post

Íntegro pon o broche de ouro ao seu 30º aniversario cunha gala cargada de emotividade e recoñecementos

O momento máis especial do día protagonizárono os usuarios/as da entidade sorprendendo aos fundadores cun galardón polo seu labor durante estas tres décadas

A música da orquestra de Cámara do Conservatorio de Carballo marcou o inicio da Gala Conmemorativa 30ª aniversario de Íntegro, celebrada onte á mañá no auditorio municipal de Cabana para poñer o broche de ouro a un ano repleto de actividades e celebracións.

Máis de 200 persoas acudiron a unha cita que se presumía cargada de emotividade e gratitude. E así foi! Palabras como inclusión, diversidade, igualdade de oportunidades ou visibilidade foron as máis oídas nun acto que deu renda solta ás emocións (que estaban a flor de pel) e a algunha que outra bágoa entre os/as asistentes. Ademais de usuarios/as, familiares, socios/as, directivos/as, veciñanza e moitas persoas anónimas vinculadas á entidade desde os seus inicios, estiveron presentes numerosas autoridades como a conselleira de Promoción do Emprego e Igualdade, María Jesús Lorenzana; a deputada de Benestar Social, Ana Lamas; o alcalde de Cabana, José Muíño; o presidente de Cogami, Anxo Queiruga; o director xeral de Maiores e Persoas con Discapacidade, Fernando González, así como representantes de diferentes concellos da Costa da Morte.

O primeiro en subir ao escenario para recoller o seu galardón foi o rexedor cabanés, José Muíño, que destacou que “hoxe todos somos Íntegro” amosándose moi orgulloso de contar no seu municipio cunha entidade “que leva tres décadas traballando a favor dunha sociedade máis inclusiva desde a normalidade e a diversidade”. A continuación, o presidente de Íntegro, Adolfo López Baña, fixo un minucioso percorrido polos 30 anos de historia da asociación, relatando os obstáculos e barreiras superadas desde a creación de Ponte-Cabana ata a actualidade, sen esquecerse da COVID e o cambio de hábitos que trouxo consigo, para concluír lembrando que “é hora de seguir avanzando e aportando á comunidade a través do noso valor social”. Por cada euro público recibido, Íntegro aporta 12€ á sociedade, contribuíndo así á cohesión do tecido empresarial e social da Costa da Morte.

O presidente de COGAMI e COCEMFE, Anxo Queiruga, foi o seguinte en recoller a peza conmemorativa elaborada polos usuarios e usuarias da entidade. Durante o seu discurso só tivo palabras de loanza e agradecemento para “cada unha das persoas que construíron esta gran familia xunto a Adolfo e Sil Couto, e que desde a unión loitan por unha sociedade máis xusta e igualitaria para todos e todas”.

 

A deputada Ana Lamas, destacou a traxectoria e o traballo que leva a cabo “unha entidade que é referencia no eido social e que está aportando calidade de vida nun sector onde a discapacidade limita pero non condiciona, dando un futuro a cada unha das persoas usuarias do centro”.  Pola súa banda, a conselleira María Jesús Lorenzana puxo en valor o traballo desenvolvido por Íntegro e agradeceu “a defensa que realiza en favor da igualdade de oportunidades e o seu compromiso social”. Entre os programas e servizos da asociación, Lorenzana destacou o labor do Centro Especial de Emprego MaisPorvir Xestión Social, así como as accións formativas adaptadas e personalizadas para facilitar e apoiar o acceso ao emprego. A titular da área de Promoción do Emprego e Igualdade da Xunta de Galicia tamén fixo mención á Medalla Pardo Bazán, que a entidade vén de recibir do órgano autonómico como recoñecemento á súa contribución a unha sociedade máis xusta, igualitaria e solidaria.

 

 

 

 

 

 

Recoñecementos especiais

Os recoñecementos máis especiais foron para María Verdes, enfermeira, socia e membro da entidade desde os seus inicios, en nome do persoal sanitario, que tan importante labor realizou durante a pandemia; Vanesa, asistente persoal e profesional sociosanitaria que representou ao colectivo de profesionais de atención sociosanitaria, e Carmen Villanueva, unha das primeiras traballadoras de Íntegro, veciña de Nantón e na actualidade voluntaria da asociación. O recoñecemento empresarial recaeu en José Ramón Pombo Imia, de Autocares J.Pombo, un dos colaboradores máis antigos da entidade, comprometido coa inclusión social das persoas con discapacidade e que na actualidade conta cunha flota de autobuses na que o 60% das prazas son accesibles.

 

 

 

 

A xornada do sábado estivo chea de imaxes para o recordo. Unha das máis emotivas foi sen dúbida o recoñecemento sorpresa que os usuarios e usuarias de Íntegro lle ofreceron aos fundadores da entidade: Adolfo López Baña e Silvestre Couto Torrado. Pero as persoas usuarias foron ademais os grandes protagonistas dunha mañá na que recitaron poemas, elaborados por eles mesmos/as, e exerceron de presentadores da gala.

 

A actuación musical do CMUS de Carballo puxo o punto e final ao acto no auditorio municipal de Cabana. A xornada rematou cun ágape que se serviu na Escola de Vela, á que os convidados/as chegaron camiñando polo paseo fluvial e desfrutando das privilexiadas vistas que ofrece o Estuario do Anllóns.

 

 

 

 

 

post

O PIMD Rural atendeu a máis de 60 mulleres en situación de vulnerabilidade da Costa da Morte

  • O Punto de Intervención para Mulleres con Diversidade do Rural, promovido por Íntegro e co-financiado polo Fondo Social Europeo (FSE) ao abeiro do programa operativo FSE Galicia 2014-2020, prestou atención a 62 mulleres desde o pasado mes de outubro 
  • Ademais de accións formativas presenciais, ofrecéronse servizos de asesoramento, orientación laboral, acompañamento e atención psicolóxica a colectivos en risco de exclusión social

O Punto de Intervención para Mulleres con Diversidade Funcional do Rural (PIMD Rural) clausura neste mes de agosto a edición correspondente ao período 2021/2022 cun balance máis que positivo e un notable incremento de usuarias con respecto ao últimos anos. Dende o pasado 1 de outubro, foron atendidas  62 mulleres, a maioría delas con disCapacidade e residentes en concellos rurais da Costa da Morte con baixa densidade de poboación, neste servizo promovido pola asociación Íntegro e co-financiado pola Secretaría Xeral de Igualdade de Xunta de Galicia e o Fondo Social Europeo (FSE), ao abeiro do programa operativo FSE Galicia 2014-2020, para fomentar a igualdade de oportunidades e contribuír a diminuír a tripla discriminación á que se ven sometidas moitas das beneficiarias do programa.

Ao longo deste exercicio, realizáronse numerosas actuacións encamiñadas á orientación e información sobre recursos singularizados, de atención e asesoramento persoal e social, así como de apoio directo nas relacións con outras entidades, organismos e servizos para facilitar ás persoas usuarias a súa integración social. De feito, un dos máis demandados nos últimos meses foi o acompañamento a centros sanitarios e outras administracións públicas ou en entidades bancarias para a realización de trámites básicos. A orientación laboral e o seguimento na busca de emprego foi, xunto coa realización de actividades para a mellora da empregabilidade, unha das prestacións máis requiridas polas usuarias, que tamén precisaron do noso servizo de atención psicolóxica e mediación familiar e/ou intercultural para a resolución de conflitos no ámbito doméstico.

Programa formativo

Por outra banda, a posta en marcha de novas accións formativas contribuíu notablemente a promover a igualdade de oportunidades e diminuír a discriminación á que habitualmente están sometidas as mulleres con disCapacidade e/ou en situación de especial vulnerabilidade. Neste último ano, levamos a cabo con gran éxito varios talleres sobre habilidades pre-laborais, habilidades sociais e domésticas, resolución de conflitos, auto-coidados, manexo do teléfono móbil e busca activa de emprego.

Se es muller con ou sen discapacidade, resides no rural e queres recibir formación ou precisas apoio e/ou asesoramento, non dubides en poñerte en contacto con Íntegro chamando ao 981 734 985 ou enviando un mail a info@integro.es.

post

En marcha o proxecto de “Ampliación do Centro de Recursos Íntegro” do que se beneficiarán 45 persoas con diversidade funcional da Costa da Morte

O proxecto conta co cofinanciamento da Xunta de Galicia, a través dos fondos do 0.7% do IRPF, a Deputación Provincial da Coruña, a través das Convocatorias FOIE 21-22, e a Fundación ONCE, a través do Plan de Prioridades 21

Desde o pasado 1 de maio, a  asociación Íntegro está a desenvolver un proxecto de “Ampliación do Centro de Recursos Íntegro” do que se beneficiarán os 45 usuarios/as do centro de Nantón (Cabana de Bergantiños), na súa maioría persoas con discapacidade intelectual da Costa da Morte. Dita actuación, que consistirá na creación dun novo volume rectangular de 110 metros cadrados ao carón da fachada principal, permitirá ampliar algunhas dependencias actuais como a aula ocupacional, a cociña, os vestiarios e os aseos. Estes traballos permitirán mellorar a calidade dos servizos actuais e incrementar o número de prazas para dar cobertura a un maior número de usuarios/as.

O proxecto, que ascende a uns 180.400,00 €, aproximadamente, e realizarase o longo desta anualidade, conta co financiamento de varias institucións públicas e entidades sociais. Por unha banda, a Consellería de Política Social da Xunta de Galicia subvencionará, a través de COGAMI, o 43% do gasto grazas aos fondos do  0,7% do IRPF procedentes do cadro 106 de “Actividades de Interese Social” da declaración da renda. Por outra banda, a Deputación Provincial da Coruña aportará o 37% con cargo ás Convocatorias FOIE 21-22 e a Fundación ONCE investirá o 8%, a través do Plan de Prioridades da Confederación Española de Persoas con Discapacidade Física e Orgánica (COCEMFE). O resto, un 12%, será aportado pola propia entidade dos fondos propios.

A asociación Íntegro é unha entidade social sen ánimo de lucro que desde 1992 promove a inclusión social e laboral das persoas con diversidade funcional da Costa da Morte. Na actualidade, conta cun Centro de Día e un Centro Ocupacional que prestan servizo a 45 persoas das comarcas de Bergantiños, Soneira e Fisterra. A entidade con sede en Nantón (Cabana de Bergantiños) forma parte da Confederación Galega de Persoas con Discapacidade (COGAMI) e da Confederación Española de Persoas con Discapacidade Física e Orgánica (COCEMFE).

post

7 persoas con disCapacidade iniciaron hoxe o curso de limpeza de superficies e mobiliario en edificios e locais

O Centro Especial de Emprego Máis Porvir Xestión Social será o encargado da formación teórica, á que seguirá un período de prácticas en empresas e a prestación de apoio na busca activa de emprego

Esta acción está subvencionada pola Fundación ONCE e co-financiada polo Fondo Social Europeo (FSE) no marco do Programa Operativo POISES 2014-2020

Esta mañá deu comezo en Íntegro o novo curso de Limpeza de superficies e mobiliario en edificios e locais, no que participan 7 persoas con discapacidade e/ou en situación de desemprego. Trátase dunha acción formativa adaptada, incluída na convocatoria de axudas económicas de selección de operacións para o reforzo da empregabilidade de persoas con discapacidade “UNO a UNO” da Fundación ONCE, co-financiada polo Fondo Social Europeo (FSE), no marco do Programa Operativo POISES 2014-2020.

Desde hoxe 26 e ata o vindeiro 12 de maio, o alumnado recibirá da man do noso Centro Especial de Emprego MAIS PORVIR XESTIÓN SOCIAL S.L.U. a formación teórica específica en materia de limpeza (160 horas), ademais das correspondentes sesións prácticas en empresas (124horas), coas que completarán o período de aprendizaxe (284 horas). Unha vez rematado o curso, levarase a cabo un programa transversal para prestar apoio individualizado na busca activa de emprego co obxectivo de promover a inclusión laboral real dos alumnos e alumnas. Benvidos a todos/as!

post

Íntegro volve ás aulas cunha nova edición da Diverescola

Tras case dous anos de inactividade pola pandemia

O CEIP Plurilingüe San Vicenzo de Vimianzo será o primeiro destino desta iniciativa, incluída no programa Capacíta-T, para a achegar ao alumnado de infantil e primaria da Costa da Morte a diversidade e a inclusión a través do xogo e o entretemento

Tras un período de inactividade de case dous anos debido á COVID-19, a asociación Íntegro porá en marcha a vindeira semana unha nova edición da Diverescola, unha iniciativa promovida pola entidade de Nantón, no marco do programa Capacíta-T, para achegar aos máis cativos e cativas da Costa da Morte a diversidade e a inclusión a través do xogo e o entretemento. A primeira saída da nova campaña terá como destino o CEIP Plurilingüe San Vicenzo, de Vimianzo.

O martes 25 terá lugar a primeira xornada de sensibilización, na que participarán un total de 69 nenos e nenas de 4 a 6 anos. Desde primeira hora da mañá, desenvolveranse diferentes actividades lúdicas arredor dun “contaconto guiado”. Ademais da lectura e e posterior interacción sobre o conto, abordarase a temática a través da técnica do “muralismo” para intercambiar ideas e afianzar conceptos relacionados coa inclusión e a diversidade.

O mércores 26 será a quenda do alumnado de 1º e 2º de educación primaria. Neste caso, os pupitres darán paso aos circuítos de obstáculos para acoller unha actividade denominada “xogamos coas barreiras”. Trátase de realizar un circuíto de mobilidade en cadeira de rodas por determinados espazos do colexio e un percorrido estacional sensorial, que lles axudará a sensibilizarse e empatizar coas dificultades. Así, a través do xogo, poderemos reflexionar sobre as barreiras físicas, sociais e mentais que existen na sociedade e como podemos superalas.

Educación en valores

Diverescola é unha acción de sensibilización desenvolvida por Íntegro, no marco do programa de capacitación da sociedade Capacíta-T, encamiñada a educar en valores ao alumnado de infantil e primaria dos centros educativos da Costa da Morte, co obxectivo de formar, xunto ao profesorado, persoas comprometidas coa diversidade funcional, romper as barreiras mentais e propiciar a normalidade e a inclusión real. A través do xogo e o entretemento, os máis cativos/as terán a oportunidade de reflexionar e flexibilizar sobre crenzas erróneas, xa consolidadas, en torno ás persoas que son diferentes e/ou teñen diferentes capacidades, ata darse conta das súas potencialidades, aprender a respectalas e descubrir que a riqueza e a importancia da diversidade. Deste xeito, promoveremos actitudes positivas no alumnado para combater a discriminación e a desigualdade.

post

Íntegro amplía o seu cadro de persoal coa contratación dunha psicóloga

Xunto coa educadora e a traballadora social, a nova profesional prestará atención especializada a persoas usuarias e familias da entidade ademais de desenvolver o servizo de atención psicolóxica do PIMDRural

A asociación Íntegro das Persoas con Diversidade  Funcional da Costa da Morte vén de ampliar o seu cadro de persoal coa contratación dunha psicóloga que prestará atención especializada, tanto de xeito individualizado como en intervencións grupais, a persoas usuarias e familias, ademais de desenvolver o servizo de atención psicolóxica do Punto de Intervención para Mulleres con Diversidade do Rural (PIMDRural).

Desde este mes de novembro, a entidade de Nantón suma así unha nova profesional ao seu equipo, integrado xa por unha educadora e unha traballadora social. Entre as súas novas funcións destaca a súa participación na planificación, elaboración, desenvolvemento e avaliación dos Plans Individuais de Atención (PIA) das persoas usuarias, así como ofrecer asesoramento e apoio psicolóxico ás familias que o precisen. Así mesmo,  facilitará ás persoas profesionais de atención directa, pautas e estratexias de intervención sobre os problemas emocionais ou de conduta detectados, ademais de informar, de xeito individualizado, sobre a evolución e necesidades de cada usuario/a aos familiares que así o soliciten.  Outra das facetas a desenvolver será a de  participar na elaboración de proxectos que requiran dun estudo psicolóxico para avaliar posibles beneficios sobre as persoas usuarias.

PIMD Rural

Desde o ano 2015 a asociación Íntegro conta cun Punto de Intervención para Mulleres con Diversidade do Rural (PIMDRural). Trátase dun programa de atención personalizada e especializada,  co-financiado pola Consellería de Emprego e Igualdade a través da Secretaría Xeral de Igualdade e o Fondo Social Europeo (FSE), dirixido a mulleres en situación de especial vulnerabilidade que residen na zona rural da Costa da Morte.

Durante o período comprendido entre o 1 outubro de 2020 e o 30 de setembro de 2021, desde o PIMDRural prestouse atención a preto de medio centenar de mulleres, a maioría delas con disCapacidade. Entre os servizos máis demandados polas usuarias destacan o de información e orientación sobre recursos singularizados de atención e asesoramento persoal e social, así como apoio directo  nas relacións con outras entidades, organismos e servizos que lles faciliten ás persoas o seu proceso de integración social; mediación  intercultural e/ou familiar, a través da posta en marcha de habilidades persoais e sociais básicas ou de competencias para a mellora da empregabilidade, e orientación laboral e de acompañamento na busca de emprego, así como a prospección do mercado de traballo, a intermediación e a titorización laboral. Ademais do acompañamento, ás persoas usuarias tamén dispoñen dun servizo de transporte gratuíto para os seus desprazamentos.

 

Por outra banda, desde o Punto de Intervención para Mulleres leváronse a cabo numerosos acompañamentos na xestión de trámites administrativos, xestións económicas, citas médicas, etc. O desenvolvemento de accións formativas, dirixidas a grupos reducidos para ofrecer unha atención máis personalizada e adaptada ao protocolo COVID, é outro dos piares fundamentais para acadar a igualdade de oportunidades. Neste último ano, leváronse a cabo diversos talleres relacionados coas habilidades sociais e pre-laborais, autocoidado e hixiene persoal, e o manexo do teléfono intelixente, un dos máis demandados polas persoas usuarias do servizo.

 

 

 

post

Preto de 50 mulleres en situación de vulnerabilidade foron atendidas no PMIDRural

  • O Punto de Intervención para Mulleres con Diversidade do Rural, promovido por Íntegro e co-financiado polo Fondo Social Europeo ( FSE) ao abeiro do programa operativo FSE Galicia 2014-2020, prestou atención a 50 mulleres en 2021 
  • Ademais de accións formativas presenciais, ofrecéronse servizos de asesoramento, orientación laboral e acompañamento a colectivos de especial vulnerabilidade 

O Punto de Intervención para Mulleres con Diversidade Funcional do Rural (PIMD Rural) vén de pechar o período 2020/2021 cun balance máis que positivo e un notable incremento de usuarias con respecto aos últimos anos. Dende o pasado 1 de outubro foron atendidas case 50 mulleres, a maioría delas con disCapacidade e residentes en concellos rurais con baixa densidade de poboación, neste servizo promovido pola asociación Íntegro e co-financiado pola Secretaría Xeral de Igualdade de Xunta de Galicia e o Fondo Social Europeo (FSE), ao abeiro do programa operativo FSE Galicia 2014-2020, para fomentar a igualdade de oportunidades e contribuír a diminuír a tripla discriminación á que se ven sometidas moitas das beneficiarias deste programa.

Ao longo do presente exercicio, realizáronse numerosas actuacións encamiñadas á orientación e información sobre recursos singularizados, de atención e asesoramento persoal e social, así como de apoio directo nas relacións con outras entidades, organismos e servizos para facilitar ás persoas usuarias a súa integración social. De feito, un dos máis demandados nos últimos meses foi o acompañamento na realización de trámites básicos en oficinas como o SEPE, administracións públicas ou en entidades bancarias.

 

 

A orientación laboral e o seguimento na busca de emprego foi, xunto coa realización de actividades para a mellora da empregabilidade, unha das prestacións máis requiridas polas usuarias, que tamén precisaron do noso servizo de mediación familiar e/ou intercultural.

Programa formativo

Por outra banda, a posta en marcha de novas accións formativas contribuíu notablemente a promover a igualdade de oportunidades e diminuír a discriminación á que habitualmente están sometidas as mulleres con disCapacidade e/ou en situación de especial vulnerabilidade. Neste último ano, levamos a cabo con gran éxito varios talleres sobre habilidades pre-laborais, habilidades sociais e domésticas, resolución de conflitos, auto-coidado, manexo do teléfono móbil e busca activa de emprego en época de pandemia, este último con excelentes resultados xa que logramos a inserción laboral de varias persoas usuarias en diferentes empresas da contorna.

Logo dun ano de sesións online, puidemos retomamos as clases presenciais, con grupos reducidos para garantir as medidas hixiénico-sanitarias e prestar unha atención personalizada e á medida das necesidades de cada participante.

Se es muller con ou sen discapacidade, resides no rural e queres recibir formación ou precisas apoio e/ou asesoramento, non dubides en poñerte en contacto con Íntegro chamando ao 981 734 985 ou enviando un mail a info@integro.es.

post

Íntegro recibe unha axuda da Consellería do Mar para a posta en marcha de Diversiplás, + diverso – plástico

  • Trátase dun proxecto medioambiental promovido pola entidade e co-financiado a través do programa operativo do Fondo Europeo Marítimo e da Pesca (FEMP)
  • Ademais de promover a inclusión social e laboral de persoas con discapacidade, desenvolverá accións de sensibilización ambiental e tratamento de residuos plásticos en colaboración con concellos, centros educativos e o sector pesqueiro da Costa da Morte

A asociación Íntegro vén de recibir unha subvención procedente da Dirección Xeral de Desenvolvemento Pesqueiro da Consellería do Mar, a través do programa operativo do Fondo Europeo Marítimo e da Pesca (FEMP), para a posta en marcha dun ambicioso proxecto denominado Diversiplás, + Diverso – Plástico, dirixido a promover e fomentar o crecemento económico, a inclusión social, a creación de emprego e o apoio á empregabilidade así como a mobilidade laboral nas comunidades costeiras e de interior, dependentes da pesca e a acuicultura, incluíndo a diversificación das actividades realizadas no marco da pesca e respecto doutros sectores da economía marítima.

O proxecto, que se desenvolverá en dúas anualidades (2021-2022), contempla diversas liñas de actuación entre as que destaca a creación dun taller para o aproveitamento e tratamento de residuos plásticos obtidos do mar así como o desenvolvemento dun programa de divulgación, sensibilización e concienciación orientado á erradicación e valorización dos residuos, tanto mariños como costeiros, que contará coa colaboración e implicación de diferentes entidades, administracións locais e outros colectivos da Costa da Morte (confrarías, redeiras, sector pesqueiro, comunidade escolar, colectivo de inclusión social), procurando así a implicación de toda a sociedade para contribuír a reforzar o dinamismo social, económico e ambiental do noso litoral. Deste xeito, ademais de promover a redución do lixo mariño e a mellora da biodiversidade e dos ecosistemas mariños, potenciaremos a autonomía e a inclusión das persoas con discapacidade no ámbito social e laboral.

post

Instalada unha marquesiña en Íntegro para as persoas usuarias do transporte adaptado  

A construción metálica, que ocupa boa parte do aparcadoiro, foi sufragada pola Deputación Provincial da Coruña con cargo ao Programa de Subvencións a Entidades Sen Fins de Lucro para o Investimento de Servizos Sociais no ano 2020 (FOIE)

Encántanos darvos boas novas e máis cando xa nos atopamos ás portas do Nadal e todo parece contaxiarse de certa maxia e ilusión. Nesta ocasión, máis que dun soño, trátase dunha antiga demanda feita ao fin realidade.

Todas as persoas que formades parte da gran familia Íntegro sabedes que dende hai tempo urxía a instalación dunha marquesiña dentro do noso recinto de Nantón para protexer aos nosos usuarios/as, a maioría con mobilidade reducida, das inclemencias meteorolóxicas durante a entrada e saída dos vehículos de transporte adaptado.  

Grazas á aportación da Deputación Provincial de A Coruña, a través do seu Programa de Subvencións a Entidades Sen Fins de Lucro para o Investimento de Servizos Sociais no ano 2020 (FOIE), vimos de acometer os traballos de construción dunha cuberta metálica instalada en boa parte do aparcadoiro do noso centro. Agora, seguro que as dificultosas e laboriosas transferencias dos vehículos de transporte aos andadores ou ás cadeiras de rodas, e viceversa, resultarán máis sinxelas e cómodas tanto para os nosos usuarios/as como para as monitoras encargadas de realizar esas labores. Adeus a loitar á intemperie contra vento e….choiva!

post

A campaña de prevención das lesións medulares arrincará este venres do IES Alfredo Brañas de Carballo

 

• A Casa do Concello de Carballo acolleu onte a presentación dunha iniciativa que conta xa con 28 anos de andadura

• No acto participaron o presidente de Íntegro, Adolfo López Baña, varios membros da xunta directiva, a educadora social da entidade, o alcalde de Carballo e a concelleira de Igualdade e Benestar

A asociación Íntegro vén de presentar na Casa do Concello de Carballo a campaña de prevención de lesións medulares para o 2020 coa que a entidade ten previsto volver a percorrer os centros de ensino de secundaria da Costa da Morte sensibilizando e concienciando aos nosos mozos e mozas, como xa vén facendo dende hai anos. “Se conseguimos evitar unha soa lesión medular, xa pagou a pena”, así resumía Adolfo López Baña, presidente de Íntegro, o principal obxectivo desta iniciativa que, pese a cambiar de formato e de destinatarios/as, constitúe unha das primeiras actividades organizadas pola entidade desde a súa fundación en 1992, ano no que, segundo lembrou, “eramos un punto negro a nivel estatal”.

Acompañando a Adolfo López Baña tamén estiveron presentes outros membros da xunta directiva de Nantón como David Pombo e José Manuel Mira; a educadora social da entidade, Tania Bartucca; o alcalde de Carballo, Evencio Ferrero, e a concelleira de Igualdade e Benestar, Maica Ures, quen calificou de moi “significativo” o cartel deste ano porque, efectivamente, “calquera descoido ou unha mala caída poden cambiarche a vida para sempre”. O rexedor, pola súa banda, felicitou a Íntegro pola organización desta iniciativa e “por todo o traballo que está a facer conseguir unha sociedade inclusiva, na que toda a xente, á marxe das súas circunstancias físicas, teña a oportunidade de demostrar as súas capacidades”.

Primeiras citas

A campaña 2020 arrincará este venres 24 coa visita ao alumnado de secundaria do IES Alfredo Brañas e continuará nas vindeiras semanas con paradas nos centros de ensino de Coristanco, Vimianzo, Zas e Carnota, entre outros municipios. Durante as xornadas de sensibilización, o alumnado non só terá ocasión de participar nas charlas protagonizadas por persoas con lesións medulares, senón que tamén poderán poñerse no seu lugar para coñecer mellor o seu día a día sobre unha cadeira de rodas.

Pola súa banda, Tania Bartucca apelou á participación de todos os centros de ensino da comarca para contribuír a concienciar aos máis novos sobre a importancia da prevención e a necesidade de evitar prácticas de risco. Neste senso, apuntou que se algún colexio ou instituto non recibiu información e está interesado en formar parte da campaña deste ano, só ten que poñerse en contacto con Íntegro no enderezo electrónico formacion@integro.es ou nos teléfonos 981 734 985 e 650 961 649.

Tras 28 anos de campañas de sensibilización, os datos confirman que as lesións medulares reducíronse de forma notable, especialmente, entre os máis novos/as e, pola contra, aumentaron entre as persoas maiores. Por iso, desde a entidade xa se está a traballar na posta en marcha de accións específicas orientadas a este sector da poboación. Seguirémosvos informando!!