Arquivos do Autor: Asociación Íntegro

post

Íntegro volve ás aulas cunha nova edición da Diverescola

Publicado en por

Tras case dous anos de inactividade pola pandemia

O CEIP Plurilingüe San Vicenzo de Vimianzo será o primeiro destino desta iniciativa, incluída no programa Capacíta-T, para a achegar ao alumnado de infantil e primaria da Costa da Morte a diversidade e a inclusión a través do xogo e o entretemento

Tras un período de inactividade de case dous anos debido á COVID-19, a asociación Íntegro porá en marcha a vindeira semana unha nova edición da Diverescola, unha iniciativa promovida pola entidade de Nantón, no marco do programa Capacíta-T, para achegar aos máis cativos e cativas da Costa da Morte a diversidade e a inclusión a través do xogo e o entretemento. A primeira saída da nova campaña terá como destino o CEIP Plurilingüe San Vicenzo, de Vimianzo.

O martes 25 terá lugar a primeira xornada de sensibilización, na que participarán un total de 69 nenos e nenas de 4 a 6 anos. Desde primeira hora da mañá, desenvolveranse diferentes actividades lúdicas arredor dun “contaconto guiado”. Ademais da lectura e e posterior interacción sobre o conto, abordarase a temática a través da técnica do “muralismo” para intercambiar ideas e afianzar conceptos relacionados coa inclusión e a diversidade.

O mércores 26 será a quenda do alumnado de 1º e 2º de educación primaria. Neste caso, os pupitres darán paso aos circuítos de obstáculos para acoller unha actividade denominada “xogamos coas barreiras”. Trátase de realizar un circuíto de mobilidade en cadeira de rodas por determinados espazos do colexio e un percorrido estacional sensorial, que lles axudará a sensibilizarse e empatizar coas dificultades. Así, a través do xogo, poderemos reflexionar sobre as barreiras físicas, sociais e mentais que existen na sociedade e como podemos superalas.

Educación en valores

Diverescola é unha acción de sensibilización desenvolvida por Íntegro, no marco do programa de capacitación da sociedade Capacíta-T, encamiñada a educar en valores ao alumnado de infantil e primaria dos centros educativos da Costa da Morte, co obxectivo de formar, xunto ao profesorado, persoas comprometidas coa diversidade funcional, romper as barreiras mentais e propiciar a normalidade e a inclusión real. A través do xogo e o entretemento, os máis cativos/as terán a oportunidade de reflexionar e flexibilizar sobre crenzas erróneas, xa consolidadas, en torno ás persoas que son diferentes e/ou teñen diferentes capacidades, ata darse conta das súas potencialidades, aprender a respectalas e descubrir que a riqueza e a importancia da diversidade. Deste xeito, promoveremos actitudes positivas no alumnado para combater a discriminación e a desigualdade.

post

O 2022 arrinca con dúas novas profesionais en Íntegro

Publicado en por

A contratación das novas traballadoras forma parte do programa de cooperación entre a Xunta de Galicia e as entidades sociais sen ánimo de lucro

O 2022 arrinca con boas novas para Íntegro grazas ao programa de cooperación entre a Xunta de Galicia e as entidades sociais sen ánimo de lucro, que subvenciona a Consellería de Emprego e Igualdade. Ao noso centro de Nantón súmanse agora dúas novas traballadoras (1 logopeda e 1 Técnico de atención sociosanitaria) coas que pretendemos mellorar a atención individualizada aos nosos usuarios e usuarias.

Pilar Noya (esqda.) e Nieves García (drta.)

Pilar Noya será a responsable do servizo de logopedia, desde o que se realizan numerosas accións encamiñadas a mellorar a calidade de vida dos nosos usuarios e das súas familias. Entre as súas funcións destacan a detección, identificación, avaliación e tratamento dos trastornos da comunicación, linguaxe, fala, voz e deglutición ademais da realización de intervencións adaptadas ás necesidades de cada usuario/a, posta en marcha de actividades grupais, participación na elaboración dos Plans Individuais de Atención Social (PIAS) e asesoramento familiar sobre os exercicios realizados para mellorar a súa xeneralización.

Pola súa banda, Nieves García incorpórase como técnico de atención sociosanitaria para proporcionar apoio educativo e social ás persoas usuarias do Centro de Día e colaborar no desempeño das actividades da vida diaria do Centro de Recursos. Benvidas, chicas!

post

Aberto o prazo de inscrición para o curso de limpeza de superficies e mobiliario en edificios e locais

Publicado en por
  • Trátase dunha acción formativa, dirixida a persoas con disCapacidade e en situación de desemprego, que vén de conceder a Fundación ONCE, e co-financiada polo Fondo Social Europeo (FSE), no marco do Programa Operativo POISES 2014-2020
  • O obradoiro, de 284 horas de duración, dará comezo o vindeiro día 26 e prolongarase ata o 12 de maio

Dentro da convocatoria de axudas económicas a proxectos de reforzo da empregabilidade de persoas con discapacidade “UNO a UNO”, a asociación Íntegro vén de recibir unha subvención para a realización dunha acción formativa adaptada sobre “limpeza de superficies e mobiliario en edificios e locais”, no marco do Programa Operativo POISES 2014-2020, co-financiado pola Fundación ONCE e o Fondo Social Europeo (FSE).

O curso, que terá unha duración de 284 horas, incluirá formación teórica específica en materia de limpeza así como as correspondentes sesións prácticas en empresas. Ademais, levarase a cabo un programa de aprendizaxe transversal e de apoio na posterior busca activa de emprego para promover a inclusión laboral deste colectivo. As clases, que se desenvolverán nas instalacións de Íntegro, darán comezo o vindeiro 26 de xaneiro e rematarán o 12 de maio.

As persoas interesadas en participar nesta formación deberán ter recoñecida unha discapacidade igual ou superior ao 33% e atoparse en situación de desemprego e/ou inactividade. Os interesados/as poderán obter máis información chamando ao 981 734 985, de luns a venres en horario de 09.00 a 17.00 horas, ou enviando un mail ao enderezo electrónico info@integro.es. O 10 de xaneiro arrincarán as primeiras entrevistas do proceso de selección de candidatos/as. Non o deixes pasar!

post

Íntegro recompilará material plástico da campaña de Nadal do CCA Carballo para o novo taller de reciclaxe de Diversiplás

Publicado en por
  • Máis de 20.000 bolas de plástico serán utilizadas como materia prima para a fabricación de novos produtos no taller de aproveitamento e tratamento de residuos que se porá en marcha en Íntegro en 2022
  • Este Nadal, o Centro Comercial Aberto tamén contribuirá á inclusión laboral de persoas con discapacidade mediante a contratación de dous traballadores da nosa empresa de xestión social MáisPorvir   

O proxecto medioambiental da asociación Íntegro para a reciclaxe e transformación de residuos plásticos Diversiplás, + diverso – plástico segue avanzando no seu camiño cara unha Costa da Morte máis sostible, máis diversa e con menos plástico. E, desta volta, faino captando novos colaboradores e participando nun fermoso proxecto no que a ilusión, a maxia e, por suposto, a reciclaxe serán co-protagonistas xunto cos máis pequenos da casa.

Grazas ao Centro Comercial Aberto de Carballo e á súa campaña de Nadal, nas vindeiras semanas teremos a oportunidade de recompilar un gran volume de residuo plástico. Nada menos que máis 20.000 bolas, as mesmas que agocha no seu interior a casiña de Nadal,  que o CCA ten instalado na Praza do Concello para repartir ilusión, sorrisos e premios entre a cativada. Para conseguilas, bastará con mercar este Nadal nos 76 establecementos comerciais e de hostalaría adheridos á campaña. A cambio, cada cliente recibirá un vale que os e as máis peques da casa poderán cambiar por unha tirada na casiña e obter así unha bola con premio seguro e directo.

 

Unha vez obtido o agasallo, os envases poderán ser depositados nun tragabolas para o seu almacenamento e posterior utilización como materia prima no taller de aproveitamento e reciclado, que imos poñer en marcha en 2022 co apoio e asesoramento de Adrián Coira, de Just Fair Enough, para a creación de novos produtos con diferentes utilidades (chaveiros, macetas, mobiliario urbano….). Neste senso, desde a asociación Íntegro queremos solicitar a colaboración de toda a cidadanía para lograr recompilar o maior número posible de bolas, e darlles así unha segunda vida a través da reciclaxe.

Diversiplás é un proxecto de economía circular, xurdido ao abeiro do proxecto Tanza, dirixido á recuperación e valorización de residuos plásticos. Coordinado pola asociación Integro, conta co apoio do Galp Costa da Morte e o financiamento do Fondo Europeo Marítimo e de Pesca, a través da Consellería do Mar da Xunta de Galicia.

 

 

 

 

 

 

 

Máis Porvir Xestión Social

Ademais da súa aportación ao proxecto medioambiental Diversiplás, este Nadal o CCA de Carballo contribuirá tamén á inclusión social e laboral de persoas con diversidade funcional. Dous traballadores de Máis Porvir Xestión Social, a empresa de economía social da asociación Íntegro, serán os encargados de repartir ilusión, sorrisos e premios entre a cativada que se achegue ata a casiña de Nadal do CCA.  Unha colaboración que pon de manifesto  o compromiso e a implicación do Centro Comercial Aberto de Carballo cos colectivos sociais máis desfavorecidos. Grazas e parabéns pola iniciativa!

 

 

 

post

Manifesto Día Internacional e Europeo das Persoas con Discapacidade

Publicado en por

Pola culminación da primeira reforma social da Constitución Española

Con motivo do Día Internacional e Europeo das Persoas con Discapacidade, que cada ano se celebra o día 3 de decembro, no correspondente ao ano 2021, o movemento social da discapacidade agrupado de xeito unitario en torno ao CERMI fai público o seguinte

M A N I F E S T O

Nas sociedades democráticas, a Constitución é a máxima e superior expresión do ordenamento xurídico; a que establece os dereitos e deberes da cidadanía; a que ordena a convivencia social conforme ós principios e valores da liberdade, a igualdade e o pluralismo; a que define e asegura as formas democráticas de goberno e a que regula o funcionamento dos poderes públicos, que deben estar ó servizo da comunidade, promovendo o ben común. As persoas con discapacidade, como parte valiosa da familia humana e das comunidades sociais e políticas nas que esta se organiza, deben ter reflexo nas Constitucións dende un enfoque esixente de dereitos humanos, que
garanta a súa inclusión, participación e benestar, sen discriminacións ni relegacións de ningún tipo.

A Constitución Española de 1978, vixente na actualidade, incorporou expresamente ás persoas con discapacidade ao seu texto, dedicándolles o artigo 49, o que representou un gran avance por canto este grupo social, tantas veces omitido e desconsiderado ó longo da historia, gozaba de visibilidade, sendo relevante aos efectos da promoción e a protección constitucionais dos seus dereitos.

A pesar de ese logro -poucas Constitucións no mundo nese momento tiñan presente as persoas con discapacidade-, tras mais de corenta anos dende a aprobación da Constitución Española, o seu artigo 49 precisa unha renovación, porque nin a terminoloxía empregada nin o contido están alienados ca visión plena de dereitos humanos, que é o único abordaxe admisible na relación ca discapacidade. A Constitución de 1978 mellórase a si mesma, afonda e estende os seus principios, valores e mandatos se actualiza a súa mirada
sobre as persoas con discapacidade.

Reforma do art.49

Consciente desta necesidade de cambio, o movemento social da discapacidade leva anos propoñendo a reforma do artigo 49 da Constitución Española, pasando a ser a primeira de contido nitidamente social do Texto Legal máximo nas máis de catro décadas de vixencia. E isto, sempre co maior dos consensos políticos e sociais, pois os dereitos das persoas con discapacidade son un elemento do acervo compartido das sociedades democráticas avanzadas, que serven para superar as disputas e as fracturas
tan estendidas hoxe na vida política.

Tras anos de esforzo do sector social da discapacidade, auténtico promotor deste proceso de modificación constitucional, na primavera deste ano 2021 chegaba por fin as Cortes Xerais, remitido polo Goberno de España, un proxecto de reforma do artigo 49 da Constitución Española, que agarda ser debatido e tramitado, se reúne as maiorías reforzadas precisas cando se trata de cambios no texto constitucional, para resultar aprobado e entrar finalmente en vigor.

A reforma proposta, produto de debates parlamentarios, sociais e académicos previos, que acadaron un elevado grado de coincidencia, desterra expresións ferintes e insostibles por mais tempo para referirse as persoas con discapacidade (“diminuídos”) e dota dun novo contido o artigo con arranxo aos conceptos, valores e propósitos que hoxe configuran un entendemento e práctica apropiados dos dereitos e deberes das persoas con discapacidade, incluídas as mulleres e nenas, a quen nomean expresamente. O clamor cidadán que alentou esta reforma -que en si e por si mesma é unha mellora do país, que eleva a calidade de texto constitucional e o seu nivel de esixencia ética, política e xurídica, ao comprometerse máis intensamente cos dereitos, a inclusión e o benestar con esa parte da diversidade social que son
as persoas con discapacidade- debe verse necesariamente acompañado por tódalas forzas políticas con representación parlamentaria, mediante a expresión dun apoio firme e claro.

Ante este fito social, que despois de moitos avatares e dilacións hoxe é mais real e próximo ca nunca, dende o movemento CERMI, no Día Internacional e Europeo das Persoas con Discapacidade, reclamamos a todos os partidos políticos, e en especial a aqueles que mostraron reticencias, que se sumen, co seu respaldo, intervindo no Parlamento para perfeccionar o texto de partida, á primeira reforma social da Constitución Española, que vén da man das persoas con discapacidade e das súas familias, e que non pretende senón facer do noso país un proxecto máis suxestivo e decente de vida en común.

3 de decembro de 2021

post

Íntegro amplía o seu cadro de persoal coa contratación dunha psicóloga

Publicado en por

Xunto coa educadora e a traballadora social, a nova profesional prestará atención especializada a persoas usuarias e familias da entidade ademais de desenvolver o servizo de atención psicolóxica do PIMDRural

A asociación Íntegro das Persoas con Diversidade  Funcional da Costa da Morte vén de ampliar o seu cadro de persoal coa contratación dunha psicóloga que prestará atención especializada, tanto de xeito individualizado como en intervencións grupais, a persoas usuarias e familias, ademais de desenvolver o servizo de atención psicolóxica do Punto de Intervención para Mulleres con Diversidade do Rural (PIMDRural).

Desde este mes de novembro, a entidade de Nantón suma así unha nova profesional ao seu equipo, integrado xa por unha educadora e unha traballadora social. Entre as súas novas funcións destaca a súa participación na planificación, elaboración, desenvolvemento e avaliación dos Plans Individuais de Atención (PIA) das persoas usuarias, así como ofrecer asesoramento e apoio psicolóxico ás familias que o precisen. Así mesmo,  facilitará ás persoas profesionais de atención directa, pautas e estratexias de intervención sobre os problemas emocionais ou de conduta detectados, ademais de informar, de xeito individualizado, sobre a evolución e necesidades de cada usuario/a aos familiares que así o soliciten.  Outra das facetas a desenvolver será a de  participar na elaboración de proxectos que requiran dun estudo psicolóxico para avaliar posibles beneficios sobre as persoas usuarias.

PIMD Rural

Desde o ano 2015 a asociación Íntegro conta cun Punto de Intervención para Mulleres con Diversidade do Rural (PIMDRural). Trátase dun programa de atención personalizada e especializada,  co-financiado pola Consellería de Emprego e Igualdade a través da Secretaría Xeral de Igualdade e o Fondo Social Europeo (FSE), dirixido a mulleres en situación de especial vulnerabilidade que residen na zona rural da Costa da Morte.

Durante o período comprendido entre o 1 outubro de 2020 e o 30 de setembro de 2021, desde o PIMDRural prestouse atención a preto de medio centenar de mulleres, a maioría delas con disCapacidade. Entre os servizos máis demandados polas usuarias destacan o de información e orientación sobre recursos singularizados de atención e asesoramento persoal e social, así como apoio directo  nas relacións con outras entidades, organismos e servizos que lles faciliten ás persoas o seu proceso de integración social; mediación  intercultural e/ou familiar, a través da posta en marcha de habilidades persoais e sociais básicas ou de competencias para a mellora da empregabilidade, e orientación laboral e de acompañamento na busca de emprego, así como a prospección do mercado de traballo, a intermediación e a titorización laboral. Ademais do acompañamento, ás persoas usuarias tamén dispoñen dun servizo de transporte gratuíto para os seus desprazamentos.

 

Por outra banda, desde o Punto de Intervención para Mulleres leváronse a cabo numerosos acompañamentos na xestión de trámites administrativos, xestións económicas, citas médicas, etc. O desenvolvemento de accións formativas, dirixidas a grupos reducidos para ofrecer unha atención máis personalizada e adaptada ao protocolo COVID, é outro dos piares fundamentais para acadar a igualdade de oportunidades. Neste último ano, leváronse a cabo diversos talleres relacionados coas habilidades sociais e pre-laborais, autocoidado e hixiene persoal, e o manexo do teléfono intelixente, un dos máis demandados polas persoas usuarias do servizo.

 

 

 

post

Once usuarios/as de Íntegro desfrutan xa dos beneficios da natación terapéutica

Publicado en por

Tras o parón provocado pola COVID-19, a entidade de Nantón recupera esta actividade, que se desenvolve unha vez á semana na piscina municipal de Cabana desde hai máis dunha década

Logo de máis dun ano de inactividade pola COVID-19, un grupo de usuarios e usuarias do noso Centro de Día e do Centro Ocupacional volve desfrutar dun novo curso de natación terapéutica na piscina municipal de Cabana co obxectivo de mellorar a súa coordinación, equilibrio e autonomía persoal, pero tamén para desfrutar dunha morea de xogos e actividades no medio acuático.

Desta volta, once persoas con discapacidade benefícianse xa desta actividade deportiva complementaria, enmarcada no programa de saúde e benestar do departamento de Fisioterapia da asociación Íntegro, que utiliza a auga cun fin correctivo e preventivo. De feito, a súa práctica está recomendada por médicos e especialistas como terapia continuada, especialmente, no caso de persoas con diversidade funcional e/ou pacientes con algún tipo de doenza lumbar ou lesión medular.

Como en anos anteriores, a duración do curso de natación terapéutica será de outubro a xuño, unha vez á semana (xeralmente os venres). Acompañados/as de dúas monitoras de apoio e unha profesora especializada en natación adaptada, o alumnado non só aprenderá a nadar, senón que tamén realizará exercicios de estimulación para contribuír a mellorar o seu funcionamento muscular e articular. Ademais dos innumerables beneficios físicos, as sesións repercutirán positivamente na adquisición dunha maior auto-confianza, independencia e capacidade de socialización.

Coa finalidade de adaptar as clases ás necesidades individuais de cada alumno/a e prestar unha atención totalmente personalizada, o número de participantes é sempre moi reducido. Este ano, son once os beneficiarios/as deste programa que, cada edición, renova o alumnado para garantir a participación de todos/as e cubrir así a demanda existente.

Agardamos que este curso dea resultados tan positivos como en anos anteriores e que os nosos usuarios/as gocen dunha experiencia saudable e divertida a partes iguais. Non perdades de vista os seus progresos. Quen sabe se este pode ser o comezo dunha prometedora carreira deportiva. Permanecede ben atentos/as!!

 

post

Diversiplás camiña con paso firme cara a sostibilidade da Costa da Morte

Publicado en por
  • Tras a excelente acollida que tiveron as actividades do programa de sensibilización levadas a cabo en setembro e no que participaron preto de 75 persoas
  • Trátase dun proxecto coordinado por Íntegro, co apoio do Galp Costa da Morte, e financiado polo Fondo Europeo Marítimo e de Pesca (FEMP), a través da Consellería do Mar

Co obxectivo de promover a redución do lixo mariño e a mellora da biodiversidade, desde a inclusión social e laboral das persoas con diversidade funcional, o pasado mes botou a andar na Costa da Morte Diversiplás, + diverso – plástico: un proxecto dirixido á recuperación e valorización de residuos plásticos derivados da actividade marisqueira e da pesca, xurdido ao abeiro do Programa Tanza e coordinado pola asociación Íntegro, co apoio do Galp Costa da Morte, e o financiamento do Fondo Europeo Marítimo e da Pesca (FEMP), a través da Consellería do Mar da Xunta de Galicia.

Precisamente, as persoas usuarias de Íntegro, principais protagonistas desta iniciativa, foron as encargadas de dar os primeiros pasos dun camiño que xa avanza cara unha contorna máis sostible e respectuosa co medio ambiente. Así, coincidindo coa chegada de setembro, arrincaron as primeiras accións de dinamización deste 2021, destinadas a  sensibilizar sobre a presenza e o impacto do lixo nas zonas costeiras- tanto en praias como no litoral e nas zonas marítimo-pesqueiras- e poñer en valor as utilidades da reciclaxe do plástico, a través da creación de proxectos de economía circular.

Setembro en ruta

A primeira saída á rúa non podía ter unha estrea mellor. Dentro da programación das Festiletras (Ponteceso), o pasado día 3 Divesiplás participou no Festival da Ciencia do Couto (Festiciencias) para dar a coñecer o proxecto ambiental entre a rapazada e activar a futura rede de colaboracións cos centros de ensino da contorna para a recollida de plásticos, previsto para os vindeiros meses. Ademais, ao longo da xornada, realizouse unha actividade demostrativa do proxecto Precius Plastic a cargo de Adrián Coira, colaborador de Diversiplás e experto en reciclaxe de residuos, que nos deixou moi claro o proceso de transformación dos refugallos. A segunda actividade, celebrada en Nantón o mércores 8, consistiu na realización dun taller informativo sobre o proxecto, dirixido á comunidade de usuarios/as de Integro, xunto cunha actividade de sensibilización centrada nos plásticos e o seu impacto no medio mariño.

Na segunda quincena de setembro continuaron as saídas pola Costa da Morte para achegarse ao traballo que realizan os e as profesionais do mar, que tamén colaboran no proxecto. A primeira parada tivo lugar o día 15 no peirao de Corme (Ponteceso) para manter un encontro coa Asociación de Redeiras Illa da Estrela de Corme, na que participaron preto de 30 persoas. Tras visitar o taller e coñecer de primeira man a súa actividade diaria, centrada na reparación de redes e os novos usos, tamén se interesaron por coñecer outros aspectos derivados do seu traballo como enfermidades e riscos laborais, asociacionismo, etc. Así mesmo, a diversificación do sector, orientado á confección e deseño de pezas artesanais, complementos de moda, deseño de lámpadas e/ou accesorios deportivos acaparou a atención dos/as participantes que non dubidaron en preguntar pola nova vida que lles dan aos útiles de pesca, contribuíndo así ao coidado do planeta e á súa propia reciclaxe laboral.  A xornada rematou co compromiso de futuras colaboracións na recollida e clasificación de refugallos, e algúns usuarios/as probando sorte na confección de nós con cabos de rede.

 

A visita á Agrupación de mariscadoras da Confraría de Camariñas, realizada o pasado día 22, puxo o punto e final ao programa de actividades previsto para este mes e no que participaron preto de 75 persoas. Nunha xornada moi interesante e participativa, as persoas usuarias achegáronse ao mundo do marisqueo para coñecer a profesión máis de preto e desde dentro, da man dunha das integrantes da asociación (zonas, capturas, especies, mareas,…).

Tamén se abordou a presenza de lixo mariño no medio, en boa parte derivado da actividade pesqueira, e a importancia de reciclar e manter limpo o litoral. De feito, a limpeza e recollida de refugallos que se ía desenvolver na zona de marisqueo, trasladouse á terra, ao merendeiro de Ariño, onde se procedeu á recollida dunha gran cantidade de microplásticos, que levaban días na zona e que o vento estaba empuxando cara o mar. Con paciencia e un traballo case artesanal, recolléronse un a un todos os restos de plástico, diversos fragmentos, papeis e moitas cabichas.

Futuras accións

Tras esta primeira fase de divulgación e sensibilización, en Diversiplás seguimos a traballar desde a inclusión para unha Costa da Morte máis sostible. E entre os novos obxectivos figuran xa a posta en marcha dunha Rede de entidades colaboradoras (centros de ensino, concellos e confrarías da Costa da Morte) para a xestión de puntos de recollida de plásticos e a creación dun taller para o aproveitamento e tratamento dos residuos plásticos obtidos do mar, que terá que agardar ao 2022.

Permanecede atentos/as porque moi pronto volveremos con máis actividades, moitas novidades e un montón de sorpresas que vos van encantar. E se o que che apetece é  colaborar e participar nas accións de sensibilización que levamos a cabo, non perdas a oportunidade de facelo. Chama xa ao 650 961 649 e únete ao noso equipo!

               

post

Preto de 50 mulleres en situación de vulnerabilidade foron atendidas no PMIDRural

Publicado en por
  • O Punto de Intervención para Mulleres con Diversidade do Rural, promovido por Íntegro e co-financiado polo Fondo Social Europeo ( FSE) ao abeiro do programa operativo FSE Galicia 2014-2020, prestou atención a 50 mulleres en 2021 
  • Ademais de accións formativas presenciais, ofrecéronse servizos de asesoramento, orientación laboral e acompañamento a colectivos de especial vulnerabilidade 

O Punto de Intervención para Mulleres con Diversidade Funcional do Rural (PIMD Rural) vén de pechar o período 2020/2021 cun balance máis que positivo e un notable incremento de usuarias con respecto aos últimos anos. Dende o pasado 1 de outubro foron atendidas case 50 mulleres, a maioría delas con disCapacidade e residentes en concellos rurais con baixa densidade de poboación, neste servizo promovido pola asociación Íntegro e co-financiado pola Secretaría Xeral de Igualdade de Xunta de Galicia e o Fondo Social Europeo (FSE), ao abeiro do programa operativo FSE Galicia 2014-2020, para fomentar a igualdade de oportunidades e contribuír a diminuír a tripla discriminación á que se ven sometidas moitas das beneficiarias deste programa.

Ao longo do presente exercicio, realizáronse numerosas actuacións encamiñadas á orientación e información sobre recursos singularizados, de atención e asesoramento persoal e social, así como de apoio directo nas relacións con outras entidades, organismos e servizos para facilitar ás persoas usuarias a súa integración social. De feito, un dos máis demandados nos últimos meses foi o acompañamento na realización de trámites básicos en oficinas como o SEPE, administracións públicas ou en entidades bancarias.

 

 

A orientación laboral e o seguimento na busca de emprego foi, xunto coa realización de actividades para a mellora da empregabilidade, unha das prestacións máis requiridas polas usuarias, que tamén precisaron do noso servizo de mediación familiar e/ou intercultural.

Programa formativo

Por outra banda, a posta en marcha de novas accións formativas contribuíu notablemente a promover a igualdade de oportunidades e diminuír a discriminación á que habitualmente están sometidas as mulleres con disCapacidade e/ou en situación de especial vulnerabilidade. Neste último ano, levamos a cabo con gran éxito varios talleres sobre habilidades pre-laborais, habilidades sociais e domésticas, resolución de conflitos, auto-coidado, manexo do teléfono móbil e busca activa de emprego en época de pandemia, este último con excelentes resultados xa que logramos a inserción laboral de varias persoas usuarias en diferentes empresas da contorna.

Logo dun ano de sesións online, puidemos retomamos as clases presenciais, con grupos reducidos para garantir as medidas hixiénico-sanitarias e prestar unha atención personalizada e á medida das necesidades de cada participante.

Se es muller con ou sen discapacidade, resides no rural e queres recibir formación ou precisas apoio e/ou asesoramento, non dubides en poñerte en contacto con Íntegro chamando ao 981 734 985 ou enviando un mail a info@integro.es.

post

Un taller informativo e varios encontros con profesionais da pesca e o marisqueo arrancan a programación de Diversiplás, + diverso – plástico

Publicado en por
  • As primeiras actividades levaranse a cabo todos os mércores do mes de setembro
  • Trátase dun proxecto coordinado por Íntegro, co apoio do Galp Costa da Morte, e financiado polo Fondo Europeo Marítimo e de Pesca (FEMP), a través da Consellería do Mar

A asociación Íntegro vén de poñer en marcha un novo proxecto medioambiental denominado Diversiplás, + Diverso – Plástico, encamiñado á recuperación e valorización de residuos plásticos derivados da actividade marisqueira e da pesca, que ten como protagonistas a diferentes axentes sociais da Costa da Morte co fin de promover e fomentar o crecemento económico, a inclusión social, a creación de emprego e o apoio á empregabilidade,  así como a mobilidade laboral nas comunidades costeiras e de interior, dependentes da pesca e a acuicultura.

Baixo o lema “Traballando dende a inclusión para unha Costa da Morte máis sostible” agóchase unha declaración de intencións coa que a entidade que preside Adolfo López Baña pretende promover a integración social das persoas con diversidade funcional preservando o medio natural da Costa da Morte e xerando novas dinámicas de colaboración para a posta en marcha de proxectos de economía circular.

O proxecto, que se desenvolverá en dúas anualidades (2021-2022), contempla varias liñas de actuación, entre as que destacan para este ano a posta en marcha dun programa de asesoramento e formación no tratamento e valorización de plásticos, dirixido ás persoas usuarias de Integro, en colaboración coa Escola de Enxeñería da Universidade da Coruña e a iniciativa Fair Enough, e outro de sensibilización, orientado ao sector do mar, para mellorar as boas prácticas e reducir a presenza de plásticos na súa actividade. Mentres, para  2022,está programada a creación dun taller para o aproveitamento e tratamento de residuos plásticos obtidos do mar e a dinamización dunha Rede de entidades colaboradoras (centros de ensino, concellos e confrarías da Costa da Morte) para a xestión de puntos de recollida de plásticos.

As primeiras citas

Ao longo do mes de setembro levaranse a cabo as primeiras citas do programa previsto para o 2021, que terán como destinatarios aos principais protagonistas do proxecto. Logo de participar o pasado día 3 na feira científica das Festiletras (Ponteceso), mañá 8 as instalacións de Nantón (Cabana) acollerán a celebración dun taller informativo para dar a coñecer polo miúdo o proxecto Diversiplás ás persoas usuarias e aos profesionais dos nosos centros de Día e Ocupacional. Xa na 2ª quincena, promoveranse varios encontros entre os nosos usuarios/as e os diferentes traballadores/as do sector marisqueiro e da pesca da Costa da Morte. O primeiro será o mércores 15 coas redeiras Illa da Estrela, de Corme, mentres que o día 22 visitarán unha zona de marisqueo acompañados/as polas mariscadoras da Agrupación da Confraría de Camariñas, que concluirá coa limpeza do areal de Ariño.

Deste xeito, ademais de promover a redución do lixo mariño e a mellora da biodiversidade e dos ecosistemas mariños, potenciaremos a autonomía e a inclusión das persoas con discapacidade no ámbito social e laboral.

Diversiplás é un proxecto, xurdido ao abeiro da iniciativa Tanza, que está coordinado pola asociación Íntegro e conta co apoio do Galp Costa da Morte e o financiamento do Fondo Europeo Marítimo e de Pesca (FEMP), a través da Consellería do Mar da Xunta de Galicia.