post

Manifesto do CERMI no Día Nacional en España da Convención Internacional sobre os Dereitos das Persoas con Discapacidade

A Convención da ONU, a mellor aliada das persoas con discapacidade

O pasado 22 de febreiro, o Consello de Ministros do Goberno de España, acollendo unha proposta do CERMI Estatal, declaraba oficialmente a xornada do 3 de maio de cada ano como Día Nacional en España da Convención Internacional sobre os Dereitos da Persoas con Discapacidade de 2006. Esta Convención é o tratado internacional que promove, protexe e asegura os dereitos humanos das persoas con discapacidade en todo o mundo.

A data do 3 de maio foi elixida por ser o día no que a Convención entrou en vigor, no ano 2008, tras lograr o número exixido mínimo de ratificacións de Estados parte, entre eles España.

Con esta declaración do Día 3 de maio, trátase de contribuír ao coñecemento, a difusión e a toma de conciencia acerca desta Convención e os seus principios, valores e mandatos, estendendo a cultura e a práctica dos dereitos humanos na esfera das persoas con discapacidade.

Este ano 2019 é, pois, o primeiro no que se celebra este día oficial, ocasión que o movemento social organizado da discapacidade desexa aproveitar para resaltar a relevancia da Convención como a mellor e máis firme aliada das persoas con discapacidade, mulleres e homes, nenas e nenos, e como o dispositivos xurídico, político e social máis apropiado para facer efectivos os seus dereitos, inclusión e benestar.

O potencial transformador da Convención, marco referencial e prescritor ineludible de todas as políticas públicas e lexislacións que se leven a cabo en España no dominio das persoas con discapacidade, intensifícase se este tratado internacional se pon en conexión cos Obxectivos de Desenvolvemento Sostible (ODS) e a Axenda 2030 das Nacións Unidas.

Interpretar, despregar e aplicar a Convención en clave de ODS e estes en clave de Convención de 2006, redobrarán os efectos de cambio social que necesitan as persoas con discapacidade para lograr contornas, relacións e comunidades plenamente inclusivas, sostibles humana e socialmente, respectuosas e valedoras da diversidade como ben de primeira magnitude, digno de promoción e protección.

A Convención de 2006 e os ODS, mutuamente combinados, marcan, polo tanto, a axenda política da discapacidade dos próximos anos, que pasa sen dúbida de modo prioritario por atender e materializar as recomendacións que o Comité dos Dereitos das Persoas con Discapacidade de Nacións Unidas formulou a España, trala segunda revisión do grao de cumprimento deste tratado realizada os días 18 e 19 de marzo de 2019, e feitas públicas o pasado 9 de abril (https://www.cermi.es/es/actualidad/novedades/observaciones-finales-sobre-los-informes-periódicos-segundo-y-tercero).

As recomendacións deste Comité referidas a mulleres e nenas con discapacidade, grupo maioritario dentro das persoas con discapacidade e máis exposto á violación estrutural e sistemática dos seus dereitos, son particularmente exixibles e urxentes, polo que deben constituír obxectivo preferente tanto das políticas públicas de igualdade como das de discapacidade.

O programa político e social para que a Convención de 2006 e os ODS sexan unha realidade práctica nun período razoable é inxente e o movemento cívico de dereitos humanos das persoas con discapacidade e as súas familias estará vixilante para que os poderes públicos, os axentes sociais, os operadores económicos, os medios de comunicación e toda a sociedade encamiñen a súa actuación con estes postulados.

post

Rematada a 2ª fase do proxecto de formación da fachada ventilada do Centro de Recursos Íntegro

As obras realizáronse con cargo ao programa FOIE da Deputación da Coruña destinado a entidades sen fins de lucro e coa co-financiación da Xunta de Galicia, xestionada por COGAMI a través dos fondos do 0,7% do IRPF destinados a fins sociais

En Íntegro vimos de rematar as obras da “Fase 2ª Formación de Fachada Ventilada do Centro de Recursos Íntegro” como continuidade ao proxecto iniciado a finais de 2017 para a reparación e acondicionamento integral da cuberta exterior das nosas instalacións de Nantón (Cabana de Bergantiños). Así, coa realización destes traballos, completase o illamento térmico e acústico da fachada, de cara á obtención dun maior aforro enerxético e unha ventilación natural máis eficaz, coa que se pon fin aos problemas de condensación que viñamos sufrindo ata o de agora. A mellora das condicións de habitabilidade tamén repercutirá positivamente nunha maior calidade de vida tanto para as persoas usuarias do centro como para os/as traballadores e visitantes que cada día se achegan ata as nosas instalacións.

Dita reforma, executada durante o primeiro trimestre de 2019 pola empresa Aluminios Beres con cargo ao programa FOIE 2018, que a Deputación de A Coruña destina a entidades sen fins de lucro para a inversión de servizos sociais, conta ademais coa co-financiación da Xunta de Galicia, xestionada por COGAMI, a través dos fondos do 0,7% do IRPF, procedente da convocatoria de subvencións que os contribuíntes derivan a “actividades de interese social” marcando o X Solidario no recadro 106 da súa declaración da renda.

 

 

 

post

Íntegro sae á rúa para esixir que se garanta a accesibilidade nos edificios de vivendas

Foi durante a concentración organizada esta mañá en Santiago por COGAMI xunto a compañeiros doutras entidades sociais e na que o noso presidente participou activamente durante a lectura dun manifesto

Dentro da campaña de sensibilización “A miña casa non é o meu cárcere”, promovida pola Confederación Española de Personas con Discapacidad Física y Orgánica (COCEMFE), un grupo de usuarios/as de Íntegro desprazouse esta mañá a Santiago de Compostela para participar  na concentración organizada por COGAMI na Praza do Obradoiro para poñer en coñecemento de toda a cidadanía a importancia da accesibilidade nos edificios de vivendas. Este acto formou parte da 37 manifestacións simultáneas postas hoxe en marcha en 37 cidades do país de 15 comunidades autónomas co obxectivo de denunciar que milleiros de persoas con mobilidade reducida non poden saír á rúa con autonomía nin, polo tanto, levar unha vida independente.

Acompañando aos nosos usuarios/as e monitoras, tamén estivo o presidente de Íntegro Adolfo López Baña, que participou na lectura dun manifesto para facer fincapé en que se leven a cabo reformas integrais nas vivendas porque “un edificio accesible é un dereito para todas as persoas e non podemos facer que a accesibilidade dependa dos recursos económicos da cidadanía” ao tempo que asegurou que “a realización das obras que garantan o acceso ás persoas con mobilidade reducida é un investimento xusto e necesario porque, ao fin e ao cabo, ninguén sabe se nalgún momento da súa vida vai necesitar destas adaptacións”.

Os datos

Ademais das persoas con discapacidade orgánica, en España hai 2,5 millóns de persoas con mobilidade reducida que precisan de medios de apoio para desprazarse e levar unha vida autónoma. No último censo de vivendas, só o 22,9% dos edificios eran accesibles e tan só o 0,6% dos 10 millóns de estudos de vivendas de España cumpre coa regulamentación. Pero os atrancos van máis alá xa que 63% dos edificios non son accesibles da rúa ao portal por contar con escaleiras nesa zona e o  64% dos edificios carecen tamén de caixas do correo accesibles dende unha cadeira de rodas. Unhas cifras desalentadoras que non convidan á esperanza. 

O acto celebrado hoxe en todo o país pretende sumar esforzos para modificar a Lei de Propiedade Horizontal e que sexa de obrigatorio cumprimento a realización de reformas de accesibilidade solicitadas por persoas con discapacidade ou maiores de 70 anos. Así mesmo, tamén se demandou a concesión de axudas concretas a todas as comunidades veciñais que deban afrontar este tipo de actuacións, ante o elevado custe que supón a súa implantación. O compromiso das administracións públicas e de toda a cidadanía é fundamental para preservar un dereito que afecta á sociedade en xeral.  É responsabilidade de todos/as!

post

Máis Porvir e o Concello de Zas asinan un contrato para a prestación de servizos públicos

Con esta xa son tres as accións sociais de emprego postas en marcha en varios municipios da Costa da Morte no último ano  

Máis Porvir Xestión Social-a empresa de economía social de Íntegro- e o Concello de Zas veñen de dar esta semana un novo paso na inserción laboral das persoas con diversidade funcional da Costa da Morte grazas á sinatura dun contrato para a xestión e o mantemento do servizo de “Limpeza de edificios públicos destinados a centros de saúde e centros de ensino” do municipio. No acto, que tivo lugar onte na Casa do Concello estiveron presentes o administrador da entidade concesionaria, Adolfo López Baña; a xerente, Sandra Caamaño e o alcalde de Zas, Manuel Muíño. Ao rematar, ambas partes coincidiron en destacar a necesidade de que as Administracións públicas se impliquen na inclusión social dos colectivos máis desfavorecidos comezando por mellorar a súa empregabilidade en condicións de igualdade.

Este contrato terá unha vixencia de dous anos e posibilitará a continuidade laboral dos nove traballadores/as que na actualidade conforman o Centro Especial de Emprego, creado e xestionado por Íntegro para a prestación de servizos e a xestión de novos recursos para persoas con discapacidade, que a partir do luns asumirá a limpeza da escola infantil de Zas, os centros de saúde de Baio e Zas e o CEIP Labarta Pose de Baio.

Sinatura entre Máis Porvir-Combina Social e o Concello de Malpica en xullo de 2016

Con esta xa son tres as accións de emprego postas en marcha. A primeira delas en xullo do ano pasado mediante a sinatura dun convenio entre a UTE formada por Máis Porvir-Combina Social, de Cogami, e o Concello de Malpica para a realización das tarefas de conserxería e limpeza do CEIP Milladoiro e do pavillón polideportivo municipal por un período de dous anos. E a segunda hai apenas dous meses no Concello de Cabana, onde a nosa empresa de economía social está a acometer o mantemento do mobiliario urbano do municipio cunha duración dun ano.

Unha listaxe que vai en aumento grazas ao compromiso e á implicación social das entidades públicas locais. Ogallá tomen nota as empresas e organismos do ámbito privado e aposten pola igualdade de oportunidades tamén a nivel laboral..

post

Lecer Náutico en Sanxenxo para seis usuarios/as de Íntegro

Xunto á logopeda e á terapeuta ocupacional do centro gozarán de cinco días de deporte, ocio e turismo convivindo con compañeiros/as doutras entidades    

Un grupo formado por seis usuarios e usuarias e dúas monitoras de Íntegro (unha terapeuta ocupacional e unha logopeda), están dende o pasado domingo na localidade pontevedresa de Sanxenxo participando no programa Lecer Náutico organizado pola Confederación Galega de Persoas con Discapacidade (Cogami), en colaboración co Real Club Náutico de Sanxenxo e a Fundación Mapfre. Trátase dunha experiencia moi divertida, enriquecedora e positiva que pretende achegar esta modalidade deportiva ás persoas con diversidade funcional, fomentando así o contacto directo coa natureza e o entorno mariño.

Ao longo desta semana, recibirán un curso de manexo de embarcacións de vela lixeira, de 20 horas de duración, impartido por persoal especializado do club náutico. Ademais das clases teóricas, que xa comezaron a primeira hora da mañá, os e as participantes terán a oportunidade de saír a navegar pola ría de Pontevedra e experimentar sensacións tan novidosas e incribles como a liberdade ou a ausencia de barreiras. Se a isto lle sumamos a posibilidade de gozar dunhas vistas sorprendentes e dende unha perspectiva diferente, o éxito está garantido. Sen dúbida, todo un privilexio ao alcance de moi poucos/as.

Pero non todo vai ser náutica! Ao igual que sucedeu en edicións anteriores, tamén haberá tempo para o lecer e o aprendizaxe fóra da auga porque durante a súa estancia en Sanxenxo está previsto que realicen outras actividades de ocio como ir á praia, pasear pola vila ou visitar algúns museos e lugares de interese turístico. Así mesmo, terán a ocasión de poñer en práctica todo o aprendido nos nosos obradoiros de autonomía persoal, asumindo a realización de tarefas tan cotiás como a limpeza do fogar, a hixiene diaria, o carro da compra e a administración dos cartos.

Durante cinco días permanecerán nunha residencia adaptada que lles permitirá convivir con compañeiros/as doutras entidades sociais e fomentar as relacións interpersoais e a creación de novos vínculos de amizade. De feito, este ano coinciden na mesma quenda cos usuarios e usuarias de Alcer Coruña. Unha experiencia única e inesquecible para os seis afortunados/as desta edición.

 

Coidado co sol e non vos esquezades de pasalo moi ben!

 

post

Íntegro pon voz a 25 anos de historia

Directivos, fundadores, socios, familiares e usuarios/as protagonizaron un emotivo evento  repleto de discursos, interpretacións, imaxes, música e humor

Apenas pasaban uns minutos das 12 do mediodía cando o auditorio municipal de Cabana de Bergantiños comezou a brillar con luz propia grazas á palabra. E a primeira voz con nome foi a de Dora Mato, unha usuaria da asociación Íntegro, que arrincou os aplausos das máis de 200 persoas alí congregadas cun emotivo poema escrito por ela mesma para conmemorar 25 anos de loita e de superación en favor das persoas con diversidade funcional.

De seguido chegou a quenda do noso presidente Adolfo López Baña. A súa intervención non deixou indiferente a ninguén e arrincou as primeiras bágoas dun público entregado e moi emocionado ao lembrar os precarios pero ilusionantes comezos da asociación que “nestes 25 anos foise caracterizando pola constancia, o compromiso, o esforzo, os ideais, a valentía e a actitude de moitos homes e mulleres que apostaron por un proxecto, sentaron as bases e levantaron os pilares necesarios para unha sociedade inclusiva”, destacou ao tempo que recalcou que “ o decisivo para min é que logo destes 25 anos Íntegro existe e medrou, o que quere dicir que era necesaria e foi aceptada”.

No acto estiveron presentes moitos dos alcaldes e edís dos concellos da Costa da Morte

Tras unha detallada viaxe pola historia da entidade dende as súas orixes en novembro de 1991 nas I Xornadas dos Minusválidos” na Casa dos Veciños do Couto (Ponteceso), organizadas pola Asociación Monte Blanco, López Baña salientou a transformación social e cultural levada a cabo nas últimas décadas xa que “o minusvalismo imperaba en cada mirada, xesto, palabra, nas compras e no papel”. Así, subliñou o importante papel que xogaron a formación e a promoción laboral a través de programas como EcoEmprego (Cogami), Íntegro Xardinería e Medio Ambiente ou a creación da empresa de economía social +Porvir Xestión Social, creada en 2013. Finalmente,  Adolfo López tamén tivo palabras de agradecemento para as institucións públicas polo seu permanente apoio e colaboración e, moi especialmente, para os concellos da Costa da Morte “que cada vez están máis volcados na concesión de servizos coas entidades de iniciativa social da comarca”.  Pero antes de rematar, aproveitou a presenza do conselleiro de Política Social para lembrarlle que “a accesibilidade e a autonomía persoal son de suma importancia en toda Galicia pero no rural axudarán a que non se desvaneza día a día porque, neste asunto, facemos falta todos” recalcou.

Intervencións

Silvestre Couto moderou unha charla con “históricos” de Íntegro para falar sobre os seus inicios

Silvestre Couto (Tesoureiro), Rafael Varela (A Mundiña) e Mario Blanco (A Pesqueira), foron algunhas das voces históricas da entidade que describiron sobre o escenario os duros pero divertidos comezos: as primeiras reunións, as viaxes, as ilusións e os proxectos dos inicios como o desfile de moda Ponte Moda 1993. Anécdotas que deron paso aos eloxios e loanzas do presidente de COGAMI e COCEMFE, Anxo Queiruga, que exaltou a labor desempeñada por Íntegro “sendo capaces de facer realidade un soño sen perder nunca o rumbo”. Na mesma liña, o alcalde de Cabana, José Muíño, transmitiu a súa admiración, respecto e gratitude polo traballo e o legado que deixa a asociación Íntegro. Isto facíao sentando sobre unha cadeira no escenario “para estar a vosa altura” mentres se desculpaba “por non ter feito máis pola inclusión das persoas con diversidade”.

Anabel pronunciou un dos discursos máis emotivos da xornada

Anabel Castiñeira, secretaria da asociación, e Ramón Porteiro, membro da directiva e pai dun usuario, deron voz ás súas vivencias, cargadas de sentimentos e sensibilidade. Primeiro foi Anabel relatando a súa vida como muller con disCapacidade, formación, traballo, autonomía e independencia. E despois, Ramón foi o encargado de dar a coñecer o papel das familias a través da súa propia, e o traballo tan importante que desenvolve o Centro de Recursos, plasmado coa proxección dun vídeo sobre o seu funcionamento. De seguido, patrocinadores/as e responsables das empresas colaboradoras recibiron xunto aos alcaldes dos diferentes concellos da Costa da Morte unha placa conmemorativa como agasallo polo seu apoio e implicación no desenvolvemento de programas inclusivos. Así, o resto de oradores/as tamén foron obsequiados ao remate das súas intervencións ao igual que a responsable da Área de Benestar da Deputación da Coruña, Ánxela Franco, que lembrou a figura de Domingos Dosil- ex-alcalde de Muros con tetraplexia- como defensor da igualdade e dos dereitos das persoas con diversidade.

O conselleiro Rey Varela foi agasallado cunha placa conmemorativa

Pola súa banda, o conselleiro de Política Social, José Manuel Rey Varela, foi o encargado de pechar a quenda de intervencións cun discurso no que falou de futuro e avogou por “seguir sumando esforzos para erradicar as barreiras e as dificultades que na actualidade aínda teñen estas persoas, máis aínda en contornos rurais onde o acceso a determinados servizos é máis dificultoso que nas cidades” e “darlle un impulso social a Galicia, con máis sensibilidade, novas políticas e máis recursos”, concluíu. Xunto a el tamén estaban Ovidio Rodeiro, delegado territorial da Xunta na Coruña, e o deputado popular Aurelio Núñez ademais dos rexedores de Malpica, Coristanco, Ponteceso e Laxe acompañados dos edís de A Laracha e Vimianzo, entre outros.

Os usuarios e usuarias protagonizaron divertidas actuacións

Usuarios e usuarias  

Todas as voces que se oíron onte no salón de actos do auditorio de Cabana brillaron con luz propia. Unhas emocionaron, outras comprometéronse e algunhas ata desvelaron as súas intencións de futuro. Pero foron as dos nosos usuarios e usuarias as que encheron de humor, maxia, enxeño e alegría un escenario que vibraba cada vez que saían a presentar a algún convidado/a, a conversar sobre as melloras do Centro de Día e do Centro Ocupacional ou a relatarnos as súas experiencias persoais, algunhas tan románticas como a do noivado de Toni e Jessi.  Ao final, a música invadiu o salón e todos/as despediron o evento cantando e bailando porque como reza un dos nosos lemas #omellorestáporvir.

O restaurante A Mundiña serviu o aperitivo que se degustou na Escola de Vela de Cabana

Ao rematar os actos de conmemoración, os asistentes desprazáronse no tren turístico, cedido polo Concello de Cabana, ata as instalacións da Escola de Vela para desgustar un exquisito aperitivo elaborado polo restaurante A Mundiña e gozar das incribles vistas do estuario do Anllóns. Un agasallo para os sentidos dos/as comensais e un broche de ouro para 25 anos de vida. A por outros 25 máis!

Grazas a todos e a todas por participar!

post

Íntegro participará en Cee na 2ª Xornada sobre Inclusión Social e Educativa

Con esta iniciativa preténdese dar a coñecer as accións formativas e educativas que se levan a cabo nas diferentes entidades sociais 

A asociación Íntegro participará o vindeiro venres, 3 de febreiro, na 2ª Xornada de Inclusión Social e Educativa que organiza o Concello de Cee, a través da concellería de Presidencia, Benestar Social, Igualdade e Emprego, para dar a coñecer as diferentes accións formativas e educativas que se desenvolven na actualidade na nosa comunidade en favor das persoas con diversidade funcional.

A iniciativa, que terá lugar no salón de actos da Casa da Cultura en horario de 10 a 14h, consistirá na realización de varias charlas informativas protagonizadas por profesionais e usuarios/as das diversas entidades sociais convidadas ao acto. Ao remate, procederase á inauguración dunha exposición temática cos algúns dos produtos e traballos elaborados polos participantes. A mostra permanecerá aberta ese día, de 16:30 a 19:30h, e do 6 ao 10 de febreiro no mesmo horario.

img_5082A media mañá chegará a quenda da nosa entidade coa proxección dun vídeo explicativo sobre o funcionamento do Centro de Día e do Centro Ocupacional. A continuación, a psicóloga do centro, Begoña Rial, intervirá para falar sobre “a sensibilización como ferramenta permanente da educación” tomando como referencia o noso programa de concienciación social Capacíta-T e, concretamente, a importante labor de sensibilización levada a cabo en numerosos centros educativos de primaria e secundaria da Costa da Morte grazas á campaña de prevención de lesións medulares, que este ano verase tamén ampliada a outros colectivos sociais para evitar prácticas de risco en ámbitos tan cotiáns como o fogar, o campo, etc…IMG-20160704-WA0020

Ademais, a técnica de Íntegro abordará a necesidade de desenvolver novas liñas ocupacionais que contribúan a mellorar a formación e a empregabilidade das persoas con diversidade como acontece no noso centro de Nantón coa posta en marcha de diferentes obradoiros temáticos entre os que destacan o de Artes Manuais, no que se elaboran artigos artesanais para a súa comercialización; Exteriores, coa creación e mantemento de invernadoiros e zonas verdes de onde se obteñen produtos para consumo dos propios usuarios/a
s ou a colección de xabóns de glicerina Bicos de Amora, lanzada ao mercado o pasado mes de maio.

Como unha imaxe vale máis que mil palabras, Íntegro tamén estará presente na exposición, que se inaugurará a última hora da mañá, cunha selección dos principais produtos e artigos elaborados artesanalmente polos alumnos/as dos diferentes obradoiros ocupacionais.

Se estás interesado/a en asistir, inscríbete e reserva a túa praza. Aquí che deixamos toda a información sobre a xornada! Vémonos en Cee!

Xornadas_febreiro_2017_cartel

 

 

 

post

Íntegro lanza un proxecto de crowdfunding para a creación dun xardín terapéutico adaptado

O proxecto está aberto á participación da cidadanía a través da páxina web da Fundación Develop

Para a Asociación Íntegro, o 2016 está a ser un ano repleto de proxectos e iniciativas en favor das persoas con diversidade funcional das comarcas de Bergantiños, Terra de Soneira e Fisterra. E agora, coa colaboración da cidadanía, queremos ir un paso máis alá. En Íntegro vimos de poñer en marcha un novidoso e ilusionante proxecto de crowdfunding para facer realidade un fermoso e moi ansiado soño: construír un xardín terapéutico adaptado para uso e gozo dos nosos usuarios/as, así como das persoas con diversidade funcional da Costa da Morte.

IMG_5670Con esta iniciativa, que conta co apoio da Fundación Develop e COGAMI, preténdese crear un novo espazo axardinado ao aire libre, deseñado especificamente para desenvolver e potenciar as capacidades e habilidades das persoas con disCapacidade, obtendo importantes beneficios físicos, psicolóxicos e sociais na súa vida diaria. A través das cores, dos aromas e das texturas poderemos estimular a memoria e a mente, mellorar a percepción do tempo, aumentar a autoestima e fomentar a actividade física. O xardín terapéutico tamén brindará a oportunidade de manter un contacto permanente coa natureza propiciando as relacións interpersoais e novas formas de expresión social.

Esta zona verde adaptada contará con sendeiros accesibles para persoas con mobilidade reducida, xardineiras a diferentes alturas e espazos habilitados para a realización de todo tipo de actividades. O mobiliario (bancos, macetas…) será construído en madeira polos usuarios e usuarias do obradoiro de carpintería do noso Centro de Recursos de Nantón ao igual que a plantación de herbas aromáticas, arbustos, céspede e outro tipo de árbores froiteiras.IMG-20160704-WA0020

Financiamento

Ao tratarse dun proxecto de crowdfunding, a súa viabilidade depende exclusivamente da colaboración solidaria e desinteresada da cidadanía. Trátase dun método de financiación colectiva xestionado integramente dende unha páxina web que colabora facendo posible a realización de proxectos sociais singulares e moi innovadores. As persoas que desexen contribuír a facer realidade este soño poderán participar, ata o vindeiro mes de setembro, con doazóns económicas (de 10 a 500 €, en función da capacidade de cadaquén) a través da páxina www.grupodevelop.com, apartado crowdfunding, proxecto Xardín terapéutico adaptado Asociación Íntegro. Para máis información tamén podes chamar ao 981 734. Esta vez a nosa terapia está nas túas mans. Non o dubides! Axúdanos a conseguilo! Contigo é posible!

post

Asinado o contrato entre a UTE Máis Porvir – Combina Social e o Concello de Malpica para a prestación de servizos de conserxería

O alcalde de Malpica, Eduardo Parga Veiga, e os administradores das empresas integradas na UTE Máis Porvir-Combina Social (Íntegro e Cogami), Adolfo López Baña e Álvaro García Bustelo, respectivamente, asinaron hoxe o contrato para a prestación de servizos de conserxería no CEIP Milladoiro e no pavillón polideportivo de Malpica, o que permitirá a integración laboral de dúas persoas con diversidade funcional.

O contrato, como destacou Álvaro García, supón “unha oportunidade dado o carácter social de Íntegro e Cogami, porque ademais de que unhas persoas con discapacidade poidan prestar un servizo que está ao seu alcance, permítenos xerar recursos para seguir desenvolvendo o noso labor social”. O administrador de Combina Social e membro da xunta directiva de Cogami encargado, precisamente, das actividades de xeración de recursos para servizos de interese social, destacou a ampla experiencia de Combina Social na prestación deste tipo de servizos en institución públicas como os concellos de Santiago e Ourense e tamén en empresas privadas. Combina Social achega, polo tanto, solvencia e experiencia á UTE formada con Máis Porvir.

Eduardo Parga, pola súa banda, reiterou o compromiso do goberno municipal de Malpica coa integración das persoas con diversidade funcional, e asegurou que as Administracións públicas son as primeiras que deben dar exemplo. O contrato terá unha vixencia dun ano, prorrogable por outro, e permitirá a inserción laboral de dúas persoas con discapacidade física.

post

Lecer Náutico en Sanxenxo para catro usuarios/as de Íntegro

Catro usuarios/as de Íntegro, acompañados dunha monitora do centro, viaxarán este domingo ata a localidade pontevedresa de Sanxenxo para participar no programa Lecer Náutico organizado pola Confederación Galega de Persoas con Discapacidade (Cogami), en colaboración co Real Club Náutico de Sanxenxo e a Fundación Mapfre. Trátase dunha experiencia moi enriquecedora e positiva que pretende achegar esta modalidade deportiva ás persoas con diversidade funcional, fomentando así o contacto directo coa natureza e o entorno mariño.

vela1Durante 5 días recibirán un curso de manexo de embarcacións de vela lixeira, de 20 horas de duración, impartido por persoal especializado do club náutico. Ademais das clases teóricas, os participantes terán a oportunidade de saír a navegar pola ría de Pontevedra e experimentar sensacións tan novidosas e incribles como a liberdade ou a ausencia de barreiras. Se a isto lle sumamos a posibilidade de desfrutar dunhas vistas sorprendentes e dende unha perspectiva diferente, o éxito está garantido.

DSC_2533

Bruno, Samuel e Martín foron os participantes da pasada edición

Pero non todo vai ser náutica! Ao igual que sucedeu en anos anteriores, tamén haberá tempo para o lecer e o aprendizaxe fóra da auga porque durante a súa estancia en Sanxenxo realizarán actividades de ocio como ir á praia, pasear pola vila ou visitar museos e lugares de interese turístico. Así mesmo, terán a ocasión de poñer en práctica todo o aprendido nos nosos obradoiros de autonomía persoal, asumindo a realización de tarefas tan cotiás como a limpeza do fogar, a hixiene diaria, o carro da compra e a administración do diñeiro.

DSC_2643

IMG-20150526-WA0007

IMG-20150526-WA0009

 

 

 

 

O seu paso pola residencia adaptada Aixiña permitiralles convivir con compañeiros/as doutras entidades sociais fomentando así as relacións interpersoais e propiciando novos lazos de amizade. De feito, na mesma quenda coincidirán con usuarios/as de Amarai e Avante procedentes de Arzúa e Val do Dubra, respectivamente. Unha experiencia única e inesquecible para os catro afortunados/as desta edición.

Coidado co sol e pasádeo moi ben!