post

O Programa Operativo de Emprego Xuvenil posibilita a contratación dunha técnica en Educación Infantil

A subvención concedida polo Fondo Social Europeo e a Xunta de Galicia terá unha duración de sete meses

Nos últimos anos, tanto o Centro de Día como o Centro de Recursos de Íntegro están a experimentar un crecemento constante no volume de actividades e programas dirixidos a persoas con diversidade funcional da Costa da Morte para contribuír así a mellorar a súa calidade de vida e acadar a súa plena inclusión na sociedade. Pero a ampliación da oferta formativa leva parella, ademais dun notable incremento de contidos en materia de capacitación, emprego ou  sensibilización social, a ampliación do noso cadro de persoal co obxectivo de atender unha demanda cada vez maior, máis esixente e con novas necesidades. Así, desde a entidade de Nantón (Cabana) apostamos pola formación continuada dos nosos traballadores/as e a adhesión a  programas de cooperación que promovan a contratación de novos profesionais destinados a favorecer a diversidade social dos colectivos máis vulnerables e/ou en risco de exclusión.   

Neste sentido, desde o pasado día 1 o noso cadro de persoal viuse ampliado grazas á incorporación dunha nova traballadora. Trátase dunha técnica especialista en Educación Infantil contratada a través dun programa de cooperación posto en marcha pola Consellería de Economía, Emprego e Industria da Xunta de Galicia e as entidades sen ánimo de lucro, coa finalidade de mellorar a empregabilidade e a inserción profesional daqueles mozos e mozas inscritos/as no Sistema Nacional de Garantía Xuvenil, dentro do ámbito do Programa Operativo de Emprego Xuvenil. Dita subvención está co-financiada nun 91,89% polo Fondo Social Europeo (FSE) e a Iniciativa de Emprego Xuvenil.

Ao longo dos próximos sete meses, a nova experta en Educación Infantil encargarase, por unha banda, de levar a cabo a planificación, deseño e desenvolvemento dalgúns dos talleres do Centro de Día e do Centro Ocupacional e, pola outra, da formación das persoas con diversidade funcional que asisten de forma regular aos nosos obradoiros ocupacionais e das que participan esporadicamente nalgunha acción formativa concreta ao longo do ano. Ademais, participará activamente no noso programa de ocio e tempo de lecer para complementar e ampliar os servizos prestados polo equipo de monitores/as. Un axuda extra que será ben recibida tendo en conta que nos últimos meses incrementouse o número de usuarios/as chegando a situarse na actualidade en 40 persoas.

Funcións:

  • Organización e desenvolvemento de talleres de artes manuais (bixutería, elaboración de xabóns, pintura…).
  • Realización de obradoiros de formación e capacitación (escola de adultos, novas tecnoloxías, formación especifica para a ESA, competencias clave…).
  • Programa e avalía os procesos educativos.
  • Desenvolvemento de actividades destinadas á creación de novos hábitos para o fomento da autonomía.
  • Realización de metodoloxías de xogo para estimular a creatividade, a iniciativa e a disciplina.
  • Deseñar saídas de ocio e lecer adaptadas ás preferencias e necesidades dos usuarios/as do centro.

Con esta nova contratación, englobada no Programa Operativo de Emprego Xuvenil, esperamos poder mellorar e incrementar a atención ás persoas con diversidade funcional da Costa da Morte e ás súas familias para a consecución dunha vida independente e autónoma.

 

post

Íntegro clausurará o martes 19 o obradoiro de Acondicionamento de Mobiliario Urbano e Xardíns

A Casa do Oleiro de Buño acollerá o acto de entrega de diplomas aos 12 alumnos/as con diversidade funcional da Costa da Morte que participaron na acción formativa subvencionada pola Fundación Once e co-financiada polo Fondo Social Europeo

O obradoiro de Acondicionamento de Mobiliario Urbano e Xardíns,  organizado pola asociación Íntegro dentro da Convocatoria de Axudas Económicas da Fundación ONCE, chegou hoxe a súa fin. Dende o pasado 1 de marzo, 12 homes e mulleres con diversidade funcional da Costa da Morte participaron nesta acción formativa, impartida pola entidade e a empresa de xestión social MáisPorvir, encamiñada a promover a igualdade, o benestar e a inclusión social das persoas con discapacidade en situación ou risco de exclusión social, e mellorar a súa empregabilidade a través do incremento de contratacións. O acto de clausura terá lugar o martes 19, ás 12h, na Casa do Oleiro de Buño (Malpica) coa entrega de diplomas aos asistentes. 

Despois de tres meses e medio e 365 horas de aprendizaxe, aos participantes desta acción formativa, incluída no marco do Programa Operativo de Inclusión Social e Economía Social 2014-2020 co-financiada polo Fondo Social Europeo (FSE), só lles queda un último reto: atopar un traballo estable e con garantías para a consecución dunha vida plena e autónoma. E méritos non lles faltan!

Ademais das clases teóricas realizadas na Casa do Oleiro de Buño, o alumnado puido completar a súa formación con varias sesións prácticas levadas a cabo tanto no taller de carpintería de Anos (Cabana) como en numerosas zonas verdes e axardinadas do casco urbano e dos núcleos rurais do Concello de Malpica. Así, ás labores de limpeza e mantemento en parques, xardíns e paseos, súmanse os traballos de rehabilitación, reparación e construción de equipamento urbano como a instalación de novas papeleiras e o arranxo de balaustradas en mal estado. 

Desde a asociación Íntegro queremos agradecer o apoio e a colaboración desinteresada dos concellos de Malpica e Cabana a través da cesión de instalacións municipais e zonas verdes para a realización das clases teórico-prácticas. Unha mostra máis da súa aposta pola capacitación profesional e a mellora do emprego para as persoas con diversidade funcional e/ou en risco de exclusión social.

 

 

 

 

 

 

 

 

post

Aberta a inscrición para os campamentos de verán específicos para persoas con discapacidade

A entrega de solicitudes poderá realizarse ata o vindeiro 30 de maio

Xa está aberto o prazo de inscrición para participar nos campamentos de verán específicos para persoas con dicapacidade, promovido pola Dirección Xeral de Maiores e Persoas con Discapacidade da Xunta de Galicia.  Este ano ofértanse 170 prazas, divididas en quendas de 10 días entre o 1 de xullo e o 12 de setembro. Como novidades, haberá 20 prazas máis destinadas principalmente ao tramo de idade comprendida entre os 19 e os 40 anos  e unha nova instalación para o desenvolvemento dos campamentos: a Residencia de Tempo Libre do Carballiño, en Ourense. O período de recepción de solicitudes rematará o vindeiro 30 de maio.

Durante 10 días, os/as participantes poderán gozar dunha estadía socializadora e de convivencia, nun espazo lúdico, integrador e seguro mediante a posta en marcha de actividades orientadas, especialmente, ao fomento de habilidades sociais, ao contacto coa natureza e o mar, ao coñecemento da propia cultura e á educación para a saúde.

A solicitude de praza neste programa de campamentos específicos para persoas con discapacidade é compatible coa solicitude de prazas de inclusión no programa Campaña de verán 2018 da D.X. de Xuventude e Voluntariado.

Requisitos

As persoas interesadas en participar nos campamentos deberán ter recoñecida alguna discapacidade, cun grao igual ou superior ao 33%, e  unha idade comprendida entre os 11 e os 40 anos, ademais dos seguintes requisitos:

  • Estar empadroado nalgún concello de Galicia.
  • Non padecer enfermidade transmisible con risco de contaxio.
  • Non presentar trastornos que poidan alterar a convivencia durante o transcurso da actividade.
  • Ter unha capacidade mínima de comunicación e de participación nas actividades que se van desenvolver.
  • Ter unha mobilidade acorde ás características da instalación que se solicita.

Instalacións

Os equipamentos nos que terán lugar estas accións de verán específicas para persoas con discapacidade son os seguintes:

Albergue xuvenil de Gandarío, emprazado no municipio coruñés de Bergondo. Desenvolverase a temática de natureza e mar.

Residencias de Tempo Libre de Panxón, no concello pontevedrés de Nigrán.

Residencia de Tempo Libre de O Carballiño, situada na provincia de Ourense.

Nas dúas últimas instalacións, os campamentos tratarán sobre actividades de teatro e natureza.

Bonificacións

O prezo máximo de cada praza ascenderá a 125 euros. Dito importe verase reducido nun 50% se o/a solicitante é posuidor do título de familia numerosa e nun 25% para quen teña o Carné Xove. Así mesmo, terán preferencia as persoas que non participasen no programa en anos anteriores así como as que residan habitualmente no domicilio familiar.

As solicitudes deben presentarse na Consellería de Política Social antes do 30 de maio.

Máis información

Teléfono Social gratuíto: 900 333 666 Para información sobre a xestión dos campamentos, envío de documentación, valoración de solicitudes e concesión de prazas:

Para información sobre as instalacións nas que se desenvolve o programa pódese consultar a páxina web http://politicasocial.xunta.gal/web/portal/portada ou dirixirse directamente ás propias instalacións.

post

O alumnado do curso de Acondicionamento de Mobiliario Urbano e Xardíns pasa á acción

O mantemento de zonas verdes e a rehabilitación de material urbano centran a actividade formativa dos/as 12 alumnos/as do obradoiro subvencionado pola Fundación ONCE e co-financiado polo Fondo Social Europeo (FSE) e a asociación Íntegro.

O obradoiro de Acondicionamento de Mobiliario Urbano e Xardíns que a asociación Íntegro está a desenvolver na Casa do Oleiro de Buño (Malpica) marcha a bo ritmo. Os/as 12 alumnos/as con diversidade funcional da Costa da Morte que participan nesta acción formativa, subvencionada pola Fundación ONCE no marco do Programa Operativo de Inclusión Social e Economía Social 2014-2020 e co-financiado polo Fondo Social Europeo (FSE) e a nosa entidade, están a facelo tan ben que xa comezaron a verse os primeiros resultados. E son espectaculares!

Ademais das clases teóricas, impartidas de luns a venres -de 09:30 a 14:30 horas- pola empresa de xestión social +Porvir, o alumnado está realizando as prácticas correspondentes tanto no taller de carpintería de Anos (Cabana) como nas zonas verdes e axardinadas, cedidas polo Concello de Malpica. Neste sentido, esta semana, xunto ás labores de limpeza e mantemento en parques, xardíns e paseos, procederon á instalación de novas papeleiras e á reparación e rehabilitación dalgunhas balaustradas que se atopaban en mal estado.  

Con esta iniciativa, posta en marcha o pasado 1 de marzo, preténdese promover a igualdade, o benestar e a inclusión social das persoas con diversidade funcional, e incrementar o número de contratacións para mellorar a empregabilidade dun colectivo en situación de vulnerabilidade e/ou risco de exclusión. A clausura do curso está prevista para o próximo 15 de xuño.

post

O PIMD Rural volve a Malpica con novas accións formativas e un servizo de asesoramento continuo

O Alcalde e a concelleira de Servizos Sociais asinaron onte o convenio de colaboración con Íntegro tras visitar as instalacións de Nantón

O Punto de Intervención para Mulleres con Diversidade no ámbito Rural (PIMD Rural), promovido por Íntegro,  volve a estar de actualidade. Onte asinouse no Centro de Recursos de Nantón un convenio de colaboración co Concello de Malpica para a posta en funcionamento do novo servizo de asesoramento e intervención integral a persoas con diversidade funcional, especialmente mulleres, co-financiado pola Secretaría Xeral de Igualdade da Xunta de Galicia e o Fondo Social Europeo (FSE).

En presencia da directora do centro, Noelia Barreira, o alcalde de Malpica, Eduardo Parga, e a concelleira de Servizos Sociais, Marisol Blanco, formalizaron a súa adhesión, por terceiro ano consecutivo, ao PIMD Rural co obxectivo de promover a autonomía e a independencia das mulleres con disCapacidade que residen no rural de cara a súa plena integración na sociedade.

 

Para elo, levaranse a cabo unha serie de accións formativas dirixidas a mellorar a capacitación profesional e o emprego dun colectivo en situación de especial vunerabilidade. Ademais, as usuarias deste servizo disporán de asesoramento continuo, información sobre recursos individualizados e específicos, apoio e acompañamento na tramitación de xestións burocráticas así como atención individualizada sobre aspectos relacionados coa diversidade, ao igual que as familias con membros en situación de dependencia. As persoas interesadas deberán dirixirse ao punto de intervención que estará situado no departamento municipal de Servizos Sociais.

Visita ás instalacións

Antes da sinatura do convenio, os representantes municipais tiveron tempo de realizar un minucioso percorrido polas instalacións de Nantón para coñecer de primeira man algunas das melloras realizadas no centro e visitar os obradoiros ocupacionais nos que estaban a traballar os nosos usuarios e usuarias. Tanto o Alcalde como a Concelleira foron agasallados con xabóns de glicerina da colección Bicos de Amora.

Os representantes municipais levaron cadanseu xabón de glicerina da colección Bico de Amora

 

 

 

 

Desde Íntegro tamén queremos agradecer a participación do Concello de Malpica no obradoiro de Acondicionamento de Mobiliario Urbano e Xardíns, mediante a cesión dun aula na Casa do Oleiro de Buño para as clases teóricas e a dispoñibilidade de diferentes zonas verdes e axardinadas do municipio para a realización das prácticas. Unha nova acción, co-financiada pola Fundación ONCE e o Fondo Social Europeo (FSE),  que vén a refozar o seu compromiso coa integración social, educativa e laboral das persoas con diversidade funcional da contorna.

post

Estudantes do CEIP Canosa-Rus protagonizan unha nova edición da campaña de lesións medulares

Varios membros de Íntegro visitaron o centro coristanqués para conversar cos alumnos/as de 6º de primaria  

Esta semana os alumnos e alumnas do CEIP Canosa Rus de Coristanco foron os protagonistas dunha nova edición da campaña de lesións medulares que Íntegro está a impartir nos centros educativos da Costa da Morte coa finalidade de informar e concienciar aos escolares de primaria e secundaria sobre as principais causas e consecuencias de sufrir un accidente medular así coma da importancia da súa prevención.

Na xornada de sensibilización o presidente de Íntegro, Adolfo López Baña; a traballadora social, Sandra Reimúndez, e Teresa Alvarellos, socia e voluntaria da entidade, foron os encargados de achegar aos nenos e nenas de 6º de primaria o día a día de quen padece unha doenza medular facendo especial fincapé na necesidade de evitar a práctica de actividades de risco como os mergullos en praias e piscinas, principal causa deste tipo de lesións entre os máis pequenos.

Ao longo da sesión, os/as escolares tamén tiveron a oportunidade de coñecer de primeira man algúns testemuños reais como o de Teresa Alvarellos, colaboradora da campaña de prevención e lesionada medular por mor dun accidente de tráfico. Un exemplo de superación e forza que espertou o interese e a curiosidade do alumnado con preguntas relacionadas co seu día a día. A accesibilidade universal e as dificultades coas que se atopan a cotío as persoas con mobilidade reducida foron outros dos asuntos que espertaron o interese dos/as escolares.

 

Esta iniciativa, que se está levando a cabo con gran éxito dende hai anos en numerosos colexios e institutos da nosa contorna, está co-financiada pola Xunta de Galicia e a Deputación de A Coruña. Así mesmo, tamén conta coa colaboración de numerosos concellos da Costa da Morte e varias empresas de carácter privado.

 

A seguinte parada da campaña de prevención terá lugar mañá e o vindeiro venres no IES Agra de Leborís (Laracha). Ademais da habitual charla- coloquio cos alumnos/as, proxectarase o último vídeo editado pola entidad “A ti tamén che pode pasar”, no que profesionais médicos e testemuñas reais analizan as causas e consecuencias de sufrir un accidente medular.  

 

 

post

Íntegro ofrecerá este venres unha charla sobre lesións medulares no Centro de Día de Cabana

Con esta actividade, de balde e aberta á cidadanía, a entidade amplía o seu programa de sensibilización social a outros ámbitos e colectivos de risco

Esta semana a campaña de prevención de lesións medulares de Íntegro traspasará as aulas dos centros educativos da Costa da Morte para informar e concienciar a novos colectivos sociais sobre a importancia de evitar prácticas de risco que poidan derivar en doenzas irreparables. E é que as estatísticas falan por si soas! Mentres que o número de lesións por sinistros de tráfico e/ou mergullos en praias e piscinas está diminuíndo nos últimos anos entre a mocidade grazas, en boa parte, ás accións de sensibilización que se están levando a cabo en colexios e institutos, os accidentes domésticos e as caídas fortuítas no ámbito do traballo estanse a cobrar cada vez máis vítimas, especialmente entre a poboación adulta. Por iso, desde a entidade de Nantón decidimos ampliar o programa de re-educación social poñendo en marcha novas actividades dirixidas ao público en xeral. A primeira delas terá lugar o vindeiro venres a partir das 11h no Centro de Día de Cabana de Bergantiños, situado na parroquia de Neaño (Estrada do Bosque, 69).

A xornada comezará cunha charla informativa para dar a coñecer as principais causas e consecuencias de sufrir un accidente medular facendo especial fincapé na importancia da prevención. Ademais, proxectarase o novo vídeo da campaña deste ano que leva por título “A ti tamén che pode pasar” (dispoñible no noso canal de Youtube e en www.integro.es), no que un médico, unha enfermeira e un terapeuta ocupacional da Unidade de Lesionados do CHUAC analizan as situacións de perigo que orixinan estas doenzas e as medidas que debemos tomar para evitalas. Na proxección tamén interveñen testemuñas reais que relatan en primeira persoa as súas experiencias. Entre outros, varios membros de Íntegro, colaboradores habituais da campaña e protagonistas involuntarios aos que un día unha lesión medular lles cambiou a vida. Algúns deles/as acudirán á cita para expoñer as súas vivencias e amosar os seus exemplos de loita, fortaleza e superación. Tamén os/as acompañarán a educadora social Tania Bartucca e o presidente da entidade, Adolfo López Baña.

 

 

 

 

Desde os seus inicios, asociación Íntegro desenvolveu unha importante e extensa labor divulgativa en favor de prevención de lesións medulares. Durante máis dun cuarto de século puxéronse en marcha numerosos proxectos de sensibilización social co único propósito de informar, primeiro, e concienciar, despois, á cidadanía e especialmente aos máis novos, por ser o colectivo máis vulnerable. Neste sentido, durante a presentación da campaña deste ano, López Baña aseguraba que “se en todos estes anos evitamos un só caso, xa pagou a pena”.

Agora este ambicioso proxecto, co-financiado pola Xunta de Galicia e a Deputación da Coruña ademais da colaboración das administracións locais e algunhas empresas privadas, traspasará as aulas dos centros de primaria e secundaria da Costa da Morte para estenderse a outros ámbitos como o do fogar ou o do traballo, e a outros grupos en situación de risco como o dos/as profesionais do campo ou da construción e as persoas de idade avanzada.

Desde Íntegro queremos convidar á cidadanía a asistir á charla informativa do vindeiro venres e participar activamente na mesma aportando as súas propias experiencias e/ou propoñendo as dúbidas ou suxestións que considere oportunas e de interese. A entrada será de balde.    

post

A Diverescola aterra no CEIP Eduardo Pondal de Ponteceso con xogos e obradoiros de habilidade

Máis de 40 alumnos/as de 3º e 4º de primaria experimentaron a diversidade na súa propia pel   

Esta mañá as aulas de 3º e 4º de primaria do CEIP Eduardo Pondal de Ponteceso abriron as súas portas a unha nova edición da Diverescola, a versión máis infantil de Capacíta-T, un programa de sensibilización e concienciación social en materia de diversidade e inclusión.

Unha vez máis, os máis madrugadores foron os máis pequenos/as. Preto de 20 alumnos e alumnas de terceiro curso recibiron ansiosos/as e con gran expectación a visita dos representantes de Íntegro. Nesta ocasión, unha educadora social e unha monitora de ocio e tempo libre foron as encargadas de achegar aos estudantes conceptos como a diversidade funcional, a inclusión e a igualdade, sobre os que xa tiñan ideas preconcibidas. E aínda que o resultado foi moi positivo e a gran maioría aseguraron coñecer de preto a persoas con discapacidade, moi poucos/as eran conscientes das dificultades e os obstáculos do seu día a día. O mesmo aconteceu cos 26 alumnos/as de 4º de primaria cos que se reuniron a continuación para abordar, a través do xogo e o entretemento, valores como a empatía e o respecto.

A xornada, que transcorreu entre actividades lúdicas e obradoiros de habilidade, deixou momentos divertidos e moi simpáticos nos que os/as nenos/as volveron a sorprender facendo gala da súa naturalidade e espontaneidade. Tras unha pequena rolda de presentacións, os/as cativos/as pasaron á acción para poñer a proba a súa destreza e meterse de cheo na pel das persoas que padecen algunha discapacidade. Pese a que os retos eran complicados, todos foron superados con éxito grazas á súa constancia, esforzo e tesón, unha mostra máis da capacidade de asimilación e adaptación dos máis pequenos/as.

Actividades sen mans!

Ademais do tradicional circuíto de obstáculos, que nesta ocasión percorreron coa visión reducida, tamén realizaron un taller de pintura sen mans, empregando só os pés ou a boca. Pero o exercicio máis difícil e anecdótico chegou cando tocou facer o bocadillo, unha acción cotiá e sinxela se non fose porque só podían usar unha man, algo que a máis de un/ha lle fixo suar a camiseta e, sobre todo, os dedos. Finalmente, proba superada e con recompensa!

 

Desde Íntegro queremos agradecer aos alumnos/as, mestres/as e equipos de dirección de todos os centros educativos a súa participación e implicación neste proxecto, que ademais de ser unha experiencia moi positiva e enriquecedora, supón unha aprendizaxe en valores e unha aposta pola educación inclusiva dende a infancia. Confiamos en que a Diverescola siga medrando entre a comunidade educativa ata chegar a todos os colexios da Costa da Morte como un complemento á formación dos máis pequenos/as.

 

 

 

 

 

 

 

Os colexios que estean interesados en acollerse a este programa non teñen máis que poñerse en contacto coa asociación Íntegro chamando ao 981 734 985 e concretar a data que máis lles conveña.

 

 

post

Aberta a inscrición para o curso de Acondicionamento de Mobiliario Urbano e Xardíns

  • Trátase dunha acción formativa subvencionada pola Fundación ONCE dentro do Programa Operativo de Inclusión e Economía Social co-financiado polo Fondo Social Europeo (FSE)
  • O obradoiro está dirixido a persoas con diversidade funcional que estean inscritas como demandantes de emprego

En Íntegro estamos de parabéns porque a partir de hoxe unha nova acción formativa vai a sumarse ao plan de capacitación posto en marcha pola asociación para dotar ás persoas con diversidade funcional da Costa da Morte das ferramentas necesarias para a mellora do emprego e o desenvolvemento dunha vida plena e autónoma.

A Fundación ONCE, a través da súa Convocatoria Xeral de Axudas Económicas,  vén de conceder á entidade con sede en Nantón unha subvención para a realización dun curso de Acondicionamento de Mobiliario Urbano e Xardíns, enmarcado no Programa Operativo de Inclusión Social e Economía Social 2014-2020 co-financiado polo Fondo Social Europeo (FSE).

O curso, que se desenvolverá entre o 1 de marzo e o 15 de xuño, constará dun máximo de 12 prazas, un número moi reducido para garantir unha atención individualizada e adaptada ás necesidades de cada alumno/a e facilitar a realización da formación práctica.

Con esta acción formativa, especializada e acorde á demanda do mercado actual, preténdese acadar a inserción laboral dunha elevada porcentaxe de participantes, ao igual que xa sucedeu en ocasións anteriores noutros cursos destas características.

Inscrición

Dende hoxe e ata o vindeiro 28 de febreiro procederase á selección de candidatos/as para formar parte deste obradoiro.  As persoas que desexen participar só deberán cumprir dous requisitos: ter recoñecida algunha discapacidade e estar inscritos/as como demandantes de emprego. Se estás interesado/a en recibir máis información non dubides en poñerte en contacto con nós chamando ao 981 734 985, de luns a venres en horario de 09 a 17h. Anímete e aposta pola túa formación. Poida que o teu futuro dependa diso. Agardámoste!

post

A campaña de prevención de lesións medulares chega ao CPI As Revoltas de Cabana

45 alumnos/as de 3º e 4º da ESO amosaron a súa destreza nas probas de mobilidade reducida

“A ti tamén che pode pasar” é o título do vídeo elaborado pola asociación Íntegro para informar e sensibilizar á poboación sobre os accidentes medulares. E, este curso académico, os responsables da entidade decidiron incorporalo á campaña de prevención de lesións medulares que están a levar a cabo nos centros educativos da Costa da Morte para achegar aos máis novos/as o día a día das persoas que padecen esta doenza e conciencialos/as sobre as importancia de previr riscos innecesarios.

Hoxe tocoulle a quenda a un grupo de 45 alumnos e alumnas do CPI As Revoltas, en Cabana de Bergantiños. E parece que o dito máis vale unha imaxe que mil palabras calou fondo entre os adolescentes de 3º e 4º da ESO que seguiron con gran atención o contido dun documental que lles fixo ver de fronte como unha imprudencia che pode cambiar a vida. Tras a proxección do vídeo, o presidente de Íntegro Adolfo López Baña insistiu, durante a charla informativa,  na necesidade de evitar prácticas de risco, especialmente ao volante e en praias e piscinas, principais causantes da maioría dos accidentes irreversibles entre a mocidade da nosa contorna.

Xunto a López Baña tamén estiveron outros membros da asociación como o vogal David Pombo e Teresa Fuentes, voluntaria e socia. Ambos relataron as súas experiencias sobre unha cadeira de rodas e explicaron as dificultades que han de superar cada día para o desempeño das súas actividades cotiás. Uns testemuños que, sen dúbida, espertaron o interese e a curiosidade dos/as escolares que non perderon detalle das intervencións como ben demostraron máis tarde cando tocou pasar á acción. Porque despois da teoría, chegou a práctica e, axudados por unha monitora do centro e varios usuarios/as, os e as estudantes foron poñendo a proba a súa habilidade nun circuíto de obstáculos coa mobilidade reducida. Mestres/as e alumnos/as decidiron subirse á cadeira de rodas para poñerse na pel das persoas con discapacidade e ser quen de ver as barreiras que a diario nos resultan invisibles. Un exercicio que foi superado con nota pola súa destreza e, sobre todo, pola súa sensibilidade e a incrible capacidade de empatía e adaptación.

Esta actividade está co-financiada pola Xunta de Galicia e a Deputación da Coruña e conta ademais coa colaboración das administracións locais e de numerosas empresas privadas.