultural e laboral das persoas do rural e, sobre todo, das mulleres “que, en ocasións, sofren dobre discriminación pola súa condición sexual”, engadiu o presidente do colectivo, Adolfo López Baña que tamén estivo acompañado pola traballadora social do centro, Sandra Reimúndez.

Atención individual

Nun principio só 12 alumnos/as formarán parte desta novidosa e interesante iniciativa coa finalidade de ofrecer unha formación individualizada e adaptada ás necesidades e características de cada participante e obter un maior aproveitamento das clases. Durante as sesións de orientación utilizaranse diferentes recursos educativos e desenvolveranse varios enfoques e metodoloxías de asesoramento, formación en habilidades sociais e laborais, itinerarios de emprego e acompañamento persoal para fomentar a participación activa do alumnado.

O curso, que se vai impartir nas instalacións de Nantón (Cabana), estará dividido en seis módulos;  catro teóricos, un de competencias transversais grupais e individuais, e outro de prácticas laborais non profesionais para poñer a proba os coñecementos adquiridos e promover a técnica de “aprender facendo”.

As persoas interesadas en participar neste novo programa formativo deberán formalizar a súa inscrición o antes posible nas oficinas de Íntegro debido ao reducido número de prazas dispoñibles. O horario de atención ao público é de luns a venres, de 09 a 17h. Máis información no 981 734 985.

post

Estudantes do CEIP Labarta Pose de Baio percorren en Íntegro o camiño da diversidade

39 alumnos/as de 5º e 6º de primaria participaron esta semana nunha nova edición de Visítanos! 

O pasado martes recibimos coas portas abertas, e os brazos tamén, a un grupo de alumnos e alumnas do CEIP Labarta Pose de Baio (Zas) nunha nova edición de Visítanos!, unha actividade formativa destinada a educar, concienciar e capacitar aos máis pequenos/as en materia de diversidade, incluída no programa Capacíta-T. Un total de 39 nenos e nenas de 5º e 6º de primaria percorreron as instalacións de Nantón, acompañados polos seus mestres/as e os nosos usuarios/as e traballadores/as, decididos/as a coñecer de preto o noso día a día e descubrir algunhas das actividades que se realizan nos obradoiros do Centro Ocupacional e do Centro de Día.

E foi precisamente nos talleres que visitaron ao longo da mañá onde xurdiron algunhas das preguntas máis curiosas relacionadas coa inclusión social e laboral das persoas con diversidade funcional. Moitos/as deles/as recoñeceron posuír ideas preconcibidas e en materia de discapacidade e comprometéronse a aportar o seu gran de area para camiñar con paso firme cara unha sociedade máis inclusiva, xusta e igualitaria onde todos e todas teñamos os mesmos dereitos e as mesmas oportunidades.

Durante a súa estancia en Íntegro, os alumnos/as tiveron tempo de pasar polo ximnasio e comprobar en primeira persoa o que custa manterse en forma na sala de fisioterapia: bicicleta elíptica, cinta de correr, traballo de musculatura,….todo vale cando se trata de gañar en benestar e saúde. Tamén amosaron gran interese na aula de informática e na de artes manuais onde puxeron en práctica algúns consellos dos nosos usuarios/as. A confección de pulseiras de macramé foi unha das actividades máis aplaudidas polos rapaces/as xunto co obradoiro de cociña, no que realizaron unhas riquísimas galletas de manteiga. Pero un dos momentos máis alegres e divertidos tivo lugar no departamento de logopedia durante a sesión de risoterapia onde aprenderon a importancia de rir e de rirse de si mesmos/as para gañar en felicidade e optimismo.

Hidroponía

Xa nos invernadoiros, os/as estudantes foron testemuñas dunha excelente masterclass sobre cultivos hidropónicos, un método innovador que tamén empregamos en Íntegro utilizando-en vez de terra- un medio acuoso e os nutrientes necesarios para proporcionar alimento ás plantas. Tras a explicación dos nosos técnicos, seguida con gran entusiasmo e expectación, a curiosidade dos nenos/as deu paso á imaxinación cunha interminable batería de preguntas para as que non sempre había fácil resposta.

Como xa é costume, houbo xogos con barreiras para poñer a proba a destreza dos alumnos/as superando obstáculos sobre unha cadeira de rodas e poñéndose, por uns intres, no lugar das persoas con mobilidade reducida. Finalmente, compartimos as experiencias vividas ao longo da xornada e as súas impresións sobre o centro. E, coma sempre, deixáronnos sen palabras. Agora, todos/as teñen máis claro que a diversidade é cuestión de capacidades, non de disCpacidades. Para nota!

Grazas pola visita. Ata a próxima!

post

Íntegro inaugura a Semana Cultural do IES Maximino Romero de Lema cunha charla sobre lesións medulares

O presidente Adolfo López Baña desprazouse ata o centro educativo de Baio (Zas) acompañado por un vogal da entidade e unha voluntaria

Ante a inminente chegada da temporada estival, a campaña de prevención de lesións medulares está a percorrer os centros educativos da Costa da Morte a un ritmo vertixinoso coa finalidade de concienciar e reeducar ao maior número de mozos e mozas posible, xa que durante as vacacións de verán é cando se produce un maior incremento de accidentes medulares por imprudencias en praias, piscinas e estradas.

Durante a charla, Adolfo, David e Teresa falaron das súas vivencias personais

Para informar sobre as causas e consecuencias de realizar prácticas de risco, o presidente de Íntegro, Adolfo López Baña, desprazouse ata o IES Maximino Romero de Lema de Baio (Zas) xunto ao vogal da nosa entidade, David Pombo, e unha voluntaria da asociación, Teresa Fuentes, abrindo así o programa de actividades da XII Semana Cultural do centro zacense.  Os tres poñentes mantiveron unha xuntanza con alumnos e alumnas de 3º da ESO para explicarlles a necesidade de coñecer e evitar riscos innecesarios que poden causar a morte ou deixar secuelas incurables- como as zambullidas de cabeza en praias e piscinas ou viaxar sen o cinto de seguridade- ao tempo que relataron as súas propias vivencias e as dificultades de vivir sobre unha cadeira de rodas, momento que suscitou gran curiosidade entre os/as estudantes por saber como era o seu día a día.

A xornada chegou ao seu punto máis álxido cando tocou poñer en práctica o aprendido na charla informativa. Os e as participantes tiveron a oportunidade de poñer a proba a súa destreza sobre unha cadeira de rodas e o seu grao de empatía para poñerse no lugar de quen ten a mobilidade reducida. E todos/as coincidiron en sinalar que sobre as dúas rodas, todo se ve diferente. Facendo gala dunha gran capacidade de adaptación e moitas gañas de superación, os alumnos/as animáronse a lanzar algúns tiros á canastra de baloncesto e realizar un circuíto de mobilidade polo pavillón escolar. O resultado foi espectacular! Seguro que a partir de hoxe todos e todas teñen un pouco máis claro que as imprudencias sempre pasan factura e nunca pagan a pena.

Esta actividade está subvencionada pola Xunta de Galicia e a Deputación da Coruña e nela colaboran tamén varios concellos e entidades privadas da Costa Morte. Vémonos moi pronto!

 

 

 

 

post

Máis de 200 persoas con diversidade funcional reivindican en Baio a inclusión para a autonomía persoal e unha vida independente

“Hoxe tomamos as rúas para facernos visibles”. Con esta declaración de intencións comezou o manifesto que as entidades participantes na 4ª Xornada de Inclusión organizada pola Asociación Íntegro leron ao remate do percorrido reivindicativo por Baio. “Estamos aquí para mandar unha mensaxe á sociedade que queremos que chegue tamén aos oídos dos políticos: queremos a inclusión para acadar a autonomía persoal e desenvolver un proxecto de vida independente”. Un obxectivo para o que é preciso que se adopten as medidas necesarias para acabar coa desigualdade, que se cree conciencia sobre a existencia de realidades e capacidades diversas “que poden aportar moito á sociedade”, que as persoas con diversidade funcional non sexan excluídas na toma de decisións que lles afectan, que se promovan as condicións necesarias nos ámbitos educativo, laboral ou social que garantan a súa autonomía “para poder desenvolver unha vida plena”, e que se fomente o “cambio de mentalidade” necesario para avanzar cara a inclusión real.

IMG_1535

As rúas de Baio enchéronse de persoas reivindicando a súa plena inclusión na sociedade

Non é unha tarefa doada a que demandaron as máis de 200 persoas que participaron na Marcha Diversa polas rúas de Baio, porque, como hoxe puido comprobarse, aínda queda moitísimo por facer en cuestións que deberían estar superadas, como a accesibilidade. De feito, o tenente de alcalde de Zas, Óscar Lema, que participou no percorrido, recoñeceu que “temos que mellorar, e estamos niso”. En Baio, como en tantas outras localidades, as beirarrúas seguen a ser unha sucesión de barreiras, malia que esta fin de semana, grazas á colaboración entre Íntegro e a Asociación de Empresarios Comarca de Soneira, hai ramplas colocadas nas portas de moitos establecementos comerciais e hostaleiros. Esas ramplas permitiron que, despois da marcha, os e as participantes puidesen acceder aos locais de hostalería para degustar os pinchos diversos. Tatiana Rellán, presidenta da entidade empresarial, agradeceu a colaboración de Íntegro “para facer de Baio ten a Pelota un evento inclusivo”.

IMG-20160506-WA0051

A Ruta do Pincho Inclusivo foi todo un éxito entre os asistentes

IMG-20160506-WA0064

Masterclass de zumba no pavillón municipal

A pesares da choiva, a néboa e as baixas temperaturas das primeiras horas do día, ningunha entidade quixo faltar á celebración da Xornada de Inclusión. Este ano sumáronse as asociacións Ámbar, Misela, Avante, Adisbismur, A Creba, Cruz Vermella de Vimianzo, Aloumiños, APEM, Un paso máis e Cogami, representada por Elena Antelo. Polo que respecta á representación política, á parte do tenente de alcalde de Zas (o alcalde, Manuel Muíño, uniuse pola tarde), no percorrido tamén participou o concelleiro pontecesán Carlos Penedo.

Stand Íntegro

A presenza de Íntegro en Baio ten a Pelota continuará toda a fin de semana. Tanto o sábado como o domingo teremos un stand na rúa Obispo Romero de Lema no que poderás atopar ampla información sobre as nosas actividades e proxectos máis recentes, como o Punto de Intervención para Mulleres con Diversidade (PIMD Rural), Costa da Morte Accesible (CMA) ou Bicos de Amora, a nova liña de xabóns naturais de glicerina que imos presentar nesta feira. Ademais, haberá un posto permanente de venta de artigos onde non faltarán as últimas creacións elaboradas polos usuarios/as do centro ocupacional como as pulseiras de macramé ou as tellas personalizadas. O horario de atención ao público será de 10.30 a 20.00.

 

post

Máis de 200 persoas participarán mañá en Baio na Marcha do Día da Inclusión

Xa está todo preparado para a celebración da 4ª Xornada da Inclusión que este ano terá lugar na localidade de Baio (Zas) coincidindo coa II edición de Baio ten a Pelota. En poucas horas dará comezo un amplo programa de actividades dirixidas a toda a poboación para reivindicar e concienciar sobre a importancia da inclusión e a diversidade.

SAMSUNG CAMERA PICTURES

A Marcha pola Diversidade será un dos actos centrais da xornada

Un dos actos centrais da xornada será Marcha Diversa pola Rúa que nesta edición contará coa participación de máis de 200 persoas pertencentes a diversas entidades sociais da provincia de A Coruña ademais doutros colectivos e institucións públicas que tamén se sumarán xunto aos veciños e veciñas que queiran asistir. Os actos darán comezo ás 11h cunha xuntanza de todos os participantes na praza Obispo Romero Lema. Media hora máis tarde, arrincará a Marcha Diversa que concluirá ás 12h coa lectura dun manifesto, elaborado polas entidades participantes, para reivindicar a inclusión social das persoas con diversidade funcional.  A continuación, como xa é costume, procederase á tradicional solta de globos.

Ruta do pincho inclusivo (1)

Os locais participantes na Ruta do Pincho Inclusivo disporán de ramplas móbiles para garantir a accesibilidade

Os actos institucionais darán paso a unhas das novidades con máis sabor desta edición: a ruta do pincho inclusivo, unha actividade froito da colaboración entre a Asociación de Empresarios Comarca de Soneira, os hostaleiros de Baio e a Asociación Íntegro, a través da súa área de traballo Costa da Morte Accesible (CMA). Esta peculiar iniciativa consistirá na instalación de ramplas móbiles, elaboradas polos usuarios/as do obradoiro de carpintería do centro ocupacional,  nos diferentes locais de hostalería que participan en Baio ten a Pelota para facilitar o acceso a persoas con mobilidade reducida e así garantir o dereito de todos/as a gozar do seu tempo de ocio e dun pinchos que lles deixarán moi bo sabor de boca.

A xornada matinal chegará ao seu remate a ritmo de zumba cunha divertidísima masterclass na que poderán participar todas as persoas que o desexen. Logo de tanta actividade tocará repoñer forzas cun xantar popular no pavillón municipal. Para os que quedaran con gañas de máis festa e diversión haberá karaoke e baile ata as 17h.

Stand Íntegro

ATURE

Pero a nosa presencia en Baio ten a Pelota continuará toda a fin de semana. Tanto o sábado como o domingo, Íntegro estará presente cun stand ubicado na rúa Obispo Romero Lema, no que poderás atopar ampla información sobre as nosas actividades e proxectos máis recentes, como o Punto de Intervención para Mulleres con Diversidade (PIMD Rural), Costa da Morte Accesible (CMA) ou Bicos de Amora, a nova liña de xabóns naturais de glicerina que imos presentar nesta feira. Ademais, haberá un posto permanente de venta de artigos onde non faltarán as últimas creacións elaboradas polos usuarios/as do centro ocupacional como as pulseiras de macramé ou as tellas personalizadas. O horario de atención ao público será de 10:30 a 20h.

Dende Íntegro queremos dar as grazas de antemán á Asociación de Empresarios Comarca de Soneira, encargados da organización de Baio ten a Pelota, así como ao Concello de Zas por permitirnos compartir con eles estas datas tan importantes para a localidade e pola súa estreita colaboración na preparación da nosa 4ª Xornada da Inclusión. Así mesmo, agradecemos tamén a participación na Marcha pola Diversidade de todos os compañeiros/as procedentes doutras agrupacións da provincia e dos veciños/as que queiran sumarse ao gran Día da Inclusión. “No único no que somos = é que somos #”.

inclusion final 1