Íntegro volve ás aulas cunha nova edición da Diverescola

Publicado a 2022-01-23T18:43:49+00:00

Tras case dous anos de inactividade pola pandemia

O CEIP Plurilingüe San Vicenzo de Vimianzo será o primeiro destino desta iniciativa, incluída no programa Capacíta-T, para a achegar ao alumnado de infantil e primaria da Costa da Morte a diversidade e a inclusión a través do xogo e o entretemento

Tras un período de inactividade de case dous anos debido á COVID-19, a asociación Íntegro porá en marcha a vindeira semana unha nova edición da Diverescola, unha iniciativa promovida pola entidade de Nantón, no marco do programa Capacíta-T, para achegar aos máis cativos e cativas da Costa da Morte a diversidade e a inclusión a través do xogo e o entretemento. A primeira saída da nova campaña terá como destino o CEIP Plurilingüe San Vicenzo, de Vimianzo.

O martes 25 terá lugar a primeira xornada de sensibilización, na que participarán un total de 69 nenos e nenas de 4 a 6 anos. Desde primeira hora da mañá, desenvolveranse diferentes actividades lúdicas arredor dun “contaconto guiado”. Ademais da lectura e e posterior interacción sobre o conto, abordarase a temática a través da técnica do “muralismo” para intercambiar ideas e afianzar conceptos relacionados coa inclusión e a diversidade.

O mércores 26 será a quenda do alumnado de 1º e 2º de educación primaria. Neste caso, os pupitres darán paso aos circuítos de obstáculos para acoller unha actividade denominada “xogamos coas barreiras”. Trátase de realizar un circuíto de mobilidade en cadeira de rodas por determinados espazos do colexio e un percorrido estacional sensorial, que lles axudará a sensibilizarse e empatizar coas dificultades. Así, a través do xogo, poderemos reflexionar sobre as barreiras físicas, sociais e mentais que existen na sociedade e como podemos superalas.

Educación en valores

Diverescola é unha acción de sensibilización desenvolvida por Íntegro, no marco do programa de capacitación da sociedade Capacíta-T, encamiñada a educar en valores ao alumnado de infantil e primaria dos centros educativos da Costa da Morte, co obxectivo de formar, xunto ao profesorado, persoas comprometidas coa diversidade funcional, romper as barreiras mentais e propiciar a normalidade e a inclusión real. A través do xogo e o entretemento, os máis cativos/as terán a oportunidade de reflexionar e flexibilizar sobre crenzas erróneas, xa consolidadas, en torno ás persoas que son diferentes e/ou teñen diferentes capacidades, ata darse conta das súas potencialidades, aprender a respectalas e descubrir que a riqueza e a importancia da diversidade. Deste xeito, promoveremos actitudes positivas no alumnado para combater a discriminación e a desigualdade.

O CPI Plurilingüe Cabo da Area de Laxe e o IES Terra de Soneira de Vimianzo protagonizaron as últimas xornadas de sensibilización de Íntegro

Publicado a 2019-03-29T15:59:32+00:00

49 nenos de 2º e 3º de primaria achegáronse a coñecer o Visítanos mentres que os de 4º da ESO e 1º de bacharelato recibiron a visita da campaña de prevención de lesións medulares

Un grupo de alumnos e alumnas de 2º e 3º curso de educación primaria do CPI Plurilingüe Cabo da Area de Laxe achegouse esta semana ata as nosas instalacións de Nantón para participar nunha nova edición do programa Visítanos, co que se pretende sensibilizar aos máis pequenos/as en materia de diversidade e inclusión. Tras unha distendida charla, protagonizada polos nosos usuarios/as e monitoras, na que se abordou o significado de ambos conceptos, os 49 estudantes procederon a realizar unha visita polo centro, xunto á directora Noelia Barreira, para coñecer de preto o seu funcionamento e o traballo que se desenvolve nos diferentes talleres.

Sen dúbida, os obradoiros de artes manuais foron os que máis chamaron a súa atención. E, moi especialmente, o de elaboración de mandalas, ao que se apuntaron sen dubidalo nin un instante para facer cadanseu deseño. A fabricación de pulseiras de macramé tamén espertou a curiosidade dos nenos e nenas, que non quixeron marchar sen aprender esta divertida e sinxela técnica. Na sala de ximnasia puxeron a proba a súa habilidade e destreza con diversos xogos de habilidade, que lle serviron para comprobar a dificultade de realizar labores cotiás desde unha cadeira de rodas.

O paso pola cociña tamén resultou do máis divertido aprendendo a facer riquísimas sobremesas coas que sorprender ás súas familias. Ao remate, os/as estudantes empregaron toda a súa creatividade e imaxinación na realización dun mural no que plasmaron as súas impresións sobre a xornada vivida no centro e no que, a bo seguro, non deberon faltar palabras como diversión e aprendizaxe.

Campaña lesións medulares

Por outra banda, a campaña de prevención de lesións medulares aterrou o pasado martes no IES Terra de Soneira de Vimianzo para concienciar ao alumnado de 4º da ESO e 1º de bacharelato sobre as causas e consecuencias de sufrir un accidente medular. Tras a proxección do vídeo elaborado por Íntegro “A ti tamén che pode pasar”, os/as estudantes seguiron con atención a charla informativa protagonizada polo David Pombo e Teresa Alvarellos, vogal e socia-colaboradora, respectivamente. Durante o acto, ambos fixeron especial incidencia na necesidade de evitar riscos innecesarios como imprudencias ao volante ou mergullos en praias e piscinas, prácticas moi habituais entre a mocidade, sobre todo, coa chegada do bo tempo.

Ao longo da mañá, os 60 alumnos/as participantes tiveron a oportunidade de comprobar en primeira persoa as dificultades de desprazarse nunha cadeira de rodas sorteando obstáculos de todo tipo nun improvisado circuíto de mobilidade, que lograron superar sen problemas grazas á súa habilidade e ás condicións de accesibilidade que reúne o centro educativo en cumprimento da normativa vixente. Así dá gusto!

Grazas a todos/as por participar!

Íntegro achega a diversidade a máis de 200 escolares da Costa da Morte

Publicado a 2018-03-22T22:30:07+00:00

Esta semana a campaña de lesións medulares, a Diversescola e o Visítanos promoveron numerosas actividades de sensibilización en varios colexios e institutos da zona

Onte foi un día de intensa actividade na asociación Íntegro, tanto dentro como fóra das nosas instalacións. Mentres que o Centro de Recursos abría as súas portas para recibir a un grupo de alumnos/as do CEIP Eduardo Pondal de Ponteceso, dentro do programa Visítanos, varios responsables da entidade desprazáronse ata o IES Terra de Soneira de Vimianzo para manter unha xuntanza co alumnado de 4º da ESO e 1º de bacharelato no marco da campaña de prevención de lesións medulares.

Esta semana en Nantón imos de aula en aula! A primeira cita foi cos alumnos e alumnas de 3º da ESO do CPI Alcalde Xosé Pichel de Coristanco, cos que mantivemos unha charla informativa o pasado martes para falarlles sobre a prevención de lesións medulares e a importancia de evitar prácticas de risco en puntos de alta sinistralidade como praias, piscinas e estradas. Dentro desta campaña, que Íntegro está a impartir nos centros de primaria e secundaria da Costa da Morte, o segundo encontro tivo lugar onte no IES Terra de Soneira de Vimianzo. 60 escolares de 4º da ESO e 1º de bacharelato participaron nunha animada e moi concorrida xuntanza con varios membros da entidade na que ademais da proxección do vídeo “A ti tamén che pode pasar”, houbo unha charla informativa e un improvisado coloquio sobre as principais causas e consecuencias das lesións medulares e a importancia da súa prevención.

Os que estes días tamén se achegaron de cheo á diversidade foron os máis pequenos/as. Concretamente onte, máis de 30 nenos e nenas de 5º e 6º de primaria do CEIP Eduardo Pondal de Ponteceso estiveron de visita en Íntegro para coñecer por dentro as nosas instalacións e o funcionamento dos obradoiros. Da man de Visítanos, unha iniciativa do programa Capacíta-T promovida por Íntegro, e xunto aos nosos usuarios e usuarias percorreron un a un os talleres do Centro de Día e do Centro Ocupacional con parada obrigada na cociña, no ximnasio e na sala de artes manuais, onde tiveron a oportunidade de elaborar tanto xabóns de glicerina como pulseiras de macramé que tamén levaron como recordo. A xornada rematou coa confección dun mural no que recolleron as súas impresións sobre a experiencia vivida no centro.

Diverescola e Medulares

Pero as actividades de sensibilización nos centros educativos da comarca continuarán ata mañá. Sen ir máis lonxe, hoxe a Diverescola, a versión máis peque do programa Capacíta-T, viaxou ata as aulas de infantil do CPI As Revoltas de Cabana para achegar a diversidade a preto de 40 nenos/as, con idades comprendidas entre os 3 e os 5 anos, a través do xogo e o entretemento. Mañá venres será a quenda dos alumnos e alumnas do CEIP Milladoiro de Malpica, ata onde se trasladará a campaña de prevención de lesións medulares poñendo o punto e final así a unha semana frenética e de intensa actividade nos colexios e institutos da Costa da Morte, reflexo da aposta por unha educación inclusiva e en igualdade. Grazas!

Un carné con moitos beneficios

Publicado a 2017-10-06T14:07:44+00:00

Esta temporada os socios e socias de Íntegro disporán de importantes vantaxes económicas en preto de trinta empresas, comercios e establecementos de seis concellos da Costa da Morte
A entidade premia así a fidelidadedos asociados ao tempo que promociona o comercio de proximidade

O outono chega a Íntegro e faino cargado de novidades e vantaxes. E unha das primeiras e máis interesantes vai dirixida aos seus socios e socias. Trátase da nova campaña de fidelidade para asociados/as que vén de poñer en marcha a entidade no ano no que celebra o seu 25 aniversario. Grazas á colaboración de numerosas empresas, comercios e establecementos da Costa da Morte, pertencer á familia Íntegro vai ter un valor engadido. A partir de agora, todas as persoas que posúan o carné de socio/a poderán beneficiarse de interesantes descontos e promocións á hora de realizar as súas compras e/ou xestións así como ao contratar determinados servizos. Para o seu presidente Adolfo López Baña, esta iniciativa “pretende ser un pequeno xesto de agradecemento co que recoñecer e premiar a lealdade de todas as persoas que, coa súa colaboración desinteresada, fan posible que sigamos traballando e medrando en recursos e actividades, ademais de axudar a promover o comercio de proximidade”.

Esta temporada mercar un ordenador, ir ao salón de peiteado ou recibir unha masaxe será entre un 5% e un 50% máis barato para todos os socios/as de Íntegro que presenten o seu correspondente carné nalgunha das preto de trinta empresas e comercios adheridos a esta campaña e pertencentes aos concellos de Vimianzo, Laxe, Ponteceso, Cabana, Zas e Carballo. Xunto aos descontos, ofertas e promocións dunha ampla selección de produtos tamén se realizarán sorteos e agasallos de numerosos artigos e servizos de uso cotiá (alimentación, téxtil, beleza, ocio…). Deste xeito, ademais de gratificar aos aboados e aboadas tamén se pretende promover a economía local e o comercio de proximidade.

Aínda que a campaña xa botou a andar, as persoas que estean interesadas en participar aínda están a tempo de facelo, ben como socios/as da entidade ou como establecemento adherido á rede de empresas colaboradoras. Abonda con chamar ao 981 734 985, de luns a venres en horario de 09 a 17h.

A partir de agora saca o carné de Íntegro cando merques nalgún dos seguintes establecementos e benefíciate das súas vantaxes.

Baio (Zas): Calzados Paco Home, Calzados Paco Muller, Óptica Arjomil, Parafarmacia Horizonte, Fisioterapia Vértebra, Alicia Novas Podoloxía, Centro Dental Baldomar, Muebles Galicia, Lencería marta, Psicoloxía Tania Rojo

Cabana: Fisioterapia Eva Senande, Amamber

DonClic, Modas Suárez, Peluquería DobleV, Deportes San Remo

Laxe: Colaxe

Ponteceso: A Tenda dos Libros, A Pesqueira Zapatería, Xoiería Rey Mira, O Mundo ao Revés, Pettit Moda, Parafarmacia Horizonte

Vimianzo: Arranxos Beatriz, A Tenda de Ma, Centro de Estética Jenn, Mónica Coscoñas, Modas Vigo, Clínica de Podoloxía Mª Cristina Varela Novo

A asociación Íntegro aposta pola renovación dos convenios de colaboración cos concellos bergantiñáns adheridos ao PIMD Rural

Publicado a 2016-10-22T18:37:08+00:00

108 mulleres do rural, na súa maioría con diversidade funcional, beneficiáronse deste programa dende xaneiro de 2015

Nas vindeiras semanas a asociación Íntegro retomará a actividade do Punto de Intervención para Mulleres con Diversidade Funcional no ámbito rural (PIMD Rural). Para elo, procederase a contactar cos concellos xa adheridos a este programa dirixido a mulleres, maioritariamente con disCapacidade, que está cofinanciado pola Secretaría Xeral de Igualdade da Xunta de Galicia e o Fondo Social Europeo (FSE), e deseñado e executado pola entidade ata o pasado día 30 de setembro. O primeiro paso para a posta en marcha da segunda edición pasará pola renovación dos convenios de colaboración cos municipios de Malpica, Laxe, Cabana e Ponteceso, que xa forman parte do mesmo dende comezos de ano.

Grazas á implicación e ao compromiso institucional, o PIMD Rural experimentou un notable crecemento na comarca de Bergantiños chegando a consolidarse como o principal servizo de atención e intervención para un dos colectivos máis vulnerables da sociedade. Dende que botou a andar en xaneiro de 2015, 108 mulleres beneficiáronse das diferentes accións formativas levadas a cabo para erradicar a discriminación e a desigualdade de oportunidades mediante o desenvolvemento de actividades que facilitan o seu empoderamento e reforzan o seu papel no ámbito rural ata acadar unha situación de normalidade. Neste sentido, os resultados non poden ser mellores! O 69% das usuarias lograron mellorar a súa situación persoal e/ou laboral mentres que un 18% acadou a súa plena integración en materia de educación e formación e o 7% conseguiu a obtención dalgunha cualificación. Ademais, o 6% das participantes acadou o seu primeiro emprego mellorando así a súa calidade de vida.

Balance

Por outra parte, os servizos de orientación, formación e a busca de emprego foron os máis solicitados polas beneficiarias do PIMD Rural acadando un nivel de participación do 81%. Así, o 36% das mulleres fixo uso do programa de orientación e información individual en materia de diversidade, e un 23% decantouse pola adquisición de competencias e habilidades profesionais. Outra das accións con gran aceptación entre as usuarias foron as encamiñadas á orientación laboral e acompañamento na procura de emprego, demandadas no 22% dos casos. A asistencia psicolóxica (11%) e a mediación familiar (8%) pechan a listaxe de prestacións ofrecidas dende os diferentes puntos de intervención, situados nas concellerías de servizos sociais e no Centro de Recursos de Nantón.

A adhesión de catro concellos bergantiñáns ao PIMD Rural, a primeiros de ano, posibilitou o achegamento de novos recursos a mulleres con diversidade funcional da zona rural. De feito, Ponteceso e Malpica son os municipios nos que se rexistran un maior nivel de participación, cun 33% e un 27%, respectivamente, seguido de Cabana (16%) e Laxe (14%) fronte ao 5% de Vimianzo ou Zas.

Dada a boa acollida que esta iniciativa está a ter na Costa da Morte e ante a crecente demanda de usuarias procedentes doutras localidades, en Íntegro seguimos traballando para ampliar o ámbito de actuación do PIMD a outros municipios e incrementar así a nosa colaboración cos servizos de proximidade á cidadanía.

Permanecede atentas porque moi pronto estaremos de volta!

Visítanos! acolleu unha nova xornada sobre diversidade con alumnos/as do CEIP San Vicenzo de Vimianzo

Publicado a 2016-04-13T21:07:57+00:00

Esta mañá un grupo de 54 escolares do CEIP San Vicenzo de Vimianzo participaron nunha nova edición de Visítanos!, tras a visita o ano pasado de varios colexios de Camariñas e Ponte do Porto. Trátase dunha actividade educativa incluída no programa Capacíta-T coa que a Asociación Íntegro pretende concienciar, educar e capacitar en materia de diversidade funcional aos máis pequenos.

A xornada deu comezo ás 10:30h cunha breve presentación da entidade para amosar os obxectivos e valores cos que traballa en favor das persoas con diversidade funcional. Dende o primeiro momento, os alumnos e alumnas de 5º e 6º de primaria amosáronse moi participativos e interesados/as en coñecer o noso día a día e achegarse á inclusión partindo das súas propias ideas, moitas delas preconcibidas e ditadas por unha sociedade desigual. Tamén se proxectou un vídeo resumo das actividades levadas a cabo ao longo do 2015.

Durante algo máis de dúas horas realizamos un percorrido polas instalacións para coñecer de preto o funcionamento do centro e o traballo que realizan os nosos usuarios/as nos obradoiros ocupacionais.

O xardín terapéutico foi todo un éxito entre os escolares

A visita ao invernadoiro foi unha das máis agardadas polos rapaces/as. Tras escoitar as explicacións da nosa enxeñeira agrónoma puideron poñer en práctica moitos dos coñecementos aprendidos.

No xardín terapéutico traballaron con plantas aromáticas, transplantándoas e realizando diversos traballos de composición. O taller de artes manuais foi outra parada obrigada. Alí tiveron a oportunidade de coñecer algunhas das técnicas empregadas polos nosos usuarios/as para confeccionar os produtos de artesanía que realizan e que máis dun escolar tamén se animou a elaborar.

O mal tempo obrigou a realizar o circuíto de mobilidade no interior das instalacións

Pero, sen dúbida, o momento máis divertido chegou ao final coa realización dun circuíto de mobilidade e desprazamento en cadeira de rodas por equipos co finalidade de achegar aos máis pequenos á realidade da diversidade, xogando coas barreiras ás que cada día deben facer fronte moitas persoas con diversidade funcional. Unha proba moi entretida e novidosa na que tiveron que poñer en práctica o seu enxeño e habilidade para sortear todo tipo de obstáculos. Unha excelente maneira de comprobar, na súa propia pel, que a diversidade é cuestión de capacidades, non de discapacidades.

Grazas a todos/as polo vosa participación e interese. Parabéns tamén aos nosos usuarios e usuarias polo excelente traballo realizado e como anfitrións/as dunha xornada diferente, diversa e moi inclusiva. Pasámolo xenial!

Os alumnos/as deseñaron as súas propias pulseiras no taller de manualidades

En Íntegro xa estamos a pensar na 3ª edición de Visítanos! Será o vindeiro 11 de maio coa visita dun grupo de alumnos e alumnas do colexio de Laxe. Agardámosvos, coma sempre, coas portas abertas!

Un grupo de escolares de Vimianzo protagonizará mañá unha nova edición de Visítanos!

Publicado a 2016-04-11T22:49:32+00:00

Esta semana o programa Capacíta-T volve a ser noticia en Íntegro grazas á realización dunha nova edición de Visítanos!, unha actividade educativa dirixida aos máis pequenos coa intención de concienciar, educar e capacitar en materia de diversidade funcional e que xa contou o ano pasado cunha primeira edición na que participaron colexios de Camariñas e Ponte do Porto. Nesta ocasión, os nosos convidados serán 54 alumnos e alumnas de 5º e 6º de primaria do CEIP San Vicenzo, de Vimianzo, que mañá visitarán o centro de Nantón para coñecer en primeira persoa as nosas instalacións e algunhas das actividades diarias que realizamos.

A visita, que está prevista para as 10:30 h, dará comezo cunha breve presentación da nosa entidade para dar a coñecer os obxectivos e os valores que nos caracterizan. Dende o primeiro momento, tentaremos promover a súa participación, de xeito activo e dinámico, para que poidan achegarse á inclusión partindo das súas propias ideas. Finalmente, proxectarase un vídeo sobre as principais actividades que leva a cabo a asociación.

Obradoiros

A visita ao invernadoiro é unha das actividades que xera maior expectación entre os escolares

A continuación, daremos paso ao momento máis agardado por todos/as: os obradoiros e os xogos diversos. Divididos en tres grupos visitarán, acompañados polos nosos usuarios/as, os diferentes obradoiros do centro ocupacional. No invernadoiro e no xardín terapéutico poderán traballar con plantas aromáticas, transplantándoas e realizando diversos traballos de composición. O taller de artes manuais será outro dos lugares a visitar, con parada incluída, para realizar algúns obxectos de artesanía seguindo as diferentes técnicas que diariamente empregan os alumnos/as do centro, que mañá converteranse en auténticos/as anfitrións/as.

O circuíto de mobilidade pon a proba as habilidades dos participantes para sortear todo tipo de obstáculos

E para o final, o mellor! Achegarémonos á realidade da diversidade xogando coas barreiras ás que cada día deben facer fronte moitas persoas con diversidade funcional. Esta actividade consiste na realización dun circuíto de mobilidade e desprazamento en cadeira de rodas por equipos. Unha proba, sen dúbida, moi entretida e novidosa na que deberán poñer en práctica o seu enxeño e habilidade para sortear todo tipo de obstáculos. Unha boa maneira de comprobar que a diversidade é cuestión de capacidades, non de discapacidades.