post

A Diverescola encheu de inclusión e diversidade as aulas de infantil e primaria do CPI As Revoltas de Cabana

75 nenos e nenas participaron na xornada de sensibilización, incluída no programa Capacíta-T, que promove a asociación Íntegro

Os alumnos/as de infantil e 1º e 2º de educación primaria do CPI As Revoltas de Cabana de Bergantiños convertéronse esta mañá nos/as protagonistas dunha nova edición da Diverescola, unha iniciativa promovida por Íntegro, no marco do programa Capacíta-T, para achegar aos máis cativos/as a diversidade e a inclusión a través dos contos, o xogo e o entretemento.

Durante algo máis de dúas horas, as aulas do centro educativo mudaron o seu aspecto para converter os tradicionais pupitres en improvisados circuítos de obstáculos e os libros en leccións orais de vida e superación. A primeira hora da mañá, a nosa monitora de ocio e tempo de lecer Lucía Blanco e varios  usuarios/as da entidade, chegaron ao centro educativo cargados de historias e divertidísimos xogos infantís para desenvolver unha xornada de sensibilización, na que participaron 75 nenos e nenas que xa agardaban ansiosos/as e o comezo das actividades. 

Aínda que moitos/as aseguraron coñecer a persoas con diversidade funcional na súa contorna, moi poucos sabían do seu día a día. E para descubrilo, nada mellor que poñerse na súa propia pel. Os máis pequenos/as fixérono a través dun contacontos inclusivo con historias nas que os protagonistas suman capacidades a prol da diversidade. E os/as estudantes de primaria  puxeron a proba a súa habilidade e destreza cunha serie de xogos de obstáculos que debían sortear cos ollos tapados ou coa mobilidade reducida. Todos os/as participantes superaron con nota a actividade facendo gala da súa naturalidade e espontaneidade.  

Desde Íntegro queremos agradecer a colaboración de todo o alumnado e profesorado do centro durante o desenvolvemento da xornada e trasladarlles os nosos parabéns por promover con este proxecto unha aprendizaxe en valores e unha aposta pola educación inclusiva dende a infancia.


post

Máis de 100 estudantes de Ponteceso, Vimianzo e Zas protagonizan as últimas accións inclusivas de Íntegro

Onte 34 alumnos/as do IES Eduardo Pondal asistiron a unha charla sobre lesións medulares e 59 do CEIP San Vicenzo de Vimianzo desprazáronse ata Nantón para participar no Visítanos. Hoxe, a campaña de prevención aterrou no CPI de Zas  

Tras as vacacións de Semana Santa, a comunidade educativa da Costa da Morte volveu ser a protagonista de varios programas de sensibilización e normalización inclusiva postos en marcha pola asociación Íntegro para achegar a diversidade funcional aos nosos mozos e mozas. Así, entre onte e hoxe celebráronse varias actividades didácticas nas que participaron máis de 100 estudantes. Onte a campaña de prevención de lesións medulares chegou ata as aulas de 4º da ESO do IES Eduardo Pondal de Ponteceso mentres que o Centro de Recursos de Nantón acollía unha nova edición do Visítanos, na que participaron preto de 60 nenos e nenas do CEIP San Vicenzo de Vimianzo. E hoxe, tocoulle a quenda ao CPI de Zas, onde se levou a cabo un encontro con estudantes de 3º e 4º da ESO para falar sobre as causas e consecuencias dunha lesión medular.

Estudantes de 4º da ESO do IES Eduardo Pondal de Ponteceso

Hoxe a campaña de prevención chegou ao CPI de Zas

 

 

 

 

 

 

 

O regreso ás aulas no IES de Ponteceso chegou con novidades, polo menos para os 34 alumnos e alumnas de 4º da ESO que participaron na campaña de prevención de lesións medulares, organizada pola entidade para concienciar aos máis novos/as sobre a necesidade de evitar sinistros, na súa maioría,  irreparables. E sobre as causas e consecuencias dos accidentes medulares xirou a xornada de onte, na que ademais de proxectarse o novo vídeo da campaña deste ano tamén se celebrou unha charla-coloquio cos estudantes, que se amosaron moi participativos/as e interesados/as, especialmente durante o relato de varias testemuñas reais, vítimas de lesións. Idéntica sesión se repetíu hoxe no CPI de Zas en presencia de 32 mozos e mozas de 3º e 4º de secundaria. 

Visítanos!

Quen marchou coa lección ben aprendida foi o alumnado de 5º e 6º de primaria do CEIP San Vicenzo de Vimianzo, tras o seu paso onte polas nosas instalacións de Nantón dentro do programa Visítanos, unha acción englobada no programa Capacíta-T dirixida a sensibilizar aos máis pequenos en materia de diversidade e inclusión. Tras abordar o significado destes conceptos, para descartar ideas preconcibidas e, ás veces, erróneas, proxectouse un vídeo explicativo titulado “Lo incorrecto”.

De seguido, os 59 nenos e nenas participantes dividíronse en varios grupos e comezaron a percorrer as instalacións para coñecer un a un os diferentes obradoiros do centro. Os xogos de habilidade da sala de logopedia deron paso á creatividade que empregaron para elaborar os xabóns de glicerina e as pulseiras de macramé. Os circuítos de mobilidade no ximnasio e o taller de cociña, onde elaboraron unhas saborosas rosquillas, foron dúas das actividades que causaron maior expectación, aínda que o máis sorprendente da xornada foi a creación dun “galiñófono” na aula de música, un novo instrumento musical feito con vasos de plástico e un pouco de fío.

Ao final, cada equipo expuxo as súas impresións sobre o aprendido no centro e entre todos/as confeccionaron un mural co máis destacado do seu paso pola entidade, no que seguro figuraban en primeiro término as palabras diversión e aprendizaxe.  Grazas a todos/as!

post

Visítanos recibe a 47 estudantes do CPI As Revoltas

Os talleres de artes manuais e cociña tiveron gran aceptación entre os alumnos/as do centro educativo de Cabana

Esta semana o Centro de Recursos de Nantón volveu a abrir as súas portas para acoller unha nova edición de Visítanos!, unha actividade educativa incluída no programa Capacíta-T que está dirixida a concienciar e sensibilizar aos escolares en materia de diversidade e inclusión. Onte os/as protagonistas foron os alumnos e alumnas de 5º e 6º de primaria do CPI AS Revoltas de Cabana que, xunto aos nosos usuarios e usuarias, gozaron dunha xornada moi didáctica, lúdica e chea de curiosidades.

As preguntas comezaron case nada máis chegar. A primeira hora da mañá as aulas de Íntegro comezaron a encherse de alumnos/as coas pilas ben cargadas e a lección aprendida, como xa demostraron durante a xuntanza de grupo que tivo lugar antes de dar comezo a visita polas instalacións. Aínda que case todos/as aseguraron coñecer a persoas con discapacidade, a maioría recoñeceu saber moi pouco sobre a realidade do seu día a día ou como relacionarse. E para amosárllelo proxectouse un vídeo titulado “Lo incorrecto” que, a través de situacións tan absurdas como divertidas, intenta cambiar a ollada da sociedade rompendo moitas ideas preconcibidas e falsos estereotipos.

O momento máis agardado por todos/as os/as participantes chegou coa visita aos obradoiros. Se o aprendizaxe é un proceso sinxelo a estas idades, xogando aínda o é máis. Porque iso é o que fixeron ao longo da mañá os 47 alumnos/as do centro cabanés. Entre risas e caras de asombro polos logros acadados, foron percorrendo as diferentes aulas e talleres.

 

 

 

 

 

Actividades

Entre as actividades preferidas dos/as estudantes destacaron as de artes manuais (elaboración de xabóns de glicerina e bixutería) e o taller de cociña. Nesta ocasión, ademais de descubrir habilidades que tiñan ocultas, os escolares levaron para a casa cadansúa pulseira de macramé, feita por eles/as mesmos/as, e a satisfacción de ter elaborado unhas riquísimas rosquillas que tamén tiveron ocasión de degustar. Na sala de logopedia e ximnasia as risas estiveron garantidas cos xogos de coordinación e equilibrio así como nas probas de mobilidade reducida amosando gran destreza sobre a cadeira de rodas e unha capacidade de empatía e adaptación sobresaínte.

Ao remate da xornada tocou valoración e exposición de todo o aprendido. E o resultado foi espectacular! Os/as estudantes confeccionaron un mural no que plasmaron as súas experiencias no centro e algún que outro segredo de taller que nos deixaron como recordo do seu paso polo centro e co que nos animaron a non deixar nunca de voar, e de soñar porque a diversidade, como podedes ver, é cuestión de capacidades. Parabéns chicos/as!

 

 

 

 

 

 

 

 

 

 

Desde Íntegro animamos a todos os centros educativos da Costa da Morte a participar nos diferentes programas educativos que temos en marcha (Diverescola, Visítanos, Prevención de lesións medulares) apostando por unha educación inclusiva, rica en valores e comprometida coa diversidade. Chama ao 981 734 985 e infórmate! 

post

Íntegro acudirá ao II Encontro Olímpico A Creba 2017

Coincidindo coa conmemoración do Día Mundial da Saúde Mental que se celebrará o día 10                                  

O vindeiro martes un grupo de usuarios/as de Íntegro viaxará ata a localidade de Noia para participar no II Encontro Olímpico A Creba 2017 organizado pola Asociación Pro Saúde Mental A Creba. Será unha xornada deportiva, reivindicativa e de convivencia á que asistirán numerosas entidades sociais da provincia de A Coruña coa finalidade de dar visibilidade ao deporte adaptado e fomentar a súa práctica entre as persoas con diversidade funcional.

Este ano os nosos usuarios e usuarias acoden á competición co intención de divertirse pero tamén de revalidar ou superar os once títulos acadados na edición anterior. Para elo, levan días adestrando duro nas nosas instalacións de Nantón e preparándose para afrontar as diferentes probas que terán que realizar: carreira en cadeira de rodas, brille, xogos tradicionais (corda, cadeira), tiro, equitación e circuíto a cegas.

 

O acto de apertura dará comezo cun desfile inaugural, previsto para as 10:50h, no que cada asociación participará portando a súa bandeira oficial e que, no noso caso, foi elaborada por nós mesmos/as. De seguido, iniciarase a competición, que se prevé difícil e moi concorrida, e na que os/as nosos/as representantes terán que medirse ante os equipos de Adismisbur, Amicos, Ambar, Misela e A Creba.

Probas

Na carreira en cadeira de rodas poderán participar dous xogadores por entidade (con ou sen mobilidade reducida). O percorrido realizarase en zig-zag ata o medio da pista. Cando queden tres persoas disputarase a final.

En Brille disputaranse dous partidos: usuarios/as e monitores/as. Os equipos estarán formados por xogadores de diferentes agrupacións elixidos por sorteo. A duración máxima será de 15 minutos.

Xogos populares: Corda ( 4 xogadores por asociación) e cadeira (3 membros por equipo).

A proba de equitación será, sen dúbida, unha das máis divertidas xa que os/as xogadores/as deberán de superar, cun pau de fregona a modo de cabalo, un percorrido de obstáculos no menor tempo posible.  Cuestión de habilidade e moita rapidez!

Na modalidade de tiro tamén haberá dúas probas de agudeza visual e boa puntería. Ademais do tradicional tiro de disco, os participantes terán que facer gala da súa habilidade para encestar unha pelota en varios cubos con distintos diámetros e a diferentes distancias. Gañará quen máis puntos acade.

No circuíto a cegas participarán 4 usuarios/as por agrupación, dous cos ollos tapados e dous con eles destapados, como acompañantes. A proba consiste en guiar aos compañeiros/as polo percorrido de obstáculos e realizalo no menor tempo posible.

Xa pasadas as 14h procederase á entrega de medallas aos gañadores/as e, a continuación, celebrarase un xantar popular.

Desde Íntegro queremos desexarlle moita sorte aos nosos deportistas e confiemos en que corran igual ou mellor sorte que o ano anterior. Pese a levar os deberes feitos e ben preparados “a sorte está botada e que gañe o mellor”, como se soe dicir nestes casos. O que si temos asegurado é unha xornada de deporte, diversión e moi boa compañía xunto ao resto de entidades e compañeiros/as.

Grazas á Asociación A Creba por convidarnos un ano máis e parabéns pola iniciativa. Moita sorte cracks!

 

post

Estudantes do CEIP Labarta Pose de Baio percorren en Íntegro o camiño da diversidade

39 alumnos/as de 5º e 6º de primaria participaron esta semana nunha nova edición de Visítanos! 

O pasado martes recibimos coas portas abertas, e os brazos tamén, a un grupo de alumnos e alumnas do CEIP Labarta Pose de Baio (Zas) nunha nova edición de Visítanos!, unha actividade formativa destinada a educar, concienciar e capacitar aos máis pequenos/as en materia de diversidade, incluída no programa Capacíta-T. Un total de 39 nenos e nenas de 5º e 6º de primaria percorreron as instalacións de Nantón, acompañados polos seus mestres/as e os nosos usuarios/as e traballadores/as, decididos/as a coñecer de preto o noso día a día e descubrir algunhas das actividades que se realizan nos obradoiros do Centro Ocupacional e do Centro de Día.

E foi precisamente nos talleres que visitaron ao longo da mañá onde xurdiron algunhas das preguntas máis curiosas relacionadas coa inclusión social e laboral das persoas con diversidade funcional. Moitos/as deles/as recoñeceron posuír ideas preconcibidas e en materia de discapacidade e comprometéronse a aportar o seu gran de area para camiñar con paso firme cara unha sociedade máis inclusiva, xusta e igualitaria onde todos e todas teñamos os mesmos dereitos e as mesmas oportunidades.

Durante a súa estancia en Íntegro, os alumnos/as tiveron tempo de pasar polo ximnasio e comprobar en primeira persoa o que custa manterse en forma na sala de fisioterapia: bicicleta elíptica, cinta de correr, traballo de musculatura,….todo vale cando se trata de gañar en benestar e saúde. Tamén amosaron gran interese na aula de informática e na de artes manuais onde puxeron en práctica algúns consellos dos nosos usuarios/as. A confección de pulseiras de macramé foi unha das actividades máis aplaudidas polos rapaces/as xunto co obradoiro de cociña, no que realizaron unhas riquísimas galletas de manteiga. Pero un dos momentos máis alegres e divertidos tivo lugar no departamento de logopedia durante a sesión de risoterapia onde aprenderon a importancia de rir e de rirse de si mesmos/as para gañar en felicidade e optimismo.

Hidroponía

Xa nos invernadoiros, os/as estudantes foron testemuñas dunha excelente masterclass sobre cultivos hidropónicos, un método innovador que tamén empregamos en Íntegro utilizando-en vez de terra- un medio acuoso e os nutrientes necesarios para proporcionar alimento ás plantas. Tras a explicación dos nosos técnicos, seguida con gran entusiasmo e expectación, a curiosidade dos nenos/as deu paso á imaxinación cunha interminable batería de preguntas para as que non sempre había fácil resposta.

Como xa é costume, houbo xogos con barreiras para poñer a proba a destreza dos alumnos/as superando obstáculos sobre unha cadeira de rodas e poñéndose, por uns intres, no lugar das persoas con mobilidade reducida. Finalmente, compartimos as experiencias vividas ao longo da xornada e as súas impresións sobre o centro. E, coma sempre, deixáronnos sen palabras. Agora, todos/as teñen máis claro que a diversidade é cuestión de capacidades, non de disCpacidades. Para nota!

Grazas pola visita. Ata a próxima!

post

Íntegro pon voz a 25 anos de historia

Directivos, fundadores, socios, familiares e usuarios/as protagonizaron un emotivo evento  repleto de discursos, interpretacións, imaxes, música e humor

Apenas pasaban uns minutos das 12 do mediodía cando o auditorio municipal de Cabana de Bergantiños comezou a brillar con luz propia grazas á palabra. E a primeira voz con nome foi a de Dora Mato, unha usuaria da asociación Íntegro, que arrincou os aplausos das máis de 200 persoas alí congregadas cun emotivo poema escrito por ela mesma para conmemorar 25 anos de loita e de superación en favor das persoas con diversidade funcional.

De seguido chegou a quenda do noso presidente Adolfo López Baña. A súa intervención non deixou indiferente a ninguén e arrincou as primeiras bágoas dun público entregado e moi emocionado ao lembrar os precarios pero ilusionantes comezos da asociación que “nestes 25 anos foise caracterizando pola constancia, o compromiso, o esforzo, os ideais, a valentía e a actitude de moitos homes e mulleres que apostaron por un proxecto, sentaron as bases e levantaron os pilares necesarios para unha sociedade inclusiva”, destacou ao tempo que recalcou que “ o decisivo para min é que logo destes 25 anos Íntegro existe e medrou, o que quere dicir que era necesaria e foi aceptada”.

No acto estiveron presentes moitos dos alcaldes e edís dos concellos da Costa da Morte

Tras unha detallada viaxe pola historia da entidade dende as súas orixes en novembro de 1991 nas I Xornadas dos Minusválidos” na Casa dos Veciños do Couto (Ponteceso), organizadas pola Asociación Monte Blanco, López Baña salientou a transformación social e cultural levada a cabo nas últimas décadas xa que “o minusvalismo imperaba en cada mirada, xesto, palabra, nas compras e no papel”. Así, subliñou o importante papel que xogaron a formación e a promoción laboral a través de programas como EcoEmprego (Cogami), Íntegro Xardinería e Medio Ambiente ou a creación da empresa de economía social +Porvir Xestión Social, creada en 2013. Finalmente,  Adolfo López tamén tivo palabras de agradecemento para as institucións públicas polo seu permanente apoio e colaboración e, moi especialmente, para os concellos da Costa da Morte “que cada vez están máis volcados na concesión de servizos coas entidades de iniciativa social da comarca”.  Pero antes de rematar, aproveitou a presenza do conselleiro de Política Social para lembrarlle que “a accesibilidade e a autonomía persoal son de suma importancia en toda Galicia pero no rural axudarán a que non se desvaneza día a día porque, neste asunto, facemos falta todos” recalcou.

Intervencións

Silvestre Couto moderou unha charla con “históricos” de Íntegro para falar sobre os seus inicios

Silvestre Couto (Tesoureiro), Rafael Varela (A Mundiña) e Mario Blanco (A Pesqueira), foron algunhas das voces históricas da entidade que describiron sobre o escenario os duros pero divertidos comezos: as primeiras reunións, as viaxes, as ilusións e os proxectos dos inicios como o desfile de moda Ponte Moda 1993. Anécdotas que deron paso aos eloxios e loanzas do presidente de COGAMI e COCEMFE, Anxo Queiruga, que exaltou a labor desempeñada por Íntegro “sendo capaces de facer realidade un soño sen perder nunca o rumbo”. Na mesma liña, o alcalde de Cabana, José Muíño, transmitiu a súa admiración, respecto e gratitude polo traballo e o legado que deixa a asociación Íntegro. Isto facíao sentando sobre unha cadeira no escenario “para estar a vosa altura” mentres se desculpaba “por non ter feito máis pola inclusión das persoas con diversidade”.

Anabel pronunciou un dos discursos máis emotivos da xornada

Anabel Castiñeira, secretaria da asociación, e Ramón Porteiro, membro da directiva e pai dun usuario, deron voz ás súas vivencias, cargadas de sentimentos e sensibilidade. Primeiro foi Anabel relatando a súa vida como muller con disCapacidade, formación, traballo, autonomía e independencia. E despois, Ramón foi o encargado de dar a coñecer o papel das familias a través da súa propia, e o traballo tan importante que desenvolve o Centro de Recursos, plasmado coa proxección dun vídeo sobre o seu funcionamento. De seguido, patrocinadores/as e responsables das empresas colaboradoras recibiron xunto aos alcaldes dos diferentes concellos da Costa da Morte unha placa conmemorativa como agasallo polo seu apoio e implicación no desenvolvemento de programas inclusivos. Así, o resto de oradores/as tamén foron obsequiados ao remate das súas intervencións ao igual que a responsable da Área de Benestar da Deputación da Coruña, Ánxela Franco, que lembrou a figura de Domingos Dosil- ex-alcalde de Muros con tetraplexia- como defensor da igualdade e dos dereitos das persoas con diversidade.

O conselleiro Rey Varela foi agasallado cunha placa conmemorativa

Pola súa banda, o conselleiro de Política Social, José Manuel Rey Varela, foi o encargado de pechar a quenda de intervencións cun discurso no que falou de futuro e avogou por “seguir sumando esforzos para erradicar as barreiras e as dificultades que na actualidade aínda teñen estas persoas, máis aínda en contornos rurais onde o acceso a determinados servizos é máis dificultoso que nas cidades” e “darlle un impulso social a Galicia, con máis sensibilidade, novas políticas e máis recursos”, concluíu. Xunto a el tamén estaban Ovidio Rodeiro, delegado territorial da Xunta na Coruña, e o deputado popular Aurelio Núñez ademais dos rexedores de Malpica, Coristanco, Ponteceso e Laxe acompañados dos edís de A Laracha e Vimianzo, entre outros.

Os usuarios e usuarias protagonizaron divertidas actuacións

Usuarios e usuarias  

Todas as voces que se oíron onte no salón de actos do auditorio de Cabana brillaron con luz propia. Unhas emocionaron, outras comprometéronse e algunhas ata desvelaron as súas intencións de futuro. Pero foron as dos nosos usuarios e usuarias as que encheron de humor, maxia, enxeño e alegría un escenario que vibraba cada vez que saían a presentar a algún convidado/a, a conversar sobre as melloras do Centro de Día e do Centro Ocupacional ou a relatarnos as súas experiencias persoais, algunhas tan románticas como a do noivado de Toni e Jessi.  Ao final, a música invadiu o salón e todos/as despediron o evento cantando e bailando porque como reza un dos nosos lemas #omellorestáporvir.

O restaurante A Mundiña serviu o aperitivo que se degustou na Escola de Vela de Cabana

Ao rematar os actos de conmemoración, os asistentes desprazáronse no tren turístico, cedido polo Concello de Cabana, ata as instalacións da Escola de Vela para desgustar un exquisito aperitivo elaborado polo restaurante A Mundiña e gozar das incribles vistas do estuario do Anllóns. Un agasallo para os sentidos dos/as comensais e un broche de ouro para 25 anos de vida. A por outros 25 máis!

Grazas a todos e a todas por participar!

post

Íntegro celebra o seu 25 aniversario cunha ollada ao pasado e un ceno ao futuro

Entre as autoridades convidadas figura o conselleiro de Política Social, José Manuel Rey, e a responsable de Benestar da Deputación da Coruña,  Ánxela Franco

A asociación Íntegro celebrará mañá o seu 25 aniversario cun emotivo acto cargado de lembranzas e simbolismos. A historia da asociación  comezou a escribirse logo dunhas xornadas sobre discapacidade, organizadas pola agrupación Monte Branco no Couto (Ponteceso), e á que se foron sumando centos de homes e mulleres valentes, loitadores/as e decididos/as a cambiar a sociedade para defender os dereitos das persoas con diversidade funcional e contribuír a acadar a súa plena inclusión social, cultural e laboral. Mañá, moitos deses homes e mulleres anónimos/as que encheron de ilusión, esperanza, ánimo e fortaleza as páxinas da nosa vida, superando barreiras e alcanzando metas, serán os verdadeiros e merecidos/as protagonistas da xornada.

MaisPorvir ofrécense servizos de mantemento de xardíns e mobiliario urbano

Entre os preto de 200 convidados/as ao acto estarán os socios/as, familiares, usuarios/as, directivos/as, amigos/as, veciños e veciñas que fixeron posible esta longa andaina e que, de seguro, volverán a emocionarse recordando o pasado pero coa ollada posta nun futuro repleto de oportunidades e de cambios como os que experimentamos ata o día de hoxe, con máis de cincocentos socios/as e a apertura ao emprego social, a través da creación de MaisPorvir Xestión Social, ou promovendo programas de formación e inserción laboral para mulleres con disCapacidade no Rural (PIMD Rural) para lograr o seu empoderamento na sociedade. Pasos necesarios e imprescindibles para a consecución dunha vida autónoma, inclusiva e de calidade.

Ánxela Franco con usuarios/as de Íntegro durante a súa visita a Nantón

Autoridades

Por outra banda, ao acto tamén acudirán numerosas autoridades políticas de ámbito local, provincial e autonómico e unha ampla representación da vida social e económica da Costa da Morte. Así, xa confirmaron asistencia o Conselleiro de Política Social, José Manuel Rey Varela; a responsable da área de Benestar da Deputación da Coruña, Ánxela Franco, e o presidente de COGAMI e COCEMFE, Anxo Queiruga ademais de varios responsables municipais das comarcas de Bergantiños, Soneira e Fisterra.

A celebración dará comezo ás 12h no auditorio municipal de Cabana de Bergantiños coa lectura dun poema a cargo dunha usuaria de Íntegro e a intervención, a continuación, do presidente da asociación, Adolfo López Baña. A partir de aí abrirase o telón e dará comezo un fantástico espectáculo no que participarán autoridades e moitos/as dos protagonistas da historia da entidade. Sobre o escenario os testemuños e as vivencias persoais irán dando paso aos discursos, os proxectos, a música, os vídeos e o humor sen esquecer as palabras de gratitude nun acto de homenaxe que promete emocións e sentimento de principio a fin. E para mostra, un dato moi significativo! Sabiades que o lugar escollido para celebrar o 25 aniversario foi a primeira sede oficial de Íntegro?

A partir das 13:30h, servirase un aperitivo na Escola de Vela de Cabana que promete ser unha auténtica experiencia para os sentidos e deixará moi bo sabor de boca entre os asistentes. Sen dúbida, un broche de ouro a unha celebración de altura. Porque 25 anos non se cumpren todos os días! Agardámosvos a todos e a todas!

post

Estudantes de primaria e secundaria do CPI Cabo da Area de Laxe achéganse á diversidade con Íntegro

Mentres que os alumnos e alumnas de 3º e 4º da ESO participaron na campaña de prevención de lesións medulares, un grupo de 3º ciclo de primaria protagonizou a última edición de Visítanos!  

Ambas accións están enmarcadas no programa Capacíta-T, dirixido a sensibilizar e concienciar aos escolares en materia de diversidade e inclusión

Cada vez son máis os centros educativos da Costa da Morte que se suman ás campañas de concienciación sobre diversidade e inclusión promovidas pola asociación Íntegro dentro do programa Capacíta-T. Esta semana o protagonista indiscutible, e por partida dobre, foi o CPI Cabo da Area de Laxe. Se os estudantes de secundaria participaron nunha charla-coloquio enmarcada na campaña sobre a prevención de lesións medulares, ao día seguinte, os/as de primaria protagonizaron unha nova edición do programa Visítanos! nas nosas instalacións de Nantón (Cabana).

IMG_5511Por unha banda, un total de 44 estudantes de terceiro ciclo de primaria do CPI Cabo da Area desprazáronse onte ata o noso Centro de Recursos para coñecer a fondo o seu funcionamento e achegarse ao día a día das persoas con diversidade funcional, compartindo unha xornada de vivencias e emocións xunto aos nosos usuarios e usuarias.

_MG_5598

 

Divididos en varios grupos, os escolares realizaron un longo percorrido polo centro para visitar os diferentes departamentos e descubrir cales son as funcións que desempeña cada un deles. Outra das actividades que levaron a cabo dentro do programa de sensibilización consistiu na realización de varios obradoiros ocupacionais nos que participaron moi activamente seguindo as indicacións dos nosos monitores/as e usuarios/as.

_MG_5619

Cociña, estimulación cognitiva, informática, xestión económica ou rehabilitación física foron algúns dos cursos que espertaron maior interese entre os nenos/as pero, sen dubida, un dos momentos máis divertidos tivo lugar na área de logopedia, onde aprenderon a superar barreiras a golpe de imaxinación e moitas risas. O taller de artes manuais volveu a causar gran expectación entre os/as estudantes, que tamén fixeron gala da súa destreza e creatividade para elaborar pezas de bixutería ou orixinais xabóns de glicerina.

_MG_5528

Tras unha xornada moi enriquecedora e chea de boas sensacións, o profesorado comprometeuse a dar continuidade, xa no colexio, ao noso programa de sensibilización coa posta en común das experiencias vividas no centro co obxectivo de compartilas co resto do alumnado e fomentar así o seu compromiso social.

la foto 5

 

Prevención de lesións medulares na ESO

Por outra banda,  máis concienciados/as quedaron tamén os alumnos e alumnas que cursan 3º e 4º da ESO neste colexio laxense tras recibir a visita, un día antes (o martes), de Adolfo López Baña e David Pombo, presidente e vogal, respectivamente, de Íntegro. A sesión teórica deu comezo cunha animada charla-coloquio sobre a prevención das lesión medulares e a importancia de evitar prácticas de risco en praias, piscinas ou accidentes de tráfico, principais causantes na maioría dos casos. Os poñentes, que tamén relataron as súas propias experiencias, incidiron especialmente nos danos irreparables que causan este tipo de lesións e a importancia de evitalos.

Así mesmo, os/as estudantes amosáronse participativos/as e moi interesados/as en coñecer as dificultades de vivir sobre unha cadeira de rodas. E que mellor maneira de sabelo que subíndose a unha delas! Iso foi o que fixeron no pavillón do centro educativo, ao final da xornada, para comprobar a complexidade de desprazarse ou sortear obstáculos coa mobilidade reducida. Coma sempre, houbo quen sorprendeu facendo gala dunha incrible destreza e gran capacidade de adaptación.

la foto 4

la foto 2

 

 

 

 

 

 

Grazas a todos e a todas por participar! Vémonos na seguinte!

post

Íntegro celebrará o día 4 dúas asembleas xerais de socios/as e o seu tradicional cocido popular

Ao xantar, que dará comezo ás 14:30h, poden asistir todas as persoas que o desexen previa reserva de praza

A asociación Íntegro celebrará o vindeiro sábado, 4 de marzo, dúas asembleas xerais-unha ordinaria e outra extraordinaria- ás que están convocados/as todos os socios e socias da entidade. Ditas xuntanzas, aprobadas pola xunta directiva o pasado 11 de febreiro, terán lugar no Centro de Recursos de Nantón (Cabana de Bergantiños) a partir das 11h.

A xornada dará comezo coa asemblea ordinaria, prevista para as 11h en primeira convocatoria e 11:30h en segunda. A relación de asuntos a tratar desenvolverase de acordo á seguinte orde do día:

  1. Lectura e aprobación, se procede, da acta anterior.cartel-asamblea-xeral
  2. Actividades levadas a cabo no ano 2016.
  3. Estado contable do ano 2016 e a súa aprobación, se procede.
  4. Actividades e orzamentos para o ano 2017, e a súa aprobación, se procede.
  5. Rogos e preguntas.

A continuación, procederase á celebración da asemblea xeral extraordinaria na que se inclúen os seguintes asuntos na orde do día:

  1. Lectura e aprobación, se procede, da acta anterior.
  2. Modificación dos estatutos.
  3. Baixa e alta dun vogal da Xunta Directiva.
  4. Rogos e preguntas.

IMG_6321Segundo establecen os estatutos vixentes, as persoas que desexen participar nas reunións exercendo o seu dereito de voz e voto deberán estar ao corrente no pago da cota anual correspondente ao exercicio 2017, que se pasará ao cobro o vindeiro día 27. En caso de non ter o pago domiciliado deberán formalizar o ingreso, á maior brevidade posible, no propio centro ou ben nas seguintes contas bancarias, facendo constar o nome do socio/a + cota anual 2017.

ABANCA              IBAN ES03 2080 0075 0330 4000 2407

LA CAIXA             IBAN ES42 2100 5710 8802 0001 3166

Xantar

UnhIMG-20160305-WA0025a vez rematadas as asembleas, e como xa ven sendo habitual por estas datas, procederase á degustación dun cocido nas instalacións do centro ao que poderán asistir todas as persoas que o desexen. O prezo do xantar será de 10€ para os/as socios/as e de 15€ para o resto de comensais. Debido a que se trata dun espazo reducido o aforo será limitado, polo que se recomenda aos interesados/as que realicen as súas inscricións o antes posible chamando ao 981 734 985, de luns a venres en horario de  9 a 17h, ou desprazándose ata as nosas oficinas situadas en A Pedra, nº 30 – Nantón (Cabana de Bergantiños).

Ademais de gozar dun saboroso e abundante menú, ao que non lle faltarán ningún dos ingredientes típicos destas datas de Entroido, taIMG-20160305-WA0030mén haberá música, baile e moita troula coa celebración, a partir das 14h, dunha sesión vermú que encherá de ritmo unha xornada que promete ser divertida e moi entretida en compañía de familiares e amigos/as. Ao longo da tarde haberá moitas máis actividades e algunha que outra sorpresa. Non podes faltar!

post

A Secretaria Xeral de Igualdade visita Íntegro para asistir á presentación do PIMD Rural 2016-2017

Susana López acudirá o vindeiro luns á firma dos novos convenios de colaboración coas entidades locais  

A Secretaria Xeral de Igualdade da Xunta de Galicia, Susana López Abella, visitará o vindeiro luns o Centro de Recursos de Íntegro para asistir, xunto aos alcaldes e representantes dos concellos de Cabana,  Ponteceso, Malpica e Laxe, á presentación do novo Punto de Intervención para Mulleres con Diversidade Funcional no ámbito Rural (PIMD Rural) 2016-2017, co-financiado polo ente autonómico e o Fondo Social Europeo (FSE). Ao remate, realizarase un percorrido polas instalacións para coñecer de primeira man os diferentes obradoiros ocupacionais.

IMG_20160308_121417

Sinatura do primeiro convenio de colaboración cos 4 concellos participantes

O acto dará comezo ás 12h coa exposición do balance relativo ao período 2015-2016, no que se analizarán polo miúdo os resultados obtidos durante o primeiro ciclo do PIMD Rural, no que 108 mulleres- prioritariamente con disCapacidade- se beneficiaron das accións formativas levadas a cabo nos catro municipios adheridos ao plan coa finalidade de erradicar a discriminación e a desigualdade de oportunidades mediante o desenvolvemento de actividades que facilitan o empoderamento das mulleres e reforzan o seu papel no ámbito rural. Ademais, daranse a coñecer outros datos de interese relacionados coa formación, o emprego e o número de intervencións realizadas.

A continuación, procederase á firma dos novos convenios de colaboración do PIMD Rural 2016-2017 coas entidades locais. Na grafico-todossinatura estarán presentes alcaldes e representantes dos municipios de Malpica, Laxe, Ponteceso e Cabana, que renovan así o seu compromiso cun dos colectivos sociais máis desfavorecidos.

Coa posta en marcha desta segunda etapa, que terá unha duración dun ano, reforzaranse os puntos de intervención municipais posibilitando traballar, man a man, cos servicios sociais de base, axentes de emprego e orientadores laborais co obxectivo de dar continuidade á labor de inclusión laboral e social das mulleres do rural, especialmente das que están en situación de vulnerabilidade e centrándonos nas máis desfavorecidas, como son as que teñen algún tipo de diversidade funcional.

IMG-20160308-WA0016

A xornada rematará cunha visita de todos os asistentes polas instalacións de Nantón que estará protagonizada polos nosos usuarios e usuarias xa que serán os encargados/as de dar a coñecer o traballo que desempeñan día a día tanto nos obradoiros do Centro de Día como do Centro Ocupacional.