post

Íntegro amplía o seu servizo de transporte cun novo vehículo adaptado de nove prazas

Para a adquisición da furgoneta, valorada en máis de 42.000 €, a entidade contou coa financiación do AGADER, o Fondo Europeo Agrícola de Desenvolvemento Rural e a Xunta de Galicia, a través dos fondos do 0,7% do IRPF 2018

A asociación Íntegro das persoas con Diversidade Funcional da Costa da Morte vén de adquirir un novo vehículo adaptado que permitirá mellorar o servizo de transporte dos nosos usuarios e usuarias e incrementar o actual parque móbil, posibilitando así o desdobramento dalgunhas rutas e a incorporación de novas prazas.

O novo vehículo, valorado en máis de 42.000 €, ten capacidade para nove persoas e está dotado cunha plataforma e un chanzo eléctricos para facilitar o acceso ao mesmo ás persoas que se desprazan en cadeira de rodas.

Dita adquisición foi posible grazas á implicación de diversos organismos que contribuíron á súa financiación cunha aportación pública que ascende a un total de 36.665,55 €, importe sufragado en parte polo AGADER (GDR Costa da Morte), o Fondo Europeo Agrícola de Desenvolvemento Rural (Feader), no marco da medida 19 (Leader) do PDR de Galicia 2014-2020 e dentro da prioridade ou área focal 6B, dirixida a promover o desenvolvemento local nas zonas rurais, e coa financiación da Xunta de Galicia, xestionada por COGAMI, a través de fondos do 0,7% do IRPF 2018.

O presidente de Íntegro, Adolfo López Baña, amosou a súa satisfacción por dispoñer dunha flota ampla e renovada, adaptada ás necesidades das persoas con diversidade funcional e salientou “a necesidade de dotar ás entidades sociais dos medios e recursos necesarios para contribuír a eliminar os atrancos que existen á hora de facilitar ás persoas usuarias a súa chegada aos centros”.

post

17 concellos da Costa da Morte participaron nun almorzo informativo organizado por Cegasal sobre contratación pública de centros especiais de emprego

O encontro, que forma parte da Rede Eusumo, celebrouse en Carballo coa colaboración de Máis Porvir

Esta semana, a Asociación Galega de Centros Especiais de Emprego (Cegasal) organizou, coa colaboración da nosa empresa de xestión social Máis Porvir, un almorzo informativo en Carballo co obxectivo de promover o desenvolvemento dunha cultura empresarial inclusiva na Costa da Morte. A xornada, que resultou todo un éxito de participación, contou coa presenza de máis de cincuenta representantes políticos e preto dunha vintena de técnicos dos concellos da contorna que se achegaron para coñecer polo miúdo a contratación pública reservada a este tipo de centros.    

Ademais da xerente do centro especial de emprego de Íntegro, Sandra Caamaño, tamén asistiu ao evento o presidente da nosa entidade e administrador único de Máis Porvir, Adolfo López Baña, xunto a outros membros da asociación como o tesoureiro, Silvestre Couto; a directora do Centro de Recursos, Noelia Barreira; a traballadora social, Sandra Reimúndez, persoal do centro e usuarios/as.

A xornada xirou arredor da Lei de Integración Social do Minusválido, a Lei de Contratos do Sector Público e a contratación de persoas con discapacidade, cuestións que abordaron Elena Barba Pan, secretaria da Xunta Consultiva de Contratación da Xunta de Galicia; Concepción Campos Acuña, secretaria do Concello de Vigo; Adolfo López Baña e Sandra Caamaño, administrador e xerente de Máis Porvir; Ramón Sestayo, vicepresidente de Cogami, e José Antonio Vázquez, presidente de Cegasal.

A Asociación Galega de Centros Especiais de Emprego integra xa a 30 centros de emprego e conta ademais con varias empresas colaboradoras como Construcciones Ramón Vázquez y Reino, que tamén estivo presente neste primeiro encontro, incluído na Rede Eusumo.

 

 

post

Íntegro celebra o Día da Inclusión cunha andaina accesible en Camariñas

A xornada dará comezo cun percorrido desde o Club Náutico ata a Casa do Concello e a lectura pública dun manifesto, á que seguirán diversas actividades e un xantar popular na praia de Ariño

A asociación Íntegro celebrará este venres 20 o Día da Inclusión cunha andaina accesible, aberta á participación de toda a cidadanía, que partirá ás 12:00 horas do Club Náutico de Camariñas en dirección á Praza do Concello. Será un percorrido de 750 metros ata chegar á Casa Consistorial, onde se procederá á lectura dun manifesto reivindicativo en prol da inclusión das persoas con diversidade funcional da Costa da Morte. No acto está previsto que participen, ademais de usuarios, traballadores e membros da directiva da nosa entidade, varios representantes da administración local, que tamén colabora activamente na organización desta xornada de sensibilización.

A continuación, realizaranse diversas actividades para concienciar á poboación en materia de diversidade e inclusión a través do xogo e a aprendizaxe. De seguido, e se o tempo o permite, celebrase un xantar popular na praia de Ariño. En caso de choiva, a comida terá lugar no pavillón municipal. Quedades todos convidados/as!

post

Íntegro apela á conciencia cidadá para evitar lesións medulares por mergullos durante a temporada estival

Membros da entidade están a percorrer diferentes praias, peiraos e piscinas da Costa da Morte para comprobar os focos de risco e incidir na  prevención de accidentes

Como xa vén sendo habitual por esta datas, na asociación Íntegro iniciamos unha ronda de visitas polos municipios costeiros da nosa contorna para proceder á comprobación ocular dos focos de alto risco de lesións medulares por mergullos na Costa da Morte e incidir na súa prevención. Cada ano prodúcense en Galicia arredor de 100 accidentes medulares, dos que o 5% teñen a súa orixe nas prácticas de risco que se realizan en piscinas, ríos e praias. E lonxe de evitalas, cada vez son máis os adultos e adolescentes que expoñen as súas vidas en zonas altamente perigosas como as entradas a diques, peiraos e rías con pouco caudal de auga.

Como evitalo? O sentido común é a mellor defensa! En caso de mergullos, é imprescindible inspeccionar o fondo para comprobar tanto o seu interior como a súa profundidade. Aínda que na zona non haxa rocas saíntes do leito mariño, nin chanzos de pedra ou maleza ocultos pola area ou as plantas, NUNCA debemos tirarnos de cabeza. Neste senso, desde a entidade de Nantón faise un chamamento público a todas as administracións e organismos competentes para que procedan á correspondente sinalización de prohibición deste tipo de prácticas, ademais de apelar á concienciación cidadá para a súa erradicación. O verán é para gozalo e este tipo de lesións son evitables no 100% dos casos.

Estas son algunhas recomendacións para desfrutar dunhas vacacións tranquilas e sen correr riscos innecesarios.

. Comprobar sempre a profundidade da auga antes de tirarse de cabeza. (A OMS recomenda que haxa como mínimo 1.5 metros de profundidade).

. Evitar inmersións bruscas.

. Ter moito coidado cos ríos e rías porque o caudal da auga varía continuamente.

. Extremar a precaución en bordos e zonas húmidas de piscinas.

. Evitar bañarse en caso de consumir alcohol.

. Respectar os sinais de advertencia de perigo e normas de conduta en praias e piscinas. No caso de que non as haxa, como usuarios/as destas zonas debemos esixilas aos organismos competentes.

Como actuar en caso de accidente?

  • Avisar aos servizos de emerxencias ou acudir ao socorrista máis próximo da praia ou piscina.
  • Intentar non mobilizar ao accidentado/a. En caso de perigo de afogamento, desprazalo/a sempre entre varias persoas.

Lembra que o verán é para desfrutar. Non xogues coa túa vida. Usa a cabeza!

post

O CEIP de Buño transfórmase nunha Diverescola para os/as estudantes de infantil e primaria

Preto de 30 nenos e nenas participaron nunha xornada de sensibilización incluída no programa Capacíta-T

Os alumnos/as de infantil e primaria do CEIP Joaquín Rodríguez Otero de Buño (Malpica) convertéronse onte nos protagonistas dunha nova edición da Diverescola, unha iniciativa promovida por Íntegro, no marco do programa Capacíta-T, para achegar aos máis cativos/as a diversidade e a inclusión a través do xogo e o entretemento.

Durante algo máis de dúas horas, as aulas do centro educativo mudaron o seu aspecto para converter os tradicionais pupitres en improvisados circuítos de obstáculos e os libros en leccións orais de vida e superación. Así, a primeira hora da mañá a nosa monitora de ocio e tempo de lecer, Lucía Blanco, iniciaba unha xornada de sensibilización repleta de xogos na que participaron preto de trinta nenos e nenas que agardaban ansiosos/as e con expectación a visita da asociación Íntegro.

Aínda que moitos/as aseguraron coñecer a persoas con diversidade funcional na súa contorna, moi poucos sabían do seu día a día. E para descubrilo, nada mellor que meterse na súa propia pel poñendo a proba as súas habilidades e destreza a través da realización dunha serie de probas coa mobilidade reducida e os ollos tapados.  Os primeiros en apuntarse ao circuíto de obstáculos foron os/as 17 estudantes de educación infantil, que superaron con nota a actividade, dando exemplo da súa capacidade de empatía. De seguido, 11 nenos e nenas de diferentes ciclos de primaria tamén tiveron a oportunidade de comprobar cales son algunhas das barreiras que han de sortear as persoas que posúen algún tipo de discapacidade. Unha vez máis, os/as máis pequenos da casa volvéronnos a sorprender facendo gala da súa naturalidade e espontaneidade.  

Desde Íntegro queremos agradecer a participación de todos os centros educativos da Costa da Morte neste proxecto co que se pretende promover unha aprendizaxe en valores e unha aposta  pola educación inclusiva dende a infancia.

post

A Diverescola aterra no CEIP Eduardo Pondal de Ponteceso con xogos e obradoiros de habilidade

Máis de 40 alumnos/as de 3º e 4º de primaria experimentaron a diversidade na súa propia pel   

Esta mañá as aulas de 3º e 4º de primaria do CEIP Eduardo Pondal de Ponteceso abriron as súas portas a unha nova edición da Diverescola, a versión máis infantil de Capacíta-T, un programa de sensibilización e concienciación social en materia de diversidade e inclusión.

Unha vez máis, os máis madrugadores foron os máis pequenos/as. Preto de 20 alumnos e alumnas de terceiro curso recibiron ansiosos/as e con gran expectación a visita dos representantes de Íntegro. Nesta ocasión, unha educadora social e unha monitora de ocio e tempo libre foron as encargadas de achegar aos estudantes conceptos como a diversidade funcional, a inclusión e a igualdade, sobre os que xa tiñan ideas preconcibidas. E aínda que o resultado foi moi positivo e a gran maioría aseguraron coñecer de preto a persoas con discapacidade, moi poucos/as eran conscientes das dificultades e os obstáculos do seu día a día. O mesmo aconteceu cos 26 alumnos/as de 4º de primaria cos que se reuniron a continuación para abordar, a través do xogo e o entretemento, valores como a empatía e o respecto.

A xornada, que transcorreu entre actividades lúdicas e obradoiros de habilidade, deixou momentos divertidos e moi simpáticos nos que os/as nenos/as volveron a sorprender facendo gala da súa naturalidade e espontaneidade. Tras unha pequena rolda de presentacións, os/as cativos/as pasaron á acción para poñer a proba a súa destreza e meterse de cheo na pel das persoas que padecen algunha discapacidade. Pese a que os retos eran complicados, todos foron superados con éxito grazas á súa constancia, esforzo e tesón, unha mostra máis da capacidade de asimilación e adaptación dos máis pequenos/as.

Actividades sen mans!

Ademais do tradicional circuíto de obstáculos, que nesta ocasión percorreron coa visión reducida, tamén realizaron un taller de pintura sen mans, empregando só os pés ou a boca. Pero o exercicio máis difícil e anecdótico chegou cando tocou facer o bocadillo, unha acción cotiá e sinxela se non fose porque só podían usar unha man, algo que a máis de un/ha lle fixo suar a camiseta e, sobre todo, os dedos. Finalmente, proba superada e con recompensa!

 

Desde Íntegro queremos agradecer aos alumnos/as, mestres/as e equipos de dirección de todos os centros educativos a súa participación e implicación neste proxecto, que ademais de ser unha experiencia moi positiva e enriquecedora, supón unha aprendizaxe en valores e unha aposta pola educación inclusiva dende a infancia. Confiamos en que a Diverescola siga medrando entre a comunidade educativa ata chegar a todos os colexios da Costa da Morte como un complemento á formación dos máis pequenos/as.

 

 

 

 

 

 

 

Os colexios que estean interesados en acollerse a este programa non teñen máis que poñerse en contacto coa asociación Íntegro chamando ao 981 734 985 e concretar a data que máis lles conveña.

 

 

post

O CPI de Zas acolle a última xornada da campaña de prevención de lesións medulares

As charlas informativas nos centros educativos de primaria e secundaria regresarán ás aulas tras as vacacións de verán

Os alumnos e alumnas de 3º da ESO do CPI de Zas foron os encargados/as de pechar esta semana o ciclo de charlas informativas da campaña de prevención de lesións medulares que a asociación Íntegro levou a cabo durante o presente curso escolar en numerosos centros de primaria e secundaria da Costa da Morte.

O pasado martes o presidente da entidade, Adolfo López Baña, acudiu xunto ao vogal David Pombo e a nosa traballadora social, Sandra Reimúndez, ata o centro educativo para  explicarlles aos escolares en que consiste unha lesión medular e como se pode evitar. Neste senso, Teresa e Elena, dúas socias e voluntarias de Íntegro, tamén relataron as súas experiencias persoais e insistiron na necesidade de previr prácticas de risco que poidan derivar en doenzas irreparables, especialmente durante a temporada de verán como consecuencia de imprudencias ao volante ou “zambullidas” en praias e piscinas.

E que mellor maneira de concienciar e sensibilizar aos máis novos sobre as causas e consecuencias de sufrir un accidente deste tipo que converténdoos en protagonistas e sentalos sobre unha cadeira de rodas por uns intres. E a experiencia resultou do máis satisfactoria e enriquecedora xa que ademais de desenvolverse moi ben coa mobilidade reducida e sorteando máis dun obstáculo, amosaron posuír unha grande capacidade de empatía sabendo situarse no lugar das persoas que a diario deben enfrontarse a todo tipo de barreiras, tanto físicas como mentais.

Deste xeito, púxose o punto e final a unha campaña que despide temporada pero que moi pronto volverá ás aulas. Será co regreso dos/as estudantes, tras as vacacións do verán, grazas en parte á crecente acollida que este ano tivo esta iniciativa entre a comunidade educativa, incrementando notablemente a demanda deste tipo de formación. Cada vez son máis os centros que solicitan estas accións informativas e máis os rapaces e rapazas que se interesan por aprender e coñecer en materia de prevención e sensibilización social. Outro exemplo son as cada vez máis frecuentes visitas de escolares de diferentes colexios de primaria dentro do programa Visítanos!, unha actividade encamiñada á educación e capacitación dos máis pequenos en materia de diversidade, ou as xornadas de sensibilización que levamos a cabo en aulas de infantil para achegar a inclusión á infancia.

Dende Íntegro queremos desexarlle a todos os alumnos e alumnas un bo verán e que non esquezan poñer en práctica todo o aprendido durante as sesións de prevención de lesións medulares porque unha imprudencia pode custarnos a vida. Grazas por apostar por unha educación máis diversa e inclusiva porque non todo está nos libros.  Vémonos á volta!

post

Íntegro pon voz a 25 anos de historia

Directivos, fundadores, socios, familiares e usuarios/as protagonizaron un emotivo evento  repleto de discursos, interpretacións, imaxes, música e humor

Apenas pasaban uns minutos das 12 do mediodía cando o auditorio municipal de Cabana de Bergantiños comezou a brillar con luz propia grazas á palabra. E a primeira voz con nome foi a de Dora Mato, unha usuaria da asociación Íntegro, que arrincou os aplausos das máis de 200 persoas alí congregadas cun emotivo poema escrito por ela mesma para conmemorar 25 anos de loita e de superación en favor das persoas con diversidade funcional.

De seguido chegou a quenda do noso presidente Adolfo López Baña. A súa intervención non deixou indiferente a ninguén e arrincou as primeiras bágoas dun público entregado e moi emocionado ao lembrar os precarios pero ilusionantes comezos da asociación que “nestes 25 anos foise caracterizando pola constancia, o compromiso, o esforzo, os ideais, a valentía e a actitude de moitos homes e mulleres que apostaron por un proxecto, sentaron as bases e levantaron os pilares necesarios para unha sociedade inclusiva”, destacou ao tempo que recalcou que “ o decisivo para min é que logo destes 25 anos Íntegro existe e medrou, o que quere dicir que era necesaria e foi aceptada”.

No acto estiveron presentes moitos dos alcaldes e edís dos concellos da Costa da Morte

Tras unha detallada viaxe pola historia da entidade dende as súas orixes en novembro de 1991 nas I Xornadas dos Minusválidos” na Casa dos Veciños do Couto (Ponteceso), organizadas pola Asociación Monte Blanco, López Baña salientou a transformación social e cultural levada a cabo nas últimas décadas xa que “o minusvalismo imperaba en cada mirada, xesto, palabra, nas compras e no papel”. Así, subliñou o importante papel que xogaron a formación e a promoción laboral a través de programas como EcoEmprego (Cogami), Íntegro Xardinería e Medio Ambiente ou a creación da empresa de economía social +Porvir Xestión Social, creada en 2013. Finalmente,  Adolfo López tamén tivo palabras de agradecemento para as institucións públicas polo seu permanente apoio e colaboración e, moi especialmente, para os concellos da Costa da Morte “que cada vez están máis volcados na concesión de servizos coas entidades de iniciativa social da comarca”.  Pero antes de rematar, aproveitou a presenza do conselleiro de Política Social para lembrarlle que “a accesibilidade e a autonomía persoal son de suma importancia en toda Galicia pero no rural axudarán a que non se desvaneza día a día porque, neste asunto, facemos falta todos” recalcou.

Intervencións

Silvestre Couto moderou unha charla con “históricos” de Íntegro para falar sobre os seus inicios

Silvestre Couto (Tesoureiro), Rafael Varela (A Mundiña) e Mario Blanco (A Pesqueira), foron algunhas das voces históricas da entidade que describiron sobre o escenario os duros pero divertidos comezos: as primeiras reunións, as viaxes, as ilusións e os proxectos dos inicios como o desfile de moda Ponte Moda 1993. Anécdotas que deron paso aos eloxios e loanzas do presidente de COGAMI e COCEMFE, Anxo Queiruga, que exaltou a labor desempeñada por Íntegro “sendo capaces de facer realidade un soño sen perder nunca o rumbo”. Na mesma liña, o alcalde de Cabana, José Muíño, transmitiu a súa admiración, respecto e gratitude polo traballo e o legado que deixa a asociación Íntegro. Isto facíao sentando sobre unha cadeira no escenario “para estar a vosa altura” mentres se desculpaba “por non ter feito máis pola inclusión das persoas con diversidade”.

Anabel pronunciou un dos discursos máis emotivos da xornada

Anabel Castiñeira, secretaria da asociación, e Ramón Porteiro, membro da directiva e pai dun usuario, deron voz ás súas vivencias, cargadas de sentimentos e sensibilidade. Primeiro foi Anabel relatando a súa vida como muller con disCapacidade, formación, traballo, autonomía e independencia. E despois, Ramón foi o encargado de dar a coñecer o papel das familias a través da súa propia, e o traballo tan importante que desenvolve o Centro de Recursos, plasmado coa proxección dun vídeo sobre o seu funcionamento. De seguido, patrocinadores/as e responsables das empresas colaboradoras recibiron xunto aos alcaldes dos diferentes concellos da Costa da Morte unha placa conmemorativa como agasallo polo seu apoio e implicación no desenvolvemento de programas inclusivos. Así, o resto de oradores/as tamén foron obsequiados ao remate das súas intervencións ao igual que a responsable da Área de Benestar da Deputación da Coruña, Ánxela Franco, que lembrou a figura de Domingos Dosil- ex-alcalde de Muros con tetraplexia- como defensor da igualdade e dos dereitos das persoas con diversidade.

O conselleiro Rey Varela foi agasallado cunha placa conmemorativa

Pola súa banda, o conselleiro de Política Social, José Manuel Rey Varela, foi o encargado de pechar a quenda de intervencións cun discurso no que falou de futuro e avogou por “seguir sumando esforzos para erradicar as barreiras e as dificultades que na actualidade aínda teñen estas persoas, máis aínda en contornos rurais onde o acceso a determinados servizos é máis dificultoso que nas cidades” e “darlle un impulso social a Galicia, con máis sensibilidade, novas políticas e máis recursos”, concluíu. Xunto a el tamén estaban Ovidio Rodeiro, delegado territorial da Xunta na Coruña, e o deputado popular Aurelio Núñez ademais dos rexedores de Malpica, Coristanco, Ponteceso e Laxe acompañados dos edís de A Laracha e Vimianzo, entre outros.

Os usuarios e usuarias protagonizaron divertidas actuacións

Usuarios e usuarias  

Todas as voces que se oíron onte no salón de actos do auditorio de Cabana brillaron con luz propia. Unhas emocionaron, outras comprometéronse e algunhas ata desvelaron as súas intencións de futuro. Pero foron as dos nosos usuarios e usuarias as que encheron de humor, maxia, enxeño e alegría un escenario que vibraba cada vez que saían a presentar a algún convidado/a, a conversar sobre as melloras do Centro de Día e do Centro Ocupacional ou a relatarnos as súas experiencias persoais, algunhas tan románticas como a do noivado de Toni e Jessi.  Ao final, a música invadiu o salón e todos/as despediron o evento cantando e bailando porque como reza un dos nosos lemas #omellorestáporvir.

O restaurante A Mundiña serviu o aperitivo que se degustou na Escola de Vela de Cabana

Ao rematar os actos de conmemoración, os asistentes desprazáronse no tren turístico, cedido polo Concello de Cabana, ata as instalacións da Escola de Vela para desgustar un exquisito aperitivo elaborado polo restaurante A Mundiña e gozar das incribles vistas do estuario do Anllóns. Un agasallo para os sentidos dos/as comensais e un broche de ouro para 25 anos de vida. A por outros 25 máis!

Grazas a todos e a todas por participar!

post

Íntegro modifica o seu ámbito de actuación e o seu nome

A medida, contemplada nos estatutos, foi aprobada por unanimidade na asemblea extraordinaria de socios/as celebrada o pasado sábado en Nantón

O Centro de Recursos de Nantón converteuse o sábado pasado no punto de encontro de socios/as, usuarios/as, familiares e amigos/as da entidade, que se achegaron ata as nosas instalacións para gozar dunha xornada de convivencia, boa gastronomía e moita diversión na que a música e o ambiente festivo predominaron durante todo o día, logo dunha intensa mañá de traballo na que se celebraron dúas asembleas xerais de socios/as, unha de carácter ordinario e outra extraordinaria.

copi1Ambas xuntanzas transcorreron sen novidades seguindo a orde do día establecida para cada unha delas. Así, na primeira, celebrada a partir das 11h, deuse conta das actividades levadas a cabo o ano pasado e procedeuse á aprobación do estado contable de 2016 e dos orzamentos e actividades previstas para o presente exercicio. Unha vez finalizada esta reunión deu comezo a sesión extraordinaria e con ela, as novidades e o debate.

Un dos primeiros cambios propostos pola Xunta Directiva afectou directamente aos seus estatutos coa finalidade de modificar o ámbito de actuación da asociación e, por conseguinte, a súa denominación. Tras un amplo debate entre os socios/as, a decisión foi unánime e procedeuse a súa aprobación pasando a chamarse “Asociación INTEGRO das persoas con Diversidade Funcional da Costa da Morte” . Deste xeito, ademais de englobar as comarcas de Bergantiños, Terra de Soneira e Fisterra, o novo nome aporta unha fácil e rápida localización do territorio e fai alusión a unha marca de calidade, con identidade propia e sobradamente coñecida.

Outra das novidades da convocatoria extraordinaria tivo como protagonistas a varios membros da Xunta Directiva que mudaron os seus cargos. Así, púxose en copi2coñecemento dos asociados/as o cese voluntario da vogal María José Cousillas Baneira e pronunciouse o nomeamento como vogais de Mónica Suárez Blanco e de Ramón Porteiro Álvarez, ata o de agora vicesecretaria e vicetesoureiro, respectivamente.

Ambiente festivo

IMG_2597As asembleas deron paso a un ambiente moito máis festivo e relaxado que comezou coa celebración dunha sesión vermú a cargo dun dúo musical moi especial, composto pola nosa logopeda, Beatriz Loureiro, e o seu compañeiro, Ricardo Blanco. A ritmo de cumbia, pasodobre e chachachá, os convidados foron tomando asento para degustar un cocido á altura dos padais máis esixentes e ao que non lle faltou detalle.IMG_2588

Ao longo da tarde houbo actividades para todas as idades, sorpresas, máis baile, agasallos e, sobre todo, momentos para rir, conversar e compartir coa familia e os amigos/as. Grazas a todos e a todas por asistir e parabéns ao noso equipo polo traballo realizado._MG_5169

IMG_2581

post

Íntegro celebra o Día Internacional da Diversidade Funcional cunha xornada de portas abertas e a presentación dun calendario benéfico para o 2017

O vindeiro sábado, 3 de decembro, conmemórase o Día Internacional da Diversidade Funcional e na Asociación Íntegro queremos sumarnos a esta celebración cunha serie de actividades para reivindicar a igualdade de oportunidades e dereitos das persoas con diversidade e darlles maior presencia e protagonismo na sociedade porque como sinala o noso presidente, Adolfo López Baña, “a inclusión é unha cuestión de capacidades, non de discapacidades”.

SAMSUNG CAMERA PICTURESOs actos darán comezo o vindeiro venres coa celebración dunha xornada de portas abertas, que terá lugar na sede de Íntegro, dirixida ao persoal técnico dos departamentos de servizos sociais dos diferentes concellos da Costa da Morte así como aos orientadores/as laborais pertencentes á nosa área de influencia. Tamén están convidados a participar os integrantes do equipo de inclusión social para as comarcas de Bergantiños, Soneira e Fisterra, cuxa sede está situada no situada no Punto de Información Xuvenil Casa da Xuventude de Carballo.

O programa de actividades iniciarase ás 12h cunha breve exposición sobre o funcionamento do noso Centro de Día e do Centro Ocupacional para explicar aos asistentes os diferentes programas e servizos que levamos a cabo ao longo do ano. A continuación, celebrase unha charla-coloquio para intercambiar impresións e abrir novas vías de colaboración entre as diferentes administracións e a nosa entidade co fin de poñer en marcha futuros programas de cooperación que potencien a participación social das persoas con diversidade funcional, tanto no eido formativo como na súa inserción no mercado laboral.

img_5082

De seguido, realizarase un percorrido polas instalacións do noso centro de Nantón (Cabana) para amosar os diferentes traballos que realizamos diariamente tanto nos obradoiros ocupacionais como no centro de día (xardinería, artes manuais, Bicos de Amora, etc…). A xornada rematará cunha degustación de petiscos elaborados, integramente, polos nosos usuarios e usuarias.

Calendario 2017

foto-remixO sábado cambiamos de escenario e trasladámonos ao edificio do Forum Carballo para acoller a presentación do calendario benéfico de Íntegro para o 2017. No acto, que dará comezo ás 12h, estarán presentes algúns dos 14 personaxes famosos e os 11 fotógrafos/as, na súa maioría da Costa da Morte,  que se uniron aos nosos usuarios/as para facer realidade a creación deste fermoso proxecto co que pretendemos recadar fondos para financiar o servizo de ximnasia terapéutica do centro, imprescindible para que as persoas con diversidade funcional gocen dunha vida saudable e de calidade.

Actores, presentadores, xornalistas, cociñeiros/as, cantantes, escritoras, científicos, deportistas son tan só algunhas das caras coñecidas que participan de forma solidaria e desinteresada no novo almanaque, que xa está á venta por 5€ nos seguintes locais e establecementos colaboradores:

tarxeta

Marcos Monterroso (Lugo), Donclic (Carballo), Modas Suárez (Carballo), Cafetería Valle Inclán (Carballo), Fisioterapia Eva Senande (Canduas- Cabana), Floristería Amamber (Cabana), Cavident (Ponte do Porto), Restaurante O Ariño (Camariñas), Centro de Estética Mónica Coscoñas (Vimianzo), Parafarmacia Horizonte (Baio), Fisioterapia Vértebra (Baio), Lencería Marta (Baio), Papelería A Pesqueira (Ponteceso), Panadería Forno Novo (Malpica), GastroBar A Ventana (Laxe) e Restaurante A Mundiña (A Coruña).

Dende Íntegro queremos dar as grazas a todos/as os participantes pola súa colaboración, amabilidade e xenerosidade, prestando a súa imaxe e/ou traballo en favor dunha causa que, nesta ocasión, reza baixo o lema #porunanoconmenosbarreiras, especialmente,  para as persoas con diversidade funcional. Así mesmo, convidamos a todas as persoas que o desexen a asistir a este evento para coñecer de preto aos seus protagonistas e descubrir como foi a elaboración do novo calendario benéfico de Íntegro.