post

Restituído o servizo de atención presencial individualizada do PIMD Rural

  • As interesadas, prioritariamente mulleres con discapacidade do rural, deberán solicitar cita previa a través do 981 734 985 ou en info@integro.es
  • Esta prestación forma parte do Punto de Intervención para Mulleres, financiado pola Secretaría Xeral de Igualdade da Xunta de Galicia e o Fondo Social Europeo (FSE)

Tras finalizar o estado de alarma, o Punto de Intervención para Mulleres con Diversidade Funcional do Rural (PIMD Rural) vai, pouco a pouco, recuperando o seu funcionamento habitual, aínda que adaptado ás novas restricións para garantir as medidas de protección e hixiene establecidas para evitar futuros contaxios. A atención telefónica e online, prestada desde Íntegro durante o período de confinamento, deu paso nesta etapa de transición cara unha nova normalidade a un servizo de atención presencial e individualizada nas nosas instalacións de Nantón (Cabana de Bergantiños), a través do sistema de cita previa, co fin de continuar ofrecendo asesoramento e información integral a un dos colectivos máis vulnerables, especialmente, na contorna rural.

Ademais de prestar colaboración en materia de orientación e intermediación laboral e profesional para a mellora da empregabilidade, desde o punto de intervención tamén se está a ofrecer axuda en materia de recursos, apoio psicolóxico e mediación familiar para a resolución de posibles conflitos xurdidos no ámbito doméstico durante a corentena.   

As mulleres, prioritariamente, con diversidade funcional que residan no ámbito rural e estean interesadas en solicitar este servizo de atención presencial, deberán poñerse en contacto con Íntegro chamando previamente ao 981 734 985 ou enviando un correo electrónico a info@integro.es para concertar a súa cita. No momento de acudir ao centro, deberán levar tapabocas, manter a distancia de seguridade e facer uso dos xeles que temos a disposición do público.

PIMD Rural

O programa PIMD Rural, así como todas as accións que o integran, están financiadas pola Secretaría Xeral de Igualdade da Xunta de Galicia e o Fondo Social Europeo (FSE). Entre os seus obxectivos destaca fomentar a igualdade de oportunidades para contribuír á redución da dobre discriminación na que se atopan as mulleres en situación de especial vulnerabilidade, dotándoas dunha maior autonomía e independencia de cara á mellora da súa situación persoal, social e laboral, e ofrecéndolles unha atención personalizada e especializada para a súa integración na sociedade e no mercado de traballo.

post

Os concellos de Cabana e Ponteceso doaron, xunto coa empresa ceense Cubiertas Javier Fidalgo, material de protección individual para as visitas domiciliarias

Ademais da atención telefónica e on line, a entidade presta un servizo a domicilio de atención psico-social e laboral, a través de programas co-financiados pola Xunta de Galicia como Avanza Inclusión e PIMD Rural, para supervisar e garantir o benestar das persoas con diversidade funcional do rural durante a corentena

Hai case dous meses que o Centro de Recursos de Nantón (Cabana), no que se atopan o Centro de Día e Ocupacional así como a Área de Servizos (INFOASE, Avanza Inclusión e PIMD Rural) de atención a persoas con discapacidade, permanece pechado ao público por mor da crise sanitaria provocada polo COVID-19. Sen embargo, desde entón e ata a actualidade, en Íntegro continuamos traballando para achegar aos nosos usuarios/as e ás súas familias, así como ás persoas con discapacidade e/ou en risco de exclusión social da Costa da Morte un servizo de atención psico-social e formativo de calidade e adaptado ás necesidades da nova realidade que estamos a vivir.  

Desde os inicios deste confinamento, o contacto cos usuarios/as foi unha das nosas prioridades co fin de manter activos hábitos e rutinas capaces de garantir o desenvolvemento dunha vida diaria saudable, plena e equilibrada. As clases presenciais deron paso ás sesións on line e ás videochamadas, coas que comprobamos o ben que se lles dan aos nosos usuarios as novas tecnoloxías. Ademais, demos continuidade a programas como Avanza Inclusión, co-financiado pola Consellería de Política Social da Xunta de Galicia, e ao Punto de Intervención para Mulleres con Diversidade Funcional do Rural (PIMD Rural) a través dun servizo de axuda telefónica e telemática destinado ao asesoramento e apoio de cuestións socio-laborais, ao que a nosa entidade sumou o apoio presencial con visitas domiciliadas, previamente concertadas, que posibilitan ademais a supervisión e o seguimento continuado dos nosos usuarios/as, as súas familias e das persoas con discapacidade e/ou en risco de exclusión que reside no rural, para garantir e preservar o seu benestar e detectar novas necesidades e/ou conflitos, e a súa resolución.

Doazón de material

 

 

 

 

 

 

Pero as visitas domiciliarias non serían posible sen a inestimable colaboración de concellos como o de Cabana de Bergantiños e Ponteceso. Ambas administracións fixéronnos entrega do material de protección individual necesario para garantir a seguridade das nosas traballadoras nos seus desprazamentos e preservar tamén a saúde e o benestar das familias receptoras evitando posibles contaxios. Así mesmo, desde Íntegro queremos expresar tamén o noso agradecemento a Cubiertas Javier Fidalgo, unha empresa de Cee que doou un lote de mascarillas cirúrxicas para o noso persoal. Grazas a todos polo seu apoio e solidariedade nestes difíciles momentos!  

Desescalada. Fase 1

Como xa saberedes, o luns 11 a nosa comunidade entrará na Fase 1 do Plan de transición cara unha nova normalidade co obxectivo de ir, pouco a pouco e con cautela, recuperando o noso día a día, restablecendo as relacións sociais, reactivando a economía, xerando emprego, etc. Pero nesta nova etapa tamén debemos continuar traballando unidos para evitar a propagación do COVID-19. Pare elo, desde Íntegro queremos apelar á responsabilidade social  e concienciación cidadá no que respecta ao cumprimento e utilización dos mecanismos de seguridade que temos ao noso alcance para evitar posibles novos contaxios. Neste senso, é fundamental que sigades empregando sistemas de protección individual como guantes, máscaras e/ou pantallas de protección, xel hidroalcohólico e un correcto e frecuente lavado de mans, ademais de manter o distanciamento social, gardando as distancias de seguridade recomendadas (2 metros) para evitar resultar contaxiados/as. Extremar as precaucións e non baixar a garda é prioritario para lograr unha desescalada segura e sen máis vítimas. Só así poderemos gañarlle a batalla ao coronavirus e reencontrarnos moi pronto. Estámolo desexando!          

Se precisas información, asesoramento e/ou apoio en materia laboral, mediación familiar e/ou asistencia a persoas con diversidade funcional, non dubides en contactar con nós chamando aos teléfonos 981 7349 85 / 650961649 ou enviando un correo electrónico a info@integro.es.

 

post

Íntegro combate a corentena con formación e servizos de atención psico-social e laboral

A entidade combina o apoio telefónico e on-line coas visitas presenciais para achegar aos usuarios/as e ás súas familias, así como ás persoas con disCapacidade e/ou en risco de exclusión,  asesoramento e apoio a través de programas como Avanza Inclusión e o PIMD Rural

A raíz de decretarse o estado de alarma, o pasado 14 de marzo, a asociación Íntegro viuse na obriga de pechar as instalacións do Centro de Recursos, onde están situados o Centro de Día e Ocupacional así como a Área de Servizos (INFOASE, Avanza Inclusión e PIMD Rural) de atención a persoas con discapacidade, co fin de facer fronte á situación de emerxencia sanitaria provocada polo COVID-19. Sen embargo, dita medida non logrou frear moitos dos servizos e actividades que viña desenvolvendo a entidade en materia de atención formativa e psico-social para garantir o correcto desenvolvemento dos nosos usuarios/as e as súas familias, así como o das persoas con disCapacidade e/ou en risco de exclusión social.

Así, a través do programa “Avanza Inclusión”, cofinanciado pola Consellería de Política Social da Xunta de Galicia, podemos continuar desenvolvendo o labor de acompañamento social e apoio na xestión de trámites burocráticos aos nosos usuarios e usuarias, ás súas familias e ás persoas con disCapacidade e/ou en risco de exclusión social, tan necesario nestes difíciles momentos. Ademais dos servizos de axuda telefónica e on-line, que a entidade vén prestando desde o inicio da corentena, estase a ofrecer apoio presencial a través de visitas domiciliadas, previamente concertadas, que posibilitan a detección de novas necesidades e/ou conflitos e a súa resolución.
As persoas interesadas en solicitar a nosa axuda e/ou formularnos as súas dúbidas, poden poñerse en contacto coa entidade chamando aos teléfonos 981 7349 85 / 650961649 ou enviando un correo electrónico a info@integro.es e unha das nosas traballadoras porase en contacto con elas á maior brevidade posible para atopar as respostas que precisen.

PIMD Rural

Outro dos programas que non para de medrar en número de usuarias e actividades é o Punto de Intervención para Mulleres con Diversidade Funcional do Rural (PIMD Rural), que continúa desenvolvendo numerosas accións como vén facendo desde a súa implantación en 2016. Tras a declaración do estado de alarma, tivemos que modificar o sistema de traballo e a comunicación coas mulleres beneficiarias do programa, centrándonos na atención telefónica e online para seguir prestándolle todos os servizos e cubrir as súas novas necesidades (información sobre prestacións económicas, recursos individuais, formación telemática, mediación telefónica con empresas…).

Este ano, desde a asociación Íntegro estamos a traballar arreo en dous eixes fundamentais para a consecución dunha vida plena e autónoma: a prospección do emprego, a través da colaboración con varias empresas da contorna, e a mediación familiar, ofrecendo asesoramento e apoio na resolución de cuestións de carácter laboral (renovación tarxeta demandante, prestación SEPE…), agora incrementadas a raíz da crise sanitaria-económica. Así mesmo, desde a entidade continuamos traballando o fomento da igualdade de oportunidades entre
mulleres e homes como elemento básico da atención especializada.

O PIMD Rural, é un programa subvencionado pola Secretaría Xeral de Igualdade da Xunta de Galicia, dirixido, prioritariamente, a mulleres con disCapacidade pero tamén a toda a poboación feminina que resida no rural. Entre as actuacións desenvolvidas destacan a mediación intercultural e/ou familiar e as medidas de orientación laboral e de acompañamento na busca de emprego, por conta propia e o emprendemento, así como a
prospección do mercado de traballo, a intermediación e a titorización, laboral e profesional. Debido á situación de emerxencia sanitaria que estamos a vivir, desde Íntegro estase a ofrecer asistencia telefónica permanente a todas as mulleres con ou sen diversidade funcional que viven no rural. No caso de precisar axuda con algún trámite laboral ou de mediación, abonda con chamar ao teléfono 981 743 985 ou enviar un mail a info@integro.es.

post

Rematado o curso de creación de perfís en webs de emprego para achegar ao mercado laboral ás mulleres con diversidade funcional do rural

No último ano, 36 persoas beneficiáronse do Punto de Intervención para Mulleres, co-financiada polo Fondo Social Europeo (FSE) no marco do programa operativo FSE Galicia 2014-2020

O mes de setembro deixounos un balance máis que positivo no Punto de Intervención para Mulleres con Diversidade Funcional do Rural (PIMDRural), unha iniciativa promovida pola asociación Íntegro e co-financiada polo Fondo Social Europeo (FSE) no marco do programa operativo FSE Galicia 2014-2020, para fomentar a igualdade de oportunidades e contribuír a diminuír a triple discriminación na que se atopan as mulleres en situación de especial vulnerabilidade.

Tras un ano de intensa actividade formativa para dotar ás mulleres do rural dunha maior autonomía e independencia, necesarias para mellorar a súa situación persoal, social e laboral, o pasado mes de setembro puxemos en marcha unha novidosa acción, totalmente de balde baseada na creación de perfís en webs de emprego, coa finalidade de mellorar a formación das participantes de cara a aumentar a súa empregabilidade ata lograr a plena integración socio-laboral.

Balance

Durante o período 2018/2019, un total de 36 mulleres en situación de especial vulnerabilidade beneficiáronse do noso servizo de mediación familiar e de apoio e orientación laboral, postos en marcha hai xa catro anos. Moitas delas, formaron parte tamén dun extenso e variado programa formativo, no que se impartiron cursos relacionados coa procura de emprego a través do teléfono móbil, formación básica en prevención de riscos laborais e confección de currículos e cartas de presentación.

Así mesmo, leváronse a cabo numerosas accións de acompañamento na busca de emprego, promoción do emprendemento e prospección do mercado de traballo, intermediación e tutorización laboral e profesional logrando 4 insercións laborais, unha cifra moi positiva tendo e conta a triple discriminación que padece este colectivo (muller con diversidade funcional que reside no medio rural).

Ademais das sesións teóricas, as participantes tiveron a oportunidade de achegarse á realidade actual dalgunhas das empresas máis importantes e punteiras de Galicia como é o caso de Aluman, Inditex e Cerdeimar, entre outras. Nos vindeiros meses, está previsto continuar con este ciclo de visitas para adquirir novos itinerarios de inserción profesional.

 

post

O PIMDRural de Íntegro regresa en setembro cun novo curso sobre creación de perfís en webs de emprego

No último ano, 24 persoas beneficiáronse do Punto de Intervención para Mulleres, co-financiado polo Fondo Social Europeo (FSE) no marco do programa operativo FSE Galicia 2014-2020

O mes de setembro arrinca con importantes novidades no Punto de Intervención para Mulleres con Diversidade Funcional do Rural (PIMDRural), unha iniciativa promovida polo Centro de Recursos Íntegro e co-financiada polo Fondo Social Europeo (FSE) no marco do programa operativo FSE Galicia 2014-2020, para fomentar a igualdade de oportunidades e contribuír a diminuír a dobre discriminación na que se atopan as mulleres en situación de especial vulnerabilidade.

Tras un ano de intensa actividade formativa para dotar ás mulleres do rural dunha maior autonomía e independencia, necesarias para mellorar a súa situación persoal, social e laboral, este mes poremos en marcha unha novidosa acción, totalmente de balde baseada na creación de perfís en webs de emprego, que ten como obxectivo aumentar a empregabilidade de todas as participantes no curso e lograr a súa plena integración socio-laboral. Para elo, ofrecerase unha atención personalizada e especializada, orientada á realidade actual do mercado de traballo.

Todas as persoas que estean interesadas en participar nesta actividade, prioritariamente mulleres con disCapacidade, deberán inscribirse canto antes no Centro de Recursos Íntegro. Para máis información tamén poden chamar ao 981 734 985.

Balance

Durante o período 2018/2019, un total de 24 mulleres en situación de especial vulnerabilidade beneficiáronse do noso servizo de mediación familiar e de apoio e orientación laboral, postos en marcha hai xa catro anos. Moitas delas, formaron parte tamén dun extenso e variado programa formativo, no que se impartiron cursos relacionados coa procura de emprego a través do teléfono móbil, formación básica en prevención de riscos laborais e confección de currículos e cartas de presentación. Así mesmo, leváronse a cabo numerosas accións de acompañamento na busca de emprego, promoción do emprendemento e prospección do mercado de traballo, intermediación e tutorización laboral e profesional.  

Ademais das sesións teóricas, as participantes tiveron a oportunidade de achegarse á realidade actual dalgunhas das empresas máis importantes e punteiras de Galicia como é o caso de Aluman, Inditex e Cerdeimar, entre outras. Nos vindeiros meses, está previsto continuar co este ciclo de visitas para adquirir novos itinerarios de inserción profesional.

post

Íntegro inicia un ciclo de visitas a grandes empresas para promover a inserción laboral de persoas con diversidade

Dez usuarios/as do centro ocupacional e 6 mulleres do PIMD Rural foron os/as primeiros participantes desta novidosa acción, que tivo como destino Aluman pero que continuará con visitas a empresas como Coca-Cola, Inditex ou Cerdeimar, entre outras   

Un dos obxectivos da asociación Íntegro é dotar ás persoas con diversidade funcional da zona rural dos medios formativos e laborais necesarios para o desenvolvemento dunha vida plena, autónoma e igualitaria. Para elo, a nosa entidade vén de iniciar un ciclo de visitas a grandes empresas da contorna co obxectivo de poñer en marcha novos “ itinerarios de inserción profesional” para mellorar a capacitación profesional e o acceso ao mercado de traballo tanto dos usuarios do noso centro ocupacional como das participantes do programa PIMD Rural, financiado pola Secretaría Xeral de Igualdade da Xunta de Galicia e o Fondo Social Europeo (FSE).

A empresa Aluman, con sede no municipio de Arteixo, foi primeiro destino desta interesante iniciativa, na que, nesta ocasión, participaron dez usuarios/as do centro ocupacional e 6 mulleres do Punto de Información á Muller con Diversidade. Ata alí se desprazaron, o pasado día 28, todos/as participantes, acompañados/as pola terapeuta ocupacional e a educadora Social do centro, para realizar un percorrido polas instalacións e asistir a unha charla na que recibiron detallada información sobre o funcionamento da fábrica e as diferentes áreas de traballo que engloba. 

 

 

Esta actuación, que forma parte do plan estratéxico de inserción laboral do centro, verase complementada con novas visitas a outras grandes empresas, punteiras na  xeración de emprego e de riqueza na nosa contorna como é o caso do grupo Inditex, a conserveira Cerdeimar ou a sede de Coca-Cola na Coruña, entre outras. Ademais dunha primeira toma de contacto co tecido empresarial, esta ronda de visitas propiciará un maior achegamento ao mundo laboral das persoas con diversidade funcional que residen nas zonas rurais e, especialmente, das mulleres que sofren unha dobre discriminación, converténdose nun dos grupos de exclusión social máis vulnerables. O número de participantes variará en cada saída en función da dispoñibilidade das empresas. Manterémosvos informados/as!

 

 

 

 

 

 

post

O PIMD Rural volve a Malpica con novas accións formativas e un servizo de asesoramento continuo

O Alcalde e a concelleira de Servizos Sociais asinaron onte o convenio de colaboración con Íntegro tras visitar as instalacións de Nantón

O Punto de Intervención para Mulleres con Diversidade no ámbito Rural (PIMD Rural), promovido por Íntegro,  volve a estar de actualidade. Onte asinouse no Centro de Recursos de Nantón un convenio de colaboración co Concello de Malpica para a posta en funcionamento do novo servizo de asesoramento e intervención integral a persoas con diversidade funcional, especialmente mulleres, co-financiado pola Secretaría Xeral de Igualdade da Xunta de Galicia e o Fondo Social Europeo (FSE).

En presencia da directora do centro, Noelia Barreira, o alcalde de Malpica, Eduardo Parga, e a concelleira de Servizos Sociais, Marisol Blanco, formalizaron a súa adhesión, por terceiro ano consecutivo, ao PIMD Rural co obxectivo de promover a autonomía e a independencia das mulleres con disCapacidade que residen no rural de cara a súa plena integración na sociedade.

 

Para elo, levaranse a cabo unha serie de accións formativas dirixidas a mellorar a capacitación profesional e o emprego dun colectivo en situación de especial vunerabilidade. Ademais, as usuarias deste servizo disporán de asesoramento continuo, información sobre recursos individualizados e específicos, apoio e acompañamento na tramitación de xestións burocráticas así como atención individualizada sobre aspectos relacionados coa diversidade, ao igual que as familias con membros en situación de dependencia. As persoas interesadas deberán dirixirse ao punto de intervención que estará situado no departamento municipal de Servizos Sociais.

Visita ás instalacións

Antes da sinatura do convenio, os representantes municipais tiveron tempo de realizar un minucioso percorrido polas instalacións de Nantón para coñecer de primeira man algunas das melloras realizadas no centro e visitar os obradoiros ocupacionais nos que estaban a traballar os nosos usuarios e usuarias. Tanto o Alcalde como a Concelleira foron agasallados con xabóns de glicerina da colección Bicos de Amora.

Os representantes municipais levaron cadanseu xabón de glicerina da colección Bico de Amora

 

 

 

 

Desde Íntegro tamén queremos agradecer a participación do Concello de Malpica no obradoiro de Acondicionamento de Mobiliario Urbano e Xardíns, mediante a cesión dun aula na Casa do Oleiro de Buño para as clases teóricas e a dispoñibilidade de diferentes zonas verdes e axardinadas do municipio para a realización das prácticas. Unha nova acción, co-financiada pola Fundación ONCE e o Fondo Social Europeo (FSE),  que vén a refozar o seu compromiso coa integración social, educativa e laboral das persoas con diversidade funcional da contorna.

post

O delegado territorial da Xunta en A Coruña destaca o seu compromiso con Íntegro na súa primeira visita á entidade

Ovidio Rodeiro Tato acudiu a Nantón acompañado do alcalde e o concelleiro de Obras e Servizos de Cabana

Esta mañá o delegado territorial da Xunta en A Coruña, Ovidio Rodeiro Tato, realizou unha visita oficial ao Centro de Recursos de Íntegro en Nantón (Cabana) para coñecer en primeira persoa o funcionamento da entidade e abordar algúns dos programas de sensibilización social en materia de diversidade funcional nos que tamén colabora a Administración Autonómica. Durante a súa estancia estivo acompañado polo alcalde de Cabana de Bergantiños, Manuel Muíño, e o concelleiro de Obras e Servizos, Carlos Allo.

_MG_5757O presidente de Íntegro, Adolfo López Baña, exerceu de anfitrión xunto á directora do centro, Noelia Barreira, e outros representantes da directiva da asociación, durante o amplo e minucioso percorrido que realizaron polas instalacións para coñecer as actividades diarias que levan a cabo os nosos usuarios e usuarias así como algúns dos obradoiros formativos que se desenvolven no Centro de Día e no Centro Ocupacional. Ademais, durante o paseo realizaron varias paradas para observar con detalle, por exemplo, as tarefas de acondicionamento e conservación dos invernadoiros así como o asombroso traballo realizado nos talleres de artes manuais (xabóns de glicerina, escaiola, bixutería, etc).       _MG_5746

Na súa primeira visita a Íntegro, o delegado amosouse especialmente interesado nos programas educativos de sensibilización para escolares da Costa da Morte en materia de diversidade e inclusión social como a campaña de prevención de lesións medulares ou o proxecto Visítanos!, enmarcados no programa Capacíta-T co que colabora, ademais doutras entidades e institucións, a Xunta de Galicia.

Outra das accións abordadas foi o Punto de Intervención para Mulleres con Diversidade Funcional no Rural (PIMD Rural), co-financiado pola Secretaría Xeral de Igualdade da Xunta e o Fondo Social Europeo, sobre o que destacou a importante labor realizada por Íntegro en favor dun dos colectivos máis vulnerables e desfavorecidos da sociedade actual, as mulleres. Neste senso, Ovidio Rodeiro subliñou a necesidade de seguir desenvolvendo programas específicos para a formación e a inserción laboral da muller de cara ao seu empoderamento e manifestou a súa intención de continuar prestando todo o apoio institucional que sexa necesario.  Pola súa banda, López Baña, agradeceu o compromiso da Xunta e insistiu na necesidade de desenvolver programas de cooperación coa Administración como os que xa vén mantendo cos concellos da comarca, e en especial co de Cabana, para a posta en marcha destes e outros programas.

_MG_5812

Do mesmo xeito, o delegado territorial de Xunta comprometeuse a trasladar e axilizar as necesidades actuais da entidade ante os organismos autonómicos competentes ademais de colaborar estreitamente nos proxectos a curto e medio prazo da nosa asociación co fin de unir lazos en favor das persoas con diversidade funcional da Costa da Morte. _MG_5719

 

Finalmente, serviuse un aperitivo elaborado polos propios usuarios e usuarias do obradoiro de cociña de Íntegro que deixou con moi bo sabor de boca tanto ao delegado territorial como ás autoridades que o acompañaban, que aseguraron quedar con ganas de volver a visitarnos moi pronto.

post

Íntegro ofrece un servizo de asesoramento sobre recursos individuais en materia de diversidade funcional

Esta acción forma parte do PIMD Rural e está dirixida a mulleres con discapacidade e persoas en situación de dependencia

Dende hai anos a asociación Íntegro está a desenvolver un programa específico de asesoramento e intervención integral a persoas con diversidade funcional, especialmente mulleres, co-financiado pola Secretaría Xeral de Igualdade da Xunta de Galicia e o Fondo Social Europeo (FSE). Trátase do Punto de Intervención para Mulleres con Diversidade Funcional do Rural (PIMD Rural), implantado xa en 4 concellos da comarca de Bergantiños, con numerosas accións formativas sobre as súas costas e un novo proxecto que está a piques de ver a luz, o clubEmprego, dirixido á procura da igualdade de oportunidades e o empoderamento da muller na sociedade actual a través da formación e a inserción laboral. Pero o PIMD Rural é moito máis!

mujer disca 2Actualmente, dentro deste programa, tamén estamos a levar a cabo outras liñas de actuación orientadas a facilitar unha atención individualizada sobre aspectos relacionados coa diversidade, e dirixidas tanto a mulleres-prioritariamente- con disCapacidade como a familias con membros en situación de dependencia. Neste senso, temos en marcha un servizo de información e asesoramento sobre recursos individualizados e específicos en materia de discapacidade e/ou dependencia co que prestamos apoio e acompañamento na tramitación de xestións burocráticas que, moitas veces, soen converterse en procedementos longos e moi complexos que requiren de axuda externa. Estes son algúns deles:

  • Solicitude do certificado de discapacidade e acompañamento nos trámites a realizar.
  • Asesoramento a persoas con discapacidade sobre axudas e prestacións institucionais: prestación por fillo ao cargo, orfandade, prestación non contributiva, axudas individuais anuais para adquisición de servizos asistenciais e de rehabilitación (fisioterapia, logopedia, asistencia persoal, …).
  • Información e acompañamento na tramitación da tarxeta de discapacidade e/ou tarxeta de mobilidade reducida para aparcadoiro público.
  • Valoración e asesoramento en recursos de atención á discapacidade: centro de día, centro ocupacional, residencia, asistencia persoal, etc.
  • Información en materia de dependencia e acompañamento nos trámites (prestacións, axuda no fogar, tele-asistencia).
  • Asesoramento individual e específico sobre formación, emprego, acceso a servizos específicos, actividades ocupacionais, etc.

As persoas interesadas en solicitar esta servizo só teñen que poñerse en contacto coa nosa entidade chamando ao 981 734 985 ou acudir ás oficinas do Centro de Recursos de Nantón, IMG-20160308-WA0012de luns a venres en horario de 09 a 17h.

E se queres coñecer máis polo miúdo todas as accións que engloba o PIMD, lembra que en www.integro.es poderás atopar ampla información sobre todos os programas que temos en marcha. Seguro que todo o que precisas saber o atopas aquí!

post

clubEmprego, o novo espazo de encontro para a inserción laboral da muller

Trátase dunha acción formativa englobada no PIMD Rural que botará a andar o 1 de abril en Íntegro e nos concellos de Malpica, Laxe, Cabana e Ponteceso

As interesadas poderán inscribirse a partir de mañá no Centro de Recursos de Nantón, coincidindo co Día da Muller

Mañá conmemórase o Día da Muller e en Íntegro queremos celebralo dándolle, unha vez máis, todo o protagonismo a elas. Por iso, o día 8 poñemos en marcha unha nova acción formativa dentro do Punto de Intervención para Mulleres con Diversidade Funcional no ámbito Rural (PIMD Rural) que consistirá na creación dun clubEmprego, o novo espazo de encontro para a inserción laboral da muller.

CARTEL PIMD XERALEsta novidosa experiencia está dirixida a mulleres, preferentemente con disCapacidade e residentes nalgúns dos 4 concellos adheridos ao plan (Cabana, Malpica, Laxe e Ponteceso), activas e con ganas de incorporarse ao mercado de traballo. Tamén poderán anotarse aquelas que, sen cumprir estes requisitos, estean interesadas en participar.

_MG_3993

O clubEmprego posibilitará a busca de emprego en grupo e a prestación de asesoramento individual e grupal para dotar de ferramentas útiles e necesarias a un dos colectivos en maior situación de vulnerabilidade social. Para elo, en cada sesión haberá grupos reducidos de traballo aos que se lles facilitará apoio formativo individualizado relacionado con Tic´s, trámites administrativos ou empoderamento, así como accións grupais dirixidas á realización de  procuras dixitais, entrega de currículos, rastrexos a pé de rúa, creación de bolsas de emprego ou intermediación laboral con empresas, entre outras. Ademais, faranse prospeccións de mercado periódicas para coñecer, a curto e medio prazo, as necesidades de mercado da zona e adecuar a formación das alumnas ás mesmas.

Así mesmo, en caso que a demanda o requirise, tamén se poría en marcha un clubEmprendemento para mulleres emprendedoras, interesadas no autoemprego, coa finalidade de poñer ao seu alcance as medidas, coñecementos e axudas necesarias para crear o seu propio negocio ou empresa.     _mg_0981

Para garantir o éxito e a viabilidade das novas accións traballaremos cóbado con cóbado cos departamentos de orientación laboral e desenvolvemento local ademais de continuar colaborando cos servizos sociais dos municipios implicados.

Inscricións

Os encontros levaranse a cabo na sede que a asociación Íntegro ten en Nantón e nos concellos que forman parte do programa PIMD Rural, co-financiado pola Secretaría Xeral de Igualdade da Xunta e o Fondo Social Europeo (FSE).
Pimd malpicaO prazo de inscrición para formar parte do noso clubEmprego abrirase mañá no Centro de Recursos de Nantón coincidindo co Día da Muller. Se estás interesada en participar ou desexas recibir información, non dubides en chamar ao 981 734 985 e contarémosche todo o que precises saber. Os primeiros encontros ceebraranse o 1 de abril en Íntegro e nos concellos de Malpica, Laxe, Ponteceso e Cabana. Anímate e participa!