post

O alcalde de Laxe visita Íntegro para coñecer de primeira man a actividade do centro

José Luís Pérez, que acudiu acompañado pola concelleira de Servizos Sociais Sandra Mouzo, foi recibido polos responsables de Íntegro e Máis Porvir

A semana arrincou en Íntegro coa visita institucional do alcalde de Laxe, José Luís Pérez, que se achegou ata o Centro de Recursos de Nantón para coñecer de primeira man as instalacións e comprobar “in situ” as necesidades actuais da nosa entidade. O rexedor, que acudiu acompañado pola concelleira de Servizos Sociais Sandra Mouzo, foi recibido polo presidente de Íntegro, Adolfo López Baña, e a directora Noelia Barreira. Durante o percorrido que realizaron tamén estiveron presentes o tesoureiro, Silvestre Couto, e a xerente da empresa de xestión social Máis Porvir, Sandra Caamaño.

Unha das paradas obrigadas da visita tivo lugar no exterior do Centro de Recursos para contemplar a remodelación da fachada da edificio, executada hai uns meses con cargo ao programa FOIE da Deputación da Coruña, que lle confire un aspecto máis moderno e actual ademais de mellorar substancialmente a calidade de vida dos usuarios/as grazas ao illamento térmico e acústico da fachada de cara á obtención dun maior aforro enerxético e unha ventilación natural máis eficaz.

Tras realizar un minucioso percorrido polas aulas do Centro de Día e do Centro Ocupacional, a comitiva tamén se achegou ata Centro Especial de Emprego para interesarse polo traballo que desenvolven a diario os nosos usuarios e usuarias nos diferentes obradoiros que temos en marcha. Sen dúbida, un dos que máis chamou a súa atención foi o taller de elaboración de xabóns de glicerina Bicos de Amora. Ao longo da mañá, tamén mantiveron un encontro de traballo cos responsables de Íntegro para coñecer en profundidade as actividades e os novos programas de acción social da entidade de cara aos vindeiros anos. Así mesmo, tamén se celebrou unha entrevista coa xerente da empresa de xestión social Máis Porvir, Sandra Caamaño, coa que conversaron sobre os servizos que presta actualmente na contorna.

Durante a xuntanza, o presidente de Íntegro aproveitou a ocasión para trasladar ás autoridades locais ás novas necesidades do centro ao tempo que agradeceu a colaboración do Concello de Laxe no desenvolvemento de accións conxuntas que contribúen a mellorar a calidade de vida das persoas con diversidade funcional da Costa da Morte. Neste senso, o alcalde de Laxe comprometeuse a seguir traballando con Íntegro e Máis Porvir para favorecer a inclusión laboral e social dos colectivos máis desfavorecidos e, especialmente, das persoas que residen na zona rural.

 

 

 

 

 

 

 

 

 

 

post

Un carné con moitos beneficios

  • Esta temporada os socios e socias de Íntegro disporán de importantes vantaxes económicas en preto de trinta empresas, comercios e establecementos de seis concellos da Costa da Morte
  • A entidade premia así a  fidelidadedos asociados ao tempo que promociona o comercio de proximidade

O outono chega a Íntegro e faino cargado de novidades e vantaxes. E unha das primeiras e máis interesantes vai dirixida aos seus socios e socias. Trátase da nova campaña de fidelidade para asociados/as que vén de poñer en marcha a entidade no ano no que celebra o seu 25 aniversario. Grazas á colaboración de numerosas empresas, comercios e establecementos da Costa da Morte, pertencer á familia Íntegro vai ter un valor engadido. A partir de agora, todas as persoas que posúan o carné de socio/a poderán beneficiarse de interesantes descontos e promocións á hora de realizar as súas compras e/ou xestións así como ao contratar determinados servizos. Para o seu presidente Adolfo López Baña, esta iniciativa “pretende ser un pequeno xesto de agradecemento co que recoñecer e premiar a lealdade de todas as persoas que, coa súa colaboración desinteresada, fan posible que sigamos traballando e medrando en recursos e actividades, ademais de axudar a promover o comercio de proximidade”.

Esta temporada mercar un ordenador, ir ao salón de peiteado ou recibir unha masaxe será entre un 5% e un 50% máis barato para todos os socios/as de Íntegro que presenten o seu correspondente carné nalgunha das preto de trinta empresas e comercios adheridos a esta campaña e pertencentes aos concellos de Vimianzo, Laxe, Ponteceso, Cabana, Zas e Carballo. Xunto aos descontos,  ofertas e promocións dunha ampla selección de produtos tamén se realizarán sorteos e agasallos de numerosos artigos e servizos de uso cotiá (alimentación, téxtil, beleza, ocio…). Deste xeito, ademais de gratificar aos aboados e aboadas tamén se pretende promover a economía local e o comercio de proximidade.

Aínda que a campaña xa botou a andar, as persoas que estean interesadas en participar aínda están a tempo de facelo, ben como socios/as da entidade ou como establecemento adherido á rede de empresas colaboradoras. Abonda con chamar ao 981 734 985, de luns a venres en horario de 09 a 17h.

A partir de agora saca o carné de Íntegro cando merques nalgún dos seguintes establecementos e benefíciate das súas vantaxes.

Baio (Zas): Calzados Paco Home, Calzados Paco Muller, Óptica Arjomil, Parafarmacia Horizonte, Fisioterapia Vértebra, Alicia Novas Podoloxía, Centro Dental Baldomar, Muebles Galicia, Lencería marta, Psicoloxía Tania Rojo

Cabana: Fisioterapia Eva Senande, Amamber

DonClic, Modas Suárez, Peluquería DobleV, Deportes San Remo

Laxe: Colaxe

Ponteceso: A Tenda dos Libros, A Pesqueira Zapatería, Xoiería Rey Mira, O Mundo ao Revés, Pettit Moda, Parafarmacia Horizonte

Vimianzo: Arranxos Beatriz, A Tenda de Ma, Centro de Estética Jenn, Mónica Coscoñas, Modas Vigo, Clínica de Podoloxía Mª Cristina Varela Novo

 

post

clubEmprego, o novo espazo de encontro para a inserción laboral da muller

Trátase dunha acción formativa englobada no PIMD Rural que botará a andar o 1 de abril en Íntegro e nos concellos de Malpica, Laxe, Cabana e Ponteceso

As interesadas poderán inscribirse a partir de mañá no Centro de Recursos de Nantón, coincidindo co Día da Muller

Mañá conmemórase o Día da Muller e en Íntegro queremos celebralo dándolle, unha vez máis, todo o protagonismo a elas. Por iso, o día 8 poñemos en marcha unha nova acción formativa dentro do Punto de Intervención para Mulleres con Diversidade Funcional no ámbito Rural (PIMD Rural) que consistirá na creación dun clubEmprego, o novo espazo de encontro para a inserción laboral da muller.

CARTEL PIMD XERALEsta novidosa experiencia está dirixida a mulleres, preferentemente con disCapacidade e residentes nalgúns dos 4 concellos adheridos ao plan (Cabana, Malpica, Laxe e Ponteceso), activas e con ganas de incorporarse ao mercado de traballo. Tamén poderán anotarse aquelas que, sen cumprir estes requisitos, estean interesadas en participar.

_MG_3993

O clubEmprego posibilitará a busca de emprego en grupo e a prestación de asesoramento individual e grupal para dotar de ferramentas útiles e necesarias a un dos colectivos en maior situación de vulnerabilidade social. Para elo, en cada sesión haberá grupos reducidos de traballo aos que se lles facilitará apoio formativo individualizado relacionado con Tic´s, trámites administrativos ou empoderamento, así como accións grupais dirixidas á realización de  procuras dixitais, entrega de currículos, rastrexos a pé de rúa, creación de bolsas de emprego ou intermediación laboral con empresas, entre outras. Ademais, faranse prospeccións de mercado periódicas para coñecer, a curto e medio prazo, as necesidades de mercado da zona e adecuar a formación das alumnas ás mesmas.

Así mesmo, en caso que a demanda o requirise, tamén se poría en marcha un clubEmprendemento para mulleres emprendedoras, interesadas no autoemprego, coa finalidade de poñer ao seu alcance as medidas, coñecementos e axudas necesarias para crear o seu propio negocio ou empresa.     _mg_0981

Para garantir o éxito e a viabilidade das novas accións traballaremos cóbado con cóbado cos departamentos de orientación laboral e desenvolvemento local ademais de continuar colaborando cos servizos sociais dos municipios implicados.

Inscricións

Os encontros levaranse a cabo na sede que a asociación Íntegro ten en Nantón e nos concellos que forman parte do programa PIMD Rural, co-financiado pola Secretaría Xeral de Igualdade da Xunta e o Fondo Social Europeo (FSE).
Pimd malpicaO prazo de inscrición para formar parte do noso clubEmprego abrirase mañá no Centro de Recursos de Nantón coincidindo co Día da Muller. Se estás interesada en participar ou desexas recibir información, non dubides en chamar ao 981 734 985 e contarémosche todo o que precises saber. Os primeiros encontros ceebraranse o 1 de abril en Íntegro e nos concellos de Malpica, Laxe, Ponteceso e Cabana. Anímate e participa!

post

Íntegro reforma o seu PIMD Rural coa incorporación da traballadora social da asociación e a apertura de novas canles de inserción laboral

  • A secretaria xeral de Igualdade da Xunta, que visitou hoxe as instalacións de Nantón, destacou a importancia de traballar na mellora das capacidades das mulleres usuarias
  • Representantes dos concellos de Cabana, Ponteceso, Laxe e Malpica asinaron un novo convenio de colaboración para o desenvolvemento do programa

Coa experiencia acumulada no período 2015-2016, Íntegro inicia o 2017 co firme propósito de reforzar o seu Punto de Intervención para Mulleres con Diversidade Funcional no Ámbito Rural (PIMD Rural). A incorporación da traballadora social da asociación ao equipo de profesionais que xestionan o proxecto é un primeiro paso, pero este ano pretendemos centrarnos moi especialmente no ámbito laboral, e nese sentido está previsto iniciar contactos cos axentes de emprego e intermediadores laborais dos catro concellos implicados.

_MG_3976

Acto de presentación do PIMD Rural 2016-2017

Cabana, Malpica, Ponteceso e Laxe, de feito, renovaron hoxe o seu compromiso con Íntegro e co PIMD Rural, nun acto ao que tamén asistiu a secretaria xeral de Igualdade da Xunta de Galicia, Susana López Abella, e que se celebrou hoxe pola mañá no Centro de Recursos de Nantón. A secretaria xeral louvou o traballo que está a facer Íntegro pola inclusión da muller rural, destacou a importancia de traballar “na mellora das capacidades” para facilitar a súa inserción laboral e pediu unha atención especial para as mulleres vítimas de violencia de xénero.

IMG_6012

Susana López visitou os obradoiros ocupacionais en compañía dos responsables municipais

O PIMD Rural está cofinanciado pola Xunta de Galicia e o Fondo Social Europeo. No primeiro ciclo permitiu atender a 108 mulleres dos catro concellos, prioritariamente con disCapacidade, que se beneficiaron dos diferentes servizos que presta o equipo de profesionais responsable do programa. Neste primeiro bienio incidiuse na formación como unha ferramenta imprescindible para a mellora laboral das mulleres, e, de feito, o ano pasado xa se acadaron seis insercións laborais, e esta mesma semana empezarán a traballar outras tres usuarias en prácticas. Íntegro está en contacto con varias empresas da zona, e agora quere implicar aos servizos municipais relacionados co emprego para poder seguir avanzando.

Os catro concellos bergantiñáns amosáronse satisfeitos cos resultados acadados.

_MG_3998

Usuarios/as de Íntegro elaboraron xabóns de glicerina personalizados para a ocasión

                                                                              

 

post

A Secretaria Xeral de Igualdade visita Íntegro para asistir á presentación do PIMD Rural 2016-2017

Susana López acudirá o vindeiro luns á firma dos novos convenios de colaboración coas entidades locais  

A Secretaria Xeral de Igualdade da Xunta de Galicia, Susana López Abella, visitará o vindeiro luns o Centro de Recursos de Íntegro para asistir, xunto aos alcaldes e representantes dos concellos de Cabana,  Ponteceso, Malpica e Laxe, á presentación do novo Punto de Intervención para Mulleres con Diversidade Funcional no ámbito Rural (PIMD Rural) 2016-2017, co-financiado polo ente autonómico e o Fondo Social Europeo (FSE). Ao remate, realizarase un percorrido polas instalacións para coñecer de primeira man os diferentes obradoiros ocupacionais.

IMG_20160308_121417

Sinatura do primeiro convenio de colaboración cos 4 concellos participantes

O acto dará comezo ás 12h coa exposición do balance relativo ao período 2015-2016, no que se analizarán polo miúdo os resultados obtidos durante o primeiro ciclo do PIMD Rural, no que 108 mulleres- prioritariamente con disCapacidade- se beneficiaron das accións formativas levadas a cabo nos catro municipios adheridos ao plan coa finalidade de erradicar a discriminación e a desigualdade de oportunidades mediante o desenvolvemento de actividades que facilitan o empoderamento das mulleres e reforzan o seu papel no ámbito rural. Ademais, daranse a coñecer outros datos de interese relacionados coa formación, o emprego e o número de intervencións realizadas.

A continuación, procederase á firma dos novos convenios de colaboración do PIMD Rural 2016-2017 coas entidades locais. Na grafico-todossinatura estarán presentes alcaldes e representantes dos municipios de Malpica, Laxe, Ponteceso e Cabana, que renovan así o seu compromiso cun dos colectivos sociais máis desfavorecidos.

Coa posta en marcha desta segunda etapa, que terá unha duración dun ano, reforzaranse os puntos de intervención municipais posibilitando traballar, man a man, cos servicios sociais de base, axentes de emprego e orientadores laborais co obxectivo de dar continuidade á labor de inclusión laboral e social das mulleres do rural, especialmente das que están en situación de vulnerabilidade e centrándonos nas máis desfavorecidas, como son as que teñen algún tipo de diversidade funcional.

IMG-20160308-WA0016

A xornada rematará cunha visita de todos os asistentes polas instalacións de Nantón que estará protagonizada polos nosos usuarios e usuarias xa que serán os encargados/as de dar a coñecer o traballo que desempeñan día a día tanto nos obradoiros do Centro de Día como do Centro Ocupacional.

post

A asociación Íntegro aposta pola renovación dos convenios de colaboración cos concellos bergantiñáns adheridos ao PIMD Rural

108 mulleres do rural, na súa maioría con diversidade funcional, beneficiáronse deste programa dende xaneiro de 2015  

Nas vindeiras semanas a asociación Íntegro retomará a actividade do Punto de Intervención para Mulleres con Diversidade Funcional no ámbito rural (PIMD Rural). Para elo, procederase a contactar cos concellos xa adheridos a este programa dirixido a mulleres, maioritariamente con disCapacidade, que está cofinanciado pola Secretaría Xeral de Igualdade da Xunta de Galicia e o Fondo Social Europeo (FSE), e deseñado e executado pola entidade ata o pasado día 30 de setembro. O primeiro paso para a posta en marcha da segunda edición pasará pola renovación dos convenios de colaboración cos municipios de Malpica, Laxe, Cabana e Ponteceso, que xa forman parte do mesmo dende comezos de ano.

Grazas á implicación e ao compromiso institucional, o PIMD Rural experimentou un notable crecemento na comarca de Bergantiños chegando a consolidarse como o principal grafico-3servizo de atención e intervención para un dos colectivos máis vulnerables da sociedade. Dende que botou a andar en xaneiro de 2015, 108 mulleres beneficiáronse das diferentes accións formativas levadas a cabo para erradicar a discriminación e a desigualdade de oportunidades mediante o desenvolvemento de actividades que facilitan o seu empoderamento e reforzan o seu papel no ámbito rural ata acadar unha situación de normalidade. Neste sentido, os resultados non poden ser mellores! O 69% das usuarias lograron mellorar a súa situación persoal e/ou laboral mentres que un 18% acadou a súa plena integración en materia de educación e formación e o 7% conseguiu a obtención dalgunha cualificación. Ademais, o 6% das participantes acadou o seu primeiro emprego mellorando así a súa calidade de vida.

 Balance

grafico-1Por outra parte, os servizos de orientación, formación e a busca de emprego foron os máis solicitados polas beneficiarias do PIMD Rural acadando un nivel de participación do 81%. Así, o 36% das mulleres fixo uso do programa de orientación e información individual en materia de diversidade, e un 23% decantouse pola adquisición de competencias e habilidades profesionais. Outra das accións con gran aceptación entre as usuarias foron as encamiñadas á orientación laboral e acompañamento na procura de emprego, demandadas no 22% dos casos. A asistencia psicolóxica (11%) e a mediación familiar (8%) pechan a listaxe de prestacións ofrecidas dende os diferentes puntos de intervención, situados nas concellerías de servizos sociais e no Centro de Recursos de Nantón.

grafico-2

A adhesión de catro concellos bergantiñáns ao PIMD Rural, a primeiros de ano,  posibilitou o achegamento de novos recursos a mulleres con diversidade funcional da zona rural. De feito, Ponteceso e Malpica son os municipios nos que se rexistran un maior nivel de participación, cun 33% e un 27%, respectivamente, seguido de Cabana (16%) e Laxe (14%) fronte ao 5% de Vimianzo ou Zas.

Dada a boa acollida que esta iniciativa está a ter na Costa da Morte e ante a crecente demanda de usuarias procedentes doutras localidades, en Íntegro seguimos traballando para ampliar o ámbito de actuación do PIMD a outros municipios e incrementar así a nosa colaboración cos servizos de proximidade á cidadanía.

Permanecede atentas porque moi pronto estaremos de volta!

grafico-todos

 

 

post

Clausurado en Laxe o sétimo curso do PIMD Rural organizado pola Asociación Íntegro

Trátase dun programa formativo financiado pola Secretaría Xeral de Igualdade e o Fondo Social Europeo (FSE)

Hai uns días clausuramos o curso de Artes Manuais levado a cabo no Concello de Laxe dentro do programa do Punto de Intervención para Mulleres con Diversidade (PIMD Rural), financiado pola Secretaría Xeral de Igualdade da Xunta de Galicia e o Fondo Social Europeo (FSE).

CLAUSURA TAPAS E APERITIVOS 1

Dúas alumnas do curso de Cociña de Malpica xa conseguiron traballo

Na entrega de diplomas estiveron presentes cinco das oito mulleres que participaron nesta acción formativa, acompañadas de varios representantes da Asociación Íntegro e dos  responsables do departamento municipal de Servizos Sociais. Esta actividade, realizada o pasado mes de xullo nos locais sociais de Traba e de Laxe, concluíu con gran éxito de participación superando as expectativas previstas. Ademais, ao igual que aconteceu noutros concellos incluídos neste programa formativo, as alumnas- mulleres, prioritariamente, con disCapacidade- amosaron gran interese e implicación durante a súa formación co obxectivo de sentar as bases para a súa posterior inserción laboral. Este foi o caso de dúas usuarias do curso de Tapas e Aperitivos de Malpica que atoparon traballo antes de rematar o obradoiro.

Balance

Dende a posta en marcha do PIMD Rural, implantado en catro concellos da Costa Bergantiñá- Cabana, Malpica, Ponteceso e Laxe-, xa se desenvolveron sete accións destinadas á formación de mulleres con diversidade funcional: 4 no Centro de Recursos de Nantón (Cabana), 2 en Malpica e 1 en Laxe. No mes de setembro terá lugar a oitava no municipio de Ponteceso, para a que xa están cubertas todas as prazas. As especialidades impartidas abarcan diferentes temáticas segundo as preferencias das alumnas: Artes Manuais, Informática e Mecanografía, Redes Sociais e Cociña.

Pero as noticias en torno ao PIMD non rematan aquí! Despois do verán agárdannos importantes novidades orientadas á inserción laboral e á mellora do emprego. Un paso máis que esperemos sexa firme e definitivo na procura da inclusión das persoas con diversidade e, especialmente, dun dos colectivos máis vulnerables: as mulleres.

Bo verán!

IMG-20160622-WA0083CLAUSURA TAPAS E APERITIVOS 2

IMG-20160623-WA0002

IMG-20160711-WA0001

 

 

 

 

 

 

 

post

Íntegro clausurou esta mañá o curso de informática do PIMD Rural

A entidade iniciará en agosto novas accións formativas para mellorar o emprego feminino

Esta mañá en Íntegro clausuramos o curso de Informática para mulleres con disCapacidade enmarcado no programa do Punto de Intervención para Mulleres con Diversidade (PIMD Rural), co-financiado pola Secretaría Xeral de Igualdade da Xunta de Galicia e o Fondo Social Europeo (FSE). Con este acto puxemos o punto e final ás tres primeiras accións formativas desenvolvidas dende o pasado mes de maio no noso Centro de Recursos de Nantón. A finais do mes pasado tamén concluíron os talleres de Cociña: tapas e aperitivos e Artes Manuais: xabóns, pintura e bixutería.

IMG-20160623-WA0002

Clausura do curso de Artes Manuais

Durante dous meses, as alumnas do obradoiro que concluímos hoxe tiveron a oportunidade de adquirir coñecementos básicos de informática e mecanografía ademais de realizar unha primeira toma de contacto coas redes sociais e internet, dúas ferramentas moi útiles na actualidade e polas que amosaron moito interese.

IMG-20160622-WA0078

Curso de Cociña impartido en Íntegro durante os meses de maio e xuño

 

Por outra banda, as que aínda continuarán a súa formación ata finais deste mes son as participantes dos obradoiros de Malpica, Laxe e Ponteceso.

+iniciativas

Pero as actividades do PIMD Rural non fixeron máis que comezar! Este verán preséntase cheo de novidades e de aprendizaxe en Íntegro porque en agosto porase en marcha unha nova iniciativa do PIMD, dirixida tamén a mulleres con disCapacidade, centrada nas posibilidades persoais e profesionais para mellorar a súa empregabilidade.

MULLERPara elo, crearemos un grupo de traballo integrado por un máximo de seis alumnas para facilitar e garantir unha atención individual e personalizada. Entre os principais obxectivos deste obradoiro destacan o estudo da oferta e a demanda de emprego na nosa contorna, a elaboración dun currículo, o desenvolvemento de ideas e posibilidades de emprego, a busca directa e indirecta e o asesoramento en recursos, entre outras materias. No mes de setembro está previsto a súa ampliación aos concellos de Malpica, Cabana, Ponteceso e Laxe.

O prazo de inscrición para a primeira quenda aínda continúa aberto. As persoas interesadas poden poñerse en contacto con nós chamando ao 981 734 985 de luns a venres, en horario de 9 a 17h, ou no noso centro de Nantón (Cabana).

Se es muller e buscas emprego ou tes unha idea de negocio esta é a túa oportunidade. Non a deixes pasar!  

post

Clausurado o obradoiro de carpintería de Íntegro cun compromiso dos concellos de potenciar a formación

A Asociación Íntegro clausurou hoxe o obradoiro de carpintería que se desenvolveu ao longo dos últimos seis meses grazas ao financiamento da Xunta de Galicia e o Fondo Social Europeo e á colaboración do Concello de Cabana de Bergantiños. No acto participaron representantes dos concellos de Malpica, Laxe, Zas, Ponteceso e Cabana, cinco concellos que, a raíz desta iniciativa, poderían poñer en marcha un programa de formación conxunto.

SAMSUNG CAMERA PICTURES

Así o explicou o alcalde cabanés, José Muíño, quen destacou os bos resultados do obradoiro de emprego desenvolvido cos concellos de Ponteceso e Zas e avogou pola extensión da experiencia ao resto dos concellos da agrupación supramunicipal Costa Bergantiñá. “A idea –dixo Muíño- é que cada concello homologue unha aula para impartir cursos de formación de distintas especialidades”. No caso de Cabana esa aula sería, precisamente, a nave cedida a Íntegro en Anos para impartir o obradoiro. “Seguiríamos compartíndoa con Íntegro, de balde, de xeito que a asociación poida desenvolver un traballo que lle permita subsistir, ao mesmo tempo que os concellos poidamos beneficiarnos dese servizo ademais de poder utilizar tamén a nave”, engadiu o alcalde de Cabana.

De feito, a cesión do taller á Asociación Íntegro durante os últimos seis meses permitiu encher de vida unhas instalacións que non tiñan uso. Ao longo deste tempo, os alumnos e alumnas traballaron na restauración de pezas de madeira, a elaboración de mobles e a reparación de elementos do mobiliario público, principalmente. Miguel Álvarez, un dos monitores, realizou aos participantes no acto de hoxe unha detallada exposición dos distintos labores realizados, con especial fincapé no mantemento do mobiliario público. Papeleiras, xogos infantís, bancos… do municipio de Cabana volven a estar como novos despois de recibir o tratamento axeitado na nave de Anos. Precisamente, o alcalde de Cabana destacou a importancia do curso desenvolvido por Íntegro para este tipo de tarefas, que xa, segundo indicou, “moitas veces os concellos temos problemas para o mantemento do mobiliario en perfectas condicións”.

SAMSUNG CAMERA PICTURES

Pola súa banda, o presidente de Íntegro, Adolfo López Baña, incidiu na importancia do proxecto desenvolvido de cara á autonomía da asociación. “As entidades antes dependían case exclusivamente das subvencións, pero nós queremos demostrar que é preciso prestar un servizo á comunidade e cobrar por iso”, manifestou. Os 9 usuarios e usuarias que participaron no obradoiro de carpintería, que recibiron hoxe os seus diplomas, demostraron a súa capacidade para poder desenvolver este tipo de traballo, e, aínda máis, de “dar resposta á demanda e de facelo con calidade”, destacou López Baña.

post

Os concellos de Costa Bergantiñá implícanse na posta en marcha dos PIMD Rural

Os concellos de Cabana, Laxe, Malpica e Ponteceso, que compoñen a asociación supramunicipal Costa Bergantiñá, expresaron no Día Internacional da Muller o seu compromiso coa posta en marcha dos Puntos de Intervención para Mulleres con Diversidade (PIMD) Rural, un servizo que funciona dende o ano pasado no centro dIMG_20160308_121417e recursos de Nantón e que moi pronto estará dispoñible tamén nos concellos.

Os alcaldes de Cabana, Manuel Muíño; Laxe, José Manuel Mouzo, e Malpica, Eduardo Parga; así como as concelleiras Marisol Blanco, responsable de Servizos Sociais e Igualdade en Malpica; e Isabel Vuelta e Susana Toja, de Ponteceso, asistiron onte en Nantón á presentación do PIMD. O presidente de Íntegro, Adolfo López Baña, explicou que a extensión dos puntos de intervención limítase de momento aos concellos de Costa Bergantiñá por cuestións de persoal, aínda que a intención de Íntegro é continuar coa ampliación en función da dispoñibilidade dos técnicos e da implicación dos concellos.

A terapeuta ocupacional e directora do centro de recursos de Íntegro, Noelia Barreira, e a psicóloga, Begoña Rial, foron as encargadas de explicar as liñas xerais do PIMD Rural, un programa específico de asesoramento e intervención integral para mulleres con diversidade funcional, tanto no ámbito social coma no educativo, o cultural ou o laboral. De feito, aínda que a iniciativa botará a andar en colaboración cos departamentos municipais de Servizos Sociais, o obxectivo é implicar tamén a orientadores/as laborais e axentes de desenvolvemento local.